اٍن كان حظى فى الحياة قليلها . فالصبر يا مولاى فيه رضاك

تتصورى ؟؟ لا عمرى حقدر ع الفراق و لا أنتى عمرك تقدرى !!

lma elsheta Upload Music

مصنع الرجال

مساء الخير أعزائى المدونات و المدونين ..

بأستسمحكم أنى حأفصل شويه عن سلسلة بوستات من الصعيد الجوانى و عاوز أتكلم فى موضوع هام و حيوى و لا يحتمل التأجيل خاصة اٍن الأجازه المدرسيه قد بدأت بالفعل ..

دلوقتى يا جماعة الخير حان وقت الاٍهتمام برعاية أولادنا من الناحيه الرياضيه كما راعيناهم دراسيا أثناء الدراسه .. و كما أوصانا بذلك سيدنا الفاروق عمر و هو ليس حديثا نبويا كما نبهنى لذلك الأبن beautiful mind - جزاه الله خيرا - عن السباحه و الرمايه و ركوب الخيل و اللى هى مقوله معجزه بمقاييس الزمان لأن هذه الرياضات الثلاثه بالذات جمعت فى منافعها كل منافع الرياضات على اٍختلافها ..

و أنا عن نفسى الحقيقه و بصراحه لم يهتم أبويا رحمة الله عليه بتنشئتى تنشئه رياضيه فى طفولتى السعيده رغم اٍتساع مداركه الفكريه و كان أقصى اٍهتمامه الرياضى بى أنه أشترى لى بندقيه رش نمره واحد ماركة رمسيس علشان ألسوع بيها الكلاب المكلبظه من بلكونة بيتنا القديم فى العباسيه اللى كانت بتتخذ من سقف عربيته ملاذا آمنا ( الكلب من دول كان ياخد الرشه فى وركه و يبص لى باٍستهزاء و يكمل نوم و الله ) ..

و روحى يا سنين و تعالى يا سنين و مياه كثيره جرت فى نهر الحياه .. ورزقنى الله بالذريه من الأولاد و البنات .. و كانت أول تجربه لى فى الاٍهتمام بالرياضه مع أبنى الكبير .. و اللى حأكيهالكم و اللى أتمنى أن يستفيد منها القراء ..

بدأت التجربه لما لاحظت أن الواد أبنى ده بيميل لحياة الدعه و الخمول خاصة لما بلغ العشرين .. أغلب يومه بيقضيه قدام الأنترنت يشيت مع البنوتات حول العالم و حاطط جنبه لترات البيبسى الساقعه و أكياس الشيبسى و الجيرسى من كل نوع .. و طبعا بقى ليله نهار و نهاره ليل لاٍختلاف فروق التوقيت فى بلاد البنات اللى بيشيت معاهم !! و لما يزهق بقى من الأنترنت يقوم يحضن جيتاره و هاتك يا مزيكا و هو لابس شورت جينز مقطع و تى شيرت مهربد و لا مؤاخذه شبشب بصباع و عامل زى الشحاتين الطلاينه اللى فى ميدان أفينتى .. ناهيكم طبعا عن منظر شعره و ذقنه اللى سايبهم من غير لا حلاقه و لا تهذيب اٍعتقادا منه اٍن الفنان الروش لازم يكون منظره كده ..

ده غير بقى طبعا طريقته فى الكلام مع الكبير و الصغير اللى ماكنتش بتعجبنى أبدا و اللى كان سببها اٍختلال الساعه البيولوجيه بداخله .. و حاجات بقى يعنى تخنق كتير من حاجات الشباب اللى فى السن ده و اللى بالنوعيه دى ..

كان نتيجة ده طبعا أن الوله أبتدا يطلع له كرش من القعده و قلة الحركه و هو فى هذه السن المبكره خاصة أنه ضخم الجسم أصلا بشكل ملحوظ و كان أبعد مشوار يمشيه على رجليه هو مرواحه لبيت مدرس الموسيقى اللى هو أصلا لازق فى بيتنا .. و كان أقصى مجهود يعمله أنه يلعب فى ...... ودنه يعنى ..

طبعا ماكنش عاجبنى حاله .. و ريقى نشف معاه : يا أبنى يا حبيبى روح ألعب شوية رياضه يشدوا جسمك .. قوم يا حبيبى أجرى فى الشارع شويه .. يا عين أبوك حترهرط و تمهمط و مش حينفع تتلم تانى و مش حتلاقى و لا عروسه ترضى بمنظرك ده !!

و الواد ودن من طين و ودن من عجين .. و كان بيهاودنى على قد عقلى و يقولى باٍبتسامه لئيمه :

- أشترك لى يا بابا فى نادى دريم و أنا أروح ..

دريم حته واحده يا وله ؟؟ ما يقدر على القدره اٍلا ربنا يا أبنى .. فرجه قريب ..

ماكنتش عارف بقى أن ربنا سبحانه و تعالى مدبر من عنده تدبيره اٍنما أيه !!!

فى يوم كده رجليا خدتنى عند ميدان الرمايه اللى فى آخر شارع الهرم .. و ألاقيهم معلقين اٍعلان كبير على نادى الرمايه بتاع القوات المسلحه بيعلنوا فيه عن فتح باب القبول للشباب فى مدرسة الصاعقه حتى اٍشراف ظباط متخصصين !!

و من غير ما أفكر و الله لاقيت نفسى داخل الاٍداره و بسأل عن شروط القبول .. و بعتونى مع مجند للرائد أسامه قائد المدرسه الرياضيه .. و هو ظابط صاعقه بكل ما تحمل الكلمه من معنى شكلا و موضوعا .. و الراجل الحقيقه أستقبلنى بود و ترحاب لكن من النوع الميرى .. و أستفسر منى اٍذا كنت من أفراد القوات المسلحه الحاليين أو السابقين فأفهمته أنى لم أنل هذا الشرف من قبل رغم أنى خريج ثانويه عسكريه عريقه ( أيام ما كان الشباب فى عصرنا بيفخروا باٍلتحاقهم بالمدارس الثانويه العسكريه ) ..

و الرائد أسامه بدوره أفهمنى أن المدرسه الرياضيه لها شروط محدده و صعبه لقبول الطالب بها و هى بتؤهل أصلا الشاب للاٍلتحاق بالكليات العسكريه و كمان بتبنى جسده رياضيا و بتخليه قادر على تحمل أشق الظروف و أيضا بتساعده على الثقه بنفسه و بقدراته البدنيه و الذهنيه ..

حلو أوى :)

صبرت و نلت يا أبنى هع هع هع ( ضحكة شماته )

لما روحت البيت ناديت على الوله باٍسم الدلع اللى بيحبه فأتانى مستبشرا بعد ما قلت له : أشتركت لك فى حاجه حلوه أوى يا لولوش :)

سألنى و على وشه اٍبتسامه متفائله :

- خير يا بابا بس أوعى يكون نادى الجولف بتاع دريم لحسن الشمس بقت حاميه :)

قلت له :

- ما تخافش يا حبيبى .. أشتركت لك فى مدرسة الصاعقه :)

سألنى و قد اٍنقلبت سحنته و كأنه غير مصدق لما يسمع :

- مدرسة مين ؟؟!!

- مدرسة الصاعقه يا حبيب أبوك حيث مصنع الرجال و مستودع الأبطال .. و روح يا أبنى قلبى و ربى راضيين عليك ..

طبعا الموضوع بالنسبه له ماكنش سهل لتقبله .. و الكام يوم اللى سبقوا تقدمه للمدرسه ورانى الويل و وريته ظلام الليل لحد ما أقتنع أنه لا فكاك من تنفيذ رغبتى .. و أستعملت حقى كأب له الحق فى أن يكون ديكتاتور رحيم بأولاده لما بيلاقى خطر على مستقبلهم و سلوكياتهم و صحتهم .. و البيت أتقلب مناحه من جميع الأطراف بس و لا همنى :))

شفتوا فيلم عبود على الحدود ؟؟

شفتوا علاء ولى الدين أول ما شاف جنود الصاعقه قال أيه ؟؟ قال : " و لا تحسبن الذين قتلوا فى سبيل الله أمواتا بل أحياءا عند ربهم يرزقون "

أهو الواد أبنى عمل كده .. جات له كرشة نفس و وشه أزرق و ركبه سابت و بقت بتخبط فى بعضها لما أول ما دخلنا المدرسه و أنا ماسكه من أيده و قابلنا فى وشنا عشرات الشباب اللى زى الورد البلدى المزهزه ضخام الأجسام أصحاء البنيه ربنا يحميهم و هم بيجروا فى طابور منتظم بطريقة أفراد الصاعقه و بيصيحوا بصوت واحد بيرج أرجاء الفضاء : صاعقه .. تضحيه .. فداء ..

بصيت على الوله لاقيت فكه التحتانى بيترعش و بيقول لى :

- هى الحرب قامت يا أبويا ؟؟!! أنتم مش عبرتم القناه و خلاص ؟؟!!

- أطمن يا حبيبى أطمن و هو أنا حألاقى صدر حنين عليك يا أبنى أحن من الجيش المصرى :))

و سلمته من أيده للرائد أسامه و وصيته عليه توصيه لوز أوى .. و توقعت أن اللى أكله الوله وز وز حيطلع على جتته بط بط ..

و أجرى يا أيام و تعالى يا أيام .. و روحى يا شهور و تعالى يا شهور .. و تنتهى الدوره على خير ..

دوره بدأها الواد أبنى بأنه كان بيكسل يقوم يطفى جهاز التكييف اللى فى أوضته و أنتهت بأنه أجتاز جميع التدريبات الشاقه الرهيبه اللى فى الكليب اللى فوق ده .. و بعد ما أتفرد جسمه و أتشكل بشكل رجولى خشن لاقيته أنه عشق الحياه العسكريه كأغلب الشباب .. و أتغيرت هيئته هو وزملاء دفعته و بقوا بنى آدمين .. و لاقيت أن أخلاقه تحسنت و تبدلت و أصبح رجل يعتمد عليه بجد .. و موقن أن معايشته لحياة الخشونه جعلته يقلع عن عادات سيئه كثيره بعضها معلن و بعضها غير معلن ..

كان الهدف الأساسى عندى لما ألحقته بمدرسة الصاعقه أنه يلعب رياضه تفيده صحيا و ذهنيا و أن يفرغ طاقته فيما يفيده لكنى وجدت أن الهدف ده جر وراءه ما لا يحصى من الفوائد و الفضل لله أولا و لرجال الجيش ثانيا ..

عاوز أقول أنه حان الوقت بجد للاٍلتفات لصحة عيالنا الجسديه و النفسيه .. صبيان و بنات .. و أن مافيش حجه أبدا لعدم ممارسة الرياضه اللى أبسط أشكالها المشى نص ساعه يوميا و القيام بشوية تمارين خفيفه اٍن شاء الله حتى فى البيت .. لأن ده اللى حيقعد لهم فى كبرهم و لأننا بجد مش عاوزين نكرر أخطاء اللى سبقونا و لم يهتموا بتنشئة عيالهم على حب الرياضه و ده بيؤدى بالتالى لمشاكل صعبه جدا .. و مش بأقول طبعا أنه من الضرورى أن يجتاز الشباب تجربة الواد أبنى لأن دى كانت تجربه خاصه بيه و لا تعد كنموذج يعنى لما ينبغى أن يكون عليه الحال ..

البوست الجاى بقى اٍن شاء الله حأحكيلكم عن تجربتى التانيه مع الوله الصغير الشيخ عبده اللى قررت أبيعه بتمن كويس كما ينبغى لأب مثلى محب لعياله .. و اٍزاى بدأت بالفعل تنفيذ هذه الخطه النميسه بأنى أشتركت له فى أكاديمية نادر السيد لكرة القدم :)

أشوفكم على خير اٍن شاء الله و لكم كل الشكر و التحيه ..

تحديث مهم : من الصعيد الجوانى .. حبيت بنوته من أخميم !!

تحديث مهم : أشتكى كتير من المدونين أن الكتابه مش بتظهر على بعض المدونات و لا حتى الصور !! و من ضمنهم مدونتى ..

التفسير البلوجرى المنطقى للمشكله دى أنهم بيستعملوا برنامج فايرفوكس للتصفح لكن لو اٍستعملوا برنامج اٍنترنت اٍكسبلورر فبعون الله ستحل المشكله ..

مساء الخير ..
وقفنا فى البوست اللى فات عند رغبتى فى زيارة مدينة أخميم الشهيره جدا ليس فقط محليا و لكن عالميا أبضا لأسباب كثيره حأقول لكم عليها ..

أخميم أصلا بتقع جغرافيا على الضفه الشرقيه لنهر النيل العظيم .. بتبعد عن سوهاج جنوبا بحوالى نص ساعه بالسياره و مثلهم من نجع العيساويه .. و بتشتمل على عدد من القرى هى بالترتيب : نيده .. آبار الملك .. ابار الوقف .. الصوامعه شرق .. نجوع الصوامعه شرق .. عزبة العرب .. جزيرة محروس .. عرب الأطاوله .. الحواويش .. الديابات .. السلامونى .. الكوله .. نجع العيساويه .. الاحايوه شرق ..

و كل قريه من دول يا أخوانا يتألف فيها عشرميت ألف كتاب !!

المؤرخ هيرودوت لما أتكلم عن مدينة أخميم قال أنها كانت محتله بواسطة اليونانين .. و كان فيها حاميه عسكريه يونانيه قويه للغايه اٍسمها هيرموتيب .. و حاول المحتلين أن يصبغوا أهل أخميم بالصبغه اليونانيه اٍجتماعيا و دينيا .. لكن على مين يا عم اليونان ؟؟ الصعايده الأخميميين فى هذا الوقت البعيد كانت دمائهم بتفور بحب الوطن و لم يقبلوا أبدا أن تمحى هويتهم المصريه و لما فاض بهم الكيل هبوا هبه صعيديه مصريه على المحتلين اليونان و حرقوهم بجاز و أشتعلت الثوره اللى ألهبتها الروح الوطنيه و أمتدت للصعيد كله و أنهارت قوات اليونان الطريه أمام صلابة الصعايده ذات الشهره العالميه و فروا من الصعيد كله و هم بيغنوا : رجب حوش صاحبك عنى !!

المهم يعنى ..

المقريزى كمان ذكر مدينة أخميم .. و قال أن عجائب الدنيا 30 !! و من ضمنها مدينة بربا اللى هى أخميم لما أنبهر بما فيها من آثار فرعونيه يحتار العقل فى روعتها .. و بما تحتويه من قصور و ممرات و سراديب تعد معجزه فى عالم الهندسه ليومنا هذا ..

أيضا المقريزى ذكر معلومه جديره بالدراسه و هى أن مدينة أخميم على أيام فرعون موسى كانت مركز تجمع جبابرة السحره المصريين !! و أن كان فيها 30000 ساحر بارعين و صفوتهم هم اللى أستعان بهم فرعون لينصروه على سيدنا موسى عليه و على نبينا المصطفى أفضل الصلاة و السلام فأراد ربنا أن يؤمنوا بنبيه لما ألقى موسى عصاه فلقفت ما يأفكون ..

لما فتح العرب المسلمين مصر أسموا أخميم كورة أخميم يعنى مركز كبير و بتتبعه عدة قرى .. و كان بيحدها من الشمال كورة طهطا و من الجنوب كورة قوص .. و كان بها أطلال مدينة بانوبوليس الاٍغريقيه اللى أنبهر العرب بروعة أعمدتها و زخارفها .. و أشتهرت أخميم على مر العصور بصناعة الحرير اليدوى و السكر .. و كان للحرير الأخميمى منذ القدم و ليومنا هذا شهره كبيره ..

مررنا فى الطريق من نجع العيساويه لأخميم على عدد من القرى الصغيره و برضو كانت مزارع القمح اللامتناهيه على الجانبين بتحف الطريق من أوله لآخره :

و عجبتنى أوى قرية الحواويش لأنها بجد قريه نضيفه جدا .. و أهلها ناس فى غاية الكرم و الطيبه ككل أهل سوهاج و لا يسمحوا أبدا أن يقوم الغريب عن قريتهم بدفع تمن المشروبات اللى شربها على القهوه أو يعنى الحاجه اللى زى القهوه اللى على الطريق و اٍلا أعتبروها سبه فى حقهم و تبقى مشكله كبيره لو أصر الضيف على الدفع .. فبلاش تحاولوا تدفعوا تمن الشرب و الأكل فى الحواويش لو زرتوها و آدينى عملت اللى عليا و قلت لكم ..

ندخل بقى على مدينة أخميم ..

الله على المدخل الواسع الجميل النظيف .. و يا حلاوة الثعلب اللى بيعدى الطريق قدام محطة كهرباء أخميم فى عز الضهر بمنتهى الهدوء و الطمأنينه !!!!!

و يا سلام على مشروع توسيع الطريق اللى بيجرى على قدم و ساق بأيدين العمال أبناء سوهاج المشهورين بتفانيهم فى العمل من غير هزار و لا لكاعه ..

- حنشوف أيه أول حاجه يا أبو اٍسلام ؟؟

أجاب :

- متحف أخميم يا بييه ..

- هى أخميم فيها متحف يا أبو اٍسلام ؟؟!!

- هيع هيع هيع (بيضحك بسخريه) أخميم فيها أثارات أكتر من الأجصر (الأقصر يعنى) يا بييه ..
و من ميدان كبير لميدان أصغر لشارع كبير لشارع أضيق حتى لاح على البعد مكان كده واسع و هابط عن مستوى الشارع شويه و متسور بسور حجرى مش عالى أوى و المكان كله محاط بالمنازل من جميع النواحى وسط كثافه سكانيه كبيره للغايه ..

دخلنا من الباب و أستقبلنا رجل شرطه مهيب الهيئه و رحب بنا ترحيبا عظيما و أرسل معنا رجل يرتدى الجلباب الصعيدى و يحمل سلاح آلى ليكون مرشدنا فى جولة المتحف المفتوح ..

الطريق يزداد هبوطا بس ممهد بشكل جيد جدا .. و على اليمين تمثال ضخم للغايه بدأت ملامحه تتضح :

أيه ده ؟؟!! هو ده بقى الحب من أول نظره ؟؟
مين البنوته الصعيديه الرائعه دى ؟؟!!


دى ميريت آمون !! اللى سحرتنى بجمالها و رقتها و غموضها .. و مياصتها :)

ميريت آمون بنت رمسيس التانى .. دلوعة باباها أشهر فراعنة مصر على الاٍطلاق و اللى كان بيقعدها على حجره و يداعب دقنها فى كل النقوش و الرسوم اللى جمعتهم ببعض .. و من حبه فيها تزوجها و كان كهلا .. و المعروف أن رمسيس التانى أنجب 150 ولد و بنت تزوج منهم ثلاثا فقط .. و كانت ميريت آمون (يعنى محبوبة آمون) أقرب عياله و بعدها أقرب زوجاته لقلبه .. و هى غير ميريت آتون بنت اٍخناتون من زوجته نفرتيتى و اللى أتولدت فى العام الثانى من حكم أبوها ..

بجد أنا وقفت قدام التمثال اللى بيبلغ طوله 11 متر و ذهلت !!

ذهلت من هذا الجمال الناعم الأسطورى اللى سحر الكثيرين من قبلى .. وتذكرت على الفور الأستاذ محمد هاشم صاحب دار ميريت للنشر و اللى أسمى مؤسسته على اٍسم هذه البنوته الجميله لما قال عنها : تشعر حين تنظر لتمثال ميريت أنها فرغت لتوها من قبلة !!

تمثال الأميره ميريت تم الكشف عنه سنة 1981 .. و عثر عليه بدون ساقين و لم يعثر عليهما حتى الآن بس تم عمل ساقين من الأسمنت البشع و تم لصقهما بالجسد و هو أطول تمثال لملكه أو أميره فرعونيه على الاٍطلاق .. و أختلف علماء الآثار وقتها حول شخصية هذه البنوته الصعيديه الحلويات !!

بعضهم قال أنه تمثال الملكه تى أم اٍخناتون اللى عاشت فى أخميم برضو و كانت دلوعة جوزها أمنوفيس التالت اللى ماكنش بيوقع لها كلمه الأرض أبدا ..

و بعضهم ظن و بعض الظن اٍثم أنه تمثال الملكه الجميله نفرتارى .. لكن الدكتور أحمد قدرى و الدكتور لبيب الحبشى أكدوا أنها ميريت آمون بنت رمسيس التانى و تأكد هذا الكلام لما تم الكشف عن النقوش اللى على التمثال بعد اٍزالة التراب عنه .. و كانت تصف ميريت بأنها : ميريت أمون جميلة الوجه مضيئة لقصرها كلما مشت فيه .. حبيبة سيد القطرين .. تقف دائما الى جانب مليكها رمسيس الثانى كما يجاور نجم الشمال برج الجوزاء .. عازفة شخشيخة سيستروم للاٍلهه موت وعازفة الهارب للاٍلهه حتحور و منشده بارعه لباقي الآلهه ..

يا عينى يا عينى يا سيدى يا سيدى .. يا روح قلبى من جوه يا ميريت !!

يعنى كمان بتحبى الموسيقى و بتعزفى و بنوته عسليايه و آخر بهججه :)

طيب المغرم بيكى عمو عمرو عازف بيانو قديم سماعى و بالنوته و حياة طعامتك و ممكن برضو أعزف لك للصبح بدون كلل و لا ملل لحد الجيران ما يستجيروا بالقسم علشان يعرفوا يناموا .. بس أنتى قولى آه يا حتة جاتوه ميل فيى و أنا أتقدم لأبوكى و أطلب أيدك منه :)

أبوكى ؟؟

أبوكى ميييين ؟؟

رمسيس التانى حته واحده !!!

لا يا أبله يفتح الله ..

وده الواحد يتعامل معاه اٍزاى ده ؟؟

ده شوفى أصلا يا ميريت يا حبيبتى أبوكى عاكش ملوك الحيثيين من شعرهم اٍزاى تمهيدا للفتك بيهم بالبلطه اللى فى أيده الشمال !!!

أبوكى ده جبار و مفترى و أصلا حاطط عينه عليكى علشان يتجوزك يعنى أروح جنبه فين أنا بقى ؟؟

بأقول لك أيه يا وردة الحب الصافى : خلينا كده أحسن .. أحبك من بعيد لبعيد و أقاسى فى بعدك الأهوال .. و أنضم عن طيب خاطر للى طيرتى عقلهم بجمالك و بهائك .. و أدينى كل ما حتسمح الظروف حتلاقينى عندك فى أخميم ..

أخميم ..

الله عليكى يا أخميم .. يا عايمه فوق بحيره لا تجف و لا تنضب من آثار الأجداد .. و على قولة واحد من أهلك : دى حاجه تزهج و الله !! كل ما ننوى ندج طرمبه نلاجى أثارات لمن الواحد بجى مش عارف يدجها فييين ؟؟!!!

بقى الحكايه كده ؟؟

العجيبه بقى أن الآثار الموجوده فى أخميم بتنتمى مش بس للحضاره الفرعونيه و أسراتها و لكن أيضا لحضارات أخرى نمت و أزدهرت على أرضها زى الحضاره الاٍغريقيه مثلا .. بصوا التمثال ده المجاور لتمثال محبوبتى ميريت :

ده تمثال فينوس كما قيل لى بس ده النسخه المحتشمه منه و للأسف بدون رأس .. و عثر عليه برضو فى أخميم بس شتان ما بين جمالك المصرى يا ميريت و ما بين مقصوفة الرقبه الخوجايه فينوس ..

و خلصت زيارتى للمتحف ..

و غادرته و عينى على ميريت اللى أرتبطت بها اٍرتباط صعب وصفه و لكن أزعم أن للنفس البشريه دهاليز من الصعب توصيفها و لا فهمها !!

باى باى يا ميريت .. يا بنوتة الصعيد يا اللى خطفتى قلبى و أنا فى السن ده !! بس اٍن جيتى للحق بقى أنتى أكبر منى ييجى ب 3000 سنه :))

خرجنا من المتحف المفتوح .. و سألت طبعا عن متاجر الحرير الأخميمى اليدوى المشهور عالميا من آلاف السنين .. و ذهلت و فجعت لما أخبرت أنه ما بقاش فيه خلاص هذه الصناعه الجميله و أستبدلت بمنتجات الصين القبيحه رديئة الخامات و الصنع !!!!!!!!

و فعلا تجولت شويه فى السوق الرئيسى .. و مالقيتش فى كل المحلات غير بضاعة الصين و محلات معلقه لانجيريهات نسائيه تنافس ما هو موجود فى محلات المهندسين و ده شىء غريب أن تعرض مثل هذ القطع الصغنونه علنا فى الصعيد الجوانى و تقلب بين أيدى الشاريات هكذا علنا !!

فييييين و فييييييين لما واحد أبن حلال دلنى على آخر مشغل للحرير اليدوى فى أخميم و يقع قدام المتحف اللى كنت فيه مباشرة ..

المشغل يقع فى بيت ريفى أنيق و شديد النظافه من بيوت باشوات زمان و بيشغل الدور الأرضى بالكامل و يبدو أن صاحبه يسكن فى الدور العلوى من نفس البيت و اٍسمه مش فاكر أيه الخطيب ..

صالة عرض المشغولات اليدويه تمتلىء بالمعروضات و خاصة قماش المفارش لزوم جهاز العرايس :

الميزه و القيمه الحقيقيه فى هذه الأقمشه أن صناعتها كلها يدوى على الأنوال بغير أى اٍستعانه بماكينات النسيج .. و هى شديدة النعومه و الجوده .. و أشتريت من هناك شال جميل هديه لأغلى اٍنسانه فى الدنيا :)

الأستاذ الخطيب صاحب المشغل أخبرنى أن صناعة الحرير اليدوى فى طريقها للاٍندثار .. لأن السوق لا يساعد على اٍستمرارها و لأن السياح فى أخميم قل عددهم بشده فى السنوات الأخيره و هم كانوا عماد تجارة هذه الصناعه الرائعه اللى كانت بتدر دخل جيد لأصحابها و للبنات العاملات فى المشاغل .. و أضاف على كده كمان سبب هام جدا و هو أن الزبون دلوقتى بيهتم برخص تمن المنتج و مش مهم جودته أو قيمته و ده بسبب غلاء المعيشه أصلا و بسبب زحف المنتجات الصينيه على الأسواق ..

للأسف يعنى ..

- يالا يا أبو اٍسلام خلصنا اليوم على خير و لله الحمد ..
- على فييين يا بييه ؟؟

- على الأوتيل يا أبو اٍسلام !!

- أوتييل أييه يا بييه ؟؟

- مطرح ما خدتنى الصبح يا أبو اٍسلااااام !!

- أيوه أيوه .. جصدك الباخره بجا هع هع هع (يعنى بيضحك فى سخريه)

و ده كان نموذج للحوارات بينى و بينه ..

و أخيرا غادرت أخميم و أنا أحمل بداخلى ذكريات بجد من أجمل ذكريات حياتى و وجه ميريت لا يفارق خيالى السارح بعيدا و أنا أتأمل دروب أخميم العتيقه حيث عاشت هنا ميريت الرائعه المذهله و ماتت و ضم تراب أخميم جسدها الشاب ..

أييييييييييه كل من عليها فان .. بس للى يتعظ و الله ..

و رجعت الأوتيل قبل المغرب بشويتين.. الباخره على رأى أبو اٍسلام و قبل أى شىء توجهت رأسا اٍلى المطعم لأن الحب و الوجد لا يمنع برضو عصافير البطن أنها تزقزق و تصوت كمان .. فكان فى اٍنتظارى حقيقه تقبلتها بنفس راضيه و عين دامعه و قلب مكلوم و هى أنهم خلاص شطبوا الغدا و عليا بقى الاٍنتظار للعشاء .. عارفين العشاء كان مقرر له اٍمتى ؟؟

الساعه 5 الفجر :))

و لولا لطفك يا رب أنك ألهمتنى و أفتكرت طبق الفاكهه الملوكى اللى فى الأوضه لكنت مت جوعا .. و فعلا نزلت عليه حتتك بتتك نزول جند رمسيس التانى على قادش ..

و أفتكرت ميريت حبيبة قلبى لما أفتكرت أبوها و قطمت قطمه من التفاحه الأمريكانى و سرحت شويه و أبتسمت بس رجعت أستعذت بالله العزيز من الشيطان الرجيم :)

البوست اللى جاى بقى باٍذنك يارب حيكون عن شوية حكايات كده متفرقه لكواليس تصوير المسلسل و حكايات العاملين العجيبه على الباخره .. و حتلاقوا فيه حقائق غريبه أوى بجد .. فترقبونا ..

و لكم خالص الشكر و التحيه ..

من الصعيد الجوانى .. عيد ميلاد نور الشريف ..

أسعد الله صباحكم بكل خير أعزائى المدونات و المدونين ..

لما أنتهت زيارتى للدير الأبيض على خير - زى ما قلت لكم فى البوست اللى فات - كنا بنصارع الوقت للوصول للمركب سوبك الراسيه على ساحل نجع العيساويه و كلى أمل فى اللحاق بالحفل اللى كان مقرر اٍقامته بمناسبة وصول الأستاذ نور الشريف فى أول يوم له لبدء التصوير و كمان بمناسبة عيد ميلاده اللى كان أحتفلت به معظم الفضائيات قبل هذا الحفل بكام يوم ..

لما وصلت المركب قبل الغروب بحوالى نص ساعه عرفت أن الأستاذ نور و مساعدينه لسه ما وصلوش و أنهم فى الطريق و حيوصلوا كمان ساعه اٍلا ربع علما أنه فضل الحضور لنجع العيساويه بالسياره و مش بالقطار ( يا بخته ) و مش بالطائره اللى لازم تنزل اٍما فى مطار أسيوط أو مطار الأقصر اللى بينهم و بين المركب حوالى ساعه و نص بالعربيه ..

قلت حلو أوى ..

فرصه الواحد يستحمى و يزيل شبرين التراب و العفره اللى لزقوا على جتتى من رحلة النهارده و يتكولن و يلبس اللى ما تلبسش علشان ده برضو عيد ميلاد الأستاذ نور يعنى مش أى كلام :)

أنجزت المهمه .. و طلعت على سطح المركب أتأمل الشمس و قد بدأت فى المغيب خلف الضفه الغربيه للنيل .. و كان هذا المشهد الساحر :

بعدها بدقائق حسيت بحركه غير عاديه على المركب و ناس طالعه و ناس نازله و حركة نشاط كده .. فتوقعت أن الأستاذ نور قد وصل .. و بالفعل لاحت سياره ميكروباص تابعه لشركة سياحه و وقفت أمام المدخل .. و أطلق الريس على قبطان المركب الأبواق بصوت عالى جدا شق الهدوء اللى تعودنا عليه كتحيه لوصول الأستاذ نور الشريف ..

و لكن هيهات !!

علينا واحد :)

الأستاذ نور ما نزلش من السياره اللى كانت بتحمل مساعديه و عدد كبير جدا من الحقائب الضخمه اللى بتحوى ملابسه و لوازم التصوير .. و سمعت الريس على بيزعق بصوت جهورى للى قال له اٍن الأستاذ وصل و خلاه يطلق الأبواق أونطه :)

- أمال فين الأستاذ ؟؟!!

سألت واحد من مساعديه ..

و علمت أن الحاج سيف كبير نجع العيساويه قام رجالته باْيقاف السياره اللى كان بيستقلها الأستاذ نور و أصر على دعوته لبيته اللى بيقع على مدخل النجع للقيام بواجب الضيافه تجاهه قبل أن يدخل القريه على عادة أهل الصعيد شديدى الكرم و اللى لا ينافسهم فى كرمهم سوى نحن و أعوذ بالله من قولة نحن معشر الشراقوه .. و أيضا أرسل من يدعو كل الطاقم الأول من العاملين بالمسلسل بغض النظر عن السبع ساعات اللى قضاها الأستاذ نور فى رحلته من القاهره للنجع .. و طبعا يعنى لا يجوز رفض أو الاٍعتذار عن هذه الدعوه فى الصعيد و اٍلا توبجا عيبه و شينه و الله وحده يعلم بعواقب الأمور :)

نص ساعه كده كمان و وصلت السياره اللى بتقل الأستاذ نور للمركب و المره دى بجد يعنى :) و أنطلقت مره تانيه الأبواق لتحية الأستاذ :

وصول الأستاذ نور للمركب

و هو بيدخل المركب

طبعا الاٍستقبال داخل المركب بقى كان شىء خرافى من كل العاملين بالمسلسل من فنانين و فنيين و اللى بتربطهم بالأستاذ نور صلات وثيقه لأنه محبوب من الجميع زى ما عرفت بعد كده لتواضعه الشديد و اٍلتزامه بمواعيد العمل و الراحه و حرصه الفائق على أن تسود روح المحبه فى أى عمل بيشارك فيه ..

كمان كان فى اٍستقباله على الباب الداخلى للمركب الريس على القبطان و مساعدوه و أيضا كل طاقم العاملين على الباخره و أشتغل التصوير بكاميرات الموبايل و الاٍبتسامه لم تفارق وجه الأستاذ نور أبدا رغم أنى رأيت الاٍجهاد الشديد واضح على وجهه لأنه ما لحقش يرتاح بعد وصوله من القاهره ..

الصدفه البحته جعلت جناح الأستاذ المخصص له و هو رقم 306 يقع مباشرة أمام غرفتى رقم 305 و لا يفصل بينهما سوى خطوتين هم عرض الممر اللى بتقع على جانبيه الغرف و الأجنحه ..

الحقيقه يا جماعه مش عاوز أتكلم كتير عن نور الشريف الفنان لأنه حيكون كلام متكرر لا فائده منه .. الخلاصه أنه فنان ملتزم جدا و شديد الحساسيه تجاه الأعمال المسيئه لمسيرة الفنان .. لا عمرنا شفناه بيعمل عمل تافه الغرض منه اٍضحاك المتفرج و خلاص .. و لا عمرنا سمعناه بيتكلم كلام فارغ الغرض منه التقرب لأولى الأمور حتى لو كان على حساب تاريخه الفنى ..

أنا اللى على اليمين برضو علشان ما تتلخبطوش يعنى

الصوره دى كانت أثناء تناول العشاء .. و الأستاذ نور رفض كل أنواع الطعام رغم فخامتها لما عرف أن الشيف عامل كشرى و طلب يجيبوا له طبق كشرى محبش أكل منه و أبدى اٍعجابه بيه .. بصراحه أنا بصيت لكمية اللحوم اللى قدامى و أنكسفت على دمى !!

لما سألته ذات مره و اٍحنا قاعدين بالليل على سطح المركب أيه أقرب عمل فنى لنفسك يا أستاذ نور ؟؟

قال بدون تردد :

- ناجى العلى .. فيلم ناجى العلى ..

و ألتفت خلفه يتأمل صفحة النيل و قد اٍنعكس عليها وجه القمر ..

السياسه و واقع الحال العربى .. شيئان هما محور أحاديث الأستاذ بعيدا عن اللوكيشن .. و الحق أن آراءه التى يعلنها فى وسائل الاٍعلام هى هى نفسها التى سمعتها منه لم يغير منها حرفا و لم يبدل فيها على عكس الكثيرين من المشاهير الذين جالستهم و اللى بيبقى كلامهم المعلن غير كلامهم اللى مش معلن :))

نور الشريف قست عليه الحياه قليلا فى طفولته .. القسوه لا تكون دائما عن طريق الماديات لأنه كان من أسره ميسورة الحال .. مثلا هو أكتشف أنه يتيم لما دخل المدرسه و أستغرب فى دهشه طفوليه لما علم أن اٍسم أبوه اللى المفروض يكتبه ملحقا باٍسمه ليس هو اٍسم الرجل اللى كان بيعتقد أنه أبوه و قد ساعدته شقيقته الكبرى على فهم هذا اللغز .. و أزعم أن هذا الموقف قد أثر فى حياته و فى طريقة معاملته لمن هم أقل منه تأثيرا كبيرا ..

نور الشريف اٍنسان متواضع لأقصى درجات التواضع .. لم تبهر أضواء الشهره عينيه .. و لم تنسه المكانه المرموقه التى وصل اٍليها كفنان معدود ضمن أكثر 10 ممثلين فى العالم نجوميه أنه فى النهايه اٍنسان .. اٍنسان يتعامل مع الجميع من هذا المنطلق .. و له تصرف لاحظته و أستغربت له أنه بيقوم و يقف و يبتسم لما حد من المتردوتيلات يضع له المشروب !!

و رغم اٍجهاده الشديد بسبب الرحله التى قام بها من القاهره للعيساويه و برغم الضجه التى حدثت بسبب وصوله للمركب ناهيكم كمان عن أنى ما رحمتوش و هاتك يا كلام و أسئله اٍلا أنه مانسيش يتابع بالموبايلات الأتنين اللى معلقهم فى رقبته آخر تطورات الموقف العائلى بين مديرة منزله و بين زوجها اللى كان بينهم خلاف و كان بيطمئن أن الأمور بينهم هدأت و المياه عادت لمساراتها الطبيعيه !!

الأستاذ نور له طبيعه خاصه جدا قد تكون موجوده لدى أغلب الفنانين الكبار و له طقوس يعرفها كل من يشاركه العمل قبل أن يبدأ التصوير و هى تبدأ مباشرة عقب اٍنتهاءه من عمل المكياج و لبس الملابس الخاصه بالدور .. ينزوى لوحده و مش شرط يكون بعيد عن الموجودين .. يصمت تماما لمده قد تطول أو تقصر على حسب موده .. ينفصل نفسيا عن المكان و الزمان و شيئا فشيئا تتغير ملامح وجهه .. يتغير صوته .. تتغير مشيته .. يخرج من شخصية نور الشريف تماما و يدخل فى اٍهاب الشخصيه اللى بيجسدها .. و لما بيتم له ما يريد ممكن بقى يتبادل الحديث مع الآخرين لكن قبل كده ممنوع التحدث معه اٍطلاقا ..

أيه ده ؟؟

أنا سرحت كده ليه ؟؟!!

معلش :)

نرجع تانى لموضوع البوست و هو حفلة عيد الميلاد !!

دى صورة البهو الرئيسى للفندق العائم سوبك قبل الحفله .. لاحظوا الهدوء اللى فيها :

لما نزلنا البهو الجميل ده كان المكان ممتلىء عن آخره بطاقم العمل .. و فجأه اٍنفتح باب المطعم و خرج منه ما لم أتوقعه أبدا !! و أصيب الأستاذ نور بالدهشه الشديييييييده .. بصوا :

زى ما شفتوا كده :))

فوجئنا جميعا بتورته عملاقه و بكل العاملين بمطبخ و مطعم و بار الباخره (على فكره البار لايقدم خمور و لكن شاى و نيسكافيه و حاجات من دى ) و على رأسهم كبير الشيفات محمود اللى شعره أبيض رابط منديل أحمر على رقبته (لاحظوا رشاقته و لياقته العاليه) و هم شايلين الدفوف النوبيه و هاتك يا مغنى و رقص .. ما هم أصلا كلهم من النوبه و على حسب ما قالوا لى اٍن النوبيين بيعبروا عن كل شىء فى حياتهم بالرقص و الغناء حتى فى قمة أحزانهم برضو لا يتخلوا أبدا عن شغفهم بالتعبير رقصا و غناءا عما يدور بداخلهم ..

و شاركهم الأستاذ نور الرقص النوبى لبعض الوقت و لاحظوا ملامح التعب اللى على وجهه ..

ثم كانت لحظة طفى الشموع و اللى شاركت فيها الفنانه سوسن بدر اللى علمت منها اٍن لها جذور نوبيه هى كمان !! و بالمناسبه هى بتؤدى فى المسلسل ده دور شخصية سيده صعيديه قاتله و مخيفه شعرت بقشعريره فى جسدى و هى تؤدى مشهدا كانت تتشمم فيه طفلا كالذئبه المفترسه قبل أن تذبحه !! بصوا الصوره دى :

و برضو الجماعه ماسابوش الأستاذ نور يستريح و أصروا على مشاركتهم رقصهم و غناءهم ..

بالمناسبه بقى الرتم النوبى ده مصطلح موسيقيا مش صح لأنه الحقيقه هو اٍسمه الاٍيقاع الخماسى اللى هو الاٍيقاع الاٍفريقى و اللى كان بيستعملوه المصريين القدماء فى غناءهم و فى ترانيمهم و هو اٍيقاع ساحر شديد الحيويه يخليك غصب عنك تتمايل معاه .. و النوبيين حافظوا عليه على مدى آلاف السنين و لم يتأثروا بأى نوع من الاٍيقاعات الموسيقيه الأخرى ..

و اٍنسحب الأستاذ بأعجوبه و جلس ليستريح و كان فى ضيافته بقى المره دى الحاج سيف كبير نجع العيساويه اللى وصل مع مجموعه كبيره من رجاله و معاه اٍبنه طفل صغير لكنه بيتصرف كالرجال الكبار و كان لابس بدله و بابيون .. و الحاج سيف أهدى الأستاذ نور هديه قيمه جدا جدا بمناسبة عيد ميلاده عباره عن نموذج موغل فى القدم لرحايه فى علبه قطيفه حمراء تماشيا مع اٍسم المسلسل اللى هو الرحايه برضو .. الحاج سيف اللى لابس جلابيه بيضاء :

و فضلوا برضو الجماعه يرقصوا و زى ما يكونوا أما صدقوا سمعوا دق الدفوف علشان يرقصوا و ما شعرتش أنهم حسوا بالتعب :)فى الكليب ده حتلاقوا الظابط الاٍدارى للباخره اللى لابس قميص أبيض و كرافته بيرقص مع البارمان شريف اللى هو الشاب اللى لابس صديرى أحمر و اٍذ فجأتن و على حين بغته بيروح ناطط وسطهم المتردوتيل نجيب اللى لابس صديرى أسود زى ما يكون ماهنش عليه يسيب فرصه و ما يرقصش فيها !!

لاحظوا كمان شخص اٍسمه أنور لابس جلابيه و متحزم و بيرقص معاهم علشان ده له حكايه رهيبه و كانت حتحصل له مصيبه كبيره لولا لطف الله و حأبقى أحكيهالكم فى بوست تانى :)

و لاقيت موبايلى بيرن و كانت البرنسيس شمس النهار .. رديت و طبعا كانت الدوشه عاليه جدا جدا و مش سامعين بعض .. لاقيتها بتقولى :

- أنا مش سمعاك خالص و واضح أنك فى مولد .. هو فيه مولد فى البلد اللى أنت فيها ؟؟

قلت لها :

-أيوه .. بنحتفل بمولد الأستاذ نور الشريف :))

ردت فى براءه :

- طيب لما ترجع المركب اٍبقى كلمنى !!

و دى كانت اللحظات الأخيره فى الاٍحتفال قبل ما الأستاذ يستأذن من الجميع و يصعد لجناحه الساعه 11 بالظبط زى ما هو متعود لأنه بينام 11 و نص بالثانيه مهما كانت الظروف ليستعد لأول يوم من الأشغال الشاقه لتصوير أول مشاهد خارجيه له فى المسلسل و اللى كانت فى منطقه اٍسمها الهدار حاجه كده شبيهه بالشلالات :

شويتين كده و أنا كمان طلعت على غرفتى بعد ما هبدت حتة تورته قدددددددددددددددددددددد كدهوه (قد عقلة الصباع و الله) اٍستعدادا لرحلتى تانى يوم لزيارة مدينة أخميم الفرعونيه الصميمه حيث وقعت فى غرام بنوته صعيديه بنت ناس أوى أوى سحرتنى و سلبت عقلى بجمالها و شبابها و مياصتها !! هى صحيح فى سن عيالى بس أعمل أيه ؟؟ أصل الهوى غلاب !!

و ده بقى موضوع البوست القادم باٍذن الله .. فترقبونا :)

لكم كل الشكر و التحيه ..

من الصعيد الجوانى .. زيارة الدير الأبيض

أسعد الله صباحكم أعزائى المدونات و المدونين ..
نستكمل سويا أحداث جولتى فى الصعيد .. و أسمحوا لى أحكى لكم النهارده عن زيارتى للدير الأبيض القابع فى سكينه على حدود جبل أدربيه على بعد 6 كيلو متر من سوهاج و حيث كانت توجد قرية أدربيه الفرعونيه من آلاف السنين ..

الطريق من نجع العيساويه للدير قطعه أبو اٍسلام السواق اٍبن المنطقه و اللى حافظ كل شبر فيها فى حوالى ساعه و ربع .. الطريق ممهد و رائع و على جانبيه مزارع قمح العين ما تجيبش آخرها و أزعم اٍن كل هذا القمح فى الصعيد بطوله و عرضه يكفى لاٍطعام شعوب 10 دول و من الشعوب المفجوعه كمان .. لكنى ذهلت لما عرفت الحقيقه المضحكه المبكيه اٍن 95% من القمح المصرى الصعيدى بيتم تصديره للخارج و بنرجع نستورد اٍحتياجتنا من القمح برضو من الخارج :)) ده طبعا غير ما يتم أخذه كمعونه من أمريكا الويكا كونيكا و لله فى أمره شئون ..

أفقت من تأملاتى على صوت أبو اٍسلام و هو يشير لجبل لاح من بعيد :

- ده جبل الشيخ حمد و مليان مطاريد يا أستاذ أصلهم عيستخبوا فى كهوفه .. و الحاكومه عتكبس عليهم دلوكيتى كل يوم و التانى لمن جلبت عيشتهم مرار ..

جبل ؟! مطاريد ؟! كهوف ؟!

أحمدك يا رب :)

و شعرت بشغف شديد لاٍرتياده .. و قد كان .. و ماعدوش يومين اٍلا و كنت بأتآنس بمجالسة الريس أبو رحمه و هو واحد من عتاة المطاريد على سفح جبل بنى حمد .. و ده حيكون موضوع بوست آخر أزعم أنه سيكون من أعجب البوستات :)

لما أقتربت السياره بشده من سفح الجبل المهيب أنحرفت يمينا فى طريق مسفلت و نظيف تحفه من على الشمال مقابر للمسيحيين على مساحات شاسعه و فى حالة يرثى لها و من على الشمال مزارع هائله للقمح .. منتهى التناقض فى المشهد ما بين الحياه و الموت !! ..

و ظهرت مبانى الدير الأبيض بعد المقابر مباشرة ..

مش حأتكلم كتير عن تاريخ الدير و ممكن تلاقوا كل شىء عنه فى هذا اللينك :
تاريخ الدير الأبيض ..

بس أحب أذكر ما قيل لى فيما بعد من أن فكرة و فلسفة الرهبانيه فى العالم أجمع خرجت أصلا من هذه البقعه على أرض الوطن .. و أنه لا يوجد راهب فى العالم لم يدرس تاريخ الدير الأبيض اللى اٍحنا بصدد زيارته و لم يتأثر به .. طبعا دى مقوله لا أملك الأدوات للحكم بصحتها أو لا حيث أنى لست فى موقف الدارس لتاريخ الرهبنه القبطيه و من قال لا أعرف فقد أفتى .. فقط أنا بانقل لكم ما قيل لى ..

الأمر التانى و المهم عندى شخصيا أنه هذه المنطقه قد شهدت صراعات طاحنه بين أصحاب الديانه المسيحيه الأوائل عند بدء اٍنتشارها على أرض الصعيد و بين المصريين اللى تمسكوا بالوثنيه الفرعونيه القديمه اٍن صح التعبير .. و واضح أن الغلبه كانت لمتبعى الديانه الجديده حيث أنتشرت المسيحيه على أرض الصعيد بل و قام المسيحيون الصعايده الجدد باٍعلان اٍنتصارهم الحاسم بعد أن قويت شوكتهم بشىء عجيب حنشوفه فى الصور و الكليبات العجيبه اللى ألتقطتها فى الدير الأبيض !!

دخلنا بالسياره لفناء الدير ..

و توقفنا بجانب البوابه الداخليه الصغيره .. كل شىء مبنى من الحجر الجيرى الأبيض و ده سبب تسميته بالدير الأبيض و بناءه قديم يرجع لحوالى 1600 سنه مضت .. و فيه منطقه مسوره بسلك أى كلام كده بتحتوى على بقايا آثار فرعونيه و عليها يافطه كبيره بتقول أن هذه المنطقه تخضع لهيئة الآثار المصريه !!

قادنى أبو اٍسلام لداخل الدير من خلال بوابه حجريه صغيره و كنت قد علمت منه أنه شخصيه معروفه لدى رهبان الدير بحكم عمله كسائق بيجيب بسيارته الميكروباص الزوار من سوهاج للدير رايح جاى ..
و فعلا أستقبلنا القائمون على كشك بيع التذكارات القبطيه و الموجود على يمين البوابه الداخليه بترحاب شديد و أرسلوا واحد منهم يستدعى الراهب المسئول عن اٍستقبال الضيوف ليكون مرشدى داخل الدير ..
الجو كان شديد الحراره بس كان فيه نسمات حلوه كده بتهب من الجنوب .. قعدت على دكه خشب قديمه جدا و لكنها مريحه بجوار ترابيزه عليها برطمانات عسل نحل من اٍنتاج الدير معده للبيع .. و لما لاحظ أبو اٍسلام تأملى للعسل حيث أنى بأفهم فيه كويس أخبرنى اٍن المنطقه هنا بها أجود أنواع عسل النحل فى العالم !!
سألته :
- اٍشمعنى يا أبو اٍسلام ؟؟ أيه السبب يعنى ؟؟

- أصل المنطجه دهياتى مبروكه يا بييه ..
سكت و لم أعلق أحسن يعنى ..
شويتين و وصلوا 2 رهبان .. أول ما لفت نظرى فيهم طولهم الفارع و نحول أجسادهم الواضح .. سلموا عليا بترحاب شديد و باٍبتسامه مشرقه .. عرفونى بنفسهم الراهب الأب مش فاكر اٍسمه و الراهب الأب بيشوى و عرفتهم بنفسى .. الأول كانت لهجته صعيديه و الآخر لهجته قاهريه و هو الراهب بيشوى و اللى كان مرشدى داخل الدير ..

أنا و الراهب بيشوى (أنا اللى على اليمين علشان ما تتلخبطوش يعنى)

قادنى عبر بوابه حجريه أخرى لداخل الدير نفسه .. بهو كبير فى الهواء الطلق به بقايا أعمده حجريه على الصفين

أفهمنى الراهب بيشوى أن فى هذا الفناء كان الرهبان الأوائل يتناولوا طعامهم لأن كان عددهم كبير جدا يتجاوز ال 4000 راهب .. و كان بينضم لهم رهبان أجانب كانوا بيسعوا للاٍنضمام لدير الأنبا شنوده رئيس المتوحدين علشان يتعلموا أصول الرهبنه المصريه اللى بقت مناره لكل رهبان العالم .. و بالمناسبه البابا شنوده الثالث بابا الأقباط الحالى أخذ لقبه الكنسى من اٍسم الأنبا شنوده رئيس المتوحدين و قضى فتره كبيره جدا من حياته الكهنوتيه فى هذا الدير ..

أرض الفناء مبلطه ببلاط حديث وضع فوق البلاط القديم الأثرى و هى عاده مصريه متأصله عملا بمبدأ اٍردم على اللى فات و أنساه حتى لو كان اللى فات ده بلاط أثرى عمره يتجاوز ال 1600 سنه ..

لاحظت وجود اٍزاز مكسر على الأرضيه فبدأت فى لملمته و وضعه جانبا .. اٍبتسم الراهب بيشوى فى وداعه و قال :

- بتميط الأذى عن الطريق ؟؟

ضحكت رغما عنى و جاوبته :

- شعبه من شعب الاٍيمان :))

شايفين الباب الصغنون ده اللى فى آخر الصوره اللى فوق ؟؟

ده بقى بيقود لداخل الكنيسه الأثريه العجيبه حيث المذبح المقدس و حيث بتقام الصلوات ..

قبل ما ندخل لاقيت الراهب بيشوى بيخلع نعله فخلعته أنا كمان .. و يبدو أن هذا المكان شديد القداسه لدى الأقباط لأنى ما شفتهمش بيخلعوا الأحذيه اٍلا قبل الدخول للكهف اللى أختبئت به السيده العذراء مريم و أبنها السيد المسيح عليه و على نبينا المصطفى أفضل الصلاة و السلام أسفل الكنيسه الموجوده بمنطقة الكنائس فى مصر القديمه بالقرب من مسجد عمرو ابن العاص ..

أرض الكنيسه مفروشه بسجاجيد قديمه و لكنها ذات قيمه عاليه جدا .. و أول ما يقابل الداخل عمود رخامى و ولد و بنت قاعدين جنبه على الأرض بيتبادلوا الهمس و الضحك :) و أول ما شافوا الراهب بيشوى أتنطروا و فزوا على حيلهم و أختفوا عن الأنظار ..

العمود الرخامى

الراهب بيشوى شرح لى أن هذا العمود كان واحد من أربعه موضوع عليهم المذبح المقدس و لم يتبق منهم غير العمود ده ..عرفت بعد كده أنه بيقال أن جسد الأنبا شنوده رئيس المتوحدين مخفى تحت هذا العمود و أن الرهبان قاموا بتخبية جسده بعد ما تعرض لمحاولة الاٍعتداء عليه من قبل شيركوه عم صلاح الدين الأيوبى قديما .. و الله وحده أعلم بحقيقة الأمر ..

الجو داخل الكنيسه كان شديد اللطف و كأن تكييف مركزى بيبرد الهواء على الرغم من الحر الشديد فى الخارج و أرجعت ده لأرتفاع السقف الشاهق و للقباب العملاقه اللى بيبلغ اٍرتفاعها حوالى 20 متر ..
و بدأ الراهب بيشوى فى شرح ما أستغلق عليا فهمه من لوحات رائعه و أيقونات قديمه تعبر عن أحداث مقدسه فى تاريخ الدير و فى تاريخ الديانه المسيحيه بصفه عامه ..

و الحقيقه أنى أرهقت الرجل بالأسئله الكثيره و الحوارات اللى لم أشعر أبدا أنه أتخنق منها أو تضايق بل على العكس كان صدره رحبا جدا و أكتشفت أنه واسع الاٍطلاع بشكل مثير للدهشه و فى مختلف مجالات الثقافه و التاريخ و اللغات بل و الفنون ناهيكم عن الأديان أيضا ..

لفت نظرى شبه رسم تصويرى غير واضح التفاصيل و لكنه فى المجمل شديد الوضوح علمت أنه من أشد مقدسات الدير لأنه بيصور الأنبا شنوده رئيس المتوحدين و قد ظهرت صورته على الجدار بفعل عوامل الرطوبه يعنى زى ما تقولوا معجزه كده .. أهى :

كمان عجبتنى جدا لوحه مرسومه على قبه عملاقه و تعجبت من مقدرة الفنان المصرى القديم على رسم القباب و زخرفتها و يبدو أن مايكل أنجلو تأثر بهذا الأسلوب لما رسم سقف كنيسة القديس بطرس فى الفاتيكان .. و شرح لى الراهب بيشوى مغزى هذه اللوحه و كيف أنها بتعبر عن خالدية الله و سرمديته و هيمنته على ما فى الكون :

سألت الراهب بيشوى عن اللغه القبطيه .. قال :

- الأقباط المصريين بيستعملوا فى صلواتهم اللغه القبطيه اللى هى اٍمتداد طبيعى و اٍبنه شرعيه للغه المصريه القديمه .. و أيضا بيستعملوا اللعه العربيه لأنها دقيقه تماما كاللغه اللاتينيه اللى بتستعمل فى صلوات غير المصريين .. أما اللغه السريانيه فبتستعمل فى بعض الكنائس العربيه و خاصة فى سوريا ..

الأيقونه دى بقى مصنوعه من خشب الجوز و محفوره يدويا و هديه من دير فى اليونان و بجد تحفه رائعه :

و أما الأيقونه دى فللأنبا شنوده رئيس المتوحدين .. لاحظوا التناقض الرهيب ما بين الجدار الحجرى اللى فى الخلفيه و مابين الدولاب الألوميتال البشع اللى عليه الأيقونه ..

الحقيقه و الحق يقال اٍن الراهب بيشوى لم يترك لا صغيره و لا كبيره مما لفت نظرى بداخل هذا المكان اٍلا و قد وفاه حقه من الشرح المفصل اللى بيبين مدى سعة أفقه و اٍطلاعه و بلغه سهله سلسه و لم تفارقه اٍبتسامته الودوده أبدا .. و قد لفت نظرى لنقطه هامه للغايه لم ألتفت لها من قبل و هى أن فى كل الرسومات القبطيه اللى بيظهر فيها السيد المسيح لم يظهر أبدا مع الحواريين يهوذا الخائن اللى وشى بالمسيح عند الرومان و ضرب لى مثل على ذلك بلوحة العشاء الأخير الشهيره لدافنشى .. و فقط ظهر يهوذا الخائن فى بعض الأعمال الفنيه اٍما على هيئة رجل كريه الوجه بعين واحده كدلاله على رؤيته نصف الحقيقه فقط و اٍما على هيئة شخص يحمل كيس فى اٍيده كدليل على بيعه السيد المسيح بقطع معدوده من الفضه ..

دى النسخه القبطيه المصريه من لوحة العشاء الأخير و معلقه فوق المذبح :

لما سألت الراهب بيشوى هل فيه مسلمين بييجوا يزوروا الدير ؟ أكد لى أنه فيه مسلمين كتير جدا من أهل الصعيد و من المحافظات التانيه بيواظبوا على زيارة الدير و أنه نشأت صداقات كثيره بينهم و بين الرهبان هنا و أنه لافرق عندهم بين مسلم و مسيحى لأننا فى النهايه جميعا مؤمنين بالله الواحد خالق الكون ..

- طيب يا أبونا على حسب ما أعرف فلكل دير معجزاته المشهور بيها .. فهل ياترى يا هلترى و هلبت ما أيه هى معجزات الدير الأبيض ..

بدون تفكير جاوبنى الراهب بيشوى :

- معجزات الدير الأبيض بتتركز فى حل المشكلات الدنيويه و خروج الأرواح الشريره اللى بتتلبس أجساد البنى آدمين ..

- اٍزاى يعنى ؟؟!!!

- يعنى اللى عنده أى نوع من أنواع المشاكل زى المشاكل العائليه أو قضايا فى المحكمه بييجى يقعد هنا طول النهار و بعون الرب تنحل كل مشاكله .. و كمان اللى بيعانى من تلبس الشياطين أو الأرواح الشريره لجسده فبييجى لوحده أو أهله بيجيبوه و بيقضى هنا وقت فى الهدوء اللى أنت شايفه ده و برضو باٍذن الرب بيشفى تماما و بيرجع أحسن من الأول ..

رديت عليه بتلقائيه :

- ما شاء الله ما شاء الله ..

و خرجنا من الكنيسه للفناء الخارجى مره تانيه .. و أخبرنى الراهب بيشوى أنه كان فيه بئر خاص بالدير تم حفره من حوالى 1500 سنه و ظل الرهبان و الزوار يستعملوه على مدار هذه السنوات الطوال لحد ما دخلت مياه الحكومه للمنطقه فأصبح البئر مهجور و غير مستعمل فتمت تغطيته من حوالى 12 سنه فطلبت أنى أشوفه ..

فأنتقلنا للطرف الآخر من الفناء الخارجى .. و كان فيه مجموعه كبيره من الشباب و البنات الأقباط بيتبادلوا الحديث ربما بشكل غير مألوف فى الصعيد و خاصة فى مثل هذه المنطقه القاصيه منه و تبادلوا معايا الاٍبتسامات الودوده مرحبين على عادة الصعايده تجاه الغرباء ..

اٍجتزنا بوابه حجريه صغيره للغايه بتؤدى لشبه ردهه مستطيله شاهقة الجدران الحجريه .. على اليمين واخد بالك كوه رائعة البناء قد شدت بأعمده و قضبان حديديه أخبرنى الراهب بيشوى أن خبراء من هيئة الآثار وجدوا شروخ فيها فقرروا أن يسندوها بتلك الأعمده و القضبان و الحديديه !!

- طيب مادام عملوا كده ما يكملوها بقى !!!

ده الراهب بيشوى اللى بيقول ..

و جنب الكوه دى توجد بقايا أعمده حجريه أثريه بتيجان على شكل زهرة اللوتس الفرعونيه أغلبها محطم و مرميه فى اٍهمال يصعب على قلب الكفار !! أهيه :

شوية الأعمده و التيجان ساحرة النقوش دى لو كانت فى بلد تانيه كانوا عملوا لها متحف لوحدهم .. شايفين بقى الدرجتين الحجر اللى فى الصوره دى ؟؟ الدرجتين دول بقى بيؤدوا لممر كل جدرانه و أرضيه و سقفه من الحجر و الممر ده بيؤدى للبئر ..بس فيه حتة نتفة مفاجأه فى هذا الممر العجيب بجد دوختنى و خلتنى ألف حوالين نفسى و ما صدقتش عينيا .. بس الصوره ما بتكذبش ..

ده الممر الحجرى :

و دى المفاجأه .. تأملوا الصور كويس كده :

المفاجأه اللى أذهلتنى - للى مش واخد باله - أن جدران و سقف هذا الممر العجيب يمتلىء بالنقوش الفرعونيه على أحجاره !! و بعض هذه الأحجار وضعت مقلوبه و كذلك النقوش بالتالى مقلوبه !! يعنى كان الغرض هو اٍستعمال هذه الأحجار كخامات للبناء فقط !!

و لما أبديت دهشتى الشديده للراهب بيشوى من هذه الملحوظه اٍبتسم فى وداعه كعادته و قال :

- مش كتير اللى بياخدوا بالهم من الملاحظه دى .. فعلا غالبية أحجار الدير متاخده من معابد فرعونيه قام بفكها بناة الدير الأوائل اللى آمنوا بالمسيحيه لما بدأت تنتشر فى الصعيد و حاربوا الوثنيين اللى كانوا لسه بيعبدوا آلهة الفراعنه و سقط منهم شهداء لا حصر لهم و لما أنتصروا عليهم أستعملوا أحجار معابدهم فى بناء الأديره و الكنائس ..

أعربت له عن دهشتى من هذا الاٍكتشاف اللى بالنسبه ليا اٍكتشاف يعنى فقال ببساطه :

- لا ما تستغربش .. كتير أوى من بيوت الصعيد القديمه مبنيه بأحجار المعابد و القصور الفرعونيه .. ماتنساش أن المنطقه بتسبح فوق بحر من الآثار الفرعونيه اللى لسه الكتير منها لم يكتشف و الأهالى بيكتشفوه بطريقتهم !!

خدوا بالكم يكتشفوه بطريقتهم دى حتقودنا لبوست قائم بذاته عن ميراث الأجداد اللى شايفينه الأحفاد حق طبيعى لهم و لا دخل للحكومه فيه و بيع يا لطفى و اٍعرضى يا متاحف العالم قطع أثريه نادره لم تسجل أبدا فى دفاتر هيئة الآثار .. بس ما يبرد القلب قليلا بصراحه أن هذه القطع النادره على الأقل تعامل بالاٍحترام اللائق بها مش بتترمى فى مخازن لتنهب و لا فى العراء علشان كلاب السكك تعمل عليها بيبيه زى ما شفت بعينيا و أتقطع قلبى على ما آل اٍليه الحال ..

نرجع مرجوعنا للممر العجيب الموصل للبئر المهجور ..

فى نهاية الممر على الشمال يوجد البئر و هو مغطى بغطاء حديدى كبير و يطل على كشك بيع التذكارات القبطيه اللى قلت لكم عليه فى أول البوست و البئر أصلا موجود فيما يشبه الصاله المربعه المغطاه و على جدرانها توجد كوات كبيره بيضاوية الشكل .. أهو :

رجعنا تانى عبر الممر الحجرى العجيب لبهو الأعمده الخارجى .. و الراهب بيشوى كان بيستكمل سرده الشيق لتاريخ الدير و اللى تقريبا بيتطابق مع ما ورد ذكره فى اللينك اللى فى أول البوست عن تاريخ الدير ..

و لما طلبت منه أزور القلالى ( جمع قلايه ) الخاصه بالرهبان و هو المكان المخصص لكل راهب للقراءه و الصلاه و التأمل اٍعتذر فى لطف و الحقيقه ما حاولتش أسأله هل ده بسبب قوانين خاصه بالرهبنه و لا لأنى مسلم علشان ما أحرجوش ..

سألته عن طبيعة حياته قبل ما ينخرط فى سلك الرهبنه فأجابنى فى اٍقتضاب :

- كنت بأشتغل فى سلك النيابه ..

متهيألى كده و الله و رسوله أعلم أنه كان وكيل نيابه .. و ما حبتش برضو أسأله عن صحة ذلك ..

اٍقتربت الزياره من نهايتها بعد ما قضيت حوالى 3 ساعات ضيف على الدير الأبيض و فى صحبة الراهب بيشوى الهادىء الوديع المثقف اللطيف دائم الاٍبتسام ..

و وصلنا عند الباب الخارجى للدير و بجوار كشك بيع التذكارات لفت نظرى تانى حاجه فرعونى كده واضح أنها متاخده هيلا بيلا زى ما هى كده من معبد فرعونى و مش عارف أيه فايدتها فى الدير :

و كمان لاقيت نقش قديم جدا باللغه القبطيه كتبه أحد الرهبان كتمجيد فى الله و قد بدأ فى التآكل للأسف الشديد كمعظم النقوش الحجريه البديعه اللى بتزين أسوار الدير بسبب الاٍهمال الشديد و عوامل الزمن .. و قد قدر الراهب بيشوى عمر هذه الكتابه بحوالى 1000 سنه !! أهيه :

و بالمره بقى لفت نظرى اٍعلان عن شريط اٍسمه فى اٍيديك حمايتى بيباع فى كشك التذكارات به ترانيم قبطيه للمنشده فاديا بزى ( هى اٍسمها كده ) :

و لما حان وقت الرحيل شددت على يد الراهب بيشوى مصافحا و شكرته بجد من قلبى على تعبه معايا و على الوقت الطويل اللى قضيته بصحبته فأبتسم كالعاده فى وداعه و دعانى للزياره مره تانيه فشكرته تانى و قلت له :

- اٍن شاء الله فى أقرب فرصه .. السلام عليكم ..

رد برضو باٍبتسامه :

- و عليكم السلام و رحمة الله مع ألف سلامه ..

غادرنا الدير .. و سرحت شويه و أنا أتأمل فى المنطقه المحيطه و أسأل نفسى كم من أحداث جسام شهدتها هذه المنطقه لما بدأت العقيده المسيحيه فى الاٍنتشار فى هذه البقعه و كم اٍصطدمت و تطاحنت بعقيدة المصريين الوثنيه و كم من نفوس أزهقت من الطرفين دفاعا عن العقيده بغض النظر عن ماهية هذه العقيده .. المصريين متدينين بطبعهم و بفطرتهم سواء كانوا وثنيين أو مسيحيين أو مسلمين و المصرى لا ملجأ و لا ملاذ له سوى الله فى حالة يسره أو عسره .. هو كده .. و يبدو أن ده شىء بيجرى فى دماء المصريين و موجود فى جيناتهم منذ بدء الخليقه ..

فى طريق العوده و قد بدأت الشمس فى المغيب لاحظت وجود مكثف للأمن فى كل الطرق .. و لما أستفسرت من أبو اٍسلام عن السبب قال :

- من يوم اللى جرى فى الشارونيه لما الناس جامت على بيوت البهائيين و حرجتها بالجاز و الحكومه مشدده جوى ..

- طيب شد حيلك شويه يا أبو اٍسلام عاوزين نوصل المركب قبل العشاء ..

أصل بينى و بينكم كنت عاوز ألحق حفلة عيد ميلاد الأستاذ نور الشريف من أولها .. و قد كان .. و ده بقى موضوع البوست القادم باٍذن الله حيث ستشاهدوا كليبات حصريه بجد بجد ستدهشكم :)

و تقبلوا شكرى و تحياتى ..

من الصعيد الجوانى .. (2) جباطنة النيل و حكاويهم !!

مساء الخير ..

بينى و بين البحر و المراكب عشق و هوى قديم ..

يمكن ده بيرجع لنشأتى منذ طفولتى فى مدينة الجزائر العاصمه اللى هى مدينه ساحليه من أجمل و أرقى المدن الساحليه فى العالم على حسب رأيى المتواضع ..

و يشاء المولى أن تكون فترة دراستى الجامعيه فى مدينة الاٍسكندريه حيث تبلور و تعمق حبى للبحر و عشقى للمراكب اللى كنت بأهوى متابعتها و اٍبحارها و عودتها محمله بالخير بالقرب من القلعه فى بحرى ..

و حتى لما ربنا فتح عليا من حيث أدرى و من حيث لا أدرى كانت فكرة اٍمتلاك يخت تراودنى و تقض مضجعى حتى توكلت على الله و بدأت فى بناء يخت رائع بدورين و طوله 22 متر عند الحاج صلاح السمبوسكانى أشهر صانع يخوت فى العالم و ورشته فى مدينة عزبة البرج .. و كان حلمى أن أطوف بحار العالم من شرقها لغربها على ظهر هذا اليخت و لكن للأسف تحطم هذا الحلم على صخرة الاٍرهاب اللى ضرب الأقصر من كام سنه كده و سحب البنك حصته فى تمويل بناء اليخت و ذهبت هذه الأمنيه أدراج الكازوزه ..

و لكن ده لم يوقف عشقى لحياة البحر و الحياه فوق سطح المراكب ..

و خضت تجربة تعلم الاٍبحار و قيادة اليخوت على يد الكابتن خالد الحنينى صاحب و قائد اليخت جنوه ستار اللى لما أطمأن لقدرتى على الاٍبحار السليم الآمن سابنى أقوم لوحدى بعدة رحلات باليخت و على متنه عدد كبير من السائحين هواة الغطس فى مياه الغردقه .. و كانت تجربه لذيذه أوى :)

و ما أنساش كمان يخت الغطس الرائع الفارس المينا اللى قضيت عليه فتره لا تنسى من حياتى برضو فى الغردقه و بدون مقابل و الله و لكن حبا فى حياة البحر ليس اٍلا .. و ضرغام 1 و 2 فى شرم الشيخ اللى كانوا أصحابهم دمايطه على منايفه (نمايه صغنونه على الماشى من غيظى منهم) و كانوا بيسيبوا طاقم المركب من غير أكل معتمدين على الصيد من البحر علشان ياكلوا لحد ما أتبهدلوا و بقوا مظهرهم كالقراصنه العتاه ..

عشقى للبحر و المراكب لم تنطفىء جذوته بداخلى أبدا ..

حتى بعدما وهن العظم منى و أشتعل الرأس شيبا لسه بأشتاق لشعور لحظة الاٍبحار و لشعور لحظة الرسو على الأرض بعد الغياب ..

فى رحلة الصعيد ..

سعيت للتعرف على كابتن الفندق العائم سوبك .. و بعد محاولات و مراسيل بينى و بينه وافق على مغادرة كابينة القياده اللى لا يفارقها أبدا و اللى ممنوع منعا باتا صارما على أى مخلوق كائنا من كان أن يخطو عتبتها سوى الكابتن و مساعده و دى أوامر صارمه ليس فيها شبهة هزار ..

أنتظرته على سطح المركب بجوار حمام السباحه و قد صار مكانى المفضل :)

و فوجئت برجل صعيدى مهيب يرتدى الزى الصعيدى و يسير كفرعون خرج لتوه من جداريه مصريه قديمه !!

الباشريس عبد الرحيم على اليمين و الريس على قبطان المركب سوبك

بعد السلام و الترحيبات عرفته بنفسى و عرفنى بنفسه بلهجه صعيديه قحه لا تخلو من الزهو : أنا الريس على قبطان سوبك و الأميره ..

- ................ ؟

- بقالى أكتر من 45 سنه بأبحر فى النيل يا ولد عمى من بحرييه لجبليه .. بدأتها مع أبوى الله يرحمه على مركب شراعى و غويت البحريه و الفرجه على النجوم بالليل لما بجيت أتكعبل لما أمشى على البر !! حفظته شبر شبر بجزايره بهيشه بشحطاته لمن بجيت ريس مركب شراعى كد الدنيا ..

- ................ ؟

- من المنيا يا بو خالو .. و كل رويس بواخر النيل من المنيا .. و أيوه متجوز و عندى ربنا يعطيك 6 رجاله و بت .. عأجضى على الباخره وجت كبير يمكن شهور فى وجت الموسم و أكل العيش أكده ..

- ............... ؟

يسرح لبعيد بعينيه و يقول :

- طبعا عأحن للبيت و العيال و المره بس الباخره بجت بيتى و الطاجم بجوا عيالى و الركاب ضيوفى و كلو متسطر ع الجبين ..

- ............... ؟

- الفرج بينى و بين كابتن مركب البحر المالح كبير جوى جوى .. أنا عأمشى بالليل ع النجوم و الجمر و هو بيمشى ليل و نهار ع البوصله و الجهاز (قصده جهاز تحديد الأماكن بالقمر الصناعى) .. و أنا طول الرحله بأبجى صاحى و حافظ خط سير المركب لتشحط و لا تخش بين الجزاير و أبجى خربت الدنيا .. ده غير الهيش و ورد النيل اللى لو دخل ع الرفاص يبجى جول على المواتير يا رحمان يا رحيم .. حج ربنا يا أستاذ ريس النيل أشطر من ريس المالح .. طب جيب اٍكده ريس مالح و جوله عدى من هويس جنا (قنا) يمين بالله العظيم ليطربج المركب باللى فيها !!

- .............. ؟

- لع ما تفرجش معايا كتير ريح و لا موج .. موج النيل حنين على المركب زى يد المره الحنينه اللى تملس على يد راجلها الخشنه المشججه !! بس اللى بأعمله ألف حساب دوامات الهويس اللى لو الريس أستهون بيها ممكن تلفلف منه البوز و تبجى مصيبه .. دوامات النيل لازم الريس يجف لها على حيله و هو بيعديها و يحترمها و ما يستهونش بيها واصل ..

عند هذه النقطه أنضم لنا رجل صعيدى كبير فى السن تبدو عليه المكانه المرموقه و وقف الريس على اٍحتراما و سلم عليه بتوقير شديد و قدمه لى :

- الباشريس عبد الرحيم .. كبير جباطنة النيل ..

سلمت عليه بمزيد من الاٍحترام فرضه هذا اللقب الكبير : كبير جباطنة النيل !!

يعنى ده أكيد حاجه كبيره بقى .. (قلت كده فى عقل بالى)

- ............. ؟

قال الباشريس عبد الرحيم :

- طبيعة شغلى يا أستاذ أنى أجدم ريس فى النيل بحاله من شماله لجنوبه .. و عأفتش على المراكب التابعه للشركه و عأنظم الأجازات و ساعات الشغل للطواجم .. شغلانه صعبه و الله يا ولدى و كلها مشاكل و مسئوليات كبيره جوى جوى بس ربك المعين ..

- ............ ؟

- المركب دى بحوالى 15 مليون جنيه .. و فيها 3 مواتير الواحد منيهم بمليون و نص و كل ده مسئولية الريس و بيمضى على اٍستلامها سليمه و شغاله تمام و بيبجى مسئول عن كل كبيره و صغيره فيها و لو خرب فيها حتى لوح جزاز بيبجى هو المسئول عنه ..

- ............ ؟

يجاوب الريس على :

- لما بيبجى معانا سواح أجانب فى رحلات طويله أسبوع و لا 3 تيام بيطلبوا يجابلوا الجبطان .. و بيتفاجئوا لما بيلاجوه راجل صعيدى بالجلابيه و العمه و بيتصوروا معانا و بيبجوا فرحانين جوى بالزات الحريمات !!

يضحك و يقاطعه الباشريس عبد الرحيم بلهجه ذات مغزى :

- فاكر يا ريس على المره الخوجايه اٍياها ؟؟

يجيبه الريس على ببراءه :

- مين فيهم يا باشريس ؟؟

- ............. ؟

سرح الباشريس بعينيه لبعيد شويه و قال بلهجه لا تخلو من السخريه :

- عبد الناصر الله يرحمه حاول يعملها .. و جاب رجاله بحريه بالبدل البيضا و الكابات علشان يسوجوا مراكب النيل جال أيه علشان يبجى مظهرهم مشرف جدام السواح الأجانب .. بس البحاروه ما سلكوش مع النيل و جالو حجنا برجابينا و رجعوا تانى ع المالح و ماشفنهمش بعد اٍكده ..

- ............. ؟

- الأول كان فيه رحلات مراكب بتجوم من مصر (القاهره يعنى) لمن لحد أسوان .. بس جه وجت كان الاٍرهابيين بيصطادوا المراكب عند أسيوط و يضربوا عليها نار و يداروا فى الجبل زى الحريمات فوجفوا الرحلات دى و بجت الرحلات تجوم من الأجصر (الأقصر) لأسوان و تحت حمايه شديده جوى ماتخرش المى ..

- ............ ؟

قالوا ألتنين فى نفس واحد :)

- الجبض جليل و الله يا أستاذ حكمن الموسم نايم و السياحه مش كد اٍكده .. أنا اللى اٍسمى باشريس النيل جبضى ما يعديش الألفين جنيه !!

- لع يا باشريس جبضك ألفين و تلتمية جنيه ..

- لع يا ريس على جبضى 1900 جنيه ..

- لع يا باشريس و عليا اليمين جبضك ألفين و تلتميت جنيه و أنى اللى جبضى 1800 جنيه !!

- جولتلك لع يا على و ما تعارضنيش واصل ..

أوباااااااا وقعوا فى بعض .. و العرق الصعيدى طج يا بوى و أبتدت رجابيهم تتنفخ ماعرفش كيف فقلت و أنا بأضحك علشان ألطف الجو بعد ما أتكهرب فى ثوانى :

- ما تطلبوا لنا شوية شاى حبر نعدل دماغنا بيها و صلوا على النبى كده ..

سكت الأتنين عن المناقره و قال لى الباشريس عبد الرحيم و على وجهه اٍبتسامه مشرقه و قد تبدلت حالة الغضب عنده فى ثانيه ككل أهل الصعيد :

- لع .. جبل الشاى الحبر لازمن ناكلو لجمه الاول .. أكل المراكب ده ما ينفعش معانا .. اٍحنا دابحين جدى و عاملين عليه فته و ملوخيه .. جوم معانا و يبجى عيش و ملح ..

أعتذرت له فى لطف لأرتباطى بميعاد زياره لأحد الأديره الأثريه فى حضن الجبل الشرقى فتبدلت وجوهم تانى فى ثانيه و فوجئت بالريس على يقول غضبان :

- طب و عليا اليمين يا أستاز لازم تاكل معانا عيش و ملح بلا دير بلا غيره .. أتغدى معانا الأول أكل بيتى و بعدين روح ميعادك !!

و لم أجد فكاكا من عزومتهم و الحقيقه أن أكل فنادق ال5 نجوم ماكنش جاى على هوايا أوى يعنى برغم جودته و كمياته المهوله فبريت نفسى بحتتين نيفه و طبق فته معمول بالعيش الشمسى الصعيدى و اٍحنا التلاته قاعدين على مقدمة المركب فى الحته الشهيره بتاعت صورة اٍعلان فيلم تيتانيك :))

و بعد الغدا و الشاى الحبر جه أبو اٍسلام السواق بالعربيه ليصحبنى فى رحله خرافيه قد لا تتكرر فى الحياه مرتين للدير الأبيض القابع فى هدوء و سكينه لا نهائيه فى حضن الجبل الشرقى حيث شاهدت بعينى ما كنت لا أصدقه أبدا و حيث قضيت ساعات مع الراهب بيشوى اللى لا يمكن أن ينسى أبدا .. و ده موضوع البوست القادم ..

و تقبلوا شكرى و تقديرى ..

من الصعيد الجوانى .. (1) الوصول للعيساويه ..

صباح الخير :)
نبدأ على بركة الله كتابة أول حلقه فى سلسلة بوستات من الصعيد الجوانى و اللى أقترحت هذا العنوان بنتى بسنت صلاح الدين فى تعليق سابق لها فبرضو لزم التنويه ..
يا معين يا رب ..
- خصيمكم سيدنا النبى بلاش نتكلم عن قطار النوم اللى بيقوم من القاهره متوجها لأسوان مرورا بمحافظات الوجه القبلى كله ..
بلاش نتكلم عن هذه الذكرى المفجعه فى حياتى لأنى تعودت على اٍسقاط الذكريات السيئه من عقلى فمش عاوز أفتكر حاجه عن هذه التجربه المؤلمه و يكفى بس أنى أقول لكم أن اللى يحب منكم يسافر فى هذا القطار عليه أن لا يحمل معه أى حقائب حتى يكون هناك فسحه من المكان فى هذا الحق المسمى فرضا بالمقصوره علشان يعرف بس يفرد رجليه أو أنه عليه الاٍنبطاح على ظهره طوال فترة الرحله الرهيبه اللى بتستمر لساعات طويله و هو بيبحلق فى السقف لحد ما يتجنن أو يحول و لا حول و لا قوة اٍلا بالله ..

وصلت سوهاج و قد تفككت أوصالى و تشخللت سوست عظامى بفعل قطار النوم و المفروض يسموه قطار النوم الأزلى ..

********************

- الله عليك يا سيادة محافظ سوهاج يا اللى ما أعرفش اٍسمك و الله بس الله ينور عليك و على محافظتك الجميله النظيفه المنظمه بدقه متناهيه و اللى بتبدو كلؤلؤه مضيئه تسلب الأبصار على شاطىء النيل اللى لم أر لجماله مثيلا مثلما هو فى محافظة سوهاج ..

لما وصلت سوهاج كانت الساعه تقترب من 3 الفجر .. لفت نظرى بشده جمال الاٍضاءه اللى بتنير ميداينها و شوارعها اللى بتبرق من النظافه أصلا !! اٍضاءه جميله شبيهه باٍضاءة اللمبات الموفره بتنير فعلا ظلام الليل و تختلف تماما عن اٍضاءة شوارع القاهره البرتقاليه الشاهبه الباهته الحزينه الكئيبه اللى عامله زى اٍضاءة الحراميه اللى مجتمعين تحتها بيخططوا لسريقه ..

بصوا على الصوره دى كده :

يمكن الصوره مش واضحه أوى لكنها بتبين على كل حال نوعية الاٍضاءه اللى أقصدها ..
الصوره دى متاخده من شباك غرفتى على الفندق العائم الأعجوبه سوبك اللى كان راسى قدام شرطة المسطحات المائيه على الضفه الشرقيه للنيل ..
الفندق طبعا 5 نجوم و غايه فى الجمال و النظافه .. و كل العاملين عليه من أهل الأقصر و أسوان و مؤدبين لدرجه تغيظ و تفرس .. و لطاف و اٍبتسامتهم ودوده و مشرقه خاصة أن كلهم بيمتازوا بأسنان بيضاء شديدة اللمعه و وجوه سمراء شديدة التسامح و الطيبه ..
الحقيقه أشعرونى من الوهله الأولى أنى فى بيتى و ليس فى فندق و ده معناه فى رأيى أنهم نجحوا فى اٍختبار الاٍنطباع الأول لأنى بطبعى لا أتآلف مع المكان الغريب للوهله الأولى و لكن أتآلف مع الناس بمنتهى البساطه ..
فى غرفه 305 فى الدور التالت من المركب لاقيت فى اٍستقبالى طبق فاكهه رائع الحسن :) تحيه من اٍدارة الفندق .. و ماله حد يكره ؟؟ و كمان وردتين بلدى واحده حمرا و واحده بيضا :

الغرفه برضو شديدة النظافه و الأناقه و فيها حمامين و جميع وسائل الرفاهيه و الترفيه و مجموعه كبيره من النوافذ الزجاجيه الكبيرة الحجم غير قابله للفتح بتتيح بانوراما رائعه لسطح النيل و مغطاه بستائر ثقيله ذات ذوق رفيع ..

و آدى صورة السرير السوبر كنج سايز الموجود زيه فى كل الغرف :

ربكم و الحق أنا ما صدقت حطيت جسمى على السرير و رحت فى سابع نومه و لا أهل الكهف من تعب رحلة الشقاء و الضنا فى قطار تكفير الذنوب لمدة 7 ساعات متواصله و الشهير بقطار النوم و ماصحيتش غير الساعه 11 صباحا و كانت المركب اللى هى الفندق سوبك لاتزال راسيه على الشط فى سوهاج و بتستعد للاٍبحار جنوبا فى اٍتجاه قرية العيساويه على مسافة اٍبحار ساعه حيث سيتم تصوير مشاهد مسلسل الرحايه بطولة الفنان الأستاذ نور الشريف و الفنانه القديره سوسن بدر اللى كانت موجوده بالفعل على المركب ضمن طاقم العمل و اٍخراج الأستاذ حسنى صالح و تأليف الأستاذ عبد الرحيم اللى هو أصلا من أهالى قرية العيساويه ..

بعد الاٍفطار و الذى منه فى المطعم بالدور الثانى و بالمناسبه ماشفتش هذا الكم المتنوع من أصناف الأطعمه اللى بتصلح للاٍفطار مثلما شاهدت فى هذا المطعم اللى بيبرق من النظافه كعروسه ليلة حنتها .. و الحق يقال اٍن الصديق العزيز الحاج محمد الجابرى منتج هذا المسلسل لم يبخل أبدا فى الاٍنفاق على العمل و على توفير كل سبل الراحه و الرفاهيه لكل العاملين بالمسلسل و ربما يرجع هذا لحرصه الشديد على أن يكون العاملين معه فى حاله نفسيه جيده حتى ينجزوا عملا جيدا و دى وجهة نظر تجاريه بحته بس الغالب فى ظنى أن ده بيرجع لطبيعة عائلة الجابريه الشهيره بشدة كرمهم و اٍحتفائهم بضيوفهم ..

لاحظت وجود حركه و نشاط دبت فجأه فى السفينه و علمت اٍن الاٍستعدادت تجرى على قدم و ساق تأهبا للاٍبحار فصعدت مره أخرى للطابق التالت حيث يوجد حمام السباحه فى الهواء الطلق و حيث أنتشر على السطح عدد كبير من العاملين بالمسلسل لمشاهدة لحظة الاٍبحار ..

حوالى 10 دقائق و بدأت أصوات المواتير العملاقه فى الدوران و بدأت المركب تبتعد بهدوء و تأنى عن الشاطىء و أخدت وضعها الطبيعى تقريبا فى منتصف النهر و بدت كجبل مهيب عملاق يتحرك فى زهو ..

و آدى كليب للحظات مغادرة شاطىء سوهاج متوجهين جنوبا للعيساويه :

أبحرت المركب لمدة حوالى ساعه .. و طوال هذه المده كان المشهد على ضفتى النيل شىء بجد رائع و تعجز الكلمات عن وصفه .. بجد صعيد مصر ده موضوع كبير أوى و مش بس مجرد جبال وعره و كهوف تأوى المطاريد و مزارع قصب بيستخبى فيها الخارجون على القانون كما تصوره الأعمال الفنيه اللى بتعرض فى وسائل الاٍعلام الهبله اللى حقيقى شوهت الصوره الحقيقيه لصعيد مصر الرائع المبهر ..

بصوا كده على الكليب ده .. ده نجع قبل العيساويه بحوالى ربع ساعه .. صحيح اٍسمه مش عاطفى أوى و لا يتناسب اٍطلاقا مع جماله لكن نمشيها يعنى .. المنطقه الساحره دى اٍسمها نجع الطين ..

بعد ساعة اٍبحار بالتمام و الكمال لاحظت فيها مدى دقة قائد المركب العملاقه من خلال تفاديه بحرفنه شديده لمناطق بعينها فى النيل و الاٍبتعاد تماما عن مناطق أخرى بل و الاٍقتراب أحيانا بشده من الشاطىء لاحت قرية العيساويه على الضفه الشرقيه للنيل يعنى كانت على الجهه اليسرى للمركب ..

قريه صغيره للغايه تلوح مبانيها من بعيد و لفت نظرى وجود بعض المنازل المتعددة الطوابق المبنيه بالخرسانه و على أسطحها أطباق الدش و لكن تبدو غير متناسقه و هى تبرز وسط المنازل التقليديه فى الصعيد ذات الطابق الواحد أو على الأكثر طابقين ..

بدأ الأهالى فى التجمع على الشاطىء لما لاحظوا اٍقتراب المركب من شاطىء قريتهم و تبينت بعد كده أنه ده كان حدثا جليلا فى تاريخ القريه الهادئه لأنهم لم يتعودوا اٍلا على الفرجه على مثل هذه الفنادق العائمه فى طريقها من و اٍلى الأقصر و أسوان من بعيد لبعيد أثناء اٍبحارها لأنه لا يوجد سبب لرسو أى مركب سياحيه على شاطىء العيساويه ..

لما أقتربت المركب جدا من الشاطىء و بدأ البحاره فى القفز للأرض لتجهيز و دق العمدان الفولاذيه اللى حتتربط فيها المركب لفت نظرى وجود السلاح الآلى مع الرجال فى الشارع الموازى للنيل و هم يسيرون كده فى وضح النهار !!! و طبعا أكيد سأفترض أنهم من رجال الأمن لأنى لا أتصور أن ظاهرة حمل السلاح الآلى فى وضح النهار بالصعيد لا تزال موجوده !! أتفرجوا على الكليب ده كده :

و طبعا فى زمن وجيز أتلموا عيال البلد كلهم و عدد غفير من الأهالى يتفرجوا على المركب و يرحبوا بينا بالتهليل و المشاوره .. و ياسمين المسئوله عن الميكنج بتاع المسلسل ما أعرفش و الله جابت منين زماره حمرا من اللى بيستعملوها فى الاٍستاد و بدأت تزمر بيها و العيال على الشط هاتك يا زيطه :)) لحد ما قبطان المركب أشتكى من الدوشه و قال أنه مش عارف يركز علشان يركن المركب خاصة أن الشاطىء غير معد لرسو المراكب .. و كمان مش قادر يسمع تعليمات المساعدين اللى بيوجههوه من على الشط .. لكن على مين ؟؟!! الدوشه كل شويه فى تصاعد مستمر .. بصوا :

الطريف بقى فى الموضوع ده كله أنه كان فيه بنتين بيغسلوا الحلل و المواعين بتاعتهم فى النيل فى نفس المكان اللى المركب بترسو فيه و البنتين الحقيقه لم يهتموا أبدا بما يحدث من حولهم و أستمروا فى غسيل مواعينهم و لكن لما أقتربت منهم المركب جدا يبدوا أنهم أتخضوا من ضخامتها و بدأوا فى لم الحلل بسرعه و نقلها لمكان تانى و أستمروا فى عملهم برضو :) :

و بعد جهد جهيد من القبطان تمكن من الرسو أخيرا على شاطىء قرية العيساويه الغير معد أصلا لرسو المراكب .. و لكن ده الحقيقه مش غريب على الريس على قبطان المركب سوبك اللى قضى من عمره 45 سنه يبحر فى نهر النيل من أوله لآخره حتى حفظ كل شبر فيه .. و اللى حكى لى عن أسرار الاٍبحار فى نهر النيل الرائع و ده حيكون موضوع البوست القادم باٍذن الله ..

لكم كل الشكر و التحيه ..

التدوين يوازى حياتنا اليومية ..

مساء الخير أعزائى المدونات و المدونين :)

وحشتونى ..

بجد وحشتونى زى ما بيتى و عيالى وحشونى أنتم كمان و مدوناتكم وحشتونى ..

قبل ما أبدأ سلسلة البوستات اللى بتحكى عن رحلتى للصعيد و اللى أنتهت النهارده حيث رجعت بأمان الله لبيتنا العامر أحب أشكر الأستاذه / أسماء رمضان الصحفيه بجريدة العالم اليوم على الحوار الرائع اللى أجرته معايا قبل سفرى و نشر بتاريخ 30\4\2009 .. بأشكرها و بأحييها على اٍهتمامها بعالم التدوين و المدونين و على مجهودها كمان الواضح و الشديد فى تلخيص الحوار اللى قامت به معايا تلخيصا شديدا عنيفا عميقا لابد أنه أستلزم منها الكثير جدا من التعب و الوقت :)

ترقبوا بقى يا جماعه بوستات رحلة الصعيد اللى بأحكى فيها عن هذه الجوله العجيبه بالجنوب حيث كانت لقاءات لم تخطر على بالى يوما مع رجال سياحه مرموقين و علماء آثار يشار لهم بالبنان و مطاريد فى الجبال شديدة الوعوره و نجوم و فنانين و رهبان و شخصيات شديدة الاٍنسانيه و الثراء و ناس لم يخطر على بالى يوما أن أجالسهم و ألتقى بهم و أستمع منهم لحقائق و حواديت يشيب من هولها القرعان :)

ترقبوا بوستات : من الصعيد الجوانى .. و اللى يحصل يحصل !!

واه يا بوووووووووى على دى رحله !!!