~SUN~ Pictures, Images and Photos

الجمعة، 6 مارس 2009

الاٍعدام علنا !!

تحية شكر و تقدير للسيد المستشار مختار مختار شلبى رئيس محكمة جنايات كفر الشيخ الذى قضى أمس بتنفيذ حكم الاٍعدام شنقا حتى الموت بعد أن صدق فضيلة مفتى الديار المصرية على الحكم فى حق المجرمين العشره اللى خطفوا سيده آمنه من بيتها و أنتزعوها بالقوه من وسط أطفالها الصغار و لم ترق قلوبهم لبكائهم و فزعهم و لا لبكائها و فزعها و أقتادوها وسط الزراعات و تناوبوا اٍغتصابها لمدة 3 ساعات متواصله حتى فقدت الوعى و عثر عليها الأهالى فى حالة يرثى لها ..
مبروك مسبقا على تنفيذ حكم الاٍعدام فى المجرمين العشره كما قضى الله على المفسدين فى الأرض ..
أتصور مدى ألم و معاناة السيده اللى وقع عليها هذا الفعل الشيطانى المؤلم و اللى أكيد لازالت تعانى منه و من آثاره النفسيه المدمره ..
أتصور أيضا مدى الفزع اللى أصاب أطفالها الصغار و هم شايفين بعينيهم أمهم و هى بتنتزع منهم و بتختطف من وسطهم بالقوه لينتهك شرفها و اٍنسانيتها و آدميتها بغير ذنب جنته غير اٍنها أنثى ليس أكثر .. هكذا خلقها الله بغير اٍراده منها .. يعنى لا هى مثلا كانت بتشتغل فى مكان مش ولابد يعنى و لا هى كانت ماشيه فى الشارع لابسه ملابس مثيره و لا يوجد أى سبب يدعونا للاٍعتقاد أنها حرضت مغتصبيها بشكل أو بآخر على خطفها و اٍغتصابها .. بالعكس دى أم لأورطة عيال و قاعده فى بيتها فى أمان الله لا بيها و لا عليها !!
لا حول و لا قوة اٍلا بالله ..
عندى اٍقتراح و مش عارف مدى صحة قانونيته من عدمه و ربما يفيدنا فيه أخونا المتر محمود صاحب مدونة قصر الرئاسه حيث أنه محامى متمكن و أثق فى فتاويه القانونيه ..
بأقترح يا جماعه أن يكون تنفيذ حكم الاٍعدام فى هؤلاء المجرمين العشره علنيا و بحضور الضحيه نفسها و بحضور جوزها و أقاربها أيضا لعل هذا يشفى شىء من غل صدورهم و أن يكون فى ميدان عام يحضره الناس و يشاهدوه ليكون عبره للمجرمين الآخرين اللى لو فكروا للحظه على الاٍقدام على مثل هذا الفعل القبيح اللى أصبح بيتكرر كثيرا لأرتدعوا فورا و لتمثلت فى أذهانهم المريضه صورة المجرمين العشره و هم بيتأرجحوا على حبال المشانق ..
عارف أنه اٍقتراح عنيف و قاسى و ربما لا يلاقى قبول لدى الكثيرين .. و لكن عندى قناعه تامه أن لا شىء يردع المجرم سوى خوفه الشديد من العقاب الشديد ..
للمره التانيه بأشكر قضاء مصر العادل النزيه و ربنا يحفظنا و يحفظكم من كل شر ..

هناك 16 تعليقًا:

شمس النهار يقول...

فعلا المفروض يعدموا في مكان عام
واعتقد ان العقوبه في الاسلام بتقول كده ان يشهد الناس علي العقوبه
صح
بس انا نفسي قبل الاعدام يتعمل عليهم بحث نفسي موسع من مجموعه من علماء النفس والاجتماع والناس الجامده دي اللي بتطلع تتكلم وترغي في التليفزيون ومابيعملوش حاجه لو بيعملوا ربع مابيرغوا يمكن نلاقي حل للموضوع البايخ ده
مره دكتوره متخصصه قالت لي ده مش جديد كل ده موجود ومش حاجه جديده بس هو اتعرف مع التقدم الاعلامي وان المجتمع مابقاش يخاف يتكلم في الاشياء دي
وكمان ذيادة السكان والضغوط النفسيه
كل ده ذودها شويه بس
ربنا يحفظنا من الغدر

الازهرى يقول...

بالعكس انا اجد اقتراحك جميلا
فلا عقاب يردع أشد من العقاب امام الجماهير
لعل وعسى يتعظ هؤلاء الذين تحكمهم شهواتهم متخلين عن انسانيتهم الى مرتبة اقل من مرتبة الحيوان

Kiara يقول...

ياااااااااااااااه في كدا

ايه القسوه اللي بقيت في الناس دي

دا فعلا يستحق الاعدام علنا

عشان يبقوا عبره

عاشقه وغلبانه يقول...

بقلب في التليفزيون النهارده لاقيت النطق بالحكم جاي في العاشره مساءا
بس لا عارفه دول عملوا ايه ولا ايه القضيه
بس لحد دلوقتي مش متصوره دول ليه يخططوا لكده ويعملوه
ده الواحد يبقي مرعوب وهو في بيته
مش كفايه الرعب في الشارع

حاجه تقرف
قله دين
وبطاله
واستسلام لرغبات اصبحت حيوانيه
وستات وبنات في الشوارع لبعد نص الليل
وملابس اللهم احفظنا
ومخدرات
واصدقاء سوء
وكليبات
وناس بتبيع اجسامها للفلوس
وناس بتشتري الاجسام بالفلوس
ودنيا مش عارفه رايحه بينا لفين

ربنا يطلعنا منها علي خير

صبرني يارب يقول...

والله انا عايزه اعدم كمان واحد تاني خاااااااااالص

الراعي المسؤل عن رعيته

لكن طبعا انا نفسي يتنفذ فيهم الحكم علنا

وهو ده الصح وهي دي الحكمه من القصاص اساسا

واسمحلي اقول لشموسه ان اه الجريمه موجوده طول عمرها
انما اوكد لك ان اصبح فى زياده نسبيه
وكمان وحشيه كيفيه فى الموضوع وانعدام الانسانيه عموما فى المجتمع

حيث اننا للاسف اصبحنا مجتمع محروم من انسانيته بالفعل


تحياتي لك يااستاذنا

mahasen saber يقول...

انا اؤؤيد هذا الرأى والحكم
وفعلا يمكن اليى يفكر يعمل كده يخاف من مصير المجرمين دول

حسيى الله ونعم الوكيل

حاسوباتيه يقول...

لما سمعت بشاعه الي عملوه قولت ان يوم القيامه قرب والله فعلا شئ اكتر من بشع بجد حاجه كده مش قادره اوصفها ازاى اصلا دول مفروض يتقطع من جسمهم كده علني قدام الناس يقطعوا من جسمهم لغايه لما يموتوا مش عارفه حتى ربنا هيحاسبهم يعد كده ازاى بجد شئ فظيع وبشع وبحيي جدا جدا القاضي

Unknown يقول...

السلام عليكم ورحمة
الله تعالى وبركاته
اقتراح وجيه وعظيم
ياريت يُنفذ لان هذه
الفئة الضالة لا تخاف
الا بعينهاومما تراه فقط
والا ما كان ربنا سبحانه
وتعالى وهو الحليم الستّار
على عباده فى كل الاحوال
قال فى تنفيذ عقوبة الزنا
والعياذ بالله منه(الزَّانِيَةُ وَالزَّانِي فَاجْلِدُوا كُلَّ وَاحِدٍ مِّنْهُمَا مِئَةَ جَلْدَةٍ وَلَا تَأْخُذْكُم بِهِمَا رَأْفَةٌ فِي دِينِ اللَّهِ إِن كُنتُمْ تُؤْمِنُونَ بِاللَّهِ وَالْيَوْمِ الْآخِرِ وَلْيَشْهَدْ عَذَابَهُمَا طَائِفَةٌ مِّنَ الْمُؤْمِنِينَ)
سورة النور أية 2العقوبة الوحيدة التى امر الله سبحانه وتعالى بتنفيذ واشهار تنفيذ الحكم فيها لانها أفساد فى الارض بغير الحق.

Unknown يقول...

وأضيف ايضا ياأستاذ عمرو
ان الصين سبقتنا فى تنفيذ
حكم الاعدام علنا فى مروجى
ومهربى الافيون وهى فى حربها
معهم اول الامر عند قيام
الثورة الشيوعية!وخدلى بالك
الثورة الشيوعية!لما لقيت ان
مثل هؤلاء لا يرتدعون الا (بعيونهم):(

قوس قزح يقول...

ايه الجبروت ده
من قلب بيتها يخطفوها
طبعا يستاهلوا اعدام فى ميدان عام
و مش عندهم فى بلادهم لا ده فى ميدان التحرير كمان
علشان الكل يفكر مليون مرة قبل ما يعمل كده
حسبنا الله و نعم الوكيل

د. ياسر عمر عبد الفتاح يقول...

أنا فاكر إنى رديت على الموضوع ده فى مدونة أخرى وقلت إن المفروض فى وقائع الإغتصاب يبقى الإعدام شنقاً ويبقى علنى

علشان بجد دى ناس فقدت أدميتها وأصبحوا أحد من الحيوانات وأنا شايف إننا بنبقى ظالمين للذئاب ما بنقول عليهم ذئاب بشرية

حسبنا الله ونعم الوكيل فيهم

اقصوصه يقول...

حادث فظيييييع

اول مره اسمع عنه

الحمدلله الذي عافانا مما باتلانا

ولو شاء لفعل

هاييله حيوانات مب بشر

يستاهلون الاعدام

واكيد العلن افضل

عشان يكونون عبره لمن لا يعتبر

مفكر يقول...

السلام عليكم::

أنا لما قرأت الخبر والله انقبضت وقلت لنفسي ليه أعيش وأكمل في دنيا ممكن يتعرض الإنسان فيها لأقسى أنواع الألم


الحمد لله على الإعدام وللمجرمين مع ربنا حساب تاني

وربنا يصبر أهل الضحية ويعوض الضحية نفسها من عنده في الدنيا ويوم العرض

لا حول ولا قوة إلا بالله

الفساد صعب يا أستاذ عمرو والله

الواحد لازم يحسن من نفسه ويستغفر ويتوب عن الذنوب و المفاسد اللي عملها واللي ناوي عليها علشان ميكنش أحد أعضاء منتدى الفساد ولو كان عضو على أده

ربي اغفر لي واسترني في الدنيا والآخرة

مش عارف أقول ايه

انا كنت جاي أسلم علي حضرتك بس الواقعة أثارتني الحقيقة،،،المهم اتمنى ان تكون بخير حال إن شاء الله

غير معرف يقول...

حسبنا الله ونعم الوكيل
أخى قال تعالى : ولكم فى القصاص حياة ياأولى الألباب.

وأنا أؤيد الرأى القائل بأن يكون الإعدام علنياً وخاصة فى مثل هذه الجرائم

أما هذه المرأة وأطفالها فلهم الله

Unknown يقول...

كل لحظة وحضرتك والاسرة
بافضل حال وصحة وسلامة.

رئيس جمهوريه نفسى يقول...

العزيز عمرو
اولا شكر وتقدير لحضرتك لثقتك فى شخصى المتواضع بخصوص اني ادلي بدلوي في الموضوع دة
ثانيا: بصفتى البشرية وليست المهنية انا بضم صوتى لصوتك بخصوص تنفيذ حكم الاعدام بشكل علني في المجرمين العشر على ااقل تقدير من الممكن اعادة بعض الكبرياء للمجني عليها خاصة انى الجريمة دى تفوق اى جريمة اغتصاب لانى لاول مرة الاقي حالة ترصد فيها
ثالثا: للاسف الشديد بصفتى المهنية كمحامي لدية بعض الخبرة القليلة لا يمكن او مستحيل تنفيذ حكم الاعدام بشكل علني ليس فى المجرمين دول فقط ولكن فى اي محكوم عليه بالاعدام لاسباب قانونية بحته فالقانون ولفداحة حكم الاعدام لما يتعلق بازهاق روح احاط حكم الاعدام بضمانات كثيرة يجهلها البعض فاول خطوات الحكم بالاعدام احالة اوراق الدعوى او المتهمين لفضيلة المفتي للتاكد من ان الحكم صادر طبقا للشريعة الاسلامية ثم الحكم بالاعدام بعد موافقة المفتي و انتظار حكم النقض حتى لو لم يطعن المتهمين على اوراق الدعوي بالنقض تقوم بذلك النيابة العامة وكيلة عن المتهم
اجراءت التنفيذ تم النص عليها قانون في قانون العقوبات المصري الباب الاول وهي ان يتم التنفيذ في ايام لا تعد من الاعياد وفي حضور احد رجال الدين المنتمى الية من سوف يتم تنفيذ حكم الاعدام فيه وطبيب لاعلان الوفاة واحد اقارب المتهم لاستلام الجثمان اضافه الي بعض الحرس ورجال السجن الذي سوف يتم تنفيذ حكم الاعدام بداخلة ويتم التنفيذ في الصباح الباكر ورغم تعدد طرق الاعدام في مختلف دول العالم الا ان القانون المصري لا يعرف سوف الاعدام شنقا فقط لا غير

فللاسف الشديد تنفيذ حكم الاعدام علنا في هولاء المتهمين او غيرهم يصطدم وبشكل كبير بعقبات قانونية حيث يستوجب ذلك تغير قانونى وتشريعى شامل