الثلاثاء، 23 ديسمبر، 2008

النازعات غرقا ..


مساء الخير أعزائى المدونات و المدونين ..
عاملين أيه فى الجو المزعبب ده أبو التراب الأصفر و السحاب الأغبر و البرد المزهمر ؟ بصراحه جو كده بيفكرنى بالخماسين بس بزياده البرد اللى بيخللى الواحد منفوخ زى الكرنبه اللى طلبت الحش من كترية اللبس و البلوفرات اللى الواحد لابسهم بالذات لما يبقى أبن آدم من سكان مدينة 6 أكتوبر اللى هى فى الصيف أقل من مدينة القاهره 10 درجات حته واحده !! فما بالكم بالنهارده ؟؟
عانن عليا كده فى القعده البيتى الحلوه دى أحكى لكم عن موقف حصل لى أنا و الواد أبنى الشحط الوسطانى أصل عندى من صنف الشحوط 2 ده غير الواد الشيخ عبده الزغنن حبيب قلبى و آخر العنقود اللى أخواته الشحوطه الكبار لما بيحطوه فى دماغهم بأفتكر على طول اٍخوات سيدنا يوسف عليه و على نبينا الصلاة و السلام فأقوم أعدل بينهم على طول و أبين لهم المحبه و الود علشان ربنا عز و جل لما حكى فى قرآنه الكريم عن حكاية يوسف كان يقصد بيها أننا ناخد منها عبره و درس اٍلهى فى عدل المعامله بين العيال .. حكيم يا رب سبحانك جل شأنك ..

كنت بأقول أيه ؟؟
أيوه الواد الشحط الوسطانى و الشحط بالمناسبه فى لهجتنا بتدل على كل شاب ذكر داخل على العشرين كده و يكون طول بعرض و فرع و رخم و صدغ و عنده هوجه و دفعه و مستحلى عفيته و صوته الجحاشى ..
الواد اٍبنى بقى اللى هو الشحط الوسطانى كنت أنا و هو و أخواته بنصيف عمنول فى أجمل بلد فى الدنيا اللى هى راس سدر اللى بتطل على خليج السويس الساحر الباهر الغامض الهادىء الثائر المحروس بجبل عتاقه المهيب من ضفته الغربيه و بصحراء سيناء من ضفته الشرقيه ..
سارت الأمور كما ينبغى لها أن تسير و الحقيقه أستمتعنا تماما خاصة أننا أسرة سباحين نكاد نكون محترفين بالاٍضافه لكوننا كمان غطاسين و بنعرف اٍزاى نستمتع بالبحر زى ما قال الكتاب يعنى على رأى الاٍسكندرانيه نعومو وسط موج زى الجبال و لا نقولوش أحيه :))
حصل بقى فى يوم من ذات الأيام بعد الغروب بشويه و يعنى كنا خلاص بنلم العده و بنستعد لمغادرة الشاطىء أنى فجأتن كده سمعت صويت حريمى يفلق القلب و صريخ اٍستغاثه يصعب على الكافر صادر من جوه البحر اللى كان بينى و بينه حاجه كده قيمة 100 متر .. دققت شويه و لاقيت شبح أتنين بيقبوا و بيغطسوا فى الميه و بيصرخوا بجنون و كان الجو أبتدى يبقى ضلمه و حاجه ترعب و شوية ناس واقفين على الشط و هم كمان بيصرخوا و مش عارفين يعملوا أيه !! أصل طبيعة البحر فى خليج السويس غريبه حبتين حيث أن الميه وقت الغروب فى المنطقه دى بتعلى فجأتن من نص متر لحوالى 4 متر فى زمن بسيط لا يتعدى الخمس دقائق يعنى اللى مش واخد باله و واقف على الأرض جوه الميه ممكن قبل ما يطلع يلاقى نفسه تحت فى القاع و كل عام و أنتم بخير ..
أنا لسه بأدقق فى اللى بيغرقوا و اٍذا بيا ألمح الواد أبنى الشحط الوسطانى جاى جرى من الكافيتريا اللى على الشط و زى الفهد راح ناطط فى البحر المخيف ده اللى أمواجه بقت علو مترين و نص تقريبا وسط صريخ أم العيال و خالته و أخواته الصغيرين و راح رامى نفسه فى البحر و هاتك يا عوم زى اللنش أبو رفاصين ناحية الغرقى و لوحده من غير ما حد من اللى واقفين على الشط ينزل معاه ..
الصراحه يا أخوانا أنا قلبى كان حيقف لما شفت كده خوفا و فزعا على أبنى ثمرة فؤادى اللى شايفه قدام عينيا بيرمى روحه فى التهلكه و بدون ما أشعر بنفسى لاقيت روحى بأجرى وراه و أنا بأزعق بعلو حسى على عادة الشراقوه لما يغيثوا الملهوف علشان أطمنه : جايلك يا وله (بعد كده الواد قعد يضحك و يقول لى يا آبه أنت لسه فاكر نفسك فى الغيط !!) و رحت رامى نفسى وراه و أنا ربنا وحده اللى يعلم بمدى فزعى لأنى عارف اللى بيغرق ده لما بيصدق يلاقى حد ياخد بيده من الموت فبيهبش من حلاوة الروح فى اللى بينقذه و ممكن يسحبه معاه لتحت و يغرقوا جماعه لو اللى بينقذ ما لحقش نفسه و نتش الغريق ضربه على مناخيره تدوخه فيسهل السيطره عليه و سحبه من شعره فما بالكم بقى و دول غريقين مش واحد ..
على ما وصلت للمكان اللى كانوا فيه لاقيت الوله غطس و طلع من القاع أتنين ستات أم و بنتها الشابه و اللى حسبته لاقيته كانوا فى حالة هيستريا بعد ما شافوا الموت بعنيهم و هو قافشهم الأتنين من تحت باطهم لامؤاخذه و بقوا التلاته بيقبوا و بيغطسوا مع بعض .. رحت واخد منه البنت و سيبت له الأم و بقدرة الله المنجى العزيز طلعنا بسلام للشط بعد ما عرفنا نسيطر عليهم ..
و طبعا كل ده ما أخدش دقايق فى عمر الزمن لكن مرت عليا كأنها الدهر و ربنا من فزعى على أبنى و من الموقف ككل .. و بعد ما هدينا نفسنا و الناس عملوا لهم الاٍسعافات حيث أن القريه اللى اٍحنا فيها لا فيها مسعفين و لا غطاسين و لا اٍسعاف و لا هباب أزرق على عين اللى جابتهم يعنى اللى يفهم و اللى ما بيفهمش أتقلب دكتور و خبير اٍنقاذ غرقانين و حريف قبلة الحياه !!
بصيت للواد كده لاقيته قاعد بيبص لى و بيبتسم و قال لى : و بعدين يا آبويا فى شهامة الشرقاوه اللى حتودينا فى داهيه دى ؟؟
سكت و أنفاسى متلاحقه بشده من المجهود و التوتر ..
و بعدها بصراحه و على رواقه و لوحدنا أنفجرت فى الوله كبركان مخيف و فهمته مدى خطورة اللى عمله و أنه كان ممكن يفقد حياته بسبب هذه الشهامه الشرقاوى يبقى أيه اللى كان حيستفيده ؟؟
الواد بمنتهى البساطه قال : حتى لو كنت حأموت يا أبويا كنت حأبقى شهيد و كان يبقى اٍسمى أديت الواجب و نجحت فى الاٍختبار اللى ربنا حطنى فيه .. مش ده يا أبويا كلامك ليا أنت و عمتى طول الوقت ؟
بصراحه الكلمتين دول هدونى و خلونى أفكر مع نفسى كده فى الكلمتين البساط السهلين دول اللى الواد الشحط الوسطانى أفحمنى بيهم !! منين صحيح نقعد نربى فى العيال على الشهامه و المروه و الشجاعه و نسقط عند أول اٍختبار عملى ؟؟
طيب لو أنا مكانه كنت حأعمل أيه ؟؟ كنت حأفضل واقف كده على الشط زى اللى وقفوا متنحين و أسيب الحريم تغرق و لا كنت حأرمى نغسى فى الملتم زى الوله ما عمل ؟؟ مش عارف الصراحه .. يعنى سؤال محيرنى من وقتها و اللى حازز فى نفسى بالأكتر أنى لما رميت نفسى ورا الوله كان كل اللى فى ذهنى أنى ألحقه هو لو بعد الشر جراله حاجه ..
بس اللى كادنى بالأكتر بقى أن الواد الصدغ اٍبنى أشتهر فى القريه بعد العمله دى و بقى بطل قومى و بقت البنات اللى زى فتافيت السكر أصحاب البنت اللى كانت حاتغرق ييجوا يسلموا عليه و يضحكوا و يتصوروا معاه و ياخدوا نمرة موبايله و هىء و ما هيهىء و أنا و لا أكنى هنا و متجاهلينى يا أخوانا مع أنى أشتركت برضو فى اٍنقاذهم !!
اٍخص عليكم يا شعريتين يا بيض يا اللى أشعلتم الرأس شيبا ..

هناك 33 تعليقًا:

صبرني يارب يقول...

حرام عليك يا عمرو فطستنا من الضحك

وبعدين يااخي حرام عليك عمال تقر على الواد قول ما شاء الله وصلى على النبى كده

ما عدتش تقول ا لكلام ده على العيال يا شيخ حرام عليك ربنا يحميهم ويخليهم لك ويفرحك بهم دايما

وبعدين رضا بيقولك انت غيران من الواد عشان البنات يا عمرو بلاااش كده خلي الواد يشوفله يومين ههههههههههههههههه

ربنا يخليهمك يارب ويفرح بيهم وبطل تقول عليهم شحوطه وتوصفهم فيهم كده يا اخي قلبي وجعني عليهم

EmY يقول...

هههههههههههه الموضوع اتحول من خوف علي الولد لحقد عليه
بس والله انا شايفه انه عمل الصح و انقذ اتنين كان ممكن يموتو
و فعلا عيبنا اننا بنربي ولادنا علي شيء و بعدين ننفجر فيهم لكا يطبقوه عملي

تحياتي

عاشقه وغلبانه يقول...

ياربي علي الموقف
بجد الغريق بيبقي في عرض اي حد يمد ليه قشه مش ايديه وبدون قصد ولا وعي فعلا ممكن يشده معاه
والشراقوه مش غريبه عليهم
والمفروض تفرح بابنك وتربيتك ليه
وابنك المفروض يفرح بخوف ابوه عليه
ربنا مايحرمكوش من بعض
تحياتي

دعاء مواجهات يقول...

الظاهر كدة ان التدوين لسة بخير وفية نماذج مبشرة

دة الاحساس اللى جانى بعد ما قيت كلامك

استمتعت وعشت جو المغامرة

وبصراحة طريقة حضرتك ف الحكاية نفسها اكتر من رائع وجميل اوى حسيت انك قاعد قصادى بتكلمنى

تحياتى لإبن حضرتك الوسطاانى .

جعلوني مريض نفسيا يقول...

راجل وابن راجل ماشاء الله هي دي التربية ولا بلاش سيبها علي الله

وبعدين اصحاب البنت بيتصورا معاه ويخدوا رقم موبايله وانت اصحاب أم البنت متصوروش معاك ومخدوش رقم موبايلك

حاسوباتيه يقول...

ههههههههههههههههههه يعني انا ملاحظه ان الي زعلك الشعرتين البيض اصبغهم مافيهاش حاجه ههههههههه
جميله قي الحكايه و ربنا يحفظلك ابنك يارب ويسعدكم دايما

أحــوال الهـوي يقول...

اولا اول مرة اعرف انك شرقاوي زي
ثانيا ربنا يحمي لك ولادك من العين و الغين
ويبارك لك فيهم رجال في سن الشباب
ثالثا حتي بالاسلوب الساخر تملك المهارة و الحبكة التي تجذب القارئ الي نهاية القصة
اخيرا وحشتي يا صديقي

تحياتي

شمس النهار يقول...

بطل ياعمرو تقر علي العيال
الله اكبر
وبعدين الولد كويس وشهم وافحمك
طبعا دعيتلك كتير وان ربنا يبارك لك في ارضك ويحل كل مشاكلك وانك تحج كمان
انت دعيتلي بأيه

arsenalwy يقول...

ههههه

بجد تقريبا من اشد البوستات اللى شدتنى من ساعة ما دخلت عالم التدوين من ييجى سنة

هقولك حاجه انت لو مكان ابنك وبتعرف تعوم يعنى فى نفس ظروفه كنت هتعمل كده

الاختلاف الوحيد انك حاليا اب يعنى ابنك ده حته منك لما لقيته بيرمى نفسك تلقائيا مفكرتش غير فيه ودى طبيعة الاب والام لكن هو بما انه شاب وشاف اتنين بيغرقوا فمجسش بنفسه غير وهو بينط فى الميه

الموضوع كله موضوع لحظات فهو الخاطر الاول اللى بييجى فى الدماغ

وربنا يكرمك انت وابنك

عمرو يقول...

صبرنى يا رب
اللهم صلى عليك يا حبيبى يا نبى
و بصراحع أيوه يا أستاذ رضا غيران منه و متغاظ أصلك ماشفتش المنظر يا أبو خالد :)))
ربنا يخلى لك عيالك و تفرحى بيهم آمين يا رب

عمرو يقول...

Emy
اٍزيك يا اٍيمى ؟
أصلى أنتى مش واخده بالك هو الوله أصلا يغيظ بجد يعنى
يعنى مثلا فى البرد ده لابس على طول شورت مقطع و تى شيرت مخرم و حاضن الجيتار و ليل و نهار هاتك يا مزيكا زى الشحاتين الطلاينه اللى قاعدين فى جناين روما !!
ما هى التربيه اللى بتغرسها فى العيل ما ينفعش بعد كده نلومه على أنه عمل بيها
موافقك فى ده

عمرو يقول...

عاشقه و غلبانه
شرفتى المدونه بالزياره و بالتعليق
ربنا يخليكى و يفرحك بأولادك آمين يا رب

عمرو يقول...

دعاء مواجهات
أشكرك للزياره و للاٍطراء و الله جبرتى بخاطرى :)
حأبلغه تحياتك و تقبلى خالص تخياتنا و تقديرنا
أهو أنتى كده زودتى غيظى منه :))

عمرو يقول...

جعلونى مريض نفسيا
عشت ربنا يخليك
لا يا عم مش عاوزين من الصنف ده علشان عندى منه :))

عمرو يقول...

حاسوباتيه
نصبغ أيه بقى يا بنتى حناخد زماننا و زمانكم ؟ ماينفعش
فين أيام ما كانت عربية الاٍسعاف تمشى ورايا و أنا قده كده تشيل البنات اللى كان بيغمى عليهم و أنا معدى جنبهم :)))

عمرو يقول...

أحوال الهوى
أهلا بصديقى الحبيب
يعنى طلعنا بلديات كمان ؟
حصلت لنا البركه و الله يا دكتور شفت بقى الشراقوه اٍزاى بيحسوا ببعض :)
أشكرك يا صديقى للمرور و التعليق ألف شكر
و لك تحياتى

عمرو يقول...

شمس النهار
شموسه أزيك؟ الحمد لله على السلامه ربنا يتقبل اٍن شاء الله
سلامتك سمعت أنك كنتى تعبانه شويه لعلك دلوقتى أحسن
متشكر أنك دعيتى لى يا شمس و لعل الله يستجيب باٍذنه و مشيئته
أنا بقى دعيت لك براحة البال أيه رأيك ؟

dr_samarmar يقول...

هههههههههههههه

بسم الله ماشاء الله البوست جميل أوى و فيه اثارة جامدة

و حضرتك مصور الموقف بطريقة ممتعة و شيقة جدا

للأسف كتير أوى مننا بيقعد طول عمره يردد كلام و نصايح و فى الأخر يكتشف انه مش هيقدر ينفذ اللى بينصح بيه دا بشكل عملى فى الحياة

و هنا بتكون الوقفة مع النفس.. و بنفوقل و يااما نعترف ان اللى بنردده كان صعب نحققه يا اما نختار اللى طول عمرنا مقتنعين بيه و بنقوله

بسم الله ماشاء الله كمان على ابن حضرتك.. عرفت تربيه صح بطريقة المصرى المسلم الجدع :)

بحيى حضرتك

عمرو يقول...

arsenalwy
أيوه هى فعلا ثوانى الواحد بياخد فيها قرار لو أتأخر جزء من الثانيه ممكن يتراجع عن قراره
أشكرك للمرور و للتعليق و الله يبارك فيك يا رب

princess يقول...

ههههههه
ده اسمه صراع الاجيال
ربنا يخلليلك اولادك يارب:)

خمسة فضفضة يقول...

السلام عليكم ورحمة الله وبركاته

هههه

يعني كل اللي همك هما البنات وبس

مش فرحان كده انك ماشاء الله ماشاء الله الله اكبر عرفت تربي راجل ربنا يخليهولك يارب ويفرحك بيه

ما تزعلش من الشعر الابيض دا ليه برضو معجبينه ( الله يرحمه احسان عبد القدوس ) :))))



و عندك حق في ان الناس بيعدوا يربوا ويفهقوا قلبهم في زرع مبادئ معينه في ولادهم وعند اول اختبار بيسقطوا بالثلث

فكرتني بيوميات ونيس الجزء الاولاني :))))


سلام

kochia يقول...

بما انك ذكرت مغامرة صيفية واحنا في عز الشتا حاسة ببرد فظيع وكاني نزلت البحر وعومت .. زي البطة طبعا مش زي اللنش ما شاء الله

المهم ربنا يخلي لك الرجال وتفرح بيهم وبكرة يصوروك جمبهم ان شاء الله
وهم في الكوشة
وبعدين تقعد علي جمب تكتب مذكراتك

متقولش بقي شغلانة شحط دي تاني
الواد جاب زياين اهو وبقي زي الفل

تحياتي

fashkool يقول...

والله يا شيخ يا زين ما ربيت والله الواد ابنك اللى زى الشحط دا فهد وربنا بعته عشان ينقذ الست وبنتها اللى كانوا فى البحر ولك ان تفخر بيه وعلى العموم انت ما كانش قصدك تنقذ الا ابنك .. بس ربنا مش حيضيع لك تعب .. تحياتى

عمرو يقول...

dr_samarmar
أنا اللى بحييكى على زيارتك و تعليقك و اٍن شاء الله ما تكونش الأخيره
أيوه فعلا بيبقى موقف صعب و محرج لما بنصدم أولادنا بتصرفات أو أقوال بتتعارض و تتصادم مع ما علمناه لهم و دى نقطه هامه جدا يجب الاٍلتفات ليها من الأهل
ربنا معاكم و يكملها بالستر

عمرو يقول...

princess
ده اٍسمه صراع الأبطال و أنتى الصادقه :))
و يخليكى و يكرمك يا رب

عمرو يقول...

خمسة فضفضة
و عليكم السلام و رحمة الله و بركاته
لا و الله فرحان بيه بس لما مش بيسوق فى الغلاسه بتاعت سن العشرين دى ربنا ما يوريكى :)
و بنات أيه بقى يا دكتوره ما خلاص دول كلهم بقوا زى ولادنا يعنى ربنا يحميهم من مساوىء هذا الزمن الردىء
معاكى أنا يا دكتوره أن الشعر الأبيض برضو له جاذبيته و وقاره و هو لعلمك مسئوليه على عاتق صاحبه يغنى لازم يتصرف بعقل و بحكمه مع الناس تتناسب مع الشعر الأبيض اللى أنا بأعتبره تاج على راس صاحبه مكافأة له على صموده فى وجه الزمن :)
أنا بأتكلم عن الرجاله يعنى أما طبعا السيدات فدول شعرهم مش بيبيض أبدا .. ما تعرفيش ليه يا دكتوره ؟؟ :))

عمرو يقول...

kochia
آه يا كوشيا من القعده جنب الكوشه دى !!
آه لو تعرفوا أحاسيس الأب و هو بيجوز بنته و شايفها قاعده فى الكوشه جنب عريسها و هو عارف أنها خلاص رايحه لبيتها الخاص و دنيتها الخاصه و عالمها الجديد !!
الأحاسيس دى مرت عليا و أنا بأجوز البنت الكبيره .. بس متهيألى كده حأبقى فى قمة السعاده و الزأططه لما عيالى الشباب يروحوا بيوتهم مع عرايسهم لأسباب كتيره يعنى :))

عمرو يقول...

fashkool
أهلا يا صديقى أزيك ؟
و الله يا عم فشكول الواحد بيحاول يتجنب فى تربية العيال الأخطاء اللى أتربى عليها .. بس المشكله بقى لما العيل من دول بيواجه الدنيا بمفاهيم مختلفه عن المفاهيم اللى أتغرست فيه و هو صغير .. هنا بقى بيبقى فيه نوع من التناقض و التضارب داخل نفسية الشاب و ربك الستار ..
مشكور يا صديقى للمرور و شرفتنا و الله

norahaty يقول...

السلام عليكم ورحمة
الله تعالى وبركاته
معقول كده ياأستاذ عمرو
تاخد انت البت وتسيب الام للواد الصغير !!بقى الحكاية صدفة ياعنى !
فطستنى من الضحك حرام عليك الناس اللى معايا يقولو ايه؟ كده نسيتنى! الف حمدلله على السلامة لك ولابنك ولو سمحت ده مش شحط وسطانى ده بطل وسطانى مابين اخوه وابيه .ربنا يخليهم لحضرتك ويخلى حضرتك لهم يارب
ومايحرمكوا من بعض ابدا
(تجربة الغرق عشتها حقيقة
بس ما كنتش فى وعيى ساعة الانقاذ
وبالتالى ما مسكتش حد ده الغطاس اللى مسكنى الحمد لله)

المكتئبة ورد الشام يقول...

بموت فى الطريقة اللى بتحكى بيهاوقعت من الضوحك مع انى عارفة الحكايه من ساعة ما حصلت بس الواد دا جدع هو طول عمره متهور بس اخيرا تهوره بأه فى حاجة كويسة ربنا يصلحلهم الحال ويجعل حظهم احسن مننا

عمرو يقول...

norahaty
و الله يا دكتوره هى الحكايه ما جتش بالصدفه أصلى لاقيت الأم أشد تماسكا من البنت فقلت خليها معايا علشان أقدر أسيطر عليها لو لا قدر الله كانت الأمور ساءت .. و بعدين يا ستى مش لازم تدقى أوى كده :))
حمد لله على سلامتك أنتى كمان و خدى بالك فى المرات الجايه لأن البحر مالوش كبير ربنا يكفينا شره
تحياتى يا دكتوره و نورتى و شرفتى و ألف شكر

عمرو يقول...

المكتئبه ورد الشام
سلامتك من الاٍكتئاب يا ورد الشام
أرمى حمولك على الله و ربنا حيفرجها أكيد
أيوه الواد ده متهور و عنده دفعه طول عمره زى ما أنتى عارفه بس و الله جدع و له دقات رجوله بأحترمها فيه طيب فاكره أيام تدريبات الجيش و اللى عمله فيه الرائد أسامه؟ :)))))
ربنا يهديه هو و كل اللى زيه يا رب

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘