~SUN~ Pictures, Images and Photos

الأحد، 10 مايو 2009

من الصعيد الجوانى .. زيارة الدير الأبيض

أسعد الله صباحكم أعزائى المدونات و المدونين ..
نستكمل سويا أحداث جولتى فى الصعيد .. و أسمحوا لى أحكى لكم النهارده عن زيارتى للدير الأبيض القابع فى سكينه على حدود جبل أدربيه على بعد 6 كيلو متر من سوهاج و حيث كانت توجد قرية أدربيه الفرعونيه من آلاف السنين ..

الطريق من نجع العيساويه للدير قطعه أبو اٍسلام السواق اٍبن المنطقه و اللى حافظ كل شبر فيها فى حوالى ساعه و ربع .. الطريق ممهد و رائع و على جانبيه مزارع قمح العين ما تجيبش آخرها و أزعم اٍن كل هذا القمح فى الصعيد بطوله و عرضه يكفى لاٍطعام شعوب 10 دول و من الشعوب المفجوعه كمان .. لكنى ذهلت لما عرفت الحقيقه المضحكه المبكيه اٍن 95% من القمح المصرى الصعيدى بيتم تصديره للخارج و بنرجع نستورد اٍحتياجتنا من القمح برضو من الخارج :)) ده طبعا غير ما يتم أخذه كمعونه من أمريكا الويكا كونيكا و لله فى أمره شئون ..

أفقت من تأملاتى على صوت أبو اٍسلام و هو يشير لجبل لاح من بعيد :

- ده جبل الشيخ حمد و مليان مطاريد يا أستاذ أصلهم عيستخبوا فى كهوفه .. و الحاكومه عتكبس عليهم دلوكيتى كل يوم و التانى لمن جلبت عيشتهم مرار ..

جبل ؟! مطاريد ؟! كهوف ؟!

أحمدك يا رب :)
و شعرت بشغف شديد لاٍرتياده .. و قد كان .. و ماعدوش يومين اٍلا و كنت بأتآنس بمجالسة الريس أبو رحمه و هو واحد من عتاة المطاريد على سفح جبل بنى حمد .. و ده حيكون موضوع بوست آخر أزعم أنه سيكون من أعجب البوستات :)

لما أقتربت السياره بشده من سفح الجبل المهيب أنحرفت يمينا فى طريق مسفلت و نظيف تحفه من على الشمال مقابر للمسيحيين على مساحات شاسعه و فى حالة يرثى لها و من على الشمال مزارع هائله للقمح .. منتهى التناقض فى المشهد ما بين الحياه و الموت !! ..

و ظهرت مبانى الدير الأبيض بعد المقابر مباشرة ..
مش حأتكلم كتير عن تاريخ الدير و ممكن تلاقوا كل شىء عنه فى هذا اللينك :
تاريخ الدير الأبيض ..
بس أحب أذكر ما قيل لى فيما بعد من أن فكرة و فلسفة الرهبانيه فى العالم أجمع خرجت أصلا من هذه البقعه على أرض الوطن .. و أنه لا يوجد راهب فى العالم لم يدرس تاريخ الدير الأبيض اللى اٍحنا بصدد زيارته و لم يتأثر به .. طبعا دى مقوله لا أملك الأدوات للحكم بصحتها أو لا حيث أنى لست فى موقف الدارس لتاريخ الرهبنه القبطيه و من قال لا أعرف فقد أفتى .. فقط أنا بانقل لكم ما قيل لى ..
الأمر التانى و المهم عندى شخصيا أنه هذه المنطقه قد شهدت صراعات طاحنه بين أصحاب الديانه المسيحيه الأوائل عند بدء اٍنتشارها على أرض الصعيد و بين المصريين اللى تمسكوا بالوثنيه الفرعونيه القديمه اٍن صح التعبير .. و واضح أن الغلبه كانت لمتبعى الديانه الجديده حيث أنتشرت المسيحيه على أرض الصعيد بل و قام المسيحيون الصعايده الجدد باٍعلان اٍنتصارهم الحاسم بعد أن قويت شوكتهم بشىء عجيب حنشوفه فى الصور و الكليبات العجيبه اللى ألتقطتها فى الدير الأبيض !!
دخلنا بالسياره لفناء الدير ..

و توقفنا بجانب البوابه الداخليه الصغيره .. كل شىء مبنى من الحجر الجيرى الأبيض و ده سبب تسميته بالدير الأبيض و بناءه قديم يرجع لحوالى 1600 سنه مضت .. و فيه منطقه مسوره بسلك أى كلام كده بتحتوى على بقايا آثار فرعونيه و عليها يافطه كبيره بتقول أن هذه المنطقه تخضع لهيئة الآثار المصريه !!
قادنى أبو اٍسلام لداخل الدير من خلال بوابه حجريه صغيره و كنت قد علمت منه أنه شخصيه معروفه لدى رهبان الدير بحكم عمله كسائق بيجيب بسيارته الميكروباص الزوار من سوهاج للدير رايح جاى ..
و فعلا أستقبلنا القائمون على كشك بيع التذكارات القبطيه و الموجود على يمين البوابه الداخليه بترحاب شديد و أرسلوا واحد منهم يستدعى الراهب المسئول عن اٍستقبال الضيوف ليكون مرشدى داخل الدير ..
الجو كان شديد الحراره بس كان فيه نسمات حلوه كده بتهب من الجنوب .. قعدت على دكه خشب قديمه جدا و لكنها مريحه بجوار ترابيزه عليها برطمانات عسل نحل من اٍنتاج الدير معده للبيع .. و لما لاحظ أبو اٍسلام تأملى للعسل حيث أنى بأفهم فيه كويس أخبرنى اٍن المنطقه هنا بها أجود أنواع عسل النحل فى العالم !!
سألته :
- اٍشمعنى يا أبو اٍسلام ؟؟ أيه السبب يعنى ؟؟

- أصل المنطجه دهياتى مبروكه يا بييه ..
سكت و لم أعلق أحسن يعنى ..
شويتين و وصلوا 2 رهبان .. أول ما لفت نظرى فيهم طولهم الفارع و نحول أجسادهم الواضح .. سلموا عليا بترحاب شديد و باٍبتسامه مشرقه .. عرفونى بنفسهم الراهب الأب مش فاكر اٍسمه و الراهب الأب بيشوى و عرفتهم بنفسى .. الأول كانت لهجته صعيديه و الآخر لهجته قاهريه و هو الراهب بيشوى و اللى كان مرشدى داخل الدير ..


أنا و الراهب بيشوى (أنا اللى على اليمين علشان ما تتلخبطوش يعنى)


قادنى عبر بوابه حجريه أخرى لداخل الدير نفسه .. بهو كبير فى الهواء الطلق به بقايا أعمده حجريه على الصفين


أفهمنى الراهب بيشوى أن فى هذا الفناء كان الرهبان الأوائل يتناولوا طعامهم لأن كان عددهم كبير جدا يتجاوز ال 4000 راهب .. و كان بينضم لهم رهبان أجانب كانوا بيسعوا للاٍنضمام لدير الأنبا شنوده رئيس المتوحدين علشان يتعلموا أصول الرهبنه المصريه اللى بقت مناره لكل رهبان العالم .. و بالمناسبه البابا شنوده الثالث بابا الأقباط الحالى أخذ لقبه الكنسى من اٍسم الأنبا شنوده رئيس المتوحدين و قضى فتره كبيره جدا من حياته الكهنوتيه فى هذا الدير ..

أرض الفناء مبلطه ببلاط حديث وضع فوق البلاط القديم الأثرى و هى عاده مصريه متأصله عملا بمبدأ اٍردم على اللى فات و أنساه حتى لو كان اللى فات ده بلاط أثرى عمره يتجاوز ال 1600 سنه ..

لاحظت وجود اٍزاز مكسر على الأرضيه فبدأت فى لملمته و وضعه جانبا .. اٍبتسم الراهب بيشوى فى وداعه و قال :

- بتميط الأذى عن الطريق ؟؟

ضحكت رغما عنى و جاوبته :

- شعبه من شعب الاٍيمان :))

شايفين الباب الصغنون ده اللى فى آخر الصوره اللى فوق ؟؟

ده بقى بيقود لداخل الكنيسه الأثريه العجيبه حيث المذبح المقدس و حيث بتقام الصلوات ..

قبل ما ندخل لاقيت الراهب بيشوى بيخلع نعله فخلعته أنا كمان .. و يبدو أن هذا المكان شديد القداسه لدى الأقباط لأنى ما شفتهمش بيخلعوا الأحذيه اٍلا قبل الدخول للكهف اللى أختبئت به السيده العذراء مريم و أبنها السيد المسيح عليه و على نبينا المصطفى أفضل الصلاة و السلام أسفل الكنيسه الموجوده بمنطقة الكنائس فى مصر القديمه بالقرب من مسجد عمرو ابن العاص ..

أرض الكنيسه مفروشه بسجاجيد قديمه و لكنها ذات قيمه عاليه جدا .. و أول ما يقابل الداخل عمود رخامى و ولد و بنت قاعدين جنبه على الأرض بيتبادلوا الهمس و الضحك :) و أول ما شافوا الراهب بيشوى أتنطروا و فزوا على حيلهم و أختفوا عن الأنظار ..


العمود الرخامى

الراهب بيشوى شرح لى أن هذا العمود كان واحد من أربعه موضوع عليهم المذبح المقدس و لم يتبق منهم غير العمود ده ..عرفت بعد كده أنه بيقال أن جسد الأنبا شنوده رئيس المتوحدين مخفى تحت هذا العمود و أن الرهبان قاموا بتخبية جسده بعد ما تعرض لمحاولة الاٍعتداء عليه من قبل شيركوه عم صلاح الدين الأيوبى قديما .. و الله وحده أعلم بحقيقة الأمر ..

الجو داخل الكنيسه كان شديد اللطف و كأن تكييف مركزى بيبرد الهواء على الرغم من الحر الشديد فى الخارج و أرجعت ده لأرتفاع السقف الشاهق و للقباب العملاقه اللى بيبلغ اٍرتفاعها حوالى 20 متر ..
و بدأ الراهب بيشوى فى شرح ما أستغلق عليا فهمه من لوحات رائعه و أيقونات قديمه تعبر عن أحداث مقدسه فى تاريخ الدير و فى تاريخ الديانه المسيحيه بصفه عامه ..

و الحقيقه أنى أرهقت الرجل بالأسئله الكثيره و الحوارات اللى لم أشعر أبدا أنه أتخنق منها أو تضايق بل على العكس كان صدره رحبا جدا و أكتشفت أنه واسع الاٍطلاع بشكل مثير للدهشه و فى مختلف مجالات الثقافه و التاريخ و اللغات بل و الفنون ناهيكم عن الأديان أيضا ..

لفت نظرى شبه رسم تصويرى غير واضح التفاصيل و لكنه فى المجمل شديد الوضوح علمت أنه من أشد مقدسات الدير لأنه بيصور الأنبا شنوده رئيس المتوحدين و قد ظهرت صورته على الجدار بفعل عوامل الرطوبه يعنى زى ما تقولوا معجزه كده .. أهى :



كمان عجبتنى جدا لوحه مرسومه على قبه عملاقه و تعجبت من مقدرة الفنان المصرى القديم على رسم القباب و زخرفتها و يبدو أن مايكل أنجلو تأثر بهذا الأسلوب لما رسم سقف كنيسة القديس بطرس فى الفاتيكان .. و شرح لى الراهب بيشوى مغزى هذه اللوحه و كيف أنها بتعبر عن خالدية الله و سرمديته و هيمنته على ما فى الكون :



سألت الراهب بيشوى عن اللغه القبطيه .. قال :

- الأقباط المصريين بيستعملوا فى صلواتهم اللغه القبطيه اللى هى اٍمتداد طبيعى و اٍبنه شرعيه للغه المصريه القديمه .. و أيضا بيستعملوا اللعه العربيه لأنها دقيقه تماما كاللغه اللاتينيه اللى بتستعمل فى صلوات غير المصريين .. أما اللغه السريانيه فبتستعمل فى بعض الكنائس العربيه و خاصة فى سوريا ..





الأيقونه دى بقى مصنوعه من خشب الجوز و محفوره يدويا و هديه من دير فى اليونان و بجد تحفه رائعه :



و أما الأيقونه دى فللأنبا شنوده رئيس المتوحدين .. لاحظوا التناقض الرهيب ما بين الجدار الحجرى اللى فى الخلفيه و مابين الدولاب الألوميتال البشع اللى عليه الأيقونه ..



الحقيقه و الحق يقال اٍن الراهب بيشوى لم يترك لا صغيره و لا كبيره مما لفت نظرى بداخل هذا المكان اٍلا و قد وفاه حقه من الشرح المفصل اللى بيبين مدى سعة أفقه و اٍطلاعه و بلغه سهله سلسه و لم تفارقه اٍبتسامته الودوده أبدا .. و قد لفت نظرى لنقطه هامه للغايه لم ألتفت لها من قبل و هى أن فى كل الرسومات القبطيه اللى بيظهر فيها السيد المسيح لم يظهر أبدا مع الحواريين يهوذا الخائن اللى وشى بالمسيح عند الرومان و ضرب لى مثل على ذلك بلوحة العشاء الأخير الشهيره لدافنشى .. و فقط ظهر يهوذا الخائن فى بعض الأعمال الفنيه اٍما على هيئة رجل كريه الوجه بعين واحده كدلاله على رؤيته نصف الحقيقه فقط و اٍما على هيئة شخص يحمل كيس فى اٍيده كدليل على بيعه السيد المسيح بقطع معدوده من الفضه ..

دى النسخه القبطيه المصريه من لوحة العشاء الأخير و معلقه فوق المذبح :


لما سألت الراهب بيشوى هل فيه مسلمين بييجوا يزوروا الدير ؟ أكد لى أنه فيه مسلمين كتير جدا من أهل الصعيد و من المحافظات التانيه بيواظبوا على زيارة الدير و أنه نشأت صداقات كثيره بينهم و بين الرهبان هنا و أنه لافرق عندهم بين مسلم و مسيحى لأننا فى النهايه جميعا مؤمنين بالله الواحد خالق الكون ..

- طيب يا أبونا على حسب ما أعرف فلكل دير معجزاته المشهور بيها .. فهل ياترى يا هلترى و هلبت ما أيه هى معجزات الدير الأبيض ..

بدون تفكير جاوبنى الراهب بيشوى :

- معجزات الدير الأبيض بتتركز فى حل المشكلات الدنيويه و خروج الأرواح الشريره اللى بتتلبس أجساد البنى آدمين ..

- اٍزاى يعنى ؟؟!!!

- يعنى اللى عنده أى نوع من أنواع المشاكل زى المشاكل العائليه أو قضايا فى المحكمه بييجى يقعد هنا طول النهار و بعون الرب تنحل كل مشاكله .. و كمان اللى بيعانى من تلبس الشياطين أو الأرواح الشريره لجسده فبييجى لوحده أو أهله بيجيبوه و بيقضى هنا وقت فى الهدوء اللى أنت شايفه ده و برضو باٍذن الرب بيشفى تماما و بيرجع أحسن من الأول ..

رديت عليه بتلقائيه :

- ما شاء الله ما شاء الله ..

و خرجنا من الكنيسه للفناء الخارجى مره تانيه .. و أخبرنى الراهب بيشوى أنه كان فيه بئر خاص بالدير تم حفره من حوالى 1500 سنه و ظل الرهبان و الزوار يستعملوه على مدار هذه السنوات الطوال لحد ما دخلت مياه الحكومه للمنطقه فأصبح البئر مهجور و غير مستعمل فتمت تغطيته من حوالى 12 سنه فطلبت أنى أشوفه ..

فأنتقلنا للطرف الآخر من الفناء الخارجى .. و كان فيه مجموعه كبيره من الشباب و البنات الأقباط بيتبادلوا الحديث ربما بشكل غير مألوف فى الصعيد و خاصة فى مثل هذه المنطقه القاصيه منه و تبادلوا معايا الاٍبتسامات الودوده مرحبين على عادة الصعايده تجاه الغرباء ..

اٍجتزنا بوابه حجريه صغيره للغايه بتؤدى لشبه ردهه مستطيله شاهقة الجدران الحجريه .. على اليمين واخد بالك كوه رائعة البناء قد شدت بأعمده و قضبان حديديه أخبرنى الراهب بيشوى أن خبراء من هيئة الآثار وجدوا شروخ فيها فقرروا أن يسندوها بتلك الأعمده و القضبان و الحديديه !!

- طيب مادام عملوا كده ما يكملوها بقى !!!

ده الراهب بيشوى اللى بيقول ..

و جنب الكوه دى توجد بقايا أعمده حجريه أثريه بتيجان على شكل زهرة اللوتس الفرعونيه أغلبها محطم و مرميه فى اٍهمال يصعب على قلب الكفار !! أهيه :


شوية الأعمده و التيجان ساحرة النقوش دى لو كانت فى بلد تانيه كانوا عملوا لها متحف لوحدهم .. شايفين بقى الدرجتين الحجر اللى فى الصوره دى ؟؟ الدرجتين دول بقى بيؤدوا لممر كل جدرانه و أرضيه و سقفه من الحجر و الممر ده بيؤدى للبئر ..بس فيه حتة نتفة مفاجأه فى هذا الممر العجيب بجد دوختنى و خلتنى ألف حوالين نفسى و ما صدقتش عينيا .. بس الصوره ما بتكذبش ..

ده الممر الحجرى :


و دى المفاجأه .. تأملوا الصور كويس كده :




المفاجأه اللى أذهلتنى - للى مش واخد باله - أن جدران و سقف هذا الممر العجيب يمتلىء بالنقوش الفرعونيه على أحجاره !! و بعض هذه الأحجار وضعت مقلوبه و كذلك النقوش بالتالى مقلوبه !! يعنى كان الغرض هو اٍستعمال هذه الأحجار كخامات للبناء فقط !!


و لما أبديت دهشتى الشديده للراهب بيشوى من هذه الملحوظه اٍبتسم فى وداعه كعادته و قال :
- مش كتير اللى بياخدوا بالهم من الملاحظه دى .. فعلا غالبية أحجار الدير متاخده من معابد فرعونيه قام بفكها بناة الدير الأوائل اللى آمنوا بالمسيحيه لما بدأت تنتشر فى الصعيد و حاربوا الوثنيين اللى كانوا لسه بيعبدوا آلهة الفراعنه و سقط منهم شهداء لا حصر لهم و لما أنتصروا عليهم أستعملوا أحجار معابدهم فى بناء الأديره و الكنائس ..
أعربت له عن دهشتى من هذا الاٍكتشاف اللى بالنسبه ليا اٍكتشاف يعنى فقال ببساطه :
- لا ما تستغربش .. كتير أوى من بيوت الصعيد القديمه مبنيه بأحجار المعابد و القصور الفرعونيه .. ماتنساش أن المنطقه بتسبح فوق بحر من الآثار الفرعونيه اللى لسه الكتير منها لم يكتشف و الأهالى بيكتشفوه بطريقتهم !!
خدوا بالكم يكتشفوه بطريقتهم دى حتقودنا لبوست قائم بذاته عن ميراث الأجداد اللى شايفينه الأحفاد حق طبيعى لهم و لا دخل للحكومه فيه و بيع يا لطفى و اٍعرضى يا متاحف العالم قطع أثريه نادره لم تسجل أبدا فى دفاتر هيئة الآثار .. بس ما يبرد القلب قليلا بصراحه أن هذه القطع النادره على الأقل تعامل بالاٍحترام اللائق بها مش بتترمى فى مخازن لتنهب و لا فى العراء علشان كلاب السكك تعمل عليها بيبيه زى ما شفت بعينيا و أتقطع قلبى على ما آل اٍليه الحال ..
نرجع مرجوعنا للممر العجيب الموصل للبئر المهجور ..
فى نهاية الممر على الشمال يوجد البئر و هو مغطى بغطاء حديدى كبير و يطل على كشك بيع التذكارات القبطيه اللى قلت لكم عليه فى أول البوست و البئر أصلا موجود فيما يشبه الصاله المربعه المغطاه و على جدرانها توجد كوات كبيره بيضاوية الشكل .. أهو :

رجعنا تانى عبر الممر الحجرى العجيب لبهو الأعمده الخارجى .. و الراهب بيشوى كان بيستكمل سرده الشيق لتاريخ الدير و اللى تقريبا بيتطابق مع ما ورد ذكره فى اللينك اللى فى أول البوست عن تاريخ الدير ..
و لما طلبت منه أزور القلالى ( جمع قلايه ) الخاصه بالرهبان و هو المكان المخصص لكل راهب للقراءه و الصلاه و التأمل اٍعتذر فى لطف و الحقيقه ما حاولتش أسأله هل ده بسبب قوانين خاصه بالرهبنه و لا لأنى مسلم علشان ما أحرجوش ..
سألته عن طبيعة حياته قبل ما ينخرط فى سلك الرهبنه فأجابنى فى اٍقتضاب :
- كنت بأشتغل فى سلك النيابه ..
متهيألى كده و الله و رسوله أعلم أنه كان وكيل نيابه .. و ما حبتش برضو أسأله عن صحة ذلك ..
اٍقتربت الزياره من نهايتها بعد ما قضيت حوالى 3 ساعات ضيف على الدير الأبيض و فى صحبة الراهب بيشوى الهادىء الوديع المثقف اللطيف دائم الاٍبتسام ..
و وصلنا عند الباب الخارجى للدير و بجوار كشك بيع التذكارات لفت نظرى تانى حاجه فرعونى كده واضح أنها متاخده هيلا بيلا زى ما هى كده من معبد فرعونى و مش عارف أيه فايدتها فى الدير :

و كمان لاقيت نقش قديم جدا باللغه القبطيه كتبه أحد الرهبان كتمجيد فى الله و قد بدأ فى التآكل للأسف الشديد كمعظم النقوش الحجريه البديعه اللى بتزين أسوار الدير بسبب الاٍهمال الشديد و عوامل الزمن .. و قد قدر الراهب بيشوى عمر هذه الكتابه بحوالى 1000 سنه !! أهيه :


و بالمره بقى لفت نظرى اٍعلان عن شريط اٍسمه فى اٍيديك حمايتى بيباع فى كشك التذكارات به ترانيم قبطيه للمنشده فاديا بزى ( هى اٍسمها كده ) :

و لما حان وقت الرحيل شددت على يد الراهب بيشوى مصافحا و شكرته بجد من قلبى على تعبه معايا و على الوقت الطويل اللى قضيته بصحبته فأبتسم كالعاده فى وداعه و دعانى للزياره مره تانيه فشكرته تانى و قلت له :
- اٍن شاء الله فى أقرب فرصه .. السلام عليكم ..
رد برضو باٍبتسامه :
- و عليكم السلام و رحمة الله مع ألف سلامه ..
غادرنا الدير .. و سرحت شويه و أنا أتأمل فى المنطقه المحيطه و أسأل نفسى كم من أحداث جسام شهدتها هذه المنطقه لما بدأت العقيده المسيحيه فى الاٍنتشار فى هذه البقعه و كم اٍصطدمت و تطاحنت بعقيدة المصريين الوثنيه و كم من نفوس أزهقت من الطرفين دفاعا عن العقيده بغض النظر عن ماهية هذه العقيده .. المصريين متدينين بطبعهم و بفطرتهم سواء كانوا وثنيين أو مسيحيين أو مسلمين و المصرى لا ملجأ و لا ملاذ له سوى الله فى حالة يسره أو عسره .. هو كده .. و يبدو أن ده شىء بيجرى فى دماء المصريين و موجود فى جيناتهم منذ بدء الخليقه ..
فى طريق العوده و قد بدأت الشمس فى المغيب لاحظت وجود مكثف للأمن فى كل الطرق .. و لما أستفسرت من أبو اٍسلام عن السبب قال :
- من يوم اللى جرى فى الشارونيه لما الناس جامت على بيوت البهائيين و حرجتها بالجاز و الحكومه مشدده جوى ..
- طيب شد حيلك شويه يا أبو اٍسلام عاوزين نوصل المركب قبل العشاء ..
أصل بينى و بينكم كنت عاوز ألحق حفلة عيد ميلاد الأستاذ نور الشريف من أولها .. و قد كان .. و ده بقى موضوع البوست القادم باٍذن الله حيث ستشاهدوا كليبات حصريه بجد بجد ستدهشكم :)
و تقبلوا شكرى و تحياتى ..

هناك 46 تعليقًا:

شمس النهار يقول...

ماشاء الله عليك ياعمرو
حواراتك جميله بجد
والاسلوب مش هتكلم عليه عشان الحسد بس
انت اتكلمت عن مليون قضيه في البوست ده كل قضيه عايزه مليون بوست لوحدها
صحيح انت بسلاسه كده اتكلمت عليها وشرحتها بيسر وبساطه
بس هي قضايا كبيره جدا
لو تحب اعددها لك لو عندك وقت يعني :)
والصور جميله جدا
ده تقرير صحفي من العيار التقيل يافندم
تسلم ايدك والكاميرا

♥نبع الغرام♥♪≈ يقول...

السلام عليكم ورحمة الله وبركاته
أستاذ عمرو
صباحاوك سكر وعسل ابيض ان شاء الله
متشكره قووى لحضرتك لسؤالك عنى
انا الحمد لله بقيت كويسه ورجعت ليكم تانى وبوست جديد كمان
هههههههههه
بس تعالى هنا ايه الجمال ده كله
رحله جامد وجميله قووى
والصور تحفه
ومعلومات فى قمة الجمال
بجد شوقتنى أشوف تلك الامكان الجميله
ومنتظرين
حفل عيد ميلاد نور الشريف على أحر من الجمر
هههههههههههه
تحياتى لك أيها المبدع
دمت بألف خير
إيناس

حاسوباتيه يقول...

بصراحه صور وموضوع رائع انا نفسي من زمان ازور الصعيد وكلمات حضرتك والبوستات الي فاتت كمان خليتني هتجنن واروح وربنا يسهل وازورهم

بسنت صلاح الدين يقول...

بجد مجهود رائع مشكور عليه ،خليتنا نعيش معاك الزياره لحظه بلحظه،و لقطات هايله،لكن عاوزه اقولك فعلا متستغربش معظم الاثار القبطيه او اللى بترجع للعصور المتأخره من الحضاره المصريه احجارها من احجار المعابد الفرعونيه القديمه ودى منتشره فى المنيا و الاقصر وباقى مدن الصعيد زى ماتفضلت فى البوست لأنها كانت بالنسبه لهم مواد للبناء نظرا للحاله التى عاشوها من اضطهاد و كمان لأن مصر فى اواخر عصور ازدهارها مكانتش بالثراء اللى بدأت بيه،يمكن ده اللى بيحير علماء الاثار فى الكشف عن المرحله الزمنيه فى بدايه العثور عن معبد او دير من الفتره دى لأختلاط الاحجار و الاثار من كافه الفترات و الأسر،لكن طبعا بيكتشفوها بخبرتهم الطويله،كمان عاوزه اقولك ليه بس تقول على سر بركه الدير انه بيعالج كل القضايا و المشاكل بكره تلاقى شعب مصر كله هناك مستنى الفرج،وكالعاده شوقتنا للبوست اللى جاى بس متتأخرش علينا

احساس طفلة محبة للرومانسية بس واقعية يقول...

قمة التناقض بين الحياة والموت
العبارة دى خلتنى بجد
زى ما اكون بشوف الصورة

بس انت متأكد انك انت اللى على اليمين
هاهاهاهاهاهاهاهاهاها
دا انا اتلخبطت من الجملة دى :)

زيارة ثرية جدا ومعلومات رائعة اضفتها لينا والفديوهات والصور والنقوش الكتير اذهلتنى جدا

متابعين معاك بجد بجد الرحلة دى كل بوست بتزيدنا تشويق ومعلومات وكأننا كنا فيها

تقبل مرورى

MǿиY El-Shreef يقول...

السلام عليكم

رووووعه يا عمرو

بجد عجبني اوي البوست والدير شكله تحفففففه الصور والكليبات عيشتنا معاك والله ف الواقع

حكايه النقوش الفرعونيه دي فعلا صحيحه الاثار مغرجة البلد يابوي :P

هههههههه

بس رحله ممتعه وباطن القصه ومضمونها مهم جدا جدا بحييك عليه

مستنيين البوست الجاي :)

صوت من مصر يقول...

يا بختك
والله نزلت اسيو ونزلت بلاد كتير وشوفت اديار بس خارجى بجد نفسى فى زياره داخليا زى حضرتك وعموما الحمد لله ان فى ناس بتفكر اننا كمسلمين ومسيحيين مصريين والحمد لله

صبرني يارب يقول...

يعنى ينفع الكلام ده ؟


اقعد احقد بقى احقد احقد مش معقول كده انا هاسود كده من الحقد ياا ستاذنا

سرد رااااااائع

وانا باموت فى المناطق الاثريه واعتقد لو قعدت فى القاهره او اماكن اثريه هايلموني من المتاحف كل يوم
هههههههههههههههههه

ما علينا يلا بسرعه هات عيد الميلاد بس هات تورته معاك بس خليها يوم السبت فى الفري بتاعي
عااااااااااااااااااا

خمسة فضفضة يقول...

السلام عليكم ورحمة الله وبركاته

استاذ عمرو وانا بقرأ البوست كان في دماغي ميت سؤال وسؤال عن حاجات كتير بس والله اول ما البوست خلص الاسئله اتبخرت

عموما انا كنت مستمتعه جدا بالاحداث وعيشتني فيها اكني كنت معاك

يلا مستنين عيد ميلاد نور وحكاياتك مع مطاريد الجبل يا بوي

سلام

شمس النهار يقول...

صباح الخير
الحقيقه البوست جميل
ولما علقت كنا الساعه تلاته الصبح مش عارفه الساعه في التعليقات عندك مش مظبوطه ماكانتش 2:28
المهم اتفرجت علي الصور تاني دلوقتي بصراحه جميله جدا جدا
بس لاقيت حاجه لطيفه جدا
كيش شيبسي داخل بين تيجان الاعمده الفرعونيه القديمه الثمينه
ماشاء الله
تلاحم حضاري بين ابداع الفراعنه القدام
والفراعنه الشبساويين :)

همس الاحباب يقول...

بسم الله ما شاء الله
اسلوبك فى شرد الاحداث رائع جدا جدا
والمكان جميل جدا بصراحة
وحوارك مع الراهب ممتع جدا
وذكرت حقائق كثيرة وقضايا شائكة جدا
ولمعلوماتك الخاصة مدينة اخميم تسبح على بحر من الاثار قد تفوق الاقصر
فمدافن الحووايش ومنازلهم مقامة على مدينة اثرية كاملة
وحقا ما قيل لك عن تلك الاثار
مع الاسف سوهاج من المحافظات الغنية بالاثار الغير ملحوظة والغير مهتم بها اطلاقا على الخريطة السياحية لمصر
الرحلة جميلة جدا واستمتعنا بالرحلة مع حضرتك جدا جدا
وفى انتظار المزيد
تحياتى لحضرتك

MaNoO يقول...

برغم اعجابى بكل حرف حضرتك قلته انما عايز اقولك متحكيش تانى حضرتك كدا هتشوقنا اكتر وأكتر اننا نروح ونزور الأماكن دى لاننا بجد عشنا فيها من خلال الأسلوب فى عرض الرحلة انا قاعد بجد بشوف صور فى خيالى من روعة الشرح منتظرين كمان وكمان وتقبلى احترامى

شاب كــ طخين ـــــا يقول...

والله رائع يا أستاذ عمرو
رحله ممتعه والصور جميله جدا
ربنا يكرمك
ومتابعين

عاشقه وغلبانه يقول...

انا معجبه بيك اوي اوي ..

دي اقل تعليق علي البوست والرحله

عطش الصبار يقول...

الحقيقه يا استاذ عمرو رحله جميله
تلقى الضوء على عادات وتقاليد المنطقه -اثارها-زراعتها وبصراحه اندهشت لان معظم معلوماتنا عن الصعيد انه شريط ضيق وجبال لاتصلح للزراعه ولكن ان يكن صالح للزراعه ويصدرايضا كانت مفاجاءه ساره
رحله اتابعها بشغف وفضول لانه لم يسعدنى الحظ انى ازور الصعيد مع ان جذورى من هناك
رحله بتكشف جمال الصعيدوناسه وارضه
وخيراته فى انتظار المزيد
تقبل تحياتى وشكرى لتشريفك مدونتى المتواضعه

عمرو يقول...

شمس النهار
صباح الخير يا برنسيس :)
أشكرك على الزياره و التعليق ..
و الحقيقه فعلا فيه مواضيع كتيره تستحق المناقشه و التأمل مش بس فى البوست و لكن فى مشهد الحياه بصفه عامه ..
بس يبدو أن رتم الحياه السريع اللاهث خلانا نمر على الأشياء برضو بسرعه و بدون تأمل للتفاصيل ..
أجد فى المدونات القدره الكامله على مناقشة قضايا كتيره و كبيره و غايه فى الأهميه بس ما يلفت النظر بحق ان أغلب المدونات تتحدث عن أمور شديدة الخصوصيه بأصحابها و ده بيحجم من كم القضايا المطروحه للمناقشه ..
دمتى بكل خير و سلامتك 1000 سلامه :)

عمرو يقول...

عاشقة الأحزان
أهلا و سهلا بيكى و أشكرك على الاٍطراء
فعلا الرحله كانت جميله بالنسبه لى جدا جدا و مفيده أيضا ..
بوست عيد ميلاد نور الشريف حينزل قريب جدا جدا
اٍستعدوااااااا :)

عمرو يقول...

حاسوباتيه
فعلا الصعيد جميل جدا جدا و مكان يستحق الزياره و لكنه للأسف مش واخد حظه
أهلا و سهلا بيكى :)

عمرو يقول...

بسنت صلاح الدين
فعلا كلامك مظبوط و دى حقيقه كانت بالنسبه ليا جديده و مثيره و أعتقد للكثيرين كمان ..
عجبتنى فكرة الترحال للدير علشان حل المشاكل :))
أشكرك للزياره و التعليق ..

بلاش فضايح يقول...

حضرتك ماشاء الله اسلوبك فى كتابة الموضوع مع الصور جميلة اوى
هو حضرتك صحفى ولا ايه؟
بس فعلا كل سطر فيه معلومة غير التاني
كلام واسرار جديدة عليا انا شخصيا
زى الجسد اللى مختفى تحت العامود

تقبل مرورى

عمرو يقول...

احساس طفلة محبة للرومانسية بس واقعية
أشكر للاٍطراء متشكر جدا ..
و فعلا كانت الرحله بالنسبه ليا تجربه ثريه و مفيده ..
تابعى البوستات اللى جايه اٍن شاء الله حتعجبك أوى :)
تقبلى نحياتى

عمرو يقول...

مونى الشريف
دى مغرجه البلد جوى جوى و بالزوفه يا بوى :)
أشكرك يا مونى و تابعى اللى جاى فيه مفاجآت كتيره .. و تقبلى شكرى و تقديرى ..

عمرو يقول...

صوت من مصر
فعلا السياحه الداخليه مهمه جدا و يا ريت نلتفت لها لأن هى دى الدخل الحقيقى للساحه رغم المعوقات الكبيره اللى بتواجهها و ده حأتكلم عنه برضو فى البوستات القادمه اٍن شاء الله
تقبل تحياتى و شكرى لزيارتك و تعليقك ..

عمرو يقول...

صبرنى يا رب
اٍحقدى يا ست أم خالد و لا يهمك كلنا و الله عاوزين نسافر و نبعد عن المدن و اٍحنا أساسا فى القاهره أسودينا بالفعل بس مش من الحقد لكن من عادم السيارات و مداخن المصانع و محلات الكباب ..
متشكر أن أسلوب السرد عجبك و ترقبى ما هو آت :)
خالص تحياتى و تقديرى ..

عمرو يقول...

خمسة فضفضة
أهلا و سهلا بيكى و أشكرك للاٍطراء
بس ليه الأسئله تبخرت ؟؟ هل ده عيب فى البوست و لا أيه مش فاهم أرجو توضحى لى ..
المطاريد دول يقى حكايتهم حكايه حأحكيها و ربنا يستر :))
أشكرك يا دكتوره للزياره و التعليق ..

عمرو يقول...

شمس النهار
يعنى يا برنسيس أنتى زعلانه علشان كيس شيبسى مرمى بين الأعمده ؟؟؟!!
أمال لو شفتى الجاموسه اللى صاحبتها رابطاها فى عامود جرانيتى عليه نقوش بترجع لعصر الأسره ال19 كنتى عملتى أيه ؟؟
و لا لو شفتى العملات الأثريه اللى الستات فى شندويل خارمينها و مزوقين بيها الشجه اللى لابسينها ؟؟
ده أنا شفت العجب و الله يا برنسيس ..
تحياتى لك و شرفتينى و شرفتى المدونه اللى كان المفروض أفرشها فل و ريحان لزيارتك ليها مرتين فى بوست واحد :)

عمرو يقول...

همس الأحباب
بارك الله فيك و عليك يا أخى الفاضل
أنا بقى زرت الحواويش و قضيت فيها وقت ممتع جدا جدا و شفت بعينيا حاجات لا يمكن كنت أتخيل أنها حقيقيه !!!
أشكرك يا عزيزى للاٍطراء و للزياره و التعليق :)

عمرو يقول...

مانو
أشكرك يا عزيزى أخجلتم تواضعنا و الله :)
بجد لابد فعلا من زيارة الصعيد و التوغل فيه و ليس فقط الاٍكتفاء بالمحافظات و المدن الكبيره لأن القرى و النجوع مليانه حاجات جديره بالمشاهده و الزياره ..
أشكرك و أهلا بيك ..

عمرو يقول...

أمبارح كان عمرى عشرين
متشكر بك جدا .. و متشكر أنك بتشجعنى و متابع الأحداث :)
بارك الله فيك و أهلا و سهلا ..

عمرو يقول...

عاشقة و غلبانة
متشكر يا دكتوره بارك الله فيكى ..
تابعى البوستات القادمه و اٍن شاء الله تعجبك ..
تقبلى تحياتى و تقديرى ..

عمرو يقول...

عطش الصبار
أهلا و سهلا بيكى و متشكر جدا للاٍطراء ..
الصعيد بمكوناته كلها بأشوف فيه تركيبه خاصه جديره بالدراسه و التأمل و هو فعلا لايزال مجهول تقريبا بالنسبه لينا و يمكن ساعد على ده المسلسلات و الأفلام اللى بتجيب للمتفرج عته و هبل نصفى و أحيانا رباعى لأنها بتصور الصعيد بصوره مخالفه تماما للحقيقه ..
تقبلى شكرى و تقديرى و أهلا بيكى ..

عمرو يقول...

nona
أشكرك للمجامله الطيبه اللى رفعت روحى المعنويه :)
أنا مش صحفى و لكنى أشتغلت فتره فى الصحافه فى مقتبل حياتى فى مجلة صباح الخير و فى جريدة الملتقى الدولى و ليا عندهم مرتب 4 شهور بقاله حوالى 20 سنه حار و نار فى جتتهم ..
متشكر جدا لمرورك و تعليقك و أهلا بيكى و سهلا ..

دعاء يقول...

أنا سعيدة لتعليق حضرتك فى مدونتى بس سعيدة أكتر عشان لقيت مدونتك الجميلة والممتعة دى.
طبعا الكل اتكلموا على اسلوب حضرتك الرائع وانا متفقة معاهم طبعا.
تمنياتى بدوام التوفيق و إلى الأمام إن شاء الله.
دعاء

أمل حمدي يقول...

ما شاء الله يا عمرو

رحلة رائعة وشرح أروع

تسلم يا رب يا عمرو

تقديري

عمرو يقول...

دعاء
أنا اللى متشكر ليكى على الاٍطراء ز الزياره و التعليق ..
أنا كمان أستفدت جدا من مدونتك و لى عوده لها اٍن شاء الله ..
تقبلى تحياتى و تقديرى ..

عمرو يقول...

ماما أمولة
ألف شكر يا ماما .. ربنا ما يحرمناش من زيارة حضرتك و تشريفك للمدونه ..
تقبلى خالص تقديرى ..

الازهرى يقول...

الرحلة كل مرة بيبقى شكلها احلى واحلى وبتخلينى اتحسر على اننا فى امتحانات

فى انتظار السبق الصحفى القادم

غير معرف يقول...

مرحب بحضرتك فى الصعيد....يا رب يكون عجبك
المهم معلومات غايه فى الاهميه وبوست قيم بجد....بس للاسف فيه صوره مكرره للاهمال اللى بتحظى به كل اثارنا...يظهر ان من كترها موش عرفين قيمتها
دمت بخير....تقبل مرورى

Unknown يقول...

اولا
حلو اوى ان حضرتك سعيد
ثانيا بجد شكرا للمعلومات الغزيرة عن تلك المنطقة وعن الدير وما صادفت هناك من حسن الضيافة والتعريف بالدير ومشاركتنا تلك اللحظات
بجد شئ ممتع
شكرا لك

حـنــّا السكران يقول...

الله عليك و على جولاتك و على اسلوبك و على عدساتك كمان يا عمرو ..

أنا من فترة مش قليلة و انا بستفقدك و بقول الرجل ده بيروح فين ..أجي ألاقيك في زراعة أو سياحة .. المهم بتعمل حاجة جميلة ..
شيخ الشباب انت يا عمرو .

ابو بدر الدين يقول...

سلام الله عليكم ورحمته وبركاته
انا مشك هتكلم
لاني بعد ما قرأت هذا البوست كلامي ملوش اي طعم
بصراحة عرض ممتاز
والله انتي حببتني اروح الصعيد
تحقيق صحفي وملف قيم جدا
وسلالل ل ل ل ل م م مم م م

Unknown يقول...

السلام عليكم ورحمة
الله تعالى وبركاته
شكرااااااااااااا
والله ما لاقيه كلمة
تانية اقولها تعبر
عن شكرى للرحلة
الجميلة دى اللى
لو حتى قدر لىّ اروحها
ما كان حيصطحبنى
الاب بيشوى هذا
لانه واضح انه
ما بيمشى الا
مع الناس المهمين
زى حضرتك ياأستاذ
عمرو .مرة تانية شكراً

Unknown يقول...

المهم بقى انهم
بيلوموا علينا
ان (المسجد الازرق )
اللى فى تركيا بُنى
على انقاض كنيسة
(آنا صوفيا)طب
ماهم المثال بتكرر
لكن لا حس ولا خبر!
اما عن اثارنا
المرميةعلى كل جنب
ومتعرضة للسرقة
وللنهب وللمطر
فحدث ولا حرج
ياأستاذنا.

Kiara يقول...

الله ماشاء الله ولا حول ولا قوة الا بالله

البوست جبااااااااااااااااار

انا اتاخرت في الرد قريته علي يومين

والصور مدعماه جداااااااااااااا

كل سنة وانت طيب

kochia يقول...

استمتعت جدا وانا بقرأ الموضوع ده
والصور كمان رائعة
المرة الجاية عاوزين نعملها رحلة وانت تبقي المرشد وتودينا الحتت دي
وهنلتزم الهدوووووء

فشكووول يقول...

عمرو بك
الله على الزياره الجميله
بس عايز اقول لك ان فعلا الرهبنه طلعت من مصروان الرهبان كانوا بيفروا بدينهم من اضطهاد الفراعنه لهم بسبب ديانتهم الجديده ومنها اخذ العالم كله عن الرهبنه المصريه
كمان على شاكلتهم المتصوفين اللى كانوا بيهاجروا من مساكنهم الى اماكن يعبدون الله فيها بعيدا عن الناس
كمان العسل الجبلى مشهور بانه احسن الاعسان لان رحيق الزهور فيه مركز ولم يدخله اى شوائب
والمعلومتين صحيحتين ( الرهبنه والعسل)
وتحياتى