~SUN~ Pictures, Images and Photos

السبت، 17 يناير 2009

The others

مساء الخير أعزائى المدونات و المدونون .. فيه مشهد رهيب فى الفيلم بتاع البت نيكول كيدمان اللى اٍسمه The others أو الآخرون ..
المشهد ده بجد كل ما بأشوفه بأترعب من مغزاه العميق و من أداء البت نيكول (مش عارف الواد توم كروز الأهطل يطلق اٍزاى البونبونايه دى ؟؟!!) و من براعة المخرج و المصور و يعنى بصراحه مشهد لا يمكن يتنسى ..
المشهد اللى بأحكى لكم عنه بيعبر عن الفزع و الجنون اللى أصاب نيكول لما أكتشفت فى لحظه معينه قرب نهاية الفيلم أن هى و عيالها اللى أشباح و أن الآخرين اللى كانوا فاكرينهم أشباح و مطلعين على جتتها هى و عيلينها البلا الأزرق هم اللى بشر !!
أزعم أن فكرة الفيلم الرئيسيه بتناقش موضوع خطير و مهم و حيوى و بيفتح باب الحوار على مصراعيه لقضيه طال الجدل فيها و تشعب ألا و هى فكرة التعايش مع الآخر و اٍحترام أفكاره و تقاليده و خصوصياته .. و ده بيخلينى أسأل سؤال كان دايما بيلح على بالى و هو ليه مش بنقدر نحترم الآخر ؟؟
نحترمه زى ما هو كده يعنى الباكيدج كله على بعضه حتى لو كنا مختلفين معاه فى الرأى أو فى العقيده و مش شرط هنا تكون العقيده تخص الدين لكن ممكن تكون العقيده الفكريه أو السياسيه أو حتى الكرويه ..
مثلا ..
ليه بنتعمد جرح الآخر لو اٍختلفنا معاه فى رأى ما بأننا نسخر منه و نسفه أفكاره و ده أنا شايفه اٍستسهال لأن اللى يقدر يناقش بطريقه عقلانيه لا يمكن يلجأ للسخريه اللى هى أسهل الطرق لفرض الرأى المخالف .. و بالمناسبه ده بأشوفه كتير بين المدونين و دى حاجه مش لطيفه أبدا لأن اٍرهاب الآخر عن طريق السخريه منه بيبتعد بالحوار عن الموضوعيه و بيوجهه جهه أخرى تماما ..
و نقدر نقيس بقى على كده و النتيجه أن العالم أمتلىء بالمشاحنات و الحروب و البغضاء حتى تحول لحاجه ملتهبه لا أمان فيها و لا خير و ده فى رأيى المتواضع مرجعه لعدم اٍحترام الآخر و ربما اٍستهيافه و اٍحتقاره ..
ليه مش بنعرف نناقش بهدوء ؟؟ ليه غالبا مناقشاتنا بتنتهى بالعباره المشهوره : آدى 4 حيطان أخبط راسك فى اللى يعجبك !! أو : اللى مش عاجبه يشرب من البحر !!
حيطان أيه و بحر أيه ؟؟ مين اللى قال كده ؟
القرآن الكريم جل من أنزله و علا سبحانه عما يصفون الموجود قبل الوجود الناصر لعبده المظلوم و الذى أقسم بعزته و جلاله لينصرنه و لو بعد حين الله الواحد القدير المقتدر الذى أخرجنى برحمته من الظلمات اٍلى النور بفضله و أرانى من عجائب قدرته سبحانه ما لا طاقة لى بذكره عظمت صفاته و تقدست أسماؤه لا اٍله اٍلا هو الحى القيوم اللهم يا مفرج الكروب فرج كرب عبادك و أجعل لهم مخرجا بقدرتك و حكمتك يا أرحم من سأل و أجمعنا بمن نحب يا رب فى واسع جناتك كما وعدتنا قولك سبحانك الحق و لك الملك و حسبى الله و نعم الوكيل حسبى الله و نعم الوكيل حسبى الله و نعم الوكيل
أعذرونى يا جماعه شردت لكن مش حأقدر أحذف مناجاتى لله لعله خير اٍن شاء الله ..
كنت بأقول اٍن القرآن الكريم وجهنا وجهه صحيحه لا ريب فيها لكيفية مناقشة من نختلف معهم فكريا بل و عقائديا (( و جادلهم بالتى هى أحسن)) خدوا بالكم يا أخوانا من كلمة أحسن .. يعنى بأفضل الطرق الممكنه للنقاش و التحاور مش بالتريقه و العنف و الاٍرهاب الفكرى لأن ده ليس حتى من شيم الاٍنسان فما بالكم أنه يكون من شيم المؤمن ؟؟
يا جماعه يا ريت نرحم الآخرين شويه .. و نبتعد عما يؤدى لكسر روح الموده فى النفوس لأن روح الموده هى مصدر الطاقه الروحيه اللى بتخلينا نتحمل مصاعب الحياه و سخافاتها علشان ما نوصلش للحظه زى اللى مرت بيها البت نيكول كيدمان لما أكتشفت أن هى اللى عفريته و أن العفاريت هم البشر !!
بس هى بجد عفريته يجعل كلامنا خفيف عليها :)

هناك 26 تعليقًا:

mahasen saber يقول...

لا دى عفريته حلوه

الموضوع اليى حضرتك بتطرحه مهم جدا واتعمل فيه افلام طبعا زى الاخر وحتى كان فيه فيلم لباتشينو وممثل بحبه قوى بس نسيت اسمه هو شبه فيل كولينز كده وانتونى هوبكنز يعنى نفس الشكل والهيئه كده المهم الفيلم برضه كانم بيتكلم عن كيفية التعايش مع الاخر والاخر اليى هو اجنبى زيهم كمان مش اخر غريب عنهم يعنى

انا خرجت بره الحوار ولاا ايه
المهم الموضوع طبعا مهم واكيد حد فينا اتعرض كتير ان حد يسفه كلامه وياخده بمحمل مش محترم فبتالى بينتهى الحوار انه يقولك اخبط دماغك فى الحيط او اشرب من البحر حتى ولو مش قالها بلسانه
وحتى لو انا مش مصدعه ولاا عطشانه عشان اشرب من البحر

mahasen saber يقول...

بس المناجاه جميله وانا طبعا حسيت بيها قوى

بس حاسه فيها بحرقة ظلم خير
يا رب متكنش حضرتك متعرض لاى شئ مؤذى او مستفذ او ظلم ما

وبعدين توم كروز طلقها عشان اهطل فعلا بس اتجوزت سيد سيده ههههههههه مطرب كنترى

صبرني يارب يقول...

استاذنا

ده حلم حياتي ان الناس ت حترم بعضها وترحم بعضها

اموت واشوف الحوارات محترمه واختلافات الراي كده منعشه ولطيفه ومثريه مش خناقات وبس

واشوف الناس مؤدبين عشان الناس النضيفه مااااااتوا زي ما قلتلك هههههههههههه

ومناجاتك حلوه اوي سارحه جميله بصراحه قويه بس قلقاني

تحياتي لك يااستاذنا وربنا يكرمك

ويلا بقى شوف الجزء التالث وقولي رايك

عاشقه وغلبانه يقول...

بعيدا عن القمر اللي في الفيلم ... هي دي الستات ولا بلاش هههههه
ومش هاتكلم طبعا في جزء مناجاتك لربنا اللي هيا من احلي اللي اتكتب في البوست
بس هاتكلم علي ( ثقافه الاخر )
حاجه كده رتب عليها كل مشاكلنا وكل همومنا وكل اللي احنا فيه
لا حد بيحترم الاخر
ولا حد بيخاف علي الاخر
ولا بيحب يريحه ولو بكلمه طيبه
ثقافه اني بس اللي في الدنيا وانا ومن بعدي الطوفان غلط
نظريه اني صح علي طول الخط غلط
نظريه اني مافكرش في غيري ده قبل مافكر في روحي برضو غلط
اهمهم علي الاطلاق هي التسفيه او التقليل من شأن الاخر في اي حاجه
في رأيه في قراره في اسلوب حياته
كل ده بيخلق علاقات غلط × غلط بين الناس
كل ده وصلنا لمرحله ان الواحد مش حاسس بالناس
بالعكس مش شايف غير روحه في الدنيا
ليه غيري مايحترمش رأي زي مابحترم رأيه
ليه غيري مايسامحنيش في اول غلطه زي مانا ياما سامحته في غلطاته
ليه غيري بقي بيفكر ياخد وبس
ليه غيري مابقاش شايف غير روحه
ليه غيري مابقاش حتي عايز يحس بيا ولا عايز يحس ان ببعض تصرفاته بقي بيجرحني ويضرني حتي لو هو استفاد من وجهه نظره
انا يمكن كلامي مش مرتبط اوي بالموضوع
بس كلها حلقه مفرغه بندور فيها كلنا
الشاطر من وجهه نظره بيضحك ويستغل الغبي من وجهه نظره برضو
والكبير بيظلم الصغير ومش عايز يسمعه علي اعتبار انه صغير ومش بيقدر يفكر
ولا قادر ياخد قرار
هي ثقافه بنفتقدها زي ثقافات كتير
احنا بقينا عايشين في عالم اقسم بالله من وجهه نظري الصغيره جدا بقي اشبهه بالغابه
ماتستغربش لو قولتلك اني مش حاسه بالامان في الدنيا
اي حد بيتجيله فرصه يضرك او يجرحك في سبيل انه يستفاد مابقاش يتردد لحظه


انا خرجت كتير عن الموضوع بس يلا استحملني

تحياتي ليك

شمس النهار يقول...

ياسيدي وانت زعلان ليه مش يمكن مش مريحاه
همه كده الرجاله بياخدوا بالمظهر
المهم نسيبنا من البونبونايه ونشوف الاخر
ده بيكون عيب في التربيه اصلا
الطفل بيطلع شايف اب وام مش عارفين يتفهموا مع بعض اصلا
وام مش عارفه تتفاهم مع اولادها والا تحترم افكرهم والا حتي بتقيم معاهم حوار
وفي المدرسه نفس القصه
لا المدرس بيسمع لتلميذ والا حتي بيناقشه
واذا تلميذ تجاسر وناقش مدرس يوبخه ويستقصده ويعتبره تطاول عليه وفي روايه اخري بيتنطط علي المدرس وبيستعرض عضلاته
والان في قدوه غريبه جدا حوارات الديوك علي الفضائيات
احلا معلم لفوضي الحوار ولعدم احترام الرأي الاخر
ده غير ان اصلا الذيعين والمذيعات مدربين علي الاستفزاز عشان الحوار يسخن والزعيق يعلا
بعد ده كله نقول لازم نسمع لبعض
لازم نتعلم نسمع ولما نسمع هنفهم ولما نفهم هنتحاور صح ونطلع بنتيجه حلوه
ده غير اللغه السائده اليومين دول في التدوين ماحدش عاجبه اللي الاخر بيكتبه ومش كده وبس ده كمان بيسفهه
طيب لو كلنا دونا بنفس المنطق والفكر
فين الاختلاف اللي بيعلم
انا طولت عليك بس انت جيت علي الجرح
بصراحه تسلم ايدك بوست جميل وموضوع هام جدا
وكمان مناجاتك لربك جميله جميله
ربنا يتقبلها منك
وتقر عينك بنصرته لك

حاسوباتيه يقول...

طبعا لازم نحترم الراي التاني ونسمعه يمكن يكون راينا احنا الي غلط ليه لا
تحياتي لحضرتك

Unknown يقول...

السلام عليكم ورحمة
الله تعالى وبركاته
وكمان صباح الفل
عارف ليه ياأستاذعمرو
لاننا ما تعودنا على الحوار
من الاساس من الصغر من المبدأ
كتير اوى ساعات بجد صعوبة شديدة بين التوفيق بين الاحترام والقهر أو الراى الواحد فى الاسرة بمعنى انا بحترم ابويا مثلا وبالتالى من صغرى مش بقدر اقوله لا ده غلط وده صح وكمان هو شايف انه صح على طول طيب ازاى وامتى حتعود اتناقش كذلك فى المدرسة وفى الاصدقاء
وامتى حتقبل الرأى الاخر !!

أحــوال الهـوي يقول...

عمرو

لديك ذاكرة قويه توثق الاحداث
نعم اقر بانني نسيت هذه الفعلة الشنعاء من الصهاينه بالقاء اللعب المفخخه و الغرض واضح
قتل الاطفال
علي الرغم من معاصرتي انا ايضا لهذا الحدث فاني نسيته و اعتذر للجميع و اشكرك علي ذكر برهان و حقيقة اخري تدعم ما كتبت

دمت صديقا دائما تقوم قلمي و تكمل نواقصي

تحياتي

أحــوال الهـوي يقول...

فن الاختلاف
موضوع في غاية الاهميه و طرحه في هذا الوقت عبقرية منك
لاننا تركنا اساس المشكله و تجادلنا في شئ اخر
تركنا المذابح و اجتررنا خلافتنا كأولويه يسعي الكبار للمزايده علي بعض و محاولة الزعامة علي حساب الدماء المنهمرة

احيي فيك الرؤية الواسعه للامور

تحياتي

بنت الغربة يقول...

هو الفيلم رائع جدا
وانا شوفته كتيير قوى
بس موضوعك ده شائك شويتين..
يعنى لو الى قدامك اتناقش معاك بأسلوب السخريه
او بأسلوب انك مثلا مش فاهم حاجه فى الموضوع..
او انك لسه بدرى عليك علشان تفهم اى حاجه..
تفتكر طريقة الحوار تبقى معاه ازاى؟؟
ده يستاهل اصلا انك تتحاور معاه من الأساس؟؟؟؟؟
دلوقتى مفيش حد بيتقبل اى نقد من التانى....
دى حقيقه ..ولو التانى كان رأيه صح وهو غلط ...لازم ينهى الموضوع زى مانت قلت
اشرب من البحر
اضرب دماغك فى الحيط
ده اللى عندى
اى حاجه يسكتك بيها
بس مايقولش ابدا بتاتا البته خااالص
ان رأيك احتمال يكون صح..
كله عند ربنا..
تحياتى

Unknown يقول...

السلام عليكم يا استاذ
موضوع التدوينة مش هيتحل ابدا
مفيش حاجة اسمها حوار حضارات
مفيش حاجة اسمها حوار اديان
ازاى هيحصل حوار حضارات
و اصحاب كل حضارة بيقولوا ان لولا حضارتهم ما كان هذا التطور فى تاريخ البشرية
ازاى حوار اديان و الاديان اللى ربنا نزلها مضمونها واحد الناس غيرت مضمونها
و اليهودية بقت حاجة تانية غير اللى ربنا نزلها و المسيحية بقت حاجة تانية غير اللى ربنا نزلها و المسلمين بقى اسم بس بلا اى مضمون لدين الاسلامى
انا احترم راى الاخر لو مبنى على اسس صحيحة لكن مينفعش احترم راى مش محترم اصلا تيجى ازاى دى؟
انا عملت تدوينة عن عادل امام
بمناسبة تصريحه الفظيع اللى كنت انا شخصية متبنى رأيه ده من كام يوم
بس ازاى واحد المفروض انه مشهور والمفروض انه زى ما بيقولوا عليه زعيم
يصرح برأى انا تبنيته لما ابتديت افكر
يعنى مش بعد تفكير عميق
استغربت اوى
و استغربت اكتر لما لقيته بيردد كلام مبارك ليس الا ملقتش فى كلامه راى لواحد فكر علشان كدة اعتبرت ده ظلم كبير اوى انك تصرح برأى للرأى العام من غير متفكر فى الرأى ده لمجرد ان النظام متبنى الرأى ده
و غير كدة انا مش شايف ان عادل امام ده قيمة علشان يتعمل لرأيه الضجة دى
هو ده اللى انا بستنكره..
اذا كان ده رأيه ميخوتناش بقى فى كل محطة و يقول انا عميل لمصر وهو فى الحقيقة عميل لنظام مش اكتر
دى وجهة نظرى فى موضوع تدونتك
و هو ان مش كل رأى يحترم
و مش كل رأي يهاجم
و احب اعرف وجهة نظرك فى كلامى و كمان فى التدوينة لأنى الحمدلله من اصحاب العقول المتفتحة اللى مش بتتعصب لرأيها لو ثبت لها ان الرأى ده غلط
و مش عيب ان الواحد يغير رأيه بس العيب انه يفضل متبنى رأى ثبت ليه بشوية تفكير انه غلط
لك كل التحية

princess يقول...

البت نيكول والواد توم هههههه
احتلاام الغير دى ثقافة منعدمة فى البلاد العربية كلها مش عارفة ليه....

عمرو يقول...

محاسن صابر
لأ هى مش حلوه خالص و مش عاوزين حد يزعل مننا بقى :)
لأ ما خرجتيش بره الموضوع أبدا بس هو فعلا أنا ماقلتش أن فقد ثقافة اٍحترام الآخر مقصوره فقط على المصريين أو على شعوب دول العالم الثالث فقط لكن الحقيقه أن غفدان هذه الثقافه أصبح شىء عام بيسود كل المجتمعات و أبسط مثال على كده حديقة هايد بارك فى اٍنجلترا و ما يحدث بها من مهازل بين المختلفين و الرأى ..
المناجاه و الله يا أم عبد الرحمن طلعت منى كده من غير ما أشعر و كأنى كنت بأكلم نفسى و هى فعلا طالعه بحرقه من قلبى و الله
تعودت يا محاسن على التسامح و ده اللى تاعبنى .. ربنا يصبر الجميع يا رب

عمرو يقول...

صبرنى يا رب
ما هو ده اللى وصلنا لكده .. أقصد عدم اٍحترام الآخر و لا اٍحترام مشاعره و لا أفكاره
بس الناس المحترمين موجودين و الله بس اللى مش كويسين أكتر و مغطيين عليهم عملا بمبدأ أن العمله الرديئه بتطرد العمله الجيده
ما تقلقيش عليا يا أم خالد أهو كله بيعدى و لا بيطلع فى الغسيل على رأى اللى قالوا :)
روايتك عجبانى و متابعها بشغف ربما من باب الفضول لأنى متلهف أعرف نهايتها حتكون اٍزاى
يالا بقى أدخلى على الجزء الرابع

عمرو يقول...

عاشقه و غلبانه
مين دول الستات دول ؟؟ دى نيكول كيدمان وحشه و ما أرضاش أشرب من أيدها كوباية ميه حتى و تلاقيها ما بتعرفش تطبخ :)
دايما أقول للى بيغلط طول ما أنت مقتنع تماما أنك صح على طول الخط يبقى حتفضل تغلط على طول الخط .. طول ما أنت مش مقتنع برأى الآخر يبقى عمر عقلك ده ما حيتطور و لا ينضف
المشكله يا عاشقه أن الفرد مننا لا يرى فى نفسه سوى الاٍنسان الكامل المكتمل و الكمال لله وحده لا شريك له لكن طغيان الاٍنسان و غروره صور له أنه تمتع بالكمال
كل الكلام اللى قلتيه موافق عليه و أبصم بالعشره و أحب أزيد بعد اِذنك أن الموضوع كمان لا دخل له لا بمستوى ثقافى و لا اٍجتماعى و لا تعليمى و لكن المشكله بتنبع من داخلنا نحن

عمرو يقول...

شمس النهار
يا برنسيس أنا مش بأحب البونبونى خالص أبدا بالمره :)
بس لعلمك أنا مش من الرجاله اللى بياخدوا بالمظاهر لكن بيهمنى الجوهر أكتر بكتير
هو بقى موضوع نسمع لبعض هو ده لب الحكايه
اٍزاى نتعلم نسمع لبعض ؟ بس بشرط نسمع بقلب و عقل مفتوحين مش نسمع بودن من طين و ودن من عجين
شرفتى المدونه يا سمو البرنسيس :)

عمرو يقول...

حاسوباتيه
أكيد هو ده المفترض لمن يملك عقلا لكن ليس لمن يملك ربع كيلو لانشون عوشا عن عقله
شرفتى و نورتى :)

عمرو يقول...

norahaty
أهلا يا دكتوره
أوجزتى فأنجزتى و الله
أفتكر و أنا صغير كان والدى الله يرحمه يستدعينى لغرفته لمناقشتى فى أمر ما و بمجرد ما أفتح بقى و لسه بأقول : الحقيقه يا بابا ... ألاقيه مقاطعنى و مزعق بعلو صوته و قايل : و كمان بتبجح فيا يا ولد ؟؟!!
عندك حق يا دكتوره هى الحكايه فعلا بتبدأ من الصغر
لازم نعلم ولادنا يتكلموا و نحترم كلامهم علشان هم كمان يحترموا كلام و آراء الآخرين
نورتى يا دكتوره و متشكر ليكى

عمرو يقول...

أحوال هوى
صديقى العزيز العرب قالوا الاٍختلاف لا يفسد للود قضيه و لكن للأسف صار الاٍختلاف الآن مش بس بيفسد القضيه ده بيخلف ضحايا لا ذنب لهم غير أن كبرائهم أختلفوا فى الرأى مع كبراء الآخرين
هى فعلا ثقافة و فن الاٍختلاف من النقاط الهامه اللى لابد من الاٍلتفات لها و دى اٍضافه محموده منك تشكر عليها لا فوض فوك
تحياتى و لك كل التقدير

عمرو يقول...

بنت الغربة
لا اللى زى ده ما يستحقش الواحد يضيع وقته معاه فى حوار لا جدوى من وراءه لأنه جاهل و ربنا سبحانه و تعالى قال : ((و أعرض عن الجاهلين))
فيه ناس أصلا ماعندهاش اٍستعداد أنها تعلم و فرحانه بنفسها و بجهلها و مصره أن يبقى الوضع الفكرى تبعهم على ما هو عليه رغم أن العقل الاٍنسانى لا محدود و له خاصية التعلم و الاٍستفاده اٍلى ما لا نهايه
يبقى خلاص البعد عنهم غنيمه
مش يأس لكن واقعيه مفرطه و عن تجربه

عمرو يقول...

Ego
كلامك صح يا صديقى
و لكن ..
مش مطلوب مننا أن نحترم و نقدس الآراء الخطأ من وجهة نظرنا و لكن على الأقل علينا أن لا نسخر من أصحابها و نسفهها لأن هذه الآراء بلا شك لم تخرج من فراغ أو عدم و لكن خرجت نتاجا لتجارب و ثقافات مر بها أصحابها
و الله اٍحنا بنناقش أصحاب الفكر المخالف أو الآخر كما يحلو لى أن أسميهم و لكن لو وصل النقاش لحد الطريق المسدود فخلاص لكم دينكم و لى دينى و لا تنسى يا عزيزى أن الله ترك حرية الاٍختيار مكفوله حتى للكافر أن يكفر به و العياذ بالله
و لكنه سبحانه ترك الكافرين به يمشون على الأرض و رزقهم نعما كثيره من حيث لا يعلمون
طيب ده مش يعلمنا درس اٍلهى فى التعامل مع المخالفين أو الآخرين ؟؟
على العموم أحترم رأيك فى النهايه حتى لو اٍختلفت معك فى بعضه :)
تحياتى و شكرا للزياره و التعليق

عمرو يقول...

princess
تقصدى : اٍحترام
عدم اٍحترام فكر الآخر ليس مقصور فقط يا عزيزتى على البلاد العربيه و لكن تظهر فقط بشكل أوضح و أعنف لدى ثقافاتنا و لكنها فى النهايه موجوده عند كل البشر و دى حقيقه لا جدال فيها
أشكرك لزيارتك و لتعليقك :)

dalia يقول...

هذا الفيلم من أجمل الافلام الاجنبية حقيقي عمرى ما بزهق منه شوفته أربع مرات وعندى استعداد انى اشوفه تاني ، انت خت باللك من جزئية محورية في الفيلم وهى ان الواحد ممكن يوصل لاقصى لحظات الجنون لاقصاء الاخر لكي يوهم نفسه انه هو فقط على صواب حتى لو كان هو المخطئ
حلو جدا انك تهتم بهذه الجزئية وتهتم بيها وتلفت نظرنا ليها
بس انت عارف انا مش بيعجبني في الفيلم ده هو عدم ايمان الاطفال وأمهم في النهاية اللى هي نيكول كيدمان بالعالم الاخر يعنى شعرت ان في عدم ايمان بالجنة والنار وتشكيك غريب فيه رغم ان الفيلم كله وضح فيه ان الام متدينة مسيحية وتحرص على تعليم اولادها الكتاب المقدس

فاروق عادل يقول...

ازيك يا استاذ عمرو واحشنى جدا والله انا قولت اعدى اسلم

وفيلم ازورس دة انا نفسةى اتفرج علية بس عمر ماجت الفرصة

صبرني يارب يقول...

استاذنا

وبعدين معاك

بتغيب علينا انا هاجيب شمس ونيجى ننقض عليكم فى البيت نشوف ايه الحكايه

Kiara يقول...

بصراحه بوست في الجووووووووووون

مناجاتك هزتني اوي ربنا يتقبل ان شاء الله

اما بالنسبه للاخر

كل واحد بيكون مقتنع برايه ومش عنده اي استعداد لفهم وجهه نظر الراي الاخر وطول مافي كدا يبقي هنفضل مستوانا الفكري ينزل اكتر من كدا وبعدها هتبقي الحروب اللي مش بتوصل لاي نتيجه