~SUN~ Pictures, Images and Photos

الأحد، 1 مارس 2009

الرقاصه و الحمار ..

JellyMuffin.com - The place for profile layouts, flash generators, glitter graphics, backgrounds and codes
مساء الخير ..
خدوا بالكم أنه ممكن الاٍنسان العاقل جدا و الرزين جدا ينقلب فى لحظة ما و فى أقل من جزء من الثانيه لشخص آخر تماما .. شخص بيعصف بيه الغضب و الجنون حتى أنه بعد ما بيهدأ ما بيصدقش أبدا أنه ممكن يكون أتى الأفعال اللاعقلانيه اللى بيسمعها من اللى حضروا الواقعه ..
طيب .. ده ممكن فى حالة الغضب و الاٍنفعال الشديدين لكن أيه الحال لو كان الشخص هادىء جدا و متحكم فى كافة تصرفاته و عواطفه و لكن فى لحظه ما بيقوم بفعل قد يحسبه البعض فعل جنونى و لكن يراه هو عين العقل الحكمه ؟؟
مفارقه عجيبه شويه و لكنها بتحصل ..
و تشاء الأقدار أن أشهد بنفسى واقعتين فى منتهى العجب و الكوميديا و لكنها كوميديا سوداء مضحكه محزنه مخزيه بالشطه و اللمون .. و من عجائب تصاريف القدر أن الواقعتين يكونوا فى نفس المكان و فى نفس الظروف و بنفس التفاصيل حتى شككت أن شريط الأحداث بيتعاد من تانى و لكن بالمعكوس !!
تعالوا نسمع اللى حصل و قولوا لى ماذا تفعلون لو كنتم مكان أبطال الحدثين اللى بأكرر تانى أنى شهدتهم بنفسى و الله على ما أقول وكيل ..
صلوا على النبى الهادى خير البريه .. و زيدوه صلاه من أدبه رب العزه فأحسن تأديبه و اللى أوصانا بالرحمه حتى على الطوافين اللى هم القطط و الله أعلم ..
من كام سنه كده وصلتنى دعوه كريمه من رجل الأعمال الكبير أوى سنا و مقاما و اللى كان بينى و بينه مصالح مشتركه اٍبان عملى موظف كبير أوى فى شركة ما الدوليه لحضور حفل زواج كريمته الآنسه فلانه على المهندس فلان اٍبن الدكتور علان فى قاعة كذا بفندق كذا يوم كذا الساعه كذا و العاقبه عندكم فى المسرات ..
طيب .. لبست الحته الكريستيان الكحلى بكرافتتها الرييه و الشوز الطليانى الجلد الطبيعى أبو توكه على جنب و غرقت نفسى ببارفان ياتجان الفرنساوى اللى مافيش منه دلوقتى لندرة الزهره اللى بيستخرج منها و اللى اٍسمها الخشخاش :) و توكلت على المولى قاصد الفرح ..
فى القاعه حسيت أنى فى حفله من حفلات مولانا الملك البائد فاروق الأول اللى كان بيقيمها فى سراية عابدين لأن القاعه فعلا كانت بتعج بعلية القوم و كثير من المسئولين يعنى حاجه كده جو أسطورى ده غير الكوشه الخرافيه و بهاء العروسه الشابه و جمالها الأرستقراطى البديع و وسامة العريس اللى مظهره بيتفجر قوه و صحه و شباب ..
و بدأ الحفل كالمعتاد يعنى و رقصه سلو كده للعروسين و الحركات دى يعنى و طول الوقت كان واضح بشكل ظاهر مدى حب العروسين لبعض و خاصة مع رقة و عذوبة العروسه فى تعاملها مع عريسها .. لكن ..
و خدوا بالكم من لكن دى ..
فجأة كده نطت على واجهة الأحداث الراقصه الشهيره فى وقتها و أشعلت الحفل برقصها الشيطانى الزئبقى ثلاثى الأبعاد و أنتقل الحماس للشباب و البنات من الحاضرين و عملوا حلقه يابا و هاتك يا دانس على رأى خالد الذكر عمنا توفيق الدقن .. و هوبا للنبى و اٍذا بالباشمهندز العريس فى وسط الحلقه و كمان متحزم بكرافته و بينافس الرقاصه بعزيمه لا تلين فى الهز و المياصه و غلبتنى معاك يا غزال أروح يمين تجيلى شمال :))
أنا بقى يا جماعه بعينى اللى لا تلمح سوى الغلط حسيت بمدى ضيق العروسه اللى قعدت لوحدها فى الكوشه بتاع نص ساعه و هى بتراقب عريسها فى صمت و قد اٍنقلب وجهها الجميل لوجه قد من صخر بغير أى تعبيرات فقط نظرة تأمل عميقه لعريسها اللى تحول لمهرج مسخره و قد تعالت ضحكات المدعوين خاصة لما بدأ أصحابه يلزقوا على جبهته أوراق نقديه و هو يميل للخلف بشده و يأتى من الحركات ما لو أتت بها راقصه محترفه لجرجروها على حجز قسم الهرم بتهمة الاٍتيان بأفعال فاضحه .. و قلت فى سرى : وقعتك زى خلقتك الليله دى يا عريس .. بس بجد ماكنش يخطر على بالى ما سوف يحدث !!
بعد أن اٍنتهى العريس من وصلة الرقص و التهريج رجع على الكوشه و على وشه اٍبتسامه و كأنه اٍكتشف العفريت مخبى اٍبنه فين .. و بمجرد ما قعد حصل الآتى !!
العروسه راحت قايمه من جنبه و طلبت الميكروفون .. الحقيقه كلنا أفتكرنا اٍنها حتغنى و لا حاجه لكن كانت المفاجأه المروعه أنها و بمنتهى الثبات و الهدوء قالت :
- أنا بأشكركم كلكم على تعبكم و حضوركم للحفله لكن أحب أعرفكم أنى حأتطلق دلوقتى من الراجل ده !! ماكنتش أتخيل أبدا اٍن أبو أولادى حيبقى راجل بيهز (......) !!!
و قالت كلمه مش ولا بد كده ..
طبعا نزل سهم الله على القاعه لعدة ثوانى و لما فاق العريس و الحضور من الصدمه حاول العريس يخطف منها الميكروفون فكانت المفاجأه الأشد اٍنها قالت له برضو بمنتهى الهدوء :
- يالا يا (.....) !!
كلمه قبيحه برضو بتنقال على الراجل اللى كده و كده .. الحقيقه أندهشت بشده لأنها كان لا يبدو عليها أبدا أنها أصلا ممكن تنطق الألفاظ دى لكن بعض ما نحسبه فى الشخص لا يمت للحقيقه بصله أبدا .. و لا أحدثكم عن ثورة الغضب اللى أبداها العريس و اللى كان اٍلتفاف بودى جاردات أبو العروسه من حواليه كفيل بتهدئته للأبد ..
و فعلا تم الطلاق فى نفس الليله باٍحدى غرف الفندق بعد ما أصرت العروسه عليه و رفضت سماع أى كلمه لاٍثنائها عن رغبتها و لا حول و لا قوه اٍلا بالله العلى العظيم :))
الحادثه التانيه بقى كانت بعد دى بحوالى سنه .. و كان برضو حفل زفاف و فى نفس القاعه و لعروسين بينتموا تقريبا لنفس الفصيله بتاعت الفرح الأولانى و تقريبا فى نفس الأجواء مع الفارق اٍن العريس كان بيبدو عليه الوقار و الاٍتزان و العروسه مش حلوه أوى يعنى لكن تنفع برضو فقلت فى عقل بالى و قد تواترت على مخيلتى اٍحداث الفرح الأول المحزنه :
- طيب كويس كده ربنا يعدى الليله دى على خير ..
لكن تأتى الأفراح بما لا تشتهى السفن :)
من أول الحفله كده و العروسين لسه قاعدين على الكوشه و بيبتسموا للحياه و المتر بيقدم لهم كاسين فيهم عصير أحمر علشان يسقوه لبعض راح العريس مسك كاس و العروسه مسكت لامؤاخذه التانى و بتسقيه من كاسها و هو بيسقيها من كاسه و أيديهم ملفوفه على بعض يروح العريس طبعا غصب عنه يدلق على العروسه نص الكاس و يتبقع فستانها اللى جايباه من لندن بالشىء الفلانى ببقع حمرا داكنه و بقت أشبه بالجزار اللى لسه دابح دبيحه فتتنطر العروسه فى غضب شديد و بغير وعى تصرخ فى العريس المرتبك :
- مش تاخد بالك يا حماااااااار !!
أوباااااا .. غلطتى يا آنسه فى الجدع .. أصل الجدع من أصول صعيديه و دمه حامى و راجل حر ما يقبلش الاٍهانه بغض النظر عن الاٍهانه دى من راجل أو سيده خاصة اٍن برضو الميكروفون كان قريب منها جدا فالشتمه رجت القاعه رجا و برضو نزل على الحاضرين سهم الله تماما كما حصل فى الفرح الأولانى..
بصراحه توقعت ما سوف يحدث خاصة مع خبرتى السابقه فى الفرح اللى فات ..
العريس بمنتهى الهدوء و الثبات برضو أخد الميكروفون بدون أن يوجه أى كلمه لعروسته اللى أنشغلت هى و صديقاتها بتنشيف البقع و قال و على وجهه اٍبتسامة رضا مخاطبا حماه :
- عمى فلان .. بنت حضرتك طالق !!
و غادر القاعه يتبعه أهله فى هدوء و أبوه حاضنه و بيطبطب على كتفه و كأنه فخور بيه ..
مش عارف بقى بصراحه القاعه هى اللى نحس و لا أنا و لا الناس اللى مش بتقدر تتحكم فى اٍنفعالاتها هى السبب و لا فعلا جوا كل واحد فينا قنبله قابله للاٍنفجار فى أى وقت بدون رغبه مننا و لا أيه الحكايه ؟؟
تفتكروا كان ممكن الموضوع يتعالج بدون حدوث طلاق فى ليلة الزفاف اللى هى ليلة العمر ؟؟ و لا كان ممكن يتأجل شويه و يتم برضو لكن مش على الملأ ؟؟ و لا كده أحسن ؟؟
اٍحكوا لى كده كنتم حتتصرفوا اٍزاى لو لا قدر الله تعرضتم لمثل الموقفين المتشابهين بشكل غريب دول ..
تحياتى لكم جميعا :)

هناك 16 تعليقًا:

اقصوصه يقول...

هههههههههههههههههه

شر البليه ما يضحك

انا اقعتد فعلا ان

القاعه هاي نحس!!!

عرسين تحضرههم بنفس القاعه

يتم فيهم الطلاق بنفس الطريقه؟

فعلا غريب جدا..!

حلوة الدنيا يقول...

موضوع غريب فعلا في الموقفين وانا في بدايه الموضوع تخيلت ان بعد الفرح وهما لوحدهم هتعاتبه وتزعل منه لكن كانت مفاجئة ان هي في وسط الفرح وامام المعازيم تعلن الخبر ده وفي الموقف التاني توقعت ان يكون هو ده رد فعل العريس لأنه لو معملش كده يبقي ايه مش عارف بصراحة اقولها ازاي اكيد انت عارف

هو فعلا اصبحت عادة غريبة في الأفراح ان ينافس الشباب النساء في الرقص وخصوصا في هز الوسط والأغرب ان تلاقي الناس بتسقف له ومبسوطة وعروسته كمان بتبقي مبسوطة ومش عارف ايه الي بيبسطها في كده ومش شرط يكون العريس ساعات بيكون حد من اخواته او اصحابه بيرقص ويهز وكأنه كده بيعمل معاه واجب وبرده تلاقيه لو متجوز مراته فرحانه بيه

هو في الموقف الأول العروسة اخذت القرار مع انها مش في حالة هدوء وبس لأ دي في حالة فرح كمان ويمكن هو ده السبب انها كانت في حالة سعادة شديدة والي جوزها عمله بالنسبة ليها صدمة من ناحية تربتها وعادتها والتقاليد الي اتربت عليها علشان كده اخذت القرار ده مع ادراكها للنتائج

وفي الموقف الثاني كان رد فعل العروسة غلط بس هي دي حقيقتها الي فضلت بتحاول تداريها في فترة الخطوبة والعريس ده راجل ان هو عمل كده

وعلي العموم لو جالك عزومة علي فرح في القاعة دي ثاني ابقي اعتذر وبلغهم يا يلغوا الفرح من الأول او يغيرو القاعة وبكده تبقي عملت الي عليك

حلوة الدنيا يقول...

اه بالنسبة للموقف الثاني كان هيبقي نفس تصرفي هو الي عمله العريس

اما بالنسبه للموقف الأول مش عارف بصراحة ممكن نسمع رأي النساء هيكون افضل

صبرني يارب يقول...

يااااااااااااالهوووووووووي


ايه ده يا استاذنا

فرحين فى نفس ذات القاعه ؟؟؟

طب ايه طيب ما تقولي اسمها للظروف ولو انا مش من الطبقه دي الحمد لله تعالى لكن يعنى اهو برضه ننصح الاصحاب والحبايب هههههههههههههههههههه


بس على فكره موضوع الشربات ده جه فى الجرنال وانا فكرتهم بيشتغلونا

وعندنا فى المنصوره برضه حصلت حاجه زي كده

بس كانت العروسه لابسه فستان مفتوح شويتيين ثلاثه يعنى فالعريس اول ما شافها اتقفل واداها كلمتين فى جنابها

وهى ولا فى دماغها الليله وكانت بترقص عاااادي وبعدين هو منعها كمان ترقص

وفضل طول الفرح يبصلها بقرف وهى كمان اتقفلت وبعدين ما تعرفش ايه الى حصل ولا قالوا ايه لبعض والناس شفوهم بيتخانقوا بس مافيش صوت واصل للناس جريوا اهاليهم وهوبا بقت خناقه وروحت البت مع اهلها واطلقوا فعلا

دي اتحكاتلي

و فى خطوبه برضه عريس رزل العروسه وقعت نقطتين شربات عليه قاله بعصبيه وغتاته مبالغ فيها ايييه ده مش تاخدي بااااالك قرررف !!!!

بس العروسه اتكمت باقي الفرح والله وكانت الدموع محبوسه فى عنيها لكن مش عارفه عملوا ايه بعد كده

وبالنسبه لسؤال حضرتك

شوف انا مش عارفه بصراحه لو كان جوزي عمل كده فى الفرح كان ممكن اعمل فيه ايه بس يا اما كنت هاعمل زي البت دي من غير شتيمه يا اما كنت هاقتله .
اصل انا هاديه اوي ههههههههههههههه

انما اكيد اكيد ما كنتش هاكمل الجوازه دي
وكمان اكيد اكيد ما كنتش هاقول الفاظ وحشه عشان ما باعرفش اقولهم

وبالنسبه للعريس التاني اه طبعا هو جدع برضه بلاش قلة قيمه
ده عروسه قليلة الادب

تحياتي لحضرتك

صبرني يارب يقول...

ما تيجى يا استاذنا تسمعني رايك فى الاخ الى رادد عندي فى المدونه فى اخر بوست

نسمع راي رجولي يعنى احسن بيقول انى ست وباتكلم بمحاباه للستات

Unknown يقول...

انا اول ما شفت الاسم افتكرته بوست فني علي وزن الراقصه و السياسي و طبعا انا من عشاق احسان عبد القدوس و نبيله عبيد

بس بجد ايه البوست ده جميل اوي اوي

انا لو في موقف العروسه الاولي هاعمل زيها بس من غير شتيمه

هاطلب الطلاق و مش هاكمل معاه انا مش ضد ان الراجل يرقص بس ضد الراجل المايع و الست المسترجله و اكيد ما احبش الم النقطه لجوزي هي بس غلطانه انها اهانت نفسها بشتيمته بالافاظ خارجه كان ممكن تحل الموضوع من غير كده

الموضوع التاني هو فعلا حمار ما يفتح و ممكن يكون الكلمه خرجت عفويه مش بقصد الاهانه
طبيعي لما حد بيخبطنا او يوقع علينا حاجه او لكمه بنقولها ان اعمي او ماتفتح يا حمار

بس بيني و بينك بقي لو في حب حتي لو دلق عليها مصنع عصير قصب كانت هاتعدي و لو كانت قالتله يا ابن الحمار كان هايقولها ايه الرقه دي كمان يا ست

مش عارفه ليه انا ملاحظه ان الناس مش كايقه بعض و بقت كشريه و عصبيه اوي و كل واحد بيتلكك للتاني و مستني اي غلطه علشان يفترسه

اعتقد ان الاوتيل و القاعه نحس و لازم يتفجروا

عاشقه وغلبانه يقول...

انا حاسه اني متنحه للمواقف
يمكن زعلانه ان حصل طلاق
بس كمان ماقدرش الوم لا دي ولا ده
واحده ابو عيالها طلع راجل نص كم تكمل معاه ده ليه........؟؟؟؟؟؟
الومها طبعا علي جرئتها بس بحسده بصراحه علي ثباتها وقدرتها العاليه علي اتخاذ قرار زي ده في وقت زي ده


العريس الثاني بقي الوم عليه انه ماخدهاش قلمين في وقتها

صح اللي عمله
كان هايبقي نص كم زي اللي قبله لو عدي الموقف

وفي الحالتين في ناس ناقصه تربيه وناس كراكتها علي طرف مناخيرها

انت قولتلي القاعه دي فين بقي علشان احضرلي فرح من دول
ههههههههههههههههههههههه

حاسوباتيه يقول...

يعني بما اني على وش جواز فارجو من حضرتك تقول اسم اقاعه المشؤومه دي لحسن يوقعني حظي الجميل فيها

اما لو كنت لاقدر الله لاقدر الله مكان الاولى فهعمل زي ماعملت بس بدون الكلمه الجميله الي قالتها انا همسك الميكروفين واقوله طلقني بكل ادب وبابتسامه كمان


اما الحادث التاني فهي طبعا غلطانه جدا ولو كنت مكان الراجل كنت برضو طلقتها


ربنا يهدي ويثب الواحد على عقله في اوقات العصبيه

الازهرى يقول...

فى الفرح الأول أعتقد إمكانية التأجيل لكن ف النهاية الطلاق كان ضرورى ما دام احد الطرفين أصبح غير متقبل لشخصية الأخر

أما فى الثانى فلو كنت مكان العريس لم أكن لأتردد لحظة فى مشاركته لرد الفعل

عجبتنى حكاية نفس الفصيلة جدا

أحــوال الهـوي يقول...

المشكله يا عمرو يا خويا في برفان اليتاجان فهو له تاثير مزدوج الاثارة الجنسيه و العصبيه
بلاش تستخدمه مرة تانيه في الافراح ولاد الناس مش لعبه
بجد شويه
الموضوع الثاني و العصير حدث امامي ايضا و تكرر نفس السيناريو
لكن الموضوع الاولاني كان ممكن يكون حله بعد الفرح بين الاهل و بهدؤ و ده قرار فردي من العروسه دون اهلها

عافانا الله و اياكم من شر الياتاجان

تحياتي

gogo!sf يقول...

اولا صوابعك مش زى بعضها

فى الفرح الاولانى كانت ممكن تعبر عن غيرتها بطريقة اظرف من كدة عشان زى ما بيقولو دى ليلة العمر مباح فيها كل حاجة

اما فى الفرح التانى هى فعلا غلطةجامدة عشان شتمت العريس ودة عيب جدا جدا
انى الست تشتم الراجل

وفى الاول والاخر دى قسم ونصيب
يعنى مش ليهم نصيب فى بعض

اما راى انا بلاش تحضر افراح تانى الله يخليك

تقبل مرورى

خمسة فضفضة يقول...

السلام عليكم ورحمة الله وبركاته

ساعات بيبقي الغضب متملك من الانسان ومش مخليه بيفكر ايه اللي هو بيعمله وعامي عنيه، وكتير بيعمل حاجات ويندم عليها بعدين

عشان كده رسولنا الكريم صلي الله عليه وسلم قالنا ان الشديد هو اللي يملك نفسه عند الغضب

سلام

شمس النهار يقول...

بصراحه العروسه الاولي جدعه وقويه انها تتخذ القرار الصائب عشان ده جواز مش لعب عيال والزوج ده بيكون قدوه للأولاد
يعني يكون ابو اولادي هزؤ
اما العريس التاني رادل من ضهر رادل
بالصعيدي
انا لو امه وموجوده في الفرح كنت لو هو ماعملش كده كنت اجبرته علي كده
عشان الرجل رجل والست ست ودي عروسه ناقصه تربيه ماقدرتش تتحكم في اعصبها في حاجه هبله كده هتعمل ايه في مشاكل الحياة

Unknown يقول...

الصراحة ياأستاذ عمرو مش عارفة فعلا لو الانسان اتحط فى موقف العروسة الاولى
او العريس التانى كان حيتصرف ازاى
لكن اللى انا عارفة ومتأكدة منه انى
لن أنطق حرف من الكلام اللى انت سمعته
ومارضيت تكتبه الحمد لله لا يجرى على لسانى مثلى لا فى غضب او فى غير غضب.
وهذا من فضل ربى علىّ.

Unknown يقول...

بس سيبك انت انا ما عاجبنى فى كل الكلام اللى فات ده الا الحتة دى
(طيب .. لبست الحته الكريستيان الكحلى بكرافتتها الرييه و الشوز الطليانى الجلد الطبيعى أبو توكه على جنب و غرقت نفسى ببارفان ياتجان الفرنساوى اللى مافيش منه دلوقتى لندرة الزهره اللى بيستخرج منها و اللى اٍسمها الخشخاش :)
انا اشم رائحة التيجان
من هنا فالحمد لله حاسة الشم
عندى ممتااااااااااااااااازة :)

صمت المشاعر يقول...

هههههههههههههههههههه

الغريب ان الاتنين في نفس القاعه

بس انا لو مكان العروسه الاولي كنت عملت كدا وطلبت الطلاق

انما لو مكان العريس التاني اكيد بردوه كنت طلقت العروسه دي بالخمسه