~SUN~ Pictures, Images and Photos

الأحد، 15 مارس 2009

و آدينى نبهت يا بنات :)

tease. Pictures, Images and Photos


مساء الخير يا بنات :)
اٍزيكم ؟؟
يعنى الحقيقه من الآخر كده أنا شايف اٍن الظروف و الجوابات تكالبت عليكن تكالب اللئام على قصعة الأيتام !!
لييييه ؟؟
صبركن عليا حالا حتعرفن لماذا و كيف و حيثما و رب ضارة نافعه ..
كلكن عارفين طبعا ظروف الشباب و اللى هم فيه من ضيق لذات اليد و ندرة فى الوظائف و الأعمال و بطاله أخذت بناصية الكل و أحلام الشقه و السياره و الشبكه و الجهاز و المهر و الفرح و فستان العروسه و ما اٍلى آخر تلكم الأحلام المتكسره كقارب قد تدشدش و راح فى الكازوزه على صخرة الواقع المر مرارة العلقم و على رأى الست سومه علجم و الله علجم ..
فصار حال الشباب عيضه ما بعدها عيضه بعدما فقدوا الأمل فى بناء حياه و مستقبل مع بنات الحلال المهذبات المحترمات بنات الناس المتعلمات اللى هن زيكن كده .. و أصبح الشباب اليائس اٍما فاسد أو منحرف أو مرتشى على قولة المرحوم السادات فى بيان ثورة يوليو المرحومه برضو ..
يقوم كمان يظهر فى الأفق موضوع كده لا كان على البال و لا على الخاطر يقضى على ما تبقى من أحلام الزواج لدى بناتنا المصونات اللى كان لسه عندهن أمل و لو واهى و تيجى وزارة الهجره النيوزلنديه و تقلبها دندره على دماغ الكل !!
اْزاااااى ؟؟
دلوقتى يا بنات نيوزلندا دى دوله بتعانى من نقص شديد فى صنف الرجال .. و الدراسات بتقول اٍن فيها 35 ألف فتاه فى سن الزواج يعنى من سن 25 ل 45 مش لاقيين رجاله يتجوزوهم علشان الرجاله اللى لسه عايشين عمرهم بيتراوح من 75 سنه ل 82 سنه !!
فبالتالى البنات هناك طبعا بيفضلوا حياة العنوسه على الزواج من رجال بيقولوا للدنيا باى باى يا حلوه ..
الحقيقه الغريبه كمان اللى قالتها الدراسات اٍن عدد النساء النيوزلانديات بيزيد عن عدد الرجال بنسبة 1 : 4 !!
يعنى كل 4 بنات بيتولدوا بيتولد فى مقابلهم ولد واحد و حتى الولد ده غالبا بيهاجر لدبى أو أستراليا و بيسيب بنات بلده عوانس ليس لهن اٍلا الفرجه على فيلم الوساده الخاليه (بس النسخه النيوزلندى) ..
تقوم بقى تيجى الحكومه النيوزلنديه الرشيده و يصعب عليها حال بنات البلد و يتفتق ذهنها عن فكره زئبقيه فتاكه ثلاثية الأبعاد و تقرر أن تستورد رجاله ليتزوجوا من هؤلاء البنات المناحيس النيوزلنديات .. و قررت أن تقدم كل معونه و مساعده ممكنه للشباب المستورد و توفر له بيت مجهز من ما أدراكن .. و سياره آخر موديل .. و وظيفه محترمه أو مزرعه صغيره لمن يرغب و مرتب ممتاز لحين التأقلم على العمل الجديد و الحياه الجديده .. و كمان الجنسيه النيوزلندى لمن ينجب .. و فوق كل ده بقى عروسه و قالوا زمان يرزق الهاجع و الناجع و النايم على صرصور ودنه ..
طبعا كانت أول بلد جاتها وزيرة الخارجيه النيوزلنديه لاٍستيراد رجاله هى مصر أم الدنيا .. و أبرمت اٍتفاقيه لتوريد الأصناف المطلوبه و هى عباره عن شباب مصرى زى الورد من حملة المؤهلات و الفنيين الماهرين و كمان اللى معاه قرشين و عاوز يستثمرهم هناك فطبعا أهلا به و سهلا و أفتحى الباب يا وزارة الهجره النيوزلنديه و زغرطوا يا بنات نيوزلندا جايلكن شباب وادى النيل اللى أجدادهم بنوا 3 أهرامات حد فى الدنيا عرف يبنى هرم واحد ؟؟
بعدها بقى حاولوا مع اٍيطاليا لزوم اٍستيراد شباب طليانى علشان برضو يسند شويه مع الشباب المصرى لكن أسمع اٍن محاولاتهم باءت بالفشل لأن الطلاينه قالوا لا و كلا نحن لا نتحمل نتيجة هذا لكن لو الشباب عاوزين يهاجروا لكم على مسئوليتهم الشخصيه فلا مانع ..
هع هع هع ..
نفسى بقى تتفرجوا على كم طوابير الشباب المصرى اللى يا عين أمهم بيقفوا بالساعات الطويييييييييييييله قدام سفارة نيوزلندا علشان تقديم الطلبات للهجره !! و هم لا حول و لا قوة اٍلا بالله لا يملكوا خبره و لا حرفه و لا مال و لا نيله على عين اللى جابوهم و لكن بيملكوا مجرد مؤهل دراسى يعنى حبر على ورق يمسحوا بيه لامؤاخذه وشهم .. يعنى رايحين الطرف الجنوبى من الكره الأرضيه مش شايلين أى حاجه سوى أنهم شايلين فى أيدهم سلاح ألا و هو شبابهم و صحتهم و عافيتهم اللى حتهدر على أرض نيوزلندا الشقيقه بعدما ضاقت بهم سبل الحياه و تقطعت بهم الأسباب و ضاع منهم حلم الزواج تحت وطأة الظروف المهببه ..
طيب و بعدين يا بنات ؟؟
اللى المفروض يبقوا عرسانكم نيوزلندا بتسرقهم !!
ينفع الكلام ده يعنى ؟؟
خيبكى الله يا حكومة نيوزلندا يعنى مش كفايه الشرط الرخم اللى أنتى حطاه ؟؟
آل أيه آل لا يزيد سن المتقدم للهجره و الزواج عن 28 سنه !!
ده باين عليهم ما يعرفوش المصريين :))

هناك 18 تعليقًا:

mahasen saber يقول...

مبيقبلوش ستات تتجوز الرجاله ام خمسه وسبعين سنه
ههههههههههههه

mahasen saber يقول...

اعتقد كده ان مصر بكره مش هيبقى فيها ولاا شاب تحت ال28 سنه

ولو مشيوا محدش يقدر يلومهم يعنى حكومتنا الرشيده عملتلهم ايه ولاا هتعمل ربع اليى حكومة نيوزيلاندا هتعمله
كفايه عليهم مرمطه فى عقر دارهم قوى

بس قلى يا لوردنا هو بعد ما مصر تخلص من الرجاله اليى تحت ال28 سنه مصر هتستورد رجاله من نيوزيلاندا ولاا هتعمل ايه بالضبط

mahasen saber يقول...

انا بقول الحق اخبى الواد ابنى اصله يتخطف خطف

هههههههههه ربنا يكون فى عون بناتك يا محروسه

Sweet Violet يقول...

الحمدلله خييييييييييييير

اهم هيريحوا بردو على فكره هههههههههههههههههههههههههه

بس انا لحد الان مش متخيله فعلا ان ده يحصل .. يعنى ان الشباب فعلا هيروح كده عادى

هى دى تبقى عيشه بجد ؟؟؟ و هل الشاب هيقبل كده على نفسه ؟؟؟

مفكر يقول...

السلام عليكم::

اتصدق أنا لما فكرت في الموضوع شوية لقيته مشكلة،،،،؟؟؟

والله أنا مش متابع أخبار وغرائب الدنيا زي حضرتك،،،بس الخبر من غرابته يبدو إنه مجرد نكتة،،،أو إن الخبر على الأقل مكتوب في جزئية صدق أو لا تصدق في الجرنال

يلا،،،شباب مصر مرزقين،،،

بس ما قلتشليش هو تبع الإتفاقية طلبة الجامعة؟؟؟؟؟؟؟؟؟

لالالالالا،،،مش بفكر أصدر روحي،،،بس بحب يبقى عندي خطة ب

الفقيرة إلى الله أم البنات يقول...

مخلوش قدام الشباب أى شئ
ضيقوا الحياة..منطقى واحد عاوز يعيش ويصون نفسه ويشتغل...مش لاقى ده فى بلده..يروح بلد تانى

طيب لو اهالى البنات فى مصر تنازلوا شويه..كنا حلينا مشاكل بناتنا وأولادنا كمان
والافراح اللى 50000 و100000 الف ويزيد تجوز عرايس وعرسان عاوزين يعمروا الارض بالذرية الصالحه
والله فى امور كتير لو اتعدلت ولادنا مش هيجو برة البلد
احتا عايشين زمن اهله مفترييين

شمس النهار يقول...

موضوع علي قد ماهو مضحك جدا فهو مبكي جدا
والمشكله ان ده مش جواز ده بيع وشراء
وليه همه جم مصر بس
والا قالوا بدل الشباب المصري مايترمي في البحر ويموت بنات نيوزيلاندا اولا
بس انت بتجيب الاخبار دي منين
ماشاء الله عليك
ده غير طريقة الكتابه اللطيفه جدا

Unknown يقول...

ياأستاذ عمرو
اللى خلى شبابنا
مستعديين يركبوا المراكب
بتاعة الهجرة (الغير شرعية)
وعارفيين أنهم ممكن يغرقوا فيها
وأيه؟ كل واحد دافع اكتر من 50 الف
جنية من (لحم اهله الحىّ)تبقى لما
يجى فرصة هجرة رسمية موثقة
من الحكومة ما يقفوا
طووووووووووووابر
امام سفارة
البلد
دى؟

Unknown يقول...

نسيت اسألك بس معلش
هو عنوان السفارة
دى فين؟:)
ايوة ياسيدى
عندى 2 ينطبق عليهم الشروط
اعمل فيهم وفىّ (خدمة عظيمة)وأوديهم:)

عاشقه وغلبانه يقول...

يالاااااااااااااااااااااااهوي

اهئ اهئ
ده علي اساس ان عندنا فائض فبنصدر

انا اعترض
واشجب
وادين

اتجوز انا الاول وبعدين يهاجروا

نيوزلاندا مين والناس نايمين

انا عايزه حقي ياحكومه احسن مافضحكوا والله


اهئ اهئ

صبرني يارب يقول...

كده برضه

ده رضا كان اتعشم
هههههههههههههههههههههههههه

وعموما عادي ياخدوهم يا سيدى اهو بدل ما يقعدوا هنا يتخللوا اهم يطلعوا بره قيمة عشر سنين يكونوا نفسهم ويجوا
ههههههههههههههههههههههههه


دي حكومات قليلة الادب بيفكروا فى شعبهم

مش يسبوا كل حاجه على طبيعتها كده وتخرب ما تعمر ؟؟؟

عموما مش مهم 28 سنه ده
المشكله فى الىبعد كده يا اخويا انا عندي بنات
هههههههههههههههههههههه

والا ندبسك فيهم يا استاذنا تجوزهم لولادك هههههههههههههههههههههههههههه

بس اوعى تصدرهم نيوزلانده


وانا اقول يا ترى ليه الخرفان النيوزلندي كترت فى السوق

اتاريهم يا اخويا بقى جايين خلاصة حق
هههههههههههههههههههههههههه


طب شوفت حد بايع شعبه كده زينا ؟؟؟

حلوة الدنيا يقول...

يعني انا عمال اقري وفرحان وفي اخر البوست الاقي شرط السن 28 سنة يعني فاضل شهور بسيطة والفرصة تضيع مش عارف يا أستاذ عمرو تقول الخبر ده بدري شويه والواحد لسه عنده 20 او 21 سنة وبعدين هما ليه حاطين الشرط ده انت مش بتقول عندهم بنات فوق ال30 متجوزوش حيجوزوهم ازاي بقي
بس إن شاء الله ملحوقه من بكرة نبدأ نجمع معلومات عن الموضوع ده
وبعدين انا شايف ان هو موضوع زي الفل يعني حيجوزا الواحد في الحلال اه وحيدوله شقة وعربيه وشغل كمان وبعدين نيوزلندا دي علي حد علمي دوله متطورة وهي تقريبا في قارة استراليا واللغة الرسميه عندهم الأنجليزي يبقي زي الفل وحنعرف نتكلم معاهم كمان والحمد لله الفلوس والخبرة موجوديين

بس كان فيه استفسار من حوالي سنة وشويه كنت بسأل علي سفارة نيوزلنده في مصر ملقتش وقالولي ان الي في دبي هي الي مسئوله عن مصر يعني الي عايز يخلص ورق يبعته علي السفارة النيوزلنديه في دبي بس حسأل تاني عن الموضوع ده

علي العموم خبر حلو جدا وكل كلامي الي فات ده بجد مش هزار ولو ربنا وفقني والموضوع ده تم مش حتردد لحظة واحدة اني ماسافرش ويبقي ليك الحلاوة

حاسوباتيه يقول...

ههههههههههههههههههههه ياخرابي كل واحده تلحق بقى تخطف واحد قبل مايبقوا عمله نادره هنا كمان ههههههههههههههههههه وهما اصلا بقوا كده

Unknown يقول...

هههههههههههههههههه
ياعيني على بنات مصر
ولاعلى شباب مصر
معاك حق هم يبكي وهم يضحك

وأدعوك لزيارة مدونتي والتواصل

غير معرف يقول...

سيدي
يسعد مساك
مقال ممتاز بس هل يا ترى بتتكلم جد و لا هزار
لو جد اتمنى اانك تتوسط لينا لدى الحكومة النيوزيلاندية عشان تبعث مسؤوليها تستورد شباب من المغرب و الله احنا كمان الحال عندنا من بعضه
و يا بنات مصر ليكم مقترح كويس انكم تروخوا تعملوا مظاهرة امام السفارة النيوزيلندية احتجاجا على هذه الكارثة المروعة وكمان امام مجلس الشعب احتجاجا على موافقة الحكومة
ربنا يعين الجميع
مودتي
دعوة للتواصل مع مدونتي

غير معرف يقول...

هههههههههههههههههه
هههههههههههههه

ياعيني عليكم يا بنات مصر هتلاقوا عرسان بعد كدا منين خلاص الرجالة هينقرضوا ههههههههههه

بس بجد الشباب معذورين وربي

عاوزين يعيشوا ويفرحوا بشبابهم والحياة بمصر مطلعة عين اهلهم ومش عارفين لا يشتغلوا ولا يتجوزا

ربنا يفرجها عالجميع

من غير عنـــوان يقول...

إضافة إلى اسلوبك الجميل
أحب أزود إن الموضوع

عرض وطلب

واولياء أمور بناتنا لسه بيطالبوا بشقة تمليك وعربيه و...و....و....


الله يعين بناتنا وولادنا

أمنياتي

غير معرف يقول...

السلام عليكم ورحمه الله وبركاته

يعنى حنصدر رجاله كويس
بس المفروض الحكومه المصريه تساعد
لتصدير البنات كمان وممكن تصدر الشعب كله
وتجيب بعد كده شعب على مزاجها
وبالنسبه لشرط السن إحنا حكومتنا ممكن تتصرف وتضرب لنا شهادات ميلاد تحت السن
----
سعدت وأستمتعت بزياره مدونتك الرشيقه التى ستضىء قائمتى للمدونات الصديقه
وسأعود لإستكمال جولتى فى أرجائها
وتقبل تحيتى ومرورى
المتكرر بإذن الله