~SUN~ Pictures, Images and Photos

الجمعة، 27 مارس 2009

نينتنا فُن !!

white candle Pictures, Images and Photos


مساء الخير يا أهل البلوجر و أسعد الله أوقاتكم ..
أبشركم اٍن بكره اٍن شاء الله السبت ستغرق القاهره و الجيزه و الاٍسكندريه فى ظلام دامس من الساعه 8 و نص للساعه 9 و نص بالليل و ذلك بمناسبة مشاركة مصر فى اليوم العالمى لترشيد الطاقه !!
عجبت لك يا زمن على رأى المعلم محمد رضا !!
طيب ..
المهم يعنى اٍن وزارة الاٍعلام أصدرت بيان دعت فيه الخلق لطفى الأنوار فى هذا الوقت فى المنازل و المحلات تضامنا مع هذه الحمله وارد أستراليا الشقيقه اللى هى أصلا دعوه لمواجهة خطر الاٍحتباس الحرارى اللى حيشعلل الدنيا حريقه لو أستمر على هذا الحال ..
محافظة القاهره كمان طلعت بيان قالت فيه أنه بكره حتطفى الأنوار فى الساعه دى على أغلب الطرق السريعه كطريق المطار و الكورنيش و الكبارى و طريق المليون شجره الشهير و اللى محتاج أصلا نقطة بوليس آداب فما بالكم بقى لما يبقى ضلمه كحل :)) يا خبر أسود و منيل ..
و كمان الأهرامات و البرج و مجمع التحرير و مكتبة الاٍسكندريه و منطقة وسط البلد و مبنى الأهرام و الشوارع الرئيسيه و كده يعنى ..
أتعشم من كل أعماق تلافيف فؤادى أن تتخذ السلطات المختصه اٍجراءات فعاله و صارمه للحفاظ على الأمن أثناء هذه الساعه الضلمه لأنى أتوقع أن تحاول طيور الظلام العمل فى مثل هذا الظرف النادر ..
و آمل من كل قلبى أن لا تزيد المواليد بشكل مبالغ فيه بعد 9 شهور من بكره رحمة بالحكومه اللى خلاص أستجارت من زيادة البيبيهات ..
و أتمنى أن تكون هذه الساعه الكحل فرصه لاٍعادة الرومانسيه المطلوبه و المفتقده بين الناس .. يعنى شمعايه كده و كلمتين حلوين فى الهداوه و بلاش عتاب يا حبيبى بلاش العتاب ..
و أما أنتم أيها العزاب فلنا رب اٍسمه الكريم و كل ليله ضلمه و أنتم طيبين :)

هناك 17 تعليقًا:

صابر وراضى يقول...

وعليكم السلااااااااااام



ايه رايك مش عارف اقول الله ينور عليهم ولا الله يضلمها عليهم

هو الترشيد دا على الغلابه بسولا على كل الناس؟؟؟

mahasen saber يقول...

ههههههههههه الحمد لله ان الشرقيه خارج هذا النطاق المظلم

الحكايه مش ناقصه سواد

غير معرف يقول...

نينتكم فن فعلاا هههههههههههه

يلا اهو تحسوا فينا شوية الي الكهربة بتقطع عنا بغزة بشكل يومي وبالساعاااااااات ههههههه يعني شمتانة رسمي ^ـ^

برايي الناس متخرجش بالوقت دا بلاش ذئاب الظلام تنهشهم وبالذات البنات

واهي نص ساعة وتعدي

كان الله بعون ^ـ^

حاسوباتيه يقول...

هههههههههههه والله انا خايفه ان الحكومه تظلمها علينا بالعافيه ويقطعوا الكهرباء خالص عافيه كده شئنا او ابينا يلا ربنا يستر وكمان احراميه هيتبسطوا قوي من اليوم ده يلا يومهم بقى

عاشقه وغلبانه يقول...

ههههههههههههههههههههه
ههههههههههههههههههههه

مش معني انتوا بيقلولكوا
احنا بيقطعوها بدل الساعه 10 ولا حد بيعبرنا
وبتبقي ليله فن وكله بينام بدري بدري
ههههههههههههههههههههه


ده بكره موسم
اي والله

صبرني يارب يقول...

اه انا سمعت هذا الموضوع

بس لحد الان مش فاهمه هو بس مجرد دعوه لتخفيض استعمال الكهربا فى هذا الوقت ولا هايقطعوا الكهربا اصلا

على فكره دي حاجه لطيفه والله

انا كنت زمان ايام المذاكره احب النور يقطع عشان انام بقى وضميرى مستريح
هههههههههههههههههههه

انما دلوقتي باحمل هم النور يقطع عشان العيال بيقرفوني ولا سيما لما نلاقي الكشاف كمان مش شاحن ولا عطلان يييوووووووه بتبقى ليله الوان مع الشمع بقى


وبعدين حكاية المواليد ما تفرقش ماما كريمه مخلصه العمليه دي من زمان
هههههههههههههه

شمس النهار يقول...

البوست ده بيفكرني بكاريكاتور
كان عمله مصطفي حسين واحمد رجب ايام ماكانوا بيشتغلوا مع بعض
وكانوا راسمين وزير الكهرباء ايامها وكان ماهر اباظه وهو لابس جينز وماسك شومه وبيقول والله لااقلبها لكم ضلمه
واصلا هي مش ناقصه ضلمه
الله ينور ياريس عمرو

kochia يقول...

يعني التلات محافظات دول بس
طيب كويس
عندي مشاوير بكرة

♥نبع الغرام♥♪≈ يقول...

السلام عليكم ........
بصراحه بتعجبنى مواضعيك قوووى
ربنا يبارك فيك
ومزيد من التوفيق
تقبل تحياتى ط

Unknown يقول...

لا حول ولا قوة الا بالله
مالناش الا فى المظاهر الفاضية
افادك الله استاذ عمرو على التنبيه.

Mafrousa يقول...

نقابة الحرامية عملت اجتماع عاجل لفريق العمل
للاستعداد التام على الهجوم
و على ان تكون ساعة الصفر 8ونصف
بالهنا و الشفا

بص هوه الموضوع فعلا كويس و انا شخصيا حعمل ده
بس بلاش كحل
بلاش ظلام دامس
شغلو اللمبات السهاري اللى تخلينا شايفين الوشوش
ربك يستر بقا

امل يقول...

سلام عليكم
انت شايفنى..هههههههههههههههه
بجد حاجه تزهق بلدنا دى
لما يجوا يوفروا طاقه ..يضلموها علينا
طيب مانور قايد طول النهار فى الشوارع والشمس طالعه
هو بس حركات وخلاص
حسبى الله ونعم الوكيل

من غير عنـــوان يقول...

عمرو
أتخيل كفاية إنهم يشاركوا في اليوم العالمي للحفاظ على حرارة الأرض فقط بإطفاء بعض الأنوار المبهره.. والعلامات المميزه زي الهرم والبرج وخلافه

أما حكاية البيوت والشوارع
فالشوارع ظلمه خلقه
والبيوت أصلا كل الناس بتحاول تقلل عشان الفاتورة

إنما لازم نشارك

تحياتي

أنا شخصيا حاطفي كل نور زياده... ده المفروض أصلا

*** البوست دمه خفيف

شاب كــ طخين ـــــا يقول...

هههههههههههههههههههههههههههه
ربنا يستر دة البلد هتنفجر
ههههههههههههه

عاشــــــ النقاب ـقــــة"نونو" يقول...

السلام عليكم
فعلا ربنا يسترها الساعة دي ان تمت
اول زيارة ويسعدني التواصل بعون الله
تحيتي

شبه إنسانه .....( سهوره ) يقول...

طبعا أنا نورت البلوج

لكن حضرتك كان لك السبق فى النور ده

الاول بشكر شكر عميق مضيىء على زيارتك لى

وشكر مضيىء عشان ينور الليله الكحلى

ربنا مع الجميع

ميرسى على زيارتك

سهوره

gogo!sf يقول...

بجد يا عمرو اسلوبك تحفة
جدا بس اللى حصل فى الساعة دى
حته خناقة رومانسية بس اية تحفة طحن
والله لو كنت قريت البوست ده وقتها كنت قريته بصوت عالى يمكن كانو يبطلو خناق ما علينا واحنا مالنا بالناس


اما عن مواليد الضلمة فهما مش محتاجين
يستنو ضلمة ولا نور اولا الشوارع مش بيهمهم حاجه

ربنا يسترها علينا يا رب

عاشقة الاحزان