على شارع فيصل و اللى فيه !!

دلوقتى فيه سؤال محيرنى و عاوز أعرضه على حضراتكم لو تسمحوا لى ..
مين فين أيه بكام ليه اللى بيحصل فى شارع فيصل ؟؟
هو كده .. هو السؤال ماينغعش غير أنه يكون سؤال عبثى مالوش معنى محدد تماما زى اللى شفته بعينيا من 3 أيام أثناء مغامرة عبور شارع فيصل من أول الكوبرى لغاية أول الصحراوى ..
أولا كده مين سواقين الميكروباصات دول اللى بيتسببوا بسلوكياتهم فى تعطيل حركة المرور و بيتحدوا كل القوانين السماويه و الوضعيه و لا يتعاملوا مع باقى قائدى السيارات اٍلا بالشتيمه و البصق على الوجوه و سب الدين قبحهم الله ؟؟
مين دول ؟؟
مصريين دول و لا هكسوس و لا أيه موضوعهم و لا فيه أيه ؟؟
مين مئات العمال الريفيين الى سايبين غيطانهم و جايين يقعدوا على الجزيره الوسطانيه مستنيين حد يجود عليهم بشغلانه أو بسبوبه و اللى فى نفس الوقت بيعانى فيه الوطن من نقص العماله الزراعيه حتى أنه قد بدأ بالفعل عصر اٍستقدام الفلاحين النيجيريين للعمل فى الأراضى المستصلحه !!
مين اللى سمح لهم باٍحتلال الشارع بهذا الشكل العره حتى وصل بهم الحال لقضاء حاجتهم كده على العلن و اٍظهار عوراتهم للماره من نساء و أطفال و كبار ؟؟!!
مين دول ؟؟ عاوز أعرف أنا مين دول ؟؟
و أيه جبال الزباله المتعفنه اللى بتغطى كل شبر من أرض شارع فيصل دى ؟؟
اٍزاى كده ؟؟
بقى ينفع كده يعنى ؟؟ يعنى أحفاد الفراعنه الجبارين اللى بنوا 3 أهرامات و قد عجز العالم عن بناء هرم واحد على رأى البهظ بيه أنهم يبقوا بهذا القدر من البلاده و القذاره و يحتاسوا لما الشركه الطليانى المكلفه برفع القمامه تحرن و ترفض تشوف شغلها فيكون الحل أننا نرمى الزباله كده فى الشوارع و نسيبها تتراكم و تتعاظم حتى يظن الرائى أنه ماشى فى فيلم من أفلام الخيال الوهمى بعد فناء العالم و خاصة فى هذه المرحله الحرجه من مراحل اٍنتشار الأمراض و الأوبئه و يأتى على رأسهم أنفلونزا الحلاليف ..
و ليه أصلا نجيب شركه طليانى تشيل زبالتنا ؟؟
طيب ده كده ممكن نوصل لحاجات مش كويسه و ييجى اليوم اللى نستورد فيه حد يمسح لنا ... ودننا ..
و أيه بقى هذا الكم المهول من التلوث الضوئى اللى على واجهات المحلات و اللى بعضها بيحمل أسماء لها مدلولات أبيحه و قليلة الأدب بتصدم العين و الذوق العام ..
يعنى ليه كل الأضواء الباهره دى اللى بتستهلك الطاقه بدون مبرر و بنزيد الأحمال على المحولات و هل هذا التلوث الضوئى و ما يصاحبه من تلوث سمعى جنونى هيستيرى صادر عن أجهزة التسجيل المتداخله أصواتها و اللى بتذيع أغانى أقل ما يقال عنها أنها قذره سيكون السبب الحقيقى لجذب الزبون ؟؟
لا أظن ..
و مين دول أصلا أصحاب محلات اللانجيريهات النسائيه اللى بيعرضوا هذه القطع النونو على أجساد المانيكانات العريانه فى الفتارين بشكل فج و قبيح شبيه لحد كبير بفتارين الدعاره فى حى بيجال بباريس مع فارق أن مانيكانات باريس بشر من لحم و دم لكن ممنوع تماما أن تقع عين طفل أو طفله على هذه الفتارين المداريه على عكس ما يحدث فى شارع فيصل !!
يعنى ماحدش قالهم أن ده عيب و بيتنافى مع قيم الدين و الذوق و الرحمه بالشباب المكبوت اللى لا طايل لا سما و لا أرض و واقف يبحلق فى المعروضات بعينين تكاد تنط من خلقته ثم لا يلبث أن يطلع هذا الكبت و الغيظ فى شكل كلمات أبيحه و قلة أدب بيلقيها على أسماع البنات و السيدات الماشيين ده فى حالة أنه لو أكتفى بالكلمات و لم يتعداها للتحرش الفعلى ..
شارع فيصل يا جماعه أصبح غير محتمل .. بجد غير محتمل ..
يعنى تقطع شارع فيصل فى ساعتين و نص تقريبا بسبب الزحام المستعر فيه ليل و نهار ؟؟
يعنى أيه ألوف السيارات تهدر بنزين و وقت و صحه و أعصاب لمجرد فقط أن تعبر شارع فى ساعتين و نص ؟؟
حضراتكم متخيلين أنا بأتكلم عن أيه ؟؟
بأتكلم عن بؤرة تلوث و ماينفعش نطلق على هذا الشارع الكئيب غير أنه بؤرة تلوث فى ثوب الوطن رغم حيويته و أهميته و بهاءه الظاهرى ..
بلاش نقول أنه بيعتبر شارع سياحى و قوافل السياح بتمر فيه ليلا و نهارا و التصوير شغال على ودنه لحسن تقولوا لى بطلوا بقى عقدة الخواجه .. بلاش السياح مش حنتكلم عنهم ..
لكن الحقيقه أنه برضو أحفاد الفراعنه الجبارين لا يجوز لهم أن يعانوا مثل هذه المعاناه القاسيه و المستحيله بكافة المقاييس ..
و أرجوكم كمان بلاش حد يقوللى طيب أنت عرضت المشكله من غير ما تعرض حلول !!
الحقيقه اٍن الحلول مش شغلتى ., لأنى مش متخصص فى هندسة المدن أو مش عارف ده بيقع تحت أى بند من بنود التخصص العمرانى .. لكن أنصح نصيحه مخلصه لوجه رب العزه أن يتفضل المسئول عن اٍيجاد حل لمشكلة شارع الملك فيصل أنه يقعد مع السيد رئيس جهاز مدينة الشيخ زايد ( رضى الله عنه ) و يفهم منه عمل أيه علشان يعيد الاٍنضباط و النظافه و النظام للمدينه الجميله رغم اٍختلاف مستويات سكانها الثقافى و الاٍجتماعى حتى صارت مدينتنا العسوله آيه فى الجمال و الحلاوه يضرب بها المثل رغم كونها لا تبعد سوى دقائق من شارع الملك فيصل و العياذ بالله ..
اٍلحقوا شارع الملك فيصل قبل أن يحدث فيه و منه ما لا يحمد عقباه ..
ألا هل بلغت اللهم فاشهد ..
تقبلوا تحياتى ..