~SUN~ Pictures, Images and Photos

الثلاثاء، 31 مارس 2009

تاج ..

بنتى الدكتوره عاشقه و غلبانه أهدتنى هذا التاج الظريف و هو فعلا عجبنى :) فلاقيت من واجبى أنى أجاوب عليه بصدر رحب و عقل منفتح و بأشكرك يا دكتوره و نسأل المولى التوفيق ..
- اٍسمك ؟
عمرو بدر ( ده اٍسمى الحقيقى )..
- المشهور بيه وسط اصحابك..؟؟؟؟
هو برضو عمرو بدر من و أنا طفل تفريقا بينى و بين زميل الدراسه و صديق الطفوله عمرو عباس .. بس بأنبسط أوى لما بأتنده بأبو على :)
- سنك..؟؟؟
السن مش بيتحسب بالسنين و لكن بكم الخبرات المتراكمه و المختزنه فى البعد البؤرى للاٍنسان الأنوى النادر الوجود :))
- مجال دراستك...؟؟؟
ليسانس آداب لغة عربية و لغات شرقية و آدابها دفعة 1985 تخصص لغة فارسية + دبلوم موسيقى من كونسيرفتوار دى أليكسندرى تخصص صولفيج و بيانو دفعة 1983 + 4 سنين دراسات حره بكلية فنون جميله قسم تصوير .. و كفايه كده :)
- اسم مدونتك....؟؟؟
حبشتكنات فلسفية ..
- صورتك الرمزيه بتعبر عن ايه...؟؟؟؟
بتعبر عنى لأن دى صورتى الحقيقيه .. و مش قادر أفهم أيه المانع أن المدونين مش بيحطوا صورهم الحقيقيه اٍلا فيما ندر يعنى طالما أن التدوين بيعبر عن شخصية المدون يبقى ليه نخفى وجوهنا عن بعض مادام بنعرض أفكارنا على بعض ؟؟!!
- هل فكرت في اغلاق مدونتك....؟؟؟؟
خالص عمرى نهائى .. و بأستغرب من اللى بيعلنوا عن غلق مدوناتهم و غالبا بيتراجعوا بعد شوية هدوء !! يعنى غلق المدونه هو اللى حيعدل المايله ؟؟ بالعكس التدوين هو اللى ممكن يزيح عن صاحبه هموم و أفكار بتتلاطم جواه و بعدها حيشعر بتحسن و صفاء نفسى ..
- ايه رد فعلك لو حد قل ادبه عليك في تعليق...؟؟؟
ببساطه متناهيه مش حأنشر تعليقه لأنى عامل مودريشن بسبب شخص كان مدبأنى فتره من الفترات و كان بيبعتلى يوميا حوالى 200 تعليق على كل البوستات كلهم شتيمه عجيبه من نوعها و أنا لحد دلوقتى مش عارف ليه كان بيعمل كده ؟؟!! و كان بيجيب وقت منين علشان يكتب كل هذه الشتائم اللى لم أر لها مثيلا فى حياتى من حيث غرابة التراكيب !! و للعلم ماكنش بينى و بينه أى خصومه و لا أى خلاف من أى نوع بس بقاله فتره كبيره ناسينى !! يمكن مات ؟؟
- اسوأ مدونه...؟؟؟
السؤال ده ماينفعش و مالوش اٍجابه لأن كل مدونه بتعبر عن رأى صاحبها و أسلوب تفكيره فماينفعش نقول على شخص أن تفكيره ردىء و لكن ممكن نقول أن تفكيره فيه وجهات نظر بنختلف فيها معاه .. لأن الفكر كائن حر يحلق فى الأفق كما يحلو له و لا حجر عليه .. لأ مافيش مدونات رديئه و لكن أحيانا بتبقى بالنسبه ليا غير مفهومه لأنها شديدة الخصوصيه و يصعب فهم ما يدور بعقل صاحبها ..
- هايحصل ايه لايميلاتك بعد ماتموت....؟؟؟
حتروح للورثه :))
- اديت الباس ورد لحد قبل كده...؟؟؟
لاٍنسانه غاليه عندى وهى عرفت كل باسورداتى بذكاء تحسد عليه و برضا منى يعنى :)
- السفر بالنسبه ليك ايه...؟؟؟؟
عشت أغلب عمرى مسافر من بلد لبلد و حتى يمكن جوه نفسى كمان !! لكن دلوقتى مش بأفضل أسافر كتير اٍلا للبحر فقط .. السفر و تجربة الاٍغتراب مهمين فى تكوين الشخصيه و ليهم فوائد عديده أهمها بلا شك الاٍعتماد على الذات فى كل كبيره و صغيره لأن حياة الغربه لا فيها بابا و لا ماما و لا سلفنى 3 جنيه .. من الآخر بأنصح الشباب بتجربة السفر بس بشرط تكون على أساس سليم مش بهدله يعنى و خلاص ..
- المود بتاعك ايه...؟؟؟؟
متسامح .. متفائل .. صبور لأقصى حد .. أكره النكد و النكديين و المتنكدين و المكان اللى فيه نكد ..
- بتعمل ايه في وقت فراغك...؟؟؟؟
ماعنديش وقت فراغ لأنى بأعتبر كل شىء بنعمله فى يومنا حتى لو بدا للآخرين أنه تافه و مالوش لازمه هو فى الحقيقه مهم بس بشرط نعمله باٍتقان و بحب ..
- اكلتك المفضله ايه....؟؟؟؟
أيام الشراهه و الفجعه و شغل التخن اللى على أصله كان الرقاق باللحمه المفرومه و السمن البلدى مع البط المتحمر برضو بالسمن البلدى و طماطم بالخل و التوم و الحلو بقى نص دستة جاتوه كده بجد بدون مبالغه .. بس دلوقتى أكلتى المفضله شريحة سمك فيليه مشويه و ربع رغيف و طبق سلاطه و لا حول و لا قوة اٍلا بالله (وش بيعيط و بيلطم )
- الصفات اللي اخدتها من والدك......؟؟؟؟؟
الله يرحمه كان راجل محترم .. أرجو أنى أكون فعلا أخدت منه صفات الكرم و العدل فى التعامل و الحنان الشديد و الشده فى الحق و الجرأه و البساطه .. بس الحمد لله حمدا كثيرا أنى ما آخدتش منه عصبيته المفرطه :)
- الصفات الللي اخدتها من والدتك....؟؟؟
ربنا يديها طولة العمر .. مش بأحب الحال المايل و لا التردد زيها .. يعنى يا أبيض يا أسود مافيش رمادى ..
- اكتر ست حاجات بتحبهم...؟؟؟
رضا الله .. شعور الأمان .. اٍسعاد من حولى .. تلقى السعاده ممن أسعدتهم .. صدق المشاعر .. الفلوس ..
- اكتر ست حاجات بتكرههم...؟؟؟
نكران الجميل .. اللؤم و اللوع .. الغدر .. فقدان صديق .. الفلس .. البرد ..
- شخصيتك نوعها ايه...؟؟؟
هادىء لأقصى حد ممكن تخيله :) لأن عندى ثقه فى الله لا حدود لها ..
- لماذا دخلت عالم التدوين من الاساس...؟؟؟؟؟؟؟؟؟
كنت أشعر بالوحده الشديده و كنت عاوز حد يشاركنى أى شىء و لو حتى قراءة أفكارى .. و الحمد لله عملت كنز من الأصدقاء و الأهم أنى لاقيت هدية ربنا ليا اللى كان محوشهالى بعد ما قارب المشوار على نهايته و لله فى أمره شئون لا ندركها بعقولنا القاصره عن تجليات حكمته ..
- اجمل كلمه اتقالت في وصف مدونتك...؟؟؟
مش فاكر مين فى مره اللى علق عندى و قال لى مدونتك دمها خفيف :)
- اهميه التعليقات بالنسبه ليك...؟؟؟؟
طبعا التعليقات بتعمل تواصل بين المدونين و ده شىء مطلوب لأن لما حد بيعلق عند حد فالحد التانى بالتالى بيروح يعلق عند الحد الأولانى و هكذا بتتنشر الأفكار و بيتوجد جو من الحوار الهادف و أكيد بنتعلم من بعض على الأقل بحكم كثرة وجهات النظر و اٍختلافها ..
- احلي بوست كتبته وضع اللينك واذكر السبب...؟؟؟
سؤال صعب جدا .. أنا سايب الاٍجابه ليكم أنتم :)
- افضل مدونه قرأتها...؟؟؟؟
كل مدونه و لها طعم و لون و رائحه تختلف عن التانيه .. و كل مدونه بأتعلم منها حاجه ما .. حتى المدونات الأجنبيه المكتوبه بالاٍنجليزى و الفرنسى برضو بأتابعها و بأستفيد منها .. لكن المدونات اللى بتحمل أفكار متعصبه أو اللى بتدعو لكره فئه و تفضيل فئه مش مفضله عندى أبدا ..
- افضل بوست قرأته..؟؟؟
كتير أوى البوستات اللى عجبتنى فالحقيقه صعب أنى أذكر واحد فقط لأن ده حيبقى فيه ظلم لباقى البوستات ..
- الشغل بالنسبه ليك...؟؟؟؟
هو الحياه نفسها .. و مش شرط الشغل يكون عمل الشخص بيرتزق منه و لكن كل شىء ممكن نعمله هو فى الحقيقه شغل بشرط اٍتقانه .. أذكر أنى كنت بأقول أنا رايح أشتغل مش رايح أذاكر ..
- الانترنت بالنسبه ليك...؟؟؟
نافذه على العالم .. منه بأطل على الدنيا الرحيبه الواسعه و منه اٍتعلمت حاجات ما أتعلمتهاش طوال عمرى المديد السعيد لاٍختلاف الثقافات و طريقة التفكير .. الأنترنت مهم جدا بس لما يبقى مش واقع أو بطىء لأنى فى الحاله دى بيصيبنى اليأس و بأفكر وقتها فى الهجره لساحل العاج حيث النت سريع و الناس هناك لابسين قمصان مشجره و بيغنوا و بيرقصوا على البحر ليل و نهار و بيقزقزوا أناناس و عيشتهم آخر روقان :)
- تمرر التاج ده لمين...؟؟؟؟؟
لكل من يقراه و مايكونش جاوب عليه .. و له منى كل تحيه :)

هناك 38 تعليقًا:

شمس النهار يقول...

فعلا التاج لطيف
واجاباتك كالعاده دمها خفيف وصريحه ولطيفه
تنم عن شخصيتك الحقيقيه ياراجل ياطيب

Kiara يقول...

يعنى غلق المدونه هو اللى حيعدل المايله ؟؟
ههههههههههههههههههههههههههههههه مت من الضحك بما اني قافلها

انا مش قافله عشان حاجه تتعدل بس عندي ركود في الكتابه بدليل اني معاكم اهو وبرد علي البوستات

************

اما بالنسبه للصورة الشخصية هي مش مشكله بما اننا بنحضر لقاءات وتقريبا الاغلب عارف بعضه بس الموضوع ان احنا عارفين اغلي المدونين لكن مش نعرف الباقي اللي هو غير معروف ممكن يتعمل بالصوره ايه كمان عشان حاجات تانيه هرغي كدا

ومش هقول اللي في نفسي

تاج بين شخصيه بجد بفتخر انها في عالم التدوين

علي فكرا انت اتخرجت في السنه اللي اتولدت فيها :)

kochia يقول...

تاج حلو
واجابتك احلي

تحياتي

عاشقه وغلبانه يقول...

ممكن ترجمه بالعربي للي حضرتك درسته ده...؟؟

انا كمان بحب الفلوس ونسيت اكتبها عندي
مش عارفه اشيل ايه واحطها
اشيل اهلي دي
هههههههههههههههههههههههههه


وبما اني بحبها حضرتك ماسبتش ليه الاتنين جنيه..؟؟
انا مش بدي شكك

حاسوباتيه يقول...

تاج جميل خالص واجابات حضرتك عليه اجمل

صبرني يارب يقول...

صباح التيجان الجميله يا فندم والاجابات الراسيه

تحياتي لك

عمرو يقول...

شمس النهار
متشكر ليكى يا برنسيس
و الله أنتى اللى طيبه جدا و ربنا يتقبل دعوات اللى بيدعوا لك علشان الخير اللى بتعمليه
شرفتى و نورتى :)

عمرو يقول...

كيارا
و ليه عندك ركود فى الكتابه ؟؟
الكتابه من أجمل الأشياء اللى ممكن نمارسها فى الحياه بدون قيود و لا تجهيز مسبق .. يعنى اللى يخطر على البال بينكتب و بيتنشر و هكذا الأفكار تسرى بين العقول ..
أنا اللى متشكر لاٍطرائك و سعيد بوجودى بين شخصيات جميله زيكم كلكم بيمثلوا جيل كامل و قادم و سعيد أكتر أنى كانت عندى الفرصه للاٍحتكاك بهذا الجيل و التفاعل معه على عكس ما كان سائد فى عصرى بسبب قلة وسائل الاٍتصالات و ردائتها و كفايه تعرفى أن لحد سنة 1986 كنتى لما تحبى تطلبى اٍسكندريه مثلا فكان لازم تروحى سنترال الحكومه و تحجزى ميعاد و أنتى و حظك يعنى المكالمه كان ممكن تيجى لك بعد ساعتين أو تلاته و ممكن تانى يوم !!
آه و الله :))

عمرو يقول...

kochia
متشكر جدا
سعدت بزيارتك و تعليقك :)

عمرو يقول...

عاشقه و غلبانه
ترجمتها بالعربى أنى درست لغه عربيه و فارسيه و كتابة نوته موسيقيه و عزف على البيانو و رسم :)
طيب يا دكتوره أنتى مزوده علينا ربع جنيه لييييه ؟؟
هو التاج بالسن ؟ :)
و طبعا الفلوس ماحدش مايحبهاش بس الأهل أكتر :)

عمرو يقول...

حاسوباتيه
متشكر ليكى و نورتى المدونه

عمرو يقول...

صبرنى يا رب
أهلا يا أم خالد :)
ألف شكر .. و أنتى كمان اٍجاباتك عليه عجبتنى
شرفتى المكان و نورتى :)

من غير عنـــوان يقول...

تاج جميل
بطاقة تعارف
وإنت شخصية جميله...رومانسية...
وكمان فنان...
عايزين نسمع.. ولا بطلت تعزف بيانو

رحلتنا في الحياة يقول...

ليسانس آداب لغة عربية و لغات شرقية و آدابها دفعة 1985 تخصص لغة فارسية + دبلوم موسيقى من كونسيرفتوار دى أليكسندرى تخصص صولفيج و بيانو دفعة 1983 + 4 سنين دراسات حره بكلية فنون جميله قسم تصوير .. و كفايه كده :)

بسم الله ماشاء الله بجد مش عارفة اقول ايه واغلب اللى التخصصات تبعد عن بعضها خالص بس والله رجعتلى الاصرار انى ارجع ادرس تانى انا خريجة لغى عربية وكنت هموت انى ادرس فى فنون جميلة بس ظروف منعتنى من دخلوها ولما فكرت ارجع ادرس تانى قالولى لسه هتدرسى هو العمر لسه فى سنين تانى للدراسة

عمرو وجيه يقول...

التاج ده منتشر اوى اليومين دول

فى المدونات


بس جميله أجابتك يا أفندم

”*°•.˜”*°•..سونه..•°*”˜.•°*”˜ يقول...

السلام عليكم .
العقل كلو فى الاجبات ماشاء الله
يوجد حكمه فى كل اجابه حقا
تصدق ؟
كل اب كان عصبى اصبح الابن هادى
والعكس تحياتى ليك
وانا سعيده بمعرفتى بيك اكتر واكتر
هذا التاج على راسى ياباشا على راسى هههههههههههههههههه
تقبل مرورى ((**ســونه**)) .

همسه يقول...

كلمتين وبس
فعلا
انسان جميل
ارق واجمل تاج
تحياتى

غير معرف يقول...

ما شاء الله عليك يا اخى استاذ و رئيس قسم

تحياتى ليك و اشكرك على الاستفاده اللى بنستفيده منك دائما تحياتى ليك

صوت من مصر يقول...

اجابات هاديه جدا كما كنت دوما
بس بالنسبه للاكل الحمد لله واحمد يا رب ولا اكله منهم
والسن مش بالسنين ولا الايام السن بالخبره والحياه
فعلا بلد شهادات ربنا يزودك بيهم كمان وكمان

عمرو يقول...

من غير عنوان
أهلا و سهلا بيك يا صديقى الحكيم :)
لا لسه بأعزف بيانو بس طبعا مش بمهارة زمان لأن البيانو بالذات محتاج ممارسه طول الوقت للاٍحتفاظ بمهارات العزف و تنميتها ..
و الله عندى شوية تسجيلات لعزفى ممكن أبقى أنشر منهم على المدونه و نسمعهم سوا :)
أشكرك يا صديقى للزياره و التعليق و أهلا بيك ..

عمرو يقول...

أيوشه
أيوه طبعا العمر فيه وقت للدراسه طالما عندك رغبه حقيقيه للتعلم و الاٍستفاده من العلم اللى بتدرسيه خاصة لو بتحبيه فعلا ..
أهلا بزميلتى و نورتى المدونه :)

عمرو يقول...

عمرو وجيه
متشكر جدا يا افندم للزياره و التعليق و أرجو أنها تكرر دايما :)

عمرو يقول...

سونه
العقل زينه :)
أدينا بنحاول نكون عاقلين رغم كل الضغوط اللى عايشبنها ..
و فعلا بلاحظ اٍختلاف الأبناء عن آبائهم فى حاجات كتيره ربما لأختلاف وجهات نظر العصر فى الأشياء ..
أهلا و سهلا بيكى و أنا كمان سعيد بالتعرف على مدونتك الرائعه ..

عمرو يقول...

همسه
متشكر جدا لزيارة مدونتى و التعليق و أرجو فعلا أن تكون صفاتى كما وصفتيها ..
أهلا و سهلا بيكى :)

عمرو يقول...

biberess222
يا أستاذنا أشكرك و الله على الاٍطراء بارك الله فيك ..
كلنا يا بيبرس بنستفيد من بعض و اْلا يبقى بنضيع وقتنا على البلوجر ..
سعيد بزيارتك و أهلا بيك ..

عمرو يقول...

صوت من مصر
متشكر يا صديقى ..
حلوه بلد شهادات دى :) بس ده كان زمان دلوقتى بقت بلد المحسوبيات و الوسايط و اللى معاه قرشين الله أعلم جايبهم منين ..
متشكر يا عزيزى و أهلا و سهلا بيك ..

Unknown يقول...

الله كلامك جميل
واجوبتك اجمل واجمل
ياأستاذ عمرو بدر
(الاسم الحقيقى ياسيدى)
هو احنا قلنا حاجة :)

Unknown يقول...

انما بقى تقولى الباسورد سر
ابشرك واعلمك واخبرك
انى
.
.
.
.
.
.
.
.
.
..
تقريبا خمنته :)
اصلى ناصحة وفكيكة
بس ما تخافش مش حاقوله
ولو دفعولى 200 جنية
او اغرونى بصنية رقاق
من اللى وصفتها دى
حقاوووووووووووووم
ببساااااااااالة:)
نهارك ابيض ويومك سعيد
ياأستاذ عمرو وربنا يسعدك
كمان وكمااااااااااااااااان.

Unknown يقول...

وزى ما قالت شموسة
انت بتجاوب واحنا
بنجاوب معاك لانك
فعلا تتصف بالصدق
والصراحة (الغير جارحة)
ودى اهم شىء(الغير جارحة)

♥نبع الغرام♥♪≈ يقول...

السلام عليكم
تقبل مرورى
بجد برده انا جانى تاج هديه من زوجه عنيده
وان شاء الله اتمنى التواصل معى
دمت بالف خير وبجد كلماتك جميله
ربنا يسعدك يارب
سلالالالالالامى

gogo!sf يقول...

ردودك كلها دبلوماسيه اوى
بجد اجابتك رائعه يا استاذ عمرو
وتدل على جمال شخصيتك

تمنياتى لك بالسعاده

عاشقه الاحزان

مسدس صغير يقول...

اجابات فلسفية رائعة
اعتقد ان حضرتك اشتغلت فى السياسة قبل كده.
اجابات صحيحة وصريحة ولكنها دبلوماسية.
هههههههه
احييك على البوست الجميل والاجابات الاجمل.

mahasen saber يقول...

اولا ربنا يهد النت لانه مسح التعليق

يتهد ازاى ده معرفش

mahasen saber يقول...

كنت بقول اجابة التاج بتنم عن شخصيتك المثقفه والراقيه والواعيه واليى بتعكسها المدونه


بس ليا سؤال هو ايه لسه مدرستوش لحد دلوقت

فشكووول يقول...

السلام عليكم عمرو بك
تحياتى
عارف احسن حاجه لقيتها فيك انك بتحب الرقاق باللحمه وكمان البط ...
يا سلام يا عمرو بك
ما عندكش فكره انا بعز البط قد ايه
بس اليومين دول بقى غالى قوى خالص
وعلى العموم الله يسهل له الراجل اللى كان بيبعت لك الشتايم دى كلها
هو كان فاضى لك ولا ايه
تحياتى لحضرتك

عمرو يقول...

norahaty
أشكرك يا دكتوره و الله على زيارتك و مجاملتك ..
بس مش هى دى الباس وورد اللى فى بالك على فكره :)) ما أنا برضو فكيك و بأجيب التايهه :))
و بعدين صينية رقاق أيه بقى ما أنتى أخدتيها عندك و ماشفناش منها و لا فتفوته بعد كده :)
شرفتى و نورتى و أهلا بيكى ..

عمرو يقول...

عاشقة الأحزان
أنا كمان زرت مدونتك و قرأت اٍجاباتك و عجبتنى لما فيها من صراحه و منطقيه
ربنا يسعدك و يعوضك خير يا رب
تقبلى تحياتى و تقديرى

امل يقول...

الله على الحكم
انت فعلا استاذ
بارك الله لنا فيك
ورزقك سندوتش طعميه(وش بيغمز)مطرح مايسرى يمرى