~SUN~ Pictures, Images and Photos

الأحد، 22 مارس 2009

فيشنا الهوامش !! مع الأسف الشديد ..

welcome reaper Pictures, Images and Photos

صباح الخير ..
لا بجد حاجه تزعل ..
تزعل و تحزن و تخللى الواحد يتأسف من أعماق فؤاده على ما صار اٍليه الحال ..
بصراحه و من غير تطويل أنا بأتكلم عن اٍنتشار مخدر الحشيش ليس فقط بين الشباب و البنات صغار السن و لكن كمان بين كبار السن على اٍختلاف طبقاتهم و مستوياتهم الثقافيه و الفكريه بدون تمييز يذكر !!
كل شويه أتفاجىء بفلان أو فلانه اللى لا يبدو عليهم أبدا أنهم واقعين فى مصيدة المخدرات اللعينه أنهم بالفعل من أصحاب هذا الكيف المهبب اللى عاد تانى للطفو على سطح الحياه بعد ما كان أندثر و شبه اٍختفى عقب بزوغ نجمه فى الثمانينيات و ما صاحب هذه الحقبه من تغيرات هزت المجتمع بعنف و أفرزت ظواهر اٍجتماعيه لم تكن معروفه من قبل و لله فى أمره شئون !!
عاوزين نعرف أيه السبب الحقيقى لأنتشار تعاطى الحشيش بهذا الشكل المفزع بين الناس هذه الأيام ؟؟
ما أعتقدش اٍن الأجابه التقليديه اللى هى الضغوط النفسيه و الاٍجتماعيه هى السبب ستكون اٍجابه منطقيه مقنعه بدليل أنى بأشوف ناس لا عندهم مشاكل اٍجتماعيه و لا ماديه و لا من أى نوع و رغم كده غرقانين فى مستنقع الحشيش اللعين حتى آذانهم ..
خدوا بالكم أنى هنا بأتكلم عن الحشيش تحديدا و ليس أى نوع تانى من أنواع المخدرات لأنى فعلا لاحظت قوة اٍنتشاره بشكل مبالغ فيه اليومين دول ..
أيه الحشيش ده ؟؟ و مين له مصلحه فى تغييب أمة عن وعيها بشبابها ببناتها برجالها بنسائها و اللى بأعتبرها جريمه غير مسبوقه فى حق الوطن ..
الحشيش لمن لا يعلم من المخدرات اللى بيسبب الهلوسه و توجد علامات تظهر بوضوح على المتعاطى منها و أهمها اٍحمرار بياض العين اللى بيزول بعد زوال تأثير المخدر ..
و من الصعب للغايه كشف متعاطى الحشيش لو كان فرد من الأسره لا قدر الله لأن الحشيش لا يؤثر على سلوك الشخص لو كانت الجرعه المتعاطاه بسيطه يعنى مثلا ممكن المتعاطى يخدع اللى حواليه بأنه يمارس الأعمال اللى لا تحتاج للتركيز قدامهم بشكل طبيعى لكن بيسهل كشفه لو طلب منه القيام بأعمال تحتاج للتركيز الذهنى زى قيادة السيارات و حفظ الكلمات أو أى أشياء تتطلب وعى لحسابات الزمن و المسافه حتى لو كان قد تعاطى جرعه بسيطه من الحشيش ..
من الناحيه النفسيه بقى لاحظوا اٍن متعاطى الحشيش عادة ما يصف حالته بأنه فى حالة اٍسترخاء لذيذ و بيحس بنشوه وهميه هو صانعها و أن الدقائق بتمر عليه كالساعات و بيشوف الحاجات بعيده عنه جدا مهما كانت قريبه منه ..
لكن لو تعاطى جرعه كبيره فممكن أنه يشعر بالاٍكتئاب و الحزن العميقين و ذاكرته بتضطرب و بتروح فى الكازوزه و بيفقد ملكة الحكم الصحيح على الأمور .. و غالبا ما بتكون هلوساته ذات طابع جنسى و بيستمر الحال على كده من ساعه لست ساعات حسب كمية المخدر اللى طفحها ..
اللى غالبا لا يعلمه الحشاشين اٍن للحشيش تأثير ضار جدا على القدره الجنسيه للرجل على عكس الاٍعتقاد الشائع و هو اٍعتقاد خاطىء و خايب .. لأن الحشيش بيهبط من مستوى التستوستيرون فى الدم و هو هرمون ذكرى .. و كلما زادت الجرعه أو طال أمد التعاطى كلما هبط أكثر و أكثر هذا الهرمون عند الرجل اللى كلما أوغل فى التعاطى بغرض الوصول لقمة الفحوله كلما زادت خيبته القويه و حيوصل فى الآخر أنه ما ينفعش ببصله و يتخمد جنب زوجته زيه زيها و يمكن هى تكون أرجل منه شويه ..
عارفين لما الرجل بيوصل لهذه المرحله و يقول أنا غاده بيضطر من جهله و غباءه يدخل بقى فى مرحلة المخدرات التانيه اللى هى أشد فتكا من الحشيش لتنشيط ما قد همد فيه .. يعنى كده خلاص عليه العوض فيه من كل النواحى .. يعنى الحشيش اللى الناس مستهتره بيه و بيقولوا عليه بيفتح النفس و بيضحك ليس اٍلا فى الحقيقه هو ممكن يكون تمهيد لما هو أسوء بل ممكن تكون سيجارة الحشيش هى أول سلمه للقبر و لا دايم اٍلا وجهه سبحانه و تعالى ..
الشخص الحشاش اللى بيعيش وسطنا و مش عارفينه عادة بيكون غلبان و فى حاله و ماشى جنب الحيطه و مش بيعمل خروقات للقانون بسبب ما أصاب شخصيته من ضعف و جبن و اٍهتزاز .. ده طبعا بخلاف اٍن حيازة المخدرات مجرمه قانونا ..
لاحظت للأسف الشديد اٍن أغلب زوجات الحشاشين أصبحن حشاشات هن كمان !!
من وجهة نظرهن أن ده شىء فرض عليهن لمسايرة الأزواج و على حد قولهم : علشان الكيف يجمع !!
هنا بقى علاقة الحشاش بزوجته بتاخد منحنى آخر تماما .. الزوج المتعاطى دائما ما يكون أنانيا فى علاقته الخاصه يعنى لا يهتم اٍن كانت زوجته قد سعدت بالفعل أو لا .. المهم هو و كيف يمارس هذه العلاقه بطريقته الخاصه اللى ماكنش يقدر يعملها أو يكشفها لزوجته لو لم يكن تحت تأثير المخدرات اٍما بسبب الخوف أو الخجل أو الخلل النفسانى أو بسبب الوازع الدينى و النواهى الربانيه ..
و الزوجه أيضا ثبت أنها بتصاب ببرود و قلة اٍكتراث بالفعل الحميمي مع زوجها و غالبا ما تتمنى أن ينتهى هذا اللقاء المنفر بسبب ما هو ممكن أن يحدث من زوجها اللى تعلم و أكتسب عادات سيئه من جلسات تدخين الحشيش اللى هى أصلا بتلم الحثاله و الضايعين و كمان ممكن تكون بتنفر من رائحته اللى تغيرت بفعل المخدر اللى بيسرى فى دمه ..
التحاليل المعمليه أثبتت اٍن الحشيش اللى الناس مستهتره بخطورته تأثيره المدمر على خلايا المخ اللى لا يمكن أن تتجدد أقوى من تأثير الماريجوانا بخمس أو ست مرات .. و الماده الفعاله فى الأتنين هى مادة THC اللى بتختزن فى دهون الجسم و بتوصل لدرجة التشبع منها فبالتالى بيقل تأثيرها على المتعاطى فبيلجأ لزيادة الجرعه أو بيلجأ لأنواع أقوى من الحشيش لتعويض هذا النقص و هكذا من سىء لأسوء حتى تمام الضياع ..
قولوا لأ للمخدرات بكل أنواعها ..
اٍشرحوا مساوىء و أضرار الحشيش للى مش عارفها و قولوا اٍنه بيؤدى لأضرار جسيمه صحيه و اٍجتماعيه لا قبل لأحد بمواجهتها خاصة بعد غشه بمواد كيماويه و منشطات ضاره للغايه ..
قاطعوا الأفلام اللى بتعرض جلسات الحشيش على اٍنها جلسات حلوه و آخر فرفشه و اللى بتظهر الحشاش على اٍنه شخص لطيف و دم أمه خفيف و بيقول نكت و قفشات بتضحك و حاولوا قدر المستطاع منع الصغار من مشاهدتها ..
بينوا لمن تعرفوا اٍن الحشيش من المسكرات زيه زى الخمر اللى ربنا نهى عن تعاطيها و حملها و شرائها و مجالسة شاربها و وضحوا لهم اٍن المجنون لا يقذف باٍبنه من الشباك و لكن متعاطى المخدرات قد يفعلها ..
و أما أنتم أيها الحشاشين و الحشاشات فربنا يا يتوب عليكم يا ياخدكم و يريحنا من خلقتكم العكره ..

هناك 36 تعليقًا:

شمس النهار يقول...

ماشاء الله عليك ياعمرو
لما بتتكلم في موضوع ماشاء الله بتغطيه من كل النواحي ومهما كان الواحد قرا فيه برضه بياخد معلومه جديده
وكل كلمه كتبتها عن مدمن الحشيش صح والخطوره فعلا بتكمن في انه فعلا كل شويه بيدور علي حاجه اقوي عشان يحقق الانبساط الزائف اللي بيحصل عليه
والمشكله انه مابيرضاش يتعالج مع ان العلاج مهما حاول الاهل لايتم الا بقتناعه هو شخصيا واي محاوله لعلاجه من غير مايوافق لازم تنتهي بالفشل
وعلاج المدمن صعب جدا ومؤلم ليه وللي حواليه وعكس الناس مافهمه علاج المدمن بيحتاج سنه علي الاقل
وبعد كده يبتدي يصلح في اجهزته الجسمانيه اللي خربتها المخدرات اللي ممكن يتصلح
بس اللي عمره مابيتصلح نفسية المعاشرين له من اهله
بيكون ترك جواهم عدم الثقه فيه وعدم الشعور بالأمان اصلا

خمسة فضفضة يقول...

السلام عليكم ورحمة الله وبركاته

متفقه معاك ان انتشار الحشيش اليومين دول مش بس بسبب الاكتئاب اللي صاب الناس من الكبير للصغير ولا بس بسبب الحاله الاقتصاديه اللي بقت في الحضيض لمعظم الناس ولاعشان يهربوا من مشاكلهم

وبأكد لحضرتك ان فيه ناس كتير اوي في البلد دي (غير طبعا الناس اللي بيكسبوا اد كده من ورا تجارة الحشيش ) من مصلحتهم ان الشعب يبقي مغيب وتايهه مش عارف لا رايح فين ولا جاي منين ، مش قادر يعلي صوته ويقول لا
وبنص كلامك يكون :


غلبان و فى حاله و ماشى جنب الحيطه و مش بيعمل خروقات للقانون


فعشان كده انتشر الحشيش تاني واكتر من الاول وبعد ما كانت افلام التمانينات بتبين متعاطي الحشيش والمخدرات عموما بصوره بشعه تنفر الناس منه
بقي الحشاش دلوقتي هو الشخص اللطيف الظريف ابن النكته اللي الكل بيحبه


ربنا يعافينا ويعافي المسلمين من كل داء ويحمي شبابنا من كل متربص بينا جوه وبره


سلام

أمل حمدي يقول...

موضوع مهم جدا يا عمرو

وفعلا انتشر زي الوباء بين كل الاوساط الفقيرة والغنية
وكل الاعمار

ربنا ينجي اولادنا ويحميهم اللهم امين

لكن لو درسنا كل فئة على حدة هانلاقي ان الاسباب بتختلف كلية من وسط لغيره

والكلام كتييير وعايز مواضيع ومواضيع

ولو رجعت للسبب الرئيسي ابحث عن الصهيونية

تقديري لعمرو

غير معرف يقول...

انامتزوجه منذ 7سنوات مشكلتي ان زوجي مدمن الحشيش حاولت ان ابعده عنه ولكن لم يتغير بل للاسف اكتشفت انه يستخدم الحبوب وانه كان مدمنا على جميع انواع المخدرات قبل زواجنابوقت طويل وقد تلقى العلاج ولكنه استخدم انواع اخرى من المخدرات في فتره زواجناوانااحاول ان اصلحه واساعدهولكنه يغضب اذا فتحت معه الموضوع وقد يترك كم شهر ثم يعوداحس بالاحباط وكانه يهدم ما ابنيه عندما يعود اليه مشكلتى اني لااتقبله بالحشيش واخشى ان يتاثر به اولادي واني لااراة قدوة لهم ولاارى فيه الزوج الذي اتمناه وبالمناسبه هو طيب وحنون ويصلي احيانا كثيره وعندما يترك الحشيش احس اني اسعد انسانه في الكون واتمنى ان يضع يده في يدي لنربى اولادنا تربيه اسلامية ونكون نفسنا وشكرا لطرحك للموضوع

Unknown يقول...

السلام عليكم ورحمة الله بوركاتة
والله يا استاذ عمرو
المخدرات بانواعها وحتى التدخين من الافات المضرة جدا بصحة الانسان
والمكسبة لعادات اكثر من سيئة فى مجتمعنا سواء على المستوى الصحى او السلوكى

بجد موضوع مميز وفقك الله

من غير عنـــوان يقول...

تنبيه رائع
ولا حول ولا قوة إلا بالله

المشكله أيضا في أن الجميع لا يروا فيه مشكله....

وقى الله أبنائنا وإخواننا شر هذا الوباء...

أمنياتي

صبرني يارب يقول...

تمام الله يفتح عليك يا استاذنا

وحكاية ان الست بقت تعمل زي جوزها

وجوزها راضي يعنى دي المصيبه السوده

والحشيش مش عارفه مين اهبل اقنع الناس الى اهبل منه انه مش بيسطل

على فكره واحد مره كان مدمن جميع انواع المخدرات والخمور كمان

قالي ايييييه انتى فاكراني عشان باضرب كام سجارة حشيش فى اليوم ابقى ماشي اطوح ؟؟؟؟؟؟؟
لا كلا البت انا فايق وقاعد فى شغلي وباشوف شغلي

طب تقدري تقوليلي انا دلوقتي ضارب حشيش ولا لا ما انا باكلمك اهو (كتابه يعنى)
قلتله لا دلوقتي لا
انما امبارح الصبح كنت ضارب يا معلم
وكان بيرفض ابدا الاعتراف بان الحشيش بيتحول لادمان وانه بيخليه مسطول فعلا وانه عادي بيشرب حشيش وبيره بس مجرد بيعلى دماغه

الاخ ده كان مدمن هروين وبطل لوحده اه عالج نفسه بعد ما غلبوا فى مستشفيات ويطلع يرجع تاني

والحمد لله تعالى بفضل الله هو بطل كل ده وربنا هداه

ادعوله ربنا يثبته ويقدرنى اساعده كمان عشان يكمل على الطريق ان شاء الله

حقيقى الناس دول بيبقوا مغيبين يا استاذنا
وشايفين كل الناس حشاشين وكل الناس زيهم غرقانين فى الزفت

ربنا يتوب عليهم يارب ونبطل هبل ونبطل نتكلم واحنا مش فاهمين حاجه ونعلق على شماعات الازمات والمشاكل

ونعرف اننا نفسنا وحشين نصلح نفسنا الاول

تحياتي لحضرتك على الموضوع الجيد فعلا

صبرني يارب يقول...

معلش يا استاذ عمرو

هاقول كلمه لناهد

يا ناهد الله يعينك ويصبرك

يعنى حاولي تضغطي عليه اكتر ولو ما نفعش معاه الكلام اللين شدي عليه وهدديه انك تاخدي العيال وبالسله تثبتي عليه انه بياخد مخدارت ويتحرم من اي حق في تربية ولاده

بس حاولي اوي معاه بالدين وتخليه يواظب على الصلاه
ان الصلاه تنهي عن الفحشاء والمنكر

جربي الطريق ده اولا ما تتكلميش عن الحشيش الا قليلا

لكن اتكلمي فى الصلاه كتير بالحنيه والحب الاول وبعد كده بالنفور والتحذير من عقاب الله

وادعيه دايما يصلي معاكي جماعه وقوليله عشان الولاد يتعلموا

وربنا معاكي يا حبيبتى ويقدرك يارب تكوني سبب فى هدايته ان شاء الله

dr.lecter يقول...

انا اعرف واحد بيحشش علشان هو اتعود انه يشرب حشيش هو اه مش مدمن ولا حاجه لكن اول مابيلاقي مزاجه متعكر او فيه مشكله واصلا المشكله ماتستحقش اي كلاام تلاقيه راح جايب قرش علي طول ولافف جوينت محترم علشان ينسي همه وهو اصلا بيضحك علي نفسه

الحشيش كييف في المقام الاول ومزاج وتعود ويمكن انا شايف انه ارحم بتيير من المخدرات التانيه زي البانجو والهيرووين
ده مش معناه اني بؤيد نظريه هيا بنا نحشش والعياذ بالله انا بس حبيت ارغي عنه حبه

عاشقه وغلبانه يقول...

الحشيش دلوقتي اصبح زي السجاير
عاااااااااااااااااااااااااااادي جدا

المصيبه ان في ناس مابتعتبروش مخدر...........!!!!!!!

kochia يقول...

كلام جميل
بس السؤال ازاي نقنع واحد حشاش انه يبطل ؟
هيقتنع ازاي ؟
اذا كان الحشيش بيتقال عنه كلام زي انه مش مضر زي باقي المخدرات وانه له فوايد صحية اذا تم تناوله بكمية صغيرة وكلام من هذا القبيل ؟؟؟

gogo!sf يقول...

ازيك يا استاذ عمرو
موضوع جميل جدا وانت بقى سبقتنى بس مش مهم المهم ان حد اتكلم عنة

الحقيقى ان الناس دلوقتى بقو يتعاطو الحشيش وكأنه لب او سودانى عادى جدا

بس انا اعرف اة بيدمر خلايا المخ
وكمان بيؤدى الى ارتخاء فى الاعصاب بعد فترة من تعاطية
يعنى بيدمر الانسان وبيبهدله
والناس مش عارفة ده ..الواحد والله مش عارف يقول اية

يا استاذنا السبب فى انتشاره محمد هنيدى الممثل مش هو قال ان الحشيش بيعمل سيبان فى الاعصاب وبعدين يطلب زى ما يطلب ..للاسف الكلمة دى بقت على لسان الناس كلها اللى بتشرب حشيش
واللى مش بتشرب كمان

تحياتى لموضوعك الرائع

غير معرف يقول...

شجيرات القنب الهندي ( Cannabis Sativa) والذي يتم زراعتها في المناطق الاستوائية والمناطق المعتدلة والماريوانا هي أوراق وأزهار القنب الجافة. والحشيش هو السائل المجفف من المادة الصمغية. والحشيش اكثر المخدرات انتشارا في العالم نظرا لرخص ثمنه وسهوله تعاطيه فهو لا يلزمه ادوات معقده مثل سرنجات الأبر او غيرها فقط يكفيك كوب زجاجي وغطاء(كفر)وله وسائل اخري مثل الكنشه والغرقانه ووحده بيع الحشيش هي القرش وسعره يتراوح ما بين 130جنيا واربيعن جنيها وذلك في مصر والحشيش منتشر جدا في مصر وللحشيش اسماء اخري في بعض البلدان العربيه مثل كوكو السعيد او الكيف كما في بلاد المغرب وأوراق نبات القنب تحتوي مواداً كيميائية كتتراهيدرو كانبينول Tetrahydro-Cannabinol وكميات صغيرة من مادة تشبة الأتروبين تسبب جفاف الحلق .و مادة تشبة الاستيل كولين تسبب تأثير دخان الحشيش المهيج. والحشيش من المواد المهلوسة ( Hallucinogens بجرعات كبيرة نوعاً من الهلوسة. وتدخين الحشيش أكثر الطرق انتشاراً ، وأسرعها تأثيراً علي الجهاز العصبي المركزي نظراً لسرعة وصول المادة الفعالة من الرئة إلى الدم. ومنه إلى أنحاء المخ ليشعر الشخص بالاسترخاء والنعاس والابتهاج والانتعاش والمرح. والشعور بضعف شديد في القدرة على التركيز والانتباه، وفي قدرة التذكر المباشر وقريب المدى، كما يعاني الشخص من خلل في التوازن الحسي والحركي مع زيادة ضربات القلب وارتفاع النبض وهبوط ضغط الدم . وجفاف الفم والحلق والحنجرة.

عمرو يقول...

شمس النهار
أهلا بيكى يا برنسيس :)
على فكره الحشيش يعتبر آفه من أسوء الآفات اللى ممكن يتعود عليها الشخص لأن طرق تعاطيه سهله و مش بتحتاج لغلبه لكن فى الحقيقه بيجر لأشياء سيئه جدا
علاج مدمن المخدرات بصفه عامه هى تعذيب للمدمن و لأهله و يمكن لأهله بالأكتر بس الخطوه الأولى لازم تيجى من المدمن نفسه و بقناعه تامه منه و برغبه صادقه فى العلاج
شكرا لاٍطرائك و أخجلتم تواضعنا :)

عمرو يقول...

خمسة فضفضة
و عليكم السلام و رحمة الله و بركاته
الله ينور عليكى يا دكتوره جبتى المفيد و ردك لوحده كده يعتبر بوست قائم بذاته :)
أشكرك و تقبلى تقديرى

عمرو يقول...

ماما أمولة
فعلا الأسباب بتختلف من فئه لفئه لكن فى النهايه مش حنلاقى أبدا أى سبب مقنع يخللى الاٍنسان يدمر نفسه بهذا الشكل
موضوع الصهيونيه ده بقى موضوع يطول الكلام فيه و اٍن شاء الله يبقى فيه بوست قريب عن هذا الموضوع ..
تقبلى شكرى و تقديرى

عمرو يقول...

ناهد
قلبى عندك يا ناهد ..
رد أختنا صبرنى يا رب عليكى فيه الكفايه ..
ربنا يهدى عباده

عمرو يقول...

نهر الحب
العادات السيئه بتكون نتائجها غالبا أشد سوءا مما نتوقع و لكن الناس بتصر عليها اٍصرار غريب !!
تقبلى شكرى و تحياتى ..

عمرو يقول...

من غير عنوان
المشكله الحقيقيه فعلا أن كثير من الأشياء نراها بسيطه و عاديه و هى تحمل فى طياتها خطرا و شرا كبيرا جدا
تنبيه الآخرين مهم و لكن مين بقى يسمع ؟؟
شكرا للزياره و التعليق يا صديقى ..

عمرو يقول...

صبرنى يا رب
و الله برافو عليكى اٍنك ساعدتيه على الخروج من دائرة الاٍدمان بارك الله فيكى و جعله فى ميزان حسناتك
و برافو عليه هو كمان اٍنه قدر يساعد نفسه و كانت عنده الرغبه فى الشفاء و أدعو الله سبحانه أن لا يعود أبدا لهذا الطريق
و لعلمك المدمن بيبقى عارف أنه فى طريقه للموت و الهلاك و لكنه برضو بيستمر .. غريبه !!
أهلا و نورتى المدونه يا أم خالد

عمرو يقول...

dr.lecter
ما هى المصيبه اٍن الحشيش بيصنع عالم سعاده وهمى غير حقيقى لمتعاطيه و بيرسم له فى خياله اٍن الحياه بقت هاديه و لذيذه و لكنها بترجع زى ما كانت بمجرد زوال تأثير المخدر فبيرجع يحشش تانى علشان الدنيا ترجع حلوه تانى و هكذا
دائره مغلقه يا ويل اللى بيقع فيها ..

شاب كــ طخين ـــــا يقول...

موضوع بجد مفيد اوى تقبل تحياتى وأعجابى بطريقتك السهلة والجميله
مشاء الله قايل حاجات كتير اوى عن الموضوع ده تسلم ايدك

_____________

ربنا يكفينا شرة انا عن نفسى بدوخ من المية الساقعة علشان كدة مبشربهاش :D:D


سلااام

♥نبع الغرام♥♪≈ يقول...

السلام عليكم ورحمة الله وبركاته
عمرو بجد جميله والموضوع ده مهما تتكم فيه مين هيسمع كل شىء بقا عادى وسهل فى الزمن ده
تقبل تحياتى

عمرو يقول...

عاشقه و غلبانه
و مع اٍن السجاير شىء ضار جدا و لكن المصيبه الأشد اٍنهم بيعتبروا تدخين الحشيش دى حاجه كويسه و من أعمال الجدعنه اللى حتوديهم فى داهيه عن قريب اٍن شاء الله !!

عمرو يقول...

kochia
اٍحنا مش مطالبين اٍننا نقنع الحشاش بالاٍقلاع عن تدخين الحشيش و لكن نعمل اللى علينا و نوضح له أضرار التحشيش و نوضح له كمان أنه ضار جدا و فتاك
و الله لو أقتنع يبقى أهلا و سهلا و لو ما أقتنعش يبقى الصح أننا نتلافى التعامل معاه حتى يحس بالعزله و الوحده و شويه شويه حيلاقى نفسه منبوذ من أصدقائه و أقاربه بل و المجتمع كله زائد أنه أكيد حيتعرض لأزمه صحيه أو حيشهد أزمه يتعرض لها واحد من أصدقائه الحشاشين و ما أكثر هذه الأزمات !!

عمرو يقول...

gogo!sf
برضو ياريت تكتبى عنه و زيادة الخير خيرين
مش بس محمد هنيدى هو السبب :)
الأسباب كتيره أوى و الله و كلنا عارفينها و لازم حييجى اليوم اللى حتنكشف فيه كل الأسباب ..
شكرا ليكى و نورتى

عمرو يقول...

غير معرف
الله ينور :)
أشكرك على هذا البحث المصغر عن الحشيش و واضح اٍنك متخصص ..
بس ليه غير معرف ؟
تقبل تحياتى و شكرى

عمرو يقول...

أمبارح كان عمرى عشرين
أشكرك يا صديقى و بارك الله فيك
بس بتعمل أيه فى الصيف ؟! :)

عمرو يقول...

عاشقه الأحزان
أدينا على الأقل بنقول كلمة حق و بنعمل اللى علينا و ربنا بقى ياخد بأيد من سقط فى هوة الحشيش و يتوب عليه
شكرا للزياره و التعليق :)

عمرو يقول...

بيرم المصرى
حاضر
شرفت و نورت المدونه و أهلا بيك :)

gogo!sf يقول...

استاذ الفاضل عمرو
انا جاية اعتذر لانى
اسم حضرتك اللى منورنى فى مدونتى المتواضعة ناقص حرف واحد بس
فعلا ماخدش بالى
بجد اسفة

mahasen saber يقول...

فكرتنى بسيرتها المعكننه المخدرات دى

افه فعلا للمجتمع وللمتعاى ومصيبه كبره على اليى بيحتك او يتعامل مع المتعاطى ده

انا شايفه ان ممكن حضرتك تعملها حمله على المدونه للتوعيه باضرار الحشيش وغيره من السلسه الدهب الفالصو دى

ربنا يعافى كل مصاب

mahasen saber يقول...

بقالى فتره مبدخلش مدونات واعتقد انى هلاقيك نزلت مواضيع كتير بس فوجئت بالموضوع الجميل ده

رائع فعلا وفيه معلومات قيمه جدا انا مكنتش اعرفها اساسا

دايما مبدع يا لوردنا الغالى

حاسوباتيه يقول...

فعلا بقى منتشر جدا كانه سجاير بالظبط والي يغيظ انهم بيشربوه علني وكل المراحل العمريه ربنا يهدي يارب ويحمي شبابنا وكل المسلمين

gogo!sf يقول...

على فكرة يا استاذ عمرو
فى موضوع حصل لاحد جيران مها زين عن سرقة الاعضاء
واحب ان حضرتك تزور مدونتها وتقرا
بنفسك عشان تشوف اد اية الناس مش عندها قلب ولا ضمير منهم لله
معلش بس الموضوع ده مثير جدا
وارجو ان تتقبل اعتذارى

جوجو الحزينة

Unknown يقول...

فعلا استاذ عمرو
الحشيش رجع ورجع بقوة
كمان يمكن لانه ارخص او اسهل
لكن للاسف واعترف لك انتشر فهو منتشر
ربنا يستر على شبابناوأولادنا منه
غلابة والله ياأستاذ عمرو من كتر
الضغوط اللى عليهم
(وماتقوليش مفيش ضغوط لأ فيه ولو حتى الالحاح بالرغبة فى الروقان الكاذب اللى بيمثله شرب الحشيش)