~SUN~ Pictures, Images and Photos

الخميس، 18 ديسمبر 2008

عرضحال الطفله الفصيحه ..


من حوالى سبع و لا تمن سنين كده لاقيت أم العيال ماسكه فى أيديها ورقه صغيره لونها أزرق اللى هى صورتها فوق دى و بتحاول تفسر اللى فيها و على وجهها علامات التعجب و الخجل !!
سألتها أيه الورقه دى يا أم العيال ؟ أديتها لى و هى بتبتسم و قالت لى : جواب من بنتك أم عشرميت لسان ..
بنتى فى الوقت ده كانت فى سنه أولى اٍيتدائى ..
تناولت منها الخطاب و بدأت فى قراءته لاقيتها كاتبه : أمى الحبيبه أنا أحبك كثيرا و لا أريد أن تضربينى أو تشخطى فيا أنا أريد منكى أن تعطينى أربعه جنيه علشان هاجيبلك حاجه جميله علشان أنا ماعييش فلوس خالص !!!!
قرأت هذه الكلمات العفويه البسيطه اللى كاتباها بنتى اللى كان سنها فى الوقت ده لا يتعدى ال 6 سنوات بدهشه ممزوجه بفرحه و عليهم شويتين غيظ من أم العيال ..
قلت لها شفتى بقى ؟ أهى أول حاجه بتثبت أنك ما ألتزمتيش بالاٍتفاق اللى بينا أنه ممنوع منعا باتا اٍستعمال العنف مع العيال .. كمان لا يجوز الزعيق و الشخط بسبب و بدون سبب مع أطفالنا .. صح؟
قالت لى : صح .. بس ساعات كده البت دى بتستفزنى لأنها طالعه قويه زيك و زى عائلتك و بعشرميت لسان كده على عكس أخواتها الطيبين الهاديين اللى زى خالاتهم و أخوالهم !!
قلت لها بهدؤ : الموضوع مش تفاضل بالأنساب لأنها من عادات الجاهليه الأولى .. لكن الموضوع و ما فيه أننا اٍحنا اللى بنشكل نفسيات عيالنا و ....
و جرس الموبايل رن و أنشغلت فى الحديث ..
يا جماعه اٍحنا اللى بنشكل نفسيات و أخلاق أطفالنا .. تأملوا كده كلمات البت بنتى و شوفوا النقاط اللى تكلمت فيها ببساطه و سماحه طفوليه ..
أول حاجه أعربت عن حبها العميق لأمها و دى اٍفتتاحيه لا شعوريه فى نفس الطفله ربما أرادت بها التمهيد للى جاى .. الاٍعراب عن الحب العميق ده ربما كان بغرض أنه يكون حجه لكتابة هذا الخطاب العجيب أو تذكير للأم بأن هناك من يكن لها مثل هذه المشاعر و ده السبب اللى علشانه بأكتب لك .. و ده فى علم البلاغه اٍسمه براعة الاٍستهلال (معايا يا فاروق يا طالب ثانوى ؟)
نيجى بعد كده بقى على أول طلب للبنت و هو : لا أريد أن تضربينى ..
طيب ما البنت عندها حق طبعا .. ضرب أيه اللى ممكن أب أو أم يجى له قلب و يمد أيده على أبنه و لا بنته و يسبب لهم الألم ؟؟!! فيه تربيه بتتم عن طريق الاٍشعار بالألم ؟؟ تبقى تربية أيه دى ؟؟ يبقى شكل نفسيته أيه الطفل اللى بيتربى بالضرب ؟ و الله الضرب يا جماعه لا بيربى و بينيل و لا لأ يمكن أيوه بينيل لأن العيل اللى يخاف يعمل حاجه فى العلن خوفا من الضرب حيعملها فى السر اٍتقاءا للضرب .. و كمان خلاص أتعرفت الديه هى علقه و السلام و علقه تفوت و لا حد يموت .. و الأخطر من كده كمان أن الضرب بعلم العيل الكدب و المراوغه و اللوع و العنف و بيخلق اٍنسان فاسد و قاسى و لما يكبر حيبقى سادى يستمتع بتعذيب الآخرين .. و مصيبة ضرب البنت مصيبه تانيه أكبر و أخطر ..
أنا عن نفسى عمر أبويا الله يرحمه ما مد أيده عليا أبدا بس كان عنده وسيلة عقاب رهيبه حأحكيلكم عنها فى السطور الجايه ..
الطلب التانى بقى فى خطاب البنت لأمها أنها ما تشخطش فيها ..
يا سلام يا سلام عليكى يا بت يا بطوطه بنت حلال و ربنا و طالعه لأبوكى صح :)
الزعيق و الشخط للطفل بيزود شقاوته و شيطنته .. و بيخليه يطلع صوته عالى و بيعمل رد فعل عكسى سىء عند الأطفال .. أبويا الله يرحمه مثلا كان صوته شبيه جدا بصوت مغنى الأوبرا بافاروتى و كان لما يبتدى يزعق لى و أنا طفل (و برضو بعد ما أتجوزت و خلفت) كانت حيطان البيت بتترج و كانت بتنتابنى نوبات ضحك طبعا كنت بأحاول أخفيها و غالبا كنت بأفشل مما كان بيثير غضبه أكتر فيزعق أكتر و كانت عنده قدره على الزعيق بالساعات حتى أستشاع أمرنا بين الجيران و كنت طبعا أشعر بالخجل الشديد منهم و من أصدقائى اللى كانوا علشان يغيظونى فيقلدوه .. و الحقيقه أن زعيقه لا أدبنى و لا ربانى و لا خلانى أقتنع بالأسباب اللى كانت سبب فى زعيقه زى مثلا ليه و ليه ظبط وسط كتبى رواية السراب لنجيب محغوظ !!
الزعيق و التجعير يا جماعه مش بيربى و لكن بيخلق جو توتر فى البيت و بينعكس سلبا على كل اللى فيه ,, غير أنه بيخللى العيل يشعر بالخجل و الجبن لما بيواجه موقف صعب و بيتمثل فى ذهنه صورة الأب الجعار و الأم الشخاطه النطاره لما بيواجه الأكبر سنا منه أو الأكبر مقاما .. و سائل العقاب يا أخوانى لازم تكون اٍنسانيه و تحترم اٍنسانية و كرامة الطفل و ألا بقى تنقلب بيوتنا لمصانع تخرج جيل مذلول مهان واخد و متعود على الاٍهانه و البهدله و قلة القيمه و حتتواصل هذه المهزله مع عياله و عيال عياله و هكذا ..
نرجع مرجوعنا للعرضحال اللى كتباه البت بنتى لأمها .. البنت بتطلب من أمها 4 جنيه علشان تجيب لها هديه ..
طيب .. أنا عن نفسى بأفضل أن يكون لكل طفل ذمته الماليه الخاصه بيه علشان ما يتعودش تكون أموره الماليه فى أيدين الغير .. يعنى يا أبنى آدى أهو مصروفك طول الشهر و نظم حياتك عليه و ما تطلبش حاجه من حد .. الطفل هنا بيتعود على شوية حاجات مفيده أوى أهمها أن لا تكون موارده الماليه فى أيد حد يتحكم فيه و يمنعها عنه وقت ما يحب .. و أن لا يكون مضطر لمنافقة حد و اللجوء للرياء و مسح الجوخ حتى يحصل على حقوقه الماديه .. و طبعا موضوع التنظيم المالى بيبدأ فى سن مبكره و بيستمر مع الطفل لحد ما بيكبر و بيفتح بيته و بيكون مسئول عن أسره .. اٍستقلال الذمه الماليه للطفل بتخرج الاٍحتياج المادى من دائرة الثواب و العقاب و موضوع قطع المصروف كعقاب للطفل من أكبر الأخطاء اللى ممكن الأبوين يقعوا فيها لأن ده ممكن يحول الطفل غصب عنه للص أو مختلس أو على الأقل طفل حاقد على أقرانه اللى معاهم فلوس و هو لأ بسبب غلطه طفوليه أرتكبها و أتعاقب عليها بالحرمان من المصروف .. خدوا بالكم يا أبهات و يا أمهات من النقطه دى بجد ..
الأطفال يا أخوانا عندهم مشاعر رقيقه و حساسه فوق ما نتصور .. و مش كل الأطفال عندهم القدره على الكتابه و التعبير بالكلام عن نفسهم زى بنتى فبيكتموا مشاعرهم بدون ما يحس بها الكبار فيتداركوا أمرهم و بتكبر معاهم هذه المشاعر المكبوته و تنضغط جواهم على مر السنين و بتنتج فى النهايه اٍنسان مسخ و معقد بيسلم راية النفسنه للجيل اللى بعده و هكذا دواليك ..

هناك 27 تعليقًا:

فاروق عادل يقول...

بوست رائع جدا ومعاك هحاول اعمل براعة استهلال المهم انى لما جيت اقرى البوست افتكرت اسم بنتك عرضحال قولت هو عمرو كردى ولا اية انت عارف انا كمان برضة ابويا ماضربنيش الا مرتين فى حياتى مرة علشان معرفتش احفظ سورة المسد بعد اربع ساعات حفظ والمرة التانية علشان مش عاوز اذاكر
بس فى باقى الايام هى النظرة نظرة زى نظرة احمد زكى فى فيلم البيضة والحجر او تهديد بالضرب وبرضة انا بتنتابتنى هيستريا الضحك ومعرفش لية

من غير عنـــوان يقول...

لاعبوهم 7
وأدبوهم 7
وصادقوهم 7

هذه هي أصول التربيه من حبيبي رسول الله عيه أقضل الصلاه والسلام

بارك الله لكما في أولادكم

أمنياتي

عاشقه وغلبانه يقول...

اولا بوست جميل اوي
وانا صغيره زمان من 20 سنه كنت بعمل زيها كده
بس مانتش بكتبه لماما لان مش هاعمل بمبدأ اشكيك لمين
كنت بكتبه لخالتي
ولان والدي كان مسافر
المهم
انا افتكر ان والدي ضربني مره واحده فضل يعاقب روحه عليها طول عمره ولحد دلوقتي بفكره بيها ومن اهم ذكريت طفولتي بصراحه
بابا هاااااااااادي جدا وصوته مش عالي خالص
عكس ماما بتزعق علي اتفه الاسباب لما تعبتلي اعصابي بجد
ههههههههههههههههههههه
الصوت العالي بيعلم العصبيه للاطفال
والعند
ودول حاجتين انا فعلا اتعلمتهم
اتمني نتجنب في تربيه اولادنا اللي ضايقنا في تربيه اهلينا لينا
وناخدهم اصحاب ونحاول نقرب لدنيتهم
مش الزمن يقف بالاب عند اللسبعينات في وقت الابن بيتكلمعن الالفيه الللي مابقتش جديده
تحياتي

أسامة وغيداء يقول...

رائع جدا ماذكرت
نفسيات الأطفال وشخصياتهم تتشكل منذ السنوات الأولى وبأيدي الأبوين أن يخرجوا أبناء أصحاء أقوياء أو ضعاف مهزوزين والتربية مهمة صعبة فالأبناء كما هم بحاجة للرعاية هم بحاجة أيضا للتوجيه وكذلك بحاجة للعقاب كي يفرقوا بين الصواب والخطأ وطبعا ليس بالضرب ولا بالصراخ بل يكون أيضا بطريقة معين تراعى فيها نفسية الطفل

غير معرف يقول...

اتمنا ابقى بنتك

صبرني يارب يقول...

شوف يا عمرو

اكتر ما يعصبني بقى لما راجل انسان انوي يعنى هههههههههههه يتكلم عن تربية العيال ما علينا

عشان الى ايده فى الميه مش زي الى ايده فى النار

ده غير ان فى حالات لازم تزعق الام خصوصا فى غياب الاب طول النهار كما هو الحال للاسف فى اغلب البيوت

اه عاااااارفه الموال المعيشه بقت صعبه وظروف الحياه ويل ويل اوووووك

بس بقى مش تتأمروا علينا
والضرب طبعااااا مش بيربي لكن ضرب عن ضرب يفرق
انا ممكن اضرب حد من ولادي بس يعنى مش ضرب موت خبطه كده الى هي على راي بابا ضرب الغازيه فى حمارتها ههههههههههههههههه

بس كمان لما الاقي واحد فيهم بيموت نفسه او حد من اخواته
هههههههههههه
اه وربنا بتحصل عادي مره لقيت خالد لافف ايشارب حوالين رقبة رحمه وبيشدها على اساس انها حمار يعنى
ههههههههههههههههههه

طبعا كنت هاموت من الخضه عشان البت كانت هاتموت بجد لولا ستر ربنا طبعاااااا لازم اصوت وازعق واضرب كمان

ولعلمك الاثنين اضربوا كل واحد خبطه كده عشان هى كمان ما تسيبش حد يلف حوالين رقبتها حاجه

ولعب الكهربا مثلاااااااا

اي نعم انا قاعده معاهم ليلا نهارا لكن كمان هما 3 اعمل ايه يعنى اركب كاميرات مراقبه فى الشقه ؟؟

انا صحيح بازعق واصوت واضرب احيانا لكن كمان باطبط وابوس واحضن واهزر والعب معاهم وكل حاجه

وبالنسبه للاستقال المادي تمام يا فندم كل واحده لها حصاله وحساب فى البنك كمااااان ومش عايزه اقولك لما ابوهم بيقولهم بهزار على حاجه مش جايب حاجه روحي هاتي من معاااااكي وهو مش تخيل انهم محوشين تحويشه متينه يعنى
هههههههههههههههههه

يلاقي البت راحت جبتله اكتر من الفلوس هههههههههههههههههه

وفعلا بيعلم العيال حاجات كتير الادخار والاستقلال المادي

وبالنسبه للعقاب بالمصروف

فأنا عندي انواع عقابات مختلفه وهما الى بيختاروا عقابهم احيانا

لكن لما بيكون العقاب متعلق اساسا بالمصروف لازم اقطع المصروف ولو يوم لكن فى اليوم ده باعمل حسابي انى اديلها عصير من البيت وفشار مثلا كده يعنى

التربيه صعبه اوي يا عمرو وبلاش تفتوا وانتم مش شايفين العيال ولا قاعدين معاهم واتحدى اي راجل انه يقعد اليوم بطوله فى وسط العيال وما يزعقش وما يتعصبش

الله يرحمها تيته كانت تقولي الى يحب يجنن حد يسلط عليه شوية عيال
ولله الحمد انا اتجننت خلاص زي ما انتم شايفين

princess يقول...

هاى
موضوع تربية الاطفال ده فن على فكرة
والصبر عليهم برده فن
وفهمهم معضلة
انا مدرسة انجليش لكى جى تو فى مدرسة لغات اساسا انا خريجة السن ومكنتش حابة التدريس خالص
بس قلت بما انى بحب الاطفال فاجرب
وفعلا بقالى 3 شهور ومبسوطة جدا
الاطفال فعلا عالم لوحده وعالم سحرى بجد
اما موضوع الضرب ده فمش بحبه ولا حتى بحب اهدد بيه
تحياتى

عمرو يقول...

طالب ثانوى
لا يا فاروق أنت بالفعل عندك براعة الاٍستهلال أنا قصدى ألفت نظرك ليها لأن أنت اللى خلتنى آخد بالى من هذا الموضوع فى واحده من بوستاتك
أيوه صح مش عارف ليه الواحد كان بييجى عليه بالضحك المتزامن مع الزعيق !!
حأقول لك على سر و أدعى لى لما تدخل الجيش و تقف اٍنتباه فى الطابور غصب عنك و لآزمن حتيجى لك حالة الضحك الهستيرى دى و علشان تتغلب عليها بص على ضوافر أيدك من لتحت كده حتلاقى الضحك راح و برضو مش عارف ليه :))

عمرو يقول...

عاشقه و غلبانه
أهلا بزيارتك و بتعليقك
فعلا عندك حق لازم الأب و الأم يطوروا نفسهم مع تطور الزمان و اٍلا مش حيبقى فيه لا حوار و لا تواصل بينهم و بينهم أولادهم
عندك حق

عمرو يقول...

أسامه و غيداء
أهلا بيكم نورتم البلوج و و الله كويس أنكم فاهمين موضوع التربيه بدون زعيق و لا ضرب

عمرو يقول...

غير معرف
أهى بيكى و يكفى شعورك الجميل و ده شىء يشرفنى

عمرو يقول...

صبرنى يا رب
اٍزيك يا أم خالد ؟
يا ستى احنا مش بنفتى و لا حاجه لكن بنتكلم من واقع خبرات و من واقع آراء أخصائيين فى علم نفس الطفل و أساتذه فى التربيه
الضر غلط كبير فى حق الطفل حتى لو كان ضرب دلع كده زى اللى بتضربيه لعيالك لكن هو فى النهايه ضرب و مردوده غلط على مستقبل و نفسية الطفل
الطفل لو غلط فده لأنه طفل يعنى مش ذنبه فاٍزاى نعاقبه على حاجه مش فى اٍيده ؟؟!!
و مهما الطفل كرر الخطأ فده برضو مش ذنبه لأنه ببساطه طفل و محتاج للصبر الشديد و طولة البال فى التعامل معاه ..
و لو الزعيق يا أم خالد بيجيب نتيجه ما كناش فضلنا نزعق و نهاتى لعيالنا طول النهار و كانوا أرتدعوا من أول مره و خلاص لكن الزعيق له برضو مردود سىء على سلوكيات الطفل فيما بعد ..
مشكوره للمرور و التعليق و خفى عن العيال شويه :))

عمرو يقول...

princess
أهلا بيكى و الله ينور عليكى :)

مدرسة شلشلمون ث بنات يقول...

ههههههههه مشاء الله عليها الاطفال بجد عندهم براءة جميلة اوي وتلقائية كمان لذيذة بس احيانا الام بتضرب ابنها لان ممكن يكون عمل حاجة فعلا تستحق العقاب معاك ان الضرب مش طريقة للتربية بس احينا بيكون وسيلة تأديب للطفل علشان يحس بقيمة غلطه وبرضوا قلب الام مينهش عليها تحس بالم ابنها تلاقيها هي اللي بتتالم مكانه بس بتكون مجبرة علي دا

بس معرفناش بنوتك اخدت الـ 4 جنية بعد الجواب ولا وجابت اية الحاجة الحلوة هههههههههههههههه ربنا يخلي لك اولادك يارب ويصلحك الحال

تحياتي

Unknown يقول...

ياريت كل اب و ام يقروا البوست ده احنا شعب مش بنعرف نربي ولادنا بنعلمهم الجبن و الكدب و اسهل حاجه عندنا اننا نمد ايدنا اونقول اخرررررس

الضرب مش بيربي فعلا التربيه اساسها الحوار و التفاهم

سنابل يقول...

ههههههههههه
فكرتني بابن اختي لما كان لسه ما كملش خمس سنين وقاللي انتي (جرحتي كرامتي قدام العيال) عشان شديت ودنه لما خرج من غير ما يستأذن بس والله كان من خضتي عليه .....
يا ريت الناس يعرفوا إن العيال ف السن ده بيبان عليه كل افعالنا معاه أو حتي قدامه
كان فيه بنت باشتغل معاها تعديل سلوك وكانت شكوة المدرسة منها انها بتشتم وألفاظها وحشة جبت مامتها وباكلمها لاقيتها بتقول لي ماتتعبيش نفسك مع بنت الكلب دى لسانها زفر طالعة لأبوها
تخيل انت بقي



من غير عنوان
اسمحي لي
لاعبوهم سبعا ده مش حديث نبوي ده من اقوال الإمام علي كرم الله وجهه

حاسوباتيه يقول...

هههههههههههههه بنتك عسوله خالص ربنا يخليها
انا معاك في كلامك بس افتكر الاولاد ساعات بيخرجوا الواحد عن شعوره غصب عنه

صبرني يارب يقول...

مين بقى الى قال ان الطفل مش المفروض يعاقب

من اثاث التربيه والتعليم الثواب والعقاب طبعا

والضرب الى انا باتكلم عنه هو ضرب معنوي
يعنى كافيه يحس انى باضربه وزعلانه مش لازم الضربه توجع

الرسول علية الصلاة والسلام كان معلق للحسن والحسين العصايه على الحيطه

Yasmine Madkour يقول...

يخرب عقلك

إيييييييييه اللي انت كاتبه ده ؟؟

بجد كلامك بسيييييط بس بيوافق نظريات الطب النفسي و علم النفس جدا

بجد بجد


ربنا يخليلك بنتك

شمس النهار يقول...

العنف في تربية الابناء وخصوصا البنات وفي عصرنا هذا اكبر غلطه يرتكبها الاباء وخصوصا الام
الام لازم تصاحب بنتها عشان ماتخفش تكلمها في اي حاجه
وتكون هي المرشد الاول لها
بس لابد من العقاب انا كنت بقول لهم ربنا بيدخل الجنه للكويس والنار للوحش يعني مافيش حاجه من غير عقاب
وكنت بعاقب بمالايهدر الكرامه يعني مافيش كرتون النهارده
ماتسمعش معايا حدوته بليل مع اخوتها مافيش رحله مافيش نادي مافيش جده الجمعه دي
بس الاهم من العقاب المصدقيه حتي لانفقد المعني من العقاب

عمرو يقول...

مدرسة شلشلمون ث بنات
أهلا بيكى و سهلا
لأ معلش أنا مش معالضرب أبدا و قلت فى كلامى أيه أسبابى فى رفض الضرب كوسيلة عقاب و صدقينى هى الحكايه بس محتاجه شوية صبر من الوالدين لتشكيل نفسية الطفل و تهيئته على عدم اٍقدامه على أفعال تستوجب ضربه
و أيوه البنت أخدت ال 4 جنيه و جابت لمامتها توكه :)
متشكر و ربنا يخليكى و يفرحك بأولادك آمين يا رب

عمرو يقول...

EmY
شكرا للمرور و التعليق و فعلا الضرب و العنف ماينفعوش أبدا فى التربيه
تقبلى تحياتى

عمرو يقول...

سنابل القمح
شفتى بقى ؟ أهو الطفل الصغير عبر بمنتهى البراءه و الواقعيه عن مشاعره تجاه ما سببته له شدة ودن صغننه لا راحت و لا جات !!
ربنا يهدى الآباء و الأمهات علشان يطلعوا جيل صحيح نفسيا خالى من العقد و الشراشيب
شكرا للزياره و التعليق

عمرو يقول...

حاسوباتيه
متشكر ربنا يخليكى و يفرحك بأولادك
مهما الطفل أخطأ فده طبيعى لأنه طفل و المفترض فى الكبار أنهم يطولوا بالهم و يصبروا على الأطفال لأن ده واجبهم مش يلطشوهم و يهينوهم و يوصفوهم بصفات غبيه بتأثر فى نفسية الأطفال فيما بعد

عمرو يقول...

صبرنى يا رب
فعل التهديد بالضرب لا يقل يا أم خالد فى تأثيره المدمر على نفسية الطفل من فعل الضرب نفسه
يعنى نرعب العيل من الألم ؟ ليه نطلعه متخوف و جبان و مرعوب ؟
مافيش حاجه فى رأيى اٍسمها التأديب بالتخويف من الضرب لكن فيه حاجه اٍسمها تفهم لسن الطفل و أخطاءه الطفوليه اللى ممكن تتعالج بالنصح مره و أتنين و تلاته و مائة مره بس من غير ضرب
خفى عن العيال شويه يا أم خالد :))

عمرو يقول...

عاقله على أرض الجنون
يخرب عقلى ليه بس ؟؟!! :))
ما هو الكلام البسيط أحسن طريقه لتوصيل المعلومه
شكرا للزياره و التعليق و ربنا يخليكى و يفرحك بأولادك آمين يا رب

عمرو يقول...

شمس النهار
الله ينور عليكى يا شموسة المدونات
هو ده الشغل المظبوط
من غير لا ضرب و لا تهزىء للعيل و قلة قيمه
العقاب ممكن يكون مفيد جدا بالطريقه اللى بتقولى عليها و ياريت يا ريت الآباء و الأمهات يستعملوا مثل طريقتك للعقاب بالذات بقى موضوع الكرتون و حدوتة قبل النوم دى حاجات بتوجع الطفل جامد لكن مش بتأذيه نفسيا
عاقله يا شمس و الله :)