~SUN~ Pictures, Images and Photos

السبت، 13 ديسمبر 2008

حبيبتى أم زياد ..

حبيبتى و ستى و تاج راسى الست أم زياد الشهيره بفيروز ..

أزيك أخبارك أيه ؟ و عامله أيه فى هذا الزمان الأعجوبه ؟فينك بقالنا كتير يا أم زياد و لا حس و لاخبر منك و لا عنك ؟!! و النعمه وحشتينى .. وحشتينى بجد مش كلام .. أوعى تكونى زعلانه مننا علشان سمحنا باللى بيحصل ده .. و الله ما بأيدينا يا ستنا هو زماننا ده كده و مش راضيين لكن حنعمل أيه ؟ و اٍحنا اللى كبرنا و أتربينا على صوتك و حبينا و عشنا أحلى أيام عمرنا طايرين معاكى من سحابه لسحابه و من قمر لقمر برضو على صوتك .. أيييييييه سنين و جريت يا ست أم زياد و كل حاجه فى حياتنا بقت مسخ و صناعى اٍلا أنتى !!عارفه يا أم زياد أنا كل ما بأتفرج عليكى و أنتى بتغنى بأحس أن عندى دم و كرامه .. بأحس أنى بشر .. حتى بصى كده فى الكليب اللى فوق ده و شوفى بتغنى اٍزاى ؟؟ يا ستنا ده أنتى بتغنى بشموخ بكبرياء بعزة نفس مش معتمده على المنحنيات و التضاريس مش الهؤه و الحلبؤه بتاعت اليومين دول و كل اللى عملتيه يا حبيبتى حاجه صغيره كده فى مناخيرك لا قدمت و لا أخرت و فضلتى برضو أنتى فيروز اللى وصلتنا للقمر من غير صواريخ و لا دياولو ..عاوز أقول لك يا ست أم زياد أنى بأحبك أوى أوى .. و مش بأقدر أسمعك اٍلا على ضوء شمعه معطره من بتوع الصين دول و أكون متكولن و عامل جو كده من اللى وصى عليه الأولون علشان أحس أنى لائق بالتواجد فى حضرتك .. و معلش يا حبيبتى ما تزعليش منى علشان بقالى كتيييييير ما أتواجدتش فى حضرتك الزكيه مشاغل الدنيا و همومها و مشاكل العيال و الجرى ورا لقمة العيش و أنتى عارفه أن العمله الرديئه يا ستنا بتظرد العمله الجيده بس برضو أنتى فى قلوبنا قاعده و متسلطنه على عرشك اللى عملتيه بفنك السماوى و بكبريائك و عزة نفسك .. ربنا يديكى طولة العمر و الصحه و يبارك لك يا فيروز يا حبيبتى ..و ربنا بقى بقدرته يتصرف معاهم اللى خربوا لنا ودانا و طباعنا و أخلاقنا و تقاليدنا بتوع ليك الواوا أح و اللى زيهم آمين يا رب ..

هناك 9 تعليقات:

mahasen saber يقول...

ام زياد رائعه ومحدش يقدر يقول حاجه بس انا مش كل مطرب ومطربه بحب اغانيه فى المجمل
يعنى بحب اغانى فيروز وصوتها بس مش كل اغانيها

بس صوت ترفع له القبعه واحساس دافئ وعالى

سبهللة يقول...

بموت فى فيروز ونجاة
وعبد الحليم وفريد وام كلثوم وفايزة وشادية
تعرف من وانا عندى 11 سنة لحد انهاردة مش بعرف اسمع اغانى غير الاغانى القديمة مهما كانت الجديدة بيقولوا عليها حلوة
لو بالصدفة سمعت اغنية قديمة اسيب كل اللى فى ايدى واروح اسمعها وانا حاسة ان قلبى بيرفرف من السعادة واى عايشة فى مكان وزمان تانى خااااالص غير اللى احنا فيه حاليا

وكل واحد من الاصوات اللى فاتت دى قصة لوحده وطبعا ام زياد مختلفة تماما عنهم كلهم يمكن عشان معتزة بلهجتها وحبيناها كدة زى ما هى من غير ما تمصر اغانيها

اشكرك على البوست دة

صبرني يارب يقول...

فيروز مافيش عليها خلاف

بس ممكن تبعتلي شمعتين ؟؟؟ عشان اسمعها

هههههههههههههه

ربنا يكرمك يارب يا عمر يا ابو دماغ عاليه

أحــوال الهـوي يقول...

اعطني الناي وغني
يا استاذ عمرو
انا وشادي غنينا سوا
حبيتك بالشتا
نسم علينا الهوا
ياقدس يا مدينة الصلاة
يا سهر الليالي
سالوني الناس
شط اسكندرية

قبلاتي و تحياتي

Mafrousa يقول...

الله الله الله
عليك و على فيروز الجميلة
حد يسمع فيروز و يقول ان الايام هباب فى هباب
هههههههههههههههه
ربنا يجعل ايامك جميلة
و خليك اسمع فيروز صوتها لوحدة بيطلع بيك فى قمة الجبل
كل سنة و انت طيب و بخير

Unknown يقول...

فيروز
صوت فيروزى لا يتمتع به غيرها واحساس ورقى لا يعرفة الكثيرين
بجد هى صوت لا يقارن وحضور قوى
وثقافة وفكر واحساس لا يستهان بهم ابدا
كلنا نحب فيروز

حنين القلب يقول...

بسم الله ما شاء الله
اسلوبك بجد جميل اوى فى السرد

احنا كلنا بنحب فيروز وفعلا تحس انها محترمه ووقورة جدا

يسلم ايدك
تقبل مرورى

من غير عنـــوان يقول...

أضم صوتي وأقول

أسعدتينا يا جارة الوادي

شمس النهار يقول...

عارف انا بسمع فيروز من اول ماعرفت اسمع
وعندي ليها شرائط من اول مااخترعوا الشرائط
ولما بكون في مود مش والابد صوطتها بيهديني بس طبعا بعد مااكون هديت بركعتين استغاثه لله وقرات سورة ياسين
بعدها اسمع فيروز وخلاص