~SUN~ Pictures, Images and Photos

الخميس، 8 يناير 2009

صيدلية ودع أهلك !!


مساء الخير أعزائى المدونات و المدونون ..
سؤال كان دايما بيزن على عقلى زى النحله الطنانه و كنت مابلاقيش اٍجابة مقنعة له أبدا ألا و هو اٍحنا ليه بنسيب حقنا ؟ اٍحنا ليه بنفرط فى حقوقنا بسهوله و تقريبا بسامحة نفس و قناعه مستفزه ؟؟
أنا عن نفسى مش بأسيب حقى أبدا .. و ربنا سبحانه أعطانى من فضله ميزان حساس بأقدر أوزن به الأمور بعقلانيه و حياد و أعرف أحكم حقى ده قد أيه بما يرضى ربنا و آخده و لو ماجاش بالذوق بأعرف آخده بطرق تانيه قد تبدو للبعض غير عقلانيه بالمره ..
هلبت ما بتسألوا عن سبب هذه المقدمه و أيه اللى بعدها ..
وحدوا المولى و صلوا على خير الأنام سيدنا المصطفى شفيعنا يوم الزحام ..
النهارده حوالى الساعه 10 صباحا تواجدت بالصدفه أمام صيدليه شيك و بنت ناس تطلعوا لها كده بكام سلمه حجر على طريق المحور المركزى بتاع 6 أكتوبر قبل اللفه الشمال اللى تدخل على ليلة القدر فقلت فى عقل بالى ما تدخل تاخد الحقنه الأسبوعيه بالمره و أهى فرصه قبل ما تنشغل و تنسى .. و فعلا دخلت .. لاقيت دكتور شاب لطيف صغنون كده و عسوله واقف ورا الكاونتر و قدامه جدع جرم كده شديد السمار لابس على دماغه طاقيه زى بتاعت رشدى أباظه فى فيلم الأسطى أونكل عزت و سويتر جينز مقطع و أيديه يا أخوانا متلغوصه شحم و وساخه و صباعه بيخر دم و لافف عليه حتة قطنه غرقانه دم !!
قلت فى عقل بالى ده أكيد ميكانيكى و أتعور و جاى الأجزخانه يغير على التعويره ربنا ياخد بيده ..
قلت للصيدلى الشاب : سلامو عليكم ..
رد باٍبتسامه مشرقه : أهلا !! (ماشى )
أنا : من فضلك عاوز آخد حقنة ديبوفيت (للى مش عارفين دى حقنة فيتامين ب مركب بتتاخد فى العضل لزوم الدخول على سن الخمسين و ما يتبعها من تداعيات .. شايفك يا اللى بتضحك !!)
الصيدلى الحليوه : تحت أمرك .. يالا يا محمد !!
بصيت حواليا يا أخوانا مالاقيتش غير الأخ المشحم أبو صوبع بيخر دم !! فين محمد ده ؟؟؟
و هوبا للنبى لاقيته بيلف و بيدخل ورا الكاونتر و بيفتح الدرج و بياخد سرنجه و حيبتدى يفتحها !!!!!
المفاجأه الحقيقه يا جماعه لجمتنى شويه !!
بصوت هادىء جدا كالهدوء اللى بيسبق الزوبعه بصيت للصيدلى أبو خدود تفاحى و قلت له : سيادتك أنا عاوز آخد حقنة ديبوفيت مش حقنة ماكستون فورت ..
واضح أنه مافهمهاش و سألنى : نعم ؟
رديت بنفس الهدوء : هو الأخ محمد هو اللى حيدينى الحقنه ؟
قال بمنتهى البساطه : أيوه ..
أبتدا الدم الشرقاوى يتفاعل مع الدم الصعيدى فى نافوخى .. جزيت على سنانى من الغيظ ..
أنا : تقصد حضرتك الأخ محمد أبو طاقية الحراميه و بأيديه المشحمه و بصباعه اللى بيخر دم حيمسك (........) و يدينى الحقنه ؟؟!!
يبدو أن الكلمه اللى بين القوسين زعلته أوى علشان واضح أنه أبن باشوات مش أبن فلاحين ولاد فلاحين زى حالاتنا و الكلمه دى عادى عندنا يعنى ما هى اٍسمها كده فلاقيت وشه أحمر و كشر و قال بنبره عاليه حبتين :
- عيب كده يا أستاذ دى صيدليه محترمه !!
طيب يا عم الصيدلى الحليوه أديك دوست على الزرار اللى بيشغل الوش التانى بتاعى اللى هو زرار الصوت العالى جدع بقى سد عليا .. سيبوكم بقى من فاصل الوش التانى علشان دى مدونه محترمه زى الصيدليه بالظبط :)) و تعالوا نشوف الفاصل الكوميدى فى الموضوع ..
بعد ما فشيت غلى فيه و فى الأخ محمد أبو طاقية الحراميه الصيدلى أتلجم و أنكسر كسرة الفرخه الشمورت و أنا أبتديت أهدى بعد ما فرغت شحنة الغضب الرهيبه اللى كانت جوايا اٍذا فجأتن كده لاقيته بيقول :
- بس برضو أنا ما رضيتش أرد عليك علشان أنا محترم !!
يخرب بيتك ده أنت صيدلى متخلف باين عليك .. أديك دوست على الزرار التانى بتاعى اللى هو زرار الأذيه .. يعنى أفسخك قلم دلوقتى أشلفط لك وشك الأمور ده بأيدى اللى قد المطرحه و لا أعمل فيك أيه ؟؟
لأ .. ده أنا حأدبك بس بطريقه تانيه .. حأديلك درس يا أبنى تفضل فاكره طول عمرك و لو أنت ذكى و لو أنى أشك فى ده يبقى حتستفيد منه كمان ..
قلت له : كده طيب يا دكتور أنت مافيش فايده فيك .. و ربنا لأوريلك ..
الصيدلى الغبى المستهتر ده ما يعرفش لأجل حظه الأغبر أن صاحبى المقرب الدكتور أحمد عبد المغنى حاجه كبيره أوى فى اٍدارة التفتيش على الصيدليات فى 6 أكتوبر و لا ما أعرف اٍسمها أيه يعنى حاجه رهيبه كده من حاجات الحكومه المعتقه .. و اللى ما يعرفوش كمان أنه كان لسه معايا اٍمبارح بالليل و ضاربين سوا ساندوتشين فلافل حمص فى عيش صمون من عند الواد العراقى فالح أبو العنبه اللى فى الأردنيه .. و علشان الصيدلى الغبى المستهتر ده تكمل له الصوره السوداويه فكمان ما يعرفش أن الدكتور أحمد شرير لأقصى حد مع المخطأ و عشقه الأول فى الحياه هو تشميع الصيدليات المخالفه و تشريد أصحابها و عمل قضايا رشوه لا فكاك منها لو حد من أصحاب الصيدليات المخالفين حب يصبح و لا يمسى عليه و أنه بيجد متعه و لذه مهوله لما بيسمع الدعا عليه بالخراب من الناس اللى خرب بيوتهم و قفلهم صيدلياتهم :))
و رحت طالبه على الموبايل و الصيدلى بيتفرج و على وشه علامات الترقب ..
رد عليا الدكتور أحمد بصوته اللى يحسسك أنه فيه كارثه بتحصل قدام عينيه و حكيت له الموقف كله و قلت له اٍسم الصيدليه فطلع عارفها .. و راح صوته مزأطط كده و قال لى طيب أديهولى ال .... ده ..
مش سامع أنا بقى اللى بيقوله الدكتور أحمد لكن شايف رد فعله على الصيدلى الغبى المستهتر و دفاعه الأهبل عن موقفه و كذبه اللى عينى عينك كده و هو بيقول بصوت مخنوق يغلب عليه البكاء : ده يا دكتور موظف الدليفرى و مافيش حد بيدى حقن بس الأستاذ مصر أنه ياخد الحقنه و أنا مش بأعرف أدى حقن !!!
أتجننت أكتر من كذب الصيدلى و اٍنكاره للواقعه زى العيال أمات بيبى !!
بعد ما خلص كلام مع الدكتور أحمد راح مناولنى الموبايل السامسونج أبو 1800 جنيه بالضمان أكمنه بروحين و تقدر تحط فيه شريحتين و هو فى غاية الاٍنفعال و الحزن .. و لاقيت أحمد بيقول لى :
- ده نهاره أسود !! خليك عندك مسافة ربع ساعه و جايين ..
بصيت للصيدلى الغبى المستهتر لاقيته بيستغفر و هم الدنيا على خلقته .. رحت كمان زياده فى الشر قلت له و أنا بأضحك علشان أقهره أكتر :
- ده لسه كمان لما حأطلب لك عمرو بدر بيه بتاع حماية المستهلك :))
كل ده و الأخ محمد أبو طاقية الحراميه واقف يتفرج و لا كأن الموضوع يمت له بأى صله لا من قريب و لا من بعيد و البلاهه اللامحدوده على خلقته و مش فاهم حاجه .. أكاد أجزم أن الأخ محمد ده كان بيدى حقن ماكس فى غرزة نعنشه و أختها فرفشه اللى جنب قلعة قايد بيه اللى فى مقابر الغفير بس تقريبا كده حب يتوب بس يبدو أن ربنا لسه مش رايد له التوبه ..
عاوزين تعرفوا الحكايه خلصت على أيه ؟؟
اٍخطفوا رجلكم كده على طريق المحور المركزى و قبل آخر لفه شمال اللى بتطلع على ميدان ليلة القدر حتلاقوا على أيدكم اليمين صيدليه اٍسمها صيدلية ه . ر مقفوله بالضبه و المفتاح ..
طيب أنا بأعرف أعترض و فاهم كويس مدى المهزله لما واحد أيديه متشحمه من جنزير الموتوسيكل اللى بيوصل بيه الطلبات للمنازل و كمان صباعه بيخر دم و حيدينى حقنه يعنى شىء كوميدى محزن مؤلم .. لكن مش ده ممكن يحصل مع حد تانى لا بيعرف يعترض و لا أصلا يعرف مدى خطورة الموقف ؟
تخيلوا لو حد من البسطاء راجل و لا ست و لا طفل و تعامل مع الأخ محمد أبو طاقية الحراميه و على مرأى و بموافقة الصيدلى الغبى المستهتر اللى كمان كداب و مش متربى تخيلوا أيه اللى ممكن يحصل بعد كده ..
مش صح أبدا أبدا نسيب حقنا تحت أى مسمى و لا أى ظرف و لا أى حجه ..
ما تسيبوش حقكم .. لأن اللى يتعود يسيب حقه مره حيتعود يسيبه على طول ..
ألا هل بلغت اللهم فأشهد ..

هناك 8 تعليقات:

princess يقول...

انا بصراحة من ضمن الناس اللى حضرتك بتقول عليهم اللى مش بعرف اخد حقى(وش مكسوف)
يعنى هقول لحضرتك مثلا لو ركبت مثلا وسيلة مواصلات ومثلا لقيت السواق خلى الاجرة ازيد مش بتكلم
اصل معلش برده انا بنت وحضرتك عارف السواقين وطريقتهم مش هعرف اروح مع حد فيهم ولا اجى
ده مثال بسيط اوى لحاجات كتيرة
متهيالى البنات موقفهم اصعب شوية فى المواضيع الل زى كده
بس بصراحة البوست ضحكنى اوى هههههه
وقريب حضرتك ده ربنا يسامحه عشان بيتبسط بالدعا عليه:)
تحياتى

أمل حمدي يقول...

والله انت صح ولو كل واحد عمل زيك لكل انسان مالوش ضمير يمكن الدنيا تتصلح

تقديري لشجاعتك

من غير عنـــوان يقول...

بــــرافو

أنا مبسوط من تصرفك
أصلها بقت خلطبيطه

لو كل واحد طالب بحقه
بالذوق
بالعافيه
بالمعرفه
بالقانون
بالخناق
المهم يكون حقه زيك كده

ساعتها حينعدل حالنا شوية كتير

أمنياتي

صبرني يارب يقول...

بص انا ممكن ابعتر اي حد واخد حقى ثالث ومثلث بس انت ياعمرو خربت بيت الواد الصراحه ههههههههههههههههههههه

انا حنينه شويه كنت هاكتفي بالتهزيء وامشي لكن ساعات بيبقى نفسي بجد ابلغ عن اي حد مهمل ومستهتر واهبل وغبي كده

خصوصااااااااااا فى ناحية ا لعلاج والدواء

حضرتك مش هاحكيلك انا باعمل ايه فى الدكاتره والصيادله عشان لو حد منهم بيدخل عندك ما يجيش يعلقنى

بس كل الى اقدر اقولهولك ان للاسفه بقى اغلبهم غير مأمون ولا امين تماما على مرضاه

اه نسيت اقولك ان كان فى صيدليه كبيره عندنا فى المنصوره وفى ميدان المحطه كمان وكان فى واحد فى الصيدليه شغال فيها ما كانش بيعرف يقرا ويكتب ولما سألت بنت خالي الى كانت بتدرب فيها امال بيصرف الدوا ازاي قالتلى بالشبه

قشطه ؟؟؟؟؟؟؟؟

وحسبنا الله ونعم الوكيل ربنا يرزقنا باعم احمد من الى عندكم

يامااااااا رجعت دوا للصيدلي او البقال الي واقف مكان الصيدلي لانه صارفه غلط

وباقول الغلابه الى ما بيعرفوش يفرقوا يعملوا اييييييييه

اه على فكره انا باخد الديبو فيت ده من وانا عند 25 سنه ما تزعلش نفسك

بس انا بقى لزوم الانيميا والخلفه وسنينها


تحياتي لك يا عمرو

شمس النهار يقول...

ماشاء الله
ده انت شراني شر
لا لا انا بضحك معاك
طبعا انت اتصرفت صح عشان الاسطي محمد ده ممكن يدي حد حقنه يوديه في داهيه
بس المشكله ان انت تعرف مسؤل استنجدت بيه لكن لوحد تاني وعارف برضه خطورة الموقف بس ماعندوش حد يطلبه كان هيزعق له زعقتين ويمشي والمشكله مش هتتحل
احنا عندنا ازمة ضمير مش اكتر
الصيدلي اللي المفروض انه جاب مجموع كبير في الثانويه العامه ودخل كليه من كليات القمه قمة ايه مااعرفش
المهم
هذا الكائن المتعلم المفروض عنده من العلم انه يعرف خطورة الموقف
بس الضمير مافيش
بس ماعرفناش اخدت الحقنه والا لأ
بعد ده كله

عاشقه وغلبانه يقول...

ههههههههههههههههههههههههه
هههههههههههههههههههه
هههههههههههههههه
ههههههههههههههد
سيبك من الهم اللي الواحد فيه انا قلبي هايقف من الضحك
هو كويس انك مش تسيب حقك بس انت كده خربت بيته وشردته
كنت اكتفيت بلفت نظر
ههههههههههههههههههههه

الجواز و سنينه يقول...

ههههههههههههههههه
و هو انت خربت بيته
بس هو شويه يستاهل
بس لو انت ما تعرفش حد مسأول و عارف تليفونه ماكونتش هاتعرف تعمل حاجه
و ده اغلب الشعب المصرى اللى مضطر يسكت يا اما غصب يا رب يا اما مش عارف ازاى ياخد حقه
ده برضوا يوصلنا لحاجه
اننا اول مره نسمع عن مصلحه بتحاسب الصيادله
و ياترى ده عيب مين؟
احنا لاننا مش عافين و لا لان ماحدش قالنا
او لاننا لو عرفنا هانقفل كل الصيدليات ؟؟؟ انت عارف ان فيه ناس فى الازيه مؤزيين

خمسة فضفضة يقول...

السلام عليكم ورحمة الله وبركاته

ادارة التفتيش الصيدلي مره واحده يا راجل حرام عليك دا انت كده خربت بيته وممكن جدا انه يتمنع من ادارة الصيدليات لفتره طويله وكمان يتمنع من الكوته اللي بتتصرف لكل الصيدليات دا غير البهدله ووقف الحال ماهو قفل يوم في صيدليه مش قليل مابالك بقفل مده طويله

ربنا معاه بس بيني وبينك يستاهل كل اللي يجراله
تعرف ان في صيادله كتير كده مستبيعين وبيعملوا كده واكتر كمان بلاوي وبلاش بقي نصيح لبعض مهما كان احنا ولاد مهنه واحده

ولعلمك الاستهتار الرهيب ده في الصيدليات تلاقيه واضح جدا كل ما كانت الصيدليه في مدينه كبيره لان في العاده التفتيش الدوري بيبقي قليل بسبب قلة عدد المفتشين بتوع الادارة وازدياد عدد الصيدليات وده اللي جالنا من فتح الكليات قدام اعداد رهيبه بتطلع غير مؤهله وكل همها الساعه بكام وهاتشتغل كام ساعه ومش مهم اي حاجه تانيه

بس عاوزه اقولك حاجه ان الغلط اللي حصل ده انت كواحد داخل ياخد الحقنه في صيدليه شريك فيه بنسبه كبيره جدا ، لان اصلا الصيدليه مش مكان اخد الحقن والمفروض ان الصيدلي قبل العيان يرفض انه يدي حقن في الصيدليه لان ده بيعرضه لمخاطر كتير اوي وكفايه انه ممكن يتعرض لقضيه ممارسة مهنه بدون ترخيص ولو حصل للعيان اي حاجه وهو بياخد الحقنه هايروح في داهيه غير لو كان اللي بيديها دكتور او ممرضه

المفروض الحقنه مكانها المستشفي او عياده دكتور او مستوصف ، بس المشكله انه خلاص بقي راسخ في العقول ان الصيدليه مكان اخد الحقن وان الصيدلي اللي مش بيدي حقن ويقيس الضغط ويغير علي الجروح ويركب كانيولا ويفك غرز ويخيط جروح في بعض الاحيان يبقي صيدلي خايب وصيدليه سكه والزباين ينصرفوا عنها

كل ده مش دفاع عن الصيدلي اياها بل علي العكس هو كمان شريك اساسي لانه من الاول وافق انه يشترك في كل ده من الاول ويخضع لظروف السوق ويقبل يستغل شغلانات مش بتاعته

الحمد لله انك عرفت تاخد حقك وتادب الصيدلي الغلبان