صوره غريبه شويه !!غريبه أوى الحقيقه !!
دققوا فيها كده .. مين البيه أبو بدله و كرافته اللى واقف وسط الفلاحين دول ؟؟
ده شارون يا أخواننا هههههههه
أيوه شارون فى المنوفيه فى أواخر السبعينيات !!
و أصل الحكايه أنه فى الوقت ده كان شارون وزير للزراعه فى اٍسرائيل .. و كانت خطوات التفارب بين مصر و اٍسرائيل بتسير بخطى حثيثه نحو تطبيع العلاقات بين البلدين بعد زيارة السادات للقدس .. و كان التعاون فى المجال الزراعى من المواضيع المطروحه على مائدة المفاوضات ..
فى تلكم الأثناء قام الغير مأسوف على وعيه شارون بجوله بطائرة هليكوبتر فوق بعض المناطق الصحراويه المتاخمه للشريط الأخضر حول مجرى النيل و التى أعلنها المصريون كمناطق مرغوب اٍستصلاحها .. و بما أن الاٍسرائيليين ولاد ترابنتين الكلب عندهم تقنيه عاليه و خبره لا ينكرها اٍلا مغالط فى زراعة الصحراء فقد عرض شارون على الرئيس السادات بعض الأفكار حول اٍستصلاح و زراعة هذه المناطق الصحراويه .. و بالمناسبه شارون كان عنده خبره كويسه جدا فى هذا المجال رغم كونه عسكرى محترف لأن عنده مزرعه كبيره فى صحراء النقب و كان بيربى فيها خرفان بجانب زراعات التنقيط ..
السادات فضل يسمع له يسمع له و بعدين قال له : يا شارون اٍحنا مجال الزراعات الحديثه دىه جديده علينا كفلاحين مصريين و عاوز أشوف مثال لكلامك ده علشان أقتنع بيه و أأأأأأأ أقوم أتشجع و أوافق على موضوع التعاون الزراعى بين مصر و أأأأأأأ اٍسرائيل !!
شارون قال له : و ماله يا سيادة الريس .. أدينا حتة أرض بور و أنا أبعت النهارده أجيب الخبرا بتوعنا من اٍسرائيل و معاهم معداتهم و أتفرج عليها كمان 3 شهور و شوف اٍحنا حنعمل فيها ..
الرئيس السادات بمنتهى اللامبالاه و عدم الاٍهتمام بالموضوع قال له طيب حنبقى نشوف الحكايه دى بعدين و راح داخل فى مواضيع تانيه بعيده عن هذا الموضوع ..
تانى يوم واحد من مساعدى السادات قال لشارون اٍن فيه قطعة أرض فى ميت أبو الكوم مساحتها حوالى 25 فدان و جاهزه أن يتعمل فيها التجربه اللى حتظهر مدى براعة الخبراء الاٍسرائيليين فى الزراعه ..
شارون فرح جدا و بعت فى نفس اليوم جاب الخبرا و المعدات و التجهيزات و على حتة الأرض عدل اللى فى المنوفيه ..
و أستعانوا طبعا ببعض الفلاحين المصريين اللى شارون متصور معاهم فى الصوره اللى فوق دى .. و شويه شويه أبتدت حتة الأرض البور تخضر و تزهزه و تدى محصول خيار و فلفل رومى من الحجم السوبر اللى ماكنش معروف فى مصر قبل كده .. و الحقيقه أن الاٍسرائيليين لم يطلبوا جنيه واحد ثمنا لاٍستصلاح هذه الأرض بل تحملوا كافة المصاريف حتى شاى و دخان الفلاحين المصاروه اللى أشتغلوا تحت اٍشراف الخبراء بتوعهم ..
و بعد ما نجحت التجربه ذهب المفش شارون للسادات فرحا مبتهجا و قال له : آدى التجربه نجحت بجداره يا سيادة الرئيس و تعالى أتأكد بنفسك و الأرض البور بقت جنه مختلفه ألوانها يالا بقى يا ريس أدينا مصلحة تخضير الصحرا اللى وعدتنا بيها ..
السادات ضحك بطريقته المعروفه و راح ضارب شارون على كتفه و قال له : تجربة أيه يا راجل بلاش كلام فارغ حتة الأرض دى بتاعتى و ملحقه ببيتى و عموما شكرا لأنكم زرعتوها لى !!
و راح داخل فى مواضيع تانيه بعيده عن الموضوع الأساسى وسط ذهول شارون من اٍبن المنوفيه الأصلى الرئيس السادات ..
هناك 24 تعليقًا:
هاهاهااااااااااااييييييييييييي
المنوفية كل يوم بتثبت جدارتها
وشارون مكانه الحقيقي في المنوفية
الا بلفور ما وعدش اليهود بالمنوفية ليه؟
معلومة تستحق التقدير
نواره
منوره يا أم المدونين
بلفور كان يخاف على اليهود من أنهم يعيشوا فى المنوفيه هع هع هع
DOLA
كل التقدير و الشكر ليك على المرور و التعليق و مدوناتك القيمه
الله يجزايكم فرحتونى وضحكتونى
خلتونى افتخر بالمنايفة تانى
طول عمري وانا عارفه انا المنايفه دول تتفات لهم بلاد
طب ان كان شاروع ما عرفش يسلك هناك
ما تعملوا منهم جيش يا اخوانا ونخلص الليله
سلطوهم عيلهم
السادات كان مكاااااره كان داهيه فعلا
عمرو اول مره اسمع الكلام ده شكرا لك
مدونة ناهض العدوى
يا عم مالهم المنايفه ؟ كل بلد فيها الكويس و اللى مش كويس عادى يعنى
المنايفه اللى أعرفهم كويسين و بتوع شغل و ناس جد يعنى
أنت منوفى ؟
السلام عليكم ورحمة
الله تعالى وبركاته
ومتقلش السادات كان عارفهم وعارف مكرهم ليه؟ وانهم لو عملوا شىء باليمين يبقى بياخذوا (قبله) بالشمال
واديك شايف وللاسف جميع الشتلات الموجودة فى مزارعنا اسرائيلى واكبر
مثال الفراولة اللى لا طعم له لكن شكل وبس !يافرحتى بتقاوم الآفات لكن كلها مبيدات ما يعلم بيها الا ربنا سبحانه وتعالى.ربنا يستر علينا مما يحاك لنا فى (الغرفات المغلقة)
صبرنى يا رب
ما هو فعلا نص الجيش منايفه أنتى مش عارفه الحقيقه دى ؟
المنايفه بيحبوا العسكريه و الاٍنضباط و بيتفانوا فى خدمة الجيش
حقيقه تانيه غريبه برضو شويه أن لما حللوا ال DNA بتاعت مومياوات الفراعنه لقيوها أقرب ما تكون للمنايفه و تكاد تطابقها فى حين أنها تبتعد جدا عن الصعايده على عكس ما هو كان متوقع !! و أن الصعايده تكاد بصمتهم الوراثيه تتطابق مع بصمة أهالى الجزيره العربيه
نيجى بقى للشراقوه اللى أنا منهم الباحثين يا ستى لقيوا أن بصمتهم الوراثيه قريبه من بصمة قبائل المغرب و فعلا أنا جدى الكبير كان مهاجر و أستوطن الشرقيه
الحكايه اللى فى البوست دى ذكرها شارون فى مذكراته و على ما أذكر قريتها فى جريدة الفجر أعتقد مش فاكر بالظبط لكن أعتقد كانت فى الفجر و الصوره كمان
norahaty
أهلا بيكى يا دكتوره
أيوه هو ده اللى أنا بأقوله أن السادات كان صاحى لهم و عارف ملاعيبهم و ماكنش سهل أبدا
خبراء الزراعه الاٍسرائيليين بيلعبوا فى الجينات و ده ثبت أنه أكبر خطر على الصحه
الدكتور عمر خطاب أستاذ علم الجينات فى جامعة مش عارف أيه فى أمريكا شرح لى من سنتين اٍزاى مثلا ثمرة القرع العسلى الاٍسرائيلى بتوصل لوزن 200 كيلو !! فى فتره زمنيه بسيطه فى حين أن المنتج الطبيعى فى مثل نفس الفتره لا يزيد وزنه عن 10 كيلو !!
المسأله ببساطه أنهم توصلوا لطريقه بيصيبوا بيها الثمر بالسرطان !! أيوه السرطان
فبالتالى الخلايا بيصيبها الجنون و بتفقد الساعه البيولوجيه بتاعتها اللى بتنظم لها النمو فبتكبر بجنون و بتضخم بجنون و بتدى أيضا أحجام مجنونه و لكن فى النهايه طبعا هى غير مأمونه بالنسبه لآكلها لأنه بياكل شىء مسرطن
ربنا يستر
العزيز عمرو
موضوع جميل للغايةوبه الكثير بين السطور
وبعيدا عن الصراع بين المحافظات
شكرا على معلومة ان السادات من المنوفية
لاننى اول مرة اعرفها
تحياتى دوما
يعنى السادات قلوظ لشارون العمة ؟؟؟اتارى الراجل مخه ضرب ...تصور بقى ياعمرو ان اليهود راجعين يدوروا على أملاكهم اللى كانت هنا قبل ميطردهم عبد الناصر فيه فى اسكندرية فيلا تشغلها أكاديمية السادات للعلوم الإدارية فوجىء امن الأكاديمية بشاب جالهم وعرفهم ان دى كانت فيلتهم زمان وانه اتولد فيها وهو اللى زرع بعض أشجارها النادرة فى الحديقة ,,وكان جاى يعاين المبنى وربما صوره وثمنه عشان فى الوقت المناسب يقول عاوز بيتى ؟؟؟هم دول ولاد ال...ذينه..لوشوفت حد منهم عنك اديله بال....
أحمد الصباغ
أهلا بيك يا عزيزى المواصلاتى و كل سنه و أنت طيب
الأزهرى
أهلا أهلا بصديقى المختفى :)
لا هو مافيش صراعات بين المحافظات و لا حاجه كلنا ندين بالولاء للوطن الواحد
بس بجد أول مره تعرف أن السادات كان منوفى ؟
المنوفيه أخرجت العديد و العديد من الأسماء اللامعه فى كل المجالات و زور مدونة ناهض العدوى و أنت حتعرف الحقيقه دى
تحياتى و أهلا بيك
maxbeta3zaman
المدونه نورت بزيارتك يا صديقى
أيوه مظبوط دول بيدوروا على أملاك بالمليارات بحسابات النهارده حتى المدافن بتاعتهم اللى فى البساتين و اللى أتشالت علشات الطريق الدائرى اللى طالع على القطاميه برضو بيتمنوا الأرض و المبانى اللى كانت عليها
بس و لا حيقدروا يوصلوا طبعا لحاجه
لغاية منتصف السبعينيات كان لينا جيران يهود فى العباسيه و كانوا ساكنين فى البيت اللى على الناصيه قبل سينما سهير مدام فورتينيه الخياطه و عيالها فيكتور و روزيت و روزا و باعوا البيت قبل ما يختفوا و غالبا راحوا على اٍسرائيل بعد ما سمحوا بالسفر بين البلدين
على الله ما يرجعوش يطالبوا بالبيت بتاعهم تانى ههههه
هو راح فين صحيح
عمرو كل سنه وانت طيب وفيه مثل بيقول المنوفى لا يلوفى لو اكلته لحم الكتوفى ههههههههههههههه يعنى على مر الاجيال والتعاملات الشخصيه هو فعلا كده
هههههههههههههههههههه
وجول وجول وجول
بصراحة السادات ده ملهوش حل
منوفي منوفي يعني
بصراحة اتكيفت اوي من الحركة دي
الله دا اسعد خبر سمعته في حياتي والله انا كرهي للسيد السادات قل 4طن مش بيقولك لو حطيت الحية مع المنوفي في كيس وبالنسبة للاخت نوارة-هاي ازيك-بلفور مش محتاج يوعد اليهود بحاجة لان بلدي كلها الله لايوريكي والمنافية اللي بتشوفوهم عز-الشاذلي-طلعت
مصطفي ابو علاء هم بعض من كثير
ميرسي يا اخ عمرو علي الظرف
معلش في السؤال
اصل انا عندي ديلاي في
التفكير لما السادات كان عارف مكايدهم
كان عامل خده مداس ليهم ليه؟؟؟؟
كل عام وأنت والأسرة والأمة الأسلامية بخير
السلام عليكم ورحمة الله وبركاته
كل عام وانتم بخير
بصراحة الموضوع جميييل جدا واجمل ما فيه الفكاهة
شكرا لانك لفتت نظري لمعلومة كانت غايبة عني
لك كل التقدير والاحترام
أعجبني كثيرا البوست ومعلومات جديرة بالاهتمام ومدونتك بصراحة من أجمل المدونات التي نتابعها
السادات ده كان منوفي منوفي يعني
يعني السادات باع لشارون العتبه الخضرا
يجعل كلامنا خفيف علي المنايفه
إرسال تعليق