الأحد، 17 مايو 2009

من الصعيد الجوانى .. عيد ميلاد نور الشريف ..

أسعد الله صباحكم بكل خير أعزائى المدونات و المدونين ..
لما أنتهت زيارتى للدير الأبيض على خير - زى ما قلت لكم فى البوست اللى فات - كنا بنصارع الوقت للوصول للمركب سوبك الراسيه على ساحل نجع العيساويه و كلى أمل فى اللحاق بالحفل اللى كان مقرر اٍقامته بمناسبة وصول الأستاذ نور الشريف فى أول يوم له لبدء التصوير و كمان بمناسبة عيد ميلاده اللى كان أحتفلت به معظم الفضائيات قبل هذا الحفل بكام يوم ..
لما وصلت المركب قبل الغروب بحوالى نص ساعه عرفت أن الأستاذ نور و مساعدينه لسه ما وصلوش و أنهم فى الطريق و حيوصلوا كمان ساعه اٍلا ربع علما أنه فضل الحضور لنجع العيساويه بالسياره و مش بالقطار ( يا بخته ) و مش بالطائره اللى لازم تنزل اٍما فى مطار أسيوط أو مطار الأقصر اللى بينهم و بين المركب حوالى ساعه و نص بالعربيه ..
قلت حلو أوى ..
فرصه الواحد يستحمى و يزيل شبرين التراب و العفره اللى لزقوا على جتتى من رحلة النهارده و يتكولن و يلبس اللى ما تلبسش علشان ده برضو عيد ميلاد الأستاذ نور يعنى مش أى كلام :)
أنجزت المهمه .. و طلعت على سطح المركب أتأمل الشمس و قد بدأت فى المغيب خلف الضفه الغربيه للنيل .. و كان هذا المشهد الساحر :
بعدها بدقائق حسيت بحركه غير عاديه على المركب و ناس طالعه و ناس نازله و حركة نشاط كده .. فتوقعت أن الأستاذ نور قد وصل .. و بالفعل لاحت سياره ميكروباص تابعه لشركة سياحه و وقفت أمام المدخل .. و أطلق الريس على قبطان المركب الأبواق بصوت عالى جدا شق الهدوء اللى تعودنا عليه كتحيه لوصول الأستاذ نور الشريف ..
و لكن هيهات !!
علينا واحد :)
الأستاذ نور ما نزلش من السياره اللى كانت بتحمل مساعديه و عدد كبير جدا من الحقائب الضخمه اللى بتحوى ملابسه و لوازم التصوير .. و سمعت الريس على بيزعق بصوت جهورى للى قال له اٍن الأستاذ وصل و خلاه يطلق الأبواق أونطه :)
- أمال فين الأستاذ ؟؟!!
سألت واحد من مساعديه ..
و علمت أن الحاج سيف كبير نجع العيساويه قام رجالته باْيقاف السياره اللى كان بيستقلها الأستاذ نور و أصر على دعوته لبيته اللى بيقع على مدخل النجع للقيام بواجب الضيافه تجاهه قبل أن يدخل القريه على عادة أهل الصعيد شديدى الكرم و اللى لا ينافسهم فى كرمهم سوى نحن و أعوذ بالله من قولة نحن معشر الشراقوه .. و أيضا أرسل من يدعو كل الطاقم الأول من العاملين بالمسلسل بغض النظر عن السبع ساعات اللى قضاها الأستاذ نور فى رحلته من القاهره للنجع .. و طبعا يعنى لا يجوز رفض أو الاٍعتذار عن هذه الدعوه فى الصعيد و اٍلا توبجا عيبه و شينه و الله وحده يعلم بعواقب الأمور :)
نص ساعه كده كمان و وصلت السياره اللى بتقل الأستاذ نور للمركب و المره دى بجد يعنى :) و أنطلقت مره تانيه الأبواق لتحية الأستاذ :


وصول الأستاذ نور للمركب



و هو بيدخل المركب

طبعا الاٍستقبال داخل المركب بقى كان شىء خرافى من كل العاملين بالمسلسل من فنانين و فنيين و اللى بتربطهم بالأستاذ نور صلات وثيقه لأنه محبوب من الجميع زى ما عرفت بعد كده لتواضعه الشديد و اٍلتزامه بمواعيد العمل و الراحه و حرصه الفائق على أن تسود روح المحبه فى أى عمل بيشارك فيه ..

كمان كان فى اٍستقباله على الباب الداخلى للمركب الريس على القبطان و مساعدوه و أيضا كل طاقم العاملين على الباخره و أشتغل التصوير بكاميرات الموبايل و الاٍبتسامه لم تفارق وجه الأستاذ نور أبدا رغم أنى رأيت الاٍجهاد الشديد واضح على وجهه لأنه ما لحقش يرتاح بعد وصوله من القاهره ..

الصدفه البحته جعلت جناح الأستاذ المخصص له و هو رقم 306 يقع مباشرة أمام غرفتى رقم 305 و لا يفصل بينهما سوى خطوتين هم عرض الممر اللى بتقع على جانبيه الغرف و الأجنحه ..

الحقيقه يا جماعه مش عاوز أتكلم كتير عن نور الشريف الفنان لأنه حيكون كلام متكرر لا فائده منه .. الخلاصه أنه فنان ملتزم جدا و شديد الحساسيه تجاه الأعمال المسيئه لمسيرة الفنان .. لا عمرنا شفناه بيعمل عمل تافه الغرض منه اٍضحاك المتفرج و خلاص .. و لا عمرنا سمعناه بيتكلم كلام فارغ الغرض منه التقرب لأولى الأمور حتى لو كان على حساب تاريخه الفنى ..



أنا اللى على اليمين برضو علشان ما تتلخبطوش يعنى

الصوره دى كانت أثناء تناول العشاء .. و الأستاذ نور رفض كل أنواع الطعام رغم فخامتها لما عرف أن الشيف عامل كشرى و طلب يجيبوا له طبق كشرى محبش أكل منه و أبدى اٍعجابه بيه .. بصراحه أنا بصيت لكمية اللحوم اللى قدامى و أنكسفت على دمى !!

لما سألته ذات مره و اٍحنا قاعدين بالليل على سطح المركب أيه أقرب عمل فنى لنفسك يا أستاذ نور ؟؟

قال بدون تردد :

- ناجى العلى .. فيلم ناجى العلى ..

و ألتفت خلفه يتأمل صفحة النيل و قد اٍنعكس عليها وجه القمر ..

السياسه و واقع الحال العربى .. شيئان هما محور أحاديث الأستاذ بعيدا عن اللوكيشن .. و الحق أن آراءه التى يعلنها فى وسائل الاٍعلام هى هى نفسها التى سمعتها منه لم يغير منها حرفا و لم يبدل فيها على عكس الكثيرين من المشاهير الذين جالستهم و اللى بيبقى كلامهم المعلن غير كلامهم اللى مش معلن :))

نور الشريف قست عليه الحياه قليلا فى طفولته .. القسوه لا تكون دائما عن طريق الماديات لأنه كان من أسره ميسورة الحال .. مثلا هو أكتشف أنه يتيم لما دخل المدرسه و أستغرب فى دهشه طفوليه لما علم أن اٍسم أبوه اللى المفروض يكتبه ملحقا باٍسمه ليس هو اٍسم الرجل اللى كان بيعتقد أنه أبوه و قد ساعدته شقيقته الكبرى على فهم هذا اللغز .. و أزعم أن هذا الموقف قد أثر فى حياته و فى طريقة معاملته لمن هم أقل منه تأثيرا كبيرا ..

نور الشريف اٍنسان متواضع لأقصى درجات التواضع .. لم تبهر أضواء الشهره عينيه .. و لم تنسه المكانه المرموقه التى وصل اٍليها كفنان معدود ضمن أكثر 10 ممثلين فى العالم نجوميه أنه فى النهايه اٍنسان .. اٍنسان يتعامل مع الجميع من هذا المنطلق .. و له تصرف لاحظته و أستغربت له أنه بيقوم و يقف و يبتسم لما حد من المتردوتيلات يضع له المشروب !!

و رغم اٍجهاده الشديد بسبب الرحله التى قام بها من القاهره للعيساويه و برغم الضجه التى حدثت بسبب وصوله للمركب ناهيكم كمان عن أنى ما رحمتوش و هاتك يا كلام و أسئله اٍلا أنه مانسيش يتابع بالموبايلات الأتنين اللى معلقهم فى رقبته آخر تطورات الموقف العائلى بين مديرة منزله و بين زوجها اللى كان بينهم خلاف و كان بيطمئن أن الأمور بينهم هدأت و المياه عادت لمساراتها الطبيعيه !!

الأستاذ نور له طبيعه خاصه جدا قد تكون موجوده لدى أغلب الفنانين الكبار و له طقوس يعرفها كل من يشاركه العمل قبل أن يبدأ التصوير و هى تبدأ مباشرة عقب اٍنتهاءه من عمل المكياج و لبس الملابس الخاصه بالدور .. ينزوى لوحده و مش شرط يكون بعيد عن الموجودين .. يصمت تماما لمده قد تطول أو تقصر على حسب موده .. ينفصل نفسيا عن المكان و الزمان و شيئا فشيئا تتغير ملامح وجهه .. يتغير صوته .. تتغير مشيته .. يخرج من شخصية نور الشريف تماما و يدخل فى اٍهاب الشخصيه اللى بيجسدها .. و لما بيتم له ما يريد ممكن بقى يتبادل الحديث مع الآخرين لكن قبل كده ممنوع التحدث معه اٍطلاقا ..

أيه ده ؟؟

أنا سرحت كده ليه ؟؟!!

معلش :)

نرجع تانى لموضوع البوست و هو حفلة عيد الميلاد !!

دى صورة البهو الرئيسى للفندق العائم سوبك قبل الحفله .. لاحظوا الهدوء اللى فيها :


لما نزلنا البهو الجميل ده كان المكان ممتلىء عن آخره بطاقم العمل .. و فجأه اٍنفتح باب المطعم و خرج منه ما لم أتوقعه أبدا !! و أصيب الأستاذ نور بالدهشه الشديييييييده .. بصوا :




زى ما شفتوا كده :))
فوجئنا جميعا بتورته عملاقه و بكل العاملين بمطبخ و مطعم و بار الباخره (على فكره البار لايقدم خمور و لكن شاى و نيسكافيه و حاجات من دى ) و على رأسهم كبير الشيفات محمود اللى شعره أبيض رابط منديل أحمر على رقبته (لاحظوا رشاقته و لياقته العاليه) و هم شايلين الدفوف النوبيه و هاتك يا مغنى و رقص .. ما هم أصلا كلهم من النوبه و على حسب ما قالوا لى اٍن النوبيين بيعبروا عن كل شىء فى حياتهم بالرقص و الغناء حتى فى قمة أحزانهم برضو لا يتخلوا أبدا عن شغفهم بالتعبير رقصا و غناءا عما يدور بداخلهم ..
و شاركهم الأستاذ نور الرقص النوبى لبعض الوقت و لاحظوا ملامح التعب اللى على وجهه ..
ثم كانت لحظة طفى الشموع و اللى شاركت فيها الفنانه سوسن بدر اللى علمت منها اٍن لها جذور نوبيه هى كمان !! و بالمناسبه هى بتؤدى فى المسلسل ده دور شخصية سيده صعيديه قاتله و مخيفه شعرت بقشعريره فى جسدى و هى تؤدى مشهدا كانت تتشمم فيه طفلا كالذئبه المفترسه قبل أن تذبحه !! بصوا الصوره دى :


و برضو الجماعه ماسابوش الأستاذ نور يستريح و أصروا على مشاركتهم رقصهم و غناءهم ..




بالمناسبه بقى الرتم النوبى ده مصطلح موسيقيا مش صح لأنه الحقيقه هو اٍسمه الاٍيقاع الخماسى اللى هو الاٍيقاع الاٍفريقى و اللى كان بيستعملوه المصريين القدماء فى غناءهم و فى ترانيمهم و هو اٍيقاع ساحر شديد الحيويه يخليك غصب عنك تتمايل معاه .. و النوبيين حافظوا عليه على مدى آلاف السنين و لم يتأثروا بأى نوع من الاٍيقاعات الموسيقيه الأخرى ..

و اٍنسحب الأستاذ بأعجوبه و جلس ليستريح و كان فى ضيافته بقى المره دى الحاج سيف كبير نجع العيساويه اللى وصل مع مجموعه كبيره من رجاله و معاه اٍبنه طفل صغير لكنه بيتصرف كالرجال الكبار و كان لابس بدله و بابيون .. و الحاج سيف أهدى الأستاذ نور هديه قيمه جدا جدا بمناسبة عيد ميلاده عباره عن نموذج موغل فى القدم لرحايه فى علبه قطيفه حمراء تماشيا مع اٍسم المسلسل اللى هو الرحايه برضو .. الحاج سيف اللى لابس جلابيه بيضاء :


و فضلوا برضو الجماعه يرقصوا و زى ما يكونوا أما صدقوا سمعوا دق الدفوف علشان يرقصوا و ما شعرتش أنهم حسوا بالتعب :)فى الكليب ده حتلاقوا الظابط الاٍدارى للباخره اللى لابس قميص أبيض و كرافته بيرقص مع البارمان شريف اللى هو الشاب اللى لابس صديرى أحمر و اٍذ فجأتن و على حين بغته بيروح ناطط وسطهم المتردوتيل نجيب اللى لابس صديرى أسود زى ما يكون ماهنش عليه يسيب فرصه و ما يرقصش فيها !!

لاحظوا كمان شخص اٍسمه أنور لابس جلابيه و متحزم و بيرقص معاهم علشان ده له حكايه رهيبه و كانت حتحصل له مصيبه كبيره لولا لطف الله و حأبقى أحكيهالكم فى بوست تانى :)



و لاقيت موبايلى بيرن و كانت البرنسيس شمس النهار .. رديت و طبعا كانت الدوشه عاليه جدا جدا و مش سامعين بعض .. لاقيتها بتقولى :

- أنا مش سمعاك خالص و واضح أنك فى مولد .. هو فيه مولد فى البلد اللى أنت فيها ؟؟

قلت لها :

-أيوه .. بنحتفل بمولد الأستاذ نور الشريف :))

ردت فى براءه :

- طيب لما ترجع المركب اٍبقى كلمنى !!

و دى كانت اللحظات الأخيره فى الاٍحتفال قبل ما الأستاذ يستأذن من الجميع و يصعد لجناحه الساعه 11 بالظبط زى ما هو متعود لأنه بينام 11 و نص بالثانيه مهما كانت الظروف ليستعد لأول يوم من الأشغال الشاقه لتصوير أول مشاهد خارجيه له فى المسلسل و اللى كانت فى منطقه اٍسمها الهدار حاجه كده شبيهه بالشلالات :



شويتين كده و أنا كمان طلعت على غرفتى بعد ما هبدت حتة تورته قدددددددددددددددددددددد كدهوه (قد عقلة الصباع و الله) اٍستعدادا لرحلتى تانى يوم لزيارة مدينة أخميم الفرعونيه الصميمه حيث وقعت فى غرام بنوته صعيديه بنت ناس أوى أوى سحرتنى و سلبت عقلى بجمالها و شبابها و مياصتها !! هى صحيح فى سن عيالى بس أعمل أيه ؟؟ أصل الهوى غلاب !!

و ده بقى موضوع البوست القادم باٍذن الله .. فترقبونا :)

لكم كل الشكر و التحيه ..


هناك 35 تعليقًا:

شمس النهار يقول...

:)
بجد حفله لطيفه جدا

واسلوبك في السرد مع الصور والفديوهات
خلاني احس ان انا كنت معاكم

وصورة الغروب الجميله دي انا برضه هقتبسها واحطها عندي في المدونه :)

ماعندكش فكره لما طلبتك علي التليفون الصوت كان عامل ازاي

عجبني البوست جدا
كل بوست احلا من اللي قبله

المفروض كل شويه تسافر حته عشان احنا نستمتع بالسرد الجميل ده
ربنا يبارك لك

MaNoO يقول...

مش عارف ارد بقى اعمل ايه انا عايز اروحا الصعيد ياناس بلدما حلوة أوى واحنا منعرفش عنها حاجة البوست حلو جدا وأستاذ نور منقدرش نتكلم عنه كلنا عارفين قيمته طريقة السرد رائعة ياأستاذ عمرو ومن احلى الحاجات صورة الغروب فعلا خيالية وكمان شوية الرقص دول نفسى فيهم يخرجوا الطافة اللى عندنا دى
من بوست لبوست وكل يوم فى حاجة أحلى من التانية منتظرين غرام حضرتك مع الصعيدية

بسنت صلاح الدين يقول...

بوست رائع و خليتنا نحضر معاك عيد ميلاد الفنان العظيم نور الشريف و نشوف الرقص و الجو النوبى الرائع ده،مستنيييييييين البنوته على نار....

كيــــــــــــارا يقول...

اسلوبك جميل اوي

بجد كانت حفله جميله اوي واستمتعت بيها

همسه يقول...

مش غريب عليك دقه الوصف

ورقه الكلمات
والسرد بحرفه وفن
واحساس
كلماتك
همسات
من قلب
لقلوب تعشق الهمس وتعيش فى خيال سردك لليوميات
وللرحلات
بوسيت
عرفنا على صعيد مصر الجميل
رسمته وصورته لنا بشكل رائع
بقلب وريشه فنان
نور الشريف
فنا عظيما وكل سنه وهو بخير وصحه وعقبال مليون سنه

والجميله الجدعه بنت البلد سوسن بدر
اللتى اعشقها
وخصوصا دورها فى فيلم شمس الزناتى
تحفه قمه فى الجمال والحنان
ولا استطيع ان اتصورها شريره
كما قلت وزكرت عن دورها القادم
والصور تحفه
انت فعلا عاشق للجمال والكلمه والغروب
كما عشقت انا
البدر فى مدوناتك
تحياتى

صبرني يارب يقول...

سيدى يا سيدى

طب ليه اد عقلة الاصبع طيب

طيب هاتي الباقي وانا اكله فى الفري
هههههههههههه

تسلم اديك بجد البوست رااااائع كالعاده

وبعدين بلاش التشويق ده

وزي ما قلتلك بقى تعرفني على الى عزمك هناك

mostafa rayan يقول...

مبسوط انك انبسطت هناك
ربنا يسعد اوقاتك

عاشقة الأحزان يقول...

السلام عليكم
أستاذ عمرو
الله عليك بجد حضرتك هايل قووى
انك بتنقل لنا الاحداث من واقع




هههههههههههههه
ماليش دعوه بقا عاوزين زياره زى دى
ولا الحاجات الحلوه دى عشانك بس
ربنا يروق بالك
بجد الصور تحفه والفيديوهات جميله موووت
وعشت بخيالى مع الاحداث
الله عليك يامبدع
منتظرين الجديد ان شاء الله
ربنا يوفقك يارب
تحياتى
انوسه

حلـم،، يقول...

احترامي سيدي على ماطرحت هنا من مواضيع شيقة

شرفني هنا أن أزورك وانشاءالله سنتواصل احترامي

dr.lecter يقول...

يابختك ياستاذ عمرو عيشتنا كل لحظه معاك

همس الاحباب يقول...

طبعا الاستاذ عمرو سرده حلو وجميل
والحفلة كانت جميلة
بس عامل المكان له طابع مميز
والمكان ساحر بالفعل
كده ولا ايه رايك يا استاذ عمرو
سوهاج بلد المووايل
ههههههه
من حقى افتخر ببلدى
رحلة جميلة واسلوبك رائع استاذى العزيز
تحياتى وفى انتظار المزيد وباقى الرحلة

فتاه من الصعيد يقول...

كل سنه وهو طيب
بس وصف حضرتك دقيق جدا كاننا حاضرين
دمت بخير...تقبل مرورى

خمسة فضفضة يقول...

السلام عليكم ورحمة الله وبركاته

ياسلام ياسلام
ايوه الحفلات الحلوه دي ولا بلاش

وايه الوصف التفصيلي الحميل للمباراه اقصد للحفله عيون الايه ار تي يا خواتي هههههههههههه

لا بجد وصف وفيديوهات روعه اوي حسستني والله اني قاعده باتفرج علي ايه ار تي
متهيالي نورالشريف بعد الحفله دي نام ماصحيش الا العصر من كتر التعب والرقص والدوشه
الله يكون فعونه وفعونكم كلكم انكم كان لازم تصحوا في معاد محدد عشان التصوير

يلا احكيلنا الباقي حاكم انا مستمتعه جدا بالحكايات الحلوة دي :)

سلام

فشكووول يقول...

ازيك يا استاذ عمرو
تصور نور الشريف لو لم يكن نجما فى عالم الفن كان سيكون نجما فى عالم الكره
اسمه اللاعب محمد جابر لاعب ناددى الزمالك
اصله مسعود ... ربنا يديه على قد نيته ويجينا احنا كمان
تحياتى

عاشقه وغلبانه يقول...

حفله جميله اوي
انا بحب الهيصه دي جدا
هههههههههههههههههه

مستنين بوست الغرام بقي

عمرو يقول...

شمس النهار
مساء الخير يا برنسيس :)
أشكرك يا عزيزتى على الاٍطراء و أرجو أنى أكون فعلا جدير بده ..
لمتشكر لزيارتك و تعليقك .. دمتى بكل خير ..

عمرو يقول...

مانو
فعلا بلدنا جميله جدا جدا بس حقيقى السفر فيها بيحتاج لأشياء كثيره طبعا من أهمها توافر الماده لأن السفر بالنسبه للمصرى داخل مصر مكلف جدا لكن للأجنبى مش مكلف أبدا !!
و دى قضيه كبيره حلأناقشها قريب اٍن شاء الله ..
قصة غرامى بقى مع البنوته الصعيديه فى البوست القادم عن قريب :)
حيعجبك ..
تقبل تحياتى ..

عمرو يقول...

بسنت صلاح الدين
أيوه فعلا كانت حفله لطيفه جدا و اللى حلاها أكتر وجود النوبيين فيها :) و الله ناس طيبين و على طول مبتسمين و متفائلين ..
البنوته الصعيديه دى بقى حكايتها كبيره أوى :)
أهلا و سهلا بيكى ..

عمرو يقول...

كيارا
متشكر جدا ربنا يخليكى ..
شرفتى المدونه و تقبلى تقديرى ..

عمرو يقول...

همسه
يعنى متشكر و الله لاٍطرائك ربنا يخليكى ..
شرفتى المدونه بالزياره و بالتعليق بارك الله فيكى ..
تقبلى تحياتى و تقديرى ..

عمرو يقول...

صبرنى يا رب
قد عقلة الصباع لأنى لو فتحت فى الحلويات مش حيكفينى محل لابوار بذات نفسه و لا عندى فرى بقى و لا غيره :)
متشكر يا أم خالد أن البوست عجبك و اٍن شاء الله تعالى البوست القادم حيعجبك برضو ..
و يا ستى اللى عازمنى ده الحاج محمد الجابرى صديق قديييييييم و من أطيب خلق الله علشان كده مستحملنى :)
لك كل الشكر و التحيه و التقدير ..

عمرو يقول...

مصطفى ريان
عشت يا صديقى ربنا يسعدنا جميعا يا رب بفضله و رضاه عنا ..
لك شكرى للزياره و التعليق :)

عمرو يقول...

عاشقة الأحزان
متشكر جدا أن البوست عجبك ..
يا ستى الرحلات كتيييييييييير بس فين النفس :))
عموما تابعى البوستات الجايه و حتلاقى اٍن شاء الله أحداث و أشياء ما تخطرش على البال و أحلى من البوستات اللى فاتت كمان ..
متشكر ليكى و أهلا و سهلا بيكى ..

عمرو يقول...

حلم
متشكر جدا بارك الله فيك و أهلا و سهلا بيك فى زيارتك الأولى لمدونتى المتواضعه و أرجو أن لا تكون الأخيره اٍن شاء الله ..
لك كل الاٍحترام و التحيه ..

عمرو يقول...

dr.lecter
يا بختى أن البوست عجب القراء الحمد لله :)
متشكر ليك جدا و أهلا و سهلا بيك ..

عمرو يقول...

همس الأحباب
و الله من حقنا كلنا نفتخر بسوهاج .. و جمال سوهاج .. و سحر سوهاج .. و ناس سوهاج ..
الله عليها بلد ..
بجد و الله مش مبالغه أنا زرت مدن كتير كتير كتير جوه مصر و خارج مصر لكن سوهاج لاقيت لها سحر خاص جدا و طبيعه متفرده مالاقيتهاش فى أى مكان تانى ..
هنيالك يا عم أنك عايش قى سةهاج عروسة النيل :))

عمرو يقول...

فتاه من الصعيد
و أنتى طيبه و أهلا و سهلا بيكى :)
مبسوط جدا اٍن البوست عجبك .. تقبلى تحياتى و تقديرى ..

عمرو يقول...

خمسة فضفضه
و عليكم السلام و رحمة الله و بركاته ..
متشكر جدا على الاٍطراء و مبسوط أنك متابعه البوستات :)
و الله نور الشريف كان أول واحد صحى من النوم تانى يوم و أستعد للتصوير قبل أى حد على المركب أمال هو بقى فنان كبير اٍزاى ؟؟
متشكر لزيارتك يا دكتوره و للتعليق و تقبلى تقديرى ..

عمرو يقول...

فشكووول
أهلا بيك يا أستاذنا :)
فعلا نور الشريف كان حيبقى لاعب كره فى الزمالك و أعتقد أن لو كان ده حصل و لو أن كل شىء فى علم علام الغيوب كان برضو حيبقى نجم فى عالم الكره لأنه أصلا اٍنسان ملتزم و محترم و طموح و النجاح يأتى لمن يحترم و يحب عمله أيا ما كان هذا العمل ..
متشكر ليك و أهلا و سهلا ..

عمرو يقول...

عاشقه و غلبانه
و مين ما يحبش الهيصه ؟؟ بس مش على طول يعنى :)
متشكر لزيارتك و للتعليق ..

dreem يقول...

اسلوب جميل ينم عن شخصية اجمل
ربنا يديلك الصحة ويمتعك بحياتك ويبارك لك فيما اعطاك
تحياتى

mahasen saber يقول...

نور الشريف ده رائع وكلامك واليى نقلته اكد كده بالضبط

المفروض نسميك استاذ عمرو بطوطه بعد كده مش عمرو حبشتكانات فلسفيه

احساس طفلة محبة للرومانسية بس واقعية يقول...

احلى حاجة انك بتقولنا كل حاجة
بتعيشنا الجو والتصوير والفيديو
والغروب بجد يجنن

منتظرين منتظرين
ما هو اكيد فى سر للكلام دا :)
لا بجد بلاش تشويق كدا
احنا اصلا نعرف حصل اية بسرعة
الرحلة ممتعة واحنا بنقراء بس
فأكيد كانت رائعة جدا بالنسبالك

انا متابعة ومنتظرة البوست اللى جى
تقبل مرورى

z!zOoOo يقول...

السلام عليكم

فعلا حفله جميله

وناس دمهم زي السكر

والاستاذ نور برضه كان جميل معاهم

ودم حضرتك زي العسل واسلوبك جميل

انا اول مره ادخل هنا

ربنا يسعدك ويلون ايامك

تحياتي

من غير عنـــوان يقول...

كل التحية لسندباد المدونات

اسعد الله أوقاتك