~SUN~ Pictures, Images and Photos

الخميس، 11 ديسمبر 2008

تاج من صبرنى يا رب ..

صباح الخير أعزائى المدونات و المدونين ..
التاج ده جالى من الأخت العزيزه صبرنى يا رب .. و متشكر يا أم خالد و كل سنه و أنتى طيبه ..
ماذا يمثل لك العيد ؟
- الأعياد عموما بأعتبرها فرصه كويسه لعمل الخير و التكافل مع الفقراء و اٍدخال السعاده لقلوبهم ,,
وما أكثر شئ يبهجك في مظاهر العيد ؟
- مشهد الجموع و هم رايحين يصلوا العيد و بيكبروا فى الطريق للمساجد و خاصة مشهد الأطفال مع أهاليهم ..
اوصف لنا طقوسك في العيد .. من ليلة العيد لآخر يوم ؟
- فى عيد الفطر عودت أولادى أننا لازم نجتمع الصبح و نفطر شاى بلبن و كحك و بسكويت و الغدا لازمن و حتمن يكون فسيخ مش عارف ليه !! و فى عيد الأضحى بعد صلاة العيد بيكون الدبح لو الحاله متيسره و بعدين الفطار برضو مع الولاد فته و لحمه طبعا .. عادة مش بأحب الخروج فى الأعياد اٍلا نادرا يعنى يوم كده فى النص أفسح العيال .. نسيت أقول لك أن العيال أبتدوا يتمردوا على خروجاتى و بيقولوا عليا أنى بقيت عجوز و خروجاتى كلها دقه قديمه ( آل أنا دقه قديمه آل !! )
احكي لنا أطرف موقف حصلك في العيد ؟
- من كام سنه كان عندى كبش جبلى نادر و حجمه غير طبيعى و شكله بجد مخيف و كان برى مش مستأنس و ما تسألنيش جبته منين هههههه و كان لما يقفز لفوق كان تقريبا بيجيب اٍرتفاع 3 متر و الله بدون مبالغه و كنت حطه فى جنينة بيتى القديم فى العجوزه و أكل كل الشجر و الورد و شيش البلكونه و بعدين أندار على لمبات زينه من اللى بتولع و تطفى كانوا العيال مزوقين بيها شجرة أكلهم و قرقش الاٍزاز و أكل السلك و ستر ربنا أنه ماكنش فيه كهربا و الكل كان رافض أنه يدخل يحط له أكل أو ميه فكنت أنا بأتولى الشغلانه دى على أساس اٍنها مهمه اٍنتحاريه .. و بعد صلاة العيد جبت 2 جزارين عتاوله شداد غلاظ علشان يدبحوه فأول ما دخلوا عليه راح ناطط لفوق 3 متر و هو بيجعر فالجزارين خافوا من شكله و من حجمه و من قفزته و طلعوا يجروا على بره و هما بيقولوا يا اااااااامه !!

المهم رحت مصدر له الواد أبنى الشحط الكبير أكمنه زى الحيطه و بيشيل حديد و قلت له خده يا ابنى لعبد الفتاح الجزار يدبحه العجيبه بقى أن الكبش الوحش ده أستسلم لأبنى تماما و مشى معاه و هو ماسك أيده (أبنى يعنى هو اللى ماسك أيد الخروف) و أكمن الواد أليط فمشى فى الشارع و هو مكسوف أوى و حاطط أيده التانيه فى جيبه و فى الأيد التانيه الخروف و بقى فرجة الشارع من غرابة شكل الكبش .. و بعد كده أم العيال حلفتنى على المصحف الشريف أنى ما أجيبش كباش جبليه تانى أبدا ..
بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
- أيوه طبعا .. بس السنه دى بالذات العيد له معايا شكل مختلف كده شويه يعنى ..
مين أول حد تزوره أو تكلمه في التليفون /الموبايل عشان تهنيه بالعيد ؟
- الحقيقه مش بأزور حد خالص فى العيد و أول حد بأكلمه أهنيه بالعيد هى أختى ..
إيه الفرق بين العيد الحالي .. وعيد (أيام الطفولة )؟
- مش عارف الفرق بالظبط بس أيام الطفوله العيد كان حلو فى مصر بس لما كنت فى الجزائر اللى قضيت فيها جزء من طفولتى و فترة مراهقتى و جزء من شبابى كانت الأعياد خواجاتى شويه غير مصر خالص ..
كلمنا عن ذكرياتك في العيد تفتكر الحياة من غير عيد .. هتفرق كتير ؟؟؟
- و أنا طفل كان العيد بيبدأ الصبح بدرى بعد صلاة العيد فورا و على بيت جدتى فى العباسيه و هناك كنت بألاقى العشرات من أولاد و بنات أعمامى و عماتى اللى كانوا فى سنى تقريبا و نتجمع و نبدأ الخروج بقى و حملة جمع العيديات و حاجات زى كده .. الدنيا كانت رايقه و أمان و رخيصه .. و متهيألى الدنيا ما تنفعش من غير عيد طبعا تفرق كتير ..
إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟
- (عيد سعيد هتوحشنى بجد يا عمرو) الرساله دى جاتلى فى العيد ده و معلش بلاش من مين بس هى من أطيب و أنقى و أجمل اٍنسانه ممكن الواحد يعرفها فى حياته كلها ..
احم احم .. لسه بتاخد عيدية ؟؟ من مين ؟؟ وبتديها لمين ؟
- أيوه لسه بآخد عيديه من أختى الكبيره و ده تقليد أسرى محافظين عليه من سنين طويله و لعلمكم بقى عيديه مش أى كلام يعنى مش حاجه رمزيه :)) مبلغ و قدره ربنا يخليها لى حبيبة قلبى .. و بدى عيديه طبعا لأولادى و أصحابهم و عيال القرايب و اللى يستحق و كده يعنى ..
إيه رأيك في التاج ؟
- حلو و الله تجربه جديده و ممكن نستفيد منها بشكل ما لأنه بيساعدنا على التعرف على بعض أكتر و بشكل أعمق ..
تحب تمرره لمين من المدونين ؟ اذكر على الأقل 10
- بعد اٍذنهم طبعا :
شمس النهار ( اٍن شاء الله لما ترجع بالسلامه من الحج )
كل سنه و كل الناس بخير و طيبين و اٍن شاء الله نزيد و ما ننقصش أبدا ..

هناك 21 تعليقًا:

mohamed ghalia يقول...

كل سنة وإنت طيب
إجابات لذيذة قوى
دمت فى حفظ الله

الازهرى يقول...

العزيز عمرو
اجابات اكثر من رائعة
كل سنة وانت وكل من تحب فى سعادة وراحة وهناء
دمت بكل الخير وبدون الدقة القديمة

بنت الغربة يقول...

انا لقيتك عند صبرنى بجد انت شخصيه ظريفه - انا اول مره ادخل عندك وان شاء الله مش الاخيره- تحياتى ليك - وكل سنه وانت طيب

Empress appy يقول...

هموت من الضحك على شكل ابنك وهو ماشي هكونا الاطه خالص ربنا يفرحك بيهم يا عمرو يا رب

مفكر يقول...

السلام عليكم::

كل سنة وانت طيب يا أ/عمرو،،،

أعتذر لغيابي فترة العيد،،،لأني كنت مسافر حيث لا يوجد نت،،،

كبش جبلي،،،

احنا تقريباً اللي دبحناه كان أخره هضبة ويروح فيها،،،كان على نياته (الكبش يعني)،،،

دمت في حفظ الله يا حبشتكاني فلسفي

kochia يقول...

حلو الكبش الجبلي ده
واكل ورد وخشب وازاز
يا تري كان طعمه ايه ؟؟

maxbeta3zaman يقول...

ضحكت حتى كاد الوش أن "يتفلقا" على حكاية الخروف الفتوة بطل العالم فى الوثب العالى وأكل النابوليا والقزاز ..وبعدين ابنك ده ساحر والا الخروف لقى المعركة غير متكافأه ؟؟ كل عام وانتم بخير
تاج لطيف

غير معرف يقول...

حتى التاج خليته لذيذ بجد انت شخصيه جذابه و مبهرة,, عندك كام سنة و هيه دى صورتك؟

فشكووول يقول...

استاذ عمرو يا حبشتكاوى .. ايه رأيك هات الخروف ده تانى وانا آجى ادبحه لك وأخد نصه هديه .. كل عام وانت بخير وتكون على عرفات العام القادم ان شاء الله

عمرو يقول...

mohamed ghalia
و أنت طيب يا صديقى
و الله أصلى بأجاوب من غير تفكير و لا تزويق يعنى مابقاش فيه وقت الواحد يفكر حتى فى اٍجاباته :)

الأزهرى
شكرا يا عزيزى و كل سنه و أنت طيب
طيب بالذمه لابوار دقه قديمه ؟؟!! قولهم بقى

بنت الغربة
أهلا بيكى و سهلا و كل سنه و أنتى طيبه
أنا كمان زرت مدونتك و لاقيتها بجد رائعه و اٍن شاء الله متواصلين دايما

appy
كل سنه و أنتى طيبه بمناسبة العيد و بمناسبة عيد ميلادك السعيد و ربنا يجعل أيامك كلها هنا و سرور يا رب و يبعد عنك المكارين :))

مفكر
الحمد لله على رجوعك بالسلامه و كل سنه و أنت طيب
الكباش الجبليه دى كانت بتيجى من نيوزلندا لحساب وزارة الزراعه اللى كانت بتبيعها بسعر رخيص لأصحاب المزارع و بجد حقيقى كانت كباش ممتازه و قليلة الدهون على عكس الخرفان المصريه و لكن نيوزلندا منعت تصديرهم لمصر بحجة أن المصريين بيعاملوا الخرفان بطريقه مش كويسه فى الميناء !! عجيبه دى :))

kochia
و الله طعمه كان فى منتهى الجمال بس يا خساره مابقاش ييجى منه فى مصر تانى
كل سنه و أنتى طيبه :)

maxbeta3zaman
و أنت طيب يا صديقى
الواد أبنى عرف يسايس الكبش و ياخده براحه من غير عنف فأستسلم :)

غير معرف
متشكر و عندى 46 سنه و أيوه هى دى صورتى .. أنفع ؟ :))

fashkool
و أنت طيب يا صديقى و نبقى صحبه على عرفات اٍن شاء الله
يا صديقى ما يغلاش عليك و الله أتفضل عندنا تجد ما يسرك :)

اقصوصه يقول...

مبروك التاج

اجابات جميله

وكل عام وانتم بخير :)

أحــوال الهـوي يقول...

دائما يزين التاج الرؤس و هذه المرة تزين التاج بك

فانت اضفت من شخصيتك الكثير بما فيها عذوبة الحديث و طرافة الردود

كل سنة و انت طيب

تحياتي

سنابل يقول...

ينعاد عليك انت وعيلتك وكل اللي بتحبهم وانتوا بخير ان شاء الله
عارفاهم الكباش الخبلية دى خالي كان جايب واحد منهم من كام سنة وأنا من خيبتي ال داخلة اتفرج عليه وفرحانة بحجمه وشكله وكان معايا خالي و ولاده وده ساب كل الناس وطلع يجري ورايا وكل ما يجوا يمسكوه ينط النطة المفترية دى ..كنت هاكون أنا الضحية يوميها بس ربنا ستر

صبرني يارب يقول...

كل سنه وانت طيب يا عمرو

وميرسي كتير على قبول التاج

والتاج حلو اوي اوي عليك بصراحه

ولو ما قريتش لك كتاب قصصي قريب هاقطعك على فكره

وهات باقي القصه بقى بتاعة المخاض عشان انا مستنيه لسه

وتحياتي لك

خمسة فضفضة يقول...

السلام عليكم ورحمة الله وبركاته

كل سنة وحضرتك طيب يا استاذ عمرو

هو حضرتك كنت جايب الكبش ده تربيه يعني زي العصافير والسمك كده ولما توحش قررت تضحي بيه ولا كنت جايبه كاضحيه من الاول
-----

اسمي مكتوب في التاج ليه بس حضرتك دا انا غلبااااااان

ان شاء الله احاول اجاوب عليه بكره


سلام

من غير عنـــوان يقول...

إجابات جمياه

تحياتي

سبهللة يقول...

دة ايه التدبيسة دى
عموما شكرا انك فاكرنى
انا هاجاوب عليه فى اول فرصة ان شاء الله

عمرو يقول...

أقصوصه
الله يبارك فيكى و متشكر و كل سنه و أنتى طيبه :)

أحوال الهوى
يا صديقى الحبيب التاج تشرف بزيارتك و تعليقك الرقيق .. دمت لى أعز صديق

سنابل القمح
يا عزيزتى كل سنه و أنتى و الأسره بألف صحه و خير
و فعلا النوع العجيب من الكباش ده لما بينشن على حد معين و بدون سبب لازم ينطحه و ثبت فشل تربيتهم فى مصر لأن البيئه هنا غير صالحه لهم .. بس طعمهم حلو :)

عمرو يقول...

صبرنى يا رب
أنا اللى متشكر ليكى على اٍهدائك التاج ليا و متشكر كمان على تعليقك
اٍن شاء الله حتشوفى المخاض مطبوعه قريب فى السوق و حاليا بأجرى تعديلات أخيره عليها و حتنشرها دار نشر مغربيه و فيه كلام أنها تترجم للفرنسيه
مين عارف يمكن الشهره تيجى على كبر :)

عمرو يقول...

خمسة فضفضة
كل سنه و أنتى و الآسره طيبين و بخير يا دكتوره و متشكر لزيارتك و تعليقك
الكبش ده كان جاى للتسمين و الدبح و كانت وزارة الزراعه بتستورد مثل هذه الكباش العجيبه من نيوزلندا لتجربة تسمينها فى مصر لأنها بتدى كميه كبيره من اللحم الأحمر الخالى من الدهون و لكن فشلت التجربة لاٍختلاف البيئه فى مصر عن هولندا و كمان فشلت تجربة التزاوج بين النوعيه دى من الكباش و بين النعاج البلدى لأنتاج سلاله مهجنه و أيضا نيوزلندا منعت تصدير الكباش الحيه لمصر بسبب اٍهانة الحيوانات فى الميناء و سوء معاملتهم آه و الله
يعنى التجربه فشلت تماما

عمرو يقول...

من غير عنوان
شكرا يا صديقى للزياره و التعليق :)

سبهلله
لا عادى يعنى مش تدبيسه و لا حاجه :)
بس كنا نتمنى نشوف اٍجاباتك فى أسرع فرصه اٍن شاء الله .. تحياتى و كل سنه و أنتى طيبه