~SUN~ Pictures, Images and Photos

الخميس، 21 مايو 2009

تحديث مهم : من الصعيد الجوانى .. حبيت بنوته من أخميم !!

تحديث مهم : أشتكى كتير من المدونين أن الكتابه مش بتظهر على بعض المدونات و لا حتى الصور !! و من ضمنهم مدونتى ..
التفسير البلوجرى المنطقى للمشكله دى أنهم بيستعملوا برنامج فايرفوكس للتصفح لكن لو اٍستعملوا برنامج اٍنترنت اٍكسبلورر فبعون الله ستحل المشكله ..
مساء الخير ..
وقفنا فى البوست اللى فات عند رغبتى فى زيارة مدينة أخميم الشهيره جدا ليس فقط محليا و لكن عالميا أبضا لأسباب كثيره حأقول لكم عليها ..
أخميم أصلا بتقع جغرافيا على الضفه الشرقيه لنهر النيل العظيم .. بتبعد عن سوهاج جنوبا بحوالى نص ساعه بالسياره و مثلهم من نجع العيساويه .. و بتشتمل على عدد من القرى هى بالترتيب : نيده .. آبار الملك .. ابار الوقف .. الصوامعه شرق .. نجوع الصوامعه شرق .. عزبة العرب .. جزيرة محروس .. عرب الأطاوله .. الحواويش .. الديابات .. السلامونى .. الكوله .. نجع العيساويه .. الاحايوه شرق ..
و كل قريه من دول يا أخوانا يتألف فيها عشرميت ألف كتاب !!
المؤرخ هيرودوت لما أتكلم عن مدينة أخميم قال أنها كانت محتله بواسطة اليونانين .. و كان فيها حاميه عسكريه يونانيه قويه للغايه اٍسمها هيرموتيب .. و حاول المحتلين أن يصبغوا أهل أخميم بالصبغه اليونانيه اٍجتماعيا و دينيا .. لكن على مين يا عم اليونان ؟؟ الصعايده الأخميميين فى هذا الوقت البعيد كانت دمائهم بتفور بحب الوطن و لم يقبلوا أبدا أن تمحى هويتهم المصريه و لما فاض بهم الكيل هبوا هبه صعيديه مصريه على المحتلين اليونان و حرقوهم بجاز و أشتعلت الثوره اللى ألهبتها الروح الوطنيه و أمتدت للصعيد كله و أنهارت قوات اليونان الطريه أمام صلابة الصعايده ذات الشهره العالميه و فروا من الصعيد كله و هم بيغنوا : رجب حوش صاحبك عنى !!
المهم يعنى ..
المقريزى كمان ذكر مدينة أخميم .. و قال أن عجائب الدنيا 30 !! و من ضمنها مدينة بربا اللى هى أخميم لما أنبهر بما فيها من آثار فرعونيه يحتار العقل فى روعتها .. و بما تحتويه من قصور و ممرات و سراديب تعد معجزه فى عالم الهندسه ليومنا هذا ..
أيضا المقريزى ذكر معلومه جديره بالدراسه و هى أن مدينة أخميم على أيام فرعون موسى كانت مركز تجمع جبابرة السحره المصريين !! و أن كان فيها 30000 ساحر بارعين و صفوتهم هم اللى أستعان بهم فرعون لينصروه على سيدنا موسى عليه و على نبينا المصطفى أفضل الصلاة و السلام فأراد ربنا أن يؤمنوا بنبيه لما ألقى موسى عصاه فلقفت ما يأفكون ..
لما فتح العرب المسلمين مصر أسموا أخميم كورة أخميم يعنى مركز كبير و بتتبعه عدة قرى .. و كان بيحدها من الشمال كورة طهطا و من الجنوب كورة قوص .. و كان بها أطلال مدينة بانوبوليس الاٍغريقيه اللى أنبهر العرب بروعة أعمدتها و زخارفها .. و أشتهرت أخميم على مر العصور بصناعة الحرير اليدوى و السكر .. و كان للحرير الأخميمى منذ القدم و ليومنا هذا شهره كبيره ..
مررنا فى الطريق من نجع العيساويه لأخميم على عدد من القرى الصغيره و برضو كانت مزارع القمح اللامتناهيه على الجانبين بتحف الطريق من أوله لآخره :

و عجبتنى أوى قرية الحواويش لأنها بجد قريه نضيفه جدا .. و أهلها ناس فى غاية الكرم و الطيبه ككل أهل سوهاج و لا يسمحوا أبدا أن يقوم الغريب عن قريتهم بدفع تمن المشروبات اللى شربها على القهوه أو يعنى الحاجه اللى زى القهوه اللى على الطريق و اٍلا أعتبروها سبه فى حقهم و تبقى مشكله كبيره لو أصر الضيف على الدفع .. فبلاش تحاولوا تدفعوا تمن الشرب و الأكل فى الحواويش لو زرتوها و آدينى عملت اللى عليا و قلت لكم ..
ندخل بقى على مدينة أخميم ..
الله على المدخل الواسع الجميل النظيف .. و يا حلاوة الثعلب اللى بيعدى الطريق قدام محطة كهرباء أخميم فى عز الضهر بمنتهى الهدوء و الطمأنينه !!!!!
و يا سلام على مشروع توسيع الطريق اللى بيجرى على قدم و ساق بأيدين العمال أبناء سوهاج المشهورين بتفانيهم فى العمل من غير هزار و لا لكاعه ..
- حنشوف أيه أول حاجه يا أبو اٍسلام ؟؟
أجاب :
- متحف أخميم يا بييه ..
- هى أخميم فيها متحف يا أبو اٍسلام ؟؟!!
- هيع هيع هيع (بيضحك بسخريه) أخميم فيها أثارات أكتر من الأجصر (الأقصر يعنى) يا بييه ..
و من ميدان كبير لميدان أصغر لشارع كبير لشارع أضيق حتى لاح على البعد مكان كده واسع و هابط عن مستوى الشارع شويه و متسور بسور حجرى مش عالى أوى و المكان كله محاط بالمنازل من جميع النواحى وسط كثافه سكانيه كبيره للغايه ..
دخلنا من الباب و أستقبلنا رجل شرطه مهيب الهيئه و رحب بنا ترحيبا عظيما و أرسل معنا رجل يرتدى الجلباب الصعيدى و يحمل سلاح آلى ليكون مرشدنا فى جولة المتحف المفتوح ..
الطريق يزداد هبوطا بس ممهد بشكل جيد جدا .. و على اليمين تمثال ضخم للغايه بدأت ملامحه تتضح :

أيه ده ؟؟!! هو ده بقى الحب من أول نظره ؟؟
مين البنوته الصعيديه الرائعه دى ؟؟!!


دى ميريت آمون !! اللى سحرتنى بجمالها و رقتها و غموضها .. و مياصتها :)


ميريت آمون بنت رمسيس التانى .. دلوعة باباها أشهر فراعنة مصر على الاٍطلاق و اللى كان بيقعدها على حجره و يداعب دقنها فى كل النقوش و الرسوم اللى جمعتهم ببعض .. و من حبه فيها تزوجها و كان كهلا .. و المعروف أن رمسيس التانى أنجب 150 ولد و بنت تزوج منهم ثلاثا فقط .. و كانت ميريت آمون (يعنى محبوبة آمون) أقرب عياله و بعدها أقرب زوجاته لقلبه .. و هى غير ميريت آتون بنت اٍخناتون من زوجته نفرتيتى و اللى أتولدت فى العام الثانى من حكم أبوها ..
بجد أنا وقفت قدام التمثال اللى بيبلغ طوله 11 متر و ذهلت !!
ذهلت من هذا الجمال الناعم الأسطورى اللى سحر الكثيرين من قبلى .. وتذكرت على الفور الأستاذ محمد هاشم صاحب دار ميريت للنشر و اللى أسمى مؤسسته على اٍسم هذه البنوته الجميله لما قال عنها : تشعر حين تنظر لتمثال ميريت أنها فرغت لتوها من قبلة !!

تمثال الأميره ميريت تم الكشف عنه سنة 1981 .. و عثر عليه بدون ساقين و لم يعثر عليهما حتى الآن بس تم عمل ساقين من الأسمنت البشع و تم لصقهما بالجسد و هو أطول تمثال لملكه أو أميره فرعونيه على الاٍطلاق .. و أختلف علماء الآثار وقتها حول شخصية هذه البنوته الصعيديه الحلويات !!
بعضهم قال أنه تمثال الملكه تى أم اٍخناتون اللى عاشت فى أخميم برضو و كانت دلوعة جوزها أمنوفيس التالت اللى ماكنش بيوقع لها كلمه الأرض أبدا ..
و بعضهم ظن و بعض الظن اٍثم أنه تمثال الملكه الجميله نفرتارى .. لكن الدكتور أحمد قدرى و الدكتور لبيب الحبشى أكدوا أنها ميريت آمون بنت رمسيس التانى و تأكد هذا الكلام لما تم الكشف عن النقوش اللى على التمثال بعد اٍزالة التراب عنه .. و كانت تصف ميريت بأنها : ميريت أمون جميلة الوجه مضيئة لقصرها كلما مشت فيه .. حبيبة سيد القطرين .. تقف دائما الى جانب مليكها رمسيس الثانى كما يجاور نجم الشمال برج الجوزاء .. عازفة شخشيخة سيستروم للاٍلهه موت وعازفة الهارب للاٍلهه حتحور و منشده بارعه لباقي الآلهه ..
يا عينى يا عينى يا سيدى يا سيدى .. يا روح قلبى من جوه يا ميريت !!
يعنى كمان بتحبى الموسيقى و بتعزفى و بنوته عسليايه و آخر بهججه :)
طيب المغرم بيكى عمو عمرو عازف بيانو قديم سماعى و بالنوته و حياة طعامتك و ممكن برضو أعزف لك للصبح بدون كلل و لا ملل لحد الجيران ما يستجيروا بالقسم علشان يعرفوا يناموا .. بس أنتى قولى آه يا حتة جاتوه ميل فيى و أنا أتقدم لأبوكى و أطلب أيدك منه :)
أبوكى ؟؟
أبوكى ميييين ؟؟
رمسيس التانى حته واحده !!!
لا يا أبله يفتح الله ..
وده الواحد يتعامل معاه اٍزاى ده ؟؟


ده شوفى أصلا يا ميريت يا حبيبتى أبوكى عاكش ملوك الحيثيين من شعرهم اٍزاى تمهيدا للفتك بيهم بالبلطه اللى فى أيده الشمال !!!
أبوكى ده جبار و مفترى و أصلا حاطط عينه عليكى علشان يتجوزك يعنى أروح جنبه فين أنا بقى ؟؟
بأقول لك أيه يا وردة الحب الصافى : خلينا كده أحسن .. أحبك من بعيد لبعيد و أقاسى فى بعدك الأهوال .. و أنضم عن طيب خاطر للى طيرتى عقلهم بجمالك و بهائك .. و أدينى كل ما حتسمح الظروف حتلاقينى عندك فى أخميم ..
أخميم ..
الله عليكى يا أخميم .. يا عايمه فوق بحيره لا تجف و لا تنضب من آثار الأجداد .. و على قولة واحد من أهلك : دى حاجه تزهج و الله !! كل ما ننوى ندج طرمبه نلاجى أثارات لمن الواحد بجى مش عارف يدجها فييين ؟؟!!!
بقى الحكايه كده ؟؟
العجيبه بقى أن الآثار الموجوده فى أخميم بتنتمى مش بس للحضاره الفرعونيه و أسراتها و لكن أيضا لحضارات أخرى نمت و أزدهرت على أرضها زى الحضاره الاٍغريقيه مثلا .. بصوا التمثال ده المجاور لتمثال محبوبتى ميريت :


ده تمثال فينوس كما قيل لى بس ده النسخه المحتشمه منه و للأسف بدون رأس .. و عثر عليه برضو فى أخميم بس شتان ما بين جمالك المصرى يا ميريت و ما بين مقصوفة الرقبه الخوجايه فينوس ..
و خلصت زيارتى للمتحف ..
و غادرته و عينى على ميريت اللى أرتبطت بها اٍرتباط صعب وصفه و لكن أزعم أن للنفس البشريه دهاليز من الصعب توصيفها و لا فهمها !!
باى باى يا ميريت .. يا بنوتة الصعيد يا اللى خطفتى قلبى و أنا فى السن ده !! بس اٍن جيتى للحق بقى أنتى أكبر منى ييجى ب 3000 سنه :))
خرجنا من المتحف المفتوح .. و سألت طبعا عن متاجر الحرير الأخميمى اليدوى المشهور عالميا من آلاف السنين .. و ذهلت و فجعت لما أخبرت أنه ما بقاش فيه خلاص هذه الصناعه الجميله و أستبدلت بمنتجات الصين القبيحه رديئة الخامات و الصنع !!!!!!!!
و فعلا تجولت شويه فى السوق الرئيسى .. و مالقيتش فى كل المحلات غير بضاعة الصين و محلات معلقه لانجيريهات نسائيه تنافس ما هو موجود فى محلات المهندسين و ده شىء غريب أن تعرض مثل هذ القطع الصغنونه علنا فى الصعيد الجوانى و تقلب بين أيدى الشاريات هكذا علنا !!
فييييين و فييييييين لما واحد أبن حلال دلنى على آخر مشغل للحرير اليدوى فى أخميم و يقع قدام المتحف اللى كنت فيه مباشرة ..
المشغل يقع فى بيت ريفى أنيق و شديد النظافه من بيوت باشوات زمان و بيشغل الدور الأرضى بالكامل و يبدو أن صاحبه يسكن فى الدور العلوى من نفس البيت و اٍسمه مش فاكر أيه الخطيب ..
صالة عرض المشغولات اليدويه تمتلىء بالمعروضات و خاصة قماش المفارش لزوم جهاز العرايس :



الميزه و القيمه الحقيقيه فى هذه الأقمشه أن صناعتها كلها يدوى على الأنوال بغير أى اٍستعانه بماكينات النسيج .. و هى شديدة النعومه و الجوده .. و أشتريت من هناك شال جميل هديه لأغلى اٍنسانه فى الدنيا :)
الأستاذ الخطيب صاحب المشغل أخبرنى أن صناعة الحرير اليدوى فى طريقها للاٍندثار .. لأن السوق لا يساعد على اٍستمرارها و لأن السياح فى أخميم قل عددهم بشده فى السنوات الأخيره و هم كانوا عماد تجارة هذه الصناعه الرائعه اللى كانت بتدر دخل جيد لأصحابها و للبنات العاملات فى المشاغل .. و أضاف على كده كمان سبب هام جدا و هو أن الزبون دلوقتى بيهتم برخص تمن المنتج و مش مهم جودته أو قيمته و ده بسبب غلاء المعيشه أصلا و بسبب زحف المنتجات الصينيه على الأسواق ..
للأسف يعنى ..
- يالا يا أبو اٍسلام خلصنا اليوم على خير و لله الحمد ..
- على فييين يا بييه ؟؟
- على الأوتيل يا أبو اٍسلام !!
- أوتييل أييه يا بييه ؟؟
- مطرح ما خدتنى الصبح يا أبو اٍسلااااام !!
- أيوه أيوه .. جصدك الباخره بجا هع هع هع (يعنى بيضحك فى سخريه)
و ده كان نموذج للحوارات بينى و بينه ..
و أخيرا غادرت أخميم و أنا أحمل بداخلى ذكريات بجد من أجمل ذكريات حياتى و وجه ميريت لا يفارق خيالى السارح بعيدا و أنا أتأمل دروب أخميم العتيقه حيث عاشت هنا ميريت الرائعه المذهله و ماتت و ضم تراب أخميم جسدها الشاب ..
أييييييييييه كل من عليها فان .. بس للى يتعظ و الله ..
و رجعت الأوتيل قبل المغرب بشويتين.. الباخره على رأى أبو اٍسلام و قبل أى شىء توجهت رأسا اٍلى المطعم لأن الحب و الوجد لا يمنع برضو عصافير البطن أنها تزقزق و تصوت كمان .. فكان فى اٍنتظارى حقيقه تقبلتها بنفس راضيه و عين دامعه و قلب مكلوم و هى أنهم خلاص شطبوا الغدا و عليا بقى الاٍنتظار للعشاء .. عارفين العشاء كان مقرر له اٍمتى ؟؟
الساعه 5 الفجر :))
و لولا لطفك يا رب أنك ألهمتنى و أفتكرت طبق الفاكهه الملوكى اللى فى الأوضه لكنت مت جوعا .. و فعلا نزلت عليه حتتك بتتك نزول جند رمسيس التانى على قادش ..
و أفتكرت ميريت حبيبة قلبى لما أفتكرت أبوها و قطمت قطمه من التفاحه الأمريكانى و سرحت شويه و أبتسمت بس رجعت أستعذت بالله العزيز من الشيطان الرجيم :)
البوست اللى جاى بقى باٍذنك يارب حيكون عن شوية حكايات كده متفرقه لكواليس تصوير المسلسل و حكايات العاملين العجيبه على الباخره .. و حتلاقوا فيه حقائق غريبه أوى بجد .. فترقبونا ..
و لكم خالص الشكر و التحيه ..

هناك 72 تعليقًا:

شمس النهار يقول...

بجد ياعمرو تسلم ايدك

وربنا يبارك لك في موهبتك الجميله

وكمان علي قدرتك علي تذكر الاحداث وسردها بطريقه بسيطه جدا وسهله

انت كتبت معلومات تاريخيه في منتهي الاهميه بمنتهي البساطه والسلاسه

وطبعا كالعاده لازم تكون في قضيتين تلاته كده علي الماشي

بالزمه ده منظر متحف يتحط فيه الاثاره الرهيبه دي
يعني يرضيك ميريت حبيبتك الدنيا تمطر عليها
ارحم اثارنا يارب من يد الاهمال

قلبي اتوجع لما قلت كملوا رجلين التمثال بالاسمنت
ماكانوا يجبسوها احسن
الغريب ان علي رأس المجلس الاعلي للأثار رجل مش محب لاده عاشق للفراعنه
طيب ياحواس ليه سايب الدنيا هايصه كده في اثار الصعيد

والقضيه التانيه طبعا الصناعات اليدويه المصريه المشهوره القديمه

حرام والا حلال صناعات كتير بتموت مع ان المصريين مهره جدا في الصناعات دي
يعني في خان الخليلي تلاقي دكتور في الورشه قاعد بيدق طبق نحاس بديع مزاج عنده ماهو من صغره هنا والا دمياط

طيب صناعه زي دي فين رجال الاعمال ليه مايستثمروش اموالهم في عمل مشغل كبير علي مستوي
وبدل ماالسياح يروحوا اخميم نروح لهم احنا اي حته
ان شاء الله نعمل معارض عندهم ماالايدي العامله اللي بتقوم علي الصناعات دي اكتر من الهم علي القلب

مش الاثار دي بتسافر بره طيب مانعمل معارض للمنتاجات دي علي الهامش

ماعلينا
ايه ده معلش ياعمرو شكلي انا اللي عملت بوست علي الهامش

المهم
حلال عليك الملكه الجميله ميريت وهي فعلا كانت دلوعه ورقيقه والشعب والبلاط كانوا بيحبوها جدا

وادي اخرتها مرميه في متحف مفتوح الا متحف مفتوح الا

شكرا علي البوست الجميل ده
ومجهودك الكبير الواضح

♥نبع الغرام♥♪≈ يقول...

السلام عليكم
عمرو الجميل
الله الله الله عليك
والله العظيم قرئتها اكثر من كذا مره
جميله قووى والاثار تحفه بجد الله
والتصوير فى غاية الروعه
الملكه ميريت بجد تحفه
معلومات شيقه يا باشا تسلم ايديك ياقمر
بس لحد امته هتفضل الاثار دى متبهدله
كده بجد حرام والله
ولا الصناعات دى ولا ايه ولا ايه
يلا ربنا يسهل
المهم بجد بوست جميل قووى
ربنا يوفقك يارب
ومنتظرين القصه القادمه ان شاء الله تعالى
تحياتى
انوسه

ستيتة يقول...

دخلت مدونة من عند ريدر مدونة صديقة
وعجبني عنوان بنوتة من أخميم
الكلام ده كان تلاتة الفجر
من ساعتها احاول اخرج مش عارفة
لحد ما جالي حول

اصلا انا عاشقة للتاريخ المصري وبحسدك حسد صريح وليس غبطة والكلام المتداري ده

يا بختك ربنا يكرمك

طبعا انا زرت الأقصر وأسوان وكوم أمبو وأدفو زماااااااااااااااااان

لكن حلم عمري ألف كده الصعيد من أوله وأجيبه منطقة منطقة

من الصعيد الجواني مجموعة تسجيلية أكثر من رائعة

اشكرك شكرا جزيلا على دقائق متعة كنت محتاجة ليها جدا .. وايه امتع من رؤية تاريخ الأجداد

mahasen saber يقول...

بجد من كتر ما بستمتع بكتاباتك عن الصعيد ورحلتك فيه

اعتقد بجد انى اتشجعت انى اخد رحله باينى لهناك دى اكيد تبقى متعه

mahasen saber يقول...

مبدع مبدع وانسان رائع وثرى الفكر والاحاسيس والمشاعر

انا فخوره بمعرفتك واى حد يعرفك لازم يبقى فخور بيك
حتى لو مجرد معرفه صباح الخير صباح النور

مفيش كتير دلوقتى بالخبره الحياتيه الجميله دى
والثراء العقلى والفكرى ده

mahasen saber يقول...
أزال أحد مشرفي المدونة هذا التعليق.
بسنت صلاح الدين يقول...

احييك على الشرح المفصل الرائع،و هنيالك بحب مريت امون الجميله،اللى خطفت جلبك"بالصعيدى بقى"، و عاوزه اقولك ان حبيبه القلب كمان كانت كاهنه فى معبد المعبوده حتحور، واخدت لقب الزوجه الملكيه العظيمه،يعنى مش اى حد،للأسف نبهتنا لحقيقه مؤسفه وهى ان التركيز و الانتباه كله بيبقى فى المدن الاثريه دون غيرها زى اسوان والأقصر،و الباقى مهمله زى ماشفت،مع ان الصعيد فيه ثروات هائله لو استهلكت كان هايبقى لينا شأن تانى
مستنيين البوست الجاى
تحياتى

بسنت صلاح الدين يقول...
أزال أحد مشرفي المدونة هذا التعليق.
دعاء يقول...

بص
هو أنا عندي ليك سؤال:
هو انت وانت هناك كنت بتكتب التفاصيل دي..وللا دى ذاكرتك؟
أصل انا بجد حاسة انك قاعد هناك وبتنزل كل يوم تتمشى وتلف لفة وتيجي تكتب البوست.
ايه ده بجد..انا حاسة انى انا كمان كنت هناك ..
هو انت ليه برده مش بتدرس التاريخ فى المدارس ؟ يمكن العيال يفلحوا ويحبوا التاريخ ويفهموه.
تمنياتى ليك بدوام التوفيق
تحياتي

hasona يقول...

السلام عليكم

جهد كبير
وابداع رائع
وحب للتاريخ بوعي وفهم

أحييك عليه

احساس طفلة محبة للرومانسية بس واقعية يقول...

بجد حاجة جميلة جدا

رغم انى معلوماتى التاريخية قليلة
بس استمتعت جدا بالمعلومات اللى فى البوست والطريقة اللى نقلتهلنا بيها
وتنوعك بين المعلومات والطريقة الكوميدية الخفيفة بجد البوست رائع
الفراعنة بحس انهم لغز صعب علينا فهمة مهما حللنا وفكرنا حياتهم هتفضل لغز كبير بنوة صح

ربنا يبارك فيك
بأنتظار البوست اللى جى
تقبل مرورى

غير معرف يقول...

هههههههههههههههههه
انت وقعت...طيب خد بالك لاهلها يقطعوك ...وبالذات ابوها....يوه قصدى جوزها.....يوه قصدى استغفر الله العظيم ....ايه اللخبطه دى
المهم ارجو ان تستمتع بالرحله حتى النهايه
دمت بخير......تقبل مروورى

MǿиY El-Shreef يقول...

انا مش عارفه في ايه ف الصفحه مش بتظهر مش عارفه اقرأ الكلام

الخلفيه البيج يعني

الكلام غامق والخلفيه غامقه

ف بسجل حضور وهرجع يمكن مشكله من النت

Unknown يقول...

متشكريين متشكرين متشكريين
متشكريين متشكرين متشكريين
متشكريين متشكرين متشكريين
لو كررتها 1000مرة مش حأوفى
الشكر لحضرتك على الرحلة الجميلة
دى والمعلومات الحلوة ولا الجو الواقعى
اللى بتدخلنا فيه بطريقة حكايتك وكلامك .لو بيدرسولنا التاريخ
بالطريقة دى كنت اول واحدة
دخلت اداب قسم تاريخ:)
لكن للاسف ما بيحبوناش
نعرف او نحب تاريخنا
وعلشان كده
بيدرسوه
لنا
بالطريقة
المملة بتاعتهم.
مرة تانية الف شكر
لرحلة جميلة متعتنا وعلمتنا
وفكرتنا فيها بمعلومات ممكن كنا
نسيناها من زمااااااااااااااااان

Unknown يقول...

ومبروك على الشال
الحرير لمن تستحق
هذا الشال الحرير

Unknown يقول...

وشكرا على تدوينة
عي ميلاد الاستاذ
نور الشريف
انا شفتها
الحين حلوة
اوى اوى
اوى اوى

MaNoO يقول...

اعمل ايه بس والله العظيم مهما قلت ومهما عملت اسلوب حضرتك خيالى اولا ثانيا اخميم والفراعنة وميريت حالة تانية بعيشها كل اما اقرا بوست جديد ليك بحس انى بعدت عن كل الدنيا ومتعمق فىا لبوست خاصة الاماكن بحس ان انا فى المكان فعلا وكمان بتشوقنا وتغيظنا اكتر وأكتر وتجبرنا اننا فعلا لازم نروح فى يوم من الأيام ان شاء الله

صبرني يارب يقول...

هى حصلت كمان لحد اعوذ بالله من الشيطان الرجيم

لا لا لا ده لايونكن نسمح به ابداااا

بس يلا مش مهم هى ماتت من زمان خلاص بلاش بقى سواطير واكياس وكده عديها

ههههههههههههههههههه

تحياتي المصحوبه كالعاده بالحقد الدفين

هههههههههههه

فشكووول يقول...

ازيك يا عمرو بك
انا رجلى وجعتنى من كتر اللف معاك فى سوهاج واخميم ...
ثم انك عاشق لمريت .. تماما كما انا عاشق لقطر الندى بنت خمارويه
شفت الهنا اللى انا وانت فيه
انا بحب قطر الندى ومش طايلها ولا طايل زمنها وانت كمان بتحب مريت ومش طايلها ولا طايل زمانها
انا بقى لو منك كنت اشتريت توب حرير من اخميم وافصله فستان كبير واهديه لمريت والبسه لها عشان تبقى ملمسها ناعم بدل الملمس الحجرى اللى هى فيه
تحياتى استاذ عمرو

الكلمة نور يقول...

رائع

اقصوصه يقول...

تدوينه ممتعه :)

همس الاحباب يقول...

ههههههههه
الحمد لله انك ما قولتش الكلام ده عن مبريت وانت فى الصعيد كان زمانهم طخوك عيارين ولا يشفع للك انها ماتت من 3000 سنة
هههههه
المهم مدينة اخميم زى ما قلت لحضرتك عبارة عن مدينة فوق مدينة اخرى من الاثار الفرعونية والاغريقية والاسلامية كماان
ومع الاسف مهملة بطريقة بشعة وتعتبر من اكثر الاماكن التى يتم تهريب وسرقة الاثار منها وعلى مسمع ومراى من مسئولين كبار واعضاء المجالس النيابية
وناهيك عن فصل الانوار عن اخميم كثيرا لاتمام عمليات التهريب
المهم ان اخميم كانت من اهم مدن العالم فى صناعة الحرير الطبيعى وكذلك السجاد والموكيت اليدوى
وانهارت تلك الصناعات الان
شوقتنى لزيارة سوهاج تانى ههههههه
على فكرة انا مسافر بعد بكرة سوهاج لمدة 48 ساعة وراجع تانى
على فكرة انا من مركز ساقلته شمال اخميم وبوابة سوهاج من الشمال واللى كانت سابقا تسمى كورة طهطها
تحياتى وتقديرى لحضرتك

Maghool يقول...
أزال أحد مشرفي المدونة هذا التعليق.
Dr.m يقول...

السلام عليكم
زياره اولى لمدونه جميله

تاريخنا دايما حلو بس للاسف مبنعرفش نحافظ عليه
ازاي نسيب صناعه زي دي تندثر
نستاهل كل اللي بيحصلنا

تحياتي
سلام

من غير عنـــوان يقول...

شكرا على الرحلة

مصر فيها حاجات كتير

وعشان كده أصبح عندنا تشبع

يعني القيمة راحت

أمنياتي

إيمان هلال يقول...

بجد مصر تحفه
http://kot-cha.blogspot.com/

الفقيرة إلى الله أم البنات يقول...

استاذ عمرو حضرتك لك تاج عندى مش عارفه حضرتك جاوبت عليه قبل كده ولا لاء
اتمنى ان حضرتك تجاوب عليه لو لسه مجاوبتش عليه

وبخصوص التدوينه دى مش هاقولك مين هيفرح بيها
بنتى عندها 10 سنوات بتحب التاريخ والفرعونى بشده الحقيقه انا لاء
بس هاقرا معاها نزولا على رغبتها فمش هاقول رايى إلا لما اقرأ
ولكنى أرى من التعليقات انه موضوع يستحق
جزيت خير

MaNoOoSh يقول...

بجد استمتعت بالسرد دة وحسيت انى كنت معاكم خطوة بخطوة.

بس انا مش شايفة ان ميريت حلوة قوى كدة يعنى.. انا احلى منها بكتشيييييييير
ههههههههههههههههههه

لا بجد انا بحبها فعلا وبحب نفرتيتي أكتر منها بشوية.

بس صحيح اوعى تكون جبت الشال لميريت
ههههههههههه
تحياتي يا استاذ عمرو

الازهرى يقول...

ترجع بالف سلامة باذن الله
ويا رب نتقابل قريب وعلى خير

beautiful mind يقول...

استاذ عمرو لقد اثبت فعلا ان صعيدنا الغالي ممتلىء بالرجال مثلما هو ممتلىء بكل ما يريح العين من مناظر واثار
انا عرفت معلومات وحاجات اول مرة اعرفها
تسلم يا استاذي علي مدونتك الرائعه وانا من اكثر متابعيك
ودومت متالقا

عمرو يقول...

شمس النهار
أشكرك يا برنسيس على اٍطرائك و زيارتك ..
قضية الآثار فى الصعيد دى قضيه كبيره أوى أوى أوى و من مصلحة البعض ترك الحال على ما هو عليه .. صدقينى ..
بالنسبه للصناعات اللى أندثرت أو على وشك الاٍندثار فده طبعا شىء فى غاية الاٍيلام لأن هذه الصناعات جزء من الهويه و التراث المصرى و اٍندثارها يعنى اٍندثار جزء من الشخصيه المصريه للأسف ..
بس برضو ماينفعش نبعت للناس بره منتجاتنا بهذا الشكل يعنى نبعت لهم الآثار يتفرجوا عليها و كمان نبعت لهم الصناعات التراثيه لحد عندهم ؟؟ طيب حييجوا مصر ليه بقى ؟؟
و لو أن بينى و بينك هم قلتهم أحسن لأنهم مش بينعشوا السياحه المصريه بمجيئهم زى ما الناس فاهمه بالعكس ..
و ده حيكون موضوع كبير فى بوست قادم اٍن شاء الله ..
شرفتى المدونه و أهلا و سهلا بيكى :)

عمرو يقول...

عاشقة الأحزان
أشكرك على الكلام الكبير دايما بترفعى من معنوياتى ربنا يخليكى ..
قضية الآثار و الاٍهمال فيها الحديث عنها ذو شجون و لا ينتهى ..
بارك الله فيكى و أهلا و سهلا ..

عمرو يقول...

ستيته حسب الله الحمش
أهلا و سهلا بيكى شرفتى المكان :)
أشكرك من كل قلبى على الاٍطراء اللى رفع من معنوياتى .. و أحييكى على حبك لتراث الجدود اللى بجد نحن فى أشد الحاجه له ..
أتوقع زيارات تانيه اٍن شاء الله و لك تحياتى ..

عمرو يقول...

mahasen saber
أشكرك يا أم عبد الرحمن و فعلا الصعيد جديره بالزياره بس الحقيقه فى الشتاء مش فى الصيف :)
و أشكرك كمان على الكلمتين اللى قلتيهم عن شخصى بس ده كتير و الله :)
مرحبا و أهلا و سهلا بيكى ..

عمرو يقول...

بسنت صلاح الدين
أنا اللى بأشكرك على الزياره و التعليق و الاٍضافه ..
و فعلا ميريت خطفت قلبى :) حأعمل أيه ؟؟ الهوى غلاب ..
صح اٍهتمامنا كله بينصب على المدن لكبيره و بنتجاهل ما عداها و ده ربما يكون شىء مقصود و الله أعلم ..
أهلا و سهلا بيكى ..

عمرو يقول...

دعاء
الحقيقه هناك كنت بأعتمد على الصوره و على كليبات الفيديو لتذكرنى بما كان لا يعلق بذاكرتى الضعيفه أصلا ..
و ربما لشدة تأثرى بما كان يدور حولى من أحداث فقد علق بذهنى تفاصيل كتيره حتى يكون من ضمنها ما لم تلحظه عينى وقتها ..
أشكرك و أهلا و سهلا بيكى :)

عمرو يقول...

hasona
أهلا و سهلا بيك أشكرك على الاٍطراء و فى اٍنتظار زيارتك القادمه اٍن شاء الله ..

MǿиY El-Shreef يقول...

السلاااام عليكم

غيرت المتصفح وظهرت الخلفيه الحمدلله

ازيك بجى :)))

جميل اوي كلامك الواحد بيقرا وحاسس انه ف اخميم معاك والله

ماشاء الله عليك اسلوب وصف جامد جدا

عجبتني الصور اوي اوي

بس عجيبه المكان الي فيه المتحف بتقول دخلنا ف حتت ضيقه وبتاع ومتحف من غير سقف

ليه كده يعني

بالنسبه لحكايه الحرير والسياح ليه طيب الاهتمام قل وقلت معاه السياح غلط مين يعني ماهو مافيش ارهاب ف سوهاج :)

القصص مابين السطور خرافه

ماشاء الله

ربنا يوعدنا :))

سلااام

شمس النهار يقول...

مش عارفه اقول لك ايه عندك حق
همه المصريين كده مابيعرفوش يحافظوا علي الغالي اللي في ايديهم

العالم يتمني نص اللي عندنا ويحافظوا عليه كمان
لكن احنا بنفرط بسهوله

زي التفريض في الحرف اليدويه
بس عايزه اقول لك
ان مش عيب ان المنتج المصري يروح لحد عندهم
شوف الصين عامله ايه
حتي اكلهم الغريب صدروه للعالم
يعني المصريين اللي بيحبوا الاكل الصيني كانوا والدهم صيني

ياسلام لو نبعت لهم بلاص مش كده
وعسل اسود وفطير مشلتت

كان العالم اتلم حوالينا
احنا مش شطار

ميرام يقول...

(:
الله أنا افتكرت محاضرات التاريخ الفرعوني اللي بناخدها في الكلية
(:
أسلوب حضرتك جميل
وبجد شدني اني اكمل للاخر
(:
منتظرة جديدك
تحيــــاتي

عمرو يقول...

احساس طفله محبه للرومانسيه بس واقعيه
متشكر جدا ليكى أن البوست عجبك و ده بتوفيق من الله سبحانه و تعالى ..
فعلا الفراعنخ لغز كبير و حقيقى ماأنحلش منه غير جزء بسيط جدا و ما خفى كان أعظم ..
تقبلى تحياتى

عمرو يقول...

فتاه من الصعيد
يعنى هى علشان صعيديه زيك حتقولى لأبوها و تدليه على المدونه ؟؟
كله اٍلا أبوها و حياتك لحسن ده بجد راجل مفترى و مش متخيل اٍزاى رمسيس ده يخلف بنوته بالرقه و الجمال ده ؟؟!!
أيوه وقعت الحق ينقال يعنى :)
متشكر للزياره و التعليق

عمرو يقول...

مونى الشريف
عملت تحديث مخصوص علشان المشكله دى ..
متشكر جدا للمرور ..

عمرو يقول...

norahaty
ألف شكر ليكى أنتى يا دكتوره :)
تصورى بقى أنك نبهتينى لحاجه ماكنتش واخد بالى منها !!
أنى كنت بأحب مدرس التاريخ و أنا فى المدرسه و بالتالى حبيت مادة التاريخ لأنه كان بيشرحها بطريقه لطيفه جدا و كان بيألف مشاهد تمثيليه كده صغيره و ساذجه كنا بنقوم بتمثيلها فى الفصل يشرح بيها الدرس !!
متشكر ليكى بقى مره تانيخ أنك فكرتينى بهذا الموضوع اللى كاد أن ينمحى من الذاكره ..
تقبلى تحياتى و تقديرى يا دكتوره ..

عمرو يقول...

norahaty
صاحبة الشال الحرير لو أهدتها جزء من السماء برضو مش كفايه :)

عمرو يقول...

norahaty
و متشكر ليكى كمان مره أن بوست عيد ميلاد نور الشريف نال اٍعجابك :)

عمرو يقول...

مانو
و الله يا عزيزى ما أقصد أغيظكم :)
بس فعلا الصعيد جدير جدير بالزياره و جدير بتأمل أحواله و تفاصيله لأن له شخصيه تختلف قليلا عما اٍعتدنا عليه ..
متشكر ليك جدا و تقبل تحياتى و تقديرى ..

عمرو يقول...

صبرنى يا رب
الاٍستعاذه بالله من الشيطان الرجيم واجبه فى كل الأحوال :)
و يا ستى ليه الحقد بس ؟؟ ده حتى الجو هناك حر :))
متشكر لزيارتك و تعليقك و سلامى للأستاذ رضا و الأولاد ..

عمرو يقول...

فشكووول
سلامة رجلك يا أستاذنا الفاضل بس هى الحياه عاوزه اللى يلف علشان ياما يشوف :)
يعنى يا أستاذنا مكتوب علينا نحب نساء تاريخيات و لا أيه الموضوع ؟؟!!
عموما تاريخيات تاريخيات بس المهم أن هم كمان يحسوا بينا :)
على فكره ميريت ملمسها فى رأيى مش حجرى أبدا .. تأملها كده يا أستاذنا بشوية تمعن و حتأكد من كلامى (علشان بس التوب الحريرى ده حيتكلف كتير أوووووووى)
أشكرك للزياره و التعليق و تبل تحياتى و تقديرى ..

عمرو يقول...

الكلمة نور
متشكر جدا و أهلا و سهلا

عمرو يقول...

اقصوصه
متشكر جدا :)

عمرو يقول...

همس الأحباب
يعنى الحمد لله جات سليمه :)
بس مش عارف بقى حأقدر أرجع لها تانى و لا فيه حد من سوهاج عارف مدونتى و حيقولهم عليا ؟؟
مش أنت يعنى طبعا :))
أخميم دى عجيبه جدا بجد و الله عندك حق .. بس تفتكر أيه الحل فى رأيك ؟؟
الحال المايل ده ينصلح اٍزاى ؟؟
حضرتك من ساقلته و الله ؟؟
بالجوده :)
ده أنا كنت قريب منك أوى ..
تقبل تحياتى و تقديرى ؟؟

عمرو يقول...

Dr.m
أهلا و سهلا بيك فى أول زياره و اٍن شاء الله تشرفنى دايما :)
فعلا سيبنا حاجات كتير فى حياتنا أندثرت مننا بمنتهى القسوه و اللامبالاه و حاجه جرت حاجه لما بقى حالنا قريب من أن يكون مأساوى ..
تقبل تحياتى و شكرى و تقديرى ..

عمرو يقول...

من غير عنوان
و الله مش عارف يا صديقى الحكيم أيه الحل ؟؟
لكن هل كثرة الموجود بالفعل يؤدى لتخمه تقود لما آل اٍليه الحال ؟؟
أشكرك للزياره و التعليق ..

عمرو يقول...

اعق مجنونه
مصر رائعه بكل معنى الكلمه بس تحتاج للى يحبها أوى علشان يقدر يفهمها ..
شكرا و أهلا و سهلا بيكى ..

عمرو يقول...

الفقيرة اٍلى الله أم البنات
أشكرك يا أختنا الفاضله على التاج و حأبدأ أجاوبه قريبا جدا اٍن شاء الله ..
متشكر أن البوست عجبك و يكون كمان عجب بنوتك بس ياريت يكون ملائم لها ..
تقبلى تحياتى سيدتى و تقديرى و ألف أهلا و سهلا بحضرتك ..

عمرو يقول...

مانوش
ماشى يا مانوش أكيد أنتى أحلى من ميريت :)
نفرتيتى طبعا سيده جميله برضو و كان لها دور تاريخى كبير بس يقال اٍنها مش من أصول مصريه !!
لا يا ستى الشال الحرير لاٍنسانه تستحق أكتر من كده بكتيييييييييير ..
تقبلى تحياتى و تقديرى ..

عمرو يقول...

الأزهرى
الله يسلمك و أكيد حنشوفك قريب على خير اٍن شاء الله ..
لك كل الشكر و التحيه ..

سبهللة يقول...

عمرو الموضوع اكثر من رائع
حسستنى انى برنامج تليفزيونى وبشاهد كل اللى انت بتوصفه
جزاك الله خيرا
وربنا يكتب لنا زيارة لصعيد مصر
اللى عمرى ما زرته
انا اخرى كان الفيوم
ابعد من كدة ما رحتش
تحياتى لك على هذا المجهود الواضح
وسلام الله عليك ورحمته وبركاته

عمرو يقول...

beautiful mind
أشكرك يا عزيزى لزيارتك لمدونتى المتواضعه و لاٍطرائك على البوست ..
و فعلا الصعيد ملىء بكل ما هو رائع و ذو قيمه و الخوف كله أن تطغى عليه قيم مش بتاعتنا أبدا ..
أشكرك و لك كل التحيه و أنا كمان حأتلبع مدونتك من هنا و رايح :)

عمرو يقول...

مونى الشريف
كويس كده أن المتصفح أشتغل و المدونه ظهرت :)
خدى بالك أن السياحه هى اللى قلت الأول و تلاها اٍندثار لمهنة نسج الحرير اليدوى مش العكس ..
فعلا مكان المتحف غريب أوى !! و الأغرب منه البيوت المكتظه بالسكان و الغسيل المنشور فى الشبابيك و بتحيط المتحف من كل جانب !!
مش عارف ,, يمكن ليهم وجهة نظر فى كده لا ترقى اٍليها عقولنا الضعيفه :))
بأشكرك يا مونى على زيارتك و متابعتك و اٍعجابك بالبوست .. دمتى بكل خير و أتمنى الفوز للأهلى مخصوص علشانك ..

عمرو يقول...

شمس النهار
مساء الخيرات يا برنسيس :)
ضربتى مثل بالصين ..
طيب ..
عمرك شفتى الحكومه الصينيه بتبعت آثارها الحقيقيه اللى لا تقدر بكنوز الدنيا عندها لتعرض خارج الصين ؟؟
عمرها ما بتحصل ..
اللى بيحصل أنهم بيعملوا معارض لقطع مقلده كنموذج فقط لما عندهم خارج بلدهم و بيقولوا اللى عاوز بقى يتفرج يتفضل أهلا و سهلا ييجى الصين ..
ده اٍحترام الشعوب المحترمه لآثارهم و تراثهم ..
و مش الصين بس ده كل الدول المحترمه اللى بتحترم نفسها ..
تعالى بقى بصى عندنا ..
تخرج الأثار من مصر تحت سمع و بصر رجال الجمارك و تتصور و توثق و بالسلامه يا آثار نادره تروحى و ترجعى بألف مليون سلامه .. و تروح فعلا تعرض بره و ترجع ..
مش حأقول أكبد زى ما سمعت لكن حأقول يمكن يعنى يمكن مش أمر وارد برضو أن الآثار دى بتتقلد بره على أيدين محترفين طلاينه اللى أشهر ناس غى العالم فى التزييف و تتبدل القطع الأصليه بقطع مقلده و ترجع مصر و يتراجع عليها و كله تمام يا أفندم ؟؟
مش ده أمر وارد برضو ؟؟
مش جايز القطع تتلف أو الطياره تتحرق ؟؟ ساعتها هل سيعوض التأمين عن قيمتها التاريخيه النادره ؟؟
سامحينى يا برنسيس أحنا الحقيقه بنتساهل أوى فى كل حاجه بما فيها قيمنا التاريخيه اللى لن تتكرر ..
المنتج المصرى بقى اللى بيروح لحد عندهم ممكن يكون موكيت أو سيراميك أو شىء مشابه من هذا القبيل لكن نبعت لهم تراث ؟؟
صناعات تراثيه ؟؟
ده الغلط بعينه لأننا بنفوت على نفسنا فرصه كبيره لزيارة السياح لمصر بهدف الشراء و التسوق ..
يعنى ممكن أيوه نعمل حملة تسويق و دعايه لكن مش بيع ..
أيه ده يا برنسيس أنتى تعرفى يعنى أيه بلاص مش ؟؟؟!!!
ده أنا ما أعرفش الحاجات دى :))
ألا يعنى أيه بلاص مش يا برنسيس ؟؟

عمرو يقول...

ميرام
متشكر جدا لزيارتك و تعليقك و أهلا و سهلا بيكى :)
التاريخ من أهم و أجمل العلوم الاٍنسانيه و أنا عن نغسى من عشاق التاريخ مع أن مش كل الناس بتحبه ..
تقبلى تحياتى و تقديرى و شكرا لاٍطرائك ..

عمرو يقول...

سبهللة
متشكر جدا جدا و الله ربنا يخليكى ..
حاولت أوصف الأماكن بدقه لأنى أحببتها جدا و فعلا يا سبهلله الصعيد جدير بالزياره بل بنكرار الزياره كمان ..
شرفتى المدونه و لك كل التحيه ..

شمس النهار يقول...

لولا اني عارفه انك بتقرا كل كلمه وتفصص فيها كويس كنت قلت انك ماقريتش كويس انا ماقلتش ان الاثار هي اللي تسافر لا
المنتج المصري اللي يسافر للخارج تصدير يعني
اما المش ياجماله
انت ماتعرفش بلاص المش ياعمرو
طبعاماحب ميريت توهك
ده في بلاص مش وبلاص عسل اسود
شوف انت لو صدرنا كام بلاص مش لأوروبا
ياه كانوا ينبسطوا اوي

كان ساكن في الفيلا اللي جنبنا في احد الدول العربيه طليان
والست كانت صديقه لماما
جت مره قالت لنا جاني حاجه كده في علبه معدن فتحتها لاقيت ريحيتها مش حلوه لاقيتها سمك غريب واللي باعتها بيقول دي احلا اكله عندنا(صديق ليهم مصري)
ماما دخلت عندهم المطبخ لاقيته فسيخ قالت لها ده جميل جدا الست ذهلت وقالت لها اقبليه مني هديه
بس خديه دلوقتي حالا
:)
وهي طبعا سعيده ان ماما هتخلصها منه

z!zOoOo يقول...

السلام عليكم

علي العموم شكرا لرد زياره حضرتك

تحياتي

لاسع افندى يقول...

ده كلام واحد اخميمى مش مجرد زائر صح؟


تحياتى لك و لكل محب لتاريخ يحاول كثيرين محوه

بـراااح يقول...

الاستاذ عمرو
بجد مش عارفة اشكرك ازاي علي المعلومات الجميلة دي
انا حسيت قد ايه انا عندي جهل بالحاجات الجميله اللي في بلدي و محتاجة اعيد اكتشافها من جديد. و زي ما محاسن قالت كلامك فعلا يشجع ان الواحد يروح رحله لهناك و يشوف الجمال ده بعنيه
و طبعا لما الكلام بيكون عن الآثار لازم يلازمه اوضاع توجع القلب. انا من كام سنة رحت سيوة ووقعت في حبها و ماكنتش عايزة امشي منها زي ما انت بالظبط وقعت في حب ميريت:))
تصور ان الاهمال وصل لان كان فيه جامع بيتبني و بدل ما يجيبوله طوب للبناء اخدوا من اطلال معبد اثري مهمل و ماحدش حاسس بحاجة
و طبعا بالنسبة للمشغولات اليدويه الوضع ماكنش افضل بل اسوا
سالنا ... ياخواننا فين المشغولات الفضية السيوي الجميله
قالولنا واحدة اجنبية شكلها كده جاسوسة جت و لمتهم كلهم !!!!!
معرفش الوضع هناك دلوقت شكله ايه اتمني يكون احسن
و اشكرك كمان على المعلومات الجميلة عن ميريت .. انا اول مرة اعرفها و بجد استمتعت جدا
معلش انا طولت علي حضرتك و في اول زيارة ليا لمدونتك بس موضوعك الجميل هو اللي شدني و خلاني ارغي كده:)))
ربنا يوفقك دايما و يديم عليك نعمة الاحساس الجميل و سلاسة السرد
تحياتي

dr.lecter يقول...

يااه ياستاذ عمرو تخيل حلمي اني افضي نفسي واعمل رحله زيك كده اكتشف فيها مصر اللي انا معرفهاش

اوعدنا ياررب

وترجع بالسلامه ان شالله

خمسة فضفضة يقول...

السلام عليكم ورحمة الله وبركاته

طبعا مش عاوزه تعليق ، وهاعلق اقول ايه بعد الكلام الجميل والوصف التفصيلي اللي حضرتك قايله

بجد بقي انا بغبطك ونفسي كنت اكون معاك


---------------

بالنسبه للمشكلة اللي في المدونه
فيه اد اون للفير فوكس اسمها

IE Tab

وممكن ينزل من الرابط ده :

https://addons.mozilla.org/en-US/firefox/addon/1419

ودي بتضاف للفير فوكس بتبقي موجود في التولبار اللي فوق بالضغط عليها بيتحول التاب من فيرفوكس تاب الي انترنت اكسبلورر وبالتالي بيحل المشكله من غير ما الواحد يفتح الانترنت اكسبلورر مع الموزيلا

كل اللي عليك انك تدوس علي رابط
add to firefox

وتمشي مع الخطوات
بعد كده كليك يمين علي التول بار اللي فوق وتقوله
customize
هاتلاقي العلامه بتاعها موجوده اسحبها للمكان اللي تحبه في التولبار
ولما يكون فيه موقع مش متوافق مع الفيرفوكس كل اللي عليك انك تدوس عليها هايتحول التاب للاكسبلورر بمنتهي بالبساطه

واي خدعه


سلام

صوت من مصر يقول...

استاذ عمرو الفير فوكس عندى مفهوش اى مشكله وزى الفل

عادل بيه يقول...

شكرا يا استاذى على وصفك لبلدنا واثارنالقد ادهشتنى واثرت اعجابى وحللت اهلا ونزلت سهلا فى اى وقت بالحواويش -عادل لطفى الحواويش