الاثنين، 4 مايو، 2009

من الصعيد الجوانى .. (1) الوصول للعيساويه ..

صباح الخير :)
نبدأ على بركة الله كتابة أول حلقه فى سلسلة بوستات من الصعيد الجوانى و اللى أقترحت هذا العنوان بنتى بسنت صلاح الدين فى تعليق سابق لها فبرضو لزم التنويه ..
يا معين يا رب ..
- خصيمكم سيدنا النبى بلاش نتكلم عن قطار النوم اللى بيقوم من القاهره متوجها لأسوان مرورا بمحافظات الوجه القبلى كله ..
بلاش نتكلم عن هذه الذكرى المفجعه فى حياتى لأنى تعودت على اٍسقاط الذكريات السيئه من عقلى فمش عاوز أفتكر حاجه عن هذه التجربه المؤلمه و يكفى بس أنى أقول لكم أن اللى يحب منكم يسافر فى هذا القطار عليه أن لا يحمل معه أى حقائب حتى يكون هناك فسحه من المكان فى هذا الحق المسمى فرضا بالمقصوره علشان يعرف بس يفرد رجليه أو أنه عليه الاٍنبطاح على ظهره طوال فترة الرحله الرهيبه اللى بتستمر لساعات طويله و هو بيبحلق فى السقف لحد ما يتجنن أو يحول و لا حول و لا قوة اٍلا بالله ..
وصلت سوهاج و قد تفككت أوصالى و تشخللت سوست عظامى بفعل قطار النوم و المفروض يسموه قطار النوم الأزلى ..

********************
- الله عليك يا سيادة محافظ سوهاج يا اللى ما أعرفش اٍسمك و الله بس الله ينور عليك و على محافظتك الجميله النظيفه المنظمه بدقه متناهيه و اللى بتبدو كلؤلؤه مضيئه تسلب الأبصار على شاطىء النيل اللى لم أر لجماله مثيلا مثلما هو فى محافظة سوهاج ..
لما وصلت سوهاج كانت الساعه تقترب من 3 الفجر .. لفت نظرى بشده جمال الاٍضاءه اللى بتنير ميداينها و شوارعها اللى بتبرق من النظافه أصلا !! اٍضاءه جميله شبيهه باٍضاءة اللمبات الموفره بتنير فعلا ظلام الليل و تختلف تماما عن اٍضاءة شوارع القاهره البرتقاليه الشاهبه الباهته الحزينه الكئيبه اللى عامله زى اٍضاءة الحراميه اللى مجتمعين تحتها بيخططوا لسريقه ..
بصوا على الصوره دى كده :
يمكن الصوره مش واضحه أوى لكنها بتبين على كل حال نوعية الاٍضاءه اللى أقصدها ..
الصوره دى متاخده من شباك غرفتى على الفندق العائم الأعجوبه سوبك اللى كان راسى قدام شرطة المسطحات المائيه على الضفه الشرقيه للنيل ..
الفندق طبعا 5 نجوم و غايه فى الجمال و النظافه .. و كل العاملين عليه من أهل الأقصر و أسوان و مؤدبين لدرجه تغيظ و تفرس .. و لطاف و اٍبتسامتهم ودوده و مشرقه خاصة أن كلهم بيمتازوا بأسنان بيضاء شديدة اللمعه و وجوه سمراء شديدة التسامح و الطيبه ..
الحقيقه أشعرونى من الوهله الأولى أنى فى بيتى و ليس فى فندق و ده معناه فى رأيى أنهم نجحوا فى اٍختبار الاٍنطباع الأول لأنى بطبعى لا أتآلف مع المكان الغريب للوهله الأولى و لكن أتآلف مع الناس بمنتهى البساطه ..
فى غرفه 305 فى الدور التالت من المركب لاقيت فى اٍستقبالى طبق فاكهه رائع الحسن :) تحيه من اٍدارة الفندق .. و ماله حد يكره ؟؟ و كمان وردتين بلدى واحده حمرا و واحده بيضا :
الغرفه برضو شديدة النظافه و الأناقه و فيها حمامين و جميع وسائل الرفاهيه و الترفيه و مجموعه كبيره من النوافذ الزجاجيه الكبيرة الحجم غير قابله للفتح بتتيح بانوراما رائعه لسطح النيل و مغطاه بستائر ثقيله ذات ذوق رفيع ..
و آدى صورة السرير السوبر كنج سايز الموجود زيه فى كل الغرف :


ربكم و الحق أنا ما صدقت حطيت جسمى على السرير و رحت فى سابع نومه و لا أهل الكهف من تعب رحلة الشقاء و الضنا فى قطار تكفير الذنوب لمدة 7 ساعات متواصله و الشهير بقطار النوم و ماصحيتش غير الساعه 11 صباحا و كانت المركب اللى هى الفندق سوبك لاتزال راسيه على الشط فى سوهاج و بتستعد للاٍبحار جنوبا فى اٍتجاه قرية العيساويه على مسافة اٍبحار ساعه حيث سيتم تصوير مشاهد مسلسل الرحايه بطولة الفنان الأستاذ نور الشريف و الفنانه القديره سوسن بدر اللى كانت موجوده بالفعل على المركب ضمن طاقم العمل و اٍخراج الأستاذ حسنى صالح و تأليف الأستاذ عبد الرحيم اللى هو أصلا من أهالى قرية العيساويه ..
بعد الاٍفطار و الذى منه فى المطعم بالدور الثانى و بالمناسبه ماشفتش هذا الكم المتنوع من أصناف الأطعمه اللى بتصلح للاٍفطار مثلما شاهدت فى هذا المطعم اللى بيبرق من النظافه كعروسه ليلة حنتها .. و الحق يقال اٍن الصديق العزيز الحاج محمد الجابرى منتج هذا المسلسل لم يبخل أبدا فى الاٍنفاق على العمل و على توفير كل سبل الراحه و الرفاهيه لكل العاملين بالمسلسل و ربما يرجع هذا لحرصه الشديد على أن يكون العاملين معه فى حاله نفسيه جيده حتى ينجزوا عملا جيدا و دى وجهة نظر تجاريه بحته بس الغالب فى ظنى أن ده بيرجع لطبيعة عائلة الجابريه الشهيره بشدة كرمهم و اٍحتفائهم بضيوفهم ..
لاحظت وجود حركه و نشاط دبت فجأه فى السفينه و علمت اٍن الاٍستعدادت تجرى على قدم و ساق تأهبا للاٍبحار فصعدت مره أخرى للطابق التالت حيث يوجد حمام السباحه فى الهواء الطلق و حيث أنتشر على السطح عدد كبير من العاملين بالمسلسل لمشاهدة لحظة الاٍبحار ..
حوالى 10 دقائق و بدأت أصوات المواتير العملاقه فى الدوران و بدأت المركب تبتعد بهدوء و تأنى عن الشاطىء و أخدت وضعها الطبيعى تقريبا فى منتصف النهر و بدت كجبل مهيب عملاق يتحرك فى زهو ..
و آدى كليب للحظات مغادرة شاطىء سوهاج متوجهين جنوبا للعيساويه :

أبحرت المركب لمدة حوالى ساعه .. و طوال هذه المده كان المشهد على ضفتى النيل شىء بجد رائع و تعجز الكلمات عن وصفه .. بجد صعيد مصر ده موضوع كبير أوى و مش بس مجرد جبال وعره و كهوف تأوى المطاريد و مزارع قصب بيستخبى فيها الخارجون على القانون كما تصوره الأعمال الفنيه اللى بتعرض فى وسائل الاٍعلام الهبله اللى حقيقى شوهت الصوره الحقيقيه لصعيد مصر الرائع المبهر ..
بصوا كده على الكليب ده .. ده نجع قبل العيساويه بحوالى ربع ساعه .. صحيح اٍسمه مش عاطفى أوى و لا يتناسب اٍطلاقا مع جماله لكن نمشيها يعنى .. المنطقه الساحره دى اٍسمها نجع الطين ..
بعد ساعة اٍبحار بالتمام و الكمال لاحظت فيها مدى دقة قائد المركب العملاقه من خلال تفاديه بحرفنه شديده لمناطق بعينها فى النيل و الاٍبتعاد تماما عن مناطق أخرى بل و الاٍقتراب أحيانا بشده من الشاطىء لاحت قرية العيساويه على الضفه الشرقيه للنيل يعنى كانت على الجهه اليسرى للمركب ..
قريه صغيره للغايه تلوح مبانيها من بعيد و لفت نظرى وجود بعض المنازل المتعددة الطوابق المبنيه بالخرسانه و على أسطحها أطباق الدش و لكن تبدو غير متناسقه و هى تبرز وسط المنازل التقليديه فى الصعيد ذات الطابق الواحد أو على الأكثر طابقين ..
بدأ الأهالى فى التجمع على الشاطىء لما لاحظوا اٍقتراب المركب من شاطىء قريتهم و تبينت بعد كده أنه ده كان حدثا جليلا فى تاريخ القريه الهادئه لأنهم لم يتعودوا اٍلا على الفرجه على مثل هذه الفنادق العائمه فى طريقها من و اٍلى الأقصر و أسوان من بعيد لبعيد أثناء اٍبحارها لأنه لا يوجد سبب لرسو أى مركب سياحيه على شاطىء العيساويه ..
لما أقتربت المركب جدا من الشاطىء و بدأ البحاره فى القفز للأرض لتجهيز و دق العمدان الفولاذيه اللى حتتربط فيها المركب لفت نظرى وجود السلاح الآلى مع الرجال فى الشارع الموازى للنيل و هم يسيرون كده فى وضح النهار !!! و طبعا أكيد سأفترض أنهم من رجال الأمن لأنى لا أتصور أن ظاهرة حمل السلاح الآلى فى وضح النهار بالصعيد لا تزال موجوده !! أتفرجوا على الكليب ده كده :

و طبعا فى زمن وجيز أتلموا عيال البلد كلهم و عدد غفير من الأهالى يتفرجوا على المركب و يرحبوا بينا بالتهليل و المشاوره .. و ياسمين المسئوله عن الميكنج بتاع المسلسل ما أعرفش و الله جابت منين زماره حمرا من اللى بيستعملوها فى الاٍستاد و بدأت تزمر بيها و العيال على الشط هاتك يا زيطه :)) لحد ما قبطان المركب أشتكى من الدوشه و قال أنه مش عارف يركز علشان يركن المركب خاصة أن الشاطىء غير معد لرسو المراكب .. و كمان مش قادر يسمع تعليمات المساعدين اللى بيوجههوه من على الشط .. لكن على مين ؟؟!! الدوشه كل شويه فى تصاعد مستمر .. بصوا :

الطريف بقى فى الموضوع ده كله أنه كان فيه بنتين بيغسلوا الحلل و المواعين بتاعتهم فى النيل فى نفس المكان اللى المركب بترسو فيه و البنتين الحقيقه لم يهتموا أبدا بما يحدث من حولهم و أستمروا فى غسيل مواعينهم و لكن لما أقتربت منهم المركب جدا يبدوا أنهم أتخضوا من ضخامتها و بدأوا فى لم الحلل بسرعه و نقلها لمكان تانى و أستمروا فى عملهم برضو :) :
و بعد جهد جهيد من القبطان تمكن من الرسو أخيرا على شاطىء قرية العيساويه الغير معد أصلا لرسو المراكب .. و لكن ده الحقيقه مش غريب على الريس على قبطان المركب سوبك اللى قضى من عمره 45 سنه يبحر فى نهر النيل من أوله لآخره حتى حفظ كل شبر فيه .. و اللى حكى لى عن أسرار الاٍبحار فى نهر النيل الرائع و ده حيكون موضوع البوست القادم باٍذن الله ..
لكم كل الشكر و التحيه ..

هناك 19 تعليقًا:

شمس النهار يقول...

الحقيقه اسلوبك في الكتابه مشوق جدا
والتصوير اكتر من رائع

تصدق انا مااتصدمتش خالص من موضوع قطار النوم ده

لما كنا رايحين الاقصر واسوان انا والبنات وعرفت ان الرحله بقطار النوم قلت بلاش كان عندي احساس انه مشروع فاشل

صحيح الرحله اتلغت
بس انت كده ايدت احساسي بالموضوع

ومستنين باقي البوستات :)

عاشقة الأحزان يقول...

السلام عليكم
أستاذ عمرو
بجد أنت هايل قووى
ربنا يكرمك يارب ويوفقك
وبجد رحله ممتعه
التصوير روعه
والكتابه روعه
ربنا يسعدك
ويوفقك
إيناس

MǿиY El-Shreef يقول...

جمييييييييييل اوي ياباشمهندس

والله العظيم انا فرحت اوي انك هتغير الصورة الي مرسومه للصعيد عند الناس

وسوهاج دي تحففففففه وكان نفسي توصل لحد اسوان دي جميله اوي بردوا

الفيديوهات عجبوي والبنات الي بتغسل بالذات :))

وبالنسبه للسلاح وكده ف العزبوالنجوع والحتت دي لسه بيعملوا كده فعلا :))

بجد نورت الصعيد ياباشمهندس ومستنيين الباقي :)

عاشقه وغلبانه يقول...

انا محتاجه رحله زي دي
وجوه جديده
اسلوب حياه جديد
مناظر مختلفه

احساس تاني

اكيد نفسيتك اتغيرت بعد الرحله دي..


انت كنت هناك ليه بقي
سؤال فضولي..(((

ايوشة يقول...

الله بموووووت فى النيل بيقولوا فعلا سوهاج جميلة اوى بس معرفش بئا ساعات بحس ان كل محافظات الصعيد شبه بعض جدا

بسنت صلاح الدين يقول...

بوست هايل كالعاده،التصوير كمان رائع يعنى عيشتنا معاك اللحظه،و بعدين انا ليا الشرف انك تستوحى العنوان من تعليقى، عندك حق قطار النوم عذااب ،يعنى تنام وتقوم وتاكل و تلعب و تتكلم و هو لسه مكمل يعنى من الاخر الوقت مبيضيعش فيه،بس الرحله تستاهل التعب،وعندك حق الناس فى الصعيد طيبين جدا و كرماء الى ابعد الحدود، ده غير المناظر اللى تاخد العقل،مستنيين على احر من الجمر باقى البوستات، و بالتوفيق

أمبارح كان عمرى عشرين يقول...

الله على الرحله الجميله دى
اسلوبك فى الحكى بجد جبار وكمان الصور
تسلم ايدك ومنتظرين الجزء الثانى

خمسة فضفضة يقول...

السلام عليكم ورحمة الله ووبركاته

ماشا ءالله يا استاذ عمرو بث حي بالصوت والصوره كمان ايه الجمال ده

في سؤال بيلح عليّ طيب ليه ماركبتش المركب من القاهره ؟؟
طالما كنت مضايق من قطار النوم
ايه رايك اني رحت رحلة الجامعه و لحد اسوان فيما يسمي بقطار الشباب اللي عباره عن عربات درجه تانيه عادية من اللي كانت كراسيها خشب وكمان الشبابيك مش كلها مقفوله وحوالي يوم وليله علي الوضع ده بس صراحه كانت احسن رحله وكفاية الصحبه الجميله اللي كانت فيها



اما رحلة الاعدادي كان القطار درجه ثانيه مكيفه والكراسي حلوه شويه من اللي بتبقي متبطنه ولونها ازرق دي ( مش عارفه اليومين دول لونها بقي ايه ماعتدش باركب قطورات :)




يلا بقي الحقنا ببقية البوستات خلينا نعيش معاك احلي ايام


سلام

من غير عنـــوان يقول...

رحله من رحلات سندباد التدوين
أمتعتنا معك
تصوير رائع من فنان جميل هو صديقي العزيز

أمنياتي

وياريت الناس تتجه للسياحة الداخليه.. عشان احنا عندنا مناطق جميله.. بس أحنا اللي كسلانين

gogo!sf يقول...

اولا حمدلله على السلامة
بجد الصعيداكثر من رائع سواء فى الاقصر او قنا او اسنا وكل ما نجبل جمال النيل بيظهر اكتر وفعلا الصعيد مظلوم ويارب الاعلام يهتم بية اكتر من كدة

ومستنيين باقى الموضوع

تحياتى
جوجو

احساس طفلة محبة للرومانسية بس واقعية يقول...

مشاء الله مشاء الله بجد يا استاذ عمرو
اية الجمال دا غايب عنا فين
انا بحب الصعيد جدا واهل الصعيد فيهم كل الطيبة والتسامح اكتر مما نتخيل

التصوير والنظافة والبوست والرحلة كلها شكلها كانت تجنن حمد لله على سلامتك
ومتابعين معاك ان شاء الله

تقبل مرورى

mahasen saber يقول...

اول مره اشوف واعرف ان الصعيد يالجمال والروعه دى

بس اعرف كويس ان الصعايده طول عمرهم راقيين ومحترميين وكرمهم ملوش حد

norahaty يقول...

السلام عليكم ورحمة
الله تعالى وبركاته
ومليون حمدلله على السلامة
نخلى التعليق ده لحده كفاية
الترحيب بحضرتك ورجوعك بالسلامة.

norahaty يقول...

تانى تعليق وبعد اذنك
استاذ عمرو ما شاهدته
انت على شط نيلنا الخالد
يمثل مصرنا الان بمعنى:
قمة التناقضات!!!!
واحد ماسك الموبايل بيتكلم فيه
وعلى الشط اللى قاعدة تغسل الحلل!
واخرى تركب الحمار وعليه الاحمال
ورابع يحمل السلاح الآلى جهاراً
وخامساً وما تؤاخذنى(العمارات)
فى خلفية الزرع والنخل والبيوت
الطينية على النيل مباشرة!
وأخيرا كمان ومعلش المسئولة
اللى ماسكة الزمارة
والقبطان بيرجوها
الا تفعل ومع ذلك
فعلت لماذااستاذنا؟
وبعد كده نلوم الحكومة
على كل شىء!!!!.

norahaty يقول...

استاذ عمروا انا ماتكلمت
على القمامة اللى على النيل
مين اللى جابها :الناس طبعاً اللى
منهم برضة اللى عمالة تغسل وتدعك
فى الحلل !طيب اشمعنى عمالة تنضف بيتها وأشيائها ولا تعير المكان اللى حواليها
اى اهتمام؟دى جزء من مشكلتنا استاذنا !

norahaty يقول...

سؤال قبل الاخير
مش كان فيه مسلسل قديم
برضة بأسم الرحايا :يحيى شاهين
وعزيزة راشد(مش متأكدة اوىمنها )بس اللى متأكده منه يحيى شاهين؟

norahaty يقول...

السؤال الاخير بقى :):):)
معلش عشمانين فى الله ثم حضرتك
هل ممكن ابقى انزل الكليبات دى
من اليوتيويب واعمل عليها تدوينة
بكل الكلام اللى قلته لحضرتك ده؟

صبرني يارب يقول...

اااااااااااه كويس انك قلتلي على موضوع قطار النوم ده

السنه الى فاتت قاااااال كنا طالعين رحله اقصر واسوان وقلت بالقطار تبقى طويله وصعبه طب ما تشوفلنا الكباين يا جماعه

منظمين الرحله قالوا لا كلنا طالعين فى قطر واحد

ولغينا الفكره

بس تصورك تمام التمام يا استاذنا

وانا قاعده اهو متغاظه

قصدي مستنيه باقي الاحداث

وولو في فيديوهات تانيه ابقى صورلنا مزز عشان بس القاعده تبقى طريه وكده
ههههههههههههههههه


ممكن يااستاذ عمرو تبقى تعرفني على دعاك للتصوير عشان ابقى اخليه يدعوني ؟
ايوه ما الواحد عنده 3 طلقات هانعمل بيهم ايه
ههههههههههههههههههههههه

تحياتي لك

صبرني يارب يقول...

يا لهوي بعد ما علقت نص متر كتابه كده مش عارفه حصل ايه راح ولا لا انت عامل موديريشن فنقول من الاول


كويس انك قلتلى على قطار النوم السنه الى فاتت كانا المفروض طالعين الاقص واسوان وانا قااال ايه قلتلهم يا كباين خاص يا بلااااااااش المنظمين للرحله قالوا لا احنا طالعين فى قطر واحد وكده يعنى

فانا قلت لا الطريق هايبقى طويل الحمد لله اتغلت الفكره من اولها

والتصوير ميه ميه
والسرد طبعا كالعاده رائع

بس اعمل حسابك بعد كده تبقى تصورلنا مزز عشان يطروا الفيديو شويه
ههههههههههههههههههه

وانا قاعده اهو متغاظه لا قصدي مستنيه باقي الاحداث

وابقى عرفني والنبى يا استاذ عمرو على الى دعاك للتصوير عشان المره الجايه يدعوني انا

ايوه ما الواحد عنده 3 طلقات هانعمل بيهم ايه

هههههههههههههههههههههه

وبعدين انت بتهدي النفوس على طول وتروح تقول لشمس انى باشتكى منها
ماشي ماشي
هههههههههههههههههه
هوانا اشتكيييييت انا عيط بس هههههههههههههه

تحياتي لحضرتك يافندم