الجمعة، 11 سبتمبر 2009

على شارع فيصل و اللى فيه !!

دلوقتى فيه سؤال محيرنى و عاوز أعرضه على حضراتكم لو تسمحوا لى ..
مين فين أيه بكام ليه اللى بيحصل فى شارع فيصل ؟؟
هو كده .. هو السؤال ماينغعش غير أنه يكون سؤال عبثى مالوش معنى محدد تماما زى اللى شفته بعينيا من 3 أيام أثناء مغامرة عبور شارع فيصل من أول الكوبرى لغاية أول الصحراوى ..
أولا كده مين سواقين الميكروباصات دول اللى بيتسببوا بسلوكياتهم فى تعطيل حركة المرور و بيتحدوا كل القوانين السماويه و الوضعيه و لا يتعاملوا مع باقى قائدى السيارات اٍلا بالشتيمه و البصق على الوجوه و سب الدين قبحهم الله ؟؟
مين دول ؟؟
مصريين دول و لا هكسوس و لا أيه موضوعهم و لا فيه أيه ؟؟
مين مئات العمال الريفيين الى سايبين غيطانهم و جايين يقعدوا على الجزيره الوسطانيه مستنيين حد يجود عليهم بشغلانه أو بسبوبه و اللى فى نفس الوقت بيعانى فيه الوطن من نقص العماله الزراعيه حتى أنه قد بدأ بالفعل عصر اٍستقدام الفلاحين النيجيريين للعمل فى الأراضى المستصلحه !!
مين اللى سمح لهم باٍحتلال الشارع بهذا الشكل العره حتى وصل بهم الحال لقضاء حاجتهم كده على العلن و اٍظهار عوراتهم للماره من نساء و أطفال و كبار ؟؟!!
مين دول ؟؟ عاوز أعرف أنا مين دول ؟؟
و أيه جبال الزباله المتعفنه اللى بتغطى كل شبر من أرض شارع فيصل دى ؟؟
اٍزاى كده ؟؟
بقى ينفع كده يعنى ؟؟ يعنى أحفاد الفراعنه الجبارين اللى بنوا 3 أهرامات و قد عجز العالم عن بناء هرم واحد على رأى البهظ بيه أنهم يبقوا بهذا القدر من البلاده و القذاره و يحتاسوا لما الشركه الطليانى المكلفه برفع القمامه تحرن و ترفض تشوف شغلها فيكون الحل أننا نرمى الزباله كده فى الشوارع و نسيبها تتراكم و تتعاظم حتى يظن الرائى أنه ماشى فى فيلم من أفلام الخيال الوهمى بعد فناء العالم و خاصة فى هذه المرحله الحرجه من مراحل اٍنتشار الأمراض و الأوبئه و يأتى على رأسهم أنفلونزا الحلاليف ..
و ليه أصلا نجيب شركه طليانى تشيل زبالتنا ؟؟
طيب ده كده ممكن نوصل لحاجات مش كويسه و ييجى اليوم اللى نستورد فيه حد يمسح لنا ... ودننا ..
و أيه بقى هذا الكم المهول من التلوث الضوئى اللى على واجهات المحلات و اللى بعضها بيحمل أسماء لها مدلولات أبيحه و قليلة الأدب بتصدم العين و الذوق العام ..
يعنى ليه كل الأضواء الباهره دى اللى بتستهلك الطاقه بدون مبرر و بنزيد الأحمال على المحولات و هل هذا التلوث الضوئى و ما يصاحبه من تلوث سمعى جنونى هيستيرى صادر عن أجهزة التسجيل المتداخله أصواتها و اللى بتذيع أغانى أقل ما يقال عنها أنها قذره سيكون السبب الحقيقى لجذب الزبون ؟؟
لا أظن ..
و مين دول أصلا أصحاب محلات اللانجيريهات النسائيه اللى بيعرضوا هذه القطع النونو على أجساد المانيكانات العريانه فى الفتارين بشكل فج و قبيح شبيه لحد كبير بفتارين الدعاره فى حى بيجال بباريس مع فارق أن مانيكانات باريس بشر من لحم و دم لكن ممنوع تماما أن تقع عين طفل أو طفله على هذه الفتارين المداريه على عكس ما يحدث فى شارع فيصل !!
يعنى ماحدش قالهم أن ده عيب و بيتنافى مع قيم الدين و الذوق و الرحمه بالشباب المكبوت اللى لا طايل لا سما و لا أرض و واقف يبحلق فى المعروضات بعينين تكاد تنط من خلقته ثم لا يلبث أن يطلع هذا الكبت و الغيظ فى شكل كلمات أبيحه و قلة أدب بيلقيها على أسماع البنات و السيدات الماشيين ده فى حالة أنه لو أكتفى بالكلمات و لم يتعداها للتحرش الفعلى ..
شارع فيصل يا جماعه أصبح غير محتمل .. بجد غير محتمل ..
يعنى تقطع شارع فيصل فى ساعتين و نص تقريبا بسبب الزحام المستعر فيه ليل و نهار ؟؟
يعنى أيه ألوف السيارات تهدر بنزين و وقت و صحه و أعصاب لمجرد فقط أن تعبر شارع فى ساعتين و نص ؟؟
حضراتكم متخيلين أنا بأتكلم عن أيه ؟؟
بأتكلم عن بؤرة تلوث و ماينفعش نطلق على هذا الشارع الكئيب غير أنه بؤرة تلوث فى ثوب الوطن رغم حيويته و أهميته و بهاءه الظاهرى ..
بلاش نقول أنه بيعتبر شارع سياحى و قوافل السياح بتمر فيه ليلا و نهارا و التصوير شغال على ودنه لحسن تقولوا لى بطلوا بقى عقدة الخواجه .. بلاش السياح مش حنتكلم عنهم ..
لكن الحقيقه أنه برضو أحفاد الفراعنه الجبارين لا يجوز لهم أن يعانوا مثل هذه المعاناه القاسيه و المستحيله بكافة المقاييس ..
و أرجوكم كمان بلاش حد يقوللى طيب أنت عرضت المشكله من غير ما تعرض حلول !!
الحقيقه اٍن الحلول مش شغلتى ., لأنى مش متخصص فى هندسة المدن أو مش عارف ده بيقع تحت أى بند من بنود التخصص العمرانى .. لكن أنصح نصيحه مخلصه لوجه رب العزه أن يتفضل المسئول عن اٍيجاد حل لمشكلة شارع الملك فيصل أنه يقعد مع السيد رئيس جهاز مدينة الشيخ زايد ( رضى الله عنه ) و يفهم منه عمل أيه علشان يعيد الاٍنضباط و النظافه و النظام للمدينه الجميله رغم اٍختلاف مستويات سكانها الثقافى و الاٍجتماعى حتى صارت مدينتنا العسوله آيه فى الجمال و الحلاوه يضرب بها المثل رغم كونها لا تبعد سوى دقائق من شارع الملك فيصل و العياذ بالله ..
اٍلحقوا شارع الملك فيصل قبل أن يحدث فيه و منه ما لا يحمد عقباه ..
ألا هل بلغت اللهم فاشهد ..
تقبلوا تحياتى ..

هناك 38 تعليقًا:

عاشقة الأحزان يقول...

ياترى

انا اول تعليق ولا ايه

عامة اخد مكان وارجع

عاشقة الأحزان يقول...

كل سنه وحضرتك طيب

بمناسبة العشر الاواخر من شهر رمضان المعظم

وربنا يبلغنا ليلة القدر قادر ياكريم

اروح اقرء وارجع بقا

شمس النهار يقول...

مساء الخير يا لورد :)

اعتقد ان ده مش سؤال عبثي وبس
ده عبثي محمل بكل المراره والالم

انا كنت في نفس الشارع امس
مش ممكن لايمكن يكون ده شارع في مصر اصلا
دول العالم بتتقدم واحنا بنتأخر

مصر اللي كانت من افضل وانظف المدن بقت ...قلبي مش مطاوعني اقولها خالص

تفتكر ايه الحل ؟؟؟؟

انت اثرت ميت قضيه في الشارع ده
ملخصهم ان الانسان المصري بقي اناني فظ حط القيم والاخلاق والمصلحه العامه تحت رجليه

صدقني البلدي عايزه ناس تحبها

عايزه انضباط

في شارع في لوس انجيلوس عامل كده زي الموسكي والعتبه كل المحلات اللي فيه يامكسيكان ياصينين يا اي حاجه غير الامريكان
الحكومه الامريكيه علشان تعمل انضباط في الشارع ده عملت كاميرات ومخالفات تصل لعبور الشارع غلط الف دولار
وشويه شويه الشارع انضبط وبقا عال بعد ما كان قمه في الهرجله والجرايم والقمامه اللي ماليه المكان وانا صورت الشارع ده بعد اللي اتحكي لي عليه

كل شئ له حل بس لو النيه خير

عارف الشارع بتاع فيصل ده مش هينضبط الا لو سكن في اوله ونصه واخره مسؤل كبير
او قامت فيه حريقه تجيبه من اوله لأخره

انا حسيت بالغضب الشديد زيك كده

بس عمري ماكنت هعرف اكتب زيك كده

مش عارفه ياعمرو تفتكر المفروض مانتكلش علي الحكومه وسكان الشارع دول همه اللي يبتدوا يعملوا حاجه والا ايه
بس انت عارف م نصر كمان القمامه فيها بقت للودان

البوست اكتر من رائع وضوء احمر ملعل زي نار جهنم اللي هيتحدف فيها كل مسؤال مغمض عينه عن كارثة شارع فيصل
تسلم يا لورد

عاشقة الأحزان يقول...

بجد معاك حق يا استاذ عمرو موضوع فى غاية الاهميه

مش عارفين ان دى بلدهم ولاذم يحافظو عليه
لالالا مش عارفين كده ولو هما مش عارفين

فين مسؤال الحى ولا المحافظ يوقف المهزله دى

بجد انا مش عارفه هما لزمتهم ايه وبيشتغلو ازاى وهما قاعدين على مكاتبهم وخالص

اضم صوتى لصوتك استاذ عمرو
وكل سنه وحضرتك طيب
ايناس
وادعوك لزيارة بوستى الاخير

فتاه من الصعيد يقول...

واضح ان القاهره بتئن من العشوائيه

ربنا معاكم

مستكه يقول...

السلام عليكم ورحمة الله وبركاته

استاذنا الفاضل لعل هذا اول تعليق لي مدونة حضرتك لكنها مش الزياره الاولي ابدا

متابعه لمقالات حضرتك من فتره وبيعجبني جدا اسلوب حضرتك وخصوصا بوست اسرار اكل الشارع وتحقيقك عن الحواوشي واشقاؤه


لكن كلام حضرتك عن شارع فيصل مقدرتش معلقش عليه لانه جه علي الجرح والمشكله فعلا انه مش شارع فيصل بس ,لا فيه شوارع كتيييييييييره علي نفس الشكل

لاتتخيل حضرتك لما تكون معتز جدا ببلدك وتيجي صديقه اجنبيه عايشه في القاهره تستغرب جدا احنا بنعتز بإيه او علي ايه ولما اقولها الحضارة تقولي البلد مش نضيفه اقولها الناس تقولي الشحاتين كتير اقولها فن العماره تقولي البيوت عليها تراب ولوحات اعلانيه ووووووو.... في الحقيقه ادايقت منها جدا لكن هي عندها حق .

وزي ماحضرتك قلت بصرف النظر عن السياح او الزائرين احنا اهل البلد ملناش حق اننا نستمتع بمنظر نضيف القاهره الان اقدر اشبهها بالعجوز الشمطاء في معظمها غير الكباري العلويه اللي مشوهه المنظر العام سواء فوقها او تحتها وغير اللوحات الاعلانيه اللي بجد بعتبرها اكبر مصدر للتلوث البصري دا غير محتواها يعني

غير الخنقات المروريه والزباله اللي ماليه الشوارع ولو اخدت منظر عام من فوق هتشوف فوق اسطح المنازل ما لا عين رأت

ده واقع موجود مينفعش ننكره مش في فيصل بس في مناطق كتيره جدا

طيب فين الحل !!

اسمحلي اقول وجهة نظري في الحل ..

- الحل مش في الحكومه لوحدها , هي سلسله من الادوار علي الحكومه ان تلتزم بالنظافه وفرض العقوبات الصارمه علي من يتخطاها .

- علي الجمعيات الاهليه والخيريه دور عن طريق الوعي وعمل الحملات الارشاديه وفاعليات الشباب بالنزول للشوارع وكذا مره صناع الحياه قامو بالتجربه دي في اكتر من مكان ولقوا تعاون كبير من الاهالي فعلا .

- دور المواطنين لازم يكون ايجابي اكتر مش مجرد انهم يشوفو منظر مش كويس ويزعلوا وخلاص لا المفروض نصعد الامر للمسؤلين بالشكاوي او الصور او اي شكل من الاشكال , وزي ما الحكومة قدرت تزين اجزاء من القاهره اثناء زيارة اوباما فهي لازم تكون قادره علي تزيينها علي طول احنا لينا حق نعيش في مكان نضيف , وساعتها لو ملتزمناش تفرض العقوبات اللي تشوفها ^_^


في الحقيقه دي حاجه لازم نعترف بيها اغلبنا مش ايجابي

لو حضرتك بتشوف برنامج "خواطر من اليابان" لاحمد شقيري هتزعل اوي علي حالنا ,


اسفه جدا علي الاطالة

د. ياسر عمر عبد الفتاح يقول...

والله كل اللي حضرتك قلته أنا عاينته بنفسي
فيصل من أسوأ المناطق الموجودة في مصر كلها
نفسي أفهم ازاي الدولة سايبة كمية الإهمال دي موجودة في مكان واحد زي ده؟
الناس اللي هناك مستحملين ده ازاي؟

بجد لازم يبقي فيه وقفة

عاشقه وغلبانه يقول...

احنا بس هانستأذن حضرتك تصبر عليهم لحد بعد العيد علي ماتحصل اي مصيبه ويتحركوا علي اثرها
ماعلش اعذر حكومتنا اتعودت بس ان كل تصرفتها تظهر في شكل رد فعل
ماينفعش فعل ابسليوتلي

انا حاسه انك كنت بترسم صوره لقنبله موقته
ماعلش اصلي مش بنزل القاهره كتير وماعرفش حاجه عن فيصل
بس شكل في مصايب كتير جايه

reem يقول...

السلام عليكم يا استاذ عمرو

اخبارك ايه ؟

عارف انا مش بحب الشارع دا خالص يخنق بمعنى الكلمة والمناظر فيه غريبة

الحمد لله انى بعيده عنه ومش بخرج كتير برا مصر الجديدة

يا استاذ عمرو المناظر اللى حضرتك ذكرتها في البوست بتأذينى جدا وانا بحس انها بتأذى بنوتاتى لما اشوفها في اى مكان مش بس في شارع فيصل وبالاخص سواقين الميكرو باص

اللهم بلغك ليلة القدر وفضلها

بت خيخة وأي كلام يقول...

انا بكره شارع فيصل
بكرهه كره العما

اخويا ساكن هناك
بتحايل عليه يبيع شقته ويشوف مكان تانى يسكن فيه

اخويا متجوز بقاله سنة
مازورتهوش فى بيته غير مرة واحدة فقط
وكنت قاعدة على اعصابي
كنت عايزة امشى من اول فيمتو ثانية دخلت فيها الشارع

افتكر مرة زمان اتعرض عليا شغل ومكان الشركة كان فى فيصل
صاحب الشغل وافق انى اشتغل
وانا سالته انت ناوى تنقل مقر الشركة فى حتة تانية؟
قاللى لأ
قلتله انا اسفة مش هاشتغل
قاللى ليه؟
قلتله مابحبش فيصل


انا مابحبش منطقة فيصل
بكرهها
نفسيتى بتتعب بمجرد دخول الشارع
ببقى عايزة اعيط


وانا بقرا البوست
شايفة قدامى اللى انت بتحكى عنه ده
حسستنى انى جوة الشارع

انا مضايقة دلوقتى
وعايزة اخرج من برة البوست ده

mahasen saber يقول...

صباح الانوار والخيرات يا استاذنا الغالى

انا رايحه الشغل حالا بس ااقول رايي الاول

اعتقد ان مهزلة زى اليى حضرتك وصفتها دى اعتقد ان المسئول عن الشارع رئيس الشارع مش بيقولوا عليه كدا
اعتقد انه على درايه بيها ودى كارثه لانه عارف وساكت
ولو مش على درايه بيها كارثتييين لانه ميعرفش حاجه عن المكان اليى بيرأسه
وفى كلا الحالات لازم رئيس الحى او اى مسئول يتوجهله الكلام ده ويتنقله الصوره دى
وده لسرعة انقاذ ما يمكن انقاذه فى اسرع وثقت

وبالذات الفلاحيين اليى سايبيين بلدهم يعنى هما يهاجروا ويجىى فلاحيين من نيجيريا يا فرحتنا
بئا ابو قردان يرجع يستوطن الحقول والفلاحيين يسيبهاله مخضرا كدا ويمشوا

ربنا يلطف بريفنا

اروح شغلى بئا

الازهرى يقول...

يا رب اول تعليق

الازهرى يقول...

والله يا عمنا انت جبرت بخاطرى
نفسى من اتكلم عن المأساه المسماه باسم شارع فيصل دى بصراحه دماغى مش عارفه تجمع اكتب ازاى عنه وعن كوارثه
اول معرفى بيه كانت علشان منطقه الجيزه للكاراتيه فى شارع العشرين يعنى بدايات الشارع ووصلتها بعد معاناه رهيبه وكانت عادتى انى اقرأ فى المواصلات لكن فى شارع فيصل مستحيل تمام الاستحاله بسبب الازعاج سواء الصوتى والضوئى والبشرى والمعدنى وكل حاجه
ولما اتعمقت فى الشارع بدأت الكارثه فى الوضوح اكثر وظل التساؤل فى داخلى عن كيفية ادارته وكما قلت انت بخصوص المناظر التى تؤدى الى شحن الشباب سواء فى المحلات او على الطبيعه فى الشارع التى اصبحت حتى اسوأ من وسط البلد
ولا زلت أذكر إحدى المدربات ممن نعرفهن وكانت ملابسها مما يثير والحق يقال ولكن اثناء مشيها فى شارع العشرين تعرض لها بعض الشباب فعلا وبوقاحه من الصعب تصديقها والاصعب تصديقه هو عدم تحرك احد من الماره لنجدتها اطلاقا
صحيح انها والحمد لله كانت قادره على التعامل معهم لصفتها الرياضيه ولكن لنفترض ان هناك اخرى ليست قادره هل سيصل الامر الى تكرار ما حدث فى العتبه من قبل من قيام بعض الشباب باغتصاب فتاه فى فترة الظهيره وسط الزحام دون ان يحرك احد ساكنا

أما عن المشكلة الخرى وهى الفلاحين فانا اكثر من يسأل عنم لأننى أعيش وسطهم
ويكفىى للرد على كل مزاعمهم من انعدام الرزق فى الأرض وما إلى ذلك ودون اطاله
كلمة لجدى رحمه الله
الأرض التى لا تطلع الشمس على ابنها وهو بداخلها لاتعطيه خيرها
فقل لى بالعقل بعد وجود اكثر من 200 قناه داخل كل منزل غير المقاهى والسهرات التى تصل الى الفجر
كيف يريدون من الأرض أن تعطيهم خيرها ؟

لله الأمر من قبل ومن بعد

بت خيخة وأي كلام يقول...

عاجبتني اوي لفظة عسولة لما اطلقتها على مدينة الشيخ زايد
حسيت انك بتوصف بنوتة صغنونة شقية كميلة

ستيته حسب الله الحمش يقول...

ايه يا عم
ايه بقى
حرام كده ها تطفش السياح
مصر بخييييييييييييييييير
وشارع فيصل كمييييييييييييييييل
وزايد عسولة بلا ادنى ريب هي وكل الضواحي اللي لسه بنقاءهم وبراءتهم وبعدهم عن العوادم والتكاتك
انت بتتكلم على شارع عشوائي منذ اليوم الأول لتعميره
ماهو لما تحط ابراج قبيحة في شوارع ضيقة بلا اي تنظيم
وطبعا نظرا للعشوائية يجي لك في الشارع ده انواع من البشر لا يعلم كنهم الا الله "حلوة كنهم دي"
والأدهى والأمر والأنكى كمان لما يكون الشارع ده يتبع نظام الأحياء حيث المهندسين ميت فل ومتعشيين وبانين الفيلات فوقيها الروف .. وكل يوم بيتغير المسئولين في الحي وكلهم لازم برضه ياكلوا "خلوا في عينيكم حصوة ملح وساعدوا اخوانكم الفقراء" وكل ما واحد يشبع شوية "ده لو الحرام بيشبع" يجي مكانه واحد لسه عاوز يلغ من لحم البشر
في هذه المنظومة ياباشا لا أمل لتنظيم المرور ومنع الصفوف الثانية للعربيات وخفض اصوات المسجلات والحفاظ على الآداب العامة اللي كنا عادي جدا بنسميها من شوية صغننين "عادات وأصول" .. في ظل منظومة خربة تأكد ان الشوارع النظيفة الجميلة ده بس علشان غالية وفيها طبقة محددة أو يسكنها واحد من بتوع الرايات الحمر "أوبس مش حمر قصدي الرايات وخلاص" كل سنة وانت زي الفل .. ادعي لي ومتنساش

norahaty يقول...

عــارف ياأستاذ
عمرو انا كل مادا
بصدق ان اللى بنوا
الاهرامات مخلوقات جاءت
من الفضاء الخارجى :)او اننا
لا نمت باى صلة(جينية )للجماعة دول!
الحمد لله بقى لى مدة طويلة لأ ما تنفعش دى بقى لى مدة طويلللللللللللللللة
ما رحتش هناك لكن متصورة ومتصورة جداً ماتحكية لان دا بقى حالنا فى
كل حتة فيكِيامصر المحروسة امال
هو(صعبان على حالنا )ليه؟!

norahaty يقول...

شارع فيصل بقى هو
الصين الشعبية (القديمة)
بتاع مصر يعنى اخذ المرتبة
الاولى من (دار السلام)!

أم مالك يقول...

اخى الفاضل استاذ عمرو
انا كنت جاية اسلم عليك
واقولك تقبل الله منك صالح الاعمال
واطلب منك الا تنسانى من الدعاء
ورغم انى ماعرفش شارع فيصل ده
لانى مش قاهرية الا ان وصفك الدقيق
للى بيحصل فيه جعلنى اراه رؤيا العين
والله حاجة تكسف ومش عارفين اخرتها ايه
خصوصا لو فيه كام شارع كده زيه
تحياتى وكان الله فى العون

فشكووول يقول...

السلام عليكم عمرو بك

مش عارف ايه اللى بيحصل لنا ده

اصل الفلاحين ملوا الفلاحه عشان ما بتجبش لهم اى مردود ايجابى

شوف سعر الحاصلات الزراعيه قد ايه وشوف سعر مستلزمات الانتاج قد ايه واطرح ده من ده وشوف الفلاح حياخد ايه .

عشان كدا بيبحثوا عن اعى عمل يدر دخل غير الزراعه

كلها كام سنه ونسيب الارض بتاعتنا بور عشان ما فيش مردود للزراعه

يا ترى دا مقصود؟

يعنى عشان محتكرى استيراد المواد الغذائيه يعرفوا يستوردوا ويبيعوا لنا بالسعر اللى هما عايزينه ..

والمستوردين دول تبع مين ومين اللى بيحافظ على احتكاراتهم

يعنى لو تشوف سعر القمح اللى كان مستورد من اوكرانيا الفاسد بكام وبياخدوا القمح من الفلاحين بكام

وسواقين شارع فيصل ليس عليهم عيب

العيب على اللى سايبينهم يعملوا اللى هما عايزينه

او الانحطاط المجتمعى وصل الى مداه

ربنا يسترها علينا يا استاذ عمرو

عطش الصبار يقول...

استاذ عمرو
كل سنه وحضرتك بخير
مش عايزه ااقول ان مش شارع فيصل وحده فى المشكله دى لكن القاهره والاقاليم والمدن ياعنى احنا من الاخر بلد-------------
الحل من وجهه نظرى هو قانون عقوبات مغلظ لان ده فى الاول والاخر سلوك بشرى واحنا اتعودنا القانون الرادع هو اللى يعلمنا السلوك الص ولنا فى مترو الانفاق مثال
الحل التانى حمله دينيه فى المساجد والزواياوالبرامج يوضح فيها شيوخنا الاجلاءان النظافه سلوك دينى وتستمر الحمله كدا لمده طويله يمكن تجيب نتيجه
حمله برضه تقول ان الشارع جزء من المنزل مشممكن الشارع يبقى قذر وبيتك نضيف الاتنين مرتبطين ببعض
اما الاخوه الذين تركوا ارضهم واهملوها فا اهملتهم وجلسا فى اسواق الرجال فى الميادين بحثا عن عمل بوقت محدد واخدوا فرص من لايملكون ارض
دول ما عندهمش احاس بحب الارضوعاشوا فى ثقافه الوظيفه احسن من فلاحه الارض سابوا ستاتهم تزرع الارض
ربنا مع البلد يا استاذ عمرو
فى انتظار زيارتك للمدونه وتنورنى بتعليقاتك

dreem يقول...

بما انى من سكان شارع المزبلة .. فيصل وبما انى بطلت انزل من البيت اصلا بسبب كل اللى انت قلت عليه !
انا بس عايزة اقولك على ازمة الزبالة تحديدا لانى انا شخصيا بعانى منها ..
ما بقاش فيه زبالين .. بيعدوا عالبيوت من وقت اعدام الخنازير تقريبا وقلنا مفيش مشكلة اهو لو احنا نازلين ناخد معانا كيس الزبالة نرميه فالباسكيت الكبير الموجود او اللى المفروض يبقى موجود فالشارع
وهنا المشكلة : مفيس صناديق زبالة فالشوارع يمكن بالتحديد فيه صندوقين محطوطين عالرصيف اللى بيفرق الشارع الرايح من اللى جاى بس الجدع بقى اللى يلاقى واحد فيهم فاضى !
اما بقى الناس اللى سابوا ارضهم وقعدوا فالشارع يا عمرو فالحتة دى اسمها الطوابق .. اسوأ حتة فى فيصل تقريبا ولو انى بشوفها من برة واللى انت بتقول عليه ده اسمه سوق الرجالة او الناس بتقول عليه كده علشان ممكن تروح تاخد اى راجل من هناك يعمل لك اى حاجة .. يكسر لك حيطة او يبنيلك حيطة وبيفضلوا قاعدين كده لغاية ما حد يطلبهم فشغل
هذه نبذة مختصرة عن شارع فيصل اليع

عمرو يقول...

عاشقة الأحزان
كل سنه و أنتى طيبه و ربنا يعيدها علينا بخير ..
و الله برضو مش لازم نغفل دور الناس أنفسهم بجانب دور المسئولين ..
لازم يبقى فيه منظومة تعاوز بين الكل علشان الأمور ماتفلتش أكتر من كده ..
متشكر و أهلا بيكى ..

فاتيما يقول...

يا فندم رمضان كريم
و كل سنة و حضرتك طيب و الكل بيقول عنك كلام طيب جدااا خصوصاص ست الكل ستيتة
قولت مبدهاش بقى آجى أغلس
لقيتك بتتكلم ف موضوع حيوى جدا
ليا صديقة ساكنة ف فيصل و لما بزورها بشوف اللى حضرتك قولته كله متجسد
بس فيه عشرات الشوارع بالمنظر دا للأسف و دا كله دلالة على إن المنظومة كلها غلط و الناس المسئولة للأسف لا تتصرف بمسئولية
بل لا تتصرف إطلاقاااااااااا
اتمنى ييجى يوم تلاقى لسؤالك جواب شافى
و حل حقيقى
خالص ودى لحضرتك

عمرو يقول...

شمس النهار
أهلا بيكى نورتى المدونه الغلبانه اللى زى صاحبها :)
أديكى أهو شفتى بنفسك الوضع هناك عامل اٍزاى !!
مصر يا برنسيس شوارعها كانت أنضف من شوارع أوروبا لأن ناسها كانوا أنضف من ناس أوروبا ..
بالنسبه لشارع فيصل الحقيقه فمش عارف أيه الحل !!
بجد مش عارف !!
مش شغلتى و لا تخصصى و لا خبرتى هذا الموضوع العجيب بس لو تسألينى لو أنا عمرو شخصيا و مطلوب منى أعمل حاجه فالحقيقه كنت حأنزل كتيبه من الجيش تقتحم و تجتاح هذا الشارع اللعين تزيل قباحته بكل ما تحمل الكلمه من معانى و تؤدب المخالفين بالأمر العسكرى ..
ده أنا كنت حأتصرف كده و بمنتهى الصراحه لكن يمكن المتخصصين لهم حلول تانيه أشيك شويه من هذا الحل العنيف ..
بمناسبة حديثك عن الشارع اللى فى لوس أنجلوس ده بيذكرنى بالاٍنضباط اللى كانت واضحه آثاره فى الشارع المصرى أيام اللواء أحمد رشدى لدرجة أن رجال الشرطه فى هذا الوقت كانوا بيوقفوا الناس فى الشارع و يتأكدوا من هويتهم و لو طلعوا موظفين و مزوغين من شغلهم كانوا بيجروهم من قفاهم على الحجز و يراسلوا جهة عملهم لتسليمهم لها ..
الحقيقه المفروض أيوه مانتكلش على الحكومه فى كل حاجه و المفروض الناس نفسهم يتخلوا عن قدرتهم على التعايش مع الزباله و الفوضى و كل واحد يبتدى بنفسه و اٍلا حتبقى فوضى عارمه بجد ..
سلامتك من الغضب الشديد يا سمو البرنسيس بس أيه اللى وداكى هناك ؟؟
تقبلى تحياتى و تقديرى ..

عمرو يقول...

فتاه من الصعيد
للأسف مش القاهره بس لأن العشوائيه أصلا بتنبع من السلوكيات ..
تخيلى وطن بكامله بتسوده روح العشوائيه ..
شىء مفزع ..
تقبلى تحياتى ..

عمرو يقول...

مستكه
و عليكم السلام و رحمة الله و بركاته
أشكرك لأول تعليق و أشكرك لمتابعتك المدونه و رضائك عما بها من بوستات ..
المشكله الحقيقيه يا أختنا الفاضله أن المشهد القاهرى و الغير قاهرى أيضا ما هو اٍلا اٍنعكاس حقيقى لما بنفوس السكان .. و أزعم أنها حالى هيستريا جماعيه أصابت الكل و أفرزت مثل هذا الجنون و شارع فيصل خير تمثيل له ..
- الحل فعلا مش فى الحكومه لوحدها .. و نظره خاطفه على أى مصلحه حكوميه و دورات مياهها لخير شاهد و دليل أن فاقد الشىء لا يعطيه ..
- بالنسبه لدور الجمعيات الخيريه فالله ينور عليكى لأن الدور الحقيقى لهذه الجمعيات ليس فقط اٍطعام و كساء و علاج الفقراء لكن يمتد ليشمل سلوكيات البشر أيضا و فى هذا أكبر ثواب و الله .. موافقك ..
- دور المواطنين فعلا لازم يكون اٍيجابى و لا يقف عند حد الندب و مصمصة الشاف من الحسره .. لكن لما تلاقى مثلا ربة منزل بترمى الزباله على قارعة الطريق و تسأليها ليه يا ست الستا بتعملى كده ؟؟ و تقولك أصل صناديق الزباله الكبيره أتشالت من الشوارع يبقى أيه الحل ؟؟
عجبتنى أوى مبادرة بعض شباب الفيس بوك اٍمبارح لما عملوا حملة تنضيف لمنطقة المهندسين .. ماشى كجهود طيب و كويس ربنا يكرمهم .. لكن مش حنفضل طول الحياه ننضف فى المهندسين و الزمالك و جاردن سيتى لأن فيه برضو مناطق تحتاج للتنضيف بس صعبه شويه و مش عارف هل هذه المناطق داخله فى الخطه و لا لأ ؟؟\
و برضو بأوافقك تماما على فكرة اٍستعمال القسوه فى تطبيق قوانين الحفاظ على النظافه و النظام بس هم ييجوا الأول و بعدين نشوف حنحافظ عليهم اٍزاى .. موافقك ..
لا يا فندم لا لا .. يعنى حضرتك بتقارنى المصريين باليابانيين ؟؟
اليابانيين كفره :))
بالعكس الاٍطاله مفيده و بناءه و متشكر لحضرتك جدا ..
تقبلى تحياتى ..

عمرو يقول...

د.ياسر عمر عبد الفتاح
الحقيقه شىء مريع يفوق الوصف و التخيل !!
الناس اللى هناك لهم رب اٍسمه الكريم و لا أعفيهم من تحمل جزء كبير من مسئولية ما آل له حال شارعهم و المناطق المحيطه به ..
تحياتى و أهلا بيك ..

عمرو يقول...

عاشقه و غلبانه
ربنا يستر يا دكتوره و الله ..
الواحد بجد حاطط أيده على قلبه من هذا الشارع الكارثى العجيب اللى يحتاج لمجهود عظيم لظبطه ..
ده كفايه الدخان اللى بيصدر عن مداخن المطاعم و اللى مستواها قريب جدا من وجوه الماره !!
ربنا يستر ..
تقبلى تحياتى ..

عمرو يقول...

reem
و عليكم السلام و رحمة الله و بركاته ..
الحمد لله تمام و كويس و نحمد المولى على كل شىء ..
و مين يحب هذا الشارع الكئيب المكتئب اللى يجيب كآبه يعجز اللسان عن وصفها مهما أوتى من بيان ..
سواقين الميكروباص دول كوم لوحدهم و لازم يتلاقى لهم حل لأنهم بجد تجاوزوا كل الحدود و ظهرت لديهم ميول وحشيه غير اٍنسانيه بالمره فى التعامل مع الشارع المصرى و الحكايه يعنى مش مستحمله المزيد من المشوهين نفسيا و المرضى العقليين منطلقين كده فى الشوارع وسط الناس ..
ربنا يستجيب لدعائك لنا و لك اٍن شاء الله و تقبلى تحياتى ..

عمرو يقول...

بت خيخة و أى كلام
الحقيقة شارع فيصل شارع جدير بكل كره و لا يصلح للحياه أبدا لأنه بيدمر الصحه و الأعصاب و المشاعر ..
نعلش لو سببت لك مضايقه بالبوست ده بس حقيقى ماقدرتش أمنع نفسى عن الكتابه عنه و اٍلا كان حيجرالى حاجه من شدة ضيقى منه ..
فعلا مدينة الشيخ زايد عسوله و يجب الاٍشاده بالسيد رئيس جهازها اللى لحد اليوم معرفش اٍسمه و الله و لكن بأشوف همته و اٍنجازاته الرائعه فى مدينتنا اللى أصبحت آيه من آيات الجمال و النظافه و بصراحه كأنها مش فى مصر يعنى ..
متشكر ليكى و أهلا و سهلا بيكى ..

عمرو يقول...

mahasen saber
صباح النور يا أستاذه محاسن و أهلا و سهلا ..
مش عارف موضوع رئيس الشارع ده !!
الحقيقه أول مره أسمع عن هذا المنصب اٍلا اٍذا كنتى بتقصدى رئيس الحى ؟؟
لا أعتقد أن الموضوع مش معروف لأى مسئول لأن أكيد أحد المسئولين مر عليه و لو من باب حب الفضول لأنه شارع حيوى جدا و يمتد لعدة كيلومترات و بيربط بين شمال و جنوب الجيزه فأكيد يعنى مشكلته معروفه للمسئولين و الله برضو أعلم ..
مشكلة الفلاحين دى بقى مشكله عويصه و مضحكه :))
فى الوقت اللى احنا فيه بنشتكى من الأزمه الاٍقتصاديه و بنعمل بنك للطعام نلاقى العشرات من ملاك الأراضى الزراعيه بيسيبوا محاصيلهم فى الحقول للطير ياكلها أو يجيبوا جرارات تهرسها لأن جنيها أصبح مشكله بعد أن ندرة الأيدى العامله و أصبح جنيها و جمعها و ما يتكلفه من مصاريف باهظه لا يتناسب مع المكسب المادى المرجو منه فبنفضل اٍعدامه فى الأرض أو تركه و لا حول و لا قوة اٍلا بالله ..
ربنا معاكى و يوفقك فى شغلك و تقبلى تحياتى ..

عمرو يقول...

الازهرى
معلش يا أستاذنا مش أول تعليق :)
أيوه يا أزهرى متخيل أنا بتتكلم عن أيه و ضيف على كده كمان العدد المهول من الكافيهات و القهاوى المتراصه جنب بعض و اللى أغلبها سىء السمعه لدرجه كبيره ..
من ناحية محدش تحرك لنجدة المدربه فده أصبح شىء طبيعى بعدما سادت روح التبلد و مبدأ و أنا مالى ياعم و هى تستاهل ما هى اللى لابسه عريان و الحاجات دى ..
ما هو الخوف أنه فعلا موضوع فتاه العتبه يتكرر بس مش فى فيصل بقى لوحدها و لكن فى مناطق أخرى طالما سادت روح الكبت و العنف و البلاده و اللامبالاه ..
رحمة الله على جدك هو جاب المفيد بكلمات بسيطه عميقه تحمل فى طياتها خبرة فلاح مصرى أصيل توارثها من آلاف السنين كابرا عن كابر ..
أصلا مابقاش عندنا فلاحين .. خلاص !!
أصلا أنا أهو و بأعلم الفلاحين اٍزاى يزرعوا صح مع أنهم المفترض فيهم أنهم فلاحين ..
بأعلمهم اٍزاى يغرسوا صح و اٍزاى يفرقوا بين شتلة البرتقان السكرى و البرتقان أبو صره !!
مابقاش فيه فلاحين بقى فيه عمال و ده فرق كبير أوى أوى ..
الأرض حزينه يا أزهرى ..
بجد حزينه ..
تقبل تحياتى و أهلا و سهلا بيك يا عزيزى ..

عمرو يقول...

ستيته حسب الله الحمش
أيوه يا دكتوره و الله عشوائى عشوائى زى ما قال الكتاب ..
أنا فاكر لما كان شارع فيصل ده مجرد طريق ترابى و فى نصه ترعه و على جانبيه غيطان خضراء تسر العين و تشرح القلب ..
و ماكنش فيه غير فيلتين أو تلاته منهم فيلا يوسف وهبى و مزرعة الفراخ بتاعت كامل الكفراوى اللى كان بيبيع الفرخه البيضا السمينه اللى تكفى أسره كامله ب 3 جنيه !!
و لكن ما وصل له الحال الآن جدير بالتوقف و التأمل و اللى بيتعارض مع جميع قوانين علم الاٍجتماع و كأن ما يحدث فيه أمر مقصود و مش عارف لمصلحة مين ؟؟!!
أصحاب الرايات الحمر و الخضر و الزرق موجودين من قديم الأزل و لكن دورهم النهارده مختلف عن زمان لأنه أصبح دور رسمى و مدعوم فالمفروض بقى يخلوا عندهم شوية اٍحساس و يروحوا يسكنوا فى كل المناطق اللى زى فيصل ده شويات كده يمكن الحال ينصلح :))
كل سنه و أنتى طيبه و ربنا يديم عليكى نعمة الرضا ..
تقبلى تحياتى و تقديرى ..

عمرو يقول...

norahaty
و الله يا دكتوره مش عارف و أمر محير جدا !!
مش عارف اٍزاى بجد أحفاد الفراعنه يوصل بهم الحال للعيش وسط هذه الفوضى العارمه و اللى شارع فيصل خير تجسيد لها !!
أحسن حاجه حضرتك عملتيها هى الاٍمتناع عن المرور بهذا الشارع العجيب الغريب المريب اللى بجد بأنطق بالشهادتين لما بأخلص منه بس برضو بتتبقى بداخلى آثار نفسيه سئه بتستمر لكام يوم كده على ما قلبى يتغسل منه بهدوء و نظافة مدينة الشيخ زايد ..
تقبلى تحياتى و تقديرى ..

عمرو يقول...

أم مالك
بارك الله فيكى يا أختنا الفاضله و تقبل المولى منا و منكم صالح الأعمال و ربنا يكتب لك الثبات و الستر و الصحه و البركه فى الرزق و العيال ..
مهما وصفت فمش برضو حأقدر أكفى شارع فيصل !!
هو حاله خاصه لوحده كده ليس له مثيل بين شوارع مصر كلها بمعنى كلها لأنه جمع كل ما يخطر و ما لا يخطر على البال من فوضى عارمه تذهب العقل و تجيب اٍكتئاب لا شفاء منه ..
كان الله فى عون الجميع و تقبلى تحياتى ..

عمرو يقول...

فشكووول
و عليكم السلام و رحمة الله و بركاته يا أستاذنا الفاضل ..
ندرة العماله الزراعيه المدربه هى اللى بترفع أجر العماله المدربه فبالتالى تكاليف الاٍنتاج الزراعى بيزيد و بالتالى بيقل ربحه و بالتالى بنسيب المحاصيل فى الأرض تاكلها الطيور و أهو كله بثوابه ..
دى الفكره كلها من وجهة نظرى ..
طيب لما بيتقلص النشاط الزراعى و الفلاحين مش بيلاقوا قدامهم فرصه جيده للكسب و العيش يعملوا أيه ؟؟
اٍما أنهم بيسافروا بره مصر أو بينتقلوا للحياه فى المدن و بيعملوا تجمعات و يشتغلوا فى أى حاجه حتى تنضيف البيوت بالأجر !!
آه و الله ..
و طبعا من أهم المدن اللى بيرحلوا لها هى القاهره و ضواحيها اللى خلاص بقت مكتظه عن آخرها بمثل هذه التجمعات اللى على حسها بدأت موجات المناطق العشوائيه ..
أذكر فى عهد جمال عبد الناصر أنه طلعت فى عقل وزير داخليه ناسى أسمه أنه يجمع كل الصعايده و الفلاحين اللى نزحوا للقاهره و يرجعهم تانى بلادهم الأصليه و وقف رجال شرطه كتير أوى فى محطات السكه الحديد كرمسيس و الجيزه يقفشوا أى ريفى مهاجر و يركبوه القطار تانى بالعافيه .. و كان عبد الناصر فى الوقت ده بيعمل زياره رسميه لبلد تانيه و لما جه من المطار و كانت الأخبار دى طبعا وصلت له قال لوزير الداخليه و هو بيسلم عليه : أيه رأيك أنا صعيدى حترجعنى بلدنا و لا أيه ؟؟
و أبتسم ..
فما كان من الوزير اٍلا أنه تراجع عن قراره اللى أنا شايفه كان صائب لحد ما و لكن الخطأ كان فى تطبيقه اٍلزاميا ..
ربنا يسترها علينا صحيح و كل سنه و حضرتك طيب ..
تقبل تحياتى و تقديرى ..

صبرني يارب يقول...

اااااااه ثم أه ثم أه ثم مليون اه

هو شارع فيصل بقى كده ؟؟!!!

يلا مش مهم اشمعن هو

قول يا استاذنا وقووول وقول وخلينا نقول كلنا

لما نشوف اخرتها ايه

ما حدش يقدر يقولك طبعا حط حلول

مش سكتنا فعلا

مش مسؤليتنا فعلا

امال هما قاعدين فى مناصبهم وبيقبضوا مرتباتهم من دمنا على اساس ايه ؟؟

ماشيها مرتبااااااتهم بقى وخلاص


فى واحد يا استاذنا قالي انهم كانوا من اسبوعين (هو رئيس جمعية تطوير منشآت صغيره ) مش عارفه دراسته ايه بصراحه بس هو شكله زي بتوع التنميه البشريه وكده

قالي انهم كانوا عاملين مؤتمر فى القاهره فى اجانب ومصريين وخبراء وموال كده

بيناقشوا افكار مقترحه عن ازاي نخلي القاهره انظف مدينه فى خلال شهر مثلا

هابقى احكيلك بقى مقترحات الشخص ده نفسه

تحياتي لحضرتك ولنا الله جميعا

بـسـمـــة صـــــلاح يقول...

امممممم
أول زيارة ليا هنا وان شاء الله هحاول مع ظروفي عشان متكونش الأخيرة

انا كل شوية الاقي بوست يعقدني في مصر دا انا نازلة من السعودية وهدخل الجامعه
وكفاية اللي شفته
دا باين اللي انا شفته ولا حاجه من اللي بتقولوه خالص

انا اتعقدت ياجدعااااااااااااااااان
شكلي هتبهدل اخر بهدله هنا

ربنا يسترها بجد

على فكرة طرحك للبوست عجبني اوي

تسلم ايدك

تقبل مروري
تحيــ بسومة النعومةــاتي(: