الثلاثاء، 26 مايو، 2009

مصنع الرجال


مساء الخير أعزائى المدونات و المدونين ..

بأستسمحكم أنى حأفصل شويه عن سلسلة بوستات من الصعيد الجوانى و عاوز أتكلم فى موضوع هام و حيوى و لا يحتمل التأجيل خاصة اٍن الأجازه المدرسيه قد بدأت بالفعل ..

دلوقتى يا جماعة الخير حان وقت الاٍهتمام برعاية أولادنا من الناحيه الرياضيه كما راعيناهم دراسيا أثناء الدراسه .. و كما أوصانا بذلك سيدنا الفاروق عمر و هو ليس حديثا نبويا كما نبهنى لذلك الأبن beautiful mind - جزاه الله خيرا - عن السباحه و الرمايه و ركوب الخيل و اللى هى مقوله معجزه بمقاييس الزمان لأن هذه الرياضات الثلاثه بالذات جمعت فى منافعها كل منافع الرياضات على اٍختلافها ..

و أنا عن نفسى الحقيقه و بصراحه لم يهتم أبويا رحمة الله عليه بتنشئتى تنشئه رياضيه فى طفولتى السعيده رغم اٍتساع مداركه الفكريه و كان أقصى اٍهتمامه الرياضى بى أنه أشترى لى بندقيه رش نمره واحد ماركة رمسيس علشان ألسوع بيها الكلاب المكلبظه من بلكونة بيتنا القديم فى العباسيه اللى كانت بتتخذ من سقف عربيته ملاذا آمنا ( الكلب من دول كان ياخد الرشه فى وركه و يبص لى باٍستهزاء و يكمل نوم و الله ) ..

و روحى يا سنين و تعالى يا سنين و مياه كثيره جرت فى نهر الحياه .. ورزقنى الله بالذريه من الأولاد و البنات .. و كانت أول تجربه لى فى الاٍهتمام بالرياضه مع أبنى الكبير .. و اللى حأكيهالكم و اللى أتمنى أن يستفيد منها القراء ..

بدأت التجربه لما لاحظت أن الواد أبنى ده بيميل لحياة الدعه و الخمول خاصة لما بلغ العشرين .. أغلب يومه بيقضيه قدام الأنترنت يشيت مع البنوتات حول العالم و حاطط جنبه لترات البيبسى الساقعه و أكياس الشيبسى و الجيرسى من كل نوع .. و طبعا بقى ليله نهار و نهاره ليل لاٍختلاف فروق التوقيت فى بلاد البنات اللى بيشيت معاهم !! و لما يزهق بقى من الأنترنت يقوم يحضن جيتاره و هاتك يا مزيكا و هو لابس شورت جينز مقطع و تى شيرت مهربد و لا مؤاخذه شبشب بصباع و عامل زى الشحاتين الطلاينه اللى فى ميدان أفينتى .. ناهيكم طبعا عن منظر شعره و ذقنه اللى سايبهم من غير لا حلاقه و لا تهذيب اٍعتقادا منه اٍن الفنان الروش لازم يكون منظره كده ..

ده غير بقى طبعا طريقته فى الكلام مع الكبير و الصغير اللى ماكنتش بتعجبنى أبدا و اللى كان سببها اٍختلال الساعه البيولوجيه بداخله .. و حاجات بقى يعنى تخنق كتير من حاجات الشباب اللى فى السن ده و اللى بالنوعيه دى ..

كان نتيجة ده طبعا أن الوله أبتدا يطلع له كرش من القعده و قلة الحركه و هو فى هذه السن المبكره خاصة أنه ضخم الجسم أصلا بشكل ملحوظ و كان أبعد مشوار يمشيه على رجليه هو مرواحه لبيت مدرس الموسيقى اللى هو أصلا لازق فى بيتنا .. و كان أقصى مجهود يعمله أنه يلعب فى ...... ودنه يعنى ..

طبعا ماكنش عاجبنى حاله .. و ريقى نشف معاه : يا أبنى يا حبيبى روح ألعب شوية رياضه يشدوا جسمك .. قوم يا حبيبى أجرى فى الشارع شويه .. يا عين أبوك حترهرط و تمهمط و مش حينفع تتلم تانى و مش حتلاقى و لا عروسه ترضى بمنظرك ده !!

و الواد ودن من طين و ودن من عجين .. و كان بيهاودنى على قد عقلى و يقولى باٍبتسامه لئيمه :

- أشترك لى يا بابا فى نادى دريم و أنا أروح ..

دريم حته واحده يا وله ؟؟ ما يقدر على القدره اٍلا ربنا يا أبنى .. فرجه قريب ..

ماكنتش عارف بقى أن ربنا سبحانه و تعالى مدبر من عنده تدبيره اٍنما أيه !!!

فى يوم كده رجليا خدتنى عند ميدان الرمايه اللى فى آخر شارع الهرم .. و ألاقيهم معلقين اٍعلان كبير على نادى الرمايه بتاع القوات المسلحه بيعلنوا فيه عن فتح باب القبول للشباب فى مدرسة الصاعقه حتى اٍشراف ظباط متخصصين !!

و من غير ما أفكر و الله لاقيت نفسى داخل الاٍداره و بسأل عن شروط القبول .. و بعتونى مع مجند للرائد أسامه قائد المدرسه الرياضيه .. و هو ظابط صاعقه بكل ما تحمل الكلمه من معنى شكلا و موضوعا .. و الراجل الحقيقه أستقبلنى بود و ترحاب لكن من النوع الميرى .. و أستفسر منى اٍذا كنت من أفراد القوات المسلحه الحاليين أو السابقين فأفهمته أنى لم أنل هذا الشرف من قبل رغم أنى خريج ثانويه عسكريه عريقه ( أيام ما كان الشباب فى عصرنا بيفخروا باٍلتحاقهم بالمدارس الثانويه العسكريه ) ..

و الرائد أسامه بدوره أفهمنى أن المدرسه الرياضيه لها شروط محدده و صعبه لقبول الطالب بها و هى بتؤهل أصلا الشاب للاٍلتحاق بالكليات العسكريه و كمان بتبنى جسده رياضيا و بتخليه قادر على تحمل أشق الظروف و أيضا بتساعده على الثقه بنفسه و بقدراته البدنيه و الذهنيه ..

حلو أوى :)

صبرت و نلت يا أبنى هع هع هع ( ضحكة شماته )

لما روحت البيت ناديت على الوله باٍسم الدلع اللى بيحبه فأتانى مستبشرا بعد ما قلت له : أشتركت لك فى حاجه حلوه أوى يا لولوش :)

سألنى و على وشه اٍبتسامه متفائله :

- خير يا بابا بس أوعى يكون نادى الجولف بتاع دريم لحسن الشمس بقت حاميه :)

قلت له :

- ما تخافش يا حبيبى .. أشتركت لك فى مدرسة الصاعقه :)

سألنى و قد اٍنقلبت سحنته و كأنه غير مصدق لما يسمع :

- مدرسة مين ؟؟!!

- مدرسة الصاعقه يا حبيب أبوك حيث مصنع الرجال و مستودع الأبطال .. و روح يا أبنى قلبى و ربى راضيين عليك ..

طبعا الموضوع بالنسبه له ماكنش سهل لتقبله .. و الكام يوم اللى سبقوا تقدمه للمدرسه ورانى الويل و وريته ظلام الليل لحد ما أقتنع أنه لا فكاك من تنفيذ رغبتى .. و أستعملت حقى كأب له الحق فى أن يكون ديكتاتور رحيم بأولاده لما بيلاقى خطر على مستقبلهم و سلوكياتهم و صحتهم .. و البيت أتقلب مناحه من جميع الأطراف بس و لا همنى :))

شفتوا فيلم عبود على الحدود ؟؟

شفتوا علاء ولى الدين أول ما شاف جنود الصاعقه قال أيه ؟؟ قال : " و لا تحسبن الذين قتلوا فى سبيل الله أمواتا بل أحياءا عند ربهم يرزقون "

أهو الواد أبنى عمل كده .. جات له كرشة نفس و وشه أزرق و ركبه سابت و بقت بتخبط فى بعضها لما أول ما دخلنا المدرسه و أنا ماسكه من أيده و قابلنا فى وشنا عشرات الشباب اللى زى الورد البلدى المزهزه ضخام الأجسام أصحاء البنيه ربنا يحميهم و هم بيجروا فى طابور منتظم بطريقة أفراد الصاعقه و بيصيحوا بصوت واحد بيرج أرجاء الفضاء : صاعقه .. تضحيه .. فداء ..

بصيت على الوله لاقيت فكه التحتانى بيترعش و بيقول لى :

- هى الحرب قامت يا أبويا ؟؟!! أنتم مش عبرتم القناه و خلاص ؟؟!!

- أطمن يا حبيبى أطمن و هو أنا حألاقى صدر حنين عليك يا أبنى أحن من الجيش المصرى :))

و سلمته من أيده للرائد أسامه و وصيته عليه توصيه لوز أوى .. و توقعت أن اللى أكله الوله وز وز حيطلع على جتته بط بط ..

و أجرى يا أيام و تعالى يا أيام .. و روحى يا شهور و تعالى يا شهور .. و تنتهى الدوره على خير ..

دوره بدأها الواد أبنى بأنه كان بيكسل يقوم يطفى جهاز التكييف اللى فى أوضته و أنتهت بأنه أجتاز جميع التدريبات الشاقه الرهيبه اللى فى الكليب اللى فوق ده .. و بعد ما أتفرد جسمه و أتشكل بشكل رجولى خشن لاقيته أنه عشق الحياه العسكريه كأغلب الشباب .. و أتغيرت هيئته هو وزملاء دفعته و بقوا بنى آدمين .. و لاقيت أن أخلاقه تحسنت و تبدلت و أصبح رجل يعتمد عليه بجد .. و موقن أن معايشته لحياة الخشونه جعلته يقلع عن عادات سيئه كثيره بعضها معلن و بعضها غير معلن ..

كان الهدف الأساسى عندى لما ألحقته بمدرسة الصاعقه أنه يلعب رياضه تفيده صحيا و ذهنيا و أن يفرغ طاقته فيما يفيده لكنى وجدت أن الهدف ده جر وراءه ما لا يحصى من الفوائد و الفضل لله أولا و لرجال الجيش ثانيا ..

عاوز أقول أنه حان الوقت بجد للاٍلتفات لصحة عيالنا الجسديه و النفسيه .. صبيان و بنات .. و أن مافيش حجه أبدا لعدم ممارسة الرياضه اللى أبسط أشكالها المشى نص ساعه يوميا و القيام بشوية تمارين خفيفه اٍن شاء الله حتى فى البيت .. لأن ده اللى حيقعد لهم فى كبرهم و لأننا بجد مش عاوزين نكرر أخطاء اللى سبقونا و لم يهتموا بتنشئة عيالهم على حب الرياضه و ده بيؤدى بالتالى لمشاكل صعبه جدا .. و مش بأقول طبعا أنه من الضرورى أن يجتاز الشباب تجربة الواد أبنى لأن دى كانت تجربه خاصه بيه و لا تعد كنموذج يعنى لما ينبغى أن يكون عليه الحال ..

البوست الجاى بقى اٍن شاء الله حأحكيلكم عن تجربتى التانيه مع الوله الصغير الشيخ عبده اللى قررت أبيعه بتمن كويس كما ينبغى لأب مثلى محب لعياله .. و اٍزاى بدأت بالفعل تنفيذ هذه الخطه النميسه بأنى أشتركت له فى أكاديمية نادر السيد لكرة القدم :)

أشوفكم على خير اٍن شاء الله و لكم كل الشكر و التحيه ..

هناك 49 تعليقًا:

شمس النهار يقول...

البوست لطيف جدا
و كالعاده مكتوب بطريقه فريده
بس مش عارفه انت ليه (مشرد) للولد ده على النت و حاطت نقرك من نقره
انت اب و ابنه مولودين فوق راس بعض
الولد لطيف و جميل و شخصيته جميله و فوق كل ده راجل
هو مشكلته بس زى اقرانه عايز توجيه
و اللى انا شايفاه انه لما بيتوجه صح خاصة ان انت اب صح خلاص الولد ما شاء الله بيبقى كويس
ربنا يبارك لك فيه
امين

عاشقة الأحزان يقول...

السلام عليكم

عمرو الغالى
اهلا بيك ياقمر وحشنا كتير


ربنا يبارك فيك ويعزك على مواضيعك الجميله اللى بننتظره على احر من الجمر

جميل جدآ ما كتبت
وربنا يبارك لك فى الولد ويجعله من الصالحين
وبلاش تحسده كده
ادعليه ربنا يصلح حاله
وانا عن نفسى بجد بحب التمارين وبلعبها بإستمرار
تحياتى لك
ومنتظرين البوست القادم
انوسه

حاسوباتيه يقول...

والله بجد صعب عليا قوي صاعقه مره واحده ياااه بصراحه انا ماعنديش حتى اخوات ولاد علشان اعرف تفاصيل الجيش وكده بس حاسه انه صعب قوي وبحمد ربنا اني الحمد لله بنت صحيح الرياضه لازمه للجنسين سواء بنت او ولد بس يعني احنا نلعب تنس كره يد او جري لكن فعلا اللد غير البنت ولازم يطلع الطاقه الي عنده في حاجه ولان الولاد مش لاقيين فعلا يقضوا وقتهم فين بيطروا يلجؤوا لحاجات تانيه مش كويسه فطبعا اختار حضرتك صح بس برضو صعبان عليا صاعقه مره واحده ربنا معاه ويستر على بقيه اخواته هههههههه

احساس طفلة محبة للرومانسية بس واقعية يقول...

اقولك حاجة بجد يا استاذ عمرو
هى مدرسة الصاعقه دى فين وشروطها اية
انا تقريبا معرفش حاجة عنها
مدتها قد اية ؟ كل حاجة بجد ياريت تعرفهالنا

غير كدا بجد حضرتك عملت خير فى ابنك
هيدعيلك ويشكرك علية طول العمر
ومش هيعرف قيمته الا عندما يواجة الحياة اكثر واكثر ربنا يبارك فيك
ويخليك ليهم

بأنتظار البوست القادم
دائما تسيب لينا سطرين يشوقونا للبوست اللى جى

تقبل مرورى

ستيته حسب الله الحمش يقول...

سيدي الفاضل

متعرفش مكان شبه ده ياخد وغد عمره عشر سنوات .. وغد وغد حقيقي
وهو شاب صغنن آيل للإنحراف برغم كل الجهود المضنية لتقويمه

نفسي نفسي ادخله الجيش من دلوقت
رغم انه وحيد
قال وعاوز يعمل لي سبايكي
على جثتي

ربنا يبارك لك في ولادك البوست جاد جدا ولكن باسلوب رائع وضاحك جدا

beautiful mind يقول...

السلام عليكم استاذي ورحمة الله
في بس نقطتين عايز اتكلم فيهم
الاولي ان مقولة علموا اولادكم السباحه والرايه ليست حديث شريف وانما هي مقولة لسيدنا عمر بن الخطاب
الثانيه

طبعا الجيش مصنع الرجال وكلام حضرتك جميل جدا وعجبني فعلا الموقف اللي حضرتك اتكلمت عنه
واديني خلاص كلها ايام ورايح الجيش بالفعل في دفعة شهر 7 الجاي يعني هاخد الصيف كله في مركز التدريب
يلا الحمد لله علي كل حال
وربنا اعلم هنخرج من الجيش رجال زي ما كنا ولا هنخرج معقدين نفسيا وبدنيا
يارب استر

norahaty يقول...

السلام عليكم ورحمة
الله تعالى وبركاته
ومســـــــــاء الخير كمان ياأستاذنا
والله برافو عليك يا أستاذ عمرو
الحكاية مش اكل وشرب وخلاص
خلصت المسئولية لا فيه
حاجات مهمة بنفس
الدرجة.ما انسى
فرحة زميلة لىّ
لما اعلنوا
انهم
حيعملوا حمام
سباحة فى النادى الخاص بهم
وقد كان واشتركت لاولادها فيه وبفضل
الله سبحانه وتعالى وبفضل السباحة
اللى تفوق فيها الاولاد على مستوى
الجمهورية استطاعوا يدخلوا كلية
الهندسة بال(الحافز الرياضى)
او حاجة زى كده يعنى .

norahaty يقول...

(و كان أقصى مجهود يعمله
أنه يلعب فى ..ودنه يعنى ..)
بس انت متحامل على الولد شوية
ما هو بيعمل مجهود جبار اهوه:)
احنا حننهب ولا حننهب :):):)

فتاه من الصعيد يقول...

انت مثال للاب المحب.....بس الواد طلع جامد واتحمل اهو....انا قلت على وصفك ليه قبل الالتحاق بالمدرسه هيفرهد منهم
بوست لطيف وظريف كالعاده
دمت بخير.....تقبل مرورى

هبه يقول...

بابا عمرو
بجد انت اب جميل و حد رائع جدا تسمح لى اكون ابنتك و اقول لك يا بابا؟

كلمات من نور يقول...

ما شاء الله

عايزين مصنع من داه في كل المحافظات

يا ريت يا أستاذ عمرو ابنك يقدم في فريق الرماية لو ينفع

أنا ابنائي ولله الحمد في الفريق ونمرة اتنين منهم أخد أول ناشئين على مستوى العالم العربي وبعد امتحاناته عنده معسكرات تدريب للاستعداد لبطولات العالم في عدة دول اجنبية

دعواتكم

ايوشة يقول...

ههههه حضرتك اب ديمقراطى خالص :))
بس بجد حضرتك عملت حاجة كويسة جدا اغلب الاباء مش بيهتموا بالجانب الرياضى خالص واللى فى الاصل ليه سبب اكبر فى تهذيب الجانب الاخلاقى كمان
والاغرب ان ابن حضرتك اقتنع :))
ربنا يخليهم لحضرتك يارب ودايما يقروا عينك كده وتشوفهم افضل الناس باذن الله

صبرني يارب يقول...

استاذنا كنت هاموووووت من الضحك وانا قاعده لوحدي والعيال لسه نايمين يعنى كانوا هايقوموا يطلبولي مستشفى المجانين دوغري

انا كمان نفسي اطلع ولادي يحبوا الرياضه ويلعبوا رياض

عشان انا كمان كان نفسي اهلي يتهموا بحاجه زي كده


وباتكبد فى ذلك مشقات جامه اولها انا باخد ربع دستة العفاريت دول لوحدي واروح بيهم الاستاد 3 مرات فى الاسبوع

عشان تدريب السباحه

واقعد بقى وانا بانام على نفسي قدام البسين اقول مااااااشي يا كلاب افتكروا الجمايل
هههههههههههههههه

تحياتي لحضرتك على البوست الجميل

بسنت صلاح الدين يقول...

هههههههههه الحمد لله انى بنت، ولو ان الغرب البنات فيه ممكن تلتحق بالجيش،بس ربنا ستر عندنا و مسيره المساواه موصلتش لهذا الحد،الحقيقه الرياضه شبه منسيه فى عالمنا العربى،فى مجتمع كل مايهمه انه ياكل وينام،و بخلاف الغرب سيدات ورجال بعضلاتهم و اجسادهم الممشوقه ،تجدنا مترهلين و متيبسين على الكراسى مستنيين الوجبه القادمه،احييك على حرصك على تكوين اولادك جسمانيا و عقليا و نفسيا بشكل سليم،و مستنيين البوست اللى جاى نشوف عملت ايه فى اخر العنقود

دعاء يقول...

بوست من الدرجة الاولى
ما شاء الله
شكرا جدا على الفيديو,بجد رائع
هو صعب شوية بس بيطلع منه شباب قوية وعندها قدرة على التحملو طبعا المؤمن القوى خير من المؤمن الضعيف.
بالنسبة لابنك بقى انا سعيدة باللى عملته معاه و اذا كان اتدايق فى البداية او زعل فهو بكرة هيشكرك وان شاء الله يحكى لاولاده على اللى عملته معاه.
ربنا يبارك فى اولادنا ويهديهم دوما الى الصواب.
تحياتى

من غير عنـــوان يقول...

بجد
بجد

أقوى نصيحة لكا الناس وبصفه خاصة الشباب...

هي الرياضة
ثم الرياضة
ثم الرياضة

تحياتي

MaNoOoSh يقول...

كلامك حقيقي فعلا يا استاذ عمرو
الشباب الوقتي محتاج يتعلم يخشوشن ويحب يشيل المسؤولية.. مش مجرد انه مضطر يشيلها وخلاص لما يتجوز.

وانا فعلا بحييك على تجربتك مع ابنك وهو اكيد كان محتاجها.. ياريت كانت تنفع مع أخويا.. بس للأسف هو سنه تعدى ال30 خلاص يعني أساسا شخصيته وعمره صعب يتقوم..
هو مش وحش.. بس زي كل الشباب فاكر ان المسؤولية دي بعبع وكمان مبيلعبش رياضة خاااااااااااااالص.

ان شاء الله لو ربني رزقنى بأطفال.. هعلمهم واتعلم معاهم كمان.. مفيهاش حاجة.

اعقل مجنونه يقول...

هههههههههه
تصدق والله حرام هى الرياضه حلوه اه بس النت اكيد احسن

الكلمة نور يقول...

مصنع رجالة ايه بس يا عمرو
الرجالة ماتت فى الحرب
وبعدين ايه بس السياح اللى انت عاملوا للواد ده
بس انت عارف هوا غلطان عشان كان قاعد قدامك على طول
لو اختفى كنت هاتحب تشوفه فى البيت
بس البوست حلو
ضحكتنى بجد والله

ماما أمولة يقول...

الله عليك يا عمرو

بوست مفيد جدا

انت بتكلم مش على ابنك بس لا دا نص شباب مصر بالمنظر دا دلوقتي

ابني واحد منهم

انا جبته قعدته جنبي وخليته اتفرج على الفيديو وقريت معاه البوست

كان مستغرب لان البوست بيتكلم عن نفس اللي هو فيه

ربنا يبارك فيك يا عمرو ويبارك في اولادك ويهديهم ويهدي اولادنا واولاد المسلمين

بجد بوست أكثر من رائع

مسدس صغير يقول...

اولا كبوست
فى منتهى الجمال واسلوبك فى سرد الحكاية رائع احييك عليه
اما بقى فى ابن حضرتك مش هوه بس اللى كده لا شباب كتير بسبب ان الحياة اصبحت مريحة عن الماضى بكل ما تحمله الكلمة من معنى " النت والتليفونات والسيارات والطائرات وخلافه"
كل ده ادى ان الناس معادتش بتتحرك الا بسيط جدا جدا.
بس فعلا الواحد لازم يدى لنفسه قسط من التريض زى سيدنا عمر ما قال
علموا اولادكم السباحة والرماية وركوب الخيل

احييك على البوست
جميل جدا

عمرو يقول...

شمس النهار
صباح الخير يا برنسيس :)
لا و الله بالعكس أنا دلوقتى بأفتخر بيه :)
أصل الحقيقه زمان ماعندكيش فكره كان عامل اٍزاى .. كان طوب الأرض بيشتكى منه بس المشكله اٍن مش كل الشباب بيستمعوا لنصيحة الكبار و بيعتقدوا أن هم بس اللى فاهمين لكن لما بتوصل لمرحلة الخطر لازم الأب أو الأم يستعملوا كل الوسائل المتاحه لتقويم الأبناء ..
و طبعا مافيش أحسن من الجيش لتقويم السلوك المعوج ..
تحياتى و تقديرى و اٍحترامى :)

عمرو يقول...

عاشقة الأحزان
و عليكم السلام و رحمة الله
أهلا بيكى ماتشوفيش وحش :)
متشكر لأن البوست عجبك .. و مش بأحسد الولد و الله :) ده أنا بس فخور بيه ..
و برافو عليكى بجد أنك مهتمه بأداء التمارين الرياضيه فى سنك المبكر ده لأن هو ده اللى فعلا حيفيدك فى الكبر ..
متشكر ليكى و أهلا و سهلا بيكى ..

عمرو يقول...

حاسوباتيه
لا ما يصعبش عليكى غالى ..
لابد من التعود على الخشونه لأن النعمه لا تدوم :(
و طبعا الألعاب الرياضيه الخاصه بالبنات مختلفه عن ألعاب الولاد و لو أن دلوقتى و الله بأشوف بنات فى غاية الرقه و بيشيلوا حديد و بينافسوا الصبيان !!! و بيلعبوا ملاكمه و حاجات من كده يعنى :)
نورتى و أهلا بيكى ..

عمرو يقول...

احساس طفلة محبة للرومانسية بس واقعية
مدرسة الصاعقة موجوده فى أنشاص ..
و فيه اٍتجاهين للاٍلتحاق بها :
- أول اٍتجاه عن طريق التطوع بقوات الصاعقه و ده بيكون عن طريق اٍن الشاب يتقدم بأوراقه لمقر مكتب التطوع بقوات الصاعقه و المظلات فى منشية البكرى بالقاهره أو فى مكاتب التطوع بالقوات المسلحه فى المحافظات و بتقبل الحاصلين على الشهاده الاٍعداديه و ما فوقها بعد الكشف الطبى الدقيق على الشاب و التأكد من سلامة صحته و ملائمة بنيته الجسديه للاٍلتحاق بالصاعقه و بعد دوره عنيفه من التدريبات لمدة 35 أسبوع متواصل بتنتهى بأسبوع الجحيم اللى هو بيصفوا فيه الأفراد اللى اٍجتازوا فترة الاٍختبارات و التدريبات بيتخرج الشاب من مدرسة الصاعقه و بينال شرف الاٍنضمام للقوات المسلحه و لهم مميزات كثيره و المتفوقين منهم بيلحقوهم بالحرس الجمهورى أو بالسفارات المصريه بالخارج ..
الاٍتجاه التانى بقى هو أن لو فيه شاب شقى شويتين و محتاج شوية تأديب و أهله غلبوا فيه فأفضل مكان له هو مدرسة التأهيل للكليات العسكريه و الوحيده اللى أعرفها فى القاهره موجوده فى نادرى الرمايه بالهرم و بتقبل أبناء المدنيين و القائمين عليها ظباط صاعقه فى منتهى الجديه و ليهم طريقه خاصه بتأدب الشاب و فى نفس الوقت بتحببه فى الحياه العسكريه و بتخليه بعد اٍنتهاء فترة التدريبات شخص آخر و كفؤ للاٍنضمام للجيش ..
أشكرك لأن البوست عجبك و أهلا و سهلا بيكى :)

عمرو يقول...

ستيته حسب الله الحمش
أعرف :))
المدرسة البحرية الاٍعدادية فى الاٍسكندريه ..
مدرسه داخليه عسكريه رائعه بتنشأ الأولاد فى السن الصغير ده على حب الحياه العسكريه و ليهم طريقه مميزه فى التعامل مع الصبيان الأشقيا شويه و بتؤهلم لما يكبروا للاٍلتحاق بالكليه البحريه ..
حاولى حضرتك تستفسرى من دلوقتى عن شروط الاٍلتحاق بيها و أنا من ناحيتى حأحاول أوص لموبايل زميله ليا أبنها تخرج من المدرسه دى من سنه و حأعرف منها الشروط و حأقولك ..
ربنا يبارك لك فى أولادك و يبعد عنهم كل شر و متشكر للزياره و التعليق ..

عمرو يقول...

beautiful mind
أولا أشكرك يا عزيزى على التصحيح اللى قمت بيه بالنسبه لمقولة سيدنا عمر و اللى تأكدت من صحتها و هو خطأ شائع بين الناس .. فألف شكر ..
ثانيا هو أيه اللى بيعقد فى الجيش ؟؟ صدقنى و لا حاجه ..
مش بيتعب فى الجيش غير اللى أصلا رافض اٍطاعة الأوامر و الاٍلتزام بيها و ده بيبقى من رواسب الحياه المدنيه اللى على الشاب أن ينساها و هو داخل وحدته ..
بجد و الله بأحسدك أنك داخل الجيش و ستنال شرف خدمة الوطن بارك الله فيك ..
بس المهم أنك تطمنا عليك و تعرفنا أنك بخير ..
تمنياتى الطيبه لك من كل قلبى و تقبل تحياتى و تقديرى ..

عمرو يقول...

norahaty
و عليكم السلام و رحمة الله و بركاته
و صباح الخير كمان يا دكتوره :)
لا طبعا الحكايه مش أكل و شرب .. مسئولية الأ[ مش بتنتهى عند كونه بنك بيصرف على عياله و خلاص ..
لاااااااا ..
فيه حاجات ربما تفوق فى أهميتها المصاريف اللى هى برضو جزء أساسى من مسئولية الأب و الأم ..
و آدى مثال لصديقتك و حكايتها مع أولادها و بجد يا ريت يهتم الآباء و الأمهات بصحة ولادهم الجسديه و النفسيه لأنهم حيتسألوا عنهم يوم القيامه ..
شكرا يا دكتوره للزياره و التعليق و أهلا بيكى :)

عمرو يقول...

فتاه من الصعيد
متشكر جدا و ده الطبيعى أن الأب يكون محب لعياله و خايف عليهم و على مصلحتهم .. ده الطبيعى ..
هو فى الأول ماكنش قادر يتحمل لكن شويه شويه لما شعر بروح المنافسه بينه و بين زملائه تشجع و صمم على تكملة المشوار و ربنا وفقه الحمد لله ..
شكرا للزياره و تقبلى تحياتى ..

عمرو يقول...

هبه
متشكر ليكى و شرف ليا أنك تقولى لى يا بابا :)
نورتى البلوج و أهلا بيكى ..

عمرو يقول...

كلمات من نور
هى و الله المصانع موجوده بس الحكايه محتاجه شوية ضغط و شوية لين على حبتين تفاهم علشان الشباب يقتنعوا بالاٍنضمام لها ..
بارك الله فى أبنائك و يجعلهم متقدمين دايما و أكيد حضرتك لك فضل عليهم بعد فضل المولى سبحانه و تعالى للحصول على هذه المراكز المتقدمه فلك التحيه برضو ..
ربنا مع أولادنا و أولادك و يبارك فيهم ..

عمرو يقول...

ايوشه
ديموقراطى فوق ما عقلك يجيب :))
عدم الاٍهتما بالأبناء من الناحيه الرياضيه أعتقد أن ده خلل بالمسؤليه اللى ألقيت على عاتق الأهل و اللى حيتسألوا عنها يوم الدين لأن زى ما الكتوره نورهاتى قالت الحكايه مش أكل و شرب و خلاص ..
ربنا يخليكى و متشكر ليكى و عقبال ما تفرحى بأولادك و عيالهم ..

عمرو يقول...

صبرنى يا رب
سلامتك :))
بس و الله برافو عليكى أنك بتهتمى بتربية عيالك على حب الرياضه و خاصة السباحه لأن فوائدها لا تعد و لا تحصى ..
بس خدى بالك أن السباحه للبنات فى السن الصغير و مع اٍستمرارها بتخللى شكل جسم البنت قريب من شكل جسم الولاد خاصة منطقة الأكتاف و الذراعين فلازم لجانب السباحه تمارس البنت رياضه تانيه تحت اٍشراف علمى لتصحيح هذا الشكل ..
بس موضوع رد الجمايل ده مشكوك فيه :))
تحياتى ليكى و متشكر للزياره و التعليق ..

عمرو يقول...

بسنت صلاح الدين
فعلا الغرب بيهتم بالرياضه جدا على عكس الشرقيين ..
و شوفى كبار السن عندهم ماشيين اٍزاى و قارنى بينهم و بين كبار السن عندنا حتلاقى الفرق كبير جدا ..
ماشى :) نشوفك البوست الجاى على خير اٍن شاء الله .. و تقبلى تحياتى و تقديرى ..

عمرو يقول...

دعاء
متشكر جدا على الاٍطراء بارك الله فيكى ..
فعلا ثبت لى أنه لازم شىء من الضغط و الصبر على الاولاد علشان مصلحتهم و عدم الاٍلتفات لمقولة ده أب ديكتاتور و الكلام ده لو فعلا عاوزين مصلحة عيالنا ..
ربنا يبارك لك فى ذريتك و شكرا ليكى ..

عمرو يقول...

من غير عنوان
طبعا عندك حق يا صديقى الحكيم بس المطلوب برضو أن الآباء يساعدوا و يشجعوا أولادهم على ممارسة الرياضه و تقديم كل عون ممكن لهم و لهن ..
يعنى مش بس تشجيع بالكلام .. لأ .. بالفلوس و بالوقت و بمناقشتهم و بتوفير كل السبل الممكنه لتحبيبهم و اٍستمرارهم فى ممارسة الرياضه ..
تقبل تحياتى و تقديرى ..

عمرو يقول...

مانوش
ما هو ده بقى مربط الفرس ..
الشاب لما بيتجوز بيلاقى نفسه قدام مسئوليه هو أصلا ما أتعودش يشيلها علشان بابا و ماما و كل المحيطين به ماكنوش بيخيلوه يتحمل المسئوليه كما ينبغى .. فبيتفاجىء بأنه أمام حاجه جديده بالنسبه له و مش قادر يتعامل معاها صح و من هنا بقى بتبدأ المشاكل ..
ممارسة الرياضه حاجه مهمه للغايه و لو ما بدأتش فى الصغر حتبقى صعبه أوى أنها تمارس فى الكبر .. يعنى المفروض أنك تبدأى من دلوقتى فى تعلم و ممارسة الرياضه علشان تقدرى تحببى فيها أولادك فى المستقبل اٍن شاء الله ..
تقبلى كل التحيه و التقدير ..

عمرو يقول...

اعقل مجنونه
:))
النت حلو برضو بس فى حدود معقوله علشان ما يدمرش الحياه :)

عمرو يقول...

الكلمة نور
لا مش موافق :)
مصر ولاده و الله و تمتلىء بالرجال المخلصين اللى يتوزنوا بالدهب ..
أيوه كلنا نحب نشوف عيالنا فى البيت لكن لما يبقوا كويسين و مش بيعملوا مشاكل و ليلهم نهار و نهارهم ليل :)
متشكر أوى أن البوست عجبك و أهلا و سهلا بيك ..

عمرو يقول...

ماما أمولة
أهلا و سهلا بحضرتك :)
أيوه صحيح و الله يا ماما أمولة الشباب أصبح عندهم حاله عجيبه غريبه من التراخى و اللامبالاه حاجه عجيبه جدا ..
و أحيانا لما بأقارن بينهم و بين البنات بألاقى أن البنات بيتفوقوا عليهم نشاطا و عزما و قياما بواجباتهم المنزليه بكفاءه و أيضا بيشتغلوا بره البيت باٍخلاص و صبر ..
أيه اللى حصل للشباب مش عارف ؟؟!!
حتى هيئتهم و منظرهم بقت حاجه ليها العجب !!
يا اٍما تلاقى الشاب من دول مكرش و متختخ و عنده بروزات فى جسمه مش المفروض تكون عند الشباب أو تلاقيه هفتان و مسلوع و ماشى ضهره محنى زى العواجيز المكحكحين !! حاجه غرييييييبه !!
متشكر جدا اٍن البوست عجبك و أهلا و سهلا بحضرتك :)

عمرو يقول...

مسدس صغير
أوافقك على رأيك فى الأسباب اللى أدت لحياة الدعه و الخمول العجيبه دى اللى بقت عند الشباب ..
لكن فى اٍعتقادى أنه ما كل الأشياء دى موجوده فى العالم كله ..
ليه مش بنشوف شباب الغرب أجسامهم خربانه زى شبابنا ؟؟
ليه كبار السن فى الغرب بيمشوا فاردين ضهرهم و بيدبوا فى الأرض مش زى العواجيز عندنا اللى بيتحركوا بالعافيه ؟؟
ليه البنت الأجنبيه ممشوقة القوام و البنت عندنا ... و لا بلاش ..
حب الرياضه و ممارستها هى السبب الرئيسى فى رأيى لمثل هذه الفروقات ..
صح ؟؟
متشكر على الاٍطراء و أهلا و سهلا ..

نفرتارى يقول...

بجد و الله العظيم مقدرتش اسيب المدونه بتاعتك غير لما قريتها كلها
المدونه حلوه قوى قوى و انت كمان اسلوبك يجننننننننن
اقبل منى اعجابى و قبلاتى

عمرو يقول...

نفرتارى
متشكر ليكى و أهلا بزيارتك ..
بس ليه مدونتك مافيهاش بوستات ؟؟
نتمنى نشوف لك مواضيع فى القريب اٍن شاء الله ..

كيــــــــــــارا يقول...

ياربي انت شردته حتته تشريده منظره ايه دوقتي في الامم المتحده :)

والله ابن حضرتك بيفكرني باخويا كان وزنه 145 كيلو وهو في ثانوي

قبل اما يدخل الجامعه راح الجيم ولحد الان موش سابه وبيدخل بطولات رفع اوزان وبقي وزنه علي فكرا 90 واللي مزوداها العضلات اللي بيربيها

بس الصراحه كان التوجيه من ماما موش من بابا

منتظرين البوست القادم

أ م البنات يقول...

استاذ عمرو
أولا ادعى لك ربى ان يبارك فى أولاد ويجعلهم من الصالحين
انما اولادنا قطع منا تمشى امامنا
انا ضحكت من قلبى على الوصف بتاع العبور والتعبيرات..بس صحيح احنا آباء وأمهات اشرار بنفرح فى عيالنا لما يظهروا ضعف
علشان مستقوين القلب علينا

الحمد بعلم بناتى السابحه حتى ابنتى صاحبة الظروف الخاصه..استاذه سمكه وبتقرص المدرب لو حب يعلمها حركه جديده علشان هى عاوزة تعوم وتستمتع مش عاوزه حد يعكر صفوها
وبتروح الجيم برضه بس والله بفرح من قلبى وهى داخله من الباب يوم الجيم تترمى على أقرب كنبه ولا كرسى واحيانا متلحقش
تروح نايمه على السجاده, القوى فى الاقوى منه
وابنتى الاخرى بتتعلم سباحه..وبوديها المسجد تتعلم تجويد واشغال فنيه ..ومهارت جميله
فى الاجازة المهم شاقه اكثر من الدراسه

بس بجد ربنا يبارك فى اولادك ويرزقك طاعتهم
أمانه سنحاسب عليها

سبهللة يقول...

هههههههههههه
ضحكتنى موت
لما الولد قالك قاك هى الحرب قامت يا ابويا؟؟؟
بصراحة اسلوبك زى العسل
ربنا يباركلك فيهم

وربنا يهدى اخويا اللى قد ابنك ويتعدل حاله
اصله حال من حال ابنك قبل التعديل

MǿиY El-Shreef يقول...

ياااه

صاعقه مره واحده

دانا اتخضيت من هنا ياعمرو

بس الحمدلله ان الحال اتعدل وبقى عاجبك كده

ربنا يباركلك فيه ويحميه ياااارب

وبعدين فعلا زي ماقالت شموسه بدل باباه صح يبقى هو اكيد صح ومش محتاج الا حاجات بسيطه منك

وانت قدرت تعملها معاه صح بجد

ربنا يكرمك :)

mahasen saber يقول...

ههههههههههه انا ضحكت من الاسلوب الجميل فى الكتابه

وفرحت بشكل مقدرش اوصفه من العلاقه الجميله دى بين حضرتك وابنك
انا اخدت درس مفيد جدا ينفعنى مع ابنى قدام ان شاء الله

بس يا رب الدورات دى تبقى مفتوحه على عصره

انتا انسان رائع يا استاذنا بكل ما تحمله الكلمه من معنى

Mo7ammed يقول...

بوست جميل والله
وشجعتنى اقدم فى المدرسة دى
فعلا الرياضة عموما بتهذب النفس

بس بجد تدبيسة حلوة من اب عسل
^_^