الاثنين، 5 يناير، 2009

وطن الدبابير ..


ألف مبروك يا جماعه ألف مبروك ..

مش عارف الحقيقه أهنى نفسى و لا أهنيكم و لا أهنى القدر و الظروف اللى أوجدتنا على أرض هذا الوطن المعجزه ( آى و الله معجزه )
أزف اٍليكم يا شباب النيل بشرى متهيألى كده أنها جات فى وقتها مظبوط وسط خضم الأحداث الدمويه اللى بتمر بيها منطقتنا فقد أعلنوا أسوان مدينه خاليه من ختان الاٍناث !!!!! هييييييييه
أحمدك يا رب و أشكر فضلك ..
و كمان زياده فى العبثيه أقيم بالأمس مهرجان جامد أوى أوى فى قرية بلانه تحت شعار : اٍيديكم كلكم فى - لامؤاخذه - أيدنا مش عارف أيه بناتنا و أهالينا ... حاجه كده يعنى ..
ده غير بقى وثيقة مش عارف أيه فى أيه .. و اٍعلان مش عارف مين بتاع مين و حاجات كده من اللى تخض و توقف ال .. تفكير !!
طيب يا جماعه مش كان واجب برضو نأجل شويه مهرجان الدبابير ده اٍحتراما يعنى لمشاعر الخلق اللى بيدفنوا عيالهم و بناتهم فى مقابر جماعيه لأن المقابر عندهم أتملت لتمة عينها و مش عارفين يدفنوا موتاهم فين ؟؟
و مش كان من أصول الجدعنه يعنى أننا نوجه الوثيقه الناريه دى لنصرتهم و نعمل المهرجان المهول ده اللى معمول بفلوس ضرايبنا على شكل معونات لأخواننا اللى مش لاقيين حتى اللقمه ياكلوها و لا علبة دوا يعالجوا بيها جرحاهم ؟؟
يا أخواننا عيب تختاروا التوقيت المهبب ده للاٍحتفال بالدبابير .. دبور لما يقرص ننى عينكم من جوه يا معدومين الذوق و الرحمه ..

هناك 14 تعليقًا:

صبرني يارب يقول...

ايه يا عمرو انت عليك حاجااااااات

الفرح فرحنا والميت ميتنا ياعم


تمثليات تمثليااااااااااااااااااات حاجه بقت تقرررررررررف

اهم بيقلبوا عيشهم يا عمرو بلاش ياكلوا عيش على قفانا ؟؟؟


الصبر من عنده

norahaty يقول...

السلام عليكم ورحمة
الله تعالى وبركاته
ماهى دى اساسا ياأستاذ عمرو
قله الدم وعدم المرؤوة وعدم الفهم
اللى خلتهم عايزين يستضيفوا دورة الالمبياد مش عارفة ولا المنديال واتنهب فيها المليون جنية وجت اللجنة ادتنا(صفر)مع الفخر يبقى يراعوا شعور تانى ناس فى تانى بلد وهم مش مراعيين شعور اهل بلدهم اساسا!!!!!!!!.

عاشقه وغلبانه يقول...

دبور ازاي ولا مؤاخذه يعني
ياعم هو انا ناقصه
انا حاسه اني هاتشل يا هاطق اموت
بقالي اسبوعين بدور علي حاجه عدله علي الاقل ماتزعلش مش لاقيه
استغفر الله

الازهرى يقول...

هو مين دا اللى بيدفن فى مقابر جماعية ؟

هو يا جماعة فى حرب ومحدش قال والا ايه ؟
انا امبارح طول النهار فى البيت واخواتى الصغيرين طوا النهار بيسمعوا افلام وبعدها فضلت الناس تتخانق تعليقا على المباراة بين فريق أ وفريق ب انا مش عارفهم اساسا لانىمش بحب الكورة
المهم الحياة حلوة جدا
ايه بقى مواضيع النكد دى
اكيد بتتكلم عن منطقة تانية
مش كده ؟

انتظر رأيك فى الفارس الاخير

عاقلة علي ارض الجنون يقول...

احنا فلوسنا رايحه ف الهلس ده دايما ..

EmY يقول...

معلش يا عمرو اسمحلي اختلف معاك تاني مره

الحياه لازم تستمر و من حقنا الاحتفال باسوان لخلوها من الختان

انا مش عارفه انت معترض علي ايه الاحتفال ولا توقيته ولا ايه

احنا طبعا قلوبنا مع غزه بس هل عدم الاعلان عن ده هايفيدهم في حاجه اكيد لاء

الوضع محتاج تحرك عربي شامل

تحياتي

صبرني يارب يقول...

عمرو ممكن ارد على ايمى انا ؟؟

موافق صح ؟ زي مدونتي وزياده هههههههههههههه

ايمى

مش ده اعتراضنا يا بنتى ان الحياه ما تستمرش ابدا انا ضد ده

انما هو اساسا مشهد مستفز لشعب جعان مقهور مش عارف يجير جاره المستجير من الرمضاء بالنار

وعاملين يعملوا احتفالات مالهاش اي لازمه وكلها تمثليات يا بنتى والله ليس اكثر
وهي دي المشكله

والحفلات دي كلها بتتعمل بفلوسنا عشان ناس تسترزق من وراها وناس تانيين يتصوروا

فعشان خاطري بلاش تقولي نحتفل باسوان

بلا خيبه

عمرو يقول...

صبرنى يا رب
يا ستى مافيش مانع يقلبوا عيشهم و كل حاجه يعنى عادى ما هم كده كده بياكلوا عيش على قفانا بس ماحصلتش كمان ياكلوا عيش على الحاجات دى اللى الواحد و الله مستحى و هو بيتكلم عنها
و بعدين التوقيت غلط غلط غلط

عمرو يقول...

norahaty
و عليكم السلام و رحمة الله و بركاته
أعتقد أن اللى أتنهب أكتر من مليون جنيه فقط كما ذكرتى .. أعتقد أنه أكتر من كده بكتييييييير
فى الموقف ده أفتكرت العباره اللى بيكتبوها السواقين على تاكسياتهم : الاٍحساس نعمه !!
بجد و الله يا دكتوره الاٍحساس نعمه و ربنا مش بيديها لأى حد

عمرو يقول...

عاشقه و غليانه
بعد الشر عنك يا عاشقه بس أنتى كل ده و لسه ما تقطيش ؟؟
أنا عن نفسى خلااااص طقيت من زماان
أيوه و الله اٍستغفار الله العظيم كويس و بيبرد القلب
ربنا معانا و معاكى و مع الجميع يا رب

عمرو يقول...

الأزهرى
اٍزيك يا صديقى العزيز ؟
أيوه يا سيدى على قولك و الله و لا كأن فيه حرب على حدودنا و لا حاجه خااااالص
الناس مش عارف بقت ليه جبلات كده ؟؟ و على فكره ده مؤشر خطير جدا جدا فى رأيى لأن حيكون له تبعاته فيما بعد .. و فيما بعد دى قريبه أوى ..

عمرو يقول...

عاقلة على أرض الجنون
فلوسنا ؟؟!!
هى فين فلوسنا دى ؟؟
أنا مش شايف فلوسنا بصراحه
أنا شايف عرقنا بيروح جيوبهم بمنتهى الرضا و سماحة النفس مننا مش عارف ليه ؟؟
ألا صحيح هى فلوس ليه بتضيع على الهلس ؟؟
بس الحركه دى بصراحه فاقت كل التصورات و العبثيات التانيه
دبابير ؟؟ و دلوقتى ؟؟!!

عمرو يقول...

EmY
صباح الخير يا اٍيمى اٍزيك ؟
يا ستى منع الختان للبنات على عينى و على راسى من فوق أنا مش بأعترض بالعكس دى حاجه كويسه أوى
بس توقيت الاٍحتفال مش صح يا اٍيمى
مش صح أبدا
ده بيعبر عن لامبالتنا و اٍستهتارنا بالحدث الضخم المفزع اللى شئنا أم أبينا بيمسنا من قريب أو بعيد
على أى حال أنا بأحييكى و بأشكرك على مشاركتك و رأيك
تقبلى تحياتى

عمرو يقول...

صبرنى يا رب
أتفضلى يا افندم مدونتك طبعا و زياده :)
موضوع سيدنا عمر أبن الخطاب على الرؤيه عندك جميل أوى أوى
شفتى كان بيعامل أبنه اٍزاى ؟؟
لو شاف أيامنا الهباب دى مش عارف كان حيحصل أيه رضى الله عنه و أرضاه