الثلاثاء، 10 مارس، 2009

مساء الحلاوه يا دنيا الفتاوى !!

JellyMuffin.com - The place for profile layouts, flash generators, glitter graphics, backgrounds and codes
مساء الخير ..
يعنى بجد صدق اللى قال اٍن المصريين ليهم كل يوم حاجه عجبه ..
أيوه ..
دى الحقيقه بصراحه .. خلينا ما نضحكش على نفسنا ..
تأملوا كده شويه بحبتين تأمل الأخبار اللى طالعه من مصر تلاقوا فعلا كل يوم فيه خبر و لا خبرين من أعجب ما يمكن أن تسمعه فى يومك ..
و آخر ما لقطته عيناى خبر عجيب غريب مثير للضحك و البكاء فى آن واحد .. أيه هو بقى ؟؟
شوفوا يا أخوانا ..
دلوقتى فضيلة الشيخ جمال قطب رئيس لجنة الفتوى بالأزهر سابقا طلع فتوى قالك فيها أيه ؟؟!!
قالك فيها اٍن من حق الجيران يروحوا يرفعوا دعوى على جيرانهم المتجوزين علشان يطلقوهم من بعض و يفرقوا بينهم لو كانوا دائمى الشجار و النقار !!
عجيبه دى و الله !!
و أنت مالك و مالهم يا حشرى يا رخم يا جارهم يا للى تستاهل قطع لسانك ؟؟
عاوز أفهم أنا بقى و أنت مالك ؟؟
يعنى واحد و مراته مثلا مزاجهم يتناقروا فى بيتهم علشان هو راجل نكدى و هى كمان بوز فقر و أم سحلول و بتحب المهابره زى عينيها أنت مالك و مالهم بقى ؟؟ أيه اللى حشرك بينهم علشان تروح المحكمه و ترفع عليهم دعوى الطلاق و تحرمهم من بوز بعض و تشرد عيالهم ثمرة النكد العائلى و أشبال نكد المستقبل ؟؟!!
يا فضيلة الشيخ ده لو صحت فتوتك حتبقى بيوت مصر العامره كلها ناس مطلقين و رجاله مخروب بيوتها و ستات قاعدين على الكنبه ناكشين شعورهم و دموعهم بتسح على خدودهم .. دى الفتوى مسئوليه يا مولانا الواحد بيتسأل عنها فى الدنيا و حيتسأل عنها فى الآخره يوم الموقف العظيم يوم لا ينفع مال و لا بنون اْلا من أتى الله بقلب سليم .. قلب سليم .. قلب سليم .. قلب سليم خالى من الذنوب و من الهبل اللى بيوقع الناس فى بعضها بسبب الاٍستهتار و الاٍستخفاف بعقول الناس البسيطه الغير مدركه لعواقب الأمور غير لما بتطربق على دماغهم ..
و أحمد الله حمد الشاكرين العارفين بفضله و اٍحسانه أن جارى اللئيم أبن اللئيمه اللى ساكن فى الدور الفوقانى لن يجد فى بيتى أى مناقره سوى المناقره بينى و بين الواد أبنى الكبير اللى على طول رامى ودنه معايا كل ما أتكلم فى الموبايل زى ما يكون هو اللى أبويا !! و لا يمكن جارى الرخم ده حيروح يرفع عليا قضية تفريق بينى و بين الواد أبنى !! ما هو زمن العجايب بصحيح ..
بجد يا مصر كم فيكى من مضحكات و لكنه ضحك كالبكاء ..
ربنا يشفى كل مجنون ..

هناك 28 تعليقًا:

شمس النهار يقول...

علي فكره ياعمرو الريس قضب ده له كل فتوي وفتوي احلا من اختها
يعني كان طلع لنا في المقدر وقال فتوي عجبت الرجاله قوي افتي ان الرجل بدل مايدخل علي مراته بكيس فاكهه عقبال املتك يدخل عليها بواحده ماركة ماملكت ايمانكم اي ان الرجل من حقه ان يجمع بين زوجه وامراه من ديانه غير سماويه وهي دي ماملكت ايمانكم
طبعا الدنيا اتقلبت علي راسه حتي تراجع عن الفتوي تحت تهديد النساء
اما هذه الفتوي تندرج تحت مايسمي الحسبه وهي دي القضيه اللي فرقوا بيها بين الدكتور ابو زيد وزوجته التي رفضت الخضوع وهربوا مع بعض لبلاد تحترم الفكر والفكر الاخر
بس ده مايمنعش ان في ازواج مش المفروض الجيران يطلقوهم لا المفروض يبندقوهم من كتر الزعيق والخناق
ربنا ينكد علي اللي بينكد علي الجيران

EmY يقول...

ايه الحشريه دي
لا بجد يعني الجيران مالهم
افرض انا ست كئيبه و متجوزه راجل نكدي و مزاجنا اننا نصحي الصبح نضرب بعض بالجزم و نسب و نلعن بعض
و مبسوطين كده جاري ليه يرمي ودنه معايا

هو طبعا المفروض الناس تحترم نفسها و صوتها مايعلاش بس بردو كل جار لازم يلم ودنه و مش من حقه يتدخل و يطلق او يجوز

انا عندي حل لمشكلتك مع ابنك
جوزني ابنك و كده تبقي ارتحت منه و من ودنه الي معاك

مفكر يقول...

السلام عليكم::

أه والله،،،الفتاوى دي مشكلة،،انا فاكر إن فتوى مش بعيدة اوي لما طلعت سببتلي لخبطة جامدة جداً،،،مفيش داعي لذكرها

انا معرفش بالظبط من سيد قطب،،،ولكن من الواضح إنه راجل فاضي وعلى أده،،،لانه بيتصدر في حاجات غريبة بتعمل بلبلة (يعني ايه بلبلة)أقصد لخبطة للناس،،،يعني فيه حاجات جوهرية اهم

اللهم أرنا الحق حقاً وارزقنا اتباعه وارنا الباطل باطلاً وارزقنا اجتنابه،،،

dreem يقول...

ههههههههههههه
ضحكتنى والله
بس تصدق نظرية معملية فذة
يعنى ممكن اتنين ستات جيران يصاحبوا بعض والست اللى فيهم تكون زهقانة من جوزها تتفق مع صاحبتها انها تقعد تزعق شوية علشان تخلص من جوزها عن طريق جيرانها ايشى خيال يا ناس
هههههههه
تحياتى

حاسوباتيه يقول...

يعني اصلا عدد قضايا المطلقين والمطلقات في تزايد وعدد المطلقين في مصر في تزايد مستمر هي كمان ناقصه فتوى زي دي يعني اي منطق وعلى راي حضرتك لو تمت يبقى اغلب الناس هتتطلق ده يعني الجيران حتى المفروض يقول يوفقوا بين اي اتنين زعلانين على الاقل مش يروحوا يرفعول قضيه طلاق لا حول الله يارب

صوت من مصر يقول...

عارف انا بقتى وانت كمان بتفتى لانك مصرى ولا ايه
عموما مقدر لنا فى كل خطوه فتوه ؟
شكرا

صبرني يارب يقول...

اه يا مامايا

ايه يااستاذنا انا عملت فيك حاجه

مين الاخ ده ؟؟

طيب انا فى اثنين جيرانا كانوا بيتخانقوا امبارح بس واحد وابنه

وابنه ده للعلم كان لحد السنه الى فاتت شاب زي الورد فى مقتبل العمر مخلص اداب لغات شرقيه وحاجه فله

وبعدين فى رمضان الى قبل الى فات راح اعتكف فى المسجد عشر ايام

ورجع من هناك مطلق اللحيه وفضلت دقنه تطول وجلبيته تقصر وهو يتخن لحد لما بقى شكله وحش كاسر

وكان بيتخانق مع ابوه امبارح وامه بتصوت وتقول الحقونا

خلي بقى هؤلاء الشيوخ الافاضل ينزلوا من برجهم الفتوي الى عمالي ينزلوا منه فتاوي بلاوي علينا
ويشوفوا بيعملوا ايه فى ادمغة العيال

حاجه تقررررف

سوري يا استاذناا كتر ما يثير اعصابي المناظر دي

تحياتي لك على البوست

gogo!sf يقول...

والله كلامك جميل جدا
حقيقى بيعجبنى اسلوبك اوى
وسماح كمان ممكن تحضر افراح زى ماانت عايز

المهم لو فعلا الفتوى دى حقيقى انا هروح ارفع على جيرانى انا كمان
دول يا عم وجعين دماغنا يوماتى
بس كدة العمارة كلها هتكون مطلقات
بما فيهم ماما وبابا
يلا احسن بردوة على الاقل يمنعو الجواز والانجاب اللى ربنا محللة
حاجة غريبة فعلا
وبكدة الواحد ياخدها من قصيرها ومش يتجوز اصل مافيش بيت فى العالم غير وفى مشاكل اهو هنعمل اية نصبنا كدة

بجد حاجة مش طبيعية شتتو افكارنا ووجعو دماغنا
حسبنا الله ونعم الوكيل

norahaty يقول...

ياأستاذ عمرو ياأستاذنا
للاسف القنوات الفضائية
والجرايد والمجلات معظمها إن
لم يكن اغلبها قطاع خاص
يعنى اعلانات :يعنى نسبة
مبيعات: او توزيع: يعنى
عايزين زبون: بأى طريقة
ووسيلة بدون النظر عن
الصح والخطا !!وبالتالى
فوضى التصريحات والفتاوى
والاعترافات وغيرها
اللى حضرتك
بتشوفها
كل
يوم

مـجـنـووون يقول...

علي فكرة يا غالي

انبارح كانوا مستضفين الشيخ جمال قطب
علي قناة الحياة والراجل قال أنه مقلش كده خالص وان الكلام ده مش مظبوط

تقبل مروري
مجنووون

عاشقه وغلبانه يقول...

ههههههههههههههههههههههه
هههههههههههههههههههه
ههههههههههه
استني ابطل ضحك وبعدين اقول
يعني دلوقتي الست تتخانق مع راجلها بالليل يقوموا الصبح يلاقوا روحهم مطلقين
يانهار تكني كلر ياجدعان

ده نص شارعنا هايطلق
ههههههههههههههههههههههه
وانا اللي هاطلقهم

ياخراب البيوت المستعجل

خمسة فضفضة يقول...

السلام عليكم ورحمة الله وبركاته

هو عاوز يقلد امريكا ولا ايه ؟؟

يمكن يكون ناسي ان ربنا بيقول ان ابغض الحلال عند الله الطلاق


وبلاش اعلق اكتر من كده عشان مغلطش فحد


سلام

mohamed ghalia يقول...

يا مسااااااااااااااااااااء الفتاوى
الله أكبر عمار يامصر

عمرو يقول...

شمس النهار
يا برنسيس فتوى ما ملكت أيمانكم دى فتوايه مش بطاله :))
و لا أيه رأيك يعنى ؟ :)
بالنسبه لقضية الحسبه بتاعت الدكتور نصر حامد أبو زيد فدى كانت لموضوع تانى خالص حيث طعن فى صدق اٍسلامه مع اٍن الله هو الأعلم بخائنة الأعين و ما تخفى الصدور يعنى شرعا لا يجوز الطعن فى اٍيمان مخلوق لأننا لا نشق عن صدره كما قال الرسول صلى الله عليه و سلم
شروط الحسبه صعبه جدا و لها أحكامها حتى لا تصبح سلاح فى يد كل موتور أو أهبل لا يحسب للعواقب حساب
أما بقى الجيران اللى بيزعجوا جيرانهم بالزعيق فطبعا بندعى لهم بالهدايه و فيه طرق تانيه أكتر رحمه و اٍنسانيه من تطليقهم
شرفتى يا برنسيس :)

عمرو يقول...

Emy
عندك حق لأن النكد و النقار أحيانا بيبقى هوايه محببه عند بعض المتجوزين و بيقولوا اٍن الشجار و النقار هو توابل الحياه الزوجيه و للناس فيما يعشقون مذاهب :)
أما موضوع جوازك من الواد اٍبنى فأنا بصراحه يا بنتى ما أنصحكيش حفاظا على أواصر الصداقه بيننا لأن من الآخر كده الوله ده عنده دفعه و جنونه و بيشيل حديد يعنى شجاره و نقاره حيبقى خطر شويتين :)

عمرو يقول...

مفكر
تصحيح صغنون يا صديقى فهو جمال قطب مش سيد قطب المفكر الاٍسلامى الكبير رحمة الله عليه
هى فتاوى الفضائيات بقت فوضى غير محتمله و كل يوم نسمع فتوى أعجب من اللى قبلها
بس الفتوى اللى تلخبطك اٍستفتى فيها قلبك يا صديقى و أكيد أنت عارف القياس الفقهى و ما اٍلى ذلك
بارك الله فيك يا صديقى المفكر المستنير

عمرو يقول...

dreem
و هكذا يخلصوا على رجالة العماره ثم رجالة الشارع فالحى فالمحافظه فالبلد كلها و تبقى زى مملكة الأمازون اللى بتحكمها النساء و لا وجود فيها للرجال :))
مش تبقى كده أروق ؟

عمرو يقول...

حاسوباتيه
يعنى ربنا فعلا قال حكم من أهلها و حكم من أهله لكن ماقالش طلقوهم و اٍخربوا بيتهم علشان بيتناقروا
ربنا يستر من اللى جاى يا باشمهندسه لأن سوق الفتاوى من أخطر الأسواق حاليا

عمرو يقول...

صوت من مصر
أيوه كلنا بنفتى لكن فى أمور ليست خطيره و لا تمس جوهر الحياه
ممكن الواحد يفتى فى نوع دوا كحه أحسن و لو اٍن ده برضو مش صح و ممكن أسمع فتوى من شخص عن أسهل الطرق لاٍنقاص الوزن مثلا يعتى
لكن فتوى تخرب البيوت و تهدمها ؟؟
فده الخطر بعينه
شكرا و تحياتى

عمرو يقول...

صبرنى يا رب
مشكلة الشاب جاركم ده بتتكرر كتير لأنها حصلت برضو مع شاب من أقربائى و أضطريت اٍنى أقاطعه و هو بيقرا القرآن الكريم لما اٍتلخبط بين الوقف اللازم و الوقف الجائز
الشباب دول هم اللى فعلا يستحقوا الرعايه و الاٍهتمام من كبار العلماء اللى كرسوا معظم مجهوداتهم للظهور على الفضائيات
تقبلى شكرى و تقديرى

عمرو يقول...

gogo!sf
طيب يعنى ممكن أحضر أفراح خلاص ؟؟
شكرا ليكى بقى :))
طبعا فتوى كوميدى على رأيك حيترتب عليها اٍطلاق لقب مطلقات على تلات أرباع السيدات
تقبلى تحياتى

عمرو يقول...

norahaty
فعلا الموضوع بقى تجارى بحت بتتحكم فيه حاجات تانيه غير الظاهره لنا
بس الأمل فى اٍن الناس يكون عندها وعى و لا تنساق وراء الخرافات
تقبلى شكرى و تقديرى

عمرو يقول...

مجنووون
على فكره سبق لنفس الشخص صاحب الفتوى اٍنه أنكر فتوى سابقه له بخصوص ما ملكت اٍيمانكم و على نفس البرنامج فما كان من مقدم البرنامج أحمد عبدون اٍلا اٍنه أعاد عرض الجزء اللى بيثبت عدم صدق الشيخ فى اٍنكاره لفتواه السابقه
و كانت كسفته كبيره أوى

عمرو يقول...

عاشقه و غلبانه
شفتى المهازل اللى حقيقى تضحك ؟ :))
مساكين نص الستات الى فى شارعك و اللى حيطلقوا على اٍيدك :)

عمرو يقول...

خمسة فضفضه
يا ريت نقلد فى الحاجات الكويسه مش بس الحاجات اللى تخرب البيوت
و فعلا السكوت أحيانا أبلغ و افضل من الكلام

عمرو يقول...

mohamed ghalia
مسا التماسى على أحلى فتاوى تخلى العيشه بهججه أكتر ما هى بصراحه :))

reem يقول...

ههههههههههه
والله هم يضحك ويبكى في نفس الوقت
اصلا دلوقتى خلاص اى واحد عرف يطلع في برنامج على اى فضائية بيقول فتوى وخلاص
طيب الحمد لله انه مش قال اللى في بينها وبين حماتها مشاكل تتطلق هى كمان احسن كدا هايكون في خطر عليا
مدونتك رائعة وتحياتى لك

دينا يقول...

يا جماعة
والله سمعت بنفسي الشيخ جمال قطب وهو بينفى الكلام دا عن نفسه في برنامج الحياة على قناة الحياة

ياريت نبقى نتأكد من مصدر الكلام الاول قبل ما نقوووووووووول ونتهتم بنى آدم في كلمة هو مقلهاش

وانتشار الكلام دا على المواقع والمدونات يدل على اننا فاضيين
ومورناش حاجة نعملها غير فلان قال وفلان عمل
خصوصا إذا كانت فضيحة
فاحنا بنسعى نخليها بجلاجل

وشكرااااااااااا

dr_dina