~SUN~ Pictures, Images and Photos

الثلاثاء، 6 يناير 2009

على الأرض السلام ..


يا جماعه هل هنأتم أخانا عيسى العوام بعيد الميلاد المجيد ؟؟
مش أحمد مظهر كان بيقول كده فى فيلم الناصر صلاح الدين ؟
كل سنه و أخونا عيسى العوام بصحه و بخير ..
و لو أن الواحد مكسوف و التهنئه واقفه فى حلقى و أنا بأقولها .. بس معلش .. تهنئة اٍخواتنا الأقباط المصريين واجب و زى ما هنئونا فى أعيادنا واجب نهنيهم فى أعيادهم بغض النظر عن الظروف اللى بيمروا بيها أخواتنا التانيين الغزاويه العرب المسلمين و المسيحيين برضو أصل رصاص اليهود خاين و أهبل و ما بيفرقش بين مسلم و قبطى كله عنده سواسيه و مادام مش يهودى نجس يبقى دمه حلال ..
كل سنه و أنت طيب يا صديقى أسامه منير يا صديق العمر يا مخلص يا مجدع .. كل سنه و أنت طيب يا سامى كمال أنت و أخواتك وجدى و مجدى و عادل و طبعا طنط زيزيف مامتك ربنا يخليها لنا .. كل سنه و أنت طيب يا شريف و عادل سلطان يا أصحاب الطفوله يا اللى كنتم دحاحين مذاكره و آدى ربنا أكرمكم و بقيتم من خيرة أطباء مصر .. كل سنه و أنت طيب يا سمير ميخائيل يا صديقى يا طبيب الأسنان العبقرى و يا اللى دخلت سلك الرهبان و بقيت الراهب جرجس المحرقى و برضو دمك خفيف زى ما أنت و بتساعد كل الفقراء بدون السؤال عن دينهم و لا دين أبوهم زى ما البعض بيعمل ..
كل سنه و كل المصريين طيبين زى ما همه .. و حنينين زى ما همه .. و راضيين و قانعين بنصيبهم فى الدنيا زى ما همه ..
كل سنه و مساجدنا و كنايسنا عامره بالمؤمنين اللى لا ملاذ لهم غير الله .. الله الواحد .. خالق المسلم و خالق المسيحى و خالق اليهودى و الكافر و اللى بيعبد السحليه !!
اٍفتكروا يا جماعه فى الليله المفترجه دى أن سيدنا المسيح عليه و على نبينا أفضل الصلاة و السلام و لد على أرض فلسطين .. فلسطين الجريحه الأسيره الحزينه .. و لما أمه ستنا العدرا مريم عليها السلام حست بالخطر على وليدها لجأت به لمصر .. مصر .. بس على أيامها ماكنش فيه معبر مقفول زى دلوقتى فدخلوا مصر و وجدوا فيها كل أمن و سلام ..
أدعوا يا أخوانا و أكثروا من الدعاء أن يجعل الله مخرجا لكل مهموم و حزين و منكسر و مقهور و مظلوم و يجبر بخاطرهم بكرمه لأنه هو القادر القدير المقتدر ..
كل سنه و كل المصريين بخير ماعدا بوز النحس اللى ملوث هوانا لمجرد أنه بيتنفسه و بينجس أرضنا لأنه بيمشى عليها و مخلى سمانا كئيبه لأنه بيستظل بيها و بسببه الناس ماشيه شكلها عره و بتكلم نفسها من الفقر و الغلاء الجبله اللى مش بيحس على دمه .. هو مش عاوز يغور فى داهيه ليه ؟؟!!

هناك 14 تعليقًا:

عاشقه وغلبانه يقول...

لا هم ولا احنا لينا نفس نفرح
بس اكيد تهنئتهم واجب علينا وحق ليهم يحاولوا يفرحوا
كل سنه وهم طيبين
كل سنه واحنا مع بعض مافيش فرق بين مسلم ومسيحي الحمد لله كلنا اخوات واللي مش عاجبه يخبط دماغه في الحيط

Unknown يقول...

عيد ميلاد مجيد

كل سنه و كلنا طيبين مسيحين و مسلمين

انا دايما بعتبر ان اعيادنا واحده لاننا وطن واحد

الة الحرب اليهوديه عاميه و طارشه لا بترحم طفل او شيخ ولا بتفرق بين مسيحي و مسلم كنا في الهم سوا

ربنا معاهم

Unknown يقول...

كل سنة واحنا كلنا طيبين مسلمين ونصارى
و ربنا ما يجعل مصر نسخة من العراق او غينيا

أحــوال الهـوي يقول...

كل سنة و انت طيب و قلبك يسع كل الناس بمجدعتك و عبقريتك النادرة

الصورة حينما رايتها و الدمع منحدر من العين حسبتك سوف تتحدث في موضوع اخر و لكنني و جدت الصورة تعبر عما تتحدث عنه في وقت مليء بالاحزان مخلوط ببهاء العيد

فعبقرية اختيار الصورة لخصت الحال بالمحال

كل سنه و اصدقائي المخلصين المسيحيين بخير و لولا علمي بانهم لن يقرأوا تهنئتك لذكرت اسماءهم جميعا و هم كثيرون

تحياتي

بنت الغربة يقول...

انا هنيت كل اصحابى المسيحين فى مصر
لان الى هنا معظمهم من الجنسيه اللبنانيه ودول اعيادهم مختلفه لاختلاف الملل
تحياتى ليك

شمس النهار يقول...

كل سنه واهل مصر بخير
مسلمين واقباط مش عيس نبينا كلنا
بس سؤال صغنن كده
ايه موضوع السحليه دي
همه كمان بيعبدوا السحليه

princess يقول...

كل سنة وهما طيبيبن يارب ويقضوا عيد حلو برغم الظروف اللى احنا فيها دى بس على الاقل يحاولوا

سارة نجاتى يقول...

يعنى يا عم عمرو دلوقتى أقول ايه ؟؟

من غير زعل بس مش بحب جملة فيها اخواتنا ,و لا نصارى و لا احنا و لا هما

لأن مهما السياق اللى بتتقال فيه , فى دايما معنى بحسه مش موجود , عامله زى اللى بيقول لحد صباح الخير و هو بيجز على سنانه , طبعا مش قصدى عليك أنت كلامك باين تماما أنه صادق جدا , و عشان كده ح أعمل زيك و أقول " كل سنة و شنودة و ماريز , و وفيق و سيدهم و مارك و أوليفيا طيبين "
طبعا أنت مش تعرفهم و لا أنا برده
ههههههه ,
لا دول زمايلى و صحابى و أجدع ناس قابلتهم فى حياتى من الأسماء اللى فوق دى

من غير عنـــوان يقول...

أكيد.. كل سنه وجميع أقباط مصر بخير

بالمناسبة واحد من 3 أصدقاء ( هم أعز أصدقائي ) مسيحي

برافو يا عمرو


تحياتي

سنابل يقول...

ودى عايزة كلام ؟
طبعا هنأنا اخانا عيسى العوام بالعيد
بس كنت مفتقدة طنط أم إيميل الله يرحمهاأوى وافتكرت بسكويت القرفة بتاعها ده أول عيد بعد وفاتها
قمت لقيت تيريزا جاية وجايبالي البسكويت حضنا بعض وقعدنا نعيط احنا الاتنين
شوفت بقي ؟.....اخوة حتي ف النكد
كل سنة وكل المصرين بخير ...قصدي يرجعوا تاني بخير

Unknown يقول...

لسلام عليكم ورحمة
الله تعالى وبركاته
وصباح الفل كمان
أستاذنا/ عمرو
طيب وتعمل ايه ياأستاذ عمرو باللى بيقولك انت لو قلت لهم كل سنة وانتم طيبين فى اليوم ده تبقى كده أمنت بمعتقدهم الخاطىء فى وفاة السيد المسيح عليه وعلى نبىّ السلام مصلوبا وووووكل الحاجات اللى انت عارفاها.انا عن نفسى رديت عن من قالت هذا بأن لى زملاء وزميلات وجيران من غير المسلمين يعييدون على ويعاملونى بكل الود فى كل المناسبات (ولو من غير او لو من ورا قلبهم)فكيف لا ارد لهم الكلام فى مناسبتهم! حتى قلت هل سيخرجنى هذا عن دين الاسلام!!!!!!!!الاسلام اكبر من هذا.
وتحياتى لكتاباتك الهادئة وحبتشكاناتك الممحبتشكة فى كل المجالات.

كلام على بلاطة يقول...

مصر بمكانتها هـــــــــــــى الالف والبــــــاء
وتــــــــــــــــرس التصدى بالحكمةللخطر اذا جاء
فــــــــــــــــاردة جناحيها على امتها رغم العداء
الذى يبــــــــــــــــــــــديه بعض الرعاع والسفهاء
واقفة وقفة العقــــــــــــــــــل رغم خوار الاغبياء
ولا تأبه كثيـــــــــــــــــرا بصراخ الحمقى الجبناء
الذين يتراجــــــــــــعون لتتقدم مصالح الاوصياء
ويتخلون طوعا عن قضاياهم وهم فى حالة رضاء
===========================

moory-mero يقول...

السلام عليكم و رحمة الله و بركاته

كل سنه والاخوة الاقباط بخير وطيبين

على فكرة اكتر حاجه شدتني وعجبتني في البوست السطرين الآخريين جرأه بحييك عليها وبقولها زيك وبأيدك

امتى بقى يحس ويقوم حلو لفظ جبله ده أووووي هههه

في رعاية الله

صبرني يارب يقول...

باحييك يا عمرو على البوست
والىكتير ممكن يقطعوا فى شعرك بسببه هههههههههههههههههه

وكل سنه وهما طيبين وكل سنه واحنا منفضين للناس الاغبياء