الخميس، 1 يناير، 2009

تاج من عند طالب ثانوى ..

أولا يا صديقى فاروق بأشكرك على هذا التاج و بأعتذر لك عن التاج اللى فات بتاع القراءه لأنى و الله ما آخدتش بالى أنك بتهديهولى .. فمعلش عندى أنا القهوه دى .. خلينا بقى فى التاج ده و عفا الله عما سلف ..
لو كان ينفع تختار عصر تعيش فيه هيبقى انهى؟ ومين الحاكم؟
- أختار أعيش فى عصر أحمس طارد الهكسوس و هازمهم و مفرق شملهم .. البطل المصرى سليل الملوك و اللى فى نفس الوقت خرج من صفوف الشعب لينهى بقيادته و بروحه المصريه الوطنيه قرون من حكم الهكسوس الظالم الغاشم .. بالمناسبه و دى معلومه قد تبدو غريبه أن لسه فيه فى مصر بقايا من سلالة الهكسوس و موطنهم الشرقيه و هم عائله كبيره جدا جدا و مشهوره جدا و أبنائهم بيشغلوا مناصب كبيره و صحيح ملامحهم مش مصريه خالص و ده كلام علماء فى علم الأنثربولوجى يعنى تقريبا مؤكد .. و بالمناسبه كمان أصول الهكسوس اللى غزوا مصر جاؤوا من بلاد تسمى الأباظ فى وسط آسيا ..
أول اولويه فى حياتى ...عيلتى ..شغلى ...أصحابى؟
- عيلتى طبعا بتفاصيل حياتهم و مشاكلهم اللى بعضها بجد يستحق الوقوف و التأمل و بعد كده شغلى اللى فاتح بيوت و بعدين أصحابى و بالذات أصدقاء الطفوله و أصدقاء العمر اللى أغلبهم هكع و أقرع و سنانهم بقت واحده آه و واحده لأ :))
إيه اكتر حاجه بتحبها فى رمضان؟
- الصوم و القرب من الله سبحانه عز و جل .. و طبعا اللمه ساعة الاٍفطار و السحور و اللى مش بتبقى متاحه دايما فى غير رمضان لاٍختلاف مواعيد العمل و الدراسه بين أفراد الأسره .. و طبعا صينية الكنافه اللى بالموز اللى بتعملها بنتى الكبيره خصيصا ليا ..
اوصف أجمل فطار ممكن تفطره؟
- لو تقصد رمضان يبقى طبعا اللحمه بدون شك .. لو تقصد فى غير رمضان يبقى بتنجان و فلفل رومى مقلى مقطوفين من الأرض طازه و مقليين باٍيد الواد اٍبراهيم الغفير فى طاسه أجاركم الله من شكلها بس بيطلع منها الأكل طعمه حلو أوى على حتة جبنه قديمه و رغيف شمسى و قعده على الأرض وسط الشجر و الزرع و يا سلام بقى لما تشرب بعد الفطاره دى بقين ميه متلجين من بير 120 ميه نضيفه من غير كلور و لا شوائب ..
لو انت حاكم هتكون عادل ؟ وهتعرف ازاى؟
- أتمنى طبعا أكون عادل و محبوب من شعبى .. و أعرف اٍزاى ؟ لما أمشى وسط الناس من غير حرس و لا خوف و لا يحزنون و أرجع بيتنا سليم ..
مين أكتر اعلامى بتحبه؟
- محمود سعد لأنه بسيط و طيب و بيتكلم بجرأه فى نفس الوقت .. و طبعا أسامه منير لأنه صديق العمر و رفيق الغربه غير أنه جدع و أبن بلد و صعيدى و شهم و فى نفس الوقت أبن باشوات و أرستقراطى و حأقولكم على سر :)) و اٍحنا فى الجامعه فى اٍسكندريه كان عنده شقه فى ميامى لوحده يقعد فيها فكان بيسيبها و ييجى يقعد معانا و كنا حوالى 15 شاب مسلمين على أقباط شديدى الفقر و مش لاقيين اللضا ساكنين فى شقه واحده و كان أسامه بيحب اللمه و الهيصه و الأكل العزابى و كده و عمره الصراحه ما حسسنا أنه من طينه تانيه غير طينتنا علشان كده بأحبه و لسه أصحاب لحد النهارده ..
لو ممكن شغلانه تانيه تختار ايه؟
- لو لم أكن فلاحا لوددت أن أكون فلاحا .. ما ينفعش غير أنى أكون فلاح رغم الوظيفه الكبيره اللى كنت فيها و أستقلت و أعتبرونى مجنون ..
تانى بلد تحب تعيش فيه بعد مصر ؟
- الجزائر ..
اوصف ترتيبات أجمل فرح ممكن تحضره؟
- مافيش ترتيبات معينه أكتر من أنه يكون فرح محترم لا يرتكب فيه ما يغضب الله و لا أشياء تتعارض مع قيمنا و تقاليدنا ..
بتراعى كلام الناس والقيل والقال؟ وليه؟
- أيوه طبعا بأراعى كلام الناس لأن فيه مقوله اٍجتماعيه لابد من اٍحترامها و العمل بها .. و قالك زمان أمشى عدل يحتار عدوك فيك و كل اللى يعجبك و ألبس اللى يعجب الناس .. يعنى ما تخليش حد يمسك عليك غلطه ..
صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
- يا ريت يا فاروق .. بس بصراحه الموبايل بقى شىء مهم و أساسى فى الحياه خاصة أنه اٍرتبط بالشغل و الاٍطمئنان على العيال لما بيخرجوا بس برضو أحيانا بيكون مزعج جدا بالذات لما تلاقى صاحبك يتصل بيك الساعه 3 الفجر و يقولك اٍزيك ؟ أنت فين و بتعمل أيه ؟!!
السعاده هى ؟
- هى رضاء الله سبحانه و تعالى و راحة الضمير و سعادة العيال و نجاح زرعة الموسم .. و وجود شخص لأ مش شخص أقصد شخصه تملأ الدنيا من حواليك بهجه و مسرات :)
عندك أمل؟ واسبابك؟
- الأمل هو أجمل اٍختراع عقلى أبتدعه الاٍنسان لتهوين متاعب و مظالم الحياه و لابد من وجوده فى أجندتنا و اٍلا أنقلبت العيشه كلها نكد فى نكد .. و أسبابه عندى أنه طول ما الأرض بتنبت منها شجره طالعه من بذره ناشفه يبقى لسه فيه أمل ما هى دى معجزه كبيره أوى أوى فى رأيى ..
لما بتحب تهرب من كل حاجه بتروح فين ؟
- مكانين لا ثالث لهما اٍما المزرعه المتواضعه بتاعتى اللى أكرمنى بها الله من فضله و بما أنها زى واحه صغيره فى قلب الصحراء المهيبه الرهيبه فده بيدينى فرصه للتفكير و التأمل و اٍتخاذ القرار الصح فى معظم الأمور .. المكانى التانى بقى يا ريس هو شاطىء البحر فى راس سدر و هى منطقه صحراويه برضو بس بتطل على خليج السويس و هناك بيكون أقرب اٍنسان ليا على بعد 3 كيلو يعنى تقريبا خلوه :)
امتى أول مره أخدت فيها نفس وقلت ياااااااه أنا كبرت؟
- عمرى ما قلتها لأن المهم القلب و الفكر و الضمير مش السن .. ياما فيه شباب صغيرين لكن قلبهم شايخ و مخوخ و نظرتهم للحياه و الناس نظره سوداء قاتمه .. أنا عن نفسى بأحب الحياه أوى و بأحب الناس كلهم و شايل من قلبى أى كره أو بغض لأى حد ما عدا طبعا اللى بالى بالكم فبأكرهه بغير حدود ربنا ياخده بحق جاه الحبيب النبى بقى بس يفرج عليه خلقه و يبهدله قبل ما يموت بهدلة المعزه اللى وقعت فى أيد تيس ما بيعرفش قادر يا رب ..
بتشرب سجاير ولا لا؟ وايه رأيك فى الرجاله والستات اللى بتشرب؟
- ربنا تاب عليا الحمد لله .. ربنا يتوب عليهم و عليهن الحمد لله ..
بتعرف ايدك الشمال ازاى؟
- مش بأسلم بيها على حد :))
اكتر اله موسيقيه بتحبها؟
- البيانو .. و كنت بيانيست ممتاز فى شبابى و كانت لى شهره كبيره فى الاٍسكندريه بس خلاص بقى بقيت بأكتفى بالاٍستماع دلوقتى ..
ليه قله الذوق والنخوه اتعدموا؟
- لا و الله يا فاروق مش اٍنعدموا لكن لسه فيه ناس جدعه و كلهم شهامه .. و على الفكره الشهامه و الجدعنه و النخوه مش حكر على الرجال فقط يعنى بنات كتير و الله فى غاية الشهامه و الرجوله و خد بالك من كلمة الرجوله دى .. الرجوله مش شنبات و حاجات تانيه لأ .. الرجوله موقف و اٍصرار على التمسك بالصح و ياما رجاله لكن لامؤاخذه ... و لا بلاش .. الفكره يا صديقى أن الحياه فى أغلبها بقت عك فى عك و سلوكيات الناس بتحكمها فلسفة العصر الردىء اللى هى التيته فى الننه و الننه فى التيته و زى ما أنت عارف أن العمله الرديئه بتطرد العمله الجيده و على هذا فبيبان المشهد الردىء فقط أما الثمين فبيتوارى فى الظل خجلا ..
ايه الحاجه اللى لو حصلت هبقى سعيد ؟
- تقريبا نفس اٍجابة سؤال السعاده هى ؟ رضاء الله و الضمير و سعادة العيال و نجاح الزرعه و زود عليهم أن ربنا يحقق لى اللى فى بالى و أن اللى بالى بالكم يموت بس قبل ما يموت ربنا يبهدله و يفرج عليه خلقه فرجة الكلاب اللى عكس عكيس ..
تحب أرض زراعيه ولا اجنس عربيات ولا كام عماره ولا فلوس فى البنك؟
- أرض زراعيه طبعا .. ما هى العز و العزوه و السند و الصاحب وقت الشده و هى اللى تجيب عمارات و أجنسات و حاجات و محتاجات ..
تحب؟ البحر ولا النيل؟
- الأتنين بصفه عامه حيث أنى اٍنسان برمائى بطبعى يعنى بأحب الميه جدا بكل أنواعها .. البحر صديق مخلص و بيتجاوب معاك فى كل حالاتك النفسيه لو أنت فرحان أو زعلان أو غضبان أو بتحب أو أى حاجه و تقعد قدام البحر تلاقيه موافقك على طول الخط .. أما النيل فرقيق و جميل بس للأسف بنعامله معامله قذره و حقيره لا تليق بشريان الحياه اللى بيمد الوطن بالخير و البركات و بجد بيصعب عليا و خايف عليه من معاملتنا و تلويثنا له و من أطماع أعدائنا الشماليين اللى هم أحسن مننا مليون ألف مره فى الحفاظ على كل نقطة مياه عندهم و أتفرج على حالة الثقافه المائيه اللى بيعلموها لعيالهم اللى تنقصف رقابيهم مش اٍحنا اللى بنسيب السيفون خربان بالشهور و عمالين نهدر فى المياه زى المجانين و زرعنا فى الصحرا فى عرض كوباية مياه .. كفايه كده لحسن لو أنفتحت فى موضوع هدر المياه حأكتب فيه الاٍلياذه و الأدويسا و الله ..
مركب ولا طياره؟
- مركب طبعا .. مع العلم أنى ألتحقت بمعهد الطيران اللى كان فى مطار اٍمبابه زماااااان و مش عارف لسه موجود و لا لأ ؟ و قطعت شوط كبير للحصول على اٍجازة الطيران و الدراسه فيه ماكنتش مكلفه زى دلوقتى و سيبته لما المدرب أكتشف فى يوم أنى عندى فوبيا الأماكن المرتفعه :)))))
شخص مجنون ولا عاقل؟
- يا أبنى و هو فيه حد عاقل اليومين دول ؟؟!! هو بس درجات الجنون بتتفاوت بس الحقيقه أنهم جابوا لنا كلنا الهسهس ..
تقرا كتاب ولا تتفرج على فيلم؟
- بأحب القرايه طبعا بس برضو بأتفرج على أفلام بس مش أفلام مصريه و مش أى أفلام أجنبيه برضو .. بس فيه فيلم مصرى كل ما أشوفه بيزداد اٍعجابى بيه اللى هو اٍسمه عن العشق و الهوى .. جميل أوى الفيلم ده جميل بجد يعنى ..
**************************
موضوع اٍهداء التاج لمين ده بقى شىء بيحيرنى و اللى نبهتنى لده العزيزه kochia فى تعليقها .. بيحيرنى ليه ؟ لأنى لما أهديت التاج اللى قبل ده لناس معينين كان يهمنى أعرف اٍجاباتهم يبدو أنهم لم ينتبهوا لهذا الاٍهداء وسط زحام و خضم البوستات .. علشان كده بأهدى التاج ده المره دى لكل من علق عليه عندى .. و متشكر لكم كلكم ..

هناك 25 تعليقًا:

princess يقول...

صباح الهسهس ههههههه
سؤال غريب اوى مفيش حد عاقل على هذا الكوكب العاقلين هما اللى حاطنيهم فى العباسية خايفين عليهم مننا
اجابات متفردة ومتفلسفة:)
كل سنة وانت طيب

~*§¦§ Appy §¦§*~ يقول...

عمرو اجابات منطقيه اوي مش عارفه ليه وحلوه ان الجدعنه مش على قد الرجاله بس

norahaty يقول...

السلام عليكم ورحمة
الله تعالى وبركاته
أجاباتك حلوووة اوى
يااستاذ عمرو ومتهيأللى
كده لو كتبت بالروسى حتى حتفضل
انت انت انت بمنتهى خفة الدم دى والطبيعية فى الكلام.أنما عايزة أسال انت مفيش حاجة ياأخويا ماجربتهاش أو مااتعلمتهاش أو ماحاولتهاش:)الله اكبر عليك بسم الله ماشاء الله:):)مش باحسد والله ربنا يزيد ويبارك.

norahaty يقول...

ايووووةصحيح نسيت اقول لحضرتك
التاج ده انا كنت لقيته فى مدونة اخرى وجاوبت عليه لكن مش عند طالب ثانوى.تحب تقرأ اجاباتى؟:)
لو الاجابة لأمش نافصين وجع دماغ :اوكى طيب :(
ولو الاجابة نعم عايزين:):):)اوكى
طيب:)
قولى حضرتك وانا انفذ:)

عاشقه وغلبانه يقول...

حلو موضوع الجنون درجات
تصدق انا طالعه نازله في الدرجات دي
من كام يوم بصيت لروحي في المرايه وانا متأكده اني مجنونه
اه والله العظيم

الازهرى يقول...

احنا كده متفقين
انت عليك دروس البيانو
لان كل الناس حاولوا يعلمونى لانى بحبه جدا لكن المشكلة فى نفاد الصبر والوقت

وعلى فكرة معهد الطيران لسه موجود زى ماهو
اما بالنسبة لاخلاصك للاصدقاء فشىء متوقع من شخصية جميلة زيك

ربنا يحققلك كل ما تتمناه
تحياتى وخالص مودتى

kochia يقول...

ولله بحييك علي حبك للارض وقرارك انك تتفرغ لها ده قرار شجاع جدا مش كتير يقدر عليه

بس هو فين منطقة اهداء التاج ؟؟
انت نسيتها ؟

عمرو يقول...

princess
و أنتى طيبه و بخير
بجد الهسهس أصابنا جميعا و ركزى كده شويه فى تصرفات و سلوكيات الناس فى الشارع حتلاقى العجب
مثلا كتير جدا بيمشوا يكلموا نفسهم و كتير تلاقى ناس بتبتسم و بتضحك فة مواقف ما ينفعش فيها غير اللطم و البكا
طيب ركزى كده شويه فى تصرفات سائقى السيارات
و الله فى مره شفت واحد بيه نزل من عربيته يتخانق مع سواق تاكسى زنق عليه شويه العادى يعنى فالبيه راح نازل من العربيه و نط فوق كبوت التاكسى و فضل يدبدب عليه برجليه لحد ما أطبق خالص و بعدين نزل و وطى على كاوتش التاكسى و هات يا عض فى الفرده وسط ضحك هستيرى من باقى قائدى السيارات اللى أتفرجوا على هذا المشهد العبثى و هدوء تام من سائقى التاكسى و المفارقه بقى أن هذا المشهد حدث بالضبط قدام بوابة مستشفى الصحه النفسيه بالعباسيه اللى هى يعنى مستشفى المجانين ( يكفينا الشر )

عمرو يقول...

Appy
و الله أنتى كنتى على بالى يا آبى و أنا بأتكلم عن جزئية الجدعنه دى لأنك فعلا بنت جدعه جدا
تحياتى و شكرا للمرور و التعليق

عمرو يقول...

norahaty
متشكر يا دكتوره ربنا يخليكى
التجربه الحياتيه للاٍنسان مش بتتحسب بالسنين و لكن بتتحسب بكن الخبرات المتراكم عبر السنين
أنفصلت عن أسرتى من سن صغير جدا يمكن كان غلط و لكن أستفدت من ده اٍستفاده كبيره .. اٍتعلمت درس مهم و أشفق على أولادى أنهم يتعلموه لوحدهم من شدة قسوته و صعوبته فواخدهم تحت جناحى و كحوط عليهم لأن الزمن الآن مختلف عن زماننا
زماننا كان اللى بيقع بيلاقى أيد حنينه طلعت له من ال nowhere تساعده و تحن عليه لكن فى زماننا ده لو حد وقع بينداس و بيتهرس و بيتطحن
أنا بقى بأكتب زى ما بأتكلم من غير تزويق فعفوا يعنى لو لاقيتم كلام يمكن غريب شويه بس هى كدهع بقى
تقبلى تحياتى و ألف شكر

عمرو يقول...

norahaty
أيوه طبعا عاوزين كلنا نقرا اٍجاباتك يا ريت تدينا اللينك و نكون من الشاكرين

صبرني يارب يقول...

ههههههههههههههههههههههههههههههههه

كده يا عمر العيال فكروني اتهبلت وانا فجأه فتحت فى الضحك وانا باقرا

يلا لازم يسلموا انى مجنونه

استمعتتتتتتتتعت بقراءة اجاباتك جداااااااااا

انت عارف انى مش باجامل حد

واعمل حسابي فى الكنافه الى بالموز عشان انا باحبها ومش باعملها عشان ما حدش هنا بيحبها الا انا

عمرو يقول...

عاشقه و غلبانه
كلنا يا عزيزتى بتأرجح بين العقل و الجنون و الشاطر اللى ما يتأرجحش أوى ناحية الجنون
كلنا بدون اٍستثناء فينا شعره كده ساعه تروح و ساعه تيجى بس المهم أنها ما نفضلش مآنسانا على طول :)

عمرو يقول...

الأزهرى
عشت يا صديقى و كل سنه و أنت طيب
كنت فاهم أن معهد الطيران أتنقل 6 أكتوبر ..
بالنسبه للبيانو فطالما أن صبرك نفد فده يا صديقى معناه أنك تحاول مع آله تانيه زى الجيتار مثلا و هو من الآلات الجميله برضو و بالنسبه للوقت فساعتين فى اليوم يكفوا جدا للتمرين المثمر بشرط يكون معلمك كفؤ و هو كمان عنده صبر
أنا ماعنديش مانع أعلمك شوية بيانو بس فين الوقت بقى :))
الأصدقاء يا صاحبى هم ذخر المستقبل و اٍستثمارك الصح لما تخفيه الأيام .. الأصدقاء يا سلااااام
شكرا للزياره و التعليق و تقبل تحياتى

عمرو يقول...

kochia
أهلا أهلا منوره و الله
الأرض محتاجه مراعيه و عنايه و لابد فعلا من التفرغ لها لأنها تستحق
حتلاقى تحديث فى نهاية البوست خاص باٍهداء التاج و شكرا لتنبيهك ليا
و تقبلى خالص تحياتى

عمرو يقول...

صبرنى يا رب
بعد الشر عليكى من الجنان يا أم خالد :))
بس و الله أنا مش بأقصد هو كلامى بيطلع كده و مسيرى فى مره أحكى فى بوست أيه اللى حصل لما رحت أخطب للوله أبن عمى :))
من عينيا يا أم خالد و الله صينية كنافه بالموز توصلك بالدى أتش اٍل لحد عندك بس على الله البوسطجى ما ينخربش فيها طول السكه
شكرا لاٍطرائك و لزيارتك و للتعليق و تقبلى و الأستاذ رضا خالص تحياتى

mero-moory يقول...

السلام عليكم ورحمة الله وبركاته

بجد موث لاقيه حاجه اقولها برغم انها اول زياره غير ان اجابتك فيها شيء مريح صادق وحسيت اني مستمتعه وموش عايزة اخلث قراءه خالث

ربنا يوفقك

بث في ثؤال احم احم

يحني ايه عيش شمثي ؟؟

وبيتجاب منين

في رعاية الله

بنت الغربة يقول...

كل سنه وانت طيب
التاج جميل قوى وتعليقاتك عجبتنى
خصوصا رايك عن فيلم عت الغشق والهوى
انا عمرى ماحبيت افلام عربى بتاتا البته
بس الفيلم ده شدنى قوى وخلانى اعيد نظر فى الافلام العربى
تحياتى ليك

عمرو يقول...

mero-moory
متشكر جدا للزياره و للتعليق ربنا يخليكى و اٍن شاء الله الزيارد دى تتكرر دايما
العيش الشمس هو من أشهر أنواع الخبز فى الصعيد و طريقة عمله قريبه جدا من الخبز العادى اٍلا أن العجينه بتبقى لينه شويه و بعد ما بيخمر و بيتقرص و يتفرد بيتساب تانى فى الشمس شويه كده على ما يخمر تانى على حرارة الشمس فبينتفخ و بيسهل حفظه بعد خبزه لمده طويله و علامة نضجه فى الفرن هى النقر عليه بخفه فبيصدر صوت قريب من صوت الطبل :)
نورتى المدونه و تقبلى تحياتى

عمرو يقول...

بنت الغربه
أهلا و سهلا و كل سنه و أنتى طيبه
فعلا الفيلم ده رائع أنا بأحييكى على ذوقك
شرفتى المدونه و متشكر للتعليق و الزياره
و لك خالص التحيه

من غير عنـــوان يقول...

إجابات التاج تنم عن شخصية جميـــــله ،متوازنه
وحاجات كتير تضمهم الكلمتين دول..


أمنياتي

شكرا على الإطراء
وبالنسبه للتاج أقبله
بس...

الوقت يا صديقي

شمس النهار يقول...

بجد اجابات موزونه
وواضح انك شخصيه تتمتع بكثير من التفاؤل
انا كمان صعبان عليه النيل جدا
عشان انا بحبه هادي وجميل وماشي بهدوء
وسكينه وبيعملوا فيه عمايل وعمره مااشتكي
وكمان واضح انك كاتب ساخر متمكن من ادواتك

norahaty يقول...

السلام عليكم ورحمة
الله تعالى وبركاته
استاذ /عمرو ده الرابط للتاج اللى قلت لحضرتك عليه
http://lshtiwydvi.blogspot.com/2008
(/12/blog-post_27.html
وشكراًاستاذنا.

jordan shoes يقول...

i think the archive you wirte is very good, but i think it will be better if you can say more..hehe,love your blog,,,

重庆游戏中心 يقول...

Although we have differences in culture, but do not want is that this view is the same and I like that!