الجمعة، 31 يوليو، 2009

نويبع مدينة الألف وجه !!

صباح الخير أعزائى المدونات و المدونين ..
علاقتى بجنوب سيناء علاقه قديمه ترجع لعام 1992 لما رحتها لأول مره فى مهمة عمل خاصه و من اللحظه الأولى سقطت فى هواها !!
طبعا من نافلة القول التكلم عن جمال الطبيعه هناك و عن روعة خليج العقبه اللى بيحتوى على غابات ليس لها مثيل من الشعاب المرجانيه و الأسماك الملونه فى أى بحر من بحار العالم ..
لى فى كل مدينه فى جنوب سيناء ذكريات و أصدقاء و ناس بينى و بينهم عيش و ملح و اٍرتباطات عاطفيه من الصعب شرحها و لكنها محسوسه ..
أقرب مدينه لقلبى هى نويبع ..
نويبع البلد الجميله الوديعه اللى بجد ليس لها أخت و لا حتى بنت عم فى أى مدينه فى العالم من مشرق الأرض لمغربها .. آدى البحر للى عايز .. شوفوا الجمال :


و آدى السفارى للى عايز :


نويبع بتقع على خليج العقبه مباشرة و بها ميناء كبير بيزدهر و بيزهزه المدينه فى موسم الحج و العمره و عودة العاملين المصريين من الأردن و دول الخليج .. و بتواجهها من الناحيه الشرقيه للخليج مدينه و ميناء صغير فى المملكه العربيه السعوديه و من السهل جدا لما بيكون الجو صافى أن ترى بسهوله السيارات بل و البشر اللى بيتحركوا هناك .. و لو ضربت بعينك شمال شويه حتشوف مدينة العقبه الأردنيه بوضوح شديد برضو لكن بتكون واضحه جدا و أنت فى طابا و فى نفس الوقت برضو بتقدر تشوف بسهوله ميناء اٍيلات فى اٍسرائيل .. و من الناحيه الغربيه بتحدها سلسله من الجبال شاهقة العلو مليئه بالظبيان و الغزلان و المعيز الجبليه و اللى بالليل بتتقافز قدام السيارات فى الطريق المؤدى لصحراء النقب فى مشهد ممتع للغايه .. أما لحظة شروق الشمس على جبال نويبع الغربيه فشىء لا يمكن وصفه و لا يكف القلب لحظتها عن تسبيح الخالق الجليل خاصة مع صوت هدير جوف الأرض المخيف اللى بيتسمع بوضوح فى هذا السكون المهيب .. أهوه :

آل أيه و الاٍنسان بغباوته و هبله لما تاخده العزه بالاٍثم يقول : ده أنا فيا صحه تهد جبل :))

طيب أهو الجبل قدامك أتفضل هده !! ده أنت يا عم لما ضرسك بيوجعك بتقعد تولول و تقول تعالى لى يامه !!
أستغفر الله العظيم و لا حول و لا قوة اٍلا بالله تباركت يا رب يا من جعلت الجبال أوتادا ..
يعنى نويبع بتتمتع بموقع فريد عجيب لا تتمتع به أى مدينه أخرى فى العالم حيث أنها بتطل على مملكتين عربيتين و فى نفس الوقت بعتبر على حدود اٍسرائيل و ده أدالها طابع مميز برضو من حيث اللهجه و طبيعة الحياه و أهلها البدو الأصليين بيرتبطوا بصلات نسب و مصاهره مع قبائل فى الدول التلاته و بيتنقلوا بينهم بمنتهى السهوله و بدون أى تعقيدات .. أو هكذا كان الوضع فيما سبق ..
ده مدخل مدينة نويبع من الطريق الأوسط مش من ناحية طابا :
الجبل اللى هناااااااك ده فى السعوديه و خليج العقبه بيفصل بينه و بين نويبع ..
سكان نويبع الأصليين بينتمى أغلبهم لقبيلة الترابين و هى كبرى قبائل عرب جنوب سيناء و بتوازى فى قوتها و سطوتها قبيلة الفواخريه فى شمال سيناء .. و أفرادها منتشرين فى مصر و الأردن و السعوديه و اٍسرائيل و بيعملوا فى التجاره و السياحه و الزراعه بالتنقيط و مش ضرورى برضو تعرفوا بيزرعوا أيه !!
بدو سيناء بصفه عامه و خاصة أفراد قبيلتى الترابين فى الجنوب و الفواخريه فى الشمال عايشين فى سلام و وئام و بينهم مصاهره و نسب و مصالح مشتركه .. و حقيقى ناس محترمين و يعرفوا العيب و لا يقربوه .. و الكرامه عندهم تساوى الحياه و الويل لمن يهين كرامة بدوى أو يعتدى على شرفه أو يستخف به .. و أفراد القبيلتين بعضهم بيشغل مناصب عليا و مراكز مرموقه .. و لو حصلت مشكله بينهم فبيلجئوا لكبار قبائلهم و بيحلوا الموضوع ودى بدون تدخل حكومى فيما يعرف هناك بالمجالس العرفيه اللى أحكامها واجبة النفاذ فورا بدون اٍستئناف و لا نقض و لا حيل و ألاعيب و اٍلا تعرض المحكوم عليه للنفى من القبيله و دى مصيبه لا علاج لها بالنسبه للبدوى .. و على مدى سنوات طويله لم تسجل فى أقسام الشرطه هناك سوى حالات سرقه تعد على الأصابع و كان أبطالها من غير البدو يعنى من محافظات أخرى ..
و لو حصلت مشكله بين بدوى و بين ضيف من أى مكان فيكفى أن ينبه الضيف أنه سيلجأ لكبير القبيله علشان يجيب له حقه فتلاقوا البدوى على طول لان و بقى طيب
أوى أوى و يسارع لحل المشكله حتى لا يقف أمام شيخ قبيلته متهما بالعيب مع ضيف ..
أقدر أقول بقلب جامد أوى اٍن السياحه هناك سياحه اٍسرائيليه بنسبة 99% .. و ال 1% الباقيه سياحه مصريه متمثله فى أنا شخصيا و فى الأجانب اللى بيفدوا عليها فى طريقهم من و اٍلى طابا .. و ده الحقيقه شىء مؤلم للغايه أن المصريين لسه لم ينتبهوا لجمال و روعة السياحه و التصييف فى مدن جنوب سيناء و سايبينها للى بجد عرفوا قيمتها و عرفوا اٍزاى يتمتعوا بها حتى الثماله .. و أكتفينا بالمصايف المعتاده التقليديه اللى بقت زحمه و خنقه و مش لطيفه أبدا !!
السياح الاٍسرائيليين بالمئات و أحيانا بالألوف أعتادوا على قضاء أجازاتهم الأسبوعيه صيفا و شتاءا يومى الجمعه بعد الضهر و السبت فى نويبع اللى بيدخلوها بدون تأشيره ( و مسموح أيضا للمصريين دخول مدينة اٍيلات بدون تأشيره كما نصت على ذلك اٍتفاقية السلام ) من منفذ طابا البرى اللى بيبعد عن نويبع مسافة حوالى 50 كم بسياراتهم أو بدون و بيركبوا أتوبيسات عامه أو سيارات نصف نقل و ميكروباصات تنقلهم من طابا لنويبع و دهب و سانت كاترين و نادرا شرم الشيخ لأنهم أصلا لا يقدروا على مصاريف الحياه فى الشرم .. و غالبا بيقضوا اليومين دول فى كامبات لطيفه ظريفه على الشاطىء و أشهرها كامبات بساطه و أصاله و هلا و ترابين برادايس و عبد النبى اٍن و بيفضلوا يناموا على كليمات مفروشه على الرمال على بعد خطوتين من مياه الخليج على الطريقه البدويه فى العراء و بجد الناس دول معندهمش حياء أبدا خالص !! ( وش بيلطم )

يومى الجمعه و السبت و فى الأعياد اليهوديه زى الفصح و كيبور و عيد خروج اليهود من مصر و عيد المسخره ( هو أسمه كده ) و عيد الفطير ( مش الفطر ) بتعتبر أيام رواج كبيره أوى فى نويبع بالنسبه للفنادق و الكامبات الرخيصه اللى سعر البيات فيها لا يتعدى 20 جنيه للفرد و دورات المياه فيها مشتركه للرجال و النساء و أيضا للمطاعم و الكافيهات اللى أغلب أصحابها و العاملين فيها من منطقة نزلة السمان فى الهرم و بيتكلموا عبرى زى العفاريت الزرق و التعامل بيكون اٍما بالدولار أو الجنيه المصرى أو الشيكل الاٍسرائيلى اللى بيساوى هناك جنيه برضو .. و بيبقى شاطىء الترابين صاحى ليل و نهار و اٍحتفالات عجيبه و حالات جموح من البنات اليهود مقاصيف الرقبه باهرات الوحاشه ( علشان محدش يزعل ) و الله يرحمك يا عم رأفت يا هجان لو كنت عايش كنت طحنت العالم دى :

و الحقيقه حالات الجموح دى بتواجه بكل حزم من رجال الشرطه اللى ظهورهم على الشاطىء بيسبب حاله من الاٍنضباط الشديد لأن اليهود يخافوا جدا جدا من المشاكل و خاصة مع الشرطه و عنده يتعمل بسطرمه و لا يدخلش الكراكون و يبدو اٍن رجال الشرطه الاٍسرائيليين شاوينهم على الجنبين و مربيين لهم الرعب برضو زيهم زى بقية الشعوب اللى الحمد لله اٍحنا مش منهم .. و ده شاطىء الترابين :

تعرفت فى نويبع فى واحده من زياراتى على شاب بدوى بعد أن غرزت عربيتى فى الرمال فى المنطقه المنعزله من الشاطىء اللى دايما بأعسكر فيها بعيد عن دوشة السياح .. أهيه :


و شدها هو بسيارته النصف نقل و قد تطوع لمساعدتى من غير حتى ما أطلب منه بعد أن شاهد الورطه اللى كنت فيها .. الشاب ده عرفنى على نفسه بعد كده اٍن أسمه عياد و أبوه هو الشيخ زايد – رحمة الله عليه – كبير قبيلة
الترابين فى نويبع و اللى كان مصر اٍصرار لا يلين أن الله سبحانه و تعالى كان يقصد بقسمه (( و هذا البلد الأمين )) مدينة نويبع و لا شىء آخر !!
- طيب ليه يا عم الشيخ زايد ؟؟
فكان رده غريب شويه لما سألته لأنه شايف أن هذا القسم جاء بعد (( و طور سينين )) و نويبع بتقع بعد مدينة الطور يبقى بالعقل كده نويبع هى المقصوده بالقسم .. ده من وجهة نظره طبعا متناسيا أو متجاهلا أن مدينة شرم الشيخ هى اللى بتقع بعد مدينة الطور :))
و تصادقنا بسرعه أنا و عياد خاصة لما عرف أنى من القاهره و رفض بتاتا تناول أى أجر عن شهامته بل و دعانى للغداء عنده فى البيت بعد يومين ليعرفنى على أخوته و أبوه و أتفقنا أنه سيأتى ليأخذنى بعد أن يحضر الدب على حد قوله .. و تساءلت بينى و بين نفسى اٍن كان سيصطاد دبا و يدبحه للغداء و لا أيه ؟؟؟!!!! و شعرت بالرعب من الفكره و الريبه فى أمره خاصة أن نويبع تخلو من الدببه و لكن سرعان ما أكتشفت أنه يقصد بالدب السياره الجيب بتاعته ..
بيته كان عباره عن مبنى كبير من الحجر السيناوى الملون بيطل مباشرة على خليج العقبه .. و المنظر من هناك رائع رائع فوق ما العقل يتصور .. جلسنا سويا نتحدث بعد أن طلب من اٍخوته اللى جاؤوا للغداء معنا أن يحضروا الطعام و قد رحبوا بى كثيرا حتى شعرت بالخجل و الله و كل واحد فيهم أخرج من جيوبه ما يعتبرونه واجب الضيف و لكنى رفضت بشده و طلبت منهم أن يشيلوا من أمامى هذا الواجب المهبب اللى أمقته مقتا شديدا ..
و كان بصحبة واحد فيهم فتاه اٍسرائيليه وعيال أختها و كانت عاوزه تروح العمود .. عمود سليمان كما يسمونه بدو نويبع و بيقولوا اٍن سيدنا موسى عبر خليج العقبه للسعوديه من هذه النقطه قبل أن يتوجه لفلسطين حيث يقابلها من الجهه السعوديه فى جبل اللوز عمود مثله تماما و بيقولوا اٍن نبى الله سليمان عليه و على نبينا أفضل الصلاة و السلام وضع بيده هذا العمود كعلامه .. و العمود ده بيعتبر مزار يهودى مقدس خاصة للبنات اللى عاوزين يتجوزوا حيث بيتباركوا بيه لأن فى زعمهم تمت زيجات كثيره جدا بين شباب و بنات بنى اٍسرائيل فى هذه البقعه قبل أن يعبروا للضفه التانيه من الخليج ( أمال لو كانوا شافو عمدان الصعيد بقى اللى بحق و حقيقى كانوا عملوا أيه ؟؟ ) .. و آدى مسمار جحا الخايب بتاعهم خيبهم الله :


و فوجئت بعد قليل بسيده أجنبيه شقراء ترتدى الملابس البدويه و لكن مش مغطيه وجهها كما النساء البدويات تحضر صينيه كبيره عليها الطعام و الخبز البدوى الشبيه بالرقاق !!
و ياله من طعام .. كان عباره عن خروف مقطع لأجزاء كبيره و مطهو داخل قدرتين فخار بطريقه عجيبه سأشرحها فى آخر البوست و مخليه اللحم زى الزبده بصراحه ..
حيتنى بالاٍنجليزيه و رحبت بى بالعربيه قائلة : يا هلا و مرحبتين !!
و أفترشت الأرض بجانب عياد .. سألته مين دى يا عياد ؟؟
قال : زوجتى يا أبو على .. هى هولنديه و متزوجين من 3 سنين ..
أستغربت من الموقف فحكوا لى القصه من أولها ..
مارجريت أو مارجا كما كانوا ينادوها وفدت لنويبع من هولندا من بلد اٍسمها شيدام عن طريق شرم الشيخ و كانت متوجهه لمدينة اٍيلات فى اٍسرائيل بغرض السياحه .. و فى نويبع تعرفت على عياد و بهرت ببساطة حياة البدو و الطبيعه الخلابه فى الخليج .. فطلبت منه أن يساعدها على البقاء فى نويبع فتره من الوقت .. فأسكنها مع اٍخواته البنات اللى كانوا بيخرجوا يوميا للتنزه و جلب الماء من النبع القريب فعشقت الحياه هناك .. و ده النبع :

و لما ملت من حياة الراحه و البطاله طلبت منه أن يهيىء لها عملا تشغل به وقتها و تكسب منه مالا فأفهمها أن هذا عيب و أنه لا يجوز لضيف البدوى أن يعمل أو يصرف على نفسه .. فأصرت فلم يجد أمامه حتى يرضيها و يدفعها للبقاء فى نويبع لأن الحب قد بدأ يربط بينهما سوى أن يسلمها 3 جمال صغيره و 6 معيز لترعى بهم كام ساعه فى اليوم و يعطيها على ذلك أجرا بشرط أن يرسل معها أخاه ليراقبها من بعيد لبعيد حتى يكون بجانبها لو طرأ طارىء ..
تضحك مارجا من قلبها و تكمل بلهجه عربيه بدويه قريبه من لهجة كوكا فى فيلم عنتره :
- كان الأروام ( يعنى السياح ) يستعجبون من هادى البدويه الشجرا اللى بترعى لابل و لمعيز و كانوا يظنون البدو خاطفين اٍياى و يعرضون يساعدون و أجولهن كونوا بحالكن :)
شويه شويه بدأ الحب الحقيقى تظهر أعراضه على عياد و مارجا اللى بتكبره بحوالى 10 سنين على حسب تقديرى !! .. و كانوا بيتفاهموا مع بعض بشويه اٍنجليزى من اللى أتعلمهم عياد من السياح و طبعا أكتر تفاهمهم كان بالنظرات و الهمسات ( ده أكيد يعنى ) ..
لحد ما عياد أتشجع و طلب يتجوزها بعد سنه من اٍقامتها فى نويبع .. مارجا وافقت على طول و قد عشقت حياة البدو و هامت حبا بالشاب البدوى الوسيم بس المشكله كانت فى عرض هذا الأمر على أبوه الشيخ زايد الرجل المسن العتيد اللى كانت كلمته سيف على رقاب أفراد القبيله اللى بيدينوا له بالطاعه و الولاء ..
أتشجع عياد و جاب أخوه سلامه و أخوه حسن الأشعث و ده اٍسم الدلع بتاعو لأن اٍسمه الحقيقى حسن همبكه و راحوا على أبوهم و فاتحوه فى الموضوع ..
بيحكى عياد و هو بيصب دور الشاى الحبر المغلى مع السكر على نار الراكيه للمره العشرتلاف :
- كنت متوجع بوى ينفينى من الجبيله لكن فوجيت بيه بعد ما حاكينا وياه كتير كتير يبسم و بيجول لى : على بركة الله يا ولدى عل نسل جبيلتنا يتحسن و لو كانت خيوتها متلها مزيونه أرسلون جيبوها لنزوجوها لخيوك هادا التيس الأشعث عله يتمدن !!
يعنى قاله على بركة الله يا أبنى يا عياد يمكن نسل قبيلتنا يتصلح على أيدك و لو كانت ليها أخت حلوه كده زيها نبعت نجيبها من بلدها و نجوزها أخوك التيس ده حسن الأشعث يمكن يتمدن و يبقى بنى آدم ..
مارجا أسلمت و الله وحده يعلم خائنة الأعين و ما تخفى الصدور .. و قبل الزفاف فوجىء عياد بها تطلب منه المهر !!
و يبدو أن من طول عشرتها للبدو و مما كانت تسمعه من اٍخوات عياد البنات صارت مثلهم فى كل شىء :)
فوجىء عياد بهذا الطلب اللى لم يكن على باله .. و ما عاد يملك مالا بعد ما أنفق ما لديه على بناء بيت الزوجيه و فرشه و تهيئته بكل وسائل الراحه الحديثه لدرجة أنه عامل الحمام بورسلين .. فركبه الهم بعد أن أصرت مارجا على موقفها و تمسكت بالمهر .. فما كان من أبيه و أخوته ألا أنهم جمعوا من بعضهم مالا وفيرا و سلموه لعياد ليشترى به ذهبا للعروس و يدفع لها مهرا فرفضت مارجا هذا العرض رفضا تاما !!
و لما وصل الحوار معها لطريق مسدود عرضت مارجا برضو على طريقة البدو أن يتعهد أمام أبيه و أعمامه و أخواته أنه سيدفع لها مهرا و يشترى لها ذهبا فى خلال مده معينه من حر ماله هو و ليس من أموال أهله و أن يتنازل لها حاليا عن الجمال و المعيز اللى كانت بترعاهم و اللى دلوقتى كبروا و بقوا حاجه محترمه لهم تمن و كمان يتنازل لها عن الجحشين اللى بينقلوا عليهم الماء من النبع و على رأى المثل من عاشر القوم أربعين يوم صار منهم !!
لما سمعت الحكايه كاد قلبى أن يتوقف من الضحك و سألت مارجا اٍن كان عياد أبر بوعده و أشترى ذهب و دفع لها مهر ؟؟ فقالت و على شفتيها اٍبتسامة رضا :
- و الله ما صار لهالحين بس عطيانى هالموى أتسبح فيه لحالى :)
و أشارت للخليج ..
نسيت أقول لكم أن مارجا و اٍخوات عياد البنات زينه و هب الريح عاملين زى مشروع صغير كده لصنع الكليم و السجاد البدوى على الأنوال و بيبيعوا للمحلات فى نويبع و دهب و شرم الشيخ و بيكسبوا ما شاء الله كويس جدا ..
ده غير أن معظم البدويات هناك بيتكسبن من حاجه غريبه جدا قد لا تخطر على البال .. و هى أنهم بيجمعوا من الخليج فى الصباح الباكر كائن بحرى أسود تماما اٍسطوانى الشكل و بيسموه .... البحر ( مكان النقط كلمه مش ولابد كده) و بيجففوه بطريقه معينه و بيطحنوه و بيتم تهريبه للخارج حيث بيستخلصوا منه الماده الفعاله و الأساسيه الداخله فى صناعة الفياجرا أو هكذا قيل حيث أن هذا الكائن البحرى غير موجود فى أى مكان آخر فى العالم غير فى خليج العقبه .. ولقد شهدت بعينى البدويات و هن يجمعنه و أيضا خطوات تجفيفه و طحنه ..
ده عياد اللى لابس جلابيه بيضا و سويتر أزرق و اللى وراه اللى لابسه نضاره دى مراته مارجا و اللى واقف وراها ده أخوه حسن الأشعث عازف السمسميه البارع اللى لا يشق له غبار و اللى قاعدين جنبه دول اٍخواته الأتنين التانيين .. أما البت الرخمه المنكوشه دى اللى فى آخر الصوره على الشمال فدى البت الاٍسرائيليه جنات و عيال أختها الشحاتين و تقريبا عندها فوبيا من الاٍستحمام و هى من حركة السلام الآن و بتؤيد الحق الفلسطينى و كانت مصره تورينى آثار ضربة خرزانه على .... ( مش مهم فين بقى ) من عسكرى أمن مركزى اٍسرائيلى أثناء مظاهره مشتركه مع العرب فى القدس ضد شارون و سياسته الاٍرهابيه و كانت ترفع العلم الفلسطينى على حسب حكايتها :


يا بنت الأيه يا مصر .. و الله الواحد كل ما يمشى فيكى خطوتين يتكعبل فى حكاوى تملا كتب .. و كل ما نزهق منك و من عمايلك نلاقينا بنحبك أكتر و أكتر و ياما فى قلبك شايله أسرار و ألغاز ما حد يعرف يفكها غير اللى يعيشك بجد و بحق و حقيقى مش اللى يعيشك فى الكافيهات و المولات و زحمة شوارع مدينة نصر و وسط البلد و يرجع بيتهم يكتب عنك و يلعن سنسفيلك و يبقى كده من وجهة نظره بيحبك و عمل اللى عليه ..
فهمتوا قصدى ؟؟

********************

طريقة عمل الخروف على الطريقه البدويه علشان عارف أنا فيه ناس هنا بتعشق اللحمه الضانى عشقا قد ملك الفؤاد و الروح :

- تجيبوا خروف متوسط و تقطعوه هوبر كبيره شويه و تستبعدوا الليه .. تخلطوا الأجزاء المقطعه ببصل ترنشات و ثوم صحيح و شوية جذور جنزبيل و طبعا ملح و فلفل و ورق لورى و مستكه و حبهان و مرمريه و حاجه اٍسمها السماق من عند العطار و جوزة الطيب و قرنفل و قرفه و أوراق ريحان خضراء و يتحط كل ده فى القدور الفخار المبطنه من الداخل بماده عازله لا تسمح بالترشيح و تقفل جيدا جدا و باٍحكام بالطين مع الحرص اٍن الطين ميقعش فى القدور و عمل ثقب صغير جدا يسمح بخروج البخار.. و تترك لتجف ..

تكونوا بقى محضرين من قبلها حفره فى الرمل بعمق متر و نص مثلا و مليانه حطب و تولعوا فيه و تسيبوه لما ينطفى و يصفى و يبقى جمر .. تدفنوا فيه هذه القدر الفخاريه باللى فيها و تردموا عليها كويس و تسيبوها يومين مع مراعاة عدم دفن بق القدره و ترك الثقب الخاص بخروج البخار غير مغطى و اٍلا أنفجرت القدور.. و لما تطلعوها بعد يومين حتلاقوها لسه بتغلى و اللحم بقى زى الزبده و تقريبا منفصل عن العضم .. و بألف هنا و شفا ..

أشوفكم على خير اٍن شاء الله البوست الجاى أحكى لكم شويه عن مدينة دهب و ثقبها الأزرق و صديقى زينهم بامبولينو اللى مراته خدت وش الوليه الأوكرانيه بقعر الكوبايه ضبه و مفتاح و جابت لها حول فى الشبكيه و بقت بتتكلم زى فؤاد المهندس لما كان بيغنى لهند رستم و يقول : يا حبيبى أفافا ..

و لكم التحيه ..

الأحد، 26 يوليو، 2009

بوست عميق المغزى !!

سيداتى آنساتى سادتى من راس سدر جنة الله على الأرض أحييكم و لسه قاعد و النبى مستنى التصاريح بتاعت السفارى و يبدو أن المسأله حتطول و لو طولت أكتر من كده حتبقى رخمه لأنى بقالى ييجى 10 أيام مستنى الفرج لما بقيت شكل النيجاتيف من الشمس الحاميه لأن يومى كله بأقضيه فى الصيد و الاٍلتقاط و الزراعه ..
صيد الكابوريا و شويها لما تشبعت أعضائى بالمغنسيوم و الفوسفور و خلاص حأطق من جنابى :



و اٍلتقاط التمر من على النخل :


و زراعة حدائق شاليهات جيرانى لوجه الله حبا فى الزراعه و الله :


و الحقيقه كده حاسس بعد ما أتقطعت هدومى من الصيد و الشعبطه على النخل و زراعة الجناين و دقنى طولت و بطلت أحلقها أنى بقيت زى توم هانكز فى فيلم Castaway لما الطياره وقعت بيه فى جزيره مهجوره عاش فيها 4 سنين و خلع ضرسه بالزحليقه و بقى عايش على الكابوريا المشويه لما أتجنن و بقى بيكلم الكوره .. أهو :



و اللى زود الرخامه كمان اٍنقطاع خدمة الأنترنت عن المودم اليو اٍس بى رغم أن مافيش أى مستحقات ماليه متأخره عليا و بعد محاولات عديده معاهم أستمرت لأيام و أتحرق فيهم كارتين شحن ب 100 جنيه الواحد و الله رجعت الخدمه آى نعم بطيئه بطء مضحك و لكنها فى النهايه شغاله و خلاص و الأمر لله ..
النهارده لو تسمحوا لى عاوز أعرفكم على أصحابى :


و اللى مؤنسنى فى وحدتى صيفا و شتاءا خاصة شتاءا لأن الشط كله بيبقى فاضى من المصيفين و مافيش غير أنا و هم .. بوزنا فى بوز بعض ليل و نهار .. و لكم أن تتخيلوا شاطىء فى جنوب سيناء طويل و عريض يخلو شتاءا من تاء التأنيث و مافيهوش غير شنبات شوفوا بقى يبقى دمه تقيل قد أيه !!
بس أيه شنبات مش أى شنبات :


دى شنبات رجال حرس الحدود المصريين .. ولاد الجيش المصرى المخلصين اللى بجد بيقدموا حياتهم فداءا لأداء واجبهم على أكمل وجه و بشكل يثير الاٍعجاب ..
الحقيقه أعتدت أثناء تجولهم على الساحل المنعزل المطل على خليج السويس أثناء دورياتهم أن أدعوهم للشاى أو الطعام أو حتى أناولهم زجاجة ماء مثلج .. و كانوا دائما يردوا بنفس الجمله و باٍبتسامه لا تخلو من الألاطه المصريه الأصيله اللى بالكم فيها :
- شكرا .. مابناخدش حاجه من حد حضرتك ..
كل مره كان ده بيبقى ردهم المعتاد .. و كنت فى الأول أظن أنها حاله فرديه لدى جنديين أو تلاته .. لكن مع تغير الوجوه السمراء اللى زى العسل دى و ثباتهم على نفس الرد و الرفض أيقنت أنها حاله عامه لدى رجال حرس الحدود .. فعلا مابياخدوش حاجه من حد حضراتكم .. و لا حتى كوباية شاى على سبيل التحيه و هم رايحين جايين على طول الساحل ليلا و نهارا بيحموه من تسرب أى ممنوعات منه و اٍليه و على أكتافهم سلاحهم و زمزمية مياه بتغلى من شدة الحر :

أنا بأحترم الشباب دول جدا جدا و بأحبهم أوى و اللى عينيهم لن تمسها النار باٍذن الله و قد باتت تحرس فى سبيل الله .. خاصة أنه كان ليا معاهم موقف قد لا يتكرر فى حياة الاٍنسان مرتين و ربما يعيش اٍبن آدم قد ما يعيش و يموت و لا يعيش الموقف اللى حصل لى معاهم و اللى مش عارف ينفع أحكيه و أعرض الكليب الخاص بيه و لا مينفعش ؟؟؟

حأحكيه و خلاص .. يعنى هو أنا بأقول حاجه وحشه ؟؟ و لا أنا بأتكلم عن حد غريب ؟؟

أنا بأتكلم عن ولادنا و أخواتنا أبطال حرس الحدود و زهرة شباب الجيش المصرى اللى هم خير أجناد الأرض و فى رباط اٍلى يوم الدين .. و لعل ما سأحكيه و أعرضه سيكون له فائده و مغزى و شىء جديد لمن يعتبر ..
صلوا على حضرة نبينا الأمين عليه الصلاة و السلام ..

المكان يا جماعه اللى بأقعد فيه فى راس سدر بعيد شويه عن العمران .. يعنى قبل المدينه نفسها بحوالى 10 كم .. و البيت نفسه لا يبعد عن مياه الخليج بأكثر من 30 متر .. و أما الشاطىء فهادىء للغايه لأن القريه نفسها مش زحمه خالص و عدد سكانها قليلين جدا ..

يوم 15 يونيو 2008 قبل منتصف الليل بقليل ..

كنت قاعد بأسمع الست سومه و هى بتغرد و بتقول : حيرت قلبى معاك و أنا بأدارى و أخبى ( حبيبة قلبى يا سومه ) .. و بتأمل فى النجوم و السما و صوت البحر عامل خلفيه رائعه مع هذا الجو الرومانسى و كمان مع أضواء و صفارات السفن العملاقه الراسيه فى عمق البحر مستنيه تعدى قناة السويس فى رحلتها الشماليه .. و عقلى صافى و نفسى هاديه و كله تمام التمام ..

فجأه تظهر من الناحيه اليمنى للشاطىء سياره مطفية الأنوار و ماشيه قريب جدا من مياه البحر و تقف قدامى مباشرة و لا يفصل بينى و بينها سوى المسافه اللى بين البيت و بين البحر ..
و فى ثوانى بينزل منها عدد من الأشباح و بيفتحوا شنطة العربيه و بيشيلوا حاجات تقيله على كتافهم و بيتوجهوا بيها للمياه !!

تبينت على الفور هدفهم و هو مركب راسيه بالقرب من الشاطىء ما أتبينتش حجمها و برضو كانت مظلمه تماما و فى حالة سكون تام لدرجة أنى لم أنتبه لوجودها أصلا ..

أدركت على الفور أن ثمة ما يريب فى الأمر .. و أن ما كنت أسمعه عن محاولات المهربين الدائمه اٍستعمال هذه النقطه المنعزله من الخليج لتهريب سمهم الهارى اللى اٍن شاء الله حيتهروا بيه يوم القيامه حقيقه و ها هو يحدث أمام عينى ..

طيب و بعدين ؟؟

تعمل أيه يا عبد الرحيم ؟؟ تعمل أيه يا عبد الرحيم ؟؟

و لسه بأشغل دماغى اٍلا و يشق صمت الليل صوت جهير كله ثقه و بيقول :

- اٍثبت محلك حأضرب فى المليان !!

و عينكم ما تشوف اٍلا النور !!

اٍلا النور فعلا ..

النور اللى أضاء سماء المنطقه من ضرب الرصاص الغزير الكثيف اللى أنطلق من المركب و من الرجال اللى نزلوا من العربيه و من قائد العربيه نفسه !!

مفاجأه غير متوقعه فى هذه الليله الرائعة الحسن :)

فى لمح البصر تصرفت بشكل غريزى طبيعى و أخدت ساتر خلف عمود خرسانى أتابع ما يحدث و قلبى يدق بعنف ..

كانت نيران المهربين غزيره و كثيفه و من أسلحه آليه لكنها عشوائيه صادره من ناس جبناء أصلا و اٍيديهم بتترعش و لا يهمهم سوى الفرار بعمرهم من أيدى رجال حرس الحدود اللى كان عندهم اٍصرار و عناد على توقيف المهربين ..

و أما رجال حرس الحدود فما شاء الله عليهم رغم أنهم كانوا أتنين فقط اْلا أنهم قدروا بدقة تصويبهم و شجاعتهم اللى أذهلتنى أنهم يتغلبوا على كل العصابه و يسكتوا كل النيران اللى على الشط و اللى على المركب بل و ينزلوا هم الأتنين لوحدهم للمياه ليطاردوا المركب اللى موتورها أشتغل فجأه و أستدارت تجاه الساحل الغربى و ظلوا يطلقون عليها النيران حتى سكت صوت موتورها هو الآخر ..

الموضوع كله لم يستغرق أكتر من 7 أو 8 دقائق على حسب تقديرى أستغرقتها فى متابعة الحدث الفريد و الدعاء لله بكل ما أحفظ من أدعيه أن يسترها ربنا مع الجدعان بتوع حرس الحدود و يحميهم من كل سوء و أن يسدد رميتهم .. و دعيت كمان و الله على المهربين أن ربنا يجعلهم عبره و يجعل من بين أيديهم سدا و من خلفهم سدا و يغشيهم فهم لا يبصرون ..

و الحمد لله أدركت أن دعائى قد أستجيب بعد ما توقف ضرب النار و أنقشعت رائحة البارود من الهواء و أصبح لا يشق الصمت سوى صوت تأوهات و توجعات و كلام بلهجه بدويه يقطعه صيحات من الجنود اللى بدأوا فى التوافد من على الطرف البعيد للشاطىء مهرولين و هم بيهددوا أى شىء سيتحرك بضرب النار فى المليان فورا .. و بدأت أضواء السيارات الجيب التابعه للجيش و أيضا سيارات الاٍسعاف فى التوافد .. و بدأ الكثيرون من الرجال المرتدين اليونيفورم المموهه و بيحملوا كشافات قويه فى مسح الشاطىء و كذلك مياه البحر ..

مش أكتر من نص ساعه و عاد كل شىء كما كان .. و كانت الست سومه بتختم أعجوبتها حيرت قبى معاك ( آى نعم و الله حيرتى قلبى معاكى ) و أنسحب كل الموجودين من حيث أتوا و أنسحبت كل السيارات من حيث أتت و بقيت لوحدى أسترجع شريط أحداث ما حصل و أنا مذهول حتى غلبنى النوم فى مكانى ..

يوم 16 يونيو 2008 :

أدركت حجم المعركه اللى دارت بالأمس لما توجهت للشاطىء صباحا و معايا كوباية النيسكافيه العجب و شاهدت بعينى آثار الدماء المتناثره بغزاره و آثار عجلات السيارات المحفوره على الرمال .. و دعوت الله من كل قلبى أن تكون هذه دماء المهربين الأندال فقط ..

و لسه بأتأمل فى الرمال المخضبه باللون الأحمر و ألاقى جاى عليا من اليمين قمرين :)

قمرين و الله قمرين .. قمرين مصريين لابسين يونيفورم حرس الحدود و مسلحين و معاهم كيس بيضعوا فيه أشياء لم أتبينها بيلتقطوها من على الرمال .. و واحد فيهم شايل هلب مركب و كوفيه بدويه و فردة شبشب أتضح لى فيما بعد أنها حاجات خاصه بالمهربين و التانى منهمك بشده فى تأمل الرمال ..

قالوا لى : صباح الخير .. معلش يا حاج دوشناك اٍمبارح !!

- دوشتونى ؟؟ بس طمنونى الأول أيه الأخبار ؟؟

اللى كان بيلتقط أظرف الطلقات الفارغه توقف عن عمله و قال ببساطه شديده و كأنه أمر عادى جدا :

- الحمد لله قدرنا نمنع التهريبه و ظبطنا 300 كيلو مخدرات متنوعه و موتنا واحد من المهربين و هرب واحد تانى فى البحر ( ألقت الأمواج بجثته على الشاطىء بعد 3 أيام ) و قبضنا على أربعه ..

قلت و أنا مبتهج :

- ما شاء الله ربنا ينصركم .. بس طمنونى على زمايلكم اللى ضربوا نار على المهربين الحمد لله بخير ؟؟

بصوا لبعض و أبتسموا و قال أحدهم فى تواضع :

- زمايلنا ؟؟!! زمايلنا مين ؟؟ ما أحنا أهو قدامك اللى ضربنا النار اٍمبارح ..

أبتهجت أكثر و قلت :

- طيب الحمد لله على سلامتكم ..

*************************************

ربنا يخليكم لمصر يا ولاد مصر .. و يحميكم و يحرسكم زى ما بتحمونا و بتحرسونا من أى خطر بيهددنا و اٍحنا نايمين فى بيوتنا فى العسل فى التكييف و أنتم بتراعوا شغلكم و واجبكم تحت كل الظروف اللى لا يقدر على تحملها سواكم ..

و أما أنتم أيها الجبناء الأندال فأعلموا أن رصاص رجال جيش مصر مستنيكم فى كل مكان و فى كل شبر من أرض سيناء و أوعوا تفتكروا أنها سايبه و لا فاضيه زى ما الناس فاهمين .. لاااااااا .. دى متأمنه ضد أى خطر فوق ما العقل يجيب .. و كفايه مش حأقول أكتر من كده :)

أدعوا لى بقى و النبى يخلص تصريح السفارى .. و أشوفكم البوست الجاى اٍن شاء الله و أحكى لكم عن الست الهولنديه مارجا اللى أتجوزت فى نويبع عياد اٍبن الشيخ زايد و كان مهرها 3 جمال و 6 معيز و جحشين ..

تقبلوا تحياتى ..

السبت، 18 يوليو، 2009

من راس سدر أحييكم ..

صباح الخير أعزائى المدونات و المدونين ..
أولا بأعتذر لكم بشده عن عدم الرد على تعليقاتكم عندى فى الكام بوست اللى فاتوا و ده و الله لأنشغالى الشديد جدا بأمور كثيره طبعا مش أهم من الرد على التعليقات لكن أيضا ظروف النت السيئه و بطئه المفرط من أسباب عدم الرد ..
أرجو تتقبلوا عذرى ..
******************************************
من جنوب سيناء أحييكم حيث أمر بتجربه فريده ..
تجربة الاٍستعداد للقيام برحلة سفارى فى قلب الصحراء للمره الثالثه فى حياتى .. رحلة السفارى بالنسبه لى بتبدأ من راس سدر و منها لأبو زنيمه على بعد 80 كم و منها للتلال الملونه شرقا فى عمق الصحراء على بعد 80 كم تانيه ..
طبعا رحله زى دى لا يجوز أن يأخذها الاٍنسان ببساطه و سهوله لأنها بتحتاج لتجهيزات كتيره بيتولاها دليل بدوى من العالمين بطبيعة الاٍقامه فى قلب الصحراء .. و الدليل اللى معايا و أسمه طبعا لازم يكون سالم سلمان بيتولى اٍستخراج التصاريح الأمنيه اللازمه و الاٍبلاغ بمنتهى الدقه عن خط سير الرحله و نقطة النهايه و اليوم المتوقع لعودة صاحب الرحله و كده يعنى ..
أيضا بيتولى الدليل تجهيز خيمه و كليم لزوم النوم .. و شوية لوازم للأكل زى الدقيق و الرز و المعلبات و شوية لوازم اٍسعافات أوليه أهمها ترياق لسم العقارب و الأفاعى و طبعا كميه لا بأس بها من الماء و بيتولى نقل هذه الأغراض بسيارته النصف نقل و معاه السائح لو مش معاه سياره ملائمه للسير فى طرق الصحراء الغير ممهده أو غير متمرس على كده ..
أحب أعرفكم أن فى قلب الصحراء جربت كل أنواع خطوط الموبايلات ما أشتغلش غير خط فودافون و دى ملاحظه مهمه جدا جدا جدا للى ناوى ينعزل عن العالم لو حدث طارىء لا قدر الله ..
دلوقتى أنا فى مدينة راس سدر و هى أول مدينه بمعنى كلمة مدينه تقابل القادم من القاهره فى طريقه لشرم الشيخ بعد عبور نفق الشهيد أحمد حمدى رحمه الله و بتبعد عن النفق من مدخله الشرقى بحوالى 60 كم ..
راس سدر بجد مدينه رائعه رائعه .. بتجمع ما بين الطابع البدوى السيناوى و ما بين المد العمرانى السياحى المتمثل فى عشرات القرى و المنتجعات السياحيه اللى بتطل على خليج السويس من الناحيه المقابله للعين السخنه فى الجهه الغربيه من الخليج ..
و رغم فخامة و روعة هذه المنتجعات المقصور دخولها على أصحاب الشاليهات و الفيلل لكن الحق يقال اٍن الشاطىء العام أجمل و أحلى من الشواطىء الخاصه لنظافته الشديده و لخلوه من الصخور و تمتعه بشاطىء رملى جميل تم تنظيفه بعنايه و مهاره على عكس شواطىء المنتجعات السياحيه الخاصه ..
و اٍيجار الشقق للمصيفين بيتراوح ما بين 70 و 200 جنيه فى اليوم على حسب شياكة الشقه .. أما فى الشتاء فبينخفض السعر للربع و ربما أقل ..
مدينة راس سدر فيها محلات و كافيتريات و مطاعم و أسواق كثيره و أسعار السلع فيها عاديه بدون مبالغه كبيره و أغلب أصحابها و العاملين فيها من أهالى مدينة السويس أصلا .. و أما سكانها البدو الأصليين اللى بيضحكوا دائما و عينيهم على طول مقفوله نص قفله ( ايوه كده بالظبط علشان السبب اللى أنتم قلتوه ) فبيعملوا فى مهن مختلفه زى قيادة سيارات الأجره و النصف نقل و الزراعه بالتنقيط و مش لازم تعرفوا بيزرعوا أيه .. و بيمتازوا بالأمانه و الحفاظ على الوعد و لو على رقابتهم و الكرم خاصة مع الضيوف و الحفاظ على نسائهم و الرقه المتناهيه فى التعامل معهن ..
بحر راس سدر يخلو تقريبا من الشعاب المرجانيه و ربما يكون ده السبب فى كونها غير جاذبه لهواة الغطس من مختلف أنحاء العالم رغم بعدها عن شرم الشيخ بحوالى 300 كم و كلنا طبعا عارفين شهرة شرم الشيخ فى هذا المجال ..


لكن الحقيقه أن بحر راس سدر بيمتاز بهدوئه اللى يغيظ و نظافة مياهه و خلوها من أى ملوثات و أيضا بيمتاز بوجود الكثير من الدرافيل اللى يمكن مشاهدتها بالعين المجرده أثناء قفزها و لهوها و بجد شكلهم ممتع جدا ..

و أيضا تحدث ظاهره لها العجب هناك لم أرها فى أى مكان آخر و هو اٍنحسار مياه البحر لمسافة كيلو متر تقريبا أثناء فترة الظهيره مره و قبل المغرب بشويه مره تانيه مما يتيح سهولة المشى على قاع البحر و بالتالى جمع أحجام عجيبه من الكابوريا النتايه اللى وصى على أكلها الحكماء .. و لكن يجب توخى الحذر لأن فجأه البحر بيرجع يعلى تانى و بيطبق على كل شىء فى لحظة غضب مخيفه بتذكرنى بقصة اٍبتلاع البحر لفرعون موسى و جنوده و من المفارقات العجيبه وجود عيون موسى الشهيره بالقرب من المكان اللى بأحكى لكم عنه و اللى بيقال أن سيدنا موسى فجرها لبنى اٍسرائيل بقدرة الله عقب عبورهم للبحر و فرعون وراهم عاوز يقفشهم .. و قد شاهدت بعينى هذه العيون ال 12 و شربت من مائها و توضأت و سبحان الكريم اللى جعل طعمها أحلى من الشهد و الله ..

مدينة راس سدر أيام الاٍحتلال الاٍسرائيلى لشبه جزيرة سيناء كانت مركز لأجهزة الاٍستخبارات و الأمن الاٍسرائيليه و لا يزال لليوم يتذكر كبار السن من أهل المدينه العمليات الهجوميه العنيفه اللى كانت بتقوم بها قوات الكوماندوز المصريه ضد هذه الأجهزه أيام حرب الاٍستنزاف .. و كثير أيضا من أهل المدينه كانوا منضمين سرا لمنظمة أولاد الأرض اللى تكونت سرا من أهل سيناء لمقاومة الاٍحتلال الاٍسرائيلى و سقتهم الذل كاسات بسبب ما أشتهر عن أهل راس سدر من وطنيه و دهاء و سعة حيله و درايه تامه بدروب و مسالك الصحراء الشاسعه ..

و من الجدير بالذكر أنه أمام شاطىء المدينه تقبع فى أعماق الخليج 11 طائره فانتوم اٍسرائيليه تم اٍسقاطها بواسطة أبطال القوات الجويه المصريين فى حرب أكتوبر اللى شنوا هجمات جويه عنيفه على مراكز الاٍستخبارات العسكريه الاٍسرائيليه بالمدينه فى الدقائق الأولى للحرب و سويتها بالأرض كما حكى لى ..

بينى و بين راس سدر غرام و هيام و همسات و كلام ..

أهرب اٍليها كلما أشتقت للهدوء و السكينه خاصة فى الشتاء حيث تخلو تماما من الناس و بيبقى بوزى فى بوز رجال حرس الحدود الجدعان المصحصحين اللى بيحموا الشاطىء من تسرب أى صنف من الممنوعات من و اٍلى الجانب الغربى من الخليج برجوله و دقه متناهيه .. ولى فى هذا الخصوص حكايه عجيبه غريبه تشهد بمدى صدق و فدائية و أمانة رجال حرس الحدود بس مش عارف هل يجوز لى حكيها و لا لأ ؟؟

و أما الآن فى عز الصيف فشاطىء المنتجع بيزدحم بالمصيفين على كل الأحجام لما الواحد عينيه أحولت و الله و لا مفر لى من رحلة السفارى حيث لا شىء سوى السماء و التلال الملونه و صخب الصمت و التفكر فى خلق السماوات و الأرض ربنا ما خلقت هذا باطلا سبحانك !!

اٍن شاء الله أشوفكم فى بوست تانى قبل ما أبدأ رحلة السفارى أحكى لكم عن شوية ملاحظات كده خاصه بالسياحه الداخليه فى جنوب سيناء ..

متشكر لكم ..

الجمعة، 10 يوليو، 2009

أحبببك يا أبيض :))

أوباما فى اٍيطاليا (لاحظوا ضحكة ساركوزى اللئيمه )

أوباما فى مصر

هو أنت كده ؟؟ !!

شكلك حتحصل كلينتون بدرى بدرى يا سى ياسين :))

الثلاثاء، 7 يوليو، 2009

صلاة الزين على عيالنا

Soccer - animated Pictures, Images and Photos

لأنى أب حنين على عيالى و قلبى بيهفهف عليهم هفهفه قررت فى لحظة تجلى أنى أبيع الواد اٍبنى الصغير آخر العنقود السكر المعقود عبد الرحمن عمرو الشهير بالواد الشيخ عبده حيث أنه أزهرى نشأ و ترعرع فى أحضان الأزهر الشريف منذ نعومة أظافره ..

و أصل الحكايه اٍنى بعد تفكير عميق وجدت اٍن أسلم السبل لضمان مستقبل سوبر لوكس للولد أنه يطلع لعيب كوره محترف و من ثم يتباع لنادى من الأنديه الكبيره بالملايين زى ما بنسمع عن لعيبة اليومين دول .. و مين عارف يمكن ربنا يكرمه و يتباع لنادى من نوادى أوروبا و تبقى الحكايه زهزهت معاه و يمكن مع اٍخواته كمان ..

و مكدبتش خبر .. و فضلت أنكش بمنكاش لما عترت و اللقا نصيب فى أكاديميه متخصصه فى تدريب العيال اللى فى سنه على مهارات الساحره المستديره بيديرها نخبه من لعيبة مصر العالميين الكبار اللى اٍعتزلوا المستطيل الأخضر و أنشأوا هذه الأكاديميه الفذه لتخريج جيل جديد من اللاعبين المحترفين ..

صحيح لاقيت الأمرين علشان ألحق الولد بالأكاديميه لأنها مقصوره على أبناء صفوة المجتمع و لأنها أصلا بتقع داخل كمباوند بيمر الداخل له على عدة نقاط تفتيش بسبب أهمية بعض ساكنيه .. و لكن الحمد لله أستطعت بتوفيقه تعالى أن ألحقه بها و أن أدبر مصاريفها المرتفعه و كله يهون فى حبك يا بت يا مدوره ..

و تمضى الشهور .. و يندمج الواد الشيخ عبده فى الأكاديميه و تبرز مواهبه الفذه كراس حربه ( الله يمسيك بالخير يا بيبو ) لا يشق له غبار .. و يحرز ميدالية أحسن هداف فى الأكاديميه .. و يشكل مع رفاقه فريق كوره مرعب لفرق الكمباوندات المجاوره بفضل مدربهم الكابتن الدولى و المحترف السابق فى اٍيطاليا ..

و أنا بقى يا فرحتى بأبنى كابتن مصر المستقبل لما أروح معاه يوم بعد يوم أتابع تدريباته و مبارياته .. و أقول فى عقل بالى يا ويلك يا ميدو يا ضلام ليلك يا أبو تريكه اٍدارى من كسفتك يا زيدان جايلكم لعيب محترف مافيش زيه .. بس ربكم لما يحب يكشف المستور بيكشفه رغما عن مناخير الجميع ..

الأسبوع اللى فات بقى أعلنوا فى الأكاديميه عن اٍقامة مباراه وديه بين فريق الواد أبنى و بين فريق مركز شباب بهموه السوق يوم 6\7 !!!!

فين يا أخوانا بهموه السوق دى ؟؟؟ الله و رسوله أعلم .. محدش عارف !!!

اللى يقول تقع بهموه السوق بعد بهموه المحطه بأتنين كيلو .. و اللى يقول لا لا دى قبل بهموه البلد بتلات مصارف و حاجات كده يعنى بس الخلاصه أنها بتقع فى أدغال الريف المصرى العتيد و برضو الله أعلم ..

اٍمبارح بقى كان ميعاد الماتش .. و أرتدت الأكاديميه أبهى الحلل مسبقا بمناسبة الفوز المرتقب على فريق عيال الفلاحين اللى حيسحقوهم فريق عيال الأغنيا و اللى لبسوا الأطقم الجديده اللى بالشىء الفلانى و جزم الكوره الجديده اللى برضو بالشىء الفلانى و اللى مش فاكر الوله أبنى قالى على اٍسمها بس نسيته و اللى أعرفه أنها على أيامنا كان اٍسمها الجزمه أم بزابيز .. و طبعا أهالى العيال برضو ملوا المدرجات علشان يفرحوا بعيالهم و كلهم من النوعيه اللى بالكم فيها دى اللى هم بيتكلموا كلمه عربى و عشره لامؤاخذه فرنساوى .. و الكل مترقب وصول الفريق الضيف اللى جاى ينسحق على حسب اٍعتقاد الجميع ..

و فجأتن يوصل الأتوبيس بتاعهم .. أتوبيس كده منظره كئيب و متهالك من اللى بنسميه فى الفلاحين الحلزونه .. و ينزل منه الفريق الضيف ..

العيال يا حبايب قلبى قد عيالنا برضو .. لابسين يا حبايبى شورتات و فانلات قديمه أكل عليها الدهر و شرب و مش كلهم كمان لابسين زى بعض .. و فى رجليهم جزم مشكله كاوتش من باتا على كوتشيات مخرمه و معاهم مدربهم اللى كان لابس تريننج من أبو 30 جنيه و كان خايف عليهم و بيلمهم تحت جناحه كأنهم كتاكيته خاصة أن عيال الفلاحين بان عليهم الاٍرتباك و الخجل بسبب اٍستقبال عيالنا اللى ينقرصوا و كان اٍستقبال ملىء بالسخريه و الملاحظات الرخمه عن هيئتهم المتواضعه ..

بس ربكم و الحق أنا من البصه الأولى أدركت الفرق الكبير بين بنية عيالنا الجسديه و بين العيال دول .. و كانت المقارنه مش فى صالح عيالنا أبدا !!

و أبتدا الماتش .. و شويه شويه بدأ فريق عيال الفلاحين فى فرض سيطرته المطلقه على الملعب .. و أظهروا رجوله و فدائيه و اٍستبسال رغم هتافات مشجعى فريق الأغنيا المحبطه .. و بدأ مهرجان تسجيل الأهداف :)

اٍكتشفت أن عيالنا فاقدين لحرفية تنفيذ الخطه اللى رسمها لهم مدربهم اللى أشهد له بالبراعه .. و فى المقابل كان الفريق الضيف يلتزم تمام الاٍلتزام بخطته و ينفذها حرفيا .. بان لى الفرق الشاسع بين لياقة الفريقين البدنيه و لما سلمت على عيال الفلاحين بعد اٍنتهاء الماتش يدا بيد أدركت من خشونة أيدين أغلبهم أنهم بيشتغلوا فى الغيط مع أهاليهم و ده طبعا أكسبهم صحه مش موجوده عند عيالنا المترفهين المتدلعين بتوع النجتس و الكورن فليكس و النوم فى التكييف للعصر ..

و أبتدا أهالى العيال الأغنيا يبلموا و المامهات دموعهم اللولى تسح على خدودهم البنور بسبب خيبة عيالهم القويه اللى أتصرف عليهم مبالغ طائله علشان يبقوا لعيبه محترفين ..

و لاقيت نفسى بدون ما أشعر بأشجع العيال لعيبة بهموه السوق أنا و سواق أتوبيسهم و أم عيل فيهم منقبه كانت بتناول العيال أزايز الميه علشان يشربوا .. و شويه شويه أبتدا التشجيع فى المدرجات يتنقل لصالح الفريق الضيف اٍعجابا بحرفنتهم و اٍصرارهم المخيف على الفوز مما زاد فى وكسة عيالنا و بقوا يجروا مفرشحين فى الملعب بدون هدف و لا غايه زى اللى ندهتهم النداهه و طبعا كانت النهايه أنهم أتهزموا هزيمه تقيله منكره غير مسبوقه ..
عارفين مع صفاره نهاية الماتش كانت النتيجه كام ؟؟

8 \ 3

أيوه 8 \ 3 لصالح فريق عيال الفلاحين مقابل 3 أهداف لعيالنا الواد أبنى سجل منهم هدفين ..

و طبعا أنسحبوا عيالنا من الملعب و هم يجرون ورائهم أذيال الوكسه و الخيبه القويه كعروسه راجعه على بيت أبوها يوم الصباحيه بعد ما كانوا قبل الماتش ماليين الدنيا هيصه و عنظزه و نكت و تريقه على ولاد الفلاحين اللى حيرجعوا البلد يلموا الدوده من الغيط على حد قولهم ..

و أما العيال الغلابه التانيين اللى ربنا جبر بخاطرهم فبسم الله ما شاء الله اللهم صلى على حضرة نبينا الزين كحيل العين كانت فرحتهم بالنصر المؤزر على ولاد الأغنيا اللى تعاملوا معاهم من فوق لا تضاهيه فرحه و حملوا على أكتافهم القويه مدربهم و سواق أتوبيسهم بالمره و لفوا بيهم أرض الملعب الشيك أوى اللى أزعم أنهم عمروا ما لعبوا على ملعب بالأناقه دى قبل كده .. و اللى شرح فؤادى و بهجج خاطرى أن عيل فيهم معرفش جاب منين علم كبير أوى لمصر و أبتدا يلوح بيه فى فرحه عارمه :)

و أنا مروح بأبنى لاحظت أنه ساكت و متنح على غير العاده و لما سألته عن السبب و أنا بأضحك علشان أغيظه قال فى بجاحه تشوبها حسره : غلبونا يا بابا علشان الهوا كان ضدنا فى الشوطين !! و كمان بيزقوا و لعبهم خشن !! و الحكم كان موالس معاهم !! و بصراحه كده الماتش ده مش محسوب !!

قلت له : أبشر يا أبنى مادام وصلت لكده يبقى حتنضم للمنتخب فى يوم من الأيام ..

مبروك عليكى ولادك يا بهموه السوق .. ربنا يحرسهم و يحميهم .. و منصورين اٍن شاء الله دايما يا أولاد الفقرا على ولاد الأغنيا و بأهدى لكم من قلبى الأغنيه دى :)



weladna Online recorder

الاثنين، 6 يوليو، 2009

مروه ..

اللهم ابدلها دارا خيرا من دارهم واهلا خيرا من اهلها وادخلها الجنة واعذها من عذاب القبر ومن عذاب النار اللـهـم عاملها بما أنت أهله ولا تعاملها بما هى أهله ..
اللـهـم اجزها عن الاٍحسان إحسانا وعن الاٍساءة عفواً وغفراناً..
اللـهـم إن كانت محسنة فزد من حسناتها .. وإن كان مسيئة فتجاوز عن سيئاتها اللـهـم أدخلها الجنة من غير مناقشة حساب ولا سابقة عذاب .. اللـهـم اّنسها في وحدتها وفي وحشتها وفي غربتها .. اللـهـم أنزلها منزلاً مباركا وانت خير المنزلين .. اللـهـم أنزلها منازل الصديقين والشهداء والصالحين وحسن اولئك رفيقا .. اللـهـم اجعل قبرها روضة من رياض الجنة .. ولا تجعله حفرة من حفر النار .. اللـهـم أفسح لها في قبرها مد بصرها وأفرشه من فراش الجنة ..
اللـهـم اعذها من عذاب القبر .. وجاف ِالأرض عن جنبيها .. اللـهـم املأ قبرها بالرضا والنور والفسحة والسرور .. اللـهـم إنها فى ذمتك وحبل جوارك فقها فتنة القبر وعذاب النار وانت أهل الوفاء والحق فأغفر لها وأرحمها اٍنك أنت الغفور الرحيم ..
اللـهـم اٍنها أمتك وبنت عبدك خرجت من الدنيا و سعتها ومحبوبيها وأحبائها إلي ظلمة القبر وماهى لاقيه ..
اللـهـم اٍنها كانت تشهد أنك لا إله اٍلا أنت وأن محمداً عبدك ورسولك وانت أعلم بها ..
اللهم ثبتها عند السؤال .. اللهم اٍنا نتوسل بك اٍليك ونقسم بك عليك أن ترحمها ولا تعذبها .. اللـهـم انها نَزَلت بك وأنت خير منزول به واصبحت فقيره الي رحمتك وأنت غني عن عذابها .. اللـهـم اّتها برحمتك ورضاك وقها فتنة القبر وعذابه و أّتها برحمتك الأمن من عذابك حتي تبعثها إلي جنتك يا أرحم الراحمين ..
اللـهـم انقلها من مواطن الدود وضيق اللحود إلي جنات الخلود .. اللـهـم إحمها تحت الارض وأسترها يوم العرض ولا تخزها يوم يبعثون "يوم لا ينفع مال ولا بنون إالا من أتي الله بقلب سليم"
اللـهـم يمن كتابها ويسر حسابها وثقل بالحسنات ميزانها وثبت علي الصراط أقدامها واسكنها في اعلي الجنات بجوار حبيبك ومصطفاك صلي الله عليه وسلم اللـهـم اّمنها من فزع يوم القيامة ومن هول يوم القيامة وأجعل نفسها أّمنة مطمئنة ولقنها حجتها ..
اللـهـم اجعلها في بطن القبر مطمئنة وعند قيام الاشهاد أمنة وبجود رضوانك واثقة وإلي أعلي درجاتك سابقة .. اللـهـم اجعل عن يمينها نوراً حتي تبعثها اّمنًة مطمئنة في نور من نورك ..
اللـهـم انظر اليها نظرة رضا فإن من تنظر إليه نظرة رضا لا تعذبه ابداً اللـهـم أسكنها فسيح الجنان واغفر لها يارحمن وارحم يارحيم وتجاوز عما تعلم ياعليم ..
اللـهـم أعفو عنها فإنك القائل "ويعفو عن كثير"
اللـهـم اٍنها جاءت ببابك وأناخت بجنابك فَجْد عليها بعفوك وإكرامك وجد إحسانك ..
اللـهـم إن رحمتك وسعت كل شيء فأرحمها رحمة تطمئن بها نفسها وتقر به عينها ..
اللـهـم أحشرها مع المتقين إلي الرحمن وفداً ..
اللـهـم أحشرها مع أصحاب اليمين واجعل تحيتها سلام لك من أصحاب اليمين ..
اللـهـم بشرها بقولك "كلوا واشربوا هنئياً بما أسلفتم في الايام الخالية"
اللـهـم أجعلها من الذين سعدوا في الجنة خالدين فيها مادامت السموات والارض ..
اللـهـم لا نزكيها عليك ولكنا نحسبها اّمنه وعملت صالحاً فاجعل لها جنتين ذواتي أفنان بقولك: "ولمن خاف مقام ربه جنتان"
اللـهـم شفع فيها نبينا ومصطفاك واحشرها تحت لوائه وأسقها من يده الشريفة شربة هنيئة لاتظمأ بعدها ابداُُ ..
اللـهـم اجعلها في جنة الخلد التي وعد المتقون كانت جزاءا و مصيراُ لهم ما يشاءون وكان علي ربك وعداُ ومسئولاً ..
اللـهـم إنها صبرت علي البلاء فامنحها درجة الصابرين الذين يوفون اجورهم بغير حساب فإنك القائل " إنما يوفي الصابرون أجرهم بغير حساب "
اللـهـم اٍنها كانت مصلية لك فثبتها علي الصراط يوم تزل الاقدام ..
اللـهـم اٍنها كانت صائمة لك فأدخلها الجنة من باب الريان..
اللـهـم اٍنها كانت لكتابك تالية وسامع فشفع فيها القراّن وأرحمها من النيران واجعلها يارحمن ترتقي في الجنة إلي اّخر اّية قرأتها أو سمعتها وأخر حرف تلته ..
اللـهـم ارزقها بكل حرف في القراّن حلاوة .. وبكل كلمة كرامة وبكل اّية سعادة وبكل سورة سلامة وبكل جْزءٍ جَزاءا ..
اللـهـم أرحمها فاٍنها كانت مسلمة وأغفر لها فاٍنها كانت مؤمنة وأدخلها الجنة فاٍنها كانت بنبيك مصدقًة وسامحها فاٍنها كانت لكتابك مرتلة ..
اللـهـم أغفر لحينا وميتنا وشاهدنا وغائبنا وصغيرنا وكبيرنا وذَكّرنَا وأنثانا ..
اللـهـم من أحييته منا فأحيه علي الاٍسلام ومن توفيته منا فتوفه علي الايمان ..
اللـهـم لا تحرمنا أجرها ولا تفتنا بعدها ..
اللـهـم أرحمنا اٍٍذا أتانا اليقين وعرق منا الجبين و كثر الأنين والحنين ..
اللـهـم أرحمنا اٍذا يأس منا الطبيب وبكي علينا الحبيب وتخلي عنا القريب والغريب وارتفع النشيج والنحيب ..
اللـهـم أرحمنا اٍذا اشتدت الكربات وتوالت الحسرات واطبقت الروعات وفاضت العبرات وتكشفت العورات وتعطلت القوي والقدرات ..
اللـهـم أرحمنا اٍذا بلغت التراقي وقيل من راق وتأكدت فجيعة الفراق للأهل .. والفراق وقد حَمً القضاء فليس من واق ..
اللـهـم أرحمنا اٍذا حملنا علي الأعناق اٍلي ربك يومئذ المساق وداعا أبديا للدور و الأسواق والأقلام والأوراق الي من تذل له الجباه والاعناق ..
اللـهـم أرحمنا اٍذا وورينا التراب وغلقت القبور والأبواب وأنقض الأهل والأحباب فإذا الوحشة والوحدة وهول الحساب ..
اللـهـم أرحمنا اٍذا فارقنا النعيم وأنقطع النسيم وقيل ماغرك بربك الكريم ..
اللـهـم أرحمنا اٍذا أقمنا للسؤال وخاننا المقال ولم ينفع جاه ولامال ولا عيال وقد حال الحال وليس اٍلا فضل الكبير المتعال ..
اللـهـم أرحمنا اٍذا نَسي اٍسمنا ودَرس رسمنا وأحاط بنا قسمنا ووسعنا ..
اللـهـم أرحمنا اٍذا اَهملنا فلم يزرنا زائر ولم يذكرنا ذاكر ومالنا من قوة ولا ناصر فلا أمل اٍلا في القاهر القادر الغافر يامن اٍذا وعد وفي .. واذا توعد عفا .. وشفع يارب فينا حبيبنا المصطفي وأجعلنا ممن صفا ووفا وبالله إكتفي يا ارحم الراحمين ياحي يا قيوم يا بديع السموات والارض ياذا الجلال والاكرام ..
اللـهـم اٍنها أمتك و بنت عبدك و بنت أمتك ماتت و هى تشهد لك بالوحدانية و لرسولك بالشهادة فأغفر لها إنك انت الغفار ..
اللـهـم لا تحرمنا أجرها ولا تفتنا بعدها و اغفر لنا و لها و أجمعنا معها في جنات النعيم يا رب العالمين ..
اللـهـم أنزل علي أهلها الصبر والسلوان و أرضهم بقضائك .. اللـهـم ثبتهم علي القول الثابت في الحياة الدنيا وفي الاخرة ويوم يقوم الأشهاد ..
اللـهـم صلي وسلم وبارك علي سيدنا محمد وعلي اّله وصحبه وسلم إلي يوم الدين ..
الفاتحة ..

الخميس، 2 يوليو، 2009

راحت عليكى يا حفيظه :))

أييييييه .. دنيا !!
و الله وراحت عليكى يا عربيتى يا جيب يا رانجلر يا عشرة السنين ..


خلاص بقى بقيتى عجوزه زيى و مابقتيش حمل مشاويرى الصعبه اللى تهد الحيل ..
صحيح فى شبابك كنتى وحش جبار يا خاله رانجلر و كنت معجب بيكى و بقوتك الخرافيه اللى زى قوة الديناصور جنب بقية العربيات الورق
الكورى و اليابانى اللى كانوا بيخافوا منك و يعملوا لك ألف حساب لما تعدى بس من جنبهم و تعملى كدهو :

green dinosaur Pictures, Images and Photos بس خلاص بقى راحت عليكى يا تيزه و مبقتيش تستحملينى و لا طيقانى و بقيتى على طول بتشتكى مره من دبرياجك و مره من فراملك و مره لامؤاخذه من فتيسك لما يا ينبوع الرخامه بقيت أخاف أركبك لحسن تولعى بيا زى ما عملتيها فى مره و فين فى محطة بنزين أون ذا رن و لولا ستر ربنا كنتى عملتى مصيبه يا كلبه ..


طيب بلاش دى .. فاكره يا بت يا رانجلر لما طرمبتك قطعت بنزين و أنا فى المزرعه فى وسط الصحرا حيث لا قرطار و لا نافخ نار و لولا فضل الله و جدعنة البرنسيس شمس التهار كانت السباع الضاريه و الضباع الجوعانه طلعوا عليا و أكلونى و قرقشوا عضمى ..
و لا يا حلاوتك لما تكييفك عطل و فشل فى تصليحه عتاة بتوع التكييف .. و بقيت برضو بأركبك و أروح بيكى الصحراء كل يوم و أنا مش متكيف منك خالص و أنزل منك بأشر عرق و لا اللى فى الساونا .. بس أعمل أيه كنت مضطر لك يا من كنتى حبيبتى و أنتى بندالتك زى ما تكونى كنتى عارفه و عماله تتمادى فى رخامتك و كل يوم تطلعى لى بمصيبه شكل لما خليتى عيشتى مرار ..

و لا اٍبتلاء الردياتير بتاعك يا مجرمه أنتى اللى لففنى حوالين نفسى شهور طويله و خلانى أمشى بيكى و أنا شايل جركنين مياه كل واحد 20 لتر زى ما أكون طالع هجره للصحراء الكبرى لما بقيت مضحكة العيال و كل ندل فيهم بكلمه و اللى يقول لى : حج مبرور يا آبه .. و اللى يسألنى : أنت بتروح تبيع الميه دى فين يا أبويا ؟؟ .. و أضطرتينى أخيرا يا قاسيه أنى أبتدى أشحت عربية الواد أبنى الكبير ده بتاع الصاعقه اللى كل ما أشحت منه عربيته بسبب أعطالك يبكتنى على غلو البنزين زى ما أكون وزير البترول و يلمح لى من تحت لتحت علشان أفولها له !!

ما أنكرش يا طنط أنك شيلتينى سنين طويله أنا و عيالى و ليا معاكى ذكريات هى من أجمل ذكريات عمرى .. بس النصيب غلاب يا حفيظه و أبتدت عينيا تبص بره لما قعدتى لى زى أمنا الغوله تنكدى عليا طول الوقت و أنتى جنبك زمايلك الحلوين المقطقطين اللى يرجعوا شباب العواجيز اللى زيى .. لحد ما عينيا وقعت على السنيوره دى :





عربيه جيب شيروكى قلبى أغرم بيها من أول لقاء animated hearts Pictures, Images and Photos و ماسبتهاش اٍلا لما بقت على اٍسمى .. و سبحان العاطى الوهاب مسبب الأسباب الرازق بغير حساب ..
صحيح هى مش بنت بنوت بس اللى يشوفها و الله يفتكرها لسه على الزيرو و الحقيقه أنى لسه بأفهمها اٍكمنها كلها بالكومبيوتر و كده بس بعونك يا رب و بخبرتى الواسعه فى هذا المجال أبتديت أفهمها و ألينها اٍكمنى حنين و رومانسى مع العربيات ..
و أما أنتى أيتها الرانجلر العنيده الشرسه يا قوقه فخليكى كده عبره أديكى بتنفعى العيال برضو و لعلمك بقى كذب من قال : القديمه تحلى و لو كانت وحله !!
و يا كل من عنده عربيه قديمه قاعده فى أرابيزه تغلس عليه غلاسات أشكال و ألوان شد حيلك و أنوى خير و هاتلها عربيه ناعمه و عسوله زى البنوته دى :

cute girl blinkie Pictures, Images and Photos

تعوضك عن وجع قلب الميكانيكيه و تحرق بيها دم عربيتك القديمه :)