~SUN~ Pictures, Images and Photos

الأربعاء، 10 ديسمبر 2008

روح و أنت طالق !!

صباح الخير أيها المدونات و المدونون ..
عارفين يا جماعه أصعب موقف ممكن يتعرض له الرجل فى حياته هو أيه ؟
هو أنه يترفض من زوجته كزوج !!
أيوه .. أنه ينطرد من حياة زوجته اللى بترفض اٍستمراره فى حياتها كزوج و كرجل و كأب للعيال ..
زمان يا جماعه لما كنا بنسمع عن موقف زى ده كانت الأسباب اللى بتسوقها الزوجات أسباب مقنعه .. أسباب تخليك تعذرها فى تمردها على اٍستمرار الحياه الزوجيه مع هذا الزوج الخائن أو المقامر أو المتجوز واحده تانيه من ورا الأولانيه و مخلف منها ولد اٍسمه عادل و بنت اٍسمها سعاد (اٍختيار الأسماء اٍعتباطى يعنى ما أقصدش عم محمد سليمان بالذات)
و زمان يا جماعه حتى مع وجود هذه الأسباب بجانب طبعا أسباب أخرى زى شراسة الزوج و ضربه ضرب مبرح لزوجته على الفاضى و المليان و اٍدمانه للخمر أو المخدرات كانت الزوجات برضو بيبقى عندها أمل و لو ضعيف فى أن أبو العيال ممكن ينصلح حاله و يبقى بنى آدم يحترم زوجته و يحبها و يخاف عليها و على بيته و عياله .. و كانوا كتير بيستمعوا لنصائح كبار الأسره بالتمسك بالصبر مره و أتنين و تلاته و عشره لعل الزوج يرجع لطريق الصواب و كانت غالبا الحباه الزوجيه بتستمر و العيال بيكبروا و الزوج ربنا بيهد قواه و بيرجع لحظيرة زوجته يبوس الجدم و يبدى الندم على غلطاته بحج مراته ..
النهارده يا جماعه الوضع اٍختلف .. بجد اٍختلف تماما ..
الأسباب اللى بتسوقها الزوجات و خاصة صغيرات السن أنا شايف أنها لا ترقى بأى حال من الأحوال أنها تكون سبب للطلاق و خراب البيت ..
مثلا ..
زوجه شابه ماحصلتش التلاتين و أم لطفلين صغيرين مصممه تطلق من زوجها الشاب أبن الناس المؤدب أبو وظيفه مرموقه للأسباب التاليه :
- فى يوم كذا من شهر كذا الساعه كذا السنه اللى فاتت جيت أحط راسى على كتفه و اٍحنا بنتفرج على التليفزيون راح بعد عنى و قال لى كتفى بيوجعنى ..
- بعدها بأسبوع بأقوله عاوزين السباك راح رافع لى حواجبه و مشى من غير مايرد عليا ..
- أيام الخميس من كل أسبوع بيروح يلعب كوره مع أصحابه بعد الشغل و بعدين بيروح يقعد معاهم على القهوه و بيرجع آخر الليل مدغدغ و مهدود حيله ..
- و لا مره قال لى أنى حلوه ..
- مش بيعرف يجامل و بيتصرف مع الناس زى عمر الشريف فى فيلم اٍشاعة حب ..
- أمه و أبوه غلطوا فيا قدامه و هو ما عملش حاجه ..
- بييجى فى الهايفه و يتصدر ..
- لما بيزعق للعيال بيجعر و صوته عالى أوى و وحش ..
- ألدغ فى حرف الراء !!
- طيب يا ستى هل خانك مثلا ؟
- لأ و ياريت كان خاننى بس يعاملنى كويس !!
- ضربك مره و لا عاملك بخشونه زايده ؟
- لأ
- بخيل أو طمعان فى فلوسك ؟
- لأ خالص و الحمد لله حالتنا الماديه كويسه أوى أوى
- بيشرب حاجه كده و لا كده ؟
- و لا حتى السيجاره يا أونكل ..
- طيب أمال أيه ؟ مصره على الطلاق و تشريد العيلين لييه ؟ لييييييييييه ؟
- خلاص مش بأحبه و هو اللى كرهنى فيه يا أونكل !!
- يا بنتى ما أنتى مختاراه و متجوزاه عن حب و أتخطبتوا سنتين يعنى هل طباعه أتغيرت ؟
- لأ ما أتغيرش بس كنت فاهمه أنى حأقدر أغيره يا أونكل ..
الزوج الشاب حيتجنن .. و بيقول مستعد أبطل كل اللى بيضايقها بس تدينى فرصه تانيه و البت مصممه تصميم عجيب غريب على الطلاق لدرجة أن تفكيرى أتجه لاٍتجاه تانى بعيد شويه لكنه محتمل على أى حال ..
مش عارف هل فعلا أسباب الطلاق اليومين دول بتختلف بهذا الكم و الكيف عن الأسباب زمان و لا هو دلع و مياصه و عدم تقدير كافى لمسئولية البيت و الزواج و الأطفال و لا أيه الحكايه ؟؟!!

أعجب سبب بقى سمعته من بنت تانيه برضو عاوزه تطلق أن زوجها مصر ينام بالبنطلون الجينز و الحزام !!

هناك 11 تعليقًا:

mahasen saber يقول...

عذرا يعنى دول بيتبطروا على النعمه

الست اليى جوزها مش بيهنها لا بايده ولا بلسانه
ولا بيشرب هباب
ولا مبلط فى البيت وعاطل
ولا بتترعب من ايده لو اترفعت لاى سبب حتى ولو هتتحط على كتفها

تبوس ايديها وش وضهر وتحمد ربنا على النعمه وانها عايشه مع انسان بشر عارف انه بشر وبيحس

mahasen saber يقول...

بعدين اعتقد فى الدين ان الزوجه اليى تطلب الطلاق لاسباب هايفه بتروح النار ههههههههه
والله ده استعباط

بعدين ممكن تورينى نماذج الستات دول عشان نحطهم فى فاترينه ونتفرج عليهم

Empress appy يقول...

منقدرش ننكر ان الزوجه لها متطلبات ومحتاجه حنيه بس بالتفاهم معاه تاخد اللى هى عاوزاه اه يا عمرو انا شايفه انها لما تحط راسها على كتفه ويعمل كده يبقى وحش اه استعباط بقى انا بضايق من عدم مراعاه الطرف التاني ومبحبش الصوت العالى
حاولوا تعدلوا بينهم يمكن ربنا يهدي
وبعدين اه هو يجيب السباك امال هى ويحصل حادثه ونندم ها بقى انا عنصريه اعمل ايه
بس فعلا فيه بنات بتغيظ وبتهبل بجد بس دي عندها اسبابها اللى شيفاها فايتل بالنسبه ليها كل واحد حسب رؤيته وحياته فاهمنى طبعا

سنابل يقول...

أولا كل سنة ووإنت طيب وبخير

زى ما انت قلت ( هو دلع و مياصه و عدم تقدير كافى لمسئولية البيت و الزواج و الأطفال)وكمان أنا شايفاها ست غبية
أة فيها أسباب تعمل زعل بس فيه حاجة أسمها عتاب وعمر الأسباب دى ماتوصل للطلاق

Sweet Violet يقول...

بعض من النقاط اللى اتذكرت عندها حق فيها و طبعا فى البعض منها غلط

لكن الموضوع مش يوصل للطلاق الا لو فعلا الزوج ماتغيرش

يعنى مثلا فى ازواج حاطين الحمل كله على الزوجه زى المثال اللى انت قولته انه المفروض يجيب السباك و هو اللى يتعامل مع اى حد يدخل البيت مش هى

لكن فى منهم للأسف بيسيبوا الحاجات دى للواحده على اساس انها بمليون راجل بقى و هاتتصرف و هو ماعليه الا انه يجيب الفلوس و يعيشها عيشه حلوة

و لما هو يتجاهل مشاعرها و يعملها على انها برواز فى البيت طب ازاى دا يتعاش معه؟؟؟

ماهي برضه انسانه وليها متطلبات و لو تم التجاهل دا فى حد ذاته اهانه يبقى فعلا العيشه وقتها ماتنفعش لان ممكن الامور تسوء اكتر

مش لازم يكون سبب الطلاق الضرب او لاسباب ماديه

Unknown يقول...

السافل الوحش بينام بالبنطلون و الحزام كمان لاااا ده لازم يتربي

يستاهل ضرب النار مش بس الطلاق

هو في ناس كده تنام بالحزام اعوذ بالله

ايه الدلع ده الناس دي مش حاسه ان الطلاق يعني هدم اسره و مشاكل نفسيه للاطفال

يعني لازم يكون في سبب قوي يستاهل الاضرار الي هاتنتج عن الطلاق

كل سنه و انت طيب

أسامة وغيداء يقول...

الطلاق انتشر بصورة فظيعة في المجتمعات العربية وخاصةعندنا في السعودية وصل الطلاق لنسب عالية جدا والسبب الرئيسي يعود لعدت تحمل الطرفين للمسؤولية وتقدير الحياة الزوجية وبصراحة أعجبني الموضوع كثيرا

صبرني يارب يقول...

يا عمرو حرام عليك

وربنا هاموت من الضحك
يعنى عجبك كده العيال قاعدين يبصولي ويقولولي فى ايه يا ماما

ايه الحزام والبنطلون ده يا لهوي هاموت بجد من الضحك
ههههههههههههههههههههههه
طب ودوه لدكتور نفسي طيب مش عارفه اقول حاجه على فكره ههههههههههههههههههههههههههه

المهم

بالنسبه للاخت دي يا اونكل يا عمرو فمن اجابتها هى بتتلكك من الاخر عايزه تطلق لسبب او لآخر غير الى هي بتقوله ده
عارف ليه ؟؟؟

لو كان السبب معلن كانت قالت عشان كذا وبس

انما تعدد الاسباب الهايفه معناه انها بتكذب على نفسها حتى يمكن مش شرط عليك

وقولها قولي الحق احسنلك واتقي الله فى عيالك والبتران اخرته قطران

وطبعا فى الاول وفي الاخر هى حره والى بيشيل قربه مخرووووووومه بتخر على دماغه

وطبعا طبعا الجيل بقى غير الجيل يا عمرو وبقى في هبل كتير

وعلى فكره
انا مش مع الى يقول لواحده طول عمرك استحملي وضحي عشان عيالك واستحملي الزوج الخاين الحيوان الفاسق
اطلاااااااااقا

عمرو لك تاج عندي يا باشا اتفضل حدانا

kochia يقول...

مش معقول تكوني هي دي الاسباب
اصل ده كلام مش منكقي الا اذا كان ناقص
مع ملاحظة ان مش الضرب هو السبب الوحيد للطلاق
فيه اسباب تانية كتير من غير اهانة بدنية

تحياتي

من غير عنـــوان يقول...

اللي يعيش باما يشوف

لو فيه هدف من الجواز ( زي إقامة أسره وتعمير الأرض)كانوا استحملوا
لكن غالبا هما دلوقتي بيتجوزوا عشان يعملوا فرح... كارت دعوة.. فستان... وزي ما أهلهم عودوهم... مش عايزه اللعبه دي... زهقت...

الرك على التربيه

وكترة الحاجات ... بتخلى الناس تزهق...

والرضــــــــــــــــــــا



أمنياتي

شمس النهار يقول...

عارف ياعمرو الموضوع ده عامل زي البيضه الاول والا الفرخه
بس انا بقول التربيه ثم التربيه
اصل اصلا المجتمع حاله اتشقلب والمقاييس اتغيرت خالص
انزل الصبح وشوف مين اللي بيوصل الاولاد المدرسه ولو عملت عينه ميدانيه هتلاقي ياالزوج نايم في البيت يا بره مصر بيلم فلوس
طبعا ده اول مسمار في نعش الحياه
اختلاط الاوراق
الولد بيطلع ماما هي كل حاجه هي الرجل والست بيخطلت عنده دور الرجل ماعندوش قدوه في البيت يعمل زيه
بقولك ايه مش عايزه اتفتح في الكلام عشان انا كنت عامله بحث في الموضوع ده تبع مجلس الاباء عند البنات في المدرسه وكان شئ محزن ويغم العينات اللي اخدتها سمعت من الطلبه والطالبات كلام يشيب
لاالبنت عارفه حدودها والا الولد عارف يعني ايه رجل
تقدر تقولي جيل اغلبه مشوش هيعمل اسره ازاي