~SUN~ Pictures, Images and Photos

الخميس، 12 مارس 2009

فتوة الاٍبره و الفتله !!

JellyMuffin.com - The place for profile layouts, flash generators, glitter graphics, backgrounds and codes
فى بوست مساء الحلاوه يا دنيا الفتاوى كان بيتهيألى كده اٍن فتوى تطليق الجيران لجيرانهم لو بيتناقروا و بيعملوا مشاكل هى فتوى مسخره و تهريجه مصريه كده من اللى أشتهر بيها المصريين :))
بس بجد بقى فتوة النهارده هى اللى ليها العجب بصحيح و هى اللى خلتنى أصدق اٍن صاحب الفتوى الأولانيه سيد العاقلين مقارنة بصاحبة فتوة النهارده .. أصلها بصراحه كده فتوى لوز أوى :))
بصوا يا أخوانا ..
حضرة الدكتوره صاحبة الوجه المألوف على الفضائيات و أستاذة الفقه المقارن بجامعة الأزهر و المعروفه اٍعلاميا باٍسم مفتية النساء أفتت فى برنامج عما يتسائلون اللى بينذاع على قناة دريم الفضائيه أنه يجوز شرعا التصدق من مال الزكاه على البنات لعمل عمليات ترقيع لغشاء البكاره قبل الزواج !!!!!!!
و أوصت بعدم اٍخبار الزوج لأنه لو عرف حتبقى مصيبه على دماغ البنت لاٍن مين اللى يقبل يتجوز واحده ذات تجربه و يمكن تجارب !!
و شرحت فضيلتها اٍن العمليه يجب أن تكون قبل ليلة الزفاف ب 24 ساعه حتى لا تفسد !!
و كمان قالت اٍنها عمليه سهله و مش جراحه بل هى غرزتين كده فى لامؤاخذه علبة اللولى و ينفع تكرر مره و أتنين و تلاته بشرط التوبه !!
و قالت اٍن لو كيس الجوافه اللى هو العريس اٍكتشف الملعوب يبقى حظ البنت كده و ليها رب اٍسمه الكريم !!
و النبى يا أبله اٍحنا اللى لينا رب اٍسمه الكريم .. رب اٍسمه العظيم .. رب اٍسمه العدل حنقف قدامه و حنقول لأ ما عملناش و لأ ما قلناش لكن حتشهد علينا أعضائنا .. يعنى أيدينا حتتكلم و تقول أنا عملت كذا و رجلينا حتتكلم و تقول أنا عملت كذا و كل حاجه بقى حتتكلم و حتقول أنا عملت كذا و كذا و كذا.. و ألسنتنا كمان حتشهد علينا و حتقول أيوه أصحابنا قالوا كده و كده و كده و خلونا ننطق كلام فارغ كان السبب فى قرطسة شباب زى الورد شربوا المقلب المظبوط و هم لا يعلمون !!
و النبى يا أبله سيبى البنات فى حالهم و ما تطلعيش فتاوى تشجع صاحبات النفوس الضعيفه على المضى قدما فى مشروع الترقيع لحسن الحكايه مش ناقصه و الشباب و البنات مكبوتين و طالعه روحهم طبيعى من ضيق ذات اليد و قلة الجواز يعنى الحياه أصلا مترقعه علشان المركب تمشى..
كله كوم و أموال الزكاه اللى حتنصرف على عش البلبل دى كوم تانى :))
يا أبله عيييييييييييييييب !!!!

هناك 30 تعليقًا:

شمس النهار يقول...

شوف ياعمرو
الفتوي بقت علي المقاس
طبعا انا بحب الدكتوره جدا واقدر فتاواها جدا وهي من المفتيات الشجعان
وكانت قد تصدت قبل ذلك لنفس الفتوي
مش قادره استوعب هي ليه غيرت كلامها بعد ماكانت بتقول ده غش وتدليس لايقرهم الشرع والدين ومن غشنا فليس مناايه بقا اللي حصل غير الدنيا مش فهمه
وكمان مصارف الذكاة السبع مذكوره في القرآن ليس فيها هذا المصرف اطلاقا
يبقا الدكتوره جابت منين والا يكونش ده في سبيل الله واحنا مش دريانين
بصراحه الموضوع غريب ياعمرو ولولا اني بثق في كلامك ومصادر اخبارك كنت قلت ده مش صحيح
دي عملت زي فتوي ارضاع الكبير اللي تحاكي بيها الركبان وانتهت باٍقالت الشيخ الهمام صاحب الفتوي
طيب مين هنا هيتصدي للفتوي دي
كل واحد عنده عقل يميز واستفتي قلبك في هوجة الفتوي المحطمه للمجتمع

عاشقه وغلبانه يقول...

امممممممم
الموضوع ده فيه وجهتين نظر
والاتنين يحترموا وبالدليل بصراحه
انا بتكلم عن الترقيع
اما موضوع اموال الزكاه فدي مسخره
وبعدين الدكتوره ماتخافش
البنات اللي بتبقي ماشيه في الطريق الزباله ده بيبقي معاها فلوس مش محتاجين زكاه يعني ولا حاجه
انا لحد دلوقتي محتاره فيالموضوع الاساسي ومش عارفه ارسي علي رأي

صبرني يارب يقول...

نعم ؟؟؟!!!!!

لا حقيقى بقى نعم

طيب ما تطلع فتوى ان الى مش متجوز وحبكه الكيف عادي بقى بس يبقى يستخبى كويس ؟؟


طيب يعنى قالوا الترقيع للمغتصبه ماشي

اهو غصب عنها وعايشه فى مجتمع متخلف

ولو انى شايفه ان الاخ الى يرفض واحده عشان مغتصبه قبل كده وانها ناقصها غشاء يبقى حمار اساسا ما ينبكيش عليه

بس تكون مغتصبه بصحيح مش بتستهبل

انما كمان تعملها وتكررها وعادي يعنى بس تكون تابت؟؟؟

وكمان من اموال الزكاه

عموما انا مش باثق فى فتواها اساسا لانها بجد مش منصفه ومش محايده

بس على راي شموسه هى كانت معارضه اساسا حتى فىحال المغتصبه

ايه الى خلاها غيرت كلامها ؟؟؟

حضرتك انا اساسا احمد عبدون ده بالذااااااااات اول ما باشوف خلقة اهله على التليفزيون باقفل التليفزيون خالص 3 ايام

لا باطيقه ولا باطيق الالابنده الى بيعملها هو والناس الى بيجيبهم

ومش عايزه اقولك بابا مسميه ايه عشان ما باعرفش اقولها

بس بجد بجد انا مش هاتنازل عن المحرقه الى عايزه اعملها للمفتيين بتوع الفضائيات


عمرك حضرتك شوفت الشيخ عمر عبد الكافي ؟؟

يا سلام رجل محترم ذو علم بيجى يتكلم بكل احترام واخلاق وذوق وتواضع

ولا تهتهه ولا تليفونات ولا مذيع اهبل معاه ولا فتاوي لا تتخير عن الفته فى كونها مهروسه فى بعضها كده ولا اي كلام فارغ من ده

مش لوك لوك لوك فتاوي وبس


بتيجى انت على الحته الي بتتجنني موضوع المشايخ والفضائيات ده

تحياتي استاذنا

Unknown يقول...

السلام عليكم ورحمة
الله تعالى وبركاته
ومساء الخير لأاسفة
صباح الخير ياأستاذ عمرو
اصل الساعة بقت 12:4من صباح الجمعة
فقط اريد أن اسألك ياأستاذ عمرو عن رأيك الشخصى لو حدث الامر للفتاة بغير أرادة منها ولا رغبة بل عنوة وغصبا:(
هل تنصحها بها؟وهل تنصحها بأخبار الاخريين؟تعلم مجتمعنا الشرقى
وتعلم قسوته فى مثل هذه
الامور الشائكة فأريد
رأيك انت كرجل عاقل
وأب ايضا لشباب
بماذا ستجيب ؟

Unknown يقول...

أستاذ عمرو لا أتكلم
عن اموال الزكاة وما شابه
فهذا فى رأيى مرفوض تماما وربنا
ماااااااااااااااااااااااااا
يحوجنا لها بأى شكل كان.

mahasen saber يقول...

دى فتوه ظاهرها رحمه بالفتاه اليى تابت وباطنها مصيبه كبرى بالزوج لانها بتخدعه وممكن اصحاب النفوس الضعيفه يتخذوها زريعه زى ما تفضلت وقلت يا لوردنا الغالى

انا ضد فتوى زى دى يعنى شايفه ان الصراحه وبداية الحياه على ورقه بيضه افضل مليون مره من بدايتها بغش
والله وحده اعلم

غير معرف يقول...

XXXXرساله مش للنشر او ممكن تنشرها
استاذ عمرو ... كلام حضرتك جارح و صادم ... لانك مش مريت بتجربه حزينه تخلى عندك فكره قد ايه البنت الى تعرضت لاغتصاب من اقرب الناس و هى طفله و ضاعت منها احلامها و هى كبيره تلجا لعمل العمليه ديه عشان تحتفظ بالانسان الوحيد اللى حبها فى الدنيا
حبعت لحضرتك اميل و لو فيه شجاعة عندك انشره

رئيس التحرير يقول...

بسم الله الرحمن الرحيم
الاستاذ...عمرو
السلام عليكم ورحمه الله وبركاته.
سعيد جدا بدخولي عالمكم الفلسفي...
من افتت امام كاميرات التلفزيون لا يعاب عليك ذكر اسمها ....
نحن فيهذه الايام في آخر الزمان ...
الي بيحصل دا غلامات الساعه ...ولم يبقي من علامات الساعه غير خروج الشمس من المغرب.
ثبتنا الله واياكم علي الايمان.

ذو الوجه المبتسم يقول...

السلام عليكم ورحمة الله وبركاته
اولا اسمح لى بالزياره لمدونتك الجميلة ودى اول مرة
اتفضل
اوك انا قعدت اهو
ممكن اعلق على الكلام
اوك ممكن
اولا موضوع الفتاوى على الفضائيات اصبحت شئ لا يطاق لان اللى له واللى ملهوش بقي بيفت اقصد بيقتى
بخصوص موضوع البوست
فهو من وجهة النظر اصلاح ما يمكن اصلاحه وعدم الشوشرة والفضيحة للبعض
وكما تفضلت الدكتورة نور فى تعليقها وسالتك
لو بنت تعرفها وحصل لها اعتداء جنسي بالغصب
تنصحها بايه
تفتكر انت نفسك هتوافق على الزواج منها لو اعترفت لك انه غصب عنها
كلامى مش معناها تشجيع لعمليات الترقيع ولكن رائفة بالفتاة لانريد ان نحملها ما لا طاقة لها به
ولكن رايي الشخصى هو فى حالات الترقيع هذه يجب على الطبيب او الطبيبة ان يتاكد من شخصية الفتاة
ولو من الضرورى ان يكون معها احد من اهلها للتاكد من شخصيتها
استاذى العزيز عمرو
احييك على اسلوبك التلقائى والارتجالى فى التدوين وهذا الاسلوب اعشقه فعلا
وعلى موضوعاتك الهامة جدا
ارجو ان تتقبلى تحياتى
وكل عام وانت بخير بمناسبة المولد النبوى الشريف

kalamfady يقول...

لا حول ولا قوة الا بالله

عمرو يقول...

شمس النهار
برنسيس شمس أهلا و سهلا نورتى و شرفتى
مش عارف و الله أيه اللى حصل ؟؟
هى نفسها كانت ترفض هذه الفكره تماما و فجأه تغير موقفها برضو تماما !!
زيدى على كده بقى موضوع أموال الزكاه اللى أعتبرت من الجائز شرعا صرفه على راغبات اٍصلاح ما أفسدنه !!
يعنى موقف غريب و كلام أغرب لا نملك قدامه اٍلا الدهشه !!

عمرو يقول...

عاشقه و غلبانه
الموضع الأساسى و هو القيام باٍصلاح ما فسد يا ريت تقرأى رأيى فيه فى ردى على تعليق أختنا الفاضله norahaty فى نفس هذه الصفحه اٍن شاء الله
أما بقى موضوع أموال الزكاه فالعقل السليم و المنطق بيقولوا أنه مرفوض المساس بها للصرف على هذه العمليه
العقل و المنطق بيقولوا كده

عمرو يقول...

صبرنى يا رب
طيب لما هو المغتصبه بجد يعنى اللى مش بتستهبل على قولك صارحت عريسها بده قبل الزفاف و هو أرتضى أن يقبلها زوجه لأنه شهم و دى الأصول يبقى حتروح تعمل عمليه و تصلح نفسها ليه ؟؟ لييييه ؟؟ ليييييييه ؟؟
مش خالص الموضوع خلص على كده ؟؟
يبقى لازمته أيه نفتح باب العمليات و الكلام ده اللى حيجيب وجع الدماغ ؟؟
بس مالكيش حق ماتحبيش أحمد عبدون ده أحمد سكره :))
و معلش يا أم خالد لو كنتى بتضايقى من موضوع الفتاوى الفضائيه أهو كله متقدر و مكتوب :)
طيب و الله و أدينى بأحلف بالله أنا مانع عيالى من الفرجه على هذه البرامج لأنى وجدت فيها كلام بيخدش حيائى أنا شخصيا !! أنا يا اللى اٍسمى أنا
فما بالك بقى لما يبقوا شباب و بنات و يسمعوا كلام فارغ و أسئله تليفونيه بأصوات أصحابها على الهوا و حاجه سفاله و قلة أدب
ربنا يستر

عمرو يقول...

norahaty
أولا أشكرك يا أختنا الفاضله على البوست الأخير تبعك و اللى أشرتى فيه لمدونتى و الموضع اللى أثرته و ده من دواعى سرورى فشكرا لك كثيرا ..
ثانيا أشكرك مره كمان على وصفك لى بالرجل العاقل و لو أن الواحد حاسس اٍن عقله بيتآكل شويه شويه من المشهد الدنيوى العبثى اللى بنتفرج عليه مرغمين ..
بتسألينى عن رأيى الشخصى فى موضوع هذا البوست ..
طيب خلينى أقول رأيى الأول فى الموضوع الأساسى اللى هو ترقيع غشاء البكاره ..
أنا أرفض تماما مثل هذه الفكره ..
أرفض أن تقوم بها المغتصبه كما أرفض أن تقوم بها اللى مش مغتصبه ..
لييييييه ؟؟
لأن من غشنا فليس منا .. كده بمنتهى البساطه ..
يعنى بنت تم اٍغتصابها بمفهوم الاٍغتصاب العلمى و القانونى و صارحت خطيبها بهذا الأمر و عززت صراحتها بأن أهلها نفسهم أيدوا كلامها و كمان ممكن محضر الشرطه أو أوراق القضيه اٍن وجدت يبقى فى هذه الحاله لو خطيبها قبل الوضع و أحتضنها هى و الحدث المؤلم الحزين اللى فى حياتها فاهلا به و سهلا و يبقى نعم الرجل الشهم و الكريم اللى تستر على اٍنسانه و اللى أكيد ربنا حيستر عرضه فى الدنيا و الآخره
و لكن لو رفض فكرة الاٍرتباط بها و هى المغتصبه و المجنى عليها فما نقدرش نلومه لأن ده اٍختياره الحر لكن نقدر نقولها و لا تزعلى عليه لأنه مش جدع و مش شهم و مش كريم و ما يستهلكيش و لا يستاهل يكون أبو عيالك ..
نيجى بقى للنوع التانى من البنات اللى فقدن عذريتهن برغبتهن و باٍرادتهن
طيب البنت هنا عاوزه تتوب توبه نصوحه لله المولى القدير و ترتبط بزوج و تبدأ حياه نضيفه معاه
لكن اٍزاى حتبدأ الحياه النضيفه و هى أصلا بدأها بغش و تدليس و عملية ترقيع بتتبعها سلسلة أكاذيب لا نهاية لها ؟؟
المفروض و الصح أنها برضو تقول له اٍنها مش عذراء
يعنى تبقى شجاعه و تتحمل نتيجة أفعالها لأن تعالى نفترض اٍن المغتصبه أو اللى مش مغتصبه خبوا على العريس و عملوا عملية الترقيع و الحياه مشيت و بعد شويتين وصل لأسماع الزوج حاجه كده و لا كده عن ماضى زوجته حيكون أيه رد فعله ؟؟
و الله فى سماه ساعتها لا حيقول دى كانت مغتصبه و لها عذرها و لا أى كلام من ده بالعكس حيقول دى كانت أكيد ماشيه فى سكه بطاله و الكلام اللى أنتى عارفاه ده
الحقيقه يا دكتوره عمليات الترقيع أنا مش بأعتبرها ستر للبنت و لكن بأعتبرها تستر على البنت و ده ممكن يشجع ضعيفات النفوس على الاٍنحراف خاصة فى ظل الظروف اللى كلنا عارفينها .. يعنى مافيش أحسن من الصراحه و ماحدش بياخد أكتر من نصيبه يعنى لو كان ربنا سبحانه كاتب لها تتجوز الشاب ده يبقى حتتجوزه و لو مش مكتوب لها يبقى مش حتتجوزه و لو عملت 100 عملية ترقيع
نرجع هنا بقى تانى لمفهوم الشرف عند الشرقيين و هل النقطتين دول هم اللى بيمثلوا شرف البنت ؟؟
حأقول لك بصراحه لأ طبعا و أكيد مفهوم لأ طبعا ليه .. و لكن فيه مقوله اٍجتماعيه لابد أن تحترم لدى كل الشعوب ..
يعنى لو كان الغربيين مثلا بيحترموا حرية الفرد أنه يكون مثلى أو مثليه أو أن الأب بيقلق على صحة بنته النفسيه لما بتوصل سن 18 سنه و لازالت عذراء و بيوديها تتعالج نفسيا طيب ليه اٍحنا مطلوب مننا أننا لا نحترم النقطتين التافهين دول فى رأى البعض و نسيبها سبهلله و اللى تفرط فيهم باٍرادتها نطبطب عليها و نقولها معلش خدى من فلوس الزكاه و يالا على أقرب عياده و رقعى و لا يهمك !!
يعنى هل ده كلام معقول ؟؟
الخلاصه يا دكتوره اٍن الصراحه واجبه مع زوج المستقبل و هو بقى و ضميره و شهامته و جدعنته لكن ما نضحكش عليه و نغشه و لو كان ده لهدف نبيل ..
سامحينى للاٍطاله و تقبلى تحياتى ..

عمرو يقول...

norahaty
فيه حاجه كمان مهمه جدا
فى عقد الزواج بيقر ولى العروسه اٍنها بكر رشيد
طيب هى أصلا مش بكر فده بيعتبر كمان تزوير فى عقد الزواج و خدى بالك من كلمة عقد لأن هو ده التعريف القانونى تبعه
لو فيه أى عقد مبرم بين أتنين و به بند غير صحيح فبيعتبر العقد كله لاغى و مفسوخ
يعنى فى هذه الحاله بيكون عقد الزواج باطل لأن ما بنى على باطل فهو باطل
يعنى الحكايه كلها على بعضها كده مش نافعه :)

عمرو يقول...

mahasen saber
أكيد الصراحه مافيش أحسن منها لأن لو الحياه بين 2 بدأت بالغش و المداراه فأزاى ستستمر فى هدوء ؟؟
الصراحه مطلوبه فى كل شىء
تقبلى شكرى و تقديرى

عمرو يقول...

غير معرف
سامحينى لو كان كلامى صدمك أو جرحك و لكن يمكن عن غير قصد منى
عموما أتفضلى أبعتى الميل و حأرد عليكى برأيى

دموعي وابتسامتي يقول...

احنا اصلا في عصر فتاوي التيك اواي كل واحد عامل يفتي ومش عارفين هيوصولوا بينا لفين بس مين راجل في البلد دي يوافق يتجوز واحدة مش عذراء يسلام دا لو هو وافق اهله مش هيوافقوا الناس مش بتبص دي مغتصبة ولا غصب عنها لا مش بيفرقوا في الموضوع دا وكان الغشاء دا هو الدليل علي مدي طهارة البنت تفتكر لو كل واحد تابت وصارحت خطيبها باي حاجة زي دي يبقي علي كدة نسب العنوسة هتزيد 100% وعوضنا علي الله في البلد دي

احنا مش هنفتي زي غيرنا ونبيح عمليات الترقيع معنديش حاجة اقولها غير ربنا يسترها علي بنات الامة ويرحمنا برحمته قادر علي كل شيء

شمس النهار يقول...

معلش ياعمرو عايزه رد علي نورهاتي
عندك
يانور مواضيع الشرف دي مواضيع حساسه شويه علي مجتمعنا الشرقي
وتندرج تحت العيب الكبير عشان نخوض فيها كده ببساطه
مابقولش نخبي راسنا بس كمان مانكشفهاش كده قوي
وفتوي زي دي تهد الدنيا تحت رجلينا
ومش عايزين نسطح الامور ونبسطها كده وندخل تحت بند مش هي دي دليل العفه والشرف والكلام اللي بيبيح المحظورات
والاماكنش الزواج ربنا صنفه وقال للبكر شئ وللسيده شئ
والمطلقه قبل الدخول شئ وبعد الدخول شئ
وموضوع الفتوي بالشكل ده عيب اوي اوي
هنقول طب واللي غصب عنها اقول هنا لكل حاله فتوي
يعني البنت اللي اتخطفت واغتصبت واتهدت نفسيتها نديها فتوي زي اللي عملت اللي في نفسها وعايزه تغش واحد وتبتدي من جديد
والله واعلم تعمل ايه بعد كده عشان العلاقه دي بتبقا بين العبد وربه
وماحدش بيدي حد صك الغفران لو ربنا رايد لها التوبه وهو اعلم بيها هيسر لها كل شئ
لكن انا مايسرش الفاحشه واقول ستر
الستر معروف وله حدود
وربنا بيعين العبد علي التوبه عندما يكون صادق وماحدش بيبتدي التوبه بالغش خالص
اذا كان من شوط التوبه رد الحقوق والمظالم
يعني اللي سرق يرد ماسرقه واللي خاض في عرض يصلح يعني اللي جار علي الحقوق وعصي يرد الحقوق الي اهلها
مش دي شروط التوبه
طيب انت كاطبيبه ايه رأيك في غير معرف اللي بيقول ده ممكن يحصل في الصغر
ايه رأي الطب في الكلام ده والطفله دي مش ممكن اثبات بالكشف ان كان ده في الطفوله والا لا
عايزه اعرف رأيك

الفقيرة إلى الله أم البنات يقول...

استاذ عمرو
انا عرفت الموضوع من عند الدكتورة نور
الحقيقه احنا بنتكلم بقلب جامد علشان معندناش والحمد لله اى تجربه من التجربتين..ان تتعرض للإيذاء
أو تكون منفلتة الاخلاق
ونسأل الله ان لا يتعرض احبابنا ولا اولاد المسلمين لهذه التجربة
ولكنا زى ما بيقولوا اللى ايده فى الميه
ورغم كده انا ضد الفكرة
المشكله اننا بنتكلم عن غش وتدليس
انا بعلم بنتى اللى فى المدرسة لو مش عارفه تجاوب على سؤال اياها اياه تغش ولا تسأل حد
رغم وانا صغيرة كنت ممكن نغش الفصل كله...بس وقتها مكنتش ملتزمة ولا ادعى الالتزام الآن انا بحاول اسلك طريق رضى الله
فأول شئ لا للكذب لا للغش

الدكتورة اللى بتتكلموا عنها..لا اشاهدها ولا اشاهد أى برنامج تقدمه
لانى سمعت لها ردود لا يقبلها العقل لذا لا اسمع من يتجرأ بحجة من اجتهد فله اجر اذا لم يصب واذا اصاب له أجرين
هناك أمور ومن افواههم الفقهاء ..لا اجتهاد مع نص قرآنى.
والاحاديث من كلام الرسول..فالرسول لا ينطق عن الهوى
اذن من غشنا ليس منا..منهج الاسلام

أخى انا ضد الفكرة..ورغم انى لم اشعر شعور أم ولا احساس اخت اصاب حبيبتها كارثه
ولكنى اخاف الله..ومن يتقى الله يجعل له مخرجا"
والتائبه حقا لا تبدأ حياة التوبه بالكذب
اما حلقات هذا البرنامج ..فهى حلقات
لا أخلاقيه..وغير معقوله ابدا"
وجيد انك تحذر ابناؤك منها
فهى تظهر ان المصريين يعيشون فى مستنقع
وهذا غير حقيقى..نحن بخير
وهذه الدكتورة..حسبى الله ونعم الوكيل فيها

اما من اغتصبت وهى صغيرة ..ويعرف اهلها هذا يجب ان تعترف لخطيبها إما يقبلها أو يرفض فهى لا تبدأ حياتها بغش أبدا"
الكذب هو بداية اهيار حياة الانسان
اللهم ارزقنا الصدق و الاستقامة

soly88 يقول...

الكلام ليس عن بنات الهوى او المستهترات
ولكن عن اى بنت تم اغتصابها دون ارادتها
وهذه الفتوى تستند عن روايه عن سيدنا عمر بن الخطاب
هل السارق مع الفارق يعلن لكل متعامل معه
بعد توبته انه سارق
ولكننا دوما نرى الجسد هو العورة الكبرى

حاسوباتيه يقول...

انا بقرا وانا في حاله ازبهلال تام وكامل ومش مستوعبه اصلا ماشي انا مع العمليه دي لو مثلا حصلت حادثه للبنت افدتها عزيتها غصب عنها ده لو حادثه انا حتى حوادث الاغتصاب ضدد ان يتعمل العمليه دي لان ساعتها هي مالهاش ذنب وكمان حتى لو حادثه بس نقول ماشي بس كده زي ماهي بتقول لا لا عيب قوي

Unknown يقول...

السلام عليكم ورحمة
الله تعالى وبركاته
أستاذنا الاستاذ عمرو
يامجمع الطيبين والطيبات
فى مدونتك الجميلة اللطيفة
صباح الخير لحضرتك ولكل ضيوفك
وارد على الباشمهندسة البرنسيسة
شموسة النهار بأنى سارد عليها فى تدوينة قادمة بأذن الله عندى على
المدونة فلا نريد ان نستغل كرم
الاستاذ عمرو اكثر من هذا
وتقبل احتراماتى لك
ولكل ضيوفك.
و
و
و
و
و
نهارنا ابيض إن شاءالله.

من غير عنـــوان يقول...

........لا حول ولا قوة إلا بالله ... وإنا لله وإنا إليه راجعون



طبعا هذا ما يقال عند المصائب...

صديقي عمرو... أنا ريحت بالي من زمان ومش باتفرج على هذه الخزعبلات


تحياتي

GiGi world يقول...

لاتعليق ولنا الله وربنا يرحمنا منها ومن كل اللى زيها
يارب احفظ علينا ديننا يارب

زينـه يقول...

:)

الرجاله اتخضت

Sweet Violet يقول...

الحمدلله انا اصلا مابحبش اتفرج الصراحه على البرامج دى لانى بحس انهم عايزين يعملوا فرقعه اعلاميه فقط لا غير

بنت الغربة يقول...

والله انا مش معاها خااالص فى الفتوة دى ..وبعدين هى من حقها تفتى كده على مزاجها ؟؟؟؟
وهم البنات الل......محتاجين حد يدفعلهم فلوووس..
المفرووض لو فى حالة اغتصاااب مثلا..
والبنت قفيرة وماحلتهاش حاجه او من اطفااال الشوارع مثلا...
حاجه كده ..لكن تعممها بالصورة القبيحه دى .....؟؟؟؟
لالالالالالالالالالالالالا والف لالالالالالالالالا

overdose يقول...
أزال المؤلف هذا التعليق.
dreem يقول...

ازيك يا عمرو
طيب انا عايزة اعرف انت متضايق من انها قالت يجوز التصدق ولا من فتوى اعادة البكارة ؟
واللى صرحت بيها دار الافتاء من سنتين
وقالت انها مش حرام
ولما اعرف ردك هبقى اعلق
تحياتى