~SUN~ Pictures, Images and Photos

الأربعاء، 6 مايو 2009

من الصعيد الجوانى .. (2) جباطنة النيل و حكاويهم !!

مساء الخير ..
بينى و بين البحر و المراكب عشق و هوى قديم ..
يمكن ده بيرجع لنشأتى منذ طفولتى فى مدينة الجزائر العاصمه اللى هى مدينه ساحليه من أجمل و أرقى المدن الساحليه فى العالم على حسب رأيى المتواضع ..
و يشاء المولى أن تكون فترة دراستى الجامعيه فى مدينة الاٍسكندريه حيث تبلور و تعمق حبى للبحر و عشقى للمراكب اللى كنت بأهوى متابعتها و اٍبحارها و عودتها محمله بالخير بالقرب من القلعه فى بحرى ..
و حتى لما ربنا فتح عليا من حيث أدرى و من حيث لا أدرى كانت فكرة اٍمتلاك يخت تراودنى و تقض مضجعى حتى توكلت على الله و بدأت فى بناء يخت رائع بدورين و طوله 22 متر عند الحاج صلاح السمبوسكانى أشهر صانع يخوت فى العالم و ورشته فى مدينة عزبة البرج .. و كان حلمى أن أطوف بحار العالم من شرقها لغربها على ظهر هذا اليخت و لكن للأسف تحطم هذا الحلم على صخرة الاٍرهاب اللى ضرب الأقصر من كام سنه كده و سحب البنك حصته فى تمويل بناء اليخت و ذهبت هذه الأمنيه أدراج الكازوزه ..
و لكن ده لم يوقف عشقى لحياة البحر و الحياه فوق سطح المراكب ..
و خضت تجربة تعلم الاٍبحار و قيادة اليخوت على يد الكابتن خالد الحنينى صاحب و قائد اليخت جنوه ستار اللى لما أطمأن لقدرتى على الاٍبحار السليم الآمن سابنى أقوم لوحدى بعدة رحلات باليخت و على متنه عدد كبير من السائحين هواة الغطس فى مياه الغردقه .. و كانت تجربه لذيذه أوى :)
و ما أنساش كمان يخت الغطس الرائع الفارس المينا اللى قضيت عليه فتره لا تنسى من حياتى برضو فى الغردقه و بدون مقابل و الله و لكن حبا فى حياة البحر ليس اٍلا .. و ضرغام 1 و 2 فى شرم الشيخ اللى كانوا أصحابهم دمايطه على منايفه (نمايه صغنونه على الماشى من غيظى منهم) و كانوا بيسيبوا طاقم المركب من غير أكل معتمدين على الصيد من البحر علشان ياكلوا لحد ما أتبهدلوا و بقوا مظهرهم كالقراصنه العتاه ..
عشقى للبحر و المراكب لم تنطفىء جذوته بداخلى أبدا ..
حتى بعدما وهن العظم منى و أشتعل الرأس شيبا لسه بأشتاق لشعور لحظة الاٍبحار و لشعور لحظة الرسو على الأرض بعد الغياب ..

فى رحلة الصعيد ..
سعيت للتعرف على كابتن الفندق العائم سوبك .. و بعد محاولات و مراسيل بينى و بينه وافق على مغادرة كابينة القياده اللى لا يفارقها أبدا و اللى ممنوع منعا باتا صارما على أى مخلوق كائنا من كان أن يخطو عتبتها سوى الكابتن و مساعده و دى أوامر صارمه ليس فيها شبهة هزار ..
أنتظرته على سطح المركب بجوار حمام السباحه و قد صار مكانى المفضل :)
و فوجئت برجل صعيدى مهيب يرتدى الزى الصعيدى و يسير كفرعون خرج لتوه من جداريه مصريه قديمه !!


الباشريس عبد الرحيم على اليمين و الريس على قبطان المركب سوبك


بعد السلام و الترحيبات عرفته بنفسى و عرفنى بنفسه بلهجه صعيديه قحه لا تخلو من الزهو : أنا الريس على قبطان سوبك و الأميره ..
- ................ ؟
- بقالى أكتر من 45 سنه بأبحر فى النيل يا ولد عمى من بحرييه لجبليه .. بدأتها مع أبوى الله يرحمه على مركب شراعى و غويت البحريه و الفرجه على النجوم بالليل لما بجيت أتكعبل لما أمشى على البر !! حفظته شبر شبر بجزايره بهيشه بشحطاته لمن بجيت ريس مركب شراعى كد الدنيا ..
- ................ ؟
- من المنيا يا بو خالو .. و كل رويس بواخر النيل من المنيا .. و أيوه متجوز و عندى ربنا يعطيك 6 رجاله و بت .. عأجضى على الباخره وجت كبير يمكن شهور فى وجت الموسم و أكل العيش أكده ..
- ............... ؟
يسرح لبعيد بعينيه و يقول :
- طبعا عأحن للبيت و العيال و المره بس الباخره بجت بيتى و الطاجم بجوا عيالى و الركاب ضيوفى و كلو متسطر ع الجبين ..
- ............... ؟
- الفرج بينى و بين كابتن مركب البحر المالح كبير جوى جوى .. أنا عأمشى بالليل ع النجوم و الجمر و هو بيمشى ليل و نهار ع البوصله و الجهاز (قصده جهاز تحديد الأماكن بالقمر الصناعى) .. و أنا طول الرحله بأبجى صاحى و حافظ خط سير المركب لتشحط و لا تخش بين الجزاير و أبجى خربت الدنيا .. ده غير الهيش و ورد النيل اللى لو دخل ع الرفاص يبجى جول على المواتير يا رحمان يا رحيم .. حج ربنا يا أستاذ ريس النيل أشطر من ريس المالح .. طب جيب اٍكده ريس مالح و جوله عدى من هويس جنا (قنا) يمين بالله العظيم ليطربج المركب باللى فيها !!
- .............. ؟
- لع ما تفرجش معايا كتير ريح و لا موج .. موج النيل حنين على المركب زى يد المره الحنينه اللى تملس على يد راجلها الخشنه المشججه !! بس اللى بأعمله ألف حساب دوامات الهويس اللى لو الريس أستهون بيها ممكن تلفلف منه البوز و تبجى مصيبه .. دوامات النيل لازم الريس يجف لها على حيله و هو بيعديها و يحترمها و ما يستهونش بيها واصل ..
عند هذه النقطه أنضم لنا رجل صعيدى كبير فى السن تبدو عليه المكانه المرموقه و وقف الريس على اٍحتراما و سلم عليه بتوقير شديد و قدمه لى :
- الباشريس عبد الرحيم .. كبير جباطنة النيل ..
سلمت عليه بمزيد من الاٍحترام فرضه هذا اللقب الكبير : كبير جباطنة النيل !!
يعنى ده أكيد حاجه كبيره بقى .. (قلت كده فى عقل بالى)
- ............. ؟
قال الباشريس عبد الرحيم :
- طبيعة شغلى يا أستاذ أنى أجدم ريس فى النيل بحاله من شماله لجنوبه .. و عأفتش على المراكب التابعه للشركه و عأنظم الأجازات و ساعات الشغل للطواجم .. شغلانه صعبه و الله يا ولدى و كلها مشاكل و مسئوليات كبيره جوى جوى بس ربك المعين ..
- ............ ؟
- المركب دى بحوالى 15 مليون جنيه .. و فيها 3 مواتير الواحد منيهم بمليون و نص و كل ده مسئولية الريس و بيمضى على اٍستلامها سليمه و شغاله تمام و بيبجى مسئول عن كل كبيره و صغيره فيها و لو خرب فيها حتى لوح جزاز بيبجى هو المسئول عنه ..
- ............ ؟
يجاوب الريس على :
- لما بيبجى معانا سواح أجانب فى رحلات طويله أسبوع و لا 3 تيام بيطلبوا يجابلوا الجبطان .. و بيتفاجئوا لما بيلاجوه راجل صعيدى بالجلابيه و العمه و بيتصوروا معانا و بيبجوا فرحانين جوى بالزات الحريمات !!
يضحك و يقاطعه الباشريس عبد الرحيم بلهجه ذات مغزى :
- فاكر يا ريس على المره الخوجايه اٍياها ؟؟
يجيبه الريس على ببراءه :
- مين فيهم يا باشريس ؟؟
- ............. ؟
سرح الباشريس بعينيه لبعيد شويه و قال بلهجه لا تخلو من السخريه :
- عبد الناصر الله يرحمه حاول يعملها .. و جاب رجاله بحريه بالبدل البيضا و الكابات علشان يسوجوا مراكب النيل جال أيه علشان يبجى مظهرهم مشرف جدام السواح الأجانب .. بس البحاروه ما سلكوش مع النيل و جالو حجنا برجابينا و رجعوا تانى ع المالح و ماشفنهمش بعد اٍكده ..
- ............. ؟
- الأول كان فيه رحلات مراكب بتجوم من مصر (القاهره يعنى) لمن لحد أسوان .. بس جه وجت كان الاٍرهابيين بيصطادوا المراكب عند أسيوط و يضربوا عليها نار و يداروا فى الجبل زى الحريمات فوجفوا الرحلات دى و بجت الرحلات تجوم من الأجصر (الأقصر) لأسوان و تحت حمايه شديده جوى ماتخرش المى ..
- ............ ؟
قالوا ألتنين فى نفس واحد :)
- الجبض جليل و الله يا أستاذ حكمن الموسم نايم و السياحه مش كد اٍكده .. أنا اللى اٍسمى باشريس النيل جبضى ما يعديش الألفين جنيه !!
- لع يا باشريس جبضك ألفين و تلتمية جنيه ..
- لع يا ريس على جبضى 1900 جنيه ..
- لع يا باشريس و عليا اليمين جبضك ألفين و تلتميت جنيه و أنى اللى جبضى 1800 جنيه !!
- جولتلك لع يا على و ما تعارضنيش واصل ..
أوباااااااا وقعوا فى بعض .. و العرق الصعيدى طج يا بوى و أبتدت رجابيهم تتنفخ ماعرفش كيف فقلت و أنا بأضحك علشان ألطف الجو بعد ما أتكهرب فى ثوانى :
- ما تطلبوا لنا شوية شاى حبر نعدل دماغنا بيها و صلوا على النبى كده ..
سكت الأتنين عن المناقره و قال لى الباشريس عبد الرحيم و على وجهه اٍبتسامه مشرقه و قد تبدلت حالة الغضب عنده فى ثانيه ككل أهل الصعيد :
- لع .. جبل الشاى الحبر لازمن ناكلو لجمه الاول .. أكل المراكب ده ما ينفعش معانا .. اٍحنا دابحين جدى و عاملين عليه فته و ملوخيه .. جوم معانا و يبجى عيش و ملح ..
أعتذرت له فى لطف لأرتباطى بميعاد زياره لأحد الأديره الأثريه فى حضن الجبل الشرقى فتبدلت وجوهم تانى فى ثانيه و فوجئت بالريس على يقول غضبان :
- طب و عليا اليمين يا أستاز لازم تاكل معانا عيش و ملح بلا دير بلا غيره .. أتغدى معانا الأول أكل بيتى و بعدين روح ميعادك !!
و لم أجد فكاكا من عزومتهم و الحقيقه أن أكل فنادق ال5 نجوم ماكنش جاى على هوايا أوى يعنى برغم جودته و كمياته المهوله فبريت نفسى بحتتين نيفه و طبق فته معمول بالعيش الشمسى الصعيدى و اٍحنا التلاته قاعدين على مقدمة المركب فى الحته الشهيره بتاعت صورة اٍعلان فيلم تيتانيك :))
و بعد الغدا و الشاى الحبر جه أبو اٍسلام السواق بالعربيه ليصحبنى فى رحله خرافيه قد لا تتكرر فى الحياه مرتين للدير الأبيض القابع فى هدوء و سكينه لا نهائيه فى حضن الجبل الشرقى حيث شاهدت بعينى ما كنت لا أصدقه أبدا و حيث قضيت ساعات مع الراهب بيشوى اللى لا يمكن أن ينسى أبدا .. و ده موضوع البوست القادم ..
و تقبلوا شكرى و تقديرى ..

هناك 27 تعليقًا:

شمس النهار يقول...

بصراحه انا فعلا ماصدقتش عينيه
لما شفت صورة القبطان

بس ايه اخر شياكه والله والجلابيه مكويه وايه

شفت لما اتكلم علي المركب والتيار
شفت التشبيه والبلاغه

بجد ياعمرو الناس دي جميله جدا
وبشكرك انك بتعرف الناس بوجودهم

ده غير طريقتك في الكتابه الجميله

وبعدين كده كنت هتعمل فتنه علي سطح النيل
بس برضه ماعرفناش هو بيجبض كككام

بسنت صلاح الدين يقول...

يابووووووووووى،بوست حلو اوى اوى،الحقيقه عاوزه احييك على انك حفظت كل الكلام الصعيدى ده بسرعه رغم صعوبته،مستنيين بوست الدير و الراهب بيشوى،بالتوفيق

شاب كــ طخين ـــــا يقول...

السلام عليكم
حوار جميل اوى ياأستاذ عمرو واللهجه بقت جميله معاك :)

هههههههههه وأجمل حاجه انك هديت النفوس بينهم فى الأخر والقبض بقا عمال يطلع وينزل

احساس طفلة محبة للرومانسية بس واقعية يقول...

واااااااو

الله بجد دى رحلة ممتعة جدا
كويس انك بتحكيلنا بعد ما رجعت
عشان يعنى احنا مش بنحسد ولا كنا نتمنى نكون فى مكانك ونتعرف على العالم دا اكتر ولا اي حاجة

هاهاهاهاهاها
انا اعرف شوية عن الصعيد بس طبعا اللى انت بتحكية دا بدقة وتفاصيل وتعمق اكتر بكتير من اللى نعرفة

شكرا ليك عشان بتشاركنا تفاصيل الرحلة دى
متابعين معاك

تقبل مرورى

♥نبع الغرام♥♪≈ يقول...

السلام عليكم
جميل قووى وحكايه وقصة جميله من واقع حقيقى
الله عليهم بجد ناس هايله الوحدة إشتاقة تروح تقعد معاهم ونعمل زياره بقا قريب ان شاء الله
ربنا يوفقك يارب
والكلام فى قمة الروعه والشياكه
ربنا يعزك
تقبل تحياتى
إيناس

عمرو يقول...

شمس النهار
أهلا و سهلا يا برنسيس :)
أيوه طبعا آخر شياكه و وجاهه مش قباطنه :)
التشبيه ده فعلا لفت نظرى و لفت نظرى بالأكتر شدة رقة و رومانسية رجال الصعيد كطبع متأصل فيهم و اٍن بدوا على العكس من كده و لكن دى الحقيقه فعلا ..
بس برضو ما عرفتش كل واحد فيهم بيجبض كااااام ؟؟ :))
شرفتى و نورتى و أهلا بيكى دايما ..

عمرو يقول...

بسنت صلاح الدين
أهلا و سهلا بيكى ..
أشكرك و الله أخجلتم تواضعنا و بجد البوست القادم اٍن شاء الله حيبقى حلو أوى أو هكذا أرجو ..
متشكر لزيارتك ..

عمرو يقول...

أمبارح كان عمرى عشرين
أهلاااااا أزيك ؟؟ و الله وحشتنى و كنت عاوز أقول لك مبروك على الوظيفه و أنا متأكد أنك حتثبت جدارتك فيها بغض النظر عن ظروفها ..
أيوه فعلا ماعرفتش لحد دلوقتى حقيقة الرقم اللى أختلفوا عليه :))
دمهم حامى يا عم و بيقلبوا فى ثوانى خلينا فى حالنا :)

صبرني يارب يقول...

انت عارف البوست الى فات

لما قلت الريس علي

قلت ازاي قبطان والريس علي يعنى

وبعدين افتكرت ان مره بابا قالي ان الصعايده فى الاقصر والاسوان زي ما بيعرفوا كل متر فى الجبل
عارفين كل متر فى النيل

وبيمشوا ويسافروا بلانشاتهم فى النيل

ده كان فى اطار نقاش دار عن مشروع بابا اقترحه على المحافظ المعدول بتاعنا البائد عشان يعمل اتوبيسات نهريه ترحم الطرق شويه

واتعمل دراسه واتصرف عليها وادي وش الضيف وابقى قابلنى لو حاجه حصلت


المهم

بوست رائع رائع رائع

وكل شويه باتغاظ اكتر واكتر

ماليش دعوه بقى

وايه ده عمال جايب البحر شمال ويمين ماليش دعوه انا بقى

انا بامووووووووت فى البحر بس اقصى ما فعلته ركبت لانش فى دبي مره

وباركب المعديه وانا راحه طلخا
هههههههههههههههههههههه

لا لا وباصطاااااااد من اي مايه تقابلنى نيل بحر اي حاجه وياما جبت سمك الصراحه

يلا بسرعه عشان احنا اتعلقنا تعليقه جامده

عمرو يقول...

اٍحساس طفلة محبة للرومانسية بس واقعية
بجد على الرغم من قصر المد اللى قضيتها فى الصعيد لكن أختزنت بعقلى ذكريات و خبرات لا بأس بها و بجد مطلوب مننا أن لا نفوت فرصة التجول فى أى مكان جديد و نتركها لأنها بتكون فرصه لا تعوض ..
عارف أن أنتم مش بتحسدوا و لا حاجه لا سمح الله يعنى :)
و أهلا و سهلا بيكى ..

عمرو يقول...

عاشقة الأحزان
أشكرك و الله على الاٍطراء أخجلتم تواضعنا :)
فعلا الترحال مهم جدا من وقت للتانى و بأناشد الجميع عدم تفويت أى فرصه للسفر و التعلم و المشاهده لأنها تجارب حتفيده جدا فى حياته ..
تقبلى شكرى و تقديرى ..

MǿиY El-Shreef يقول...

ماتوقعتش ابدااااااا ان القبطان يكون كده

يالهوي ع الهيبه الي تحسها فيه

شكلهم ناس جدعه وطيبين كده

وكلامه عجبني اوي خصوصا عن عدم الاستهانه بالنيل

وطريقتك ف الكلام ماشاء الله والله خببت الواحد ف السفر بالبواخر عموما

مستنيين الباقي :)

عاشقه وغلبانه يقول...

حرام عليك انا في كلمات وقفت عندها ومش عارفه اقراها
كنت ترجم
معاك ناس ثقافتها محلاوي بس ياكبير
اهئ اهئ

وبعدين انا عايزه رحله من دي ماليش دعوه

Unknown يقول...

الله ياأستاذ عمرو
تسلم ايدك وعينك
والكى بورد بتاعتك
كمان اللى عملت لنا
الرحلة الحلوة اووووى
دى انا بقيت كأنى قاعدة
معاكم حاسه وشايفة وسامعه
(الجباطنة)وهم بيتكلموا.

Unknown يقول...

بس جولتلى جعدتك المتفضلة
بجت فين يابوى:):):)امممممم

مسدس صغير يقول...

بجد حياة لذيذة اوى حياة البحار دى
بحب البحر جدا جدا
على الرغم ان انا من المنصورة يعنى تقريبا مش بلد ساحلى ولا حاجة بس البحر ده غرام.
بجد الواحد كان مستمتع بالحوار اللى دار بينك وبين الريس القبطان ده
الناس دى حاجة جميلة جدا.
مع البساطة الا انه عنده عزة نفس وضحت فى حواره.
احييك على البوست الرائع

SHAPE YOUR LIFE (ABOALI) يقول...

المعدن والاصول

فعلا يطلق على هولاء ذلك
حفروا باءيداهم نبضات قلوبهم وارتحلوا فيها
فكانت لهم بحرا ونيلا
اخلصوا العمل ولم تغيروهم الوان الدينا
وتمسكوا بالهويه
فاحترمهم الجميع
تواضعوا فارفعوا فوق الاعناق

السباحة فى عقول هولاء ستكون متعة خاصه لكل غواص
الحديث عن النيل وما يحويه
لهو حديث ثرى ذو شجون و بسمات

نعم كان البوست طويلا
نعم كان البوست حواريا

ولكنى سعدت به وبقراءته
فالمتعة لها مذاق
وكم كان المذاق
هنيا"

على الرغم عدم عزومتى على الفته
بس انت الكريم وانا اللى استاهل

أم أحمد المصرية يقول...

صديقي الجديد
السلام عليكم و رحمة الله
دي مش تدوينة يا عم ده ادب رحلات
بجد
استمتعت جدا بالقراءة لدرجة اني بعد ما قرات التدوينة دي رجعت قرأتالتدوينة اللي فاتت عشان اجيب الموضوع مناوأوله
ان شاء الله بداية تواصل دائم

أنترنتاوي يقول...

بالتوفيق
مدونة حلوة جدا

همس الاحباب يقول...

ههههههههه
لا بما انى صعيدى ومن سوهاج كماان
احب اشكر حضرتك على هذا الموضوع
وفعلا سوهاج بلد جميلة جدا وكذلك محافظات الصعيد بس مع الاسف بعد المسافة بين القاهرة والصعيد جعل الصعيد فى المؤخرة دائما
اتمنى انك تكون استمتعت برحتك فى الصعيد
وزرت اماكن جميلة فى سوهاج
على فكرة انا تابعت البوستات من اولها يعنى من بداية الرحلة وباذن الله مستمر حتى النهاية
على فكرة انا تحدثت عن سوهاج فى بوستين قريب
والناس مش مصدقة ان سوهاج كده
مطلوب شهادتك
ههههههههههههه
http://hams07.blogspot.com/2009/04/1.html
http://hams07.blogspot.com/2009/04/blog-post_17.html
تحياتى وتقديرى

MaNoO يقول...

أنا أول مرة ادخل مدونة حضرتك
وان شاء الله نتواصل دائما
البوست عايشنى فى جو الصعيد وحسسنى انى لازم اروح الأقصر وأسوان حالا لان ربنا لسة ماأرادش انى ازورهم عارف الصعايدة دول هما فعلا اللى سة بحس فيهم بالأصل المصرى طبيعتهم فى الكلام ولا اسلوبهم فى قيادة المراكب مثلا اللى محدش قارد يبقى زيهم والله انا افتخر بزيهم دا لأنه دليل على مصريتهم الخالصة منتظرين المزيد وتقبلى احترامى

من غير عنـــوان يقول...

هما دول أهل مصر اللي بجد
بارك الله لهم

حوار ممتع

شكرا على الرحله يا سندباد المدونين

عطش الصبار يقول...

حلوه الرحله و
1صوره ناصر
2 والجمله الى قالها الريس على عن دومات النيل وحسيتها رساله الدومات مصيرها تبلع اللى بيستهونو بيها
الصعايده ناس عارفه النيل وبيحترموه عشان كداالنيل بادلهم الحب والاحترام واداهم اسراره
عايزه افكر الباش ريس عبد الرحيم ان عبد الناصرجاب رجاله بحريه سمر بالبدل البيضا سلكو مع الخواجت وقدروا يحرروا قنالنا حسيت ان قلمك بيرصد ناس مصر الحقيقين اتمنى تشرف مدونتى الوليده بوست رائع

الازهرى يقول...

فكرتنى بايام جميلة فعلا
البحر له ذكريات كتيييييييييير

وعلى فكرة احنا جنبنا بره ترسانة مراكب نيل انما جميلة قوى واحيانا لما اكون فى اجازة اروح اقعد على النيل معاهم وبتبقى حكاوى حلوة وجميلة وقاعدة للصبح

فى انتظار المزيد

حياه بلا عنوان يقول...

السلام عليكم
بصراحه انا اول مره ادخل المدونه بس بصراحه مش هتكون الاخيره لان فيها كلم كتير وجميل وفعلا الحياه دى بتكون حياه جميله قوى وبتكون بسيطه ومحدش بيفكر يغيرها بجد بوست جميل ومدونه اجمل تحياتى
حياه بلا عنوان

خمسة فضفضة يقول...

السلام عليكم ورحمة الله وبركاته


ياسلام علي الرحله الجميله والصحبه الاجمل

مش كنت تعمل حسابنا فحتة نيفه ولا شوية ملوخيه

بس عاوزة اعرف انت بتحكي من الذاكره ولا كنت مسجل الحوار ؟؟


سلام

Kiara يقول...

حسيت اني سمعه نغمة كلامهم بجد بوست تحفه