~SUN~ Pictures, Images and Photos

الأربعاء، 3 ديسمبر 2008

نسمه كنابل و الفشل الذريع ..


الأخت norahaty أثارت قضيه مهمه جدا فى تعليقها على بوست الأمل ألا و هو نجاح بعض المشاريع و فشل البعض الآخر رغم تشابه الظروف للأثنين !!
الحقيقه هذا الموضوع كان بيشغل بالى من فتره بعد ملاحظتى سقوط و فشل الكثير من مشاريع الأصدقاء رغم توفر كل الظروف المهيئه للنجاح .. الحقيقه كمان أن هذا الفشل كان شديد الوجع للبعض خاصة لمن فقد تحويشة عمره فى مشروعه اللى كان بيأمل أن يكون سند له فى المستقبل أو على الأقل أن يكون بمثابة اٍستثمار مضمون للقرشين اللى بحوزته ..
طيب .. تعالوا كده بهدوء نحلل ما يحدث علما بأنى لست من رجال الاٍقتصاد و لا الاٍستثمار أصلا و لكن على الأقل سأروى بعض مشاهداتى فى السوق و أرجو ممن لديه الخبره فى عالم المشاريع الصغيره – لاحظوا أنى بأتكلم عن المشاريع الصغيره – اللى لا تتعدى رأس مالها مثلا ال مية ألف جنيه أن يفيدنا برأيه لعل الآخرين يستفيدوا من علمه و خبرته ..
- أول شىء لاحظته و بيكون من أهم أسباب فشل المشاريع هو التقليد .. يعنى مثلا أنا لاقيت فلان فتح Cyber و بيكسب منه كويس ما شاء الله و ربنا فتحها عليه أقوم أنا أقلده و أفتح Cyber أشمعنى هو مادام مشروعه فلح يبقى لازم أنا كمان مشروعى حبفلح !!
لأ طبعا .. مش شرط .. لأن فلان عنده خبره و أنا ما عنديش .. عنده خبره فى الكمبيوترات و النت و الصيانه و الشبكات و البرامج و بيزنس الكمبيوتك بصفه عامه .. لكن أنا آخر خبرتى فى الكمبيوترات هى فتحها و قفلها و تنزيل الويندوز و الشات .. حأبقى فى الحاله دى محتاج موظفين لتشغيل النت كافيه و موظف صيانه و سكرتيره أو سكرتير لاٍستقبال العملاء و عامل تنضيف و حأشترى شهاده ويندوز لكل جهاز بالشىء الفلانى و شهادات لكل البرامج على كل الأجهزه برضو بالشىء الفلانى علشان ما أتحطش تحت أيد شرطة المصنفات و أقفل المكان فى كل حمله و أضيع وقت و أضيع زبون و يبقى شكلى وحش أوى و هم واخدين جهاز و لا أتنين و معاهم الموظف و على البوكس لو سمحت فى هدوء .. نضيف على كده مصاريف الدى اٍس أل و الكهرباء و الميه يبقى أنا خسرت أكيد خاصة لو أضفنا لكل ده قيمة الاٍيجار الشهرى للمحل و ده المصيبه الكبيره ..
قيسوا بقى على كده تشابه المشاريع و تقليدها فى مكان أو حيز محدود زى مثلا دياموند مول اللى فى 6 أكتوبر و اللى بيحتوى على 123 نت كافيه مما دفع أصحاب المحلات للتنافس الشرس حتى وصلت ساعة النت ب 1 جنيه !!!!!! يبقى حيكسبوا اٍزاى بقى بعد كل المصاريف السابق شرحها ؟
و طبعا كلنا شفنا هوجة محلات الموبيلات و السنترالات و محلات اٍتنين و نص و الحاجات اللى كده و أغلبه فشل للأسف الشديد ..
- السبب التانى لفشل أتخن مشروع فى رأيي هو القيمه الاٍيجاريه العاليه للمحل اللى بيتعمل فيه المشروع .. يعنى لما يبقى أقل اٍيجار لمحل 40 متر مربع فى مكان معقول نوعا ما 2000 جنيه شهريا و لا مبالغه منى فى هذا الرقم لأن دى الأسعار السائده حاليا .. يعنى مطلوب من صاحب المشروع أن يوفر يوميا حوالى 100 جنيه لسداد الاٍيجار الشهرى و الكهرباء و المياه فقط .. بخلاف مرتبات الموظفين و الضرائب و الصيانه و ما يستجد من مصاريف طارئه .. طيب ال100 جنيه دول قد يبدو للبعض أنه مبلغ تافه و ممكن يتجمع يوميا .. أيوه ممكن و لكن هل هيتجمعوا من صافى الربح و لا من رأس المال ؟؟ غالبا بيتجمعوا من رأس المال اللى المفروض أنه يتدور فى شراء بضائع جديده .. و صاحب المشروع برضو عاوز يصرف و ياكل فيبتدى برضو ياخد حته فى حته من رأس المال و يقول لك بكره أعوض !! يوم الوقفه حأعوض !! بعد أجازة شم النسيم حأعوض !! و هكذا .. و لا هو بيعوض و لا هو بيتنيل على عينه و شويه شويه المحل يبتدى يفضى و يضلم و البضاعه اللى بتنباع ما بيجيش غيرها لحد ما يتعثر فى سداد الاٍيجار و فواتير الكهرباء فيبتدى ياخد بضاعه بالآجل بشيكات و يبيع و يسدد فى الاٍيجار المتأخر و الكهرباء و يلابط مع أصحاب الشيكات لحد ما فى مره يتلط فى حكم حبس سنه يروح مصفى المحل فى 24 ساعه و هوبا للنبى يختفى و يبتدى رحلة لو حد سأل عليا قولى له مش موجود !!
- السبب التالت يا أخوانا فى فشل المشروع هو الاٍعتماد على الموظفين فى اٍدارته .. بمعنى أيه ؟ وحدوا الله و صلوا على حضرة الرسول اللى نطق الحصى بين كفوفه الطاهره و اللى بكت على فراقه النخله و اللى أدبه ربه فأحسن تأديبه زيدوه صلاه أصل الصلاه على حضرة النبى حلوه اللهم صلى و سلم وبارك عليك يا رسول الله ..
كنت بأقول بقى اٍن الاٍعتماد على الموظفين فى اٍدارة المشروع كفيل باٍفشاله اٍفشال ذريع ثلاثى الأبعاد زئبقى فتاك .. صعب أوى أوى أنك تلاقى موظف أو موظفه يبقى قلبهم على مشروعك و مالك زيك .. يا أما مش حييجوا فى الميعاد لو مافيش عليهم رقابه أو حيطفشوا الزباين لو أديتلهم جزاء أو خصم أو حيتلاعبوا فى الحسابات لو سبت لهم الدنيا سايبه و أطمنت أن فيه فى محلك أو مكتبك موظفين بيراعوه و سيادتك مريح فى البيت أو فى أجازه فى الساحل الشمالى .. أو حتلاقى فاتورة التليفون جايلك بالآلاف بتقولك تعالى اللالى اللالى يا حبيبى تعالى لالى طبعا ما هى الآنسه مروه اللى هى السكرتيره اللى تنشك فى لاباليبها عماله ليل و نهار مكالمات مع الواد هيثم و مع أخواتها و أمها و هكذا ...
- السبب الرابع هو الاٍهمال فى اٍمساك دفاتر محاسبيه تحت اٍشراف محاسب محترف مهما كان المشروع صغير لكن لازم ينحط فى الاٍعتبار أن المشروع حيكبر فى يوم من ذات الأيام و أن لو كانت البدايه غلط و مفركشه و منعكشه يبقى عمره ما حينظبط أبدا و لو انظبط حتفضل برضو فيه دايما حاجه غلط .. أنا عن نفسى كفلاح أروب و عقر بأعتبر تسجيل كل صغيره و كبيره بشكل منظم هو سبعين فى الميه من نجاح زرعتى و تجارتى بصفه عامه و قالوا زمان اللى يحسب الحسابات فى الهنا يبات .. يعنى يا صاحب المشروع أوعى تهمل فى تدوين حساباتك و تعتمد على عقلك و بس و ياريت يكون فيه محاسب يقوم عنك بالمهمه دى ..
- سبب قد يبدو للبعض غريب شويه و لكن بجد هو مهم جدا .. عارفين أيه ؟ تجنب ما يغضب الله فى مكان العمل و طبعا كمان خارج مكان العمل .. لكن بجد لو صاحب المشروع أرتكب ما يغضب الله فى المطرح يبقى يضمن كده أن الخراب المستعجل حيحل عليه باٍذن الله تعالى ..
- أهم حاجه بقى أوعوا تشغلوا البت نسمه كنابل فى أى مشروع بتعملوه و قد أعذر من أنذر هههههه

هناك 17 تعليقًا:

من غير عنـــوان يقول...

عمممممور

* كل ميّسر لما خلق له
* دوق الأول وبعدين خش على الشغل
* الحضور نصف النجاح
* حب اللي بتعمله
* عامل زباينك بكل مودة ممكنه
* لا تقلد الآخرين زي ماتفضلت وقلت

متهيألي دي أسباب أقدر أضيفها على الموضوع الممتاز اللي انت كتبته في البوت

شكلي كده أول تعليق ....

مع خالص أمنياتي بالنجاح

خمسة فضفضة يقول...

السلام عليكم ورحمة الله وبركاته

في رايي السبب الاول والاساسي في الفشل هو التقليد الاعمي لاي مشروع ناجح ، وفي الاخر تلاقي ميت واحد بيشتغل في نفس الحاجه وكلهم فاشلين
وعلي فكره دي من العلامات الصغري للساعه ( كثرة التجاره وانتشارها بين الناس )

اديك مثل علي كده مشروع فتح صيدليه الناس زمان كان كل همهم ان ولادهم يدخلوا طب عشان يبقوا دكاتره ولما لقوه مش جايب همه وان الصيادله بيكسبوا اكتر غيروا العطا علي الصيدله ، وشوف الاعداد المهوله اللي بتتخرج كل سنة( دفعتي اول عن آخر كانت 210 دلوقتي بالآلاف ) وكمية الصيدليات الفظيعه اللي بتتفتح ( من عشر سنين ماكانش جمبي الا صيدليه واحده دلوقتي بقوا حوالي سبعه ) وطبعا في الآخر ريت البيع قل والناس بقت بتتنافس منافسات غير شريفه وكل واحد عاوز يجذب اكبر عدد من الزباين لحد وصل الحال ان الصيدليه بقت مشروع فاااااااااااااشل ومش جايب همه

وقيس علي كده كل المشاريع التانيه زي السيبر والسنترالات واكسسوار الموبايل و الملابس الجاهزه ، كل المشاريع بقت فاشله وماعدش حاجه بتجيب همها
ولما حد يحاول يتجه لحاجات جديده ومفيده ومحتاجينها فعلا ( زي حضرتك كده ما حاولت تستصلح الصحراء) يلاقي مليون عفريت طالعينله من حيث لا يدري ولا يحتسب اشي ضرايب وسجل تجاري وعوايد ومجلس محلي وغيره لحد ما يزهق ومش بعيد يسيب البلد بحالها ويمشي

اما النقط التانيه ماعنديش كلام زياده حضرتك جبت الخلاصه
وزي ما بيقولوا المال السايب يعلم السرقه


هي مين نسمة كنابل .؟؟

سلام

أمل حمدي يقول...

كل عام وانت بخير يا عمرو

بص انا ها اقولك رأيي

بجانب كل الاسباب اللي ذكرتها وكلها صحيحة

الا ان المشرووع قد ينجح

ولكن السبب الرئيسي للفشل في هذه الايام وانا اعلم ان الكثير سوف يعترضون كلامي

السبب الرئيسي هو مصدر رأس المال

لو كان قرضا من البنك بفوائد ربوية

فاعلم انه لن يأتي من ورائه الخير ابدا

بل سيأخذ الحلال معه

والله المستعان

سبهللة يقول...

عمرو هى مدونتك مش كانت اتقفلت؟؟
عموما مبروك رجوعك
بالنسبة لموضوع البوست فيه مثل شعبى بيقول
الدكان جنب الدكان والرزق عالرحمن
يعنى مثلا كان قدام بيت امى محلين والاتنين لازقين فى بعض والاتنين سوبر ماركت
وكان واحد شغال نار وواحد فضل فاضى من الزباين لحد ما قفل نهائى
سبحان الله
دى أرزاق مقسمها ربنا

صبرني يارب يقول...

يعنى انا بتهيئلي الواحد يمضي تحت الكلام ده ويحطه عنده فى المدونه ؟؟

حضرتك بتهيئلي مركب عندنا سماعات فى البيت عشان الكلام ده كنا بنقوله عمن اول انا ورضا
هههههههههههههههههههههههه

طبعا طبعا كل الكلام الى قلته تمام ميه الميه

حكاية التقليد دي يا فندم بتخلينى هاولع فى اي حد يقولي هافتح سايبر او موبيلات والهم ده

الا مين البت نسمه كنابل دي ؟؟؟؟

وطبعا طبعا احنا شايفين الامرين من العماله

وبعد جهد جهيد وعشان احنا ربنا ساترها معانا ان اخو رضا وابن اخته حاليا شغالين معانا فى المحل

وبررررررضه رغم اخلاصهم وكل حاجه الا ان فى عدم وجود رضا فى المحل بيبقى طبعا كل حاجه مش مظبوطه

وانا نفسي بصراحه انزلهم انا باعتباري رئيس مجلس الاداره الى مش بيروح بس عارف كل حاجه عن الشغل الحمد لله

المهم برضه مين نسمه كنابل

فى كمان حاجه مهم احب اضيفها قبل ما امضي تحت البوست

ان الى معاه ميت الف جنيه بيقوم هووووووب رايح اي نشاط ما يعرفش به حاجه ومدبس نفسه فيه وحاطط فيه كل التحويشه ويبقى عامل بالظبط زي الى خبط راسه فى الحيط عشان يشوف الحيطه جامده ولا لا

انا رايي لازم يبدأ من اول المشوار

احنا لما حبينا ندخل سوق الادوات الكتابيه اقترحت على رضا انه ينزل لواحد من التجار الكبار معرفه واخد منه بضاعه ب 50 الف جنيه كانوا يمثلوا تقريبا ربع السيوله الى معانا وقتها بعد ما اشترينا عربيه نص نقل نص عمر وجهزناها

ولف رضا بالبضاعه دي على المحلات فى المنصوره واجوارها بعمليه تسمى مسح السوق

بنفسه رضا الى نزل قبل ما يجيب حد لف على الناس وعرف السوق شويه وحبه حبه بدأ يتعلم هو ويشترى من تجار ويتسك منهم عاااااااادي
بس طبعا السكه الصغيره مش زي الكبيره

وبعد حوالي 5 شهور من الحال ده اجرنا محل وبدأنا نشتغل جمله بكل حرص وراس المال بدأ يكبر شويه شويه والحمد لله تعالى مشروعنا كبر

اي نعم هو تحول من مشروع صناعي لتجاري بحت بس لسه عندي امل اننا ننتج اي حاجه من الحاجات الى بنستوردها

وبعدين صنية البيتى فور الى اتحرقت وانا باقرا البوست بتاعك واعلق عليه دي حسابها على مين ان شاء الله


كل سنه وانت طيب

عمرو يقول...

من غير عنوان
مرحبا يا صديقى و شكرا للزياره
أوافقك تماما فى اٍضافاتك و خاصة معاملة الزبائن بكل موده ممكنه و ده شىء بنفتقده كثيرا هذه الأيام

عمرو يقول...

خمسة فضفضة
بخصوص الصيدليات
لاحظت حاليا أنى لما بأدخل صيدليات فى أماكن راقيه كده مثلا زى هايبر وان مش بأحس أنى فى صيدليه الحقيقه .. بأحس أنى فى محل سوبر ماركت او ما شابه من غرائب البضائع اللى أصبحت تباع فى الصيدليات بغرض الربح السريع لتعويض الخسائر فى مبيعات الأدويه
و كمان أصبح أى واحد معاه قرشين يجيب خريج أو خريج صيدله و يفتح صيدليه بأسمهم و ياخد عليهم ورقة ضد !!
يعنى حاجات غريبه بنشوفها و مش لاقي لها مردود منطقى
نسمه كنابل (قنابل) هى كفيله الحقيقه باٍفساد أى مشروع فى دياموند مول هههههه

عمرو يقول...

ماما أموله
اٍزيك يا ماما ؟ كل سنه و أنتى طيبه
صدقتى و الله فىما قلتى .. قريب لى تعرض لموضوع القروض فخسر مشروعه الأصلى و مشروعه المعمول بمال القرض و شقته التمليك و كادت مراته أن تكون من نزلاء السجون لأنها كانت الضامنه له و حاليا هو هائم على وجهه من البلد دى للبلد دى حتى يسدد القرض و لا حول و لا قوة اٍلا بالله

عمرو يقول...

سبهلله
مدونتى مش أتقفلت لأ دى اٍختفت من الوجود فعملت مدونه تانيه بنفس الاٍسم بالعربى مع زيادة حرف على الاٍسم بالاٍنجليزى و على نفس الرابط القديم فأشتغلت و لكن ضاعت كل البوستات و الردود و ده لغز مش قادر أفهمه !!
السوبر ماركت بالذات يا سبهلله من المشاريع الاٍستقرابيه يعنى لو تحت بيتك سوبر ماركت و قدامه على الرصيف التانى سوبر ماركت حتروحى لمين ؟ بالتأكيد للى تحت بيتك لكت لو اللى تحت بيتك مثلا مش نضيف أو الناس اللى فيه مكشرين و مهاملتهم وحشه يبقى أكيد حتروحى للى على الرصيف التانى .. و ده غالبا اللى بيحصل لما محلين زى بعض بيفتحوا جنب بعض .. و شوفى الصاغه مثلا كل المحلات لزقه فى بعض و لكل محل رزقه ..

عمرو يقول...

صبرنى يا رب
ههههههه
ما هو كل الأفكار بتنبع من الحاله اللى ساريه علينا كلنا حاليا
اللى الأستاذ رضا عمله هو ده اللى أقصده بالظبط
مافيش مشروع ينجح غير لما صاحبه يكون بيمارس العمل فيه بنفسه و يكون بيشتغل بأيده فيه و يتعب لأكتر من كل اللى بيشتغلوا معاه ..
لكن اللى يقعد و عاوز يشغل قرشيناته بواسطة موظفينه لا يمكن حاينجح ..
نسمه كنابل أو نسمه قنابل دى يا ستى مسكت محلات مول دياموند واحد ورا التانى كل ما تشتغل فى محل بعد شهرين يحل عليه الخراب المستعجل زى ما بينت فى آخر سبب من أسباب الفشل فى البوست و رغم كده أصحاب المحلات الهبل برضو ما بيحرموش لحد ما بلغ عدد المحلات اللى طربقتها 14 محل منهم 3 محلات لأصدقائى شخصيا
صينية البتى فور ؟؟؟ و النبى بتعرفى تعملى بتى فور ؟؟ و لا يهمك خليها عليا يا أم خالد
ههههههه

أسامة وغيداء يقول...

موضوع جميل جدا والمفروض كل واحد يدور نفسه بالمجال اللي يناسبه.
وكل عام وإنت بخير

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .

موضوعك مهم جدا و اسبابك اكثر من مقنعه و لكن هناك علوم كثيرة تتكلم عن التسويق و الدعايه و قبلهم دراسة الجدويو من بنودها الكثيرة في البحث عن جدوي فتح مشروع و التنافس و استعاب السوق للسلعه او الخدمة المقدمة

و قبل كل هذا هناك اسباب اخري منها توفيق الله عز و جل مثلا بالحصول علي صفقة كبيرة بالصدفه تغيير كل التوقعات

تحياتى

Unknown يقول...

السلام عليكم ورحمة
الله تعالى وبركاته
بقى معقول انا اثرت كل هذا الحديث الشائق بالسطرين بتوعى فى التعليق!!
ياخبر ابيض!! موضوع حلو اوى ياأستاذ عمرو ربنا يوفقك يارب وارجع واقولك
ربنا عايز كده !!فى اى شىء هو عايز كده !!اعمل كل مافى وسعك وكله على اللى خلقك وخلقنى وخلق الناس كلهم .

عمرو يقول...

أسامه و غيداء
أهلا أهلا صباح الخير
أين أنتما بقالكم فتره مختفيان ؟ و كنت عاوز أطمن هليك يا أسامخ بعد الوعكه الصحيه اللى ألمت بيك و لعلك بخير الآن اٍن شاء الله

عمرو يقول...

أحوال الهوى
كل سنه و أنت و الأسره بصحه و خير يا رب
أيوه كلامك صح بالنسبه لدراسة الجدوى دى أنا فعلا نسيتها و أيضا الدعايه و التسويق مهمين جدا بس للأسف فيه حالة عشوائيه فى اٍنشاء و اٍدارة المشاريع عندنا
يعنلى اللى يطلع فى دماغنا نعمله يبقى يالا نعمله بدون لا دراسه و لا حاجه و ده طبعا من الأسباب المهمه جدا فى خسارة المشاريع
بس التجاره و السوق لا يمكن تعتمد على الصدفه فى الحصول على صفقه كبيره بالمصادفه لأن ضربات الحظ أنا معاك أنها بتحصل بس فين بقى ؟

عمرو يقول...

norahaty
أيوه الحقيقه أن كلماتك أثارت فى نفسى الرغبه و الحماس لكتابة هذا البوست بغرض المناقشه لعل حد يستفيد منه لو داخل على مشروع
و ربنا سبحانه و تعالى طبعا اٍرادته و مشيئته فوق كل شىء و ما علينا سوى أن نأخذ بالأسباب
تحياتى

شمس النهار يقول...

الموضوع شكله كده كويس بس مش هعلق عشان انا ماليش في المشاريع