~SUN~ Pictures, Images and Photos

السبت، 28 فبراير 2009

بوستات محاسن صابر و norahaty قلبوا المواجع يا مينز !!


محاسن صابر صاحبة مدونة عاوزه أطلق و .. صديقه غاليه عند المدونين و كلنا تعاطفنا و تفاعلنا مع مشكلتها اللى أتحلت مؤخرا و ربنا أكرمها هى و أبنها عبد الرحمن و زعق لها نبى و حصلت على ما كانت تبغيه و بخسائر تقريبا مقبوله ..
و كمان الأخت الفاضله الدكتوره norahaty كاتبه بوست بعنوان فرصة شدنى جدا ..
محاسن صابر نشرت اٍمبارح بوست مهم و على جانب كبير من الخطوره بعنوان أيتها المرأة أنتى فى حاجة لرجل ما .. الحقيقه أنى قريت البوستين كذا مره و أيضا قرأت التعليقات بكثير من التمعن و شعرت برغبه قويه عندى لكتابة هذا البوست اللى بين أيديكم لعلى أستكمل به ما بدأته محاسن صابر و norahaty من فتح مجال لمناقشة موضوع خطير و هام جدا جدا ..
يا جماعه قالوا زمان اٍن الحياه ما هى اٍلا سلسله من التجارب و الخبرات بعضها مؤلم و بعضها سار و اٍن التعادليه هى اللى بتصنع حياه هاديه مستقره و آمنه .. و لو تغلبت التجارب السيئه على التجارب الحسنه فى مشوار الحياه لقيل عن صاحبها اٍنه اٍنسان تعيس و لو حدث العكس لأصبح اٍنسان سعيد .. طيب و هل بيد اٍبن آدم أن يجعل من حياته كلها فرح و مسرات و خبرات مبهجه ؟؟
أكيد لأ .. لأن الاٍنسان مسير فى بعض الأمور و مخير فى بعضها الآخر و ده مش موضوعنا الحقيقه فمش عاوزين نسهب فيه الحديث ..
موضوعنا هنا عن التجربه التانيه فى حياة الاٍنسان رجل كان أم اٍمرأه فلا أرى فارق كبير بين التجربتين ..
أى فشل فى التجربه الأولى سواء كانت علاقة حب أو خطوبه أو زواج أو حتى صداقه ليس بالضروره أبدا أن يتبعها خوف و قلق و توتر و لا داعى اٍطلاقا لأن يتقوقع الشخص داخل نفسه و يخشى الدخول فى تجربه تانيه من جديد خوفا من أنه ينجرح تانى و يتعذب تانى و يشقى تانى و يقول أنا اللى جبت ده كله لنفسى و ليمو حليمو بلدياتى و قريبى من بعيد لبعيد قال : و تانى تانى تانى راجعين أنا و أنت تانى للنار و العذاب من تانى من تانى !!
يعنى الراجل ماخفش أهو من خوض تجربة حب جديده رغم الويل و سواد الليل اللى شافه فى حبه الأولانى .. و لا هى كمان اللى بيغنى لها خافت و قالت : خايفه تجرحنى يا ليمو حليمو زى جوزى الأولانى ما جرحنى و سرق عمرى و أخد منى حب ماكنش من حقه !!
لأ .. ده الجدع و البنيه عارفين أن الحب مش كله عسل لكن فيه جانب كبير من العذابات و الشك و الخوف و لكن مصرين يكملوا المشوار لأنهم مؤمنين بصدق حبهم لبعض ..
يا جماعه لاحظت فى التعليقات عند محاسن صابر و norahaty خوفكم و تشككم فى صدق نجاح التجربه التانيه .. يا جماعه ماتخافوش .. صدقونى ماتخافوش لأسباب كتيره منها و أهمها أنه لن يصيبنا اٍلا ما كتب الله لنا .. و أن التجربه التانيه عادة بتكون أرقى و أعمق و أكثر عقلانيه من التجربه الأولى و أشد صدقا و تمهلا من اللى قبلها ..
و أيه اللى يعيب الشخص أنه يجرب مره تانيه و تالته و رابعه طالما أنه بيحسن الاٍختيار و بيتعامل بصدق و طبيعيه مع الطرف التانى ؟؟
أيه العيب فى كده ؟؟ عاوز أعرف أنا .. أنا بقى عاوز أعرف ليه الخوف و هل معنى أن الأشخاص اللى خضنا معاهم تجارب ماكنتش ناجحه لازم و بالضروره تفضل أشباحهم بتهيم حول العلاقه الجديده و تفضل تنقرظ و تقرص فينا طول الوقت ؟؟!!
يعنى اٍحنا رضينا بقضاء الله فينا و بأننا أتكعبلنا فى ناس تعبونا و جرحونا و قضينا فترة العقوبه اللى ربنا كتبها علينا معاهم بحسن سير و سلوك و طلعنا اٍفراج بعد قضاء كامل المده و قلنا لله الحمد من قبل و من بعد قضاءه فينا عدل و رضينا بحكم الجبار يقوموا برضو يفضلوا منغصين علينا عيشتنا و مخوفينا من اللى بيحبونا بصدق و من كل قلبهم و مشككينا فى نواياهم و مرعوبين من كل كلمه و من كل حركه و من كل موقف و لازم نظن أنه فيه ورا كل تصرف من تصرفاتهم نيه مستتره غير معلنه ؟؟
يا جماعه شوية عقل ..
أستفتوا قلوبكم و اٍن شاء الله ربنا مش حيخذلكم و لا يكسفكم أبدا ..
يا من خضتم تجارب فاشله لا تيأسوا من روح الله .. و أقبلوا على الحياه بقلب أخضرانى مزهزه كد يعنى قلب مليجى على قولة الشراقوه .. وبنفس راضيه بكل اللى فات و مستمتعه باللى جاى و صدقونى مش حتندموا أبدا لكن برضو مع شىء كبير من توخى الحرص المره دى يعنى بدون اٍندفاع و لا تهور ..
و أدوا فرصه للطرف التانى يحاول يشفى جراحكم على قدر ما يستطيع و بشىء من الصبر و القدره على الاٍحتواء ستسير الأمور للأحسن لو قتلنا الخوف و الشك من المجهول ..
يالا بقى سمعونا صلاة النبى كده و روقوا و عاوزين نسمع أخبار حلوه كده عن قريب اٍن شاء الله :)

هناك 33 تعليقًا:

غير معرف يقول...

بأحبك والله

شمس النهار يقول...

ماشاء الله عليك ياعمرو
انسان متفائل فعلا
وانا شفت ده بنفسي وانت معيا في المستشفي
متصالح مع نفسك بتقول زي مابتعمل
شفت لما ماما كانت في البنج وانا قلقانه انت كنت بتقول ايه وبتعمل ايه
ربنا يكرمك يارب
بس عايزه اقولك الخوف من التجربه التاني
بالنسبه للمراه ده شئ طبيعي
ويااما هي واعيه تقدر تصلح اخطاء الماضي وتستفيد منها وتخللي بالها المره دي وتحاول بصدق تسعد شريكها وتسعد نفسها
يا الخوف يغلبها وتخسر كل حاجه
وعلي فكره ده كمان بيتوقف علي الشريك المحب لو هو واعي وبيحبها قوي هيعدوا مع بعض لبر الامان ويقضوا احلا سنين عمرهم
والا ايه

الازهرى يقول...

اللهم صلى عليك يا نبى


الخوف من التجربة ناتج عامة ن الخوف من المجهول
ولكن يجب ان لا يقف الانسان طويلا عند الفشل والا انتهت الحياة وهو واقف فى مكانه
ولكن يبدأ من جديد متفاديا اخطاء التجربة الاولى
وهكذا

تحياتى وخالص مودتى

Sweet Violet يقول...

مش عارفه اقول ايه بجد

انت اكيد معاك حق فى كلامك بس بردو الانسان اللى بيبقى جواه جرح من تجربه فاتت بيبقى صعب قووى انه يدخل تجربه جديده بيبقى فى نوع من انواع التردد

بجد بوست محاسن و كلامى معاها امبارح و بوستك النهارده مش هقول قلبوا مواجع لا انا بقيت فى حيره زياده .. لان الكلام جاى فى احداث انا عايشها ومحتارة اصلا فيها

ربنا يستر

شكرا على البوست اللى انا اخدته كنصيحه منك (:

mahasen saber يقول...

طب اولا ان حضرتك تتكلم عنى فى بوست او تشير ليبويت من عندى فيه
فده بعتبره شرف ليا وكأن اتكتب عنى فى الواشنطن بوست

انا قريت جزء من الموضوع ارجع اكمل الباقى

وشكرا من قلبى على الشرف اليى تسببتلى فيه ان فكر ما عندى يتناقش فى مدونتك المهيبه والرائعه

سكوت هنصوت يقول...

طيب بما اني اول مرة انط عندك وبما انك مالكش في المجاملة...فأنا مش هجامل...بص يا سيدي انا ما قريتش البوست بتاعك لإني بصراحة جاية ادعوك لغاية سامية في في الرابط ده وثيقة للتوقيع من أجل المطالبة بتفكيك إسرائيل
http://www.petitiononline.com/mod_perl/signed.cgi?ttwpdi

...من فضلك وقعها مباشرة اما لو مش مقتنع فزور المدونة دي وانا متأكدة انك هتقتنع فورا في انتظار توقيعك

http://www.tahyyes.org/2009/02/blog-post_27.html

تحياتي لمدونتك اللطيفة

mahasen saber يقول...

طب انا استمتعت وقريت وحزنت
استمتعت وقريت البوست لانه فيه دعوه للاقبال بتفاؤل وصدق على التجربه التانيه فى حياة الانسان
ولان فيه يقين كبير بما كتب لنا وبما قدر عند المولى عز وجل

اما بئهزعلت ليه ااقول
لانى حسيت ان مكتوب باعصاب مشدوده وقلب قلقان لينجرح وروح تواقه لحبيب يقول كلمة اه

منتهى العقلانيه ومنتهى الوقعيه بجانب كميه لا باس بها من الصدق
تساوى الشقاء فى الحب

mahasen saber يقول...

والبوست ده زى ما ضد قالت نصيحه ليها

ضد ااقرى وتمعنى
شوفى مش انا بس اليى بقولك كده

ده عمرو وما اداركى ما عقلية وفكر استاذنا عمرو

أحــوال الهـوي يقول...

الله ينور يا بوص
نفس الراي تقريبا بس مع اختلاف المتردافات و ثقل الكلمة التي ترجح ميزانك لحكمتك و ثقافتك

تحياتي

صبرني يارب يقول...

استاذنا

تمام الله يفتح عليك

هو صحيح احيانا الخوف بيبقى صحي

لان الطالب لو ما كانش خايف من الامتحان مش هايذاكر

بس خوف عادي فى حدود المعقول مش رعب بقى والى يجيب نتيجه عكسيه

وكمان فى نقطه مهمه

اي علاقه بتفشل زي ما دايما باقول لها طرفين
الطرفين بيكنوا غلطانين فيها بشكل ما

المشكله الكبيره بقى
ان احد الطرفين ما يكونش معترف بالغلط ده او مش شايفه اصلا

او ياخد دور الضحيه ويقول انا حظي كان وحش وانا اتظلمت وانا غلبان وكده يعنى

لانه اكيد اكيد له يد فى الفشل ده حتى لو كان بالسلبيه وسوء مواجه المشاكل

يعنى من الاخر لااااااازم يتعلم من خطأه فعلا ما يكتفيش بلوم الحظ والايام والشريك

لازم يلوم نفسه عشان يتجنب اخطاؤه فى التجربه التانيه وما يكررها


تحياتي لحضرتك ولسه ما قريتش بوست نور حياتي هاروح اقراه ان شاء الله


اه طيب هاتسمع اخبار حلوه من مين اه من مين ؟؟؟؟
ههههههههههههههه

Kiara يقول...

كلامك منطقى بس في حاجه صعب اوي اني اكون مجروحه والتجربه عملت اللي عملته فيا وبعدها لما ادخل تجربه جديده مش ابقي خايفه وحذره ومتوتره من اثر التجربه اللي فاتت دا قلب ومشاعر مش احجار سواء كانت التجربه خطوبه او حب او صداقه برد التجربه بتمس المشاعر والقلب ودا الاصعب دي مش تجربه علميه يوم اما تفشل هنقول نعملها تاني

Unknown يقول...

اللهم صلى على محمد وعلى آل محمد كما صليت على ابراهيم وعلى آل ابراهيم انك حميد مجيد وبارك على محمد وآل محمد كما باركت على ابراهيم وعلى آل ابراهيم انك حميد مجيد .

Unknown يقول...

((((أستفتوا قلوبكم )))))
ما هو ده اللى جايبنا ورااا
على العموم كلامك على العين
والرأس ياأستاذ عمرو
وماااااااشى كلامك
سأستفتيه ولو أن
هو فاتينى من
زمان (اللى
تعرفيه احسن
من المجهول!)
واللى انا فيه
الحين هو اللى اعرفه
يبقى ليه الحيرة والتجربة !!

Unknown يقول...

مش حأنسى اشكرك كتير
على اهتمامك الصادق

من غير عنـــوان يقول...

الله ينور عليك...
أحسنت يا عمرو يا صديقي...

ولكل من يمر بخاطره هاتف أو يناجيه محب...


توكل على الله

فإذا صدقت النوايا... نجحت التجارب...

أمنياتي

princess يقول...

عليه الصلاة والسلام
:))
ان شاء الله خير

عمرو يقول...

غير معرف
و من غير حلفان أنا مصدق

عمرو يقول...

شمس النهار
أشكرك يا برنسيس على كلامك و لكن بجد التفاؤل جزء من شخصيتى لا ينفصل عنها أبداو أتمنى كل الناس يكون عندهم التفاؤل هو المحرك الأساسى لحياتهم
و أوافقك تماما على وجهة نظرك فى التجربه التانيه بشرط أن يكون عند الطرفين رغبه حقيقيه فى تجاوز الماضى بأحزانه
أتمنى فعلا أن يقضوا سنين عمرهم فى هدوء كده و سلام من غير عكننه و قلبة دماغ :)
تحياتى يا برنسيس

عمرو يقول...

الأزهرى
يا صديقى علشان تنجح التجربه التانيه لازم الطرفين يكون عندهم العزم و الاٍراده على تخطى ما سبق من أحداث محزنه
يعنى الطرفين مش طرف واحد و اٍلا حيلاقى نفسه بيدن فى مالطه
شكرا يا صديقى للزياره و التعليق :)

عمرو يقول...

Sweet Violet
يشرفنى و الله أنك أعتبرتى البوست ده نصيحه
و بجد أنا بأتكلم من واقع خبره يعنى لا بأس بها فى الدنيا أو هكذا أظن
خلاصة التجربه عندى بعد هذا العمر المديد أن لا شىء يساوى الأمل و التفاؤل لا فى القيمه و لا فى المنفعه
ماتحتريش يا سويت فيوليت و أفتحى قلبك للحياه و عقلك للفهم و تفائلى و اٍن شاء الله خير

عمرو يقول...

mhasen saber
العفو يا محاسن ده كتير عليا و الله و على مدونتى المتواضعه
أنتى اللى دايما بتفجرى أفكار جديره فعلا بكل تقدير و تستحق النقاش عن جداره

عمرو يقول...

سكوت هنصوت
أهلا بيكى و اٍن شاء الله ماتكونش آخر مره تزورى فيها المدونه
أنا بالفعل وقعت على الوثيقه و مقتنع تماما بالأفكار اللى ساقتها نواره بخصوص هذه الوثيقه الفريده
متشكر للزياره و الاٍهتمام بقضيه هامه و بارك الله فيكى

عمرو يقول...

mahasen saber
الحقيقه أنى فعلا كنت بأكتب البوست ده و كانت أعصابى مشدوده شويه بسبب حالة الاٍحجام عن خوض التجربه التانيه اللى لاقيتها عند كتير أوى من المعلقين على البوست تبعك و على بوست الأخت نوراهاتى
و أنا يمكن بطبعى أميل للتفاؤل و الاٍقبال على ما يعتبره الآخرون مغامره أو يمكن مخاطره لكن بجد بأحكم عقلى و قلبى كويس أوى قبل الاٍقدام على أى فعل
و الحقيقه يا محاسن أنا بأثق فى الله ثقه لا حدود لها و علشان كده أنا حاليا بأعيش أجمل و ألاق أيام مرت عليا فى حياتى كلها
و الله على ما أقول شهيد :)

عمرو يقول...

أحوال الهوى
و الله ينور عليك يا صديقى الشاعر المدهش
يا دكتور ده أنت أستاذنا فى نحت الكلمات و تركيبها و لضمها ببعضها كعقد اللؤلؤ المطعم بحبات المرجان
أشكرك يا صديقى لتشريفك البوست و تقبل تحياتى

عمرو يقول...

صبرنى يا رب
أيوه الله ينور عليكى
شىء من الخوف
لكن مش فوبيا تخللى مثلا الطالب اللى داخل الاٍمتحان يغمى عليه و هو على باب اللجنه
الحرص مطلوب طبعا فى التجربه التانيه لكن المفروض أن الواحد بيتعلم من تجاربه السابقه و بيبقى عنده ميزان حساس يقدر يحكم بيه على الأمور بشكل صحيح
أنا و الله أتمنى زيك أنى أسمع أخبار حلوه من أى حد يعنى :))

عمرو يقول...

كيارا
دايما بأحذر من أن الخوف الشديد و الحرص الشديد يتقلبوا لفوبيا يكون صعب جدا التخلص منها
أنا فى مره الأسانسير وقع بيا من الدور التالت و كانت نازل من الدور ال14 و كدت وقتها أن تحصل لى فوبيا من ركوب الأسانسيرات و بقيت بأطلع بيتنا على السلالم لما أنهد حيلى و بعدين سألت نفسى : هل لازم بالضروره و حتما كل ما أركب أسانسير يقع بيا ؟؟
لاقيت نفسى ساذج لو قلت أيوه .. و لاقيت نفسى ما أستفدتش من التجربه السابقه و بقيت بأركب أسانسيرات متهالكه و خربانه
الحرص مطلوب و بعض الشك من حسن الفطن ماقلناش حاجه لكن حذارى من الفوبيا لأن حتى لو الاٍنسان ربنا أكرمه و تغلب نوعا ما على الفوبيا دى اٍلا أنها بتظل موجوده و بتلقى بظلالها السخيفه على علاقاته فيما بعد
و أكيد يا كيارا كل شىء بيحتاج وقت للشفاء منه حتى الجرح الصغنون اللى فى الصباع فما بالك بقى بجراح القلب
ربنا يطمئن النفوس و يهدى القلوب للخير
اللهم آمين

عمرو يقول...

norahaty
يا أختنا الفاضله لله الأمر من قبل و من بعد
يعنى اٍحنا بنعمل اللى علينا و على الله قصد السبيل
لكن
علينا أن نحسن اٍختياراتنا أو هكذا نظن أنا معاكى بس بالمنطق كده هل ينفع يعنى أن نظل حبيسين تجربه فشلت مره و نهمل كل الجوانب الحسنه فيها بل و فى اللى جاى كمان ؟
ما هو أكيد لكل شىء فى دنيانا جانب كويس و جانب ردىء
ليه مثلا مش بنقول أن التجربه السيئه اللى مرت علينا فيها جانب مضىء تعلمنا منها اٍزاى نحسن اٍختيارنا فى المره القادمه ؟
ليه دايما بنبص للجانب المحزن فى الأشياء ؟؟!!
طيب
ما تيجى نعتبر أن التجربه الفاشله المحزنه اللى خضناها قدر من الله و تكفير سيئات و رحمه من لدنه العلى القدير
تعالى نقول حاجه تانيه
تعالى نقول أن ربنا اٍستجاب لدعائنا و جعل خير أعمالنا خواتيمها و أن ما سبق فى حياتنا من أحزان كان تمهيدا لجنى ثمار الصبر و الاٍحتساب و نعم من الله كثيره لا ينالها اٍلا الصابرون المحتسبون
هدايا الله لنا يا دكتوره قد لا تبدو لأعيننا فى حينها و لكنها بغير شك موجوده بس محتاجه منا أن نحسن الظن به و سيبى بقى الباقى على المولى هو أدرى بنا و أقرب لنا من حبل الوريد

عمرو يقول...

من غير عنوان
أشكرك يا صديقى الحكيم للزياره و التعيق
فعلا هى أهم حاجه صدق النوايا و اٍلا يبقى الاٍنسان بيضحك على نفسه و بيستخف بتصاريف القدر
أشكرك يا صديقى محمد و لك خالص تقديرى

عمرو يقول...

princess
يسمع منك المولى :)
تحياتى و تقديرى

عاشقه وغلبانه يقول...

اعتقد الدخول في تجربه جديده مع الاستفاده بخبرات التجربه السابقه ده بيكون دافع لنجاح العلاقه

ماحدش بياخد اكتر من نصيبه
وكل تجربه بنستفاد منها خبره بتساعدنا في التجربه اللي بعدها
الحياه مابتقفش الايام ماشيه لوحدها

وقل لو اجتمع الانس والجن علي ان ينفعوك يضروك بشئ لن يضروك الا بشئ قد كتبه الله عليك وان اجتمعوا علي ان ينفعوك بشئ لن ينفعوك بشئ الا ما كتبه الله لك

عمرو يقول...

عاشقه و غلبانه
كلامك صحيح و أوافقك عليه و الحقيقه أنك لخصتى به أفكار كثيره جدا
فعلا لابد من الاٍستفاده من التجارب السابقه و اٍلا يبقى أيه بقى فايدتها ؟؟

الفقيرة إلى الله أم البنات يقول...

اللهم صلى وسلم وبارك على سيدنامحمد
وعلى آله وصحبه أجمعين

استاذ عمرو ناس هتقول ان اللى على البر عوام
بس اظن ناس كتير مرت بتجربة زواج فاشل او خطوبه فاشله
بتنظر فترة حتى يبرأ الجرح ونبدأ من جديد مهو مينفعش افضل زى ما قلت اللى تعبنى ..عفريته ملازمنى ما خلاص راح وانتهينا
ولما افتكرة افتكره بس علشان لا اكرر ما قمت به مرة أخرى
لازم افهم انى برضه تسببت فى مشكله .زمش هو فرنكشتين وانا الاميرة النائمه
اى انفصال بيكون خطأ مشترك..واحد اكتر من واحد ماشى الحال بس فى خطأ مشترك لازم


ممكن على سبيل المثال..لو الطرف كريم قوى ومتفانى ومندفع فى تفانيه...وتصرفه ده بيسبب للطرف الآخر نوع من الارتباك..وبعد شوية يتحول لأنانى

آجى عند التصرف ده وافرمل ..نفسى
الرجل غيور قوى وبيغير من خياله..لازم يحل المشكله دى لانها تسببت فى مشكله مع طرف آخر

اما عيوب الطرف التانى..هافضل واخد بالى من انى عند اختيارى اركز ومضحكش على روحى وابعد عن مقدمات العيوب اللى بالتأكيد نتائجها مؤكده

ده بخصوصى انا اللى هابدأ تجربه جديده
ويفضل نظرتى للطرف الجديد...
هو ماله بتجربتى السابقه..اصلا ليه اعاقب حد بذنب غيره

رايى اننا لازم نبدأ من جديد
يعنى ايه تجربة وخلاص ومش هاكررها
والتجربة السابقه تبقى درس نتعلم منه
واسأل الله الصلاح لامة سيد الخلق

غير معرف يقول...

ارجو الاتصال 0508473373