~SUN~ Pictures, Images and Photos

السبت، 20 ديسمبر 2008

دليل الراجل الفتك لغزو قلوب الاٍناث ..

الواد مايكل ويب ده كاتب أمريكانى أشتهر بالصدفه هناك بكتاباته اللى بيعالج فيها العلاقه العاطفيه بين الرجل و المرأه من واقع خبرته اللى واضح منها أنه واد مخربش و لافف و داير .. و من هنا جات نصايحه الثمينه للرجال فى كيفية الاٍستيلاء و غزو قلوب الجنس الناعم اللى هما نص الدنيا و سكرها و بهائها بغير شك ..
الواد مايكل أتكلم كتير عن الأساليب اللى بتحبها المرأه و اللى تخليها ما تستحملش غلوتين و تستسلم لحبيبها و تقوله : حبك بيفرحنى فرح الطير بطيرانه , حبك مش فاكر أيه بأغصانه ..
تعالوا كده نبص بصه فى الحيل المكاره اللى كتبها الواد مايكل و اللى أنا ترجمتها مع اٍستبعاد طبعا ما لا يتناسب مع أخلاقيتنا كشرقيين و مع ما لا يجوز ذكره فى دنيا المدونات الشريف العفيف حتى لا نخدش حياء القراء .. بصوا كده :
- الحيله الأولى : لو حبيبتك مسافره كام يوم كده قولها أنك قلقان عليها و حتبعت معاها بودى جارد من عندك علشان ياخد باله منها و روح مديها دبدوبه صغنونه شكلها رقيق !!
- الحيله التانيه : ألزق على السقف فوق السرير نجوم من اللى بتلمع فى الضلمه و أكتب لزوجتك رساله بالنجوم دى زى مثلا : بأحبك يا زوجتى فلانه .. علشان لما تبقى الدنيا ضلمه تقراها و تعرف أنك بتحبها .. (يا عينى ياض يا مايكل حلوه دى خاصة أن النور بينقطع كتير)
- الحيله التالته : أختار مناسبه حلوه كده و أشترى لحبيبتك 11 ورده حمرا و حط وسطهم ورده بلاستيك حمرا برضو و أكتب لها كارت قول فيه : يا نور عينيا حأفضل أحبك لحد ما تدبل آخر ورده !! (اللى هى البلاستيك يعنى اللى عمرها ما حتدبل هع هع هع )
- الحيله الرابعه : أعمل لحبيبتك موقع على الأنترنت أو حتى أعمل بلوج بأسمها و أسألها يا ترى يا هلترى يا فلانه يا حبيبتى عمرك عملتى سيرش على اٍسمك ؟ و لما تدور و تلاقى الموقع بتاعها حتلاقيك حاطط لها كلام حلو كده و صور ليك و ليها تقوم على طول تسورء من المفاجأه و تقولك بأحبك يا سيدى يا تاج راسى ..
- الحيله الخامسه : أشترى لها مرايه من اللى بتتمسك فى الاٍيد و معاها كارت صغنون و أكتب فيه : بصى فى المرايه دى يا قلبى و أنتى حتشوفى أجمل بنت فى الدنيا .. (أشجينا يا عم مايكل أشجينا و النعمه غلبتنى)
- الحيله السادسه : فاجىء مراتك و لا خطيبتك و لا whatever و أبعت لها بوكيه ورد حلو كده و شيك بس ما يكونش كبير على مكان شغلها و من غير ما يكون فيه مناسبه معينه .. كده بقى هى حتفرح بيك و كمان حتفرح أنها بقت محط أنظار زمايلها ..
- الحيله السابعه : و أنت بتتمشى كده و أيدك فى أيد المدام وطى و ألقط زلطه ناعمه و شكلها حلو و قول لها بصوت حنين : أنا يا حبيبتى يا أم عيالى حأحتفظ بالزلطه دى لامؤاخذه كذكرى لليوم الجميل ده .. و بعدها بكام يوم أديهالها كهديه بعد ما تكون خليت جواهرجى يحفر لك عليها : بأحبك يا فلانه و أعملها فريم دهب و عليقه علشان تنفع تتعلق فى سلسلتها ..
- الحيله التامنه : لو حبيبتك أضطرت ترجع من الشغل متأخره و طول النهار مطفلحه و راجعه تعبانه ألحقها بصندوق صغنون شيك كده و حط جواه حاجات لذيذه زى مثلا شيكولاتيه .. كيكه .. علبة عصير .. يعنى حاجات من اللى بتحبها و أربط العلبه بشريطه حمرا و فيونكه شيك و أكتب على الصندوق مثلا : علبة فلان لاٍغاثة حبيبته ..
- الحيله التاسعه : مرجح المدام .. هى كده .. قصده لما تبقوا ماشيين فى مكان فيه مراجيح لا تتردد عزيزى الزوج أنك تاخد المدام و تقعدها لامؤاخذه على المرجيحه و تفضل تمرجح فيها بغض النظر عن ضهرك المقطوم و لا فقرتك القطنيه اللى بتنقح عليك علشان ترجعها تانى لذكريات الطفوله فتقوم تحبك أكتر .. (أكيد الحيله دى ما تنفعش يوم الجمعه)
- الحيله العاشره : لو المدام شغلها بالليل و بترجع متأخره و أنت قاعد فى البيت مع العيال اٍحرص أنها لما ترجع تكون نيمتهم و محضر لها البانيو بميه دافيه و حاطط فيه معطر من أبو 31 جنيه الاٍزازه و كمان اٍزازة زيت للمساج و أنتوا عارفين بقى الباقى .. (الواد مايكل ده بلوى بجد)
- الحيله ال 11 : جهز cd عليه موسيقى من اللى كنتم بترقصوا عليها أيام الخطوبه و خد المدام فى رحله بالسياره لمكان بعيد و قولها تحبى ترقصى يا حبيبتى ؟ حتقولك آه يا حبيبى .. تروح مشغل ال cd و مديها واحده من السماعات فى ودنها و التانيه فى ودنك و تفاجئها بالمزيكا اللى ليها عندكم ذكريات حلوه و تمسك أيدها و على وشك نظرة هيمان (بس لا تنشغل بغير الطريق أكتر من كده)
- الحيله ال 12 : لو حبيبتك عندها قطه أو لا مؤاخذه كلب ما تنساش تشترى هديه لحيوانتها اللى بتحبها تقوم تعرف أن أنت حنين عليها و على كمان حيوانتها فتحبك أكتر .. (قالك زمان لأجل الورد ينسقى العليق)
- الحيله ال 13 : و أنتم على شط البحر اْرسم على الرمل المبلول بالميه قلب كبييير و أقعد جواه أنت و المدام و أتفرجوا على منظر الغروب و أنت أيدك فى أيدها و فى حالة صمت و تأمل و يا حبذا لو حطيت راسها على كتفك .. (يا مسهل يمكن تيجى بفايده مين عارف؟)
- الحيله ال 14 : لما تبقى المدام خارجه رايحه الشغل الصبح و أنت لامؤاخذه قاعد فى البيت حطه يا بطه لأى سبب يعنى ودعها على الباب و بوسها على جبهتها باى باى .. و قبل ما تركب عربيتها تكون بعت لها رساله على الموبابل بتقولها : وحشتينى يا نور عينيا ! و لما توصل شغلها تلاقى منك اٍيميل فيه نفس الكلمتين دول .. نروح هى مبتسمه و فاكراك على طول و تفضل فرحانه بيك طول النهار لحد ما ترجع البيت ..
- الحيله ال 15 : لو المدام شعرها طويل اٍعرض عليها أنك تسرحهولها و لو مش بتعرف حاول تتعلم و خد وقتك الكافى لهذه المهمه لأنها حتحس قد أيه أنت رقيق و بتحبها .. (الواد مايكل ده واد آخر بهججه)
- الحيله ال 16 : أبعت لها شريط كاسيت متسجل عليه موسيقى فيلم مهمه مستحيله بتاع الواد توم كروز و بعد الموسيقى سجل لها بصوتك : دى مهمتك يا فلانه لاٍنقاذ شاب وسيم بيحبك موت و لابس كذا و كذا و قاعد مستنيكى فى المكان الفلانى الساعه كذا و الشريط ده حيدمر نفسه بعد 10 ثوانى و تروح مسجل 10 بيبات من الستوب واتش و بعدين بصوتك تقول لها : أنتى صدقتى يا حبيبتى ؟؟ هىء هىء طيب أنا مستنيكى فى الميعاد و بأعد الثوانى .. (أنا شايل المراره يا أخوانا على فكره و ربنا يستر على اللى فاضل)
- الحيله ال 17 : أسأل أهل خطيبتك من وراها هل كان فيه حاجه هى عاوزاها و هى طفله و ما حدش جابهالها ؟ عروسه معينه مثلا .. لعبه .. حاجه كده يعنى و لما تعرفها فاجئها بيها كهديه لطيفه فتقوم تعرف أنك مهتم بيها و بتنبش فى ماضيها .. (بس بلاش تنبش فى ماضيها أوى يعنى لحسن تكعبل فى حاجه تكون سبب فى فسخ الخطوبه)
- الحيله ال 18 : عند مصوراتى شيك أعمل صوره متركبه ليك و ليها – صوره عاديه يعنى – و حطها فى برواز شيك و خبيها فى دولابها مثلا و خليها تلاقيها بالصدفه و أتفرج بقى على فرحتها و دهشتها فى نفس الوقت ..
- الحيله ال 18 : ما تنفعش أبدا أبدا أنى أقولها علشان ما تباتوش فى التخشيبه ..
- الحيله ال 19 : الحيله دى حلوه أوى .. أنزل أنت و المدام و أشترى لها شجره صغيره من أى مشتل و دور على مكان مناسب و أزرعوها أنتم الأتنين و كل سنه فى نفس الميعاد خدها و روحوا أتفرجوا عليها و قول لها بصوت هامس كده و عينيك كلها حنيه : شجرة حبنا يا حبيبتى بتكبر يوم ورا يوم زى ما حبنا بيكبر برضو يوم بعد يوم .. (بس على الله تلاقوا الشجره أصلا و ما تكونش أتسرقت زى ما حصل معايا)
- الحيله ال 20 : لو أنت بتستحمى الأول و قبل ما تخرج من الحمام أعمل شبورة بخار و أكتب لها على المرايه : حمام الهنا يا روحى فلان بيحبك و تروح راسم قلب و كمان ممكن تعمل ده على اٍزاز العربيه لو الدنيا برد ..
- الحيله ال 21 : شوية شمع ملون كده حوالين البانيو .. و موسيقى هاديه .. و علبة شيكولاته و كلمتين حلوين كده من بتوع حبيبى دائما .... و بس
- الحيله ال 22 : لما تبقى الدنيا بتمطر خد حبيبتك و أنزلوا أتمشوا فى الشارع تحت المطر من غير لا شماسى و لا حاجه و أعمل نفسك كأنك بتغطيها و بتحميها من المطر و لما ترجعوا البيت نشف لها شعرها و قول لها أنك ما حسيتش لا بالمطر و لا بالبرد لأنك قلبك دافى من حبها .. (غالبا الحيله دى حتخلص على اٍلتهاب رئوى فخد بالك يعنى)
- الحيله ال 23 : بعد المدام ما تخلص مذاكرة العيال و هرتك البيت و تلاقيها قاعده كده على كرسى شبه محطمه تعالى من وراها و أعمل لها مساج فى كتافها و رقبتها و قولها بصوت هامس فى ودنها : كلنا بنحبك و ربنا يخليكى لينا و أنت شغال مساج فى كتافها برضو .. تقوم هى بالشويتين دول تنسى التعب بتاع اليوم و تقول لك : و يخليك يا حبيبى يا أبو عيالى ..
- الحيله ال 24 : من غير مناسبه كده تحط لها ورقه صغيره فى مكان ظاهر فى البيت قبل ما تروح شغلك و تكتب لها : حبيبتى فلانه و أنتى جنبى كل أيامى أعياد حب .. متشكر ليكى أنك فى حياتى .. (قديمه ياض يا مايكل)
- الحيله ال 25 : لو المدام عيانه – بعد الشر يعنى – خد لك يوم أجازه و أقعد معاها فى البيت و فضى نفسك ليها خالص فى اليوم ده .. و أظهر لها اٍهتمامك بيها من غير مبالغه منك يعنى مثلا تعمل لها شوية شوربة لسان عصفور و لا شوربة خضار أو كوبايتين عصير فريش .. و تدفيها بالبطاطين كويس و كل ساعتين كده تقيس لها الحراره و تديلها الدوا بأيدك فى مواعيده و تطبطب عليها بحنيه و تقول لها سلامتك يا حبيبتى اٍن شاء الله حاتصحى و تبقى كويسه ..
- الحيله ال 26 : حاول تعرف منها كده أيه الحاجات اللى كانت بتتمنى أنها تعملها قبل ما ترتبط بيك عاطفيا و تحاول تحققها لها .. مثلا حتقولك : كان نفسى أركب طياره ! بسيطه أحجز تذكرتين طياره لأسكندريه و فاجئها بيهم فى يوم غير متوقع فيه السفر .. حتقولك مثلا : كانت عندى رغبه قويه أنى أتعشى فى مكان شعبى بجد مش ديكور ! برضو بسيطه خدها فى مره مثلا عشيها عند بحه فى الناصريه أو عند زيزو المنتن فى الجماليه و هى تتوب عن أكل الحوارى طول عمرها .. ممكن برضو تقولك : طول عمرى يا محسن نفسى أتجوز شاب وسيم و غنى و ذكى ! فى الحاله دى بقى تروح قالب سحنتك على سحنة محمود المليجى و تقول لها : بوش أنا اللى تقصديه بالتأكيد يا حبيبتى روحى دورى عليه بعيد عنى يا مجرمه !! و تبقى كده خلاص أرتحت من همها و دلعها ..
- الحيله ال 27 : بلاش دى علشان فى مره واحد أخد منها حبايه قلبه وقف فقال لقلبه و هو بيموت : مش أأأأنت !!
- الحيله ال 28 : أملا شنطة العربيه بلالين متعبيه هليوم من اللى بتطير دى و خدها على مكان عالى زى المقطم مثلا و أنزلوا من العربيه و كأنكم بتتفرجوا على المنظر من فوق و بعدين أديها المفتاح و قول لها : اٍلهى لا يسيئك يا حبيبتى ناولينى الجاكت من شنطة العربيه لحسن البرد بهدل عضمى .. فتروح فاتحه الشنطه تلاقى البلالين طارت فى السما و تكون حاطط ورقه كبيره فى الشنطه كاتب عليها : على قد البالونات دى ما تعلا يا حبيبتى فلانه على قد ما بأحبك .. (مش بطاله الفكره دى)
- الحيله ال 29 : لما بتبقى بتتعشوا فى مطعم خد حاجه من اللى فىطبقك بالشوكه و أكلها لها بأيدك و قول لها : دوقى دى يا حبيبتى من أيدى .. فتروح هى كمان عامله كده .. و هكذا تبقوا بتتشاركوا فى الأكل و ده حيقرب بينكم أكتر ..
- الحيله ال 30 : دايما جاملها و أتكلم عنها كويس و أشكر فى أكلها قدام أصحابكم و اٍياك ثم اٍياك عزيزى المحب أن تعيب أو تتريق على أى شىء بتعمله أو بتطبخه بالذات لما يبقى صابح تانى يوم أجازه و ألا حيبقى ذنبك على جنبك ..
- الحيله ال 31 : على الزوج أن يختار يوم خميس و يسرب العيال عند مامته أو حد من القرايب و يعمل جو حلو كده علشان المدام تحس أنها فاضيه ليه كلية و هو كمان فاضى لها .. و على ضوء الشموع يتعشوا و فى وسط الكلام يمسك أيدها ويقول لها بحب : فاكره يا حبيبتى أول مره أتقابلنا ؟ أنا مش ممكن أنسى اليوم ده أبدا .. حتروح مبتسمه بحب و بخجل و حاتقول : و ده يوم يتنسى يا حبيبى .. (لا ينصح بذلك لو كانت أول مقابله تمت فى وسيلة مواصلات أو فى طابور العيش)
- الحيله ال 32 : أشترى عزيزى الزوج مخدتين محشيين بالريش و أعمل فتحه فى كل مخده و أفتعل مع المدام خناقه على سبب هايف و أضربها بالمخده كده ضربة دلع يعنى تروح هى كمان مستعمله المخده فى الخناقه و تلاقوا الريش ملا المكان و بيطير من حواليكم فتروحوا ضاحكين و الباقى بقى كل واحد و شطارته ..
أيه رأيكم ؟ دول شويه من الأفكار الرومانسيه ال 101 اللى أوردهم الواد مايكل ويب فى نصايحه للرجال لغزو قلب مراته أو خطيبته أو whatever .. تفتكروا النصايح دى تنفع عندنا ؟؟ يعنى الكلام ده ياكل معانا و لا الحاجات دى ليها ناسها اللى يكون بالهم رايق و جيبهم عمران و بكره بتاعهم متأمن و تمام التمام ؟؟
صراحه أنا شايف أن بعضها عادى يعنى و عمايله سهله و مش حتكلف غير شوية محبه صافيه و اٍهتمام من الرجل حيكون مردوده مدهش على مشاعر أنثاه .. وفقنا الله و اٍياكم لما فيه خير الوطن و زيادة أعداد المواليد و أدينا بنعمل اللى علينا و الباقى على الله و عليكن .. و السلام عليكم و رحمة الله .... (تصفيق حاد )

هناك 33 تعليقًا:

Unknown يقول...

السلام عليكم
والله انا رأى من رأيك ان فيها حاجات عادية وتناسب مختلف الاشخاص وفيها ما هو صعب تنفيذة بحكم عاداتنا او امكانياتنا المحدودة وثقافتنا الاكثر ضائلة فى عالم التعبير عن المشاعر خاصة بين الزوجين

Unknown يقول...

واضح امك بذلت مجهود كبير للتلخيص والترجمة
شكرا

بعبعه يقول...

عمرو

حرااااااام عليك شايله انا المراره من خمس سنين وربنا

عموما هوزي ما انت قلت اغلبها حاجات بسيطه وممكن تحصل بسهوله وحقيقى اي واحده بتكون محتاجه لفته حنيه ومفجأه حلوه مش لازم هديه ممكن كلمه تكون مفجأه

وكل شخص فى الدنيا كلها محتاج لكده سواء كان ست او راجل

طب انا عايزه اعرف بتاعة السجن ماليش دعوه

تحياتي لك يا عمرو

فشكووول يقول...

سيدى ياسيدى
بودى جارد واشترى 11 ورده .. اما موقع الانترنت مش مشكله ده ببلاش وزلط اوديه للجواهرجى وعطر بـ31 جنيه ووصلت لحد الحمام ووقفت وما لقيتش فى جيبى ولا مليم اصل اجيب منين الفلوس دى كلها دى كلهاحاجات بتصرف كتير قوى .. هى على العموم ايدها منى والارض ويادوب هما قلمين باخدهم كل يوم وراضى والحمد لله وماشيه .. تقبل اول مرور لى لمدونة الحبشتكانات البشتكانات الجميله .. وتحياتى

Empress appy يقول...

انسي ياعمرو ههههههههههه
ولا بيجيب معانا الكلام ده حاجه هتهزر واولا الراجل المصري مش بيعمل كده

سنابل يقول...

أما انت بتجيب حاجات غرييييبة يا عمرو
انت قلت ان مش حتكلف غير شوية محبه صافيه ......منيييييييين ؟
معظم الرجالة هنا فاهمين الحب انهم ياخدواوبس فكرة العطاء وبذل اى مجهود عشان يسعد شريكته مش موجودة اصلا وبيعتبر انه كتر خيره انه يادوب حاسس بوجودها ف الدنيا
امااهتمامهاورعايتها ودلعها ليه فا ده حقه هو اتربي كده مش ذنبه يعني

طهقان يقول...

ايه يا خواتي العثل دا
؟؟؟

ماكنش حد غلب

مش تحبيط ولا حاجة

من غير عنـــوان يقول...

العزيز الصديق عمرو
_______________
عايز أقولك نصيحه
_______________

* لو الست بتحب.. يبقى مش مهم كل اللي إنت قولته.. لأنك حتفضل طول عمرك الحبيب

* ولو الست مش بتحب،، برضه مش مهم تعمل حاجه، لأنها لن ترضى عنك أبدا...

وإعمل اللي عليك...

إنما المردود ده: ( من عند الله)
وعايزك تقرا ( من عند الله ) دي باللغه الشامية


..................
..................
..................
..................
..................
..................
..................
..................
..................
..................
..................

كل اللي فات ده كلام كتبته ومسحته.. حيث أن حريه التعبير غير مكفوله...

حبيت أكتب لك صباح جميل يا راجل يا جميل القلب

mohamed ghalia يقول...

ياعم الكلام ده ميجبش مع المصريات هههههههههههههه
دمت بكل الود

صبرني يارب يقول...

يا سلام يا سلام

طيب لو كل واحد يختارله حاجتين من دول ولا حاجه واحده بس يعملها مره فى الشهر اعتقد حاجات كتير تتغير فى حياة ناس كتير

وبعدين اقراالبوست بتاعي وشوشة للرجاله
وشوف صبرني الاجدع ولا مايكل

مش عارفه انت قريته قبل كده ولا لا بس اهو راجع بقى
http://raghy-emraao-gheer-mathona.blogspot.com/2008/05/blog-post_11.html

عمرو يقول...

نهر الحب
و عليكم السلام
معاكى أنه فيه ضآله فى عالم التعبير عن المشاعر بين الزوجين بس لو بدأ طرف فيهم و بارد باٍظهار بعض من هذه المشاعر للطرف الآخر فصدقينى بشىء من التعود و الصبر سينهمر مطر المشاعر فوق الرؤوس و ستتخذ الحياه شكل جديد تماما
طبعا تقصدى أن تقولى واضح (أنك) بذلت مجهود كبير :))
شرفتى و نورتى البوست

عمرو يقول...

بعبعه
لأ بجد بتاعت السجن دى ما أقدرش أتكلم عنها هنا :))

عمرو يقول...

fashkool
زعلتنى يا أستاذنا :( بس معلش ضرب الحبيب زى أكل الزبيب :))
نورت يا فندم و شرفت و اٍن شاء الله متواصلين

عمرو يقول...

appy
و الله يا آبى فيه رجاله فى منتهى الرقه و التفهم لاٍحتياجات الزوجه النفسيه و العاطفيه بس مداريين من الحسد :))

عمرو يقول...

سنابل القمح
موافقك بس ييجى هنا دور الزوجه أنها تكون صريحه مع زوجها و لا تخجل أنها تقول له أنت مش بتدينى كفايتى من الحب و الحنان و اللى أنا محتاجاهم .. يمكن الزوج فعلا مش عارف لأنه أتربى على كده يعنى أتربى على جمود المشاعر .. فليه الزوجه ما تساعدوش بشىء من المصارحه من جانبها ؟

عمرو يقول...

طهقان
:)) صحيح ماكنش حد غلب

عمرو يقول...

من غير عنوان
مساء الخير يا صديقى العزيز
فى رأيى المتواضع يا عزيزى أن الحب يحتاج لمقومات لكى يحيا و يكبر
يعنى لو الزوج مثلا بيحب زوجته جدا و لكنه مش بيعبر لها عن هذا الحب فعلا و قولا فهل يمكن للزوجه أن تستمر على حبها لهذا الزوج ؟
أو لو عكسنا الوضع و الزوجه لا تحب زوجها حب حقيقى لأى سبب و لكنها شايفه منه أفعال و أقوال كل حب و موده مش يمكن فى الحاله دى أن حبها يتجه له و لو بحكم شعورها بأنها اٍمرأة يحوطها رجل بكل مشاعر الحب ؟
قريتها بالشامى و ضحكت لأن دى أول مره آخد بالى منها منطوقه بهذه الطريقه :)
سبحان الله مقلب القلوب الذى يحول بيم المرء و قلبه
النبى عليه الصلاة و السلام كان محب لزوجاته و كان بظهر لهن هذا الحب قولا و فعلا فأحببنه حبا جما لرقته و لعذوبة مشاعره عليه الصلاة و السلام
فاٍحنا فين بقى من ده ؟
بس بجد نفسى أعرف أيه الكلام اللى مسحته يا صديقى ؟ لو ممكن يعنى

عمرو يقول...

محمد غاليه
ليه بس ما يمكن أتغيروا هههه

عمرو يقول...

صبرنى يا رب
يعنى مش قليل شويه أن الاٍنسان يظهر الحب مره واحده بس فى الشهر ؟
طيب حأقرا البوست بتاعك و أشوف قايله أيه :)

princess يقول...

هيا ليه اسمها حيل؟؟؟؟؟
انا شايفة ان اللى بيحب بجد اكيد هيفكر ازاى يبسط اللى قدامه وكل حد حسب شخصيته او حسب الامكانيات المتاحة
الحب هو الحل :)
تحياتى

عاشقه وغلبانه يقول...

بص يابني الحلال الواحد داخل البوست ده بالتهاب في المعده خارج بالمراره والقاولون
هههههههههههههههههههههه
تصدق هو ممكن
بس الرجاله مش بتحب تبان بتدلع ستاتها خصوصا المصريين
ههههههههههههههههه

ست البيت يقول...

بجد أول زيارة للمدونة
وين فيه ايه
أنت بتتكلم عن الراجل المصري ؟؟؟؟؟
لأ بتهزر !!!!! اللي دبح مراته عشان الغدا اتأخر؟
لأ واللي شايف أنه مراته دي تافهة وانه عقله الراجل يعديها ب80سنة وهو افكارة كلها عيشان وهم
اكيد ممكن تنفع بس في الاوساط اللي قلت عليهم مش واحد متجوز بالدين وحياة سواد
بس عجبتني نصايحة قوي

شمس النهار يقول...

بصراحه الموضوع مضحك طبعا
بس يعني الست الذكيه مش هتعرف ان ده ضحك علي عقلها
ليه التمثيل
الحب حب
لو بيحبها هيرضيها بحب وود وهتطلع حاجات احلا وارق من كده بكتير وبعدين هيمثل يوم اتنين تلاته
دي عشره قد تدوم سنين طويله يصعب عدها هيمثل كل ده ده حتي الممثليين بيعتزلوا
الحل بسيط كل واحد يتقي الله في الاخر ونشوف سيدنا النبي وزوجاته عملوا ايه ونحاول نعمل زيهم

Yasmine Madkour يقول...

مممممممم

أنا مش ضد النصايح دي ..

بس شايفه انها لما تكون من غير نصايح هتبقي أحلي

غير كده .. مجرد ان حد يدور علي التصرفات اللي تسعد شريكة حياته و يحاول يبتكر فيها .. أكيد ده حد بيحبها جدا ..

ربنا يخليكوا لبعض :)

غير معرف يقول...

ايه اللى بتقوله دااحنا حنهزر احنا رجالتنا حاجه تانية والحمدلله يصحا الصبح بوزه مترين ليه ماتفهمش تصبح كأنه ماسمعش يتحضرله الشاى والفطار يشرب وياكل فى صمت زى ما يكون ندر عليه انه مايفتحش بقه الا ومراته على الباب بتجرى يا حبة عينى عشان طبعا اتأخرت على شغلها عشان تحضر حاجة لغدا الباشا وهى على الباب بأه يفتح بقه اخيرا ويقولها حاجة تحرق دمها زى على فكرة امى واختى حيتغدوا معانا النهاردة ومالوش دعوة هى عاملة حسابها ولا لا وصلت هى شعلها متأخرة وسمعت كلمتين من صاحب الشغل وبدأت تشتغل وهى حتموت من الغيظ من امه اللى طبعا حتسم بدنها على طبيخها الوحش وفجأة تلاقيه بيتصل بيها قوم عقلها الزنخ يصور لها انه بيكلمها يقولها انه حيجيب اكل من برة عشان ما تتكسفش قدام اهله بس هو بأهاتصل يسألها هو مافيش كاتشب ولا ايه ولما تقوله ماعرفش انا مش باكله يروح مصرخ فى ودانها يسورها عيشة زفت ويرزع التليفون وطبعا لما ترجع من شغلها حيكمل الموشح واللى يغيظك بجد انه بعد دا كله يشتكى انهامش بتحبه وباردة معاه ويصاحب عليها ويبقى زى العسل برة ياختى عليه آدى الجالة ولا بلاش مش تقولى ورد وبلالين يا خويا بلا فقع

عمرو يقول...

princess
هو المؤلف مسميها حيل .. يمكن جايه من المحايله :)
فعلا الفعل الصادق للتعبير عن الحب بيكون أكثر اٍقناعا من الأفعال المصطنعه بس مين يفهم بقى ؟
تحياتى ليكى على الزياره و التعليق

عمرو يقول...

عاشقه و غلبانه
سلامتك .. ليه كده بس ؟ :))
عموما و الله برضو مش كل الرجاله فيه برضو رجاله بيتفننوا فى اٍظهار دلعهم للست و غالبا بيبقوا تعالب برضو :))

عمرو يقول...

ست البيت
بس برضو ممكن التعبير عن الحب بأساليب تانيه تكون بسيطه و سهله و تلقائيه بس على حسب موود الأثنين
و على رأيك المتجوز بالسلف و الدين و عيشته هباب فى هباب حيعبر عن حبه اْزاى ده ؟؟
ربنا مع الناس كلها يارب
طيب أيه أكتر نصيحه عجبتك بقى ؟

عمرو يقول...

شمس النهار
أزيك يا شموسة المدونات ؟ عامله أيه ؟ كويسه ؟ طيب الحمد لله .. أشتقنا لوصفات طبخاتك بس ياريت كده تقولىلنا على وصفه مش معروفه و يكون اٍسمها صعب علشان الأزواج يطلبوها من ستاتهم و لما ستاتهم ما يعرفوهاش يروحوا الأزواج باصين لفوق كده و يقولوا لهن : كانت ماما دايما بتعملها لنا :))
يا سيدتى أقتنع أن للمرأه رادار لا يخيب أبدا .. و عندها ترمومتر حساس تقيس به درجة صدق أفعال الرجل و تصرفاته تجاهها .. فاٍن كان صادق فسترحب به على بعضه كده شروه واحده و اٍن كان كاذب أو مخادع فسيكتشف أمره فورا و ده مصداقا لكلامك يعنى
لكن يا شمس النهار الحب كالزهره محتاجه مراعيه و اٍعتناء و اْلا سيبذل و يموت و الحركات الحلوه اللى بتصدر من الطرفيت لبعض كفيله بالحفاظ على الحب
هو ليه دايما الرجل بيبقى موضع شك و ريبه لما يقول أو يعمل حاجه كويسه ؟!!

عمرو يقول...

عاقله على أرض الجنون
أيوه أنتى بتكلمى صح و لكن لنفترض أن الراجل مثلا ما عندوش الخبره الكافيه للتعبير عن حبه أو مشاعره يبقى أيه المانع أنه ممكن يستعين بمثل هذه النصائح أو الحيل كما أسماها المؤلف ؟
و يخليكى يا ستى و متشكر :))

عمرو يقول...

المكتئبه ورد الشام
سلامتك من الاٍكتئاب يا ورد و الله ألف سلامه عليكى
اللى بتقوليه برضو بيحصل بس بتبقى تراكمات فوق بعضها بتؤدى لهذا الكلام .. يعنى مش معقول من الباب للطاق كده الزوج يوصل للحاله دى بدون ما يكون فيه خلفيات قديمه أدت به لهذا الوضع و اْلا يبقى مجنون .. صح ؟؟

غير معرف يقول...

مساء الخير

بصراحة انا اول مرة احب بس حاسس بحاجات اول مرة احسها فى حياتى

وانا فى رأييى ان اللى بيدور على حاجات زى اللى بتسميها حجج دى يبقى مش بيحب اصلا وعايز يقنع نفسه قبل ما يقنع اللى قدامه انه بيحب


الللى بيحب لو قال كلمة حنينة من جواه هتدخل قبل حبيبه على طول وهيحس بيها اعظم من كنوز الأرض كلها وزى ما بيقولوا من القلب للقلب رسول

اهم حاجة ان اللى بيحب ميبخلش بانه يعبر اللى جواه لحبيبه حتى لو بالنظرة بس مش شرط الكلمة



انا عارف انى ممكن اكون خيالى اوى بس والله ده اللى حسيته جديد وهى دى الطريقة اللى هاعبر بيها عن حبى لحبيبتى كل يوم وكل لحظة

اسف انى طولت عليكم وشكرا لكل اللى طول باله وبص على الكلام بتاعى

غير معرف يقول...

مساء الخير

بصراحة انا اول مرة احب بس حاسس بحاجات اول مرة احسها فى حياتى

وانا فى رأييى ان اللى بيدور على حاجات زى اللى بتسميها حجج دى يبقى مش بيحب اصلا وعايز يقنع نفسه قبل ما يقنع اللى قدامه انه بيحب


الللى بيحب لو قال كلمة حنينة من جواه هتدخل قبل حبيبه على طول وهيحس بيها اعظم من كنوز الأرض كلها وزى ما بيقولوا من القلب للقلب رسول

اهم حاجة ان اللى بيحب ميبخلش بانه يعبر اللى جواه لحبيبه حتى لو بالنظرة بس مش شرط الكلمة



انا عارف انى ممكن اكون خيالى اوى بس والله ده اللى حسيته جديد وهى دى الطريقة اللى هاعبر بيها عن حبى لحبيبتى كل يوم وكل لحظة

اسف انى طولت عليكم وشكرا لكل اللى طول باله وبص على الكلام بتاعى