الأحد، 30 نوفمبر، 2008

الأمل ..

صباح الخير أيها المدونات ..
صباح الخير أيها المدونون ..
بيعجبونى أوى الشباب اللى عندهم اٍصرار على النجاح رغم الظروف اللى مش و لابد المحيطه بيهم من جميع النواحى .. شباب بأحس أن الطاقه اللى جواهم نابعه من حبهم للحياه و تفاؤلهم اللى أوجدوه بنفسهم داخلهم من غير الاٍعتماد على أى حد ممكن يساعدهم ..
اٍيهاب الشيمى و غاده فاروق .. ولد وبنت أتعرفوا على بعض فى المعهد اللى فى المنيل ده اللى على الكورنيش (مش فاكر اٍسمه معلش) ربط الحب بينهم طوال سنوات الدراسه لا ضربوا ورقه عرفى على رأى صاحبنا أونكل عزت و لا فكروا يوم يركبوا الأتوبيس المكيف .. كانت كل مقابلاتهم فى النور مع مجموعة أصحابهم ..
بعد التخرج كل واحد فيهم مسك شهادته فى أيده و أبتدا يفكر .. الشاب عاوز يبنى مستقبله و يجيب شقه و شبكه و مهر للبنت اللى بيحبها و اللى أهلها وافقوا عليه بس بالشروط المعلومه اللى بتحطها كل الأسر المصريه لعريس بنتهم ..
اٍيهاب لقى أنه لو قبل الوظائف المعروضه عليه كمندوب مبيعات أو محصل كمبيالات أو جرسون فى مطعم و لا كافيتيريا يبقى الله الوكيل حيتجوز البنت كمان 500 سنه !!
و البنت كان أفضل العروض اللى أتقدمت لها وظيفة بياعه فى محل ملابس فى المهندسين يدوبك مرتبها يكفى المواصلات !!
طيب يعملوا أيه و هم شايفين الحلم اللى عاشوا له سنوات بيتحطم قدام عينيهم ؟؟
فكروا أنهم يعملوا مشروع مع بعض .. مشروع تجارى مشترك يعنى بس فين رأس المال اللى حيبتدوا بيه المشروع ؟
فكروا فى قرض من البنك لكن لقيوا العراقيل و الشروط الموضوعه بالاٍضافه للفائده العاليه جدا كفيله بالقضاء على الفكره فى مهدها .. ما يئسوش و لجئوا للجمعيه المصريه لصغار الحرفيين يطلبوا قرض بفائده بسيطه لقيوا أن شرط وجود المشروع بالفعل يقضى على الفكره برضو فى مهدها ..
للأسف والد اٍيهاب ما أسعدوش حظه بالسفر لدول الخليج و لا السعوديه علشان يقدر يساعد اٍبنه ماديا .. أبوه ترزى رجالى عفا الزمن عن مهنته اللى قربت تنقرض من الوجود .. و أبتدا اليأس يتسرب لنفس الولد و البنت خاصة مع قدوم العرسان يطرقوا باب غاده طالبين يدها ..
بس زى ما تقولوا كده ربنا أعلم بما كان يقاسيه الولاد فبعت من عنده فرج و نصر قريب .. اٍزاى ؟ وحدوا الله و صلوا على النبى الهادى و القبطى يمجد سيده ..
الصدفه البحته قادت اٍيهاب ذات صباح لمجاهل مزارع وادى الملوك علشان يوصل جلابيتين حرير أبوه مفصلهم لشريف الكويتى عاشق الخيول العربيه و صاحب مزارع النور و اللى قرر أنه يعيش و يموت فى مزرعته الخلابه كواحه فى قلب الصحراء ..
اٍيهاب أنبهر بالمشاهد اللى شافها هناك .. و دى كانت أول مره بالنسبه له تطأ قدماه منطقه صحراويه أصلا .. أنبهر بمزارع العنب اللى العين ما تجيبش آخرها .. و بغيطان الطماطم و الخضار اللى عامله زى الموكيت الأخضر من بعيد .. داخ اٍيهاب من روائح شجر البرتقال و الليمون و التفاح و الخوخ و المشمش اللى بتعطر هواء الصحراء النقى .. شرب اٍيهاب و توضأ من ماء البير 94 اللى بيطلع ميه متلجه فى عز حر الصحراء الرهيب فى شهر أغسطس ..
اٍيهاب بقى حيتجنن و اللى طالع عليه سبحان الله سبحان الله !! .. و عقد مقارنه بين شوارع القاهره المميته زحمة و تلوثا و سوء تعامل و بين الهدوء الصوفى و طهارة و نقاء الصحراء .. و بين صعوبة المعايش فى القاهره و بين الخيرات المتراميه فى كل مكان على مدى العين فى أراضى المزارع .. و أتخذ قرار فورى !!
قرر الشاب أن يرتبط بالمكان .. طيب اٍزاى و هو لا يملك فلوس يقدر يشترى بيها أرض و يستصلحها و يزرعها ؟؟
جات له فكره ذكيه جدا و شرع فى تنفيذها .. و لله الحمد من قبل و من بعد على ما أخذ و على ما أعطى .. أصل أبن آدم لما تبقى نيته صافيه و حلوه يقوم ربنا يقف جنبه و يجبر بخاطره و خاطر محبينه ..
اٍيهاب بعد دراسه متأنيه للموقف بدأ باٍستجئار سياره ربع نقل حمولة 1000 كيلو و أتفق مع شوية مزارع صغيره يحمل من عندهم الخضار أو العنب أو الفاكهه كل فى موسمه و ينزل بالحموله على سوق الجمله اللى على طريق الواحات اللى بعد مدينة الاٍنتاج و هناك يبيع الصبح بدرى حمولة السياره و يكسب فى الكيلو ما بين نص جنيه لجنيه على حسب السوق .. بحسبه صغيره تلاقى اٍيهاب باٍسم الله ما شاء الله بيكسب من 500 ل 1000 جنيه ساعة الصبحيه و بعد ما يطلع الربع مصاريف سياره و تحميل و كارته تلاقيه كسبان مبلغ محترم ربنا يزيده .. و كان أحيانا بيكرر الشغلانه دى مرتين و تلاته فى اليوم و أشتهر بين أصحاب المزارع بأمانته و بسرعة سداده لقيمة البضاعه بعد بيعها فوثقوا فيه و بقى هو المتعهد الرئيسى لبعض منتجات مزارع معينه ..
و السياره اللى بتحمل بقت 2 ثم 3 و شويه شويه بقت نقل بمقطوره و حبتين و أشترى لحسابه سياره تريلا و هوبا للنبى بقوا 2 بعد تعب 5 سنين ..
سبحانك يا رب لما تعطى عبدك المخلص الأمين المجتهد ..
و أتجوز غاده السنه اللى فاتت و عمل فرح محترم و حلو فى نادى الميه اللى على الكورنيش زى ما كانوا بيحلموا و هما طلبه فى المعهد .. و فتح مخزن كبير فى سوق الجمله بتديره هى و أخوها عادل اللى لازم الواحد يبقى له عشرميت عين و هو بيوزن له البضاعه على الطبليه ..
و أما اٍيهاب فدايما تلاقوه قاعد بعد ما يخلص شغل فى المزارع جنب بير 94 اللى شرب منه ميه متلجه فى عز حر أغسطس فى أول يوم حط رجله فى وادى الملوك بيتفرج على السهل الأخضر اللى فى قلب الصحرا و بيسبح ربنا فى هدوء ..

الجمعة، 28 نوفمبر، 2008

بين دبى و الشيخ زايد !!!

الراحله هبه العقاد
تحديث : يا جماعه أنا مش بأتكلم فى علاقه ماديه ظاهره بين الجريمتين .. و لكن بأتكلم فى طريقة تنفيذ الجريمه نفسها و دوافعها .. بأتكلم عن طريقة الذبح البشعه اللى تعرضت لها الراحلتين سوزان فى دبى و نادين فى الشيخ زايد .. بأتكلم عن الدافع الاٍنتقامى اللى يخللى اٍنسان يتجرد من أدنى مشاعر الرحمه و يفصل رقبة بنت فى عمر الزهور عن جسدها مهما كان سبب الخلاف بينهم و يطعن زميلتها عشرات الطعنات أغلبها فى الظهر و ده دليل على محاولة الفرار من القاتل اللى أصر على تكملة مجزرته المروعه ..
يعنى هل أصبح اٍنتقام الأثرياء اليومين دول بقطع الرقبه ؟ بالذبح ؟ بالطعن المتوحش حتى الموت ؟
أنا مش عارف اٍذا كانوا أعلنوا عن خبر اٍلقاء القبض على  صديق الراحله نادين و لا لسه ؟ عموما هو تم القبض عليه و ستظهر الحقيقه خلال ساعات اٍن شاء الله ..
بأقدم تعازى للفنانه ليلى غفران لمقتل اٍبنتها بطريقه وحشيه بالأمس .. و بأسأل مجرد سؤال : هل فيه صله بين مقتل الراحله سوزان تميم فى دبى و بين مقتل الشابه هبه بنت ليلى غفران فى مدينة الشيخ زايد فى مصر ؟
مجرد سؤال حبشتكانى فلسفى ..

الخميس، 27 نوفمبر، 2008

و الله تستاهل يا قلبى ..


الاٍسكندريه 10 يناير 1982 ..
حديقة كافيتريا كلية الآداب ..
أنا و زميلى العزيز اللى ماكناش بنفترق عن بعض أبدا بسام اللى كان فى قسم مسرح و اللى أصبح بعد كده الفنان اللامع بسام رجب قاعدين سرحانين فى ملكوت الله و غالبا كنا دايما سرحانين فى كيفية الحصول على مورد نجيب منه فلوس علشان معايش الحياه ..
و فجأه ..
ينطلق صوت جميل رخيم يصاحبه عزف على العود : أنا هويت و أنتهيت و ليه بقى لوم العزول ..
ألتفت ورايا و ألاقى شاب طويل نحيل من سننا يحتضن عوده و بيدندن و اٍبتسامه لطيفه على وجهه ..
- مين ده يا بسام ؟
- ده اٍيمان بتاع كلية الهندسه اللى جده سيد درويش ..
اٍيمان ؟ و جده سيد درويش ؟؟!!
فى الوقت ده أنا كنت بأدرس موسيقى لجانب دراستى فى كلية الآداب فى معهد كونسيرفتوار دى أليكسندرى على يد عازفة البيانو الرائعه مدام اٍيفلين أسود .. و هو كان معهد كده بالفلوس للهواه لكن كان راقى جدا جدا و مستوى الخريجين منه لا يقل عن مستوى الموسيقيين المحترفين ..
أنتبهت بشده لصوت اٍيمان و قارنت طبعا بين صوته و أداؤه و بين صوت و أداء جده الشيخ سيد .. طبعا جده كسب بدون شك ..
- بعد ما خلص الطقطوقه و أبتدا يضحك مع الطلاب اللى ألتفوا حوله لاقيت نفسى قمت و رحت له و سلمت عليه و قدمت له نفسى .. لاقيته رايح واقف و سلم عليا بترحاب شديد و بأحترام شديد و عرفنى بنفسه : اٍيمان البحر ..
و من اللحظه دى أبتدت صداقتنا .. كنت وراه فى كل حفله بيشارك فيها فى الكليات لأن فى الوقت ده كان فيه زخم فنى و ثقافى عاتى فى جامعة الاٍسكندريه .. ندوات ثقافيه بيحضرها كتاب كبار و شعراء و مثقفين يعتد بهم .. معارض فنون تشكيليه .. حفلات موسيقيه و غنائيه .. رحلات منظمه بشكل جيد كنا بنستفيد فعلا منها .. اٍحتكاك مباشر بأساتذتنا و مناقشات بينا و بينهم .. مكتبات لا حصر لها و مراكز ثقافيه أجنبيه فاتحه أبوابها بالمجان لكل الطلاب .. يعنى كان الجو مختلف تماما عما نشاهده الآن رغم مضايقات زملائنا الرافضين لفكرة الثقافه من أساسه ..
كان اٍيمان البحر بيقضى معظم أوقاته بين المحاضرات بكليته فى كافيتريا كلية الآداب .. و كان له أصدقاء مننا كثيرين لا حصر لهم .. أحببناه لدماثة خلقه و لطفه الشديد و اٍبتسامته الجذابه التى لا تفارقه ..
جدع أسكندرانى أبن بلد شهم و يفدى صاحب صاحبه .. و لو كان يعرف أن حد فى ورطه و لا مشكله ماكنش ينام الليل غير لما يحلها له و ياما أتكلف فى سبيل حل مشاكل أصدقائه ..
لما سألته ليه يا اٍيمان ما دخلتش معهد الموسيقى ؟ قال لى : اٍحتراف الموسيقى ما يأكلش عيش !! الموسيقى دى هوايه و لو أحترفتها مش حأنفع فيها ..
قبل الاٍمتحانات كان اٍيمان بيختفى و بيدخل الصومعه يذاكر زى السوسه علشان يعوض الأيام اللى قضاها حاضن عوده و بيتنقل من هنا لهناك .. و كان دايما بيجيب تقديرات كويسه .. ما هو الشاطر فى حاجه بيبقى شاطر فى كل حاجه أو هكذا يفترض ..
أنا و اٍيمان أختلفنا على حاجه ذات مره .. سوء تفاهم أو سوء فهم .. و زعلنا من بعض و دى كانت المره الأولى و الأخيره .. عدت شوية أيام و ماجاش كلية الآداب .. قلقت عليه و رحت له البيت علشان أصالحه .. لاقيته قاعد فى أوضته و مطفى النور و ضوء المغرب الخفيف داخل من الشباك .. قاعد على السرير و حاضن عوده و أبتدا يدندن : و الله تستاهل يا قلبى ليه تميل ما كنت خالى أنت أسباب كل كربى و أنت أسباب ما جرالى ..
يمكن ماخدش باله أنى موجود .. يمكن أنفصل بروحه عن المكان و الزمان .. يمكن أنا اللى أنعزلت عن الموجودات و اٍحساسى بالذنب تجاهه خلانى أشعر بضآلة و حقارة ما أختلفنا عليه و كدنا أن نخسر صداقتنا بسببه .. مش عارف !!
اٍيمان البحر درويش أحيانا أظن أنه مجرد روح .. روح بغير جسد .. روح شفافه مرهفه مرهقه تحترق من الداخل لاٍسعاد الآخرين .. روح تهيم و تتغذى بالموسيقى و بالجمال و بالمشاعر الاٍنسانيه التى لا تعرف حدودا و لا قيدا ..
صديقى الجميل بجد أنا فى حاجه شديده لسماع صوتك ..

Get this widget Track details eSnips Social DNA

الأربعاء، 26 نوفمبر، 2008

الطوبجى الأعمى !!

يعنى بالذمه ينفع الكلام ده ؟
موقف عيثى سيريالى لو عرض فى فيلم كوميدي من أفلام الكوميديا السوداء حيقول النقاد أنه شىء over غير قابل للتصديق ..
و لكن الحقيقه أنه حدث بالفعل فى خليج عدن من كام يوم ..
بناءا على تفويض من المجتمع الدولى أصبحت القوات البحريه الهنديه هى المسئوله عن حماية السفن و الناقلات العملاقه اللى بتمر من أمام سواحل الصومال الشقيق و أيضا مسئوله - للأسف - عن مطاردة و تدمير سفن القراصنه الصوماليين اللى كانت أصلا سفن صيد مهكعه لا تصلح لشىء ..
الكوميديا السوداء بقى أنه كان فيه سفينة شحن مملوكه لشخص عربى بتمر فى المنطقه لما بدأ القراصنه فى التحرك بسفينتهم النص لبه ناحيتها للسيطره عليها .. و هنا تنبهت الفرقاطه الهنديه للتحركات اللى مش طبيعيه و أتخذ قائدها على الفور قرارا بضرب سفينة القراصنه ..
هع هع هع
و بدلا من ضرب سفينة القراصنه قامت بضرب السفينه التجاريه اللى المفروض يحموها عن طريق الخطأ و غرقت فورا بحمولتها و بطاقمها فى حين تمكن القراصنه من الفرار بلنشهم المصدى !!!!
يعنى فيه كده يعنى ؟
طبعا صاحب السفينه الغارقه عمال يلطم فى وسائل الاٍعلام و بيقول ما معناه يا ريت كان الهنادوه سابوا القراصنه يخطفوا السفينه على الأقل يعنى كان حيبقى فيه أمل أنها ترجع لكن دلوقتى .... اٍهىء اٍهىء اٍهىء ( ده هو اللى بيأوأ )
آه يا قراصنة الصوماليين يا شوزات قديمه شكلكم كده حايجيلكم ولاد الفراعنه قريب يطحنوكم دفاعا عن مصالح الوطن و يعملوكم عشوه للسمك اللى حيعصر عليكم لمون علشان يرضى ياكلكم ..

الثلاثاء، 25 نوفمبر، 2008

حسن و مرقص أتظبطوا فى الحجز ..


سؤال محيرنى و مش لاقى له أى اٍجابه من فتره كده يعنى ..
دلوقتى السؤال أصبح سؤالين بعد الاٍحداث المؤسفه المخجله اللى حصلت بالأمس فى عين شمس بين المسلمين و المسيحيين من سكان المنطقه !!
سيبكم من السؤال الأول دلوقتى .. خلينا فى السؤال التانى :
- ببساطه كده يعنى هو أيه اللى يزعل المسلمين من أن الأقباط يتجمعوا 100 و لا 200 و لا حتى ميت ألف و يصلوا فى مبنى خدمات تابع لكنيستهم قيل أنه كان أصلا مصنع لبسه و فانلات ؟
يعنى أيه اللى يهيج الدنيا على المسيحين اللى بيقيموا صلاتهم فى أى مكان سواء كان هذا المكان حاصل على ترخيص لأقامة الصلوات أو مش حاصل على هذا الترخيص (يعنى أيه ترخيص لاٍقامة الصلاه أصلا ؟؟؟!!!!) ..
يعنى بجد أيه اللى يزعل المسلمين من كده ؟
حد يفهمنى يا جماعه يمكن أنا مش فاهم ..
أنا مسلم و لله الحمد و لا عمرى زعلت أن مسيحى بيصلى و لا أن مسلم مش بيصلى لأن الأتنين حسابهم على اللى خلقهم سبحانه علام الغيوب ..
عايز أسأل هل كل المسلمين فعلا بيزعلوا لما المسيحيين بيتلموا فى الكنيسه و لا فى أى حته و يصلوا ؟
عايز أسأل كمان المسيحيين هل بتزعلوا يا مسيحيين لما بتلاقوا المسلمين بيصلوا 5 مرات فى المساجد و يوم الجمعه بنقفل المرور فى الشوارع و بنفرش علشان نصلى ؟
بصراحه ما أفتكرش أن المسلمين بيزعلوا لما المسيحيين يصلوا لأن ربنا أوصى بيهم و لأنهم أقرب للمسلمين موده بالنص القرآنى الصحيح .. و كمان الرسول عليه الصلاة و السلام .. زيدوه صلاه .. اللهم صلى عليك يا نبى تزوج منهم و أنجب ولد و أوصى هو و التابعون بالحفاظ على الكنائس و الأديره و البيع فى البلاد المفتوحه ..
و لا أعتقد برضو أن المسيحيين يزعلوا لما المسلمين يصلوا فى أى مكان يشاؤوا .. و لا فيه حد بيزعل من الطرفين ؟ قولوا بصراحه علشان ماتبقاش النفوس شايله و ملتهبه و على شعره ..
طيب لما هو كده يبقى مين اللى يوافق على ما يحدث و ما شاهدناه بالأمس من هتافات صبيانيه زى : مش عاوزين كنيسه مش عاوزين كنيسه !!
و ما تلبث أن تلتهب المشاعر لدى المتجمعين فيبدأون فى تبادل الطوب و الزجاجات الفاضيه و يتعور من دول و يتعور من دول و يتدخل الأمن لفرض النظام و يجرجر دول و دول على القسم و أنتم بقى عارفين الباقى ههههههه
يا ناس عيب عليكم .. يا عالم عيب شغل العيال اللى بينتهى بكارثه لا يدفع فاتورتها غير الوطن و غير أبناء الوطن .. و لا تعود بالخير اٍلا على المتربصين بمصر و أبناء مصر .. يعنى مطلوب شوية عقل من الطرفين لأن فى النهايه المصالح مشتركه و الهموم مشتركه .. و الحيطه لازقه فى الحيطه .. و جارى المسيحى أقرب لى من أبن عمى اللى ساكن فى مدينة نصر .. و جارك المسلم أقرب لك من أخوك اللى فى شبرا .. ربنا يهديكم يا يا خدكم و يريح البلد من عكننتكم ..
شايفك ياض يا مايكل يا اللى حاتحدف طوبه على اللى بيصلوا الجمعه من فوق السطح يا وله !!

الاثنين، 24 نوفمبر، 2008

بيع يا عواد ..

هو هانى رمزى مكشوف عنه الحجاب و لا حاجه ؟!


تقبل الله منا و منكم ..

قال بن عباس عن النبي صلي الله عليه و سلم انه قال:
1. في أول يوم من ذي الحجة غفر الله فيه لأدم .. و من صام هذا اليوم غفر الله له كل ذنب.
2.و في اليوم الثاني استجاب الله لسيدنا يوسف و من صام هذا اليوم كمن عبد الله سنة و لم يعص الله طرفة عين.
3. و في اليوم الثالث استجاب الله دعاء زكريا و من صام هذا اليوم استجاب الله دعائه.
4. و في اليوم الرابع ولد سيدنا عيسي عليه السلام و من صام هذا اليوم نفي الله عنه البأس و الفقر و في يوم القيامة و يحشر مع السفرة الكرام.
5.و في اليوم الخامس ولد موسى عليه السلام و من صام هذا اليوم برء من النفاق و عذاب القبر.
6. و في اليوم السادس فتح الله لسيدنا محمد بالخير و من صامه ينظر الله إليه بالرحمة و لا يعذبه أبدا.
7. و في اليوم السابع تغلق فيه أبواب جهنم و من صامه اغلق الله له ثلاثين بابا من العسر و فتح الله له ثلاثين بابا من الخير.
8. و في اليوم الثامن المسمي بيوم التروية من صامه أعطى الله له من الأجر ما لا يعلمه إلا الله.
9. في اليوم التاسع و هو يوم عرفه من صامه يغفر له الله سنة من قبل و سنة من بعد.
10. و في اليوم العاشر يكون عيد الأضحى و فيه من قرب قربانا و ذبح ذبيحة ففي أول قطرة من دماء الذبيحة يغفر الله ذنوبه و ذنوب أولاده و من أطعم فيه مؤمنا و تصدق بصدقة بعثه الله يوم القيامة آمناً و يكون ميزانه اثقل من جبل أحد.
صدق رسول الله صلى الله عليه و سلم

الجمعة، 21 نوفمبر، 2008

تم نقل المدونه ..

كل المواضيع و التعليقات تم نقلها للورد برس
و متشكر لتعبكم معايا