~SUN~ Pictures, Images and Photos

السبت، 10 يناير 2009

شمس النهار تشرق من جديد ..



صباح الخير أعزائى المدونات و المدونين ..
قالوا زمان الدنيا صغيره .. و أن رب صدفة خير من ألف ميعاد ..
و لكن بجد أكتشفت اٍمبارح أنه فعلا الدنيا صغيره أوى أوى .. و أن الصدفه فعلا لها وجود و بتلعب دور خطير فى حياتنا و أنها أحيانا مش بتكون خير من ألف ميعاد و بس .. لأ .. دى كمان بتكون أحلى و أجمل صدفه فى العمر كله على رأى ليمو حليمو رحمه الله الشهير بالعندليب الأسمر ..
شمس النهار .. صديقة الجميع .. و المحبوبه من الجميع .. و صاحبة المدونتين المشهورتين شمس النهار و مطبخ شموسه و التى لا يختلف أبدا عليها أثنين من المدونين لطيبتها و أخلاقها العاليه و حكمتها و رزانة عقلها و أيضا لأكلاتها الشهيه الشيك اللى بجد خلت الواحد يتخنق من أكل المطاعم و يرجع يحن لأكل المطبخ البيتى ..
شمس النهار أراد الله سبحانه و تعالى أن ألتقى بها و بأسرتها اللطيفه المكونه من 3 بنات تبارك الله القدير فى أدبهم و تدينهم و جمالهم الملفت للنظر بجد و أيضا زوج بنتها الكبيره الشاب الوسيم اللطيف أبو عيون كحيله و اللى بيشغل وظيفه مرموقه و كمان خطيب البنت الوسطانيه اللى بيعمل في وظيفه كلها فلووووووس ربنا يتمم لهم على خير ..
و أصل الحكايه أن لى صديق عرفته أيام دراستى بكلية الفنون الجميله بقسم الدراسات الحره يعنى من حوالى 25 سنه كده و جمعنا حب فن التصوير .. مش التصوير الفوتوجرافى لأ التصوير اللى هو الرسم يعنى .. و أمتدت صداقتنا على مدى السنين الطويله لا عمرنا اٍختلفنا و لا عمرنا زعلنا من بعض يمكن لأننا كنا بنتحاشى الدخول فى معاملات ماليه و هى من أول الأسباب بالمناسبه لفشل الصداقات بين الناس ..
صديقى ده كلمنى من حوالى أسبوع و عزمنى على حفلة عيد زواجه العشرين و عرفنى أنه ناوى يعمله فى فايد حيث يملك هناك فيلا لطيفه بتطل على البحر حط فيها شقا عمره و شقا عمر مراته و شقا عمر اٍخواته و يمكن كمان شقا عمر الجيران و أصر على حضورى أنا و العيال و برر ده بأن زملاء الدراسه فى الكليه معزومين هم و عيالهم و أزواجهم و زوجاتهم علشان الكل يتعرفوا على بعض ..
بصراحه يا جماعه أنا كنت متردد فى قبول هذه الدعوه و لكن لأمر لا يعلمه غير المولى قررت قبولها فى النهايه ..
و بالفعل قمت اٍمبارح الصبح بدرى علشان ألحق أكون هناك بعد صلاة الجمعه كما هو متفق لأن صديقى عرفنى أن الحفله حتكون صباحيه .. و لبست اللى على الحبل و عليه الجاكته الهولندى الشمواه فى قطيفه منها فيها و شمطت الساعه الرولكس أم أستيك مدهب بتاعت الأفراح .. و صحيت العيال اللى لبسوا لبس العيد الكبير و هوبا للنبى وقصدنا وجه كريم على فايد بالعربيه الجيب و لما الجيب تنحط بس كده على أول الأسفلت قولوا على الأسفلت يا رحمن يا رحيم حاكم الجيب الأمريكانى دى 6 سلندر لما بتفتح بتبقى زى أمنا الغوله اللى عماله تبلع فى الكيلوات بدون رحمه أصلها 4100 سى سى ..
كنت بأقول أيه ؟؟ و الله نسيتونى
معلش صبركم عليا أصلى الصراحه لسه عطر أول مقابله مدوخنى حبتين
صلينا الجمعه فى فايد أنا و ال 3 عيال .. و بعد ما خلصنا توجهنا لبيت صديقى الفنان الجميل و الراجل و المدام بصراحه أستقبلونا أحسن اٍستقبال و قالك زمان لاقينى و لا تغدينى و فرحت أنهم بيهتموا بالاٍحتفال بعيد زواجهم السعيد بغض النظر يعنى شويه عن الظروف اللى اٍحنا فيها .. بس هى دى سنة الحياه و اللى يحتفل يحتفل بس اللى فى القلب فى القلب ..
فى التراس المطل على حاجه زى البحيره كده لاقيت مجموعه من الضيوف كانوا سبقونى فى المجىء و واضح أن دخولى بالتلات عيال قطع عليهم حديث كانوا بدأوه .. سلمنا و أتعرفنا و جات قعدتى قريب من سيده قدرت سنها كده بالويم أنها على مشارف الأربعين أستكملت حديثها اللى قطعه دخولنا عليهم ..
السيده دى يا أخوانا بجد سبحان الخلاق فيما خلق .. ذات وجه ملائكى برىء شديد الجاذبيه و الطيبه من غير بودره و لا أحمر و لا أزرق .. صوتها له رنه تكاد تكون كرنة الألماسه الحره داخل كاس كريستال بلجيكى أصلى لا يملك المرء أمامه سوى الاٍنصات له بكل جوارحه .. تتصرف و تتكلم كبرنسيس مدلله خرجت للتو من كتاب أطفال ملون من بتاع اٍنجلترا ده حتى أن صورة أميرات العائله المالكه السابقه قفزت لذهنى فورا .. و بالمناسبه هى بالفعل تنحدر من أصول تركيه و لهذا تشبه جدا الأميره فوزيه أخت صاحب الجلاله المرحوم الملك فاروق الأول ملك مصر و السودان اللى كان فى عهده البائد البيضه بمليم و رطل اللحمه بشلن ..
البرنسيس الرائعه كانت بتحكى عن رحلة الحج اللى قامت بها مؤخرا و اٍزاى تعبت جدا و دكتور صرف لها الدوا بالغلط و تسبب لها فى مشاكل صحيه عديده ..
الله !!! دى تقريبا نفس اللى حكيته شمس النهار عن رحلة حجها فى مدونتها !!
قلت فى عقل بالى يمكن تشابه أحداث ..
شويه كده و هى بتحكى قالت أن بناتها التلاته كانوا بيتصلوا بها يوميا علشان يطمنوا عليها ..
الله !! مش شمس النهار عندها 3 بنات برضو و لا أنا مش فاكر ؟؟
قلت فى عقل بالى أتقل يا راجل يمكن تشابه بنات ..
حبتين كده يا أخوانا و موبايل البرنسيسه رن فقطعت الحديث بشياكه كده و باٍبتسامه ساحره ردت على اللى كانت بتكلمها و اللى كان اٍسمها حاجه دلع كده تفتح النفس .. طبعا أمال أيه يعنى هى البرنسيسه دى حتعرف مين غير برنسيسات زيها هوانم و مدلعين كده ؟؟
لما أنهت المكالمه و حطت الموبايل النوكيا قدامها على الترابيزه و بنظرة الصقر لمحت صوره مش غريبه عليا أبدا .. صوره شفتها كتير أوى .. صورة الورده الحمرا اللى هى الصوره الرمزيه لشمس النهار !!
هنا بقى قلت لاااااا .. و ما قدرتش أمسك نفسى و رحت خابط سؤال و قلت زى ما تيجى .. سألتها قبل ما تكمل حديثها :
- هو حضرتك عندك مدونه ؟
بان عليها الدهشه من سؤالى المفاجىء ده .. و عقدت حواجبينها اللى زى الهلالين وسألتنى و فى صوتها نبرة قلق :
- و حضرتك بتسأل ليه ؟
رديت بدون تردد :
- أصل الحقيقه صورة الورده دى اللى على موبايلك بتاعت مدونه غاليه عند كل المدونين و عندها برضو 3 بنات زى حضرتك و كانت بتحج و تعبت بالظبط زيك .. و على فكره أنا عندى مدونه اٍسمها حبشتكنات فلسفية ..
البرنسيس رفعت حواجبها فى دهشه و تأملتنى شويه و قالت :
- أنا متابعه مدونتك و بأعلق عندك و أنت بتعلق عندى .. أنا شمس النهار !!
هوباااااا يبقى ظنك جه فى محله ..
********************************************
اٍمتد الحوار بينا لساعات طويله .. اٍتكلمنا فى كل حاجه من سياسه لثقافه لفن لموسيقى لظروف الحياه و متاعبها لدنيا المدونات لطبيخ حتى القطط اٍِتكلمتا فيها .. و أكتشفت أن ما نعرفه عن شمس النهار من تدين و حكمه و صبر و عذوبه ما يجيش واحد من ألف من شخصيتها الحقيقيه .. بالاٍضافه لأن اٍسمها الحقيقى أشد دفئا من شمس النهار بكتييييير و هو يعنى شىء تقوم عليه الحياه و به تستمر ..
شمس النهار برنسيس بمعنى الكلمه و يشهد الله على شهادتى دى فى حقها ..
شمس النهار اٍنسانه حمالة أسيه بغير حدود ..
شمس النهار مثال يحتذى للأم اللى ربنا عوضها ببناتها و أزواجهم خير عوض .. و لأجل الحق هى مش حماه خااااالص لأن الحب الحقيقى ظهر لى من معاملة زوج و خطيب بنتينها لها كأم محبوبه من الجميع ..
ما أسعدنى حقا و شرح تلافيف قلبى هو حالة التآلف و الاٍنسجام اللى كانت بين أسرتها و بينى أنا و عيالى .. يعنى بناتها فتافيت السكر أنسوا لى و لحديثى معهن و مع أزواجهن و تآلفوا أيضا مع عيالى و خدوا بعض كلهم و هاتك يا تمشيه و هزار و كأنهم يعرفوا بعض من زمن و حتى لما حان وقت الرحيل تبادلوا أرقام الموبايلات و تواعدوا على لقاء آخر قريب .. صحيح يا أخوانا اللمه حلوه بجد .. و جو الأسره ده من أحلى الأجواء اللى ممكن الواحد يعيشها بشرط تكون من غير نكد و زوابع و هباهيب ..
الحقيقه كان يوم ممتع جدا جدا .. و كان أجمل ما فيه أن شمس النهار أشرقت بنورها على الحياه فبددت الظلام الرخم اٍن شاء الله ..
سبحانك يا رب يا مقلب القلوب !!

هناك 30 تعليقًا:

عاشقه الرومانسيه يقول...

فعلا رب صدفه خير ان شاء الله
لا اخفى عليك سرا
انا فى البدايه تهت شويه بس بعد كده فهمت انت بتتكلم على ايه
حلو انك تلاقى ناس ترتاح لهم بالشكل ده
انت شوقتنى اشوفها مش بس اشوف المدونه بتاعتها
تحياتى

أحــوال الهـوي يقول...

تصدق يا عمرو انا كنت فاكرك قريب شمس النهار او بينكما معرفة عائليه

و فوجئت الان ان الامس فقط كان اول لقاء

كل ما تفضلت ووصفت عن هذه الشخصية الفذة
تستطيع بكل بساطه ان تستشفه من اول سطر تقراه عندها و اذكر سوء الفهم بيننا في بداية تدويني كانت هي هناك تراب الصدع و تتحدث عنك بكل احترام ومودة فجعلتني اري الامور بنظرة اخري و الوم نفسي و بفضلها كسبت شخصية ثريه مثقفه مثلك صديق لم اراه و اتمني ان التقي به

اجتمع الكل علي احترامها فلابد ان تكون هذه الشخصيه اهلا للتقديس

شكرا للقدر ان كتب لك شربة هنيئه مريئة من هذا النبع الصافي

تحياتي

princess يقول...

ياه ايه الصدف دى :))
انا بصراحة مكنتش بروح مدونتها غير بالصدفة بس لما قرات عن الحج وكده اثرت فيا اوى فبقيت بدخل عنها بانتظام
وانا قبل كده قلتلها فى تعليق ان كلامها يوحى بالاحترام والطيبة وحاجات كتير حلوة:)
تحياتى

شمس النهار يقول...

اهو انت
كل الكلام الجميل ده
الكلام اللي هكتبه ده مش عشان انت قلت علي رأيك(بوقين)حلوين في شخصي
لأوالله انت كده واكتر
ماشاء الله عليك ربنا حباك ببسطه في الجسم والعقل وخفة الدم والعجيب الحنيه
بجد ياجماعه عمرو حنين فعلا مش تمثيل وده انا شفته بعيني وهو بيتعامل مع الشيخ عبده في موقف لو اي اب كان اتنرفزوهد الدنيا وكسف الولد
بس ماشاء الله اتصرف بحكمه وحنيه شديده مع الولد ازهلتني انا شخصيا
وماشاء الله اولاده حته منه ادب اخلاق وخفت دم
بس بجد بجد عندك سرعة بديهه ولماح
انا اتخضيت لما لاقيته عرفني
وده يدل علي ذكاء خارق
مش قادره اقول لكم ان عمرو كان مسيطر علي القعده ازاي والناس بتحبه ازاي ربنا يكرمه
انا طبعا بشكرك علي الكلام الجميل اللي كتبته في حقي انا مااستاهلوش في ناس احسن مني كتير في الحياه
واذا كنت انا برينسيس انت فعلا كنت ملك المجلس وحسيت انك ملك في وسط اولادك
وطبعا القبيله عندي مبهورين بيك
وعايزه اقولك اهو انت كل الكلام اللي قلته عليا
واني امبسط جدا اني قابلتك وفعلا انت بتكتب زي مابتتكلم زي مابتتصرف
ربنا يكرمك وتفرح بالاولادوان شاء الله معرفة خير
واوعي تاكل علينا العزومه اللي وعدت بيها الاولاد
ياشرقاوي

طوبه فضه وطوبه دهب يقول...

بجد بوست جميل ومن كتر كلامك نفسنا كلنا نشوف شمس النهار بس برضو احنا شايقينها فى كتاباتها وموضوعتها وافكارها ربنا يكرمها يارب ويعوضها كل خير فى بناتها

Sweet Violet يقول...

عاااااااااااااااااااااااااااااااااااا

ايه دا بقى دا بقى دا بقى

عاااااااااااااااااااااااااااااا

انا كدا اتغظت قوى على فكره بقى

عااااااااااااااااااااااااا

جبتلى احباط )):

لانى متشوقة اشوف شموسه و انت شوفتها بقى قبلى

عااااااااااااااااااااااااااااااااااااااااا

*******

كفاية عياط بقى و نتكلم جد

بجد بجد كلامك عن شموسه رغم انى ماشفتهاش الا انى من كتابتها كان واضح

و اتضح اكتر لما كلمتها و بقى بينا تواصل

فعلا شخصية جميلة و مرحه ولذيذة موووووووووووووت

عاشقه وغلبانه يقول...

اهو انا نفسي في صدفه من اللي خير من الف ميعاد دي
شكلها بتبقي حلوه اوي

ربنا يديم عليكوا الفرحه

صبرني يارب يقول...

سبحان الله

طب يا عمرو صاحبك ده ما كانش معايا فى الكليه ؟؟؟

ههههههههههههههههههههه

حقيقى انا ما اعرفش شمس اوي عرفتها لما كانت فى الحج بس

بس بعد كلامك لازم اعرفها ان شاء الله

هى نورتي فى احد مدوناتي بالفعل

تحياتي لك يا عمرو

وعايزه اخد رايك فى حاجه مهمه بالنسبه للقصه بتاعتي بما انى معجبه بقصصك يعنى عشان انا مش مقتنعه بقصتي او بطريقتها مش عارفه ليه

حاسوباتيه يقول...

سبحان الله رب صدفه خير من الف معاد ويايخت حضرتك بصراحه انا كمان نفسي اقابلها لانها فعلا انسانه جميله وشخصيه رائعه

أمل حمدي يقول...

جميل قوي يا عمرو احساسك ووصفك لشموسة

ربنا يصلح حالك وحالها اللهم امين

من غير عنـــوان يقول...

اللقا نصيب

يا بختك يا عم

وبعدين كمان الأرواح جنود مجنده

أكيد كانت قعده جميله

وما تقوله عن شمي النهار ليس بغريب
وإنت كمان يا عنرو ما شاء الله عليك

وده باين في تعليق شمي

أمنياتي

كان نفسي أكون موجود
دي قعده لا تعوض مع برنسيسه وملك

عمرو يقول...

عاشقه الرومانسيه
لا لا ربنا ما يجيب توهان كفايه التوهه اللى الواحد فيها من اللى بيحصل حواليه :)
فعلا بجد نادر الواحد يلاقى ناس بهذه المواصفات فى الزمان ده فالحمد لله على مل الأحوال
شكرا للمرور و التعليق

عمرو يقول...

أحوال الهوى
أهلا أهلا يا صديقى الشاعر الرقيق و بالمناسبه أنا بأحاول أحفظ قصيدتك اللى نشرتها فى آخر بوست من جمالها و عذوبتها :)
شمس النهار دائما تسعى للخير و بصدق لولاها لما نشئت بيننا هذه الصداقه اللى من بعيد لبعيد و أتشوق و الله لليوم اللى نتقابل فيه على أرض الوطن لما ترجع بالسلامه اٍن شاء الله
أشكرك يا صديقى لرقة مشاعرك و اٍخلاصك وتقبل مودتى

عمرو يقول...

princess
شمس النهار فعلا شخصيه جديره بكل تقدير و اٍحترام و من أسعده القدر مثلى بالتعرف عليها فقد كسب اٍنسانه يقل وجودها فى الحياه كلما ساءت أخلاق الناس
أشكرك يا عزيزتى للمرور و التعليق و لك التحية

عمرو يقول...

شمس النهار
و الله يا شمس كل ما قلته مايوفكيش حقك أبدا
و أسمحى لى أنا اللى أشكرك على ما قلتيه فى حقى بالذات حتة الحنيه دى :))
يا سيدتى أولادنا فلذات أكبادنا زهور لسه بتتفتح و محتاجين كل عطف و حنان علشان يكبروا كأشخاص أسوياء محترمين
بس برضو أنتى ماشوفتيش لما بأبص لهم بصة زكى رستم فى فيلم رصيف نمره خمسه بس أنا يومها قلت يا عمرو بلاش تخوفها منك :))
متشكر بجد يا شمس على كل حاجه ..

عمرو يقول...

طوبة ذهب و طوبة فضة
شمس النهار شخصيه ذات حضور طاغى بتفرض اٍحترامها الحقيقه على كل من يقترب منها
وده اللى أستشعرته من زمان من لما تعاطفت مع مشكلتنا بتاعت الأرض اللى فى وادى الملوك
ربنا يكرمها و الله
شكرا يا عزيزتى للزياره و أرجو أن تتكرر

عمرو يقول...

ضد التيار
من غير عياط يا ضد :))
بس علشان تبقى تعرفى تسبقينى بعد كده :)))
اللى بجد حظه كويس هو من يتعرف على شمس النهار عن قرب ..
أشكرك لزيارة المدونه و نورتينا و شرفتينا و الله

عمرو يقول...

عاشقه و غلبانه
ربنا يفرحك و يسعد أيامك
الصدفه اللى خير من ألف ميعاد دى بتيجى لما الظلام بيغلف الحياه بشكل أو بآخر فبيحب ربنا سبحانه و تعالى أن يرتضى عباده المخلصين فى سلك طاعته فبيهاديهم بصدفه كده تنور لهم جانب فى حياتهم
سبحانه يعلم خائنة الأعين و ما تخفى الصدور

عمرو يقول...

صبرنى يا رب
:))
خلاص بقى يا أم خالد فات ميعاد البحث عن زملاء الدراسه و البركه فى زملاء الكفاح :))
أنا تحت أمرك بالنسبه للقصه و ممكن نستفيد من خبرات بعض فى المجال القصصى و ده شىء يسعدنى
بجد و من غير مجامله أسلوبك حلو و سهل بس ليا ملحوظه صغنونه كده خاصه بلغة و مفردات الشخصيات
تقبلى تحياتى و سلامى الكثير لأبو خالد و العيال

عمرو يقول...

حاسوباتيه
أى نعم سبحان الله و الله و يقينى أن الله لا يفعل شيئا بغير هدف
أشكر للزياره و التعليق و دمتى على ألف خير

عمرو يقول...

ماما أموله
أهلا بيكى يا ماما أموله أزيك ؟
أشكرك كثيرا و الله و ربنا يتقبل دعاءك

عمرو يقول...

من غير عنوان
أهلا بك يا صديقى الحكيم
و الله فعلا اللقا نصيب و شمس النهار جديره بتذكر لقاها اللى لا ينمحى من الذاكره
و بج الجلسه دى كانت فعلا يتقصها و جود صديق مثلك فنان لأن كان كل الموجودين فنانين لا يستهان بهم أبدا كل فى مجاله و تخصصه
أشكرك للزياره يا صديقى و التعليق و دمت حكيما تفيد الآخرين و أنا أولهم بتجاربك و أفكارك الرائعه
تقبل تحياتى

VÖltaa يقول...

لقاء فعلا جميل انا عرفته بالصدفة برده وانا بقلب فى المدونات ..!

يا عينى ياعينى عالصدف ..

اينعم انا معرفش حضرتك يااستاذ عمرو ولا البرنسيس شمس النهار .. بس قلبت فى مدوناتكم وماشاء الله عليكم ..

اتمنى حضرتك تنور مدونتى الغلبانة ( لسة عاملها النهاردة والنعمة ومش عايز حد يتريق ..^_^ )

بالسلامة ..

الازهرى يقول...

طبعا يا سيدنا
انت هناك عمال تقابل برنسيسات التدوين والناس الاكثر من الجمال ذاته واحنا هنا موحولين فى الامتحانات وخلافه

عليكم انتم الاثنين حق عرب كبير جدا جدا
ولازم ولا بد تعزمونا كلنا قريب
علشان نتعرف على اتنين من اكتر شخصيات التدوين جمالا ورقة وثقافة

والى هذا اللقاء
تقبلوا منى اجمل التحيات وارق المودة

mahasen saber يقول...

عمرو شموسه دى فعلا اسم على مسمى

شموسه فعلا بتبعث ضؤء ودفء على الجميع

بجد بحبها من غير ما اشوفها
ما بالك بئه لو شفتها واحتكيت بيها

Unknown يقول...

السلام عليكم ورحمة
الله تعالى وبركاته
سبحان الله ياأستاذ عمرو
فعلا الناس الطيبين لازم يعرفوا
بعض ويتالفوا مع بعض من اول لقاء
ما حكيته انت فى جلستك وجهاً لوجة مع
الحاجة شمس النهار استشفيته انا وكل من دخل مدونتها وقرأ لها .بارك الله لك ما عرفتنا وبارك الله لها طيب خلقها
وأخلاقها.ومبروك ياسيدى على الحتة الامريكانى ام مش عارفة 1200 سلندر
ربنا يزيد ويبارك كمان وكمان
يارب ويخليلك اولادك ويفرحك بهم.

"عبير النجار "نيجار يقول...

اولاً بعتذر جدا لحضرتك على تأخيري في زياره مدونتك الرائعه ،
وبشكرك جدا لتشريفك لمدونتي المتواضعه ،
وبوست رائع عن إنسانه رائعه بحق،
تحياتي لحضرتك

Unknown يقول...

هنتقابل فى الاسماعيلية
يوم الجمعه 16/1
الساعه 11 ظ
امام الباب الرئيسى للمستشفى الجامعى
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربعينيات
ومازالت المستشفى تستقبل المزيد
فى اربع رجال فى مستشفى الكهربا
غير ان هناك عدد من الاصابات
فى المستشفى العام
محتاجين
تبرعات مالية
وبعض الملابس
عصائر
معلبات
رقم تلفونى للاستعلام
0188047779
والله المستعان
اللهم اجعل اعمالنا خالصه لوجهك الكريم

خمسة فضفضة يقول...

السلام عليكم ورحمة الله وبركاته

رب صدفة خير من الف ميعاد

تصدق اني انا كمان كنت فاكراكم قرايب من الود والالفه اللي كانت دايما بتبقي في حواراتكم وتعليقاتكم عند بعض

صدق رسول الله صلي الله عليه وسلم لما قال
الأرواح جنود مجندة ما تعارف منها ائتلف وما تناكر منها اختلف

سلام

Kiara يقول...

كل الكلام اللي عن شموستي دا بجد ولا حاجه

انسانه بجد في منتهي الرقه والحكمه

يابختييييييييييييييييييييييييييك بقي عااااااااااااااااااااااااااااااااا


امتي اشوفك ياشموسه

علي فكرا الرد دا وانا في اجازة عن التدوين يحني مخصوص مخصوص لاحلي شموسه في الدنيا