الاثنين، 14 سبتمبر، 2009

الرجل الحلوف و لغز الغشاء اللاصق !!

مساء الخير أعزائى المدونات و المدونين و أسعد الله مساءكم بالمباهج و السرور ..
سامحونى يا أعزائى النهارده عاوز أكتب عن موضوعين بايخين شويه .. صادمين رخمين .. و عارف أنه ربما سيمتنع الكثيرون عن التعليق على البوست ده لحساسية موضوعه و ألتمس لهم العذر ..
لكن بصراحه أنا مقدرتش أمنع نفسى عن الكتابه عن الموضوعين دول كنوع من تفريغ شحنة الغضب اللى أصابتنى و كنوع من ردة الفعل اللى ألجمتنى و فى نفس الوقت أثارت بداخلى حزنا من نوع خاص .. فعذرا لكم ..
الموضوع الأول :
صدمت و فزعت لخبر جاء فى الجرايد من يومين كده ..
ملخصه أن رجلا ( مجازا يعنى ) فى منتصف الثلاثينات من عمره ( اللى يا رب ينقصف بدرى ) متزوج من فتاه عندها عشرين سنه .. و بعد 3 سنين من الجواز قبت و نطت و طقت فى دماغه أنه يعملها عملية ختان !!!
ليه و أيه السبب ؟؟ الله و رسوله أعلم ..
فيقوم المجرم السافل يتفق مع أخته و جوزها أنهم يساعدوه فى اٍتمام هذه الجريمه النكراء !! على أن يتولى النطع التانى جوز أخته الحلاق ختان البنت !! اللى أصيبت طبعا بنزيف حاد يا قلب أمها و بلاوى زرقا و أتشلفطت بعد ما أنهارت مقاومتها أمام عنفهم الوحشى و أتشالت مرابعه على المستشفى فى حاله سيئه للغايه .. و تم اٍلقاء القبض على النطع زوجها الفران و أخته و جوزها ..
أيه ده ؟؟
طيب اٍزاى يعنى ؟؟
أيه كم الجرائم المرعب فى القصه دى ؟؟
الجريمه بدأت من مجرد تفكير الزوج و رغبته فى تشويه جسد زوجته و حرمانها من أحد مظاهر الأنوثه ربما لاٍحساسه بالنقص و الله أعلم و هى البنت اللى لسه بتتفتح للدنيا ..
و الجريمه التانيه أنه أستعان بزوج أخته للقيام بهذه الفعله النكراء .. يعنى لا أتصور أن راجل بمعنى راجل يمسك مراته و يكتفها لجوز أخته علشان يطاهرها !!!
مش عارف أقول أيه و الله بس أنا متنكد آخر نكد و بسبب الموضوع حاولت أفش غلى فى عيالى الكبار و الصغار و نكدت عليهم كتقليد طبيعى و متبع لدى كل الأبهات المصريين لما بيتنكدوا ..
أيه اللى حصل للرجاله ؟؟
و أيه اللى حصل للبنى آدمين ؟؟
عمرنا ما سمعنا عن حلوف مسك حلوفته للحلوف جوز أخته الحلوفه علشان يعتدى على كرامتها و حلوفيتها و أنوثتها !!
مش حأسأل بقى فين خشية الله و لا فين القيم و فين النخوه و الرجوله لا سمح الله لأنه واضح أنه أصبح من العسير الحصول على اٍجابه مقنعه فى زمن مفهوم الرجوله فيه بقى أنه كلمه سقط حجر بنطلونك أكتر كلما أحبتك البنات أكتر و أكتر ..
لو أنا من ولى الأمر و الله لحكمت على هذا الزوج النعجه بأنه يتعمل فيه زى ما عمل بالظبط لا أكثر و لا أقل جزاءا وفاقا لجريمته النكراء خليه بقى يفرح برجولته المزعومه الراجل الوضيع العره اللى حرام يتحسب على جنس الرجال ظلما و بهتانا ..
الموضوع التانى :
الصين و آه من اللى بييجى لنا من الصين !!
يعنى بعد ما الصينين ولاد العفاريت الزرق صنعوا كل شىء بمعنى كل شىء لاقوا أن لسه فيه حاجه لم ينتجوها و لم يقتحموا بها أسواق الشرق فأنتجوها و قالوا رزق الصين على الشرقيين و زى ما تيجى ..
الصين أم العجايب يا ساده أقتحمت سوق العفه !! و هى اٍسمها كده و بتدل على العفه فعلا رغم رفض الرافضين لهذا التقليد ..
نعم ؟؟!!
اٍزاى ؟؟
الصين أنتجت غشاء بكاره صناعى زى ما أنتجت كل حاجه صناعى .. و المنتج الجديد له سوق رائجه لدى بعض الدول العربيه الشقيقه و قد أثبت نجاحا باهرا و اٍقبالا شديدا من المستهلكات للسهوله الشديده فى اٍستعماله حيث أنه لا يحتاج فى تركيبه سوى ثوانى من غير طبيب و لا بنج و لا عياده و لا وجع قلب و لا يحزنون يعنى زى العدسات اللاصقه كده و ترجع السيده بكر بالغ رشيد بفضل هونج وانج يونج كومبانى ليمتد!!
أهوه :

و عليه فقد بدأ هذا الغشاء الصناعى يعرف طريقه لتجار الشنطه و القادمين من الخارج بكميات هائله و كذلك مراكز السبا و المصيبه أنه بدأ يعرف طريقه كمان لبعض الصيدليات بالمناطق الشعبيه و الراقيه على السواء و المصيبه الأكبر فى زعمى أن بعض المستوردين قد عقدوا صفقات مع الشركه الصينيه المنتجه لها لأستيراده بالطريق الرسمى و توزيعه فى مصر المحروسه بأسعار تناسب الجميع مع التحدى أن يوجد أى فرق بينه و بين الغشاء الطبيعى !!!

يعنى مش عارف ..

أتوقع أن يوجد تحرك ما من جهة ما لوقف هذه المهزله المسخره النص كم و لحقها فى أولها ..

أتوقع أنه من الأصوب و الأصح منع هذا المنتج الجهنمى من دخول الوطن أصلا بل و تجريم تهريبه و تغليظ العقوبه على من يدخله خلسه و ده لأسباب كتيره يطول شرحها ..

أرحموا الناس بقى يرحمكم ربنا و فتحوا عينيكم على الصغائر فمعظم النار من مستصغر الشرر ..

تقبلوا تحياتى و سامحونى على العكننه ..

هناك 60 تعليقًا:

شمس النهار يقول...

مساء الخير يا لورد :)
للأسف ان انا قريت الخبر الاول ده في جريدة الاخبار واصابني الغثيان فعلا
السؤال هل بعض الرجال للدرجه دي اصبح الدم اللي في عروقهم ماء بارد
وليه وازاي وميت سؤال
يعني سألت نفسي هو للدرجه دي الناس دي ماعندهاش وعي والاعلام كده سايبهم في جهلهم وخصوصا ان الزوج فران محدود الثقافه والتعليم
بس لاقيتها مالهاش دعوه بكده دي لها دعوه بالنخوه والرجوله
اما الخبر التاني الصادم فعلا
هعلق اقول ايه عليه مش عارفه
المفروض بقا الدوله متمثله في الازهر ودار الافتاء يتحركوا وبدل ما بيتخانقوا في الفضائيات
علي من له حق الفتوي اللي تلت اربعها غلط اصلا
يعملوا حاجه في دنيتهم صح
والصيدلي اللي المفروض انه امين
يحط نفسه مكان الشاب اللي هو بيتعاون مع بنت انعدم ضميرها
وبيساعدها علي غشه
ياريت جمعية حماية المستهلك وحقوق الانسان علي نقابة الصيادله يعملوا حاجه
وزي ماالطبيب اللي بيعمل العمليه دي او الاجهاض بيتعاقب من النقابه كمان الصيدلي اللي يعمل كده برضه يتعاقب
هو ربنا طبعا هيعقبوا بس ياريت المجتمع كمان يعاقبه
انا شخصيا لو دخلت صيدليه ولاقيتها بتبيع الكلام ده مش هدخلها تاني علشان اللي يغش كده يغش في كل حاجه
في النهايه يا لورد اقول لك ايه انت فشيت غضبك في عيالك افش غضبي انا بقا في مين
لا مش كده
اللهم ارفع غضبك ومقتك عنا

عاشقه وغلبانه يقول...

الخبر الاول لسه صادمني حالا
اما الخبر الثاني مصدومه منه من قبل الفطار
عارف لما تقرا حاجه تخليك تفتح بوقك وتوقف التنفس وتبرق عنيك وفي لحظه تاخد نفس عميق وتقول هو في ايه...؟؟؟؟؟
اولا البني ادم بتاع الخبر الاولاني راجل من قله الرجاله
نص كم
او كات
مقروفه منه من غير ماعرفه ولا عايزه اعرفه
وانت قولت اللي يشفي غليلي منه وانه يتعمل فيه زي ماتعمل فيها
انا نفسي ربنا يوعده بظابط من اللي بيعملوا الكليبات اياها
اه والله
حلال فيه
جاته القرف

انا الصين بقي فدي المصيبه اللي حطت فوق دماغنا
هتخلي الرجاله تلف حوالين روحها
انا معاك ان العذريه مش بس غشاء بس ده مايمنعش انه كان مانع بلاوي كتير
وانه نفسيا مهم جدا للزوج
وانه بنات كتير من اللي خوفها من ربنا قليل اوي كانت بتخاف تعمل الغلط علشان الغشاء
مابالك بقي والغشاء غلب اللينسيس
يادي النيله
انا مش عارفه مخهم ده جابهم ازاي لحاجه زي دي

ده انا لو كنت قعدت عمري كله ماكنت اتخيل اختراع زي ده
دي مصيييييييبه والله
ده زيد بقي زي عبيد
وكله بقي شبه بعض
بنت البنوت بقت شبه اللي درات علي حل شعرها ولما زهقت قالت اتجوز بقي
انا زعلانه علي روحي اكتر من زعلي علي الرجاله
كله بقي شبه بعضه
انا عارفه ان الدين والاخلاق مش بس غشاء والله
بس هانشوف اللي تلف وتخرب الدنيا فوق وتحت وتيجي تلبس حجاب وتحط غشاء وتعملنا خضره الشريفه
انا مصدومه ومقهوره وحزينه فوق ماتتخيل

عطش الصبار يقول...

مساء الخير يا استاذ عمرو
انا مش هعلق على الموضوع بتاع الحلوف لانى مش قادره اتخيل حاجه زى دى يبدو انه نوع جديد من الحلاليف نتاج ادماجه مع اشباه البشر شوف الناتج هيبقى ايه
اما الصين فهى غزت امريكا كمان واللهى انا كان نفسى اشترى اى حاجه مش صنع الصين
الخطوره فى موضوع الغشاء الصناعى انه هبعمل نوع من الغش لان كتير من الجماعه اياهم هيستخدموه مره واتنين مش عارفه اكمل اصل الموضوع ده له مردود اجتماعى خطير ابسطها ان الناس هتشك فى بعضها
زمان قوىايام شواين لاى كنت باحب الصين وكنت باعتبر حرب الافيون ملحمه
دلوقت لما بشوف اسم الصين على اى منتج بحس ان الصين بقت نموذج لكل شىء ردىء ومش عارفه العيب فى الصين ولا فى تجارنا اللى همهم التجاره والمكسب على حساب اى قيم واعراف (يارب اى واحد يستورد المنتج ده بالذات يقع فيه هه بقى)
تقبل تحياتى

عاشقة الأحزان يقول...

السلام عليكم

انا بجد اتصدمت قووى لما قريت الخبر ده عند حضرتك حسبى الله ونعمه الوكيل

هى دى الحضارة
وهى دى العولمه
وتحيا مصر يا عم

لما قريت كلامك
افنكرت بيت الشعر ده
لا يسلم الشرف الرفيع من الأذى حتى يراق على جوانبه الدم
وطبعا ده بقى موضه قديمه شرف مين والناس نايمين
هو الغشاء وصل كام النهارده
مع الغشاء يمكنك أن تفعلى ما تشائين
ويمكنك اختياره من بين خمس ألوان جذابه
وبرائحه النعناع والبرتقال والمانجو
كلامك حسسنى بالقهر
إنما تعليقى على الأفكار التى تأتى لنا من الغرب ومن بلاد تتمنى الزوال للمسلمين
المفروض ان واجبنا كأبناء وطن
بنغير علي وطنا وعلي قيمه وتقاليده ومثله العليا
اننا لما تجيلنا أفكار مسومه زي دي
لا نعير لها اهتماما ولا نلقي عليها الضوء حتي تصبح حقيقه
مؤكده وكأننا نجزم بوجود تلك الأعمال المشينه
في مجتمعاتنا العربيه
هو معني انهم يعملو دعايه وقحه زي دي
يبقي خلاص الأمر بقي مسلم بيه
ولازم نسلم بان الصين هتوردلنا بعد كدا....
علي العموم عادي كل شىء متوقع دلوقتي
الناس صاحيه جدا وواعيه جدا
المفروض فعلا يبقي لا تعليق.....!!!!!!!!


تحياتى
ايناس

صبرني يارب يقول...

ايه يا استاذنا

انا عملت فيك حاجه

طيب الموضوع الاول لا خلاف على ان هذا الاخ يادوب حلوف ولا يستاهل حتى يبقى حلوف

وحسبنا الله ونعم الوكيل


والصين رضا لما كان هناك قالي ان فى سوق كبيره جداااا هناك كلها حاجات منحرفه كده

وموضوع الغشاء ده مصيبه وربنا

الا العيال الشباب كانوا شاكين في الدنيا كلها بالعمليات

طب بعد كده يبقى يروح يكشف عليها فى حماية المستهلك ويشوف هو صناعه ايه مصري ولا صينى


اااااه ياني

بت خيخة وأي كلام يقول...

عمرنا ما سمعنا عن حلوف مسك حلوفته للحلوف جوز أخته الحلوفه علشان يعتدى على كرامتها و حلوفيتها و أنوثتها !!


عاجبنى التركيب اللغوي للجملة اللى فوق دى



نيجى للموضوع الاولانى

بعد تلات سنين؟
بعد تلات سنين؟
هههههههههههههههههه
بيفكرنى بعادل امام
بعد سنتين
بعد سنتيييييين بيفتح السمكة كدة مالقاش الخاتم

بص يا عمرو
انت بتقول فران وحلاق
يعنى واضح جدا ان معندهومش اى وعي وان مستواهم الثقافى منعدم
والناس دى لسة مخها معشش فى الجهل ولسة دماغهم بيسلموها لاهاليهم


الموضوع التانى
مريب وغريب وشائك وازاى يعنى

ده كدة فعلا وبجد شبابنا هيحتاجوا معاهم فى ليلة الزفاف خبير فى الطب الشرعي
علشان يتأكدوا اذا كان عذرية الزوجة طبيعية ولا صينية

غير معرف يقول...

الخبرين انيل من بعض
الاول ده راجل مالوش وصف ونفسي اعرف هو افتكر الموضوع ده بعد 3 سنين جواز ليه
اما الخبر التاني!!
ده بقي اللي في الصميم
الصين غلبت خالتي بمبه
عرفوا منين اننا بنغش بعض حتي في الكلام ده
طبعا السفاره والملحق التجاري بالذات بيدرس السوق المصري وبيعرف المصريين عايزين ايه
يالهوووووووي
دي فضيحه يارجاله!!!!!
المصريين بيغشوا في كل حاجه حتي الشرف
مش هستغرب لو رجعوا وعملوا دراسه تانيه
ويخترعوا ماده اوجهاز يخاللي الشاب من دول يقدر يعرف الغشاء ده صيني والا مصري
(طبعا مااحنا لينا السبق في اختراع الغشاء المصري برضه)
والا لاسمح الله البنت شريفه وعفيفه وكانت ماشيه بما يرضي الله......
وطبعا الاتنين هيتباعوا في نفس الصيدليه!!!!!!!
ومش هستغرب والله علي مااقول شهيد......
انهم يدربوا الشاب المقبل علي الزواج ازاي يعرف ده لوحده من غير ماحد يقول له
عجبي!!!!!!!!!

حاسوباتيه يقول...

انا مزهوله ومبلمه ومزبهله ومش عارفه اقول ايه بالنسبه للراجل الاولاني ده انا ماليش كلام اقوله اكتر ملي حضرتك قولته

بالنسبه للمنتج التاني ده فيعني مش عارفه ازاى تفكيرهم يوصل لكده يعني هو ليه وازاى وفين

انا اجننت تقريبا يعني مش متخيله ان الي انتوا المنتج ده قعدوا كده مع بعض وقالوا هننتج كزا يعني معقوله حسوا ان بنات العرب محتاجينه مثلا

حسبي الله ونعم الوكيل على اي حد يستورده او يجيبه

وبس انا هكمل ازبهلال

أحلام حقيقية يقول...

لا حول ولا قوة الا بالله مفيش كلام اعلق بيه على الخبرين

فليعد للدين مجده يقول...

استاذ عمرو
طبعا هذا الرجل الاحمق هو ضحية لهذا المجتمع الجاهل
هل تتخيل أني لم أستغرب فعلته النكراء
هل تعرف لماذا؟
لأني في عملي طبيب ذكورة أقابلمثل هذه الكوارث بصفة دائمة
ألم تعلم أن العريس الجديد عندما يصاب بالعنة النفسية الشائعة في مثل هذه الحالات يتم الاستعانة بدجال يوهمه أن زوجته مربوطة وأنه لابد من فك ربطها، ويقوم الدجال بفك ربطها بنفسه وبطريقت الخاصة في خلوة كاملة في غرفة نوم العريس لذي لا يستطيع لدخول عالي غرفة نومه حتي ينتهي الدجال من فك ربط زوجته!!
هذا العريس استخسر فيه لفظ حلوف الذي أطلقته انت علي الرجل الاول

يا أخي المجتمع به من الجهالات الكثير وبينه وبين كلا من الدين والعلم بعد المشرقين
هذا المجتمع الجاهل يحتاج الينا
لتنويره وتعليمه

غير معرف يقول...

مش هقول غير حسبى الله ونعم الوكيل ودا صعب يتوصف ببنى ادم مش رجل فقط


الخبر التانى

الرجالة هما اللى مستفدين من كدة يعنى الاغتصاب هيزيد يعنى يبقا سهل من اى ذئب انة يغتصب واحدة ويقول اهو الغشاء الصينى موجود يعنى مش البنات هى اللى هتستفيد

بجد لازم كلنا نوقف المهزلة دية باى طريقة منعا للعنف بأى شكل من الاشكال

حماية لولادنا وبناتنا واخواتنا

وربنا يسلمنا ويرحمنا

Appy يقول...

يا صباح العصبيه
بس يا سيدى الاولانى ببساطه راجع للجهل ونقص الرجوله ايون هى دى الىل انت فاهمها مش عارفه اوضحها ازاى بس معروف انالبنت اللى مش معمول لها ختان بتكون اكتر اثاره فهو تقريبا خاف على نفسه او حاجه
والسبب برضه جهل منه فى الحياه عموما الزوجيه او غيره
كونه نطع او حلوف او اى مسمى فمش مهم بس انا عندى حاجه الناس دى اذا شبهتها بالحيوانات يبقى انت بتهين الحيوان
الخبر التانى
بجد انا منبهره بالصينين يا عمرو بجد الناس دى بتشتغ لواحنا بنتكلم وبس
دى ابسط تعليق على اللى عملوه لانى مش هينفع اناقش من ناحيه حلال وحرام والقصه دى لان فيها جدا
طويل لان ببساطه فيه دكاتره بتعمل كده وفيه بنات بتتولد من غير غشاء بكاره وفيه بنات بتصاب فى العاب فالموضوع كبير ومش هينفع ادخل فيه
بس الانبهار الحقيقى بدماغ الناس دى

ماما يقول...

بجد يا استاذ عمرو انا من جيل اتكسف من الكلام فى المواضيع ديه
اتربيت فى بيت كان بيمنعنا من الفرجه على افلام عبد الحليم اللى بتعلم البنات الحب
دلوقتى بنسمع العجايب ولا اقول غير حسبى الله ونعم الوكيل
يعنى هاننتظر ايه من الملحدين الكفره
بس ايه ذنب ولادك
ربنا معاهم
انا متخيلاك وانت بتقولهم زمانهم زفت وايامهم قطران

صدقنى سيدى هما مساكين فى زمن ماعدش ليه طعم حتى الشرف معدلوش طعم
ربنا معاهم ويعوضهم خير

قوس قزح يقول...

الموضوع الاول
اعتقد ده نتيجة الجهل فى الموضوع ده و انه له تأثير على الرغبة الجنسية

اما الموضوع التانى
فانا امبارح قريت الخبر ده
و بقيت مش مصدقة اننا وصلنا للدرجة دى
و كنت هكتب بوست عنه

بس تصدق
اتكسفت

و اتكسفت اكتر لبنات مصر اللى سمعتهم بقت كده

ربنا يستر على بناتنا

غير معرف يقول...

يعنى مفيش غير ان ربنا كبير و قادر على كشف كل خوان اثيم
فلا الصين و لا غيرها و لا اى فاجره تستطيع ان تغش من اراد الله له الحمايه من خيانه الاخرين

و من يتق الله يجعل له مخرجا و يرزقه من حيث لا يحتسب و اكيد الزوجه الصالحه العفيفه رزق من الارزاق

تحياتى

الازهرى يقول...

لا حول ولا قوة إلا بالله العلى العظيم

طيب الأولانى وفهمناها نتيجة كتير من االأفكار المغلوطه الموجودة داخل المجتمع وعدم الوعى الدينى الصحيح نتيجة كل هذا الكم من مدعى العلم بالدين

اما بقى الخبر التانى فصعب فهمها شويتين على مش لأنى مش متوقع الإنحلال الموجود فى المجتمع
لكن لأنى وبكل بساطه لم أكن أتخخيل أن يكون قد شاع إلى تلك الدرجة

والمشكلة عندى مش فى ان الموضوع بقى انك لازم تعرف الزوجه حافظت على نفسها او لأ زى ما كتير ااشارو ا
ده سهل يكفى اننا نتبع اوامر الرسول الكريم صلى الله عليه وسلم وندور على البيت المحترم المتدين تدين صحيح واكيد ياذن الله تلاقى ذات العفه هناك

الكارثه ان ده معناه زى ما قلت االانتشار والتسيب وعلامة كبييييييره جدا على الانهيار الحادث فى المجتمع وده هو نفسه اللى حصل فى اى مكان وزمان على مر التاريخ قبل محلة الفوضى التامة وتفكك الأسس الرئيسية للمجتمع أدعوا الله تعالى أن يعافينا جميعا

ويعنى لازم تعكنن على الأولاد ما كفايا احنا هنا
سامحهم علشان خاطرى

mahasen saber يقول...

جهل ..تخلف ..انعدام للحياء مع ندره فى الاخلاق
يطلعوا تصرفات اكثر فظاعه وبشاعه من كدا

اما الصين فمتعرفش تخترعلنا عقل نعرف نفكر بيه
ندخل ايه من منتجاتها ونسمح ببيعه وايه مندخلوش

reem يقول...

استاذ عمرو

انا قرأت البوست من امبارح لكن بجد مش عرفت اكتب كومنت

حسيبت انى مخنوقة بجد من الخبرين وبالذات الحبر الاول لانى كنت اول مره اعرفه هنا عند حضرتك

كتير من اللى كتبو كومنتس على هذا الرجل قالو مش غريبة بسبب التخلف والجعل والعادات الخاطئة
بس كان ممكن نقول كدا بس لو هو خد مراته واجرى لها عملية الختان عند طبيبة او حتى اللى قامت باجرائها سيدة على الاقل

انما اللى مش قادره استوعبه ان اللى يقوم باجرائها زوج اخته
يعنى الراجل دا اتمسك بالعادات في الختان وعادى كدا وافق على كشف عورات زوجته امام رجل ومش اى رجل دا جوز اخته دا بجد مش مستوعباه خالص

وكفاية اوى بجد وصف حضرتك ليه وهو ما اشفي غليلى نوعا ما منه

اما موضوع الصين فدا عرفته من كم يوم وعرفت ان تقريبا سعره 15 دولار ولا عزاء للشرف لما يوصل سعره كدا

غير معرف يقول...

الراجل اللى عمل كدة فى زوجتة صعب انة يتقال علية حيوان

اما التانى ففعلا دية حرب علينا

وعلى فكرة بيبان الغشاء الطبيعى عن الصناعى والطب هو اللى بيحدد دة وممكن الغشاء دة يكون غير صحى يسبب امراض وحاجات تانية منعرفش عنها حاجة

وعلى فكرة الصين دايما بتوردلنا اردىء المنتجات بتعتها فى كل شىء على اد فلوسنا

ستيته حسب الله الحمش يقول...

زعلانة جدا ان الناس بتقول فران وحلاق ومش مثقفين
من إمتى النخوة والجدعنة كان بيلزمهم علم او ثقافة

القصة ان الراجل عنده مشكلة ما او بيشك شك ما او مريض نفسي بشكل ما او يعاني عجز ما او الست ميت فل بطريقة ما

فقرر انه يتخذ خطوة طبيعية جدا لقهر المرأة في مجتمع اعتاد قهرها من زمان
العجيبة انا مش مستغربة فعله خالص
انا اللي مستغربة ليه بس انه مرحش دور بره
لأ ده جاب جوز اخته علشان زيتهم يبقى في دقيقهم
خيبه الله حلوف حلوف مفيش كلام


اما الموضوع التاني فبعد ما كتبت لك عريضة حسيت انها قلة ذوق مني اني استغلك كل الإستغلال الطوووووووووويل ده رحت نشرته بوست عندي :)

تحياتي وخالص دعواتي يا عمرو يا طيب

شمس النهار يقول...

مساءالخير يا لورد:)

مش عارفه ايه الحكايه ياعمرو حاسه من خلال التعليقات والبوستات اللي اتعملت بعد بوستك في البلوجر وتعليقات الناس سواء عندك او عندهم او في اليوم السابع
تعليقات مسكت في فروع الموضوع وسابت اساس الموضوع
يعني بعضها سطح الموضوع كالعاده

الموضوع ان في دوله صناعيه تجاريه كبري حاطه في دمغها انها تكون نمره واحد علي العالم
لما عملت دراسات علي احتياجات الامه المصريه الحره
وعايزه ايه
لقيت ان بنتها استغفر الله العظيم
وشبابها ورجالتها هبل ممكن يضحك عليهم
يعني بجد انا مكسوفه
هو ده احنا فعلا والا ايه

عمرو اعتقد ان هدفك من كتابت البوست التنبيه وافاقت الغافلين

والا ايه؟

المفروض ان كل واحد مننا لو دخل صيدليه بتبيع هذا المنتج يقاطعها وكمان في محيطه ينبه علي مقاطعتها
وانا اعتقد ان اي بنت هتروح تشتري المنتج ده هتتخفي وراء نقاب
وتشبه المنقبات بالمره!

MǿиY El-Shreef يقول...

انا مش هعلق انا هقول حسبي الله ونعم الوكيل

انا بجد مصدومه

!!

Me7'o يقول...

أستاذى
واحشنى كتير وكل سنة وإنت طيب

---------------------

الحلوف الأولانى

مش عارف أعلق غير إنى أقول المفروض نموته هو والحلوف جوز الحلوفة أخته زى ما الحكومة موتت كل الحلاليف

الحلاليف المذكورين فى الموضوع التانى "العرب"

تحية وتقدير للصين للفكر التجارى بتاعهم ودراستهم للسوق ومش زعلان منهم لإنهم ما عندهمش ملة ولا دين فحاجة زى دى هما أصلاً شايفين إنها مالهاش لازمة أساساً
وعلى أد إعجابى بالصينيين على أد ماأنا حاسس بالعار من العرب اللى سمعتهم الوسخة وسمعة حريمهم بقت على نطاق دولى

وعلى فكرة أنا مستعد أراهنك على إن الأغشية دى هاتنزل مصر بالقانون لإن كبارات البلد محتاجينها اكتر من اى حد تانى

والبقاء لله
وحسبى الله وهو نعم الوكيل

أنسانة واعذرنى يقول...

لا تتعجب ولا تعجب
من بعد عبدة الشيطان
ومن بعد تبادل الزوجات
ومن بعد اسمدة مسرطنة تبقى
فى الارض عشرات السنين ومن بعد
دفن النفايات الذرية فى الصحراء
الغربية مش الشرقية خلى بالك؟!
من بعد كل اللى فات واللى جاى فلا تستغرب من شىء اطلاقا ...هى علامات
الساعة وتصديق كلمات رسول الله صلى الله عليه وسلم.

beautiful mind يقول...

استاذي عمرو
انا لا اجد كلام اعلق بيه ولا كلام اقوله
غير حسبي الله ونعم الوكيل
بالنسبه لموضوع الراجل ده
فاكيد انا ممكن اعذره
اعذره بجهله وغباؤه
وانه منساق زي الحمار وراء الفضائيات والافلام وغيره وغيره
المشكله مش في الختان بحد ذاته
المشكله في اللي عمله والطريقه اللي عملها بيه
دا يدل ان الخنازير ابتدت فعلا تشوف شغلها في المصريين
*******
الموضوع التاني بقي
اعتقد ان الواحده اللي رضت انها تتخلي عن اعز شىء عندها
ممكن بسهوله جدا ترجع الشرف الزائف دا
واذا كانت هاتبقي شريفه كدا قدام الناس
فمابالك برب الناس الذي لا تخفي عليه خافية
**********
حضرتك بتطالب انهم يمنعوا المنتج دا من نزول الاسواق
طيب هم هايمنعوه
زي ما منعوا المخدرات
ومنعوا الادويه الفاسده
والقمح الفاسد
والمبيدات المسرطنه
وافلام الدعاره
وزي ما منعوا اي حاجه ممكن تبوظ الشباب
علي مصر السلام يا استاذ عمرو

Beram ElMasry يقول...

الهم تقبل صيامكم وقيامكم وأجعله في ميزان حسناتكم وعيد سعيد أعاده الله عليكم باليمن والخير والبركة أنتم وجميع الأهل

** بيرم المصري

فشكووول يقول...

السلام عليكم

عذرا عمرو بك لم اقرأ البوست والكنى جئت اليك مهنئا بالعيد

تحياتى


عيد سعيد عليكم وعلى عائلتكم

كل عام وانتم بخير

يعيده الله عليكم بالخير واليمن والبركات

لاسع افندى يقول...

لاتعليق
لاتعليق
هى الناس جرالها ايه
هى الاخلاق راحت فين
طيب ليه البلد كلها متدينه
............والاخلاق متدنيه

خلاص كفايه كلام
عيد سعيد

أم مالك يقول...

اخى الفاضل استاذ عمرو
انا جاية اهنيك واعيد عليك
واقولك كل عام وانت بالف خير
انت واسرتك الكريمة
تقبل الله منك صالح الاعمال
وجعله عيد مبارك عليك
تحياتى

wella يقول...

لا تعليق
لاتعليق

عارف وانا بقرى الخبرين فتحت بقى وبرقت عنية

ماعم صدق


هوة فى اية اية؟؟

حسبى الله ونعم الوكيل مش عارفة افول اية بصراحة

شمس النهار يقول...

كل سنه وانت طيب يا لورد:)

عيد سعيد عليك
ان شاء الله

واديني رايحه دهب اهو ان شاء الله اشوف الكلام اللي وصفته بيها

واعمل بوست انا كمان
:)

م/ الحسيني لزومي يقول...

تقبل الله منا ومنكم
كع عام انتم بخير

.. هعزف لنفسي يقول...

تقبل الله منا ومنكم الصيام والقيام
وجعلنا من عتقاء شهر مضان
وعيد مبارك .. عساكم من عوادة
وباذن الله العيد الجاي بفلسطين

ليس فقيرا من يحب يقول...

السلام عليكم

كل سنه وحضرتك طيب

عيد سعيد عليك يارب وعلى الاسرة

الكريمه

قوس قزح يقول...

كل سنة و انت طيب و بخير يا رب
عيد سعيد عليك و على كل احبابك

احساس طفلة محبة للرومانسية بس واقعية يقول...

مش لاقية كلام اقولة
عارف وصف عاشقةوغلبانة للصدمة
ضيف عليهم شوية بلاهه وعدم فهم

اسمحلى بس هقول لا حول ولا قوة الا بالله
ربنا يسترها على البلد دى والطريق اللى ماشية فيه

تقبل مرورى

اقصوصه يقول...

كل عام وانتم بخير

تمنياتي بقضاء عيد سعيد

عاشقة الأحزان يقول...

كل سنه وحضرتك طيب
عيد سعيد عليك وعلى اسرتك

د. ياسر عمر عبد الفتاح يقول...

كل عام وأنتم جميعا بخير

كل عام والأمة الإسلامية إن شاء الله منتصرة

كل عام ونحن جميعاً إلي الله أقرب وعلي طاعته أدوم

تقبل الله منا ومنكم صالح الأعمال

الازهرى يقول...

كل لحظه وهى عيد سعيد
عليك وعلى الأسرة الكريمة
وكل أحبابك وأصحابك

ريمان ونوسه فى هاكونا مطاطا يقول...

كل سنه وحضرتك طيب عيد سعيد علينا وعلى الامة الاسلاميه
مودتى

Ghreeb يقول...

كل عام وانتم بخير وصحة وسعادة واقرب الي الله تقبل الله منكم صيامكم وقيامكم واعاد الله عليكم هذه الايام المباركة بالخير عليكم وعلي احبابكم يا رب العباد

ماما أمولة يقول...

كل عام وانت بكل خير يارب يا عمرو

أنا لسه ما قرأتش الموضوع

ها ارجعله تاني سلام

أبــــو ضـــيــاء يقول...

عندك حق في كل اللي قلته

بس برضه العبره في التربية والدين

وربنا يهدي

كلمات من نور يقول...

no comment

7ASBY ALLAH WENE3MA ALWAKEL

3EED SA3EED YA 3MR....MY PC DOEN'T TYPE ARABIC DONO YYYYYYYYYYYYYYY....SEE U WHEN CHANGE THIS SILLY LANGUAGE.

مستكه يقول...

السلام عليكم ورحمة الله وبركاته

كل سنه وحضرتك طيب

عيد اضحي مبارك اعاده الله عليكم باليمن والبركات

سنابل قمح يقول...

يعني بعد ما قريت الخبرين دول اعييد عليك ازاى بقي ؟

الخبر الاولاني خبر صادم وماينفعش نبررله بالجهل وقلة الوعى عشان تواضع مستواه الاجتماعي مبرره الوحيد انه يطلع مجنون
اما الخبر التانى فا خبر مهيين جدا
وكان بنات مصر مجموعة من أستغفر الله العظيم مستنيين الحل الصيني

ومن خيبتي التقيلة ناديت لماما تقراه واهى من ساعتها ماشية تكلم نفسها ف الشقة
ذنب الست دى ف رقبة مين ؟




بس برغم كل ده برررررررردو
كل سنة وانت طيب

ঔღঔ نـــوارة ঔღঔ يقول...

لا حول ولا قوة الا بالله

حياتنا بقت صيني بصيني وقلنا ماشي لكن يصنعوا الزفت دا

تقيلة اوووي ربنا يفرجها علينا يارب

كل سنة وانت طيب

تقبل الله منك ومنا

عيد سعيد عليك

فتاه من الصعيد يقول...

كل سنه وانت طيب استاذ عمرو .... معلش جات متاخره بس المدونه بتاعت حضرتك كانت موش بتفتح :)

بسنت صلاح الدين يقول...

اولا كل سنه وانت طيب ،ثانيا انا اتصدمت من هذا النطع فعلا شىء مقزز ،ويستاهل عقاب شديد فى ميدان عام للتصرف فى ما لا يخصه ،المسكينه ايه ذنبها تعيش بعاهه نفسيه قبل ماتكون عضويه ، اما ثانى موضوع ،انا عاوزه اقول ان ده مبقاش شرف ده بقى كوسه ،مش معقول يبقى رمز الطهاره والعفه فى الصيدليه زيه زى الكيتوفان ،بس اهو زمن اتباع فيه الشرف مره بالرشاوى و مره بالفساد و مرااات بالظلم و اللامبالاه ،فمش فاضل غير اننا نقتل الشرف فى عرينه عشان تبقى كملت.....

عمرو يقول...

شمس النهار
مساء الخير يا برنسيس و كل سنه و أنتى طيبه و أجازه سعيده فى دهب اٍن شاء الله :)
فعلا الموضوع مش مرتبط لا بثقافه و لا بوعى ثقافى و ده فيما يخص الجانب الاٍنسانى و الرجولى فى الموضوع ..
و ياما فيه عجايب الواحد بيقف قدامها محتار و نمش فاهم حاجه بس بيرجعها فى النهايه لمدى ما يمكن أن يصل اٍليه الاٍنسان فى قلة الأدب و السفاله اللى ليس لها مثيل ..
بالنسبه للموضوع التانى فزى ما تفضلتى و قلتى و أسمحى لى أضيف كمان أن الحكايه محتاجه كمان وعى من الناس أنفسهم لأن الموضوع الحقيقه زاد عن حده جدا ..
و برضو ممكن تفشى غيظك فى بناتك يعنى لا يوجد ما يمنع اٍطلاقا :))
تقبلى تحياتى و تقديرى و ترجعى بالسلامه اٍن شاء الله ..

عمرو يقول...

عاشقه و غلبانه
عجبانى أوى فكرة أنه يقع فى أيد ظابط من بتوع الكليبات :))
بجد عجبتنى الفكره دى أوى و و الله برضو حيبقى شويه عليه ..
و فعلا على رأيك بالنسبه للموضوع التانى يا دكتوره حيبقى الموضوع فى السهل و زيد يبقى زيد عبيد و أبو قرش زى أبو قرشين و كله ماشى .. يعنى الحقيقه موضوع خطير و حيكون له عواقب أتوقع تكون وخيمه لو لم يتم تدجاركها ..
كل سنه و أنتى طيبه و تقبلى تحياتى و تقديرى ..

عمرو يقول...

عطش الصبار
مساء النور يا أستاذه و كل سنه و حضرتك طيبه و ترجعى مصر اٍن شاء الله بكل خير ..
فعلا الصين أصبح اٍسمها مرادف لكل ما هو ردىء و فالصو رغم قدرتها الرهيبه و اٍمكانياتها المهوله ..
بس أعتقد أن المنتج الصينى الجيد نوعا ما مش بييجى منطقتنا و لكن بيتصدر لمناطق أخرى أكثر اٍعتزازا بنفسها و لا يصدروا لنا سوى أردىء الردىء ..
مش عارف يعنى هل النظريه دى صح و لا لأ ؟؟
ياريت حد يقدر يفيدنا فى هذه المعلومه ..
أشكرك و تقبلى تحياتى و تقديرى ..

dr.lecter يقول...

ماتعرفش الناس بتفكر ازاي وهيستخدموه ازاي

احنا مرضي للاسف

فشكووول يقول...

عمرو بك

السلام عليكم

كيف حالك يا اخى ... اوجزت فى تعليقك وما انتش لاقى كلام ... والله انا كمان عايز اضرب سيجارتين حشيش وواحده بانجوا واسيب كلابها على ديابها وانااااااااام

dr/shiko يقول...

اولا : يالورد عمرو الف شكر علي تشريفك لنا بزيارتك لمدونتنا المتواضعة الرحالة .. بالنسبة للموضوع الاول فاي شئ متوقع في زمن انعدمت فيه الرجولة .. ولكن يجب علينا ان نقول بان ختان الاناث سنه عن رسولنا الكريم-ص- ولا يجب علينا ان ننكرها حيث قال رسولنا الكريم |(خففوا ولا تغوطوا) .. ليس معني هذا انني اتفق مع هذا الحلوف فهذه اصبحت امرأة بالغة وليست فتاة صغيرة كما ان اسلوبه لايتسم باي ملمح من ملامح الرجولة ولا التقوي فهذا يستحق حرمانه من ذكوريته التي يتفاخر بها... الموضوع الثاني : لاتعليق لي سوي انني اخشي ان ياتي اليوم الذي تصدر لنا الصين عرسان صينية للبنات العوانس وعروسات صينيات للشباب بارخص الاسعار .. اشتري اتنين وخد التالته عليهم هدية..هههههههه ربنا يستر

أحــوال الهـوي يقول...

بما اننا في زمن انفلوانزا الحلاليف و للعلم ان الحلوف هو الخنزير و هو حيوان مضطرب جنسيا و لا يعرف النخوة
فلا حرج ان تجد من نتاجه هذا المنتج بين البشر

و ناتي لموضوع الغشاء اللاصق كنت قد صدمت منذ سنوات بمجرد معرفتي بجراحه تعيد البكارة يقوم بها اطباء معدومي الضمير ثم اتت فتاوي الاباحه للمغتصبه ثم ظهور تقليعه لبعض النساء احتفالا بعيد زواجهن باعادة البكارة
و اليوم الغشاء السحري بقاعدة االزق و اجري

اخي الحبيب ان البكارة في العقول قبل ان تكون غشاء و العفة في التربيه السليمه قبل ان تكون تعليمات مكتوبه

هون علي نفسك فاالبضاعة الرائجه لها زبونها و لاحول ولا قوة الا بالله
فاهمني؟؟؟
حكل سنه و انت طيب بعد العيد و الكحك
تحياتي

سبهللة يقول...

بالنسبة للخبر الاول
دة اسمه شغل حلاليف
والحلاليف يعنى الخنازير
والخنازير معندهمش نخوة
وبالتالى دة شىء متوقع من ناس مستواها التعليمى زيرو ومخها أوسخ من صفيحة الزبالة
اسفة على التعبي السوقى دة
لكن انا شايفة انه مناسب جدا لمن قاموا بهذه الفعلة الشنعاء
===========
بالنسبة للموضوع التانى
الصين مش غلطانة خالص
هم شايفين انها بالنسبة لهم تجارة
وتجارة رابحة جدا
لان ليه الزبون بتاعها
ما هو العرب دلوقتى بقوا زباين
مش للصين بس
لدول كتير
احنا فعلا زبون لقطة

أبنوسة يقول...

صباح الخير

والله الجهل مصيبة

تقبل وجودي

صافي الود

شاب مفقوع يقول...

عشان كده بقول الرجالة تمتنع عن الزواج

بس يكونوا رجالة بجد مش زي الفران اللي انت حكيت عنه الاول دا

تحياتي ليك