الثلاثاء، 24 فبراير 2009

بوست للكلابيظ !!


البوست ده يا جماعه .. مساء الخير الأول :)
البوست ده يا جماعه يمكن يكون موضوعه غريب شويه .. يعنى موضوع لم يتطرق اٍليه المدونون كثيرا أو يمكن لم يفتح النقاش فيه أبدا على المدونات مع اٍنه موضوع شايف أنه على جانب كبير من الخطوره و الأهميه ..
حد حيسألنى ليييييه ؟؟!!
حأقول له ببساطه لأنه بيمس الصحه اللى هى أثمن ما وهبه الله للاٍنسان بعد نعمة الاٍيمان به .. و لأنه أيضا بيمس الشكل العام و الهيئه اللى لها تأثير قوى جدا على مجريات أمور الحياه بصفه عامه ..
مين فينا مايحبش أنه يتمتع بصحه جيده و لياقه بدنيه عاليه و شكل لطيف متناسق مريح للعين تيسر و تقوى الروابط الاٍجتماعيه و أيضا تسهل مهمة العثور على مقاس ملابس شيك و بنت ناس ؟؟
الاٍجابه طبعا أكيد كلنا ..
طيب .. مين فينا لم يخض تجربة الريجيم على مختلف درجاته السهل منه و المتوسط و القاسى ؟؟
الاٍجابه برضو حتكون أغلبنا جربه على الأرجح ..
ماشى .. مين بقى الجدع اللى قدر يكمله للنهايه و وصل للوزن المثالى المناسب عن طريق ريجيم غالبا ما بيكون من وصف الأصدقاء و المعارف و غالبا برضو مش بينجح تماما و بيفقد الشخص صبره و قدرته و يرجع يفترى على الأكل أكتر من الأول و بالتالى بيرجع وزنه يزيد أكتر من الأول و مره على مره بيصاب بالاٍحباط الشديد و باليأس و فى النهايه خالص يقول : هو نصيبى كده و بس أعمل أيه ؟؟!!
الريجيم يا جماعه لازم يكون نمط ثابت لطريقة الأكل و الشرب و ممارسة الرياضه باٍنتظام علشان ينجح ..
يعنى مش المفروض أنه يكون عقاب للنفس و حرمان لشهوة الطعام اللى هى ثانى الشهوات عند الاٍنسان بعد شهوة التكاثر ..
الشخص البالغ بيحتاج يوميا ل 25 سعر حرارى لكل كيلو جرام من وزنه ده لو معدل نشاطه طبيعى .. يعنى لو شخص مثلا وزنه 100 كيلو فبيحتاج 2500 سعر بالتمام و الكمال علشان يفضل محافظ على وزنه لا يزيد و لا ينقص ..
طيب لو قللنا فى عدد السعرات اللى بتدخل الجسم ده حينقص الوزن بشكل آمن و لكن على المهل و بتأنى بدون حدوث مشاكل صحيه .. و بديهى أن لو عدد السعرات دى زاد يبقى الوزن أيضا حيزيد لكن بسرعه و يبقى الشخص كلبوظ و تشه و العيال تزفه فى الشارع و يقولوا له التخين أهو التخين أهو ..
ريجيم تقليل عدد السعرات الحراريه يا جماعه و عن تجربه شخصيه من أفضل و أحسن أنواع الريجيم بدون الحرمان من الأكلات المحببه و اللى فى النهايه بتخللى الريجيم يفشل و تنسف الفكره من أساسها ..
هنا بقى لازم نوضح أن ممارسة الرياضه الخفيفه بشكل منتظم و أبسطها المشى بسرعه متوسطه حيساعد جدا جدا جدا على اٍنجاح هذا الريجيم و تجديد الدوره الدمويه فى الجسم و تنشيط كافة الخلايا المستهلكه و الخامله و صدقونى حتحسوا بفرق كبير أوى شكلا و موضوعا لو أتبعتم هذه الطريقه لاٍنقاص الوزن ..
و نصيحه أخيره أدرسوا كويس جدول الوجبات اللى حاططها هنا و أختاروا منها المناسب لكم و لنوع النشاط اللى بتزاولوه و أوزنوا نفسكم قبل البدء فى الريجيم ده و أمتنعوا شهر كامل عن متابعة الوزن و بعد الشهر أوزنوا نفسكم تانى و حتفرحوا أوى بنفسكم و حتدعوا لى ..
نصيحه كمان اٍياكم ثم اٍياكم من مقولة النهارده يوم تبويظ الريجيم و نبقى نعوضه بكره :))
و آدينا بنعمل اللى علينا اٍستعدادا ليوم المعمعانه و ربنا يقوينى بقى و على رأى الريس حنتيره يا غزال يا غزال العشج حلال دوبت أنى دووووووب خلتنى خيال !!
على الله نعجب يا غزال أنت يا غزال :)
نماذج لوجبات الإفطار
1- 285 سعرة حرارية
كوب شاي بحليب بدون سكر + بيضة مسلوقة + قطعة جبن قريش – 50 جم + ربع رغيف أسمر كبير
2- 310 سعرة حرارية
كوب شاي بحليب بدون سكر + بيضة مسلوقة + برتقالة متوسطة + ربع رغيف أسمر كبير
3- 355 سعرة حرارية
كوب حليب بدون سكر + قطعة جبن قريش 50 جم +ربع رغيف أسمر كبير
4- 370 سعرة حرارية
كوب شاي بحليب بدون سكر +
2 بيضة أومليت مقلي بـمعلقة سمن صغيرة + ربع رغيف أسمر كبير
5- 410 سعرة حرارية
كوب شاي بحليب بدون سكر +4 ملاعق فول مع معلقة صغيرة زيت زيتون + ربع رغيف أسمر كبير
6- 420 سعرة حرارية
كوب شاي بحليب بدون سكر + 2 بيضة مسلوقة + نصف رغيف أسمر كبير
7- 430 سعرة حرارية
كوب نسكافيه بملعقة صغيرة حليب بودرة بدون سكر + قطعة جبن شيدر 50 جم + نصف رغيف أسمر كبير

8- 522 سعرة حرارية
كوب شاي بحليب بدون سكر + قطعة جبن شيدر 50 جم + شرائح طماطم 50 جم + 2 معلقة صغيرة زيت زيتون + نصف رغيف أسمر كبير
نماذج لوجبات الغذاء
1- 550 سعرة حرارية
طبق سلطة نصف كيلو + خضار 300 جم + شريحة لحم مسلوق أو مشوي 100 جم + تفاحة واحدة كبيرة
2- 615 سعرة حرارية
طبق سلطة نصف كيلو + 5 ملاعق فول مدمس + ملعقة صغيرة زيت + ربع رغيف أسمر كبير + برتقالة كبيرة
3- 655 سعرة حرارية
طبق سلطة نصف كيلو + طبق شوربة خضار 250 جم + ربع فرخة أو أرنب مسلوقة أو مشوي 250 جم + بطيخ أو شمام 250 جم
4- 700 سعرة حرارية
طبق سلطة نصف كيلو + 4 ملاعق كبيرة مكرونة مسلوقة + شريحة لحم خروف مشوي أو مسلوق 150 جم + فراولة 150 جم

5- 755 سعرة حرارية
طبق سلطة نصف كيلو + 4 ملاعق كبيرة أرز أو نصف رغيف خبز + سمك مشوي 250 جم + بطيخ أو شمام 250 جم
6- 795 سعرة حرارية
طبق سلطة نصف كيلو + 8 ملاعق خضار حوالى 370 جم + قطعة لحم بقري 100 جم + 4 ملاعق كبيرة أرز أو نصف رغيف خبز + مانجو 175 جم

نماذج لوجبات العشاء
1- 215 سعرة حرارية
زبادي 100 جم + قطعة جبن قريش 50 جم + ربع رغيف أسمر كبير
2- 415 سعرة حرارية
6 حبات زيتون أسود + قطعة جبن قريش 50 جم + نصف رغيف أسمر كبير

3- 450 سعرة حرارية
2 بيضة أومليت مقلية بمعلقة سمن صغيرة + بسطرمة 50 جم + ربع رغيف أسمر كبير

4- 550 سعرة حرارية
2 شريحة مخ 200 جم مع ملعقة سمن كبيرة + نصف رغيف أسمر كبير

5- 685 سعرة حرارية
2 حبة سجق 100 جم + نصف رغيف أسمر كبير
6- طبق كشري مصري = 840 سعرة حرارية تقريبا
6 ملاعق أرز + 4 ملاعق مكرونة + 4 ملاعق عدس + تقلية بصل

هناك 26 تعليقًا:

رئيس جمهوريه نفسى يقول...

طيب انا مش كلبوظ ولا امت للكلبظة بصلة ممكن بوست بقاء للنحافة بعد ده ينوبك ثواب

شمس النهار يقول...

طبعا البوست ده مش ليه خالص
الحمد لله
بس هو موضوع مهم جدا فعلا
كمان المصريين عندهم عادات سيئه جدا في الطعام
يعني لو كل واحد شاف ايه الزياده في اكله وبطلها هيخس
يعني لو بياكل شيبسي كتير لو منعه واخد بداله فاكهه هيخس
وكمان المياه الغازيه لو بطلها هيخس عشان كل ده سعرات في الهوا وغير مفيده اصلا
كمان انا بحب الرياضه جدا مش بس التخان اللي لازم يلعبوا رياضه لا الرفيعين كمان عشان يحفظوا علي اللياقه بتاعتهم
بس مش عارفه ليه انت بتتكلم علي الرجيم مع ان انت جسمك رياضي ومتناسق
ماشفتش اي تخن خالص مع الطول ماشي
والا انت بتتكلم علي بنتي الصغيره وبنتك
ده دول ياعمرو اللي سترنا ومعرفين الناس ان احنا عندنا اكل عشان الباقي عاملين لنا سمعه من الرفع اللي همه في

صبرني يارب يقول...

يا لهووووووووووووووي

كده يا استاذنا ناقصة انا انظمة رجيم

ما عليناااااااااااااااااااااااا

الانظمه بتاعتك على فكره فعلا حلوه بس الى يمشي عليها بقى

وعلى فكره يا شموسه مش بس الشبسي والمياه الغازيه الى بتخن انا واحده من الشعب مثلا اساسا اساسا ما اقدرش اكل واشرب الحاجات دي عشان معدتي بايظه تماما

لكن لما بالبخ فى الاكل عموما وزني بيزيد بسرعه جدا

فى الحقيقه انا بس فعلا شايفه ان فى اجسام فعلا بيكون معدل الحرق عندها عالي بمعنى بتاكل بس طبيعة جسمها بيحرق الاكل ده بسرعه اكبر

وفى ناس عندها العكس ودول يا عينى يبقوا غلابه زيي كده ويفضلوا يعملوا رجيم طول حياتهم وياااااااااريته نافع

انا معاك يا استاذ عمرو فى حكاية الرياضه دي فعلا مؤثره اوي

والمشي جميل اوي اوي

بس اول ما حد يعتقني لمدة ساعتين فى اليوم اوعدك امشيهم كلهم بس يعتقووووووووووووني

تحياتي لكم

عاشقه وغلبانه يقول...

ماتكتب بوست الاقي فيه روحي بقي
مره تقول اللي الصغننين ومره المكلبظين
ده احنا ماطلعناش من الدنيا غير بالرشاقه( وش مكسوف اوي)
انا وزني 67 كيلو وطولي 170 سم تفتكر اعمل رجيم ولا كده حلو
ههههههههههههههههههههههه

عموما انا يارب اكل نص الاكل اللي انت كاتبه تحت ده

ياريت تعملنا بوست عن الناس السمباتيك اللي زي حالتنا
( برضو وش مكسوف )

جعلوني مريض نفسيا يقول...

السلام عيكم

تقريبا جسم الأنسان عامل زي ماتور السيارة ممكن تلاقي واحد 700 سي سي وواحد 2000 سي سي وواحد 5000 سي سي
وكل واحد بيحرق بنزين علي قده

الجزئية بتاعت ان الشخص البالغ بيحتاج يوميا ل 25 سعر حرارى لكل كيلو جرام من وزنه مش عارف اقتنع بها
انا طولي 190CM ووزني 70KG وبأكل بتاع 5000 سعر حراري في اليوم والحمد لله مبطخنش ومبسوط كده بس بصراحة انا متعود امشي كتير ومسافات طويله بحب المشي جدا ممكن يكون هو ده السبب؟

عمرو يقول...

رئيس جمهورية نفسى
أدام الله عليك نعمة الرشاقه يا سيادة الرئيس لأنها بجد نعمه من المولى لا يدركها اٍلا السعداء
بس لو حبيت وزنك يزيد شويه و بشكل معقول يبقى عليك يا صاحبى و على الفطير المشلتت و السجق البلدى لأنه ثبت أن الأتنين دول قنابل لا علاج لها لزيادة الوزن
و بعد الجواز صدقنى يا ريس بكام شهر كده حتضطر تشترى هدوم جديده تتناسب نع زيادة الوزن المفرطه اللى حتصيبك :))

عمرو يقول...

شمس النهار
يا برنسيس طبعا أنتى بره المواضيع دى تماما لأنك من طائفة الغزال بدون شك :9
فعلا عادات المصريين بل و الشرقيين بصفه عامه فى الأكل سيئه جدا خاصة بعد اٍنتشار الوجبات السريعه و التيك أواى و الحاجات دى و كمان المسبك و الاٍفراط فى الحلويات و المياه الغازيه و القعده قدام الكمبيوتر و الدش لساعات طويله بدون حركه
و يا برنسيس ربنا يجبر بخاطرك أصلك ماشفتنيش قبل ما أصر على أن أتخذ هذا الريجيم نمط لحياتى الغذائيه منذ سنوات طويله
يعنى بجد كان وزنى زايد زياده مفرطه للغايه و لدرجه مزعجه لكن لله الحمد دلوقتى زى ما أنتى شايفه بشىء من الاٍصرار و المعاناه فى البدايه قدرت أتخلى عن عادات المتاخن و شغل الفجعه و الرمرمه و بقيت طبيعى
أنا بأقول الكلام ده مش مباهاه باٍرادتى و لا غرور منى و لكن بجد أنا حاسس بمشاكل الكلابيظ و الكلبوظات النفسيه و الصحيه و أتمنى من كل قلبى أنهم يتخلصوا منها لسابق معاناتى شخصيا منها
بنتى و بنتى بقى دول مشكلتهم مشكله بس اٍن شاء الله حنبقى نعمل لهم ريجيم قاسى شويه
مش كده و لا أيه ؟؟ :)

عمرو يقول...

صبرنى يا رب
يا أم خالد يا أم خااااالد أنا فتحت مدونتك طابخين أيه النهارده أتخضيت بصراحه :))
يعنى مبدئيا وش كده ده أنتى بتعملى بأيدك الزبده البلدى اللى بتتسيح بعد كده و تبقى سمن بلدى يعنى كل 100 جرام فيهم حوالى عشرميت ألف سعر و كمان المورته و يا عينى على المورته اللى هى خلاصة و صفوة دسم اللبن الجاموسى يعنى مافيش أنظمة ريجيم تنفع و لو كان اللى حاططها شمهورش بذات نفسه :))
بس سيبك أنتى مافيش أحلى من السمن البلدى اللى بترم العضم و تشد الركب مش الزيت اللى بينضرب بيه المثل فى كتر الصيام :)
الرياضه مهمه و المشى مهم و ده اللى بيساعد على حرق الدهون و سعرات السمن البلدى رهيبة الاٍرتفاع بس ممكن برضو تجيبى مشايه بالكهربا فى البيت و تذاكرى للأولاد و أنتى بتتمشى عليها على الأقل حتحرقى مثلا من 150 ل 200 سعر فى النص ساعه وده كويس
مع تحياتى و سلامى للأستاذ رضا

عمرو يقول...

عاشقه و غلبانه
حاضر حأعمل بوست عن السمباتيك و اٍزاى وزنهم بيزيد بعد الزواج :)
بس أنا شايف أن كده وزنك بيتناسب مع طولك بس خدى بالك مش مهم كمية الأكل اللى بتاكليها لكن المهم النوعيه يعنى مثلا 4 كحكات بالسكر من صنع أختنا أم خالد اللى هى صبرنى يا رب معمولين بالسمن البلدى اللى هى برضو عاملاه فى مطبخها كفايه جدا لأمدادك بما يحتاجه جسمك من سعرات طول اليوم مع بذل مجهود كمان
لكن كترى من أكل الخضراوات الطازه كالطماطم و الخيار و الجزر و الكابوتشى و البصل و البقدونس و الجرجير خاصة البقدونس لأنه مفيد جدا و ياريت يكونوا متقطعين قطع كبيره يعنى مش سلاطه و عليها زيت و كمون و اٍحترسى من الكمون لأنه بيتفاعل مع المياه و بيكون كمية دهون تفسد أى ريجيم
الخضراوات الطازه مهمه جدا للى فى سنك لأنها بتدى فيتامينات لازمه لتكوين الخلايا و تجديدها و كمان بتدى نضاره للوجه و بتحسن من الشعر بس برضو يا ريت ما تزوديش فى العشا مهما كنتى سمباتيك خدى عندك مثلا البرنسيس شمس النهار بتتعشى تفاحه و بونبونايه :)
مش كباب و كفته و طرب و حاجات تودى فى أبو نكله :))

عاشقه وغلبانه يقول...

جعلوني مريض نفسي

بعد اذن استاذ عمرو
انت محتاج علشان توصل للوزن المثالي ياتزيد 20 كيلو ياتقصر 20 سم

اعتقد تقصر احسن
ههههههههههههههههههههههههه

بطل مشي شويه ياهشام

عمرو يقول...

جعلونى مريض نفسيا
كل جسم بيحرق سعرات حراريه بما يتناسب مع المجهود اللى بيقوم به
و خد بالك أن كل 1000 سعر حرارى بيتخزنوا فى الجسم بدون حرق بيدوا فى النهايه 1 كجم من الشحم و الدهون اللى بيبقى صعب بعد كده التخلص منه
بس أنت كده وزنك قليل على طولك الفارع ماشاء الله بس صدقنى كده أحسن
أحسن فى كل شىء طالما صحتك كويسه و بعدين مشيك الكتير هو اللى بيحرق سعراتك الحراريه مهما أكلت يعنى مافيش قلق من زيادة وزنك
لكن غيرك بياكل كتير و مش بيتحرك كتير فبيتخن و بيبقى مكسوف من شكله و ملابسه القديمه اللى مش قادر يشترى غيرها لصعوبة العثور على مقاسه بس يستاهل بصراحه :)

fashkool يقول...

السلام عليكم عمرو بك
تحياتى
بصراحه يا عمر بك لا كل اصحاب الاوزان الثقله ولا كل المسلوعين .. يعنى الوسط حلو
الحمد لله انا مسلوع ومهما كلت وزنى مثالى .. هبه من عند الله بقى
جدول الاكلات مجهود تستحق الشكر عليه لما بذلت فيه من مجهود .. ربنا يجازيك خير
تحياتى

mahasen saber يقول...

البوست رائع رائع رائع بس للتخين
لا بهزر ومفيد للرفيع فى جزئية السعرات الحراريه اصلها بايضه عندى باكل اى حاجه فى اى وقت بشكل عبيط
وده غلط طبعا

بس بوست مفيد اخر من بوستات عمرو الممتعه

عاشقه وغلبانه يقول...

اتعشي ايه يا استاذ عمرو
ده انا غلبانه وصاحبه التهاب مزمن في المعده
ههههههههههههههههههه

انا كبيري اكل مرهواحده في اليوم
مش بحب الكحك ولا السمنه ابسليوتلي
وباكل السلطه من غير زيت اصلا
مشكله حياتي هي الموالح
مدمنه
ومش بحب الكمون بس بحب الفلفل الاسمر
ههههههههههههه
بحب الطماطم والجزر والخيار بس مش باكل خضار مطبوخ للاسف يعني
بكره السمك
من الاخر هاتدور تلاقي اكلي بينحصر في كام صنف
الاكل اساسا مش من هوياتي
لو ماحدش فكرني اني ماكلتش مش هاكل

ههههههههههههههههههه

حاسوباتيه يقول...

مش عيب الفضايح دي انا بعترف اني كلبوظه وعملت ريجيمات وفشلت عموما الريجيم حلو بس انا الي مش حلوه لاني مش بمشي عليهم عموما شكرا لحضرتك جدا

Sweet Violet يقول...

الرجيم انا جربته الصراحه و كنت ماشيه بانتظام و كان نافع

لكن الحمدلله جت ظروف نزلت منها من غير رجيم فبطلته الصراحه D:

و لحد الان مارجعتش تانى بل بالعكس بنزل بشكل كويس لكن طبعا بضرر للصحه )):

بس على فكرة مش شرط يكون سبب السمنه هو الاكل .. فى ناس اعرفها الاكل عندها حسب التساهيل لكن بردو الوزن عندهم زايد بشكل مش معقول

امممم مش عارفه ده بقى يبقى سببه ايه

عموما اشكرك على البوست المفيد ده (:

عمرو يقول...

fashkool

و عليكم السلام و رحمة الله و بركات أستاذنا الفاضل
طبعا خير الأمور الوسط و لكن الوسط بتاعنا كثيرا ما يتعدى مرحلة المعقول ليدخل فى الزياده لأننا نتعامل مع كل الأشياء باٍفراط غير محسوب
و طبعا أنت عندك هبه تستحق الحمد و الشكر لأن المحافظه على الوزن بدون مجهود و لا ريجيم هبه فعلا ..
أشكرك يا عزيزى للمرور و التعليق و دمت بكل خير

عمرو يقول...

mhasen saber
أهلا بيكى و سهلا يا أم عبد الرحمن
أشكرك طبعا للاٍطراء و لكن بجد خدى بالك من مسألة نوعية الأكل و كميته لأنه لو مالوش دلوقتى أضرار ظاهره لكن فى المستقبل ستظهر له أضرار عديده
اٍحترسى يا محاسن :)

عمرو يقول...

mhasen saber
أهلا بيكى و سهلا يا أم عبد الرحمن
أشكرك طبعا للاٍطراء و لكن بجد خدى بالك من مسألة نوعية الأكل و كميته لأنه لو مالوش دلوقتى أضرار ظاهره لكن فى المستقبل ستظهر له أضرار عديده
اٍحترسى يا محاسن :)

عمرو يقول...

عاشقه و غلبانه
برضو الاٍمتناع عن الأكل المفيد يضر
يعنى فيه 3 وجبات لابد أن يأكلهم الاٍنسان و زى ما قالوا زمان أنه الأفضل يكون اٍفطار الأمير و غداء الوزير و عشاء الفقير
و الخضار المطبوخ كمان مهم جدا لو كان مسلوق أو مطهى بطريقه صحيه من غير تسبيك و حاجات رهيبه
شرائح السمك الفيليه المشوى من أفضل نوعيات الأسمام و كمان التونه المغسوله بالخل
السمك عموما غذاء جيد جدا
الاٍعتدال فى كل شىء مطلوب

عمرو يقول...

حاسوباتيه
الاٍعتراف بالحق فضيله
بس اٍحنا مش بنقول لازم ريجيم قاسى يزهق و يخنق لكن عاوزينه يبقى نمط ثابت فى أسلوب التغذيه طول الحياه
التقليل من الكميات و اٍختيار نوعيات لما تتركب على بعض ما تتفعلش و تعمل دهون
يعنى فيه ناس ملتزمين بالريجيم جدا و لكن برضو مش بيخسوا لأن نوعيات الطعام لا تتوافق مع بعضها و هنا يكمن السر
بصى كده فى الوجبات اللى حاططها فى البوست و حاولى تتبعيها بدون قسوه حتلاقيها جابت نتيجه جيده اٍن شاء الله

عمرو يقول...

Sweet violet
نتمنى لك الصحه دائما و لكن خدى بالك من النزول السريع للوزن علشان ماتحصلش مشاكل بعضها خطير زى مثلا سقوط الكليتين بسبب ذوبان الدهون من حولهما بسرعه مفرطه
سبب زيادة الوزن لبعض الناس اللى مش بياكلوا أكلات تتخن ربما ترجع لعوامل وراثيه و ربما ترجع لنوعية الأكل نفسه و تفاعله مع بعضه بشكل سىء و ممكن كمان قلة الحركه و عدم حرق سعرات كافيه
يعنى فيه أسباب كتير لده و لكنى مقتنع تماما بأن ما يدخل الفم هو المسئول الأول عن زيادة الوزن

خمسة فضفضة يقول...

السلام عليكم ورحمة الله وبركاته

لا بقي يا استاذ عمرو دا انت كاتب البوست ده مخصوص عشان تعقدني

انا طول عمري عايشه علي رجيم مستمر مش ممكن بقي افتح كمان المدونات الاقي نظام رجيم

تعرف احسن نظام جربته ( ما انا خبره بقي هههههه) هو النظام الكيماوي اللي تاكل فيه بعض الاكلات مع بعض فاتحرق بعض او بمعني تاني تمنع ان الجسم يستفيد من السعرات اللي فيها مش عارفه ازاي بالظبط بس النظام ده فظييييييييييع بيخلي الواحد ياكل بكميات اكبر شويه عن اي نظام تاني وبيخس بسرعه اكبر ، و طبعا وماننساش الرياضه دي اساسي و بتخلي الوزن ينزل بسرعه اكتر من الرجيم لوحده
عارف النظام ده مع رياضه 3 ايام في الاسبوع في ذات مره من المرات خلوني نزلت 26 كيلو في شهر ونص وفضلت ثابته علي الوزن الجديد فتره طويله حوالي 7 سنين وبعدين رجعت ازيد واعمل رجيم واخس وازيد وزيد واخس واخس وزيد .........وراك حاجه ولا مستعجل هههههههه

لحد ما ايقنت ان وما الدنيا الا نظام رجيم كبير

فحرام بقي ما حدش يكلمني تاني علي انظمة الرجيم اللي قربت اخد فيها دكتوراه

سلام

من غير عنـــوان يقول...

معلومات قيمة جدا

والحفاظ على الصحة أمر ضروري

والإتجاه للأكل الصحي شي مفيد

أمنياتي

عمرو يقول...

خمسة فضفضة
و عليكم السلام و رحمة الله و بركاته
الريجيم الكيميائى ده يا دكتوره فعلا من أفضل الطرق لاٍنقاص الوزن و فى نفس الوقت من أخطرها لأن النزول السريع فى الوزن بينتج عنه مشاكل صحيه لا حصر لها من أهمها سقوط الكليتين و تشوه جلد الجسم بعلامات كالشروط الكويله البيضاء بعضها عميق كما فى منطقة البطن و الذراعين
المفروض أن يكون الريجيم الكيميائى الغرض منه تركيب نوعيات من الطعام لا تتفاعل مع بعضها و تخلق دهون لا أن تتفاعل مع بعضها و تحرق الدهون
و غالبا بيرجع تانى الوزن يزيد أكتر من الأول زى مثلا ما حصل ما ديميس روسوس اللى فقد حوالى 100 كيلو من وزنه و بعدين رجع أكتسب 125 كيلو فى زمن قياسى
كل شىء بالعقل كويس و بالصبر كل الأمور تمشى كويس بدون اٍستعجال .. صدقينى :)

عمرو يقول...

من غير عنوان
أهلا بك يا صديقنا الحكيم
الطعام الصحى فى رأيى من أكثر الأشياء حكمه اللى ممكن يقوم بها الاٍنسان
و العقل السليم فى الجسم السليم و دى فعلا مقوله صحيحه مائه فى المائه
نورت و شرفت و تقبل خالص تقديرى