الاثنين، 9 مارس 2009

الأشجار لا تموت واقفه و لكن مقطوعه ..

شاءت المقادير أول اٍمبارح أن أخلص النيه و أتوجه عن بكرة أبى - رحمة الله عليه - لورشة الأسطى طاطا اٍستشارى تصليح الرادياتيرات و ذلك للحام الثقب اللى أصاب ردياتير سيارتى المصونه و اللى أشك أنه ممكن ثقب الأوزون يتصلح و لكن لا ينصلح حال ثقب ردياتيرى اللى دوخنى و لففنى السبع دوخات و اللى كان السبب فى مشاكل جمه يطول هنا شرحها ..
و من شارع عمومى لشارع أضيق حبتين لحاره لزقاق زغنون لا يصل اٍليه اٍلا العارفين بخبايا حوارى الكوم الأخضر حتى وصلت لورشة الأسطى طاطا اللى كان لسه بيعمل اٍصطباحة الشاى الحبر و بيحبس بحجرين بعد الفطاره المصريه الصميمه اللى كلكم عارفينها و اللى بجد بتربس الدماغ و بتخللى اٍبن آدم مش فاهم شماله من يمينه و لا حول و لا قوة اٍلا بالله ..
و أتحل الردياتير .. و بدأت العمليه .. و بان التوتر على خلقة الأسطى طاطا و هو بيعاين الثقب الجهنمى اللى أكتشفه بعد جهد جهيد .. و بانت علائم هذا التوتر خاصة لما بدأ ينادى على الصبيه من مساعديه ليناولوه القصدير و مسدس اللحام بأسماء و كنيات تتصل اٍتصالا مباشرا بعلم التشريح .. و فجأه !!
و فجأه ..
تناهى لأسماعى صوت ضجيج و خبط و رقع جاى من الشارع اللى بتتفرع منه الحاره اللى بيتفرع منه الزقاق اللى فيه الورشه .. فدفعنى الفضول دفعا أنى أروح أبص لى بصايه كده أستطلع بيها سر هذه الجلبه الجلباء ..
ففوجئت !!
بجد فوجئت ..
فوجئت بتلاته شحوط واحد فيهم ماسك سنجه و التانى ماسك بلطه و التالت ماسك منشار و هاتك يا دق فى شجره عملاقه غايه فى الجمال و الروعه و عاوزين يقطعوها من على وش الأرض !! الشجره يا قلب أمها و ال3 شحوط بيقطعوها
طبعا قطع الأشجار جريمه يعاقب عليها القانون المصرى بصريح العباره .. و أيضا نبينا الهادى صلى الله عليه و سلم أوصانا بأنه لو قامت القيامه و فى يد أحدنا فسيله يعنى شتله فليتمم غرسها فى الأرض يعنى شوفوا مدى الاٍحترام للأشجار ممكن يوصل لأيه ؟؟
و بعدين على المستوى الاٍنسانى فاٍحترام الخضره أمر واجب لا نقاش فيه .. و أما على المستوى الشخصى فبصفتى فلاح اٍبن فلاحين لا أحتمل أبدا أن تؤذى نبته خضراء فما بالكم بشجره عملاقه جميله تظلل فروعها الوارفه على ما يحيطها من بشر و حيطان ؟؟
ربكم و الحق أنا لسه بأفكر فى عقل بالى عن التصرف الواجب فى مثل تكلم الأمور اٍلا و ألاقى الموبايل بيرن تقوم تطلع البرنسيس شمس النهار بتقول لى بصوتها اللى من مقام دو صغير :
- صباح الخير أنت فين ؟!
و يبدو اٍنها سمعت الدوشه اللى جنبى ..
قلت لها :
- بأتفرج على جريمه !!
بان الفزع على صوتها و قالت بنبرة خضه برنسيساوى كده :
- جريمة أيه ؟؟ أنت فين ؟
رديت عليها و أنا أتابع الشحوطه التلاته و هم بيكملوا ذبح الشجره المسكينه :
- جريمة قطع شجره يا برنسيس .. تخيلى لسه فيه ناس بتقطع الشجر !!
قالت بدون تردد :
- أطلب لهم البوليس حالا ..
- بوليس أيه يا برنسيس ؟؟ ده أنا فى سوق فكيهه يعنى البوليس ما بيدخلش هنا اٍلا لو فيه جريمة قتل و بعد تفكير كمان !!
سألتنى :
- بتقول سوق مين ؟؟
شرحت لها أن سوق فكيهه دى منطقه يعنى خطره شويتن تلاته أربعه عشره كده و أنها فى شارع ترسا اللى بيمتد من ترعة المريوطيه لحد الطالبيه و أن المشاكل فيه بيحلها أصحابها بدون تدخل من الشرطه و غالبا بيكون الحل سهل خالص و بسيط بواسطة قانون الغابه اللى هو أن القوى بيطحن الضعيف و بيخرسه للأبد ..
هنا بقى البرنسيس شمس اٍستغربت من كلامى .. طبعا لازم تستغرب .. ما هى أيه عرفها بمثل هذه المناطق ؟؟
طيب . اٍستئذنت منها علشان أصور ما يحدث و لتكن الصور خير شاهد على مثل هذه الجريمه النكراء ..


الشحوط التلاته و هم بيزقوا الشجره علشان تقع بعد ما أتموا تكسير جذعها

توجهت لهم و حاولت أستفسر منهم عن سبب قطعهم للشجره .. ففوجئت بما لم يكن فى حسبانى أبدا !!فوجئت أنهم عمال من رئاسة الحى و أنهم مكلفين بهذا الفعل الاٍجرامى رسميا لأن الشارع حيتسفلت و أنهم حيقطعوا كمان 5 شجرات بتعوق أعمال الرصف !! اٍزاى يعنى مش عارف ؟؟ بس هو كده !! طبعا الحوار معاهم كان عقيم خاصة أن لا أحد من سكان الشارع تدخل لمنعهم بالعكس كانوا بيتفرجوا و هم ساكتين و كأنهم واكلين سد الحنك .. و مما زاد عجبى أن تكون الأشجار الخضراء العملاقه سبب لتعطيل أعمال رصف الطرق و دى حاجه أول مره أسمعها !! و بعدين لما هم مهتمين كده أوى بالمناطق العشوائيه طيب ما يحلوا الأول المشاكل الخاصه بهذه المناطق و أولها توصيل مياه الشرب النقيه بشكل منتظم مش ساعتين بس فى اليوم زى ما بنسمع ..

كاد الأمر أن يتطور لمشكله و مشاده عنيفه بينى و بين المجرمين التلاته خاصة بعد أن لوح لى كبيرهم بكارت منع موظف عمومى من أداء عمله فما كان منى اٍلا أن رديت عليه بما يستحق هو و زملاؤه و رئيسه المباشر اللى أصدر هذا القرار بذبح هذه المخلوقات الجميله اللى بتسبح ربنا و لكن لا نفقه تسبيحها ..

و تدخل الناس المتجمعين للفرجه على الجريمه لتهدئة النفوس و كانوا مستغربين من تصرفى رغم ضعفه و عدم اٍيجابيته فى رأيى و لكن عشمى فى الله أن يقضى فى المسؤول عن هذا الفعل الاٍجرامى بما يليق و يستحق ..

و أتم المجرمون فعلتهم .. و غادرت هذا المكان و الحزن يسيل من قلبى و أنا شايفهم بيسحبوا أشلاء الشجره الجميله بما عليها من أعشاش عصافير كانت تغرد عليها كل صباح ..

ربنا لا تؤاخذنا بما فعل السفهاء منا و أقض فيهم بعدلك يا أعدل العادلين ..


الشجره الغلبانه بعد ما دبحوها المجرمين التلاته

هناك 21 تعليقًا:

شمس النهار يقول...

مش انا قلت لك استدعي النجده
مره راجعه من بره لاقيت نفس الحفله دي هتبتدي في شجره عملاقه امام منزلي بل امام البلاكونه بتاعتنا حيث نحتل الدور الثالث
وماكان مني الا ان استدعيت النجده ومع اخطار السكان للتضامن معي
ماكان من الساكن اللي كان عايز يقطع الشجره الا التراجع والعدول عن ذلك صاغرا
وبعدين انا عايزه اعرف انت بتعرف الاماكن دي منين
اه ترسه دي
احمد ربنا انك طلعت بسلام منها

صبرني يارب يقول...

يوووووووووووووووووه

تعالى اتفرج يا استاذنا على المصايب دي كل يووووووووووم

وشوف الشجر العملاق فعلا والاثري الى على الكورنيش عندنا والى كل يوم بينقص سواء من الاهمال ولا من الافترا ده

ولا شجر القصور الى كانت على الكورنيش
الى شالوها بقصورها عشان يعملوا ابراج

ااااااااااااااه يا بلد


الشيخ زايد الله يرحمه

كان عامل مشاتل مهوله عشان يعمل شتل اشجار وبيستورد تربه من افغانستان وبينقل تراب من مدينة العين للصحرا الي حوالين ابو ظبي عشان بيعمل حزام غابات حوالين ابو ظبي عشان يغير الصفات المناخيه للمنطقه

واحنااااااااااا بنقطع الشجر

تحياتي لحضرتك

وبعدين هات اردياتير جديد بقى احسن ومين ترسه ومين فكيه وايه الاسامي دي هههههههههههههه

اقصوصه يقول...

فعلا حرام

اعداء البيئه

انصار التلوث

مالت عليهم :(

gogo!sf يقول...

كل سنة وحضرتك طيب

من غير عنـــوان يقول...

المشكله الأولى.. هي عدم معرفة قيمة الأشياء... قسمة الجمال... قيمة الأشجار..

أنا لا أعذرهم... ولكنهم لا يعلمون... وعلينا أن ننشر ثقافة القيمة أولا...

تحياتي

رئيس جمهوريه نفسى يقول...

للاسف الشديد موضوع الاشجار واهميتها ليس كمنظر مبهج للعين يبعث بعض الراحة للنفوس بل واهميتها البيئية هي ثقافة مفتقدة في العالم العربي ككل والمصري خاصة

خمسة فضفضة يقول...

السلام عليكم ورحمة الله وبركاته

ازيك يا استاذ عمرو

قلبت علينا المواجع ،اصعب حاجه قطع الاشجار كده جهجهوني من غير رابط ولا ظابط وكتيراوي من غير سبب ، بس عشان السيد المسئول مزاج سيادته كده

عندنا كان فيه قصر قديم الشرطه كانت مأجراه من اصحابه كقسم بوليس او بمعني ادق وخداه بوضع اليد كان قدامه كام شجره كده ممكن تقول عمرها فوق ال 100 سنه ، الشجره الواحده اد يجي عشره من اللي في الصور بتاع حضرتك قبل ما يسلموا القصر لاصحابه قطعوا الشجر اللي كان ماؤي لآلاف العصافير اللي كنا بنستمتع بصوتهم الجميل خصوصا وقت الغروب ، نفسي اعرف ايه السبب في القطع ده ما تعرفش

اللي فرحني بقي ان الشجر رغم كده برضو اتحداهم لانهم ماقدروش يقطعوه من الجذور فسابوا حوالي 3 متر من الجذع ، تخيل ان بعد اقل من سنتين الجذع ده بدأ يطلع ورق ويعمل فروع جديده ..يالله

وكأنه بيقولهم من غصب عنكم هافضل موجود

دا غير طبعا الاشجاراللي كانت علي النيل وقطعوها مره عشان يوسعوا الميدان ومره عشان ساحة جامع والاسباب الواهيه ما تنتهيش

اللي يجنن بقي ان لو فعلا اسبابهم دي صحيحه برضو المفروض ما يقطعوش الشجر لانه بيبقي عامل زي الاثار خصوصا لما يكون اعماره تجاوزت الميه ، لو الشجره يعني مضيقاهم اوي ليه ماينقلوهاش لاماكن تانيه من غير ما يقطعوها زي ما بيحصل في كل الدنيا شرق وغرب ولا هو استسهال وخلاص

حسبنا الله ونعم الوكيل

معلش طولت عليك بس اصلي متغاظه

ممكن تقرا الموضوع ده برضو كنت كتباه بعد مذبحة اشجار كارفور في الجيزة

http://5fadfada.blogspot.com/2007/07/blog-post_20.html


سلام

EmY يقول...

كويس انهم سابوك تخرج بسلام
الي حصل ده عادي جدآ و طبعا الناس كانت بتتفرج علي حضرتك علي اساس انك كائن خرافي و عجيب و بتول كلام غير مفهوم

الموضوع كلو مشكلة ثقافه بالنسبالهم ايه يعني شجره ايه اهميتها لا بتتاكل ولا بتتشرب يبقي تتقطع و نص

norahaty يقول...

(واكلين سد الحنك )
لا والله ياأستاذ عمرو
لكن ما قاسوه من قبل
جعلهم هكذا واكثر من هكذا
كمان؟
حاجة كمان :هو حضرتك فاكر لو طلبت البوليس وانت حتى فى المهندسين كان جه؟
ها ها ها ها (لا تؤاخذنى يعنى:(
البوليس الان لا يأتى لوحده!
لازم انت تروح تجيبه !
او كمان ممكن تقول
ان فيه أجانب
موجوديين
ووحيتضرروا من الحكاية
او حيصوروا الجريمة وينشروها فى النت!

norahaty يقول...

حضرتك ما مشيت فى
شارع الجامعة من مدة
حدث مثل هذا واكثر!

norahaty يقول...

انما ايه ياعُمنا
التحقيقات الصحفية
المدعومة بالصور دى:)

عمرو يقول...

شمس النهار
أهلا يا برنسيس اٍزيك :)
يا برنسيس ماكنش ينفع أتصل بالنجده لأن المجرمين التلاته كانوا بالفعل على وشك الاٍنتهاء من عملهم الاٍجرامى
و بعدين ما سموك عارفه النجده لما بيجى لها بلاغ زى ده عن قطع شجره حتتصرف اٍزاى !!
ثم اٍن المجرمين دول و ده الأهم كان معاهم أمر شغل مختوم من الحى يعنى بينفذوا أوامر جهه حكوميه هم بيتبعوها
يعنى كده خلاص للأسف
بس أنا مبسوط و الله من تصرف سموك مع جارك اللى كان عاوز يقطع الشجره لأنه تصرف اٍيجابى الحقيقه
أما بقى موضوع بأعرف الأماكن دى منين فده موضوع تانى يطول شرحه بس لازم طبعا حأحكيهولك علشان تبقى كل المسائل على نور :)
شرفتى المدونه و نورتيها ..

عمرو يقول...

صبرنى يا رب
شىء مؤلم بجد و الله يا أم خالد
الواحد بيحزن أوى لما بيشوف شجره بتنقطع من غير ذنب جنته غير اٍنها شجره قد خلقت فى بلد لا تحترم فيها الأشجار
الشيخ زايد .. يا سلام على الشيخ زايد رحمة الله عليه
أزعم أنه من أعظم الزعماء العرب قديما و حديثا و أشك أن يأتى الزمان برجل مثله على الأقل حاليا
ترسا و فكيهه دى يا أم خالد مناطق عشوائيه كبيره جدا جدا شاءت الظروف و الأقدار أن أسكن فيهم لفتره من حياتى المليانه بالأعاجيب و لى فيهم ذكريات و أصحاب يتمنوا بس يخدمونى برقبتهم :)

عمرو يقول...

أقصوصه
اللى ما يقدرش قيمة الأشجار فهو فعلا شخص جاهل و هو اللى يستحق أن يجتث و ليس الشجره الجميله اللى ربنا خلقها لتسبحه و لتنشر الظل و الجمال على باقى المخلوقات
أهلا بيكى و شكرا للزياره و التعليق

عمرو يقول...

gogo!sf
و أنتى و الأسره بألف صحه و خير
أشكرك للزياره و التهنئه بارك الله فيكى

عمرو يقول...

من غير عنوان
طيب يا صديقى أنا أوافقك تماما فى رأيك و لكن اٍزاى ننشر ثقافة القيمه و الاٍحساس بالجمال فى مثل الظروف اللى بيمر بيها المجتمع ؟؟
متهيألى الحكايه محتاجه تغيير جذرى لكل المفاهيم السائده أصلا و من ضمنها مفهوم الجمال لدى الناس لأن المنظومه كلها فى الطراوه بصراحه
بس أزعم أن مقولة : التعلم فى الصغر كالنقش على الحجر صحيحه تماما و هى بداية كل تغيير نحلم به
أشكرك يا صديقى و أهلا بيك

عمرو يقول...

رئيس جمهورية نفسى
و الله يا أستاذنا أنا زرت معظم الدول العربيه و الأوروبيه و الآسيويه و بعض دول شرق اٍفريقيا و مجاهل الصحراء الكبرى حيث تعيش قبائل الطوارق و يمكن كمان بلاد نمنم عمرى ما شفت ناس لا تحترم الخضره زينا
يا أستاذ محمود أنا عشت فى بلد عربى المصريين بيبصوا لها على أنها بلد متخلفه و أهلها بدائيين و لكن الحقيقه و الله كانوا بيحترموا النبته الخضرا بشده و يكادوا يقدسوها و مافيش بيت مافيهوش حديقه صغيره كده و فيها ورد
مش عارف أيه اللى حصلنا مع أننا شعب فلاحين أصلا
ربنا يستر

عمرو يقول...

خمسة فضفضه
و عليكم السلام و رحمة الله و بركاته
أشعر بالحزن العميق و الشديد كلما سمعت حكايه عن قطع الأشجار و مستغرب فين بقى جمعيات البيئه و الحاجات اللى بنسمع عنها دى ؟؟!
مش فيه حاجه اٍسمها أصدقاء البيئه و لا أنا بيتهيألى ؟؟
و فين كمان وعى الناس اللى لازم يفهموا مدى أهمية الأشجار لصحتهم و لصحة عيالهم ناهيكى عن جمال الأشجار أصلا ؟؟
غريبه جدا أن المجتمع موافق على هذه الجريمه و بيتضامن معها بالصمت و الفرجه !!
حاجه تغيظ فعلا

عمرو يقول...

Emy
لا بس خدى بالك لو كان الموضوع أتطور كنت حأسحب ناعم طبعا هو العمر بعزقه :)
تصورى أن صناعة الفحم فى مصر قائمه على قطع أشجار الجازورينا اللى هى أصلا مصدات للرياح و الأتربه يعنى مهمه جدا لنقاء البيئه و لكنها للأسف بتقطع من غير رحمه و بتستعمل كفحم !!
شىء مؤلم و لكنه واقع مرير نحياه بغير عقل ..

عمرو يقول...

norahaty
و الله يا دكتوره موضوع النجده موضوع تانى بقى و لسه كان ليا معاهم موقف كده عجيب شويه لما أتصلت بيهم علشان كان فيه صندوق قمامه من الحديد الكبار أوى دول و كان مشتعل و طالع منه دخان كثيف بيهب على معهد أزهرى للأطفال و فضلت أتصل بالنجده أكتر من نص ساعه من غير ما حد يرد عليا و فىن و فين رد عليا شخص مهذب جدا و أخبرنى أن سيارة مطافىء ستتوجه فورا للمكان و فضلت واقف حوالى ساعه و ماجتش المطافىء فمشيت و رحت مشوار و رجعت بعد ساعه و ماكنتش المطافى جت فأتصلت بالمطافى و أخبرونى أن ماحدش بلغهم !!
لكن ربك و الحق بعد حوالى نص ساعه كمان جات سيارة المطافى و طفت صندوق القمامه بعد ما كان أنطفىء أصلا علما بأن مركز الأطفاء ما يبعدش أكتر من 5 دقايق عن مكان الحريق :))
حلوه فكرة التحقيق الصحفى المصور ده بس الحقيقه أنتى أدتينى فكره كويسه و الله
ده أنا حأزهقكم تحقيقات صحفيه مصوره :))

همسه عتاب يقول...

عمرو
صاحب القلم الجميل
ليست الاشجار فقط هيا ما تقتل فى هذا الزمان
فهم يقتلون كل ما هوا جميل
ولا تغضب من قاتليها
فهم نفسهم مقتولون
يعيشون امواتا بدون قبور
ولم تكن لهم حياه
فهانت عليهم حياه كل مخلوق جميل
لم يجدوا من يرحمهم او يبكى عليهم
فكيف بربك
لاتهون عليهم حياه غيرهم
من مخلوقات جميله
يعيشون فى زمن دميم فكيف يعرفون قيمه اطلال ما بقى من زمان جميل
صديقى
اشكرك جداااااا
لك تحياتى وارق امنياتى
بدوام الصحه والجمال