~SUN~ Pictures, Images and Photos

الأربعاء، 5 أغسطس 2009

دهب اٍسم على مسمى ..

مساء الخير أعزائى المدونات و المدونين ..
مبدئيا كده عاوز أقول حاجه مهمه و هى اٍن سلسلة البوستات دى اللى عن منتجعات جنوب سيناء ليس الغرض منها اٍلا لفت الأنظار لهذه المناطق شديدة الحسن بارعة الجمال و اللى للأسف الشديد اٍختار المصريون باٍرادتهم أن يحرموا أنفسهم منها بحجج واهيه و غير صحيحه و تركوا متعة زيارتها للغرباء اللى بينهلوا منها بنهم و شغف لا يشبع .. و أكتفينا بالتصييف فى شارع خالد اٍبن الوليد فى اٍسكندريه اللى المشى فيه بيجيب خنقه من كتر الزحمه و قلة الأدب و بلطيم و راس البر و أحيانا عين الصيره و عين حلوان ..
آدى شاطىء دهب :

و آدى شاطىء اٍسكندريه :

و الاٍختيار لك أخى المصيف .. أختى المصيفه !!

و من أهم الحجج الواهيه اللى بنتعلل بيها للعزوف عن التصييف فى سيناء أن الرحله بتتكلف كتير !!

و الله أبدا .. و عن تجارب لا حصر لها فى كل أوقات السنه و ليس تجربه واحده بأؤكد لكم اٍن الرحله و الاٍقامه و الأكل و الشرب و التهييص هناك أوفر بكتير جدا من رحله تقوم بها أسره متوسطة العدد و الدخل لفتره مماثله فى أى مصيف آخر من اللى متعودين عليه ..

صدقونى جربوا و مش حتندموا و على مسئوليتى :)

النهارده بقى حأتكلم عن منتجع دهب ..

دهب و هى دهب .. و صدق اللى سماها دهب ..

البت المايصه الدلوعه دى اللى اٍسمها دهب بتقع جنوب نويبع بحوالى 100 كيلو على خليج العقبه ..
و كانت زماااااااااان مجرد قريه صغيره للصيادين .. قريه شويه بدائيه و لسه آثارها موجوده :

و أيام الاٍحتلال الاٍسرائيلى لسيناء كانت مدينة دهب هدفا للضباط الاٍسرائيليين لقضاء أجازاتهم فيها و خاصة الطيارين اللى لم يتبق من آثارهم فى المنطقه سوى هذه الطائره الخرده اللى عيال البدو بيستعملوها حاليا لعمل البي بى :
و طبعا المحتلين ماحاولوش أبدا أبدا لا يطوروا منها و لا يعملوا فيها أى خدمات لسكانها و لا مرافق و لا أى شىء لعلمهم أنهم حيخرجوا منها اٍن عاجلا أم آجلا .. و أكتفوا بالشماسى الخوص على الشاطىء و اللى لحد النهارده سمه مميزه لدهب ..
فى أوائل التسعينيات الحقيقه محافظة جنوب سيناء عملت تطويرات كثيره و مجهودات فعاله لتنمية المدينه و النهوض بها اٍلى أن صارت قبله لهواة الغطس :

و تسلق الجبال :

و السفارى :


و القفز بالمظلات
و التزحلق على الأمواج :

دهب مدينه سبحان الله ربنا وضع فيها الجمال فى كل شىء !!
فى البحر و تحت البحر و فى السماء و الجبال و فى الهواء و فى الوجوه و فى كل ما يحيط بك هناك ستجد الجمال !!
دهب المدينه نفسها بتنقسم لعدة أحياء بتضم فى مجملها مساكن حديثه بنتها الحكومه و أسكنت فيها البدو عوضا عن الخيام و المساكن البدائيه اللى كانوا فيها .. و مساكن أخرى بناها الأهالى المقتدرين نوعا ما .. و مناطق الفنادق و الموتيلات الشيك الخاصه بالسياح الشيك برضو .. و أشهر منطقه طبعا فى دهب هى منطقة المسبط حيث الممشى السياحى و حيث توجد عشرات المطاعم و الكافيهات و الكامبات الرخيصه و أشهرها كامب محمد على اللى بأنزل فيه دايما ( 25 جنيه الليله للغرفه و بتساع فردين ) .. و آدى النومه فيه كدهو :
و آدى المسبط بالليل .. تقولش حتة ألماظ يا جدع :
نوعية السياح فى دهب مختلفه حبتين عن نوعية سياح نويبع .. السياح فى دهب جنسياتهم متنوعه مش على طول اٍسرائيليين و لو أن السياحه الاٍسرائيليه برضو رائجه هناك بشكل كبير لكن السياحه الألمانى و الطليانى تكسب فى دهب .. لأن هواة الغطس الألمان و الطلاينه بتعجبهم دهب من حيث تنوع أغراضها السياحيه و تكلفة الغطس فيها بتقل جدا عن التكلفه فى الغردقه و شرم الشيخ .. ده غير أن طبعا وجود الثقب الأزرق اللى فى دهب و اللى له شهره عالميه رهيبه بيجذب له عناتيل الغطس من كل العالم .. و الثقب الأزرق ده له حكايه معايا حأحكيها لكم قدام شويه ..
يعنى الحقيقه السياح فى دهب بيبقوا مبهورين اٍنبهارا باللى شايفينه و عايشينه هناك ليل و نهار و بيحاولوا بشتى الطرق التمتع بكل ما فيها .. من أول مشاركة البدو لتفاصيل حياتهم اليوميه زى العجين و الخبز :

و السهر فى كافيهات المسبط للفجر :

و التمشيه بالليل و التسوق من محلات التذكارات السيناويه :


و التجول بالموتوسيكلات الرباعيه :

و التعامل مع بنات البدو العفاريت الزرق فى البيع و الشراء و اللى بيتكلموا عشرميت ألف لغه بطلاقه و الماهرات فى صنع عقود و أكسسوارات من الخرز و الرسم بالحناء و عمل حاجات كده للبنات :

و بالمناسبه فبنات البدو على فكره منتجين جدا و بيعرفوا يكسبوا و يطلعوا الجنيه من حنك العنتيل على عكس الفكره السائده أن بنات و نساء البدو عاله و لا يعملن .. و بعضهم بيعمل فى أعمال شاقه للغايه زى مثلا الاٍطعام و السقايه و السيطره على عدد كبير من الاٍبل العملاقه فى رحلات السفارى على الجمال .. زى البنوته ساره دى بالذمه مش قمر :

الغطس بقى فى دهب له طعم تانى خاااالص .. و له فلسفه مختلفه عن أى مكان يصلح للغطس فى العالم بأكمله .. ليه ؟؟

بصوا الأول على الخريطه دى :

دى خريطه لأماكن الغطس فى دهب شوفوا عددها الكبير و تنوعها اللى الموقع الواحد فيهم كفيل بأنه يعمل حركة سياحه قويه فى دوله من دول الكاريبى مثلا .. و لا يوجد غطاس محترف أو هاوى فى العالم اٍلا و يحفظها عن ظهر قلب و يحتفظ بنسخه منها فى جيبه على أمل واحد ..

واحد فقط ..

الأمل اللى بيراود كل الغطاسين من مشرق الأرض و مغربها و التحدى الأكبر فى حياته أنه يعمل غطسه واحده يتيمه فى أعماق الثقب الأزرق و يطلع منها و هو لايزال على قيد الحياه !! .. واللى حتلاقوا مكانه فى أعلى الخريطه من فوق خالص ..

الثقب الأزرق بيتحول شيئا شيئا لدى الغطاس لحاله من التحدى الشخصى خاصة لو كان بيعانى من أزمه نفسيه ما و لسه خارج من حالة اٍكتئاب حاده و اللى بيثبت بها لنفسه أولا أنه مش فاشل و أنه لو وصل لمنتهى عمق هذا الثقب المفزع و خرج حيا يبقى كده هو من أفضل الغطاسين فى العالم .. و حقق ما قد فشل فيه العشرات من قبله و كان الفشل بيتمثل اٍما فى الموت و اٍما فى عدم القدره على الوصول لنهايته و يكون الرجوع للخلف رجوعا مؤلما و حزينا لأى غطاس ..

الثقب الأزرق دى بوابته :

مكان يبدو عاديا جدا و لا ينم عما يوجد تحت هذه المياه الهادئه ..

لكن الفتحه اللى بتظهر بلون غامق شويه فى الصوره و اللى بتبدأ بعد متر واحد من سطح الماء بتؤدى لممر مائى مظلم طوله 60 متر بالتمام و الكمال .. و شويه شويه و كلما أوغل الغطاس فى العمق بيبدأ فى الاٍنفصال عن الواقع الحقيقى شيئا فشيئا مع خفوت ضوء الشمس تحت الماء و بداية الاٍظلام التام و أول تنبيه للغطاس ممنوع تماما النظر لأعلى حيث سطح الماء :

و بعده نفق ضيق للغايه من الصخور الحاده شديدة الصلابه المغطاه بالشعاب المرجانيه طوله 20 متر تانيه و النفق ده شديد الظلام فعلا و ده اللى بتحصل فيه حالات الوفاه المتكرره تقريبا بشكل أسبوعى بين الغطاسين بسبب ما يسميه الغواصين صدمة النيتروجين و اٍختلال الضغط فى تجاويف الجسم حيث يتطلب هذا العمق موازنة الضغط الخارجى الرهيب للماء مع الضغط الداخلى و ذلك بسد فتحتى الأنف و النفخ فيهم بشده و هى عمليه سهله و بسيطه و لكن تحتاج لتدريب و تنظيم .. ده بداية النفق :

بعد نهاية النفق المظلم بيوصل الغطاس للقاع حيث يرى بعينيه ما لا يخطر على بال :

قليلون من أستطاعوا أن يلمسوا بأيديهم ما ترونه فى الصور دى على هذا العمق المخيف ..
لا اٍله اٍلا أنت سبحانك اٍنى كنت من الظالمين .. تسبيح بيظل القلب يردده بدون اٍراده للخلاق العظيم حيث لا شىء يعصمه من الموت فى ثوانى اٍلا قدرته ..
مخلفات الغطاسين الغرقى اللى لم يجرفها التيار تتناثر على القاع و تذكر الغواص بمصيره لو فقد السيطره على أعصابه و أستسلم لمخاوفه و للهلاوس السمعيه و البصريه اللى بتصيب الاٍنسان فى العمق ده ..
الغريب فى الأمر اٍن الغطاس بيبقى عارف أنه على بداية فقدان للوعى كلما أوغل فى العمق و بيبتدى يسمع حاجات غريبه أصلا مش موجوده زى أصوات موسيقى و كلام مش مفهوم و صوت قطار سريع و حاجات من دى و لكن برضو بيستمر فى الغوص و كأن فيه حاجه مجهوله بتشده لهناك ..
أهم حاجه أن يحافظ الغطاس على توازنه العصبى و يتبع اٍرشادات المدرب أو المدربه اللى معاه بمنتهى الدقه و الثقه فيهم و خاصة أثناء الصعود للسطح حتى لا يصاب بالتسمم الرئوى أو اٍنفجار المخ و الأمعاء و لا يتسرع فى الاٍنتقال من عمق لآخر و اٍلا مش حيطلع تانى أبدا ..
و دول عتاولة الغطاسين الألمان و هم من القلائل المتخصصين فى مصاحبة من يريد اٍقتحام الثقب الأزرق بمبلغ و قدره و متخصصين أيضا فى اٍنتشال جثث الغرقى من هناك .. بالذات البنت الطليانيه النحيله الهزيله دى اللى تحت المياه بتبقى زى الحوت :

من أمتع النشاطات اللى ممكن أن تمارس هناك القيام برحلة سفارى فى عمق الصحراء المحيطه بدهب .. و للسفارى عدة أنواع منها ما يكون على ظهر جمل أو بالموتوسيكلات الرباعيه أو بواسطة السيارات الجيب .. و فى كل الأحوال فلابد من وجود أدلاء من البدو العارفين بدروب و مسالك الصحراء و اٍلا أنتهت الرحله بما لا يحمد عقباه ..
و أهداف رحلات السفارى كمان مختلفه و متنوعه .. فمنها ما يكون بهدف المكوث فى الصحراء للتأمل و لا لشىء آخر سوى ذلك فى خيام صغيره معده تتسع لفرد واحد و أنت بقى و حظك فقد يكون رفيقك فى الرحله و فى جلسات التأمل و الحوارات الشخصيه و الفلسفيه تحت قمر الصحراء البديع كده و لا حول و لا قوة اٍلا بالله :

أو كده بسم الله ما شاء الله :

و كل واحد بقى و نصيبه ..
طبعا الرحلات اللى من النوع ده مش بتزيد عن يومين أو تلاته و بتتكلف مش أكتر 250 جنيه أو 300 جنيه و ده بيشمل الاٍنتقالات من و اٍلى دهب بواسطة الأخ البدوى اللى بيوديك للمكان و بيسيبك هناك و بيرجع لك فى الموعد المحدد يرجعك و بيشمل كمان اٍيجار الخيمه و الطعام اللى عادة بيكون معلبات و خبز جاف .. و طبعا الماء شىء أساسى ..
رحلات التأمل الصحراويه بتبقى فرصه كويسه أوى للبحث عن الراحه النفسيه و الصفاء الذهنى المفتقدين وسط صخب و جنون المدينه .. و كمان فرصه برضو عظيمه للعوده للحياه البدائيه البسيطه و تنقية الروح من شوائب المدنيه ..
و أما بقى التعرف بالنهار على البيئه الصحراويه المحيطه بك فحدث و لا حرج .. و أيضا لا تدع الفرصه تفوتك للتعرف على جيرانك الجدد هناك بل و اٍحترامهم لأنها مخلوقات الله الضعيفه و لأنك ضيف عندهم زى الآنسه دى :


و الشاب الوسيم ده اللى كان بيدور على عروسه و طول الليل بينكش فى الكراتين :


أما العصافير الحمراء اللون الموجوده بكثره فى الصحراء فأمرها عجيب و الله لأنها جريئه جدا و لا تستحى أنها تشاركك الطعام من الطبق بتاعك بتباته متناهيه :


بس كله كوم و الأخوات التلاته الرخمين دول كوم تانى !!

التلات حمير دول أصلا هربانين من صاحبهم حميد اللى يأس من الاٍمساك بيهم لأنهم مستخبيين فى منطقه جبليه شديدة الوعوره و مطاردتهم فيها خطوره كبيره فكان يكتفى بسبهم و الدعاء عليهم أن يقعوا من أعلى الجبل و تنقطم رقبتهم من غيظه منهم و يحدفهم بالحجاره اللى كانوا بيتفادوها بمهاره فائقه و يردوا عليه الشتيمه بنهيق و تجعير يتردد صداه الرهيب بين الجبال فيخرج الواحد من هدوءه و تأمله و لا يسعه غير تحديفهم هو أيضا بالحجاره من الغيظ ..
و أثناء تجوالك بالنهار فى الصحراء المحيطه بالمخيم أكيد حتلاقى ما يلفت النظر و يستوقفك لتتأمل الحكمه الربانيه فى خلقه .. زى مثلا يعنى هذه النبته الخضراء وسط هذه الأمواج الرمليه الجافه !! سبحانك اللهم و بحمدك رزقتها الحياه فى وسط الأرض الموات :


و من أفضل ما يمكن أن تتفاجىء به أثناء تجوالك النهارى الدائره البيضاء الكبيره المرسومه بواسطة البدو على الرمال و اللى بتعنى أنه بيوجد بئر تصلح مياهه للشرب فى محيط هذه الدائره :

و ده طبعا كنز لا يقدر بمال الدنيا للجماعه اللى بيعملوا سفارى على ظهور الاٍبل و اللى بتستغرق مسيرتها عدة أيام وسط الصحراء القاحله حتى الوصول لواحة عين خضرا المذهله بنخيلها و عيون ماءها المثلجه و بأهلها شديدى الكرم و خفة الظل و بالزراعات العجيبه اللى رائحة زهرتها لما بتعبق هواء الواحه فى الربيع بتسطل اللى دماغه خفيفه زى حالاتى :
نيجى بقى للمغامره الحقيقيه ..
يا سلام على رحله لزيارة منطقة التلال البيضاء و الحمراء و اللى بتعتبر برضو داخله ضمن نطاق رحلات السفارى ..
اللى بيقوم بالرحله دى بيحمل معه حقيبه صغيره يسهل حملها على الكتف بتحتوى على بعض الأطعمه الخفيفه و زجاجتين ماء و شوية تجهيزات بسيطه للاٍسعاف فى حالة حدوث اٍلتواءات أو جروح ..
و كلما طبعا صغرت الحقيبه و خفت الحموله كلما كان ذلك أفضل لأن ده سيساعد كثيرا فى السير و التسلق .. يعنى بلاش تعملوا زى البنت الألمانيه دى و تشيلوا هذا الكم من الشنط المليئه بأصناف الطعام و الحلويات و اللى فكرتنى بالسيدات المصريات اللى بياخوا معاهم فى الجنينه و لا فى النادى كميات أكل تكفى عزومه :

و نصيحه تانيه مهمه أن لا يقوم بهذه الرحله الشاقه اٍلا الواثق من لياقته البدنيه أو على الأقل يستعد لها قبل القيام بها بشوية تمارين لتنشيط العضلات حتى لا يضطر كل شويه لطلب المساعده من السائحين اللى بيتنططوا زى الغزلان بمنتهى اللياقه و هم بيبتسموا كمان ( وش متغاظ أوى )
و أيضا اٍرتداء ملابس واسعه لتسهيل الحركه .. و أحذيه خفيفه .. وربط أنكل القدم برباط ضاغط علشان ما يلتويش أثناء السير و التسلق ..
باٍختصار كده و من الآخر المشوار ده صعب جدا و لا يقدر عليه بجد اٍلا الشباب العفى اللائق جسديا ..
الرحله للمنطقه بتستغرق حوالى يومين و هناك فيه أدلاء مخصوصين بيستلموا أبن آدم من زميله اللى جايبه من دهب .. و بالتأكيد الدليل ده حافظ كل الممرات اللى بداخل التلال كما يحفظ كف يده خاصة أنها تماما كبيت جحا و التائه فيها قولوا عليه يا رحمن يا رحيم و متهيألى كده أن متاهة بنى اٍسرائيل كانت وسط هذه التلال العجيبه :
و فيه مناطق فى هذه التلال وعره جدا و يصعب تسلقها و تحتاج لقوه بدنيه و لياقه هائله .. و حتلاقوا فى بعض المناطق سلالم خشبيه عاملينها البدو بطريقه بدائيه لكن جيده لاٍستعمالها .. و من ضمن المهام الوظيفيه للدليل البدوى صالح اللى على راسه كوفيه حمرا اللى فى الصوره دى أنه يسند السائحات اللى مش بيعرفوا يتسلقوا كويس :شغلانه لطيفه و مش بطاله برضو و ممكن يتحسد عليها ..
تكوينات الصخور و تدرج ألوانها بجد شىء يفوق الوصف !!
من الأبيض الناصع للأسود اللامع مرورا بكل الألوان المعروفه و الغير معروفه و بعضها طبقات فوق بعض و بعضها يتداخل فى دوائر خلابه و تدور فى الأذهان أسئله كثيره محيره عن الحكمه الاٍلهيه من هذه التشكيلات البديعه و دائما تتردد فى النهايه كلمة : سبحان الله !!
يعنى شوفوا التكوين البديع ده !!
شوفوا تدرج الألوان و تداخلها !!
سبحان الله ..

أهم ملحوظه بقى فى المشوار ده اٍن الجماعه الأجانب دول عندهم مبدأين محترمين جدا و عجبونى أوى .. أول حاجه أنهم بيعملوا كل حاجه بحب .. مافيش حاجه مفروضه عليهم .. و بيخلصوا فى حبهم للأشياء لدرجة العشق و الوله .. فتلاقوا أى حاجه بيعملوها بتطلع منهم متقنه ..
الحاجه التانيه أنهم بيحترموا الأشياء .. أى أشياء .. ماشفتش واد و لا بت خوجايه بيحفروا على الصخر الجميل ده قلب و جواه سهم و حرفين أساميهم .. ماشفتش حد منهم بيرمى عود كبريت على أرض الصحراء الشاسعه و لا بيقضى حاجته ورا صخره و يقولك أمال أعمل أيه يعنى أعملها على نفسى ؟؟يا جماعه دول بيحافظوا على التراث اللى ربنا خالقه متعه للعين كمحافظتهم على نظافة بيوتهم ..

و أنقهرت و ربنا لما أفتكرت المناظر و الحركات المؤذيه من طلبة المدارس بتوعنا فى رحلاتهم للمتحف المصرى و لا لمنطقة الأهرامات و أبو الهول .. و الرسومات و الكلام القذر المكتوب بأيدين الأحفاد على قواعد التماثيل و المسلات اللى تركوها الأجداد فى الأقصر ..

بس برضو اٍحنا أحسن منهم ..

نعم ؟؟ بأمارة أيه ؟؟

مش عارف و الله بأمارة أيه .. بس اٍحنا أحسن منهم و خلاص ..

و نرجع مرجوعنا تانى لدهب :)
دهب المدينه اللطيفه الظريفه الحلوه بناسها و اللى بيشتغلوا فيها بمنتهى الجديه و الجدعنه و تقريبا لا المطاعم و لا الكافيهات و لا المحلات بتقفل على مدار ال 24 ساعه ..
بأستمتع أوى فى دهب بصحبة حبيبى و صديق السنين زينهم الشهير بزينهم بامبولينو و هو اللى أطلق على نفسه هذا الأسم الطليانى حبا فى زعيم عصابة المافيا فى نابولى ..
و هو رجل أعمال ناجح و عنده مطعم شيك أوى فى دهب بيطل على البحر مباشرة .. و هو أصلا أبن بلد من العباسيه القديمه و دمه خفيف أوى أوى و له من النوادر ما يملأ مجلدات :)
منها مثلا أنه لما أراد أن يفتتح كافيتريا فى المسبط ملحقه بمطعمه طلب منى أقترح عليه اٍسم يجذب السياح الاٍسرائيليين !!
أتغظت أنا بصراحه و كعادة الفلاحين لم أبين غيظى و كتمته جوايا .. فكرت شويه و فى لحظة تجلى و كأنى لاقيت التايهه قلت له :
- نيوهولوكوست .. هو ده أحسن اٍسم يا زينهم !!
الراجل فكر شويه كده و سألنى فى حيره :
- يعنى معناته أيه بالعربى ده ؟؟
جاوبته :
- نيو يعنى جديد يا زينهم .. و هول يعنى ثقب .. و كوست يعنى شاطىء .. يبقى الاٍسم معناه أييييييه ؟؟
فكر شويه كده و قال فى شك :
- يعنى ثقب الشاطىء الجديد ؟؟ هو فين الثقب ده ؟؟
كتمت ضحكى بالعافيه و شاورت له فى اٍتجاه الثقب الأزرق فى مياه الخليج :
- بالظبط كده يا زينهم الثقب الأزرق هناك أهو و كافيتريتك بقى هى الثقب الجديد ..
اٍقتنع زينهم بكلامى و فرح بالاٍسم اللى كتبه بحروف اٍنجليزى من اٍملائى فى ورقه علشان ماينسهوش و عارفين طبعا الهولوكوست ماذا يعنى لليهود .. و شرع فى تجهيز الكافيتريا و فرشها و لما بدأ فى كتابة اليافطه عند الخطاط اللى فى المدينه كان السياح اليهود بيمروا فى الشارع و يوجهوا نظرات ناريه كلها كراهيه للخطاط اللى بيكتبها ظنا منهم أنه شعارمش يافطة كافيتريا و كان بعضهم بيصور اليافطه و زينهم بيضحك فرحان و فاهم أن اليافطه عجباهم .. و لاحظ زينهم بعد شويه تجمعهم قدام اليافطه بالعشرات و نظرات الحقد و الغضب فى عينيهم بل و بدأ بعضهم فى الاٍتيان بحركات يعاقب عليها القانون بأيديهم لزينهم فخاف منهم و سألهم هو فيه أيه يا جدعان ؟؟
و لما فهم الحقيقه أستشاط غضبا و زعل منى بصراحه و كدنا أن نفقد صداقتنا أثناء العتاب لولا مرور سائحه أوكرانيه قدامنا طيرت عقله ( و ما طيرتش عقلى ) و خلته يسيب القهوه اللى كنا قاعدين عليها و طار وراها ..
السائحه الأوكرانيه دى عملت عنده فيما بعد فى المطعم .. و كان جمالها الأخاذ سببا فى اٍكتظاظ المطعم بالرواد .. و كانت نهاية جيتا - و هذا اٍسمها - مأساويا على يد زوجة زينهم اللى ضربتها بكوبايه فى وشها و خدت فيه 6 غرز بعد أن يئست من زوجها و أيقنت أنه فعلا بيميل لهذه الأوكرانيه الحسناء .. و كانت مشكله كبيره للغايه و خلصت بقرشين تعويض للبنت الأوكرانيه اللى لسه موجوده فى دهب لحد النهارده ..

دهب كمان بتعتبر نقطة اٍنطلاق لسانت كاترين حيث زيارة الدير الأثرى و المسجد اللى بناه عمرو ابن العاص هناك .. و حيث و هذا الأهم زيارة جبل موسى القريب من جبل سانت كاترين ..
زيارتى لجبل موسى و وقوفى فى البقعه المباركه اللى تلقى عليها كليم الله موسى عليه و على نبينا الهادى الأمين أفضل الصلاة و السلام الوحى تجربه روحيه اٍنسانيه جديره بالحكى ..


فأنتظروا البوست القادم ..
مع تحياتى ..

هناك 62 تعليقًا:

شمس النهار يقول...

صباح الخير يالورد :)
انت كالعاده اثرت مليون قضيه واهمها اننا دايما بنستسهل ونستقرب وبنخاف من التغيير ليه مش عارفه
العيله من دول تحط عينها علي مصيف يقضوا عمرهم محبوسين فيه علي طول
بس ماشاء الله عليك كاتب رحلات ماهر بتحسسني بالمكان تماما
انا سمعت عن الثقب ده بس اول مره اسمع عنه بالتفصيل كده ده انا خفت وانا بقرا والصور جميله جدا بجد تسلم ايدك

أحــوال الهـوي يقول...

والله باحبك يا عمرو بيك

انت فيض من المحب و كنز من الاخلاص وافضل من يكتب بسلاسه عن نعم الله علي ارض هذا الوطن

انا ايضا استمتعت بالرحلة معاك لاني لمست كل ذرة .رمل مشيت عليها و كل لسعه من الشمس لفحة و جهك و كل ابتسامة قلب زغزغتها السعادة

انت كنز متحرك و خسارة البوست ده يبقي محدود و لو عندي الصلاحيات لنشرة في الكتب و المجلات واسعة الانتشار لفعلت

و مهما قلت مش هاوفيك حقك

لانك وصفت و اجزلت و اعطيت حتي اني سافرت برحلة مجانيه الي دهب و غطست و انا يا دوب باعرف اعوم


تحياتي

♥نبع الغرام♥♪≈ يقول...

السلام عليكم

كل سنه وحضرتك طيب
وكعادتك
بجد مبدع الله عليك شوقتنا قووى للاماكن الجميله دى
ربنا يسعدك كمان وكمان

دمت بالف خير
تحياتى

ايناس

د. ياسر عمر عبد الفتاح يقول...

جميلة بجد أوي
أنا مكنتش متوقعها بالجمال ده


بس برضه مش هروحها :(

غير معرف يقول...

مذهوله من شخصيتك و كلامك و اسلوبك
و الله مذهوله
انت حقيقى؟

من غير عنـــوان يقول...

طيب ده بوست عايز شهر قرايه وتعليق

وحشتني يا حاج عمرو

ووحشتني البوستات ادسمه

فقدت الكثير ببعدي

اتمنى لك كل الخير

بوست رائع عن جزء رائع من مصرنا

زرت أنا دهب من شويه زمان كده

أمنياتي

طوبه فضه وطوبه دهب يقول...

bgd bgd t7fa lo fe aktr mn kda kont olt tslm aydk ya astaz 3amr wtsfek 7ad 3la gmal el m3lomat el wasltahlna

بنجاواتى يقول...

الله على دى رحلة

بجد انا حبيت دهب من الحكاية

وحكاية ابلو هول دى جميلة وغريبة

بجد ربنا يخليك متعتنا بالرحلة الجميلة

تحياتى

كلمات من نور يقول...

لا زلت مصمصمة على نشر روائعك هذه في كتاب

يلاشد الهمة والله وترجم الجمال داه للغات أجنبية علشان نعرف التاجانب بمصرنا الجميلة وكنوزها

أما بالنسبة لهذه الأماكن فهي أجنبية حتى النخاع يا سيدي يعني أنا فاكرة من كام سنة رحت الغردقة في قرية كنا احنا المصريين الوحيدين وسط جماعات من الألمان و الإيطاليين

أختك من نوعية ممنوعه من الشمس والحر وباتضايق من السخونية فكنت افضل تحت الشمسية باشتغل كانافاه لغاية قرب المغرب و أساسا كان حجابي وربي يسامحني من نوعية البنطولنات والبلوزات الطويله والطرحه الصغيرة..لقيت الأجانب بيبصولي باذبهلال أي والله ويشاروا عليا ويضحكوا بشفقة لدرجة لقيت زوجي مستغرب مالهم دول

تقريبا الأفواج كلها عملت كده و أنا قلت لزوجي تلاقيهم بيحسبوك سي السيد عبد الجواد قاعد بالمايوه و في البحر إنت والبنين و أنا يا حبة عيني أمينة قاعده تحت الشمسية اشتغل تابلوهات وكانافاه للبيت

المناظر هناك مؤسفة يا سيدي و السباحة شبه عراة تخلي العيال تتسائل والرجال يجيلها حول مؤقت

أمل حمدي يقول...

بسم الله ما شاء الله

رحلة رائعة بأسلوب أروع

امتعتنا برحلاتك

وفي انتظار الباقي

دمت بحفظ الله

تقديري

mohamed ghalia يقول...

بجد شوقتنا أوى نروح دهب
واضح انى المكان روعة فعلا
تسلم ايدك على الصور

الجواز و سنينه يقول...

الله الله الله
و الله مزجتنى جدااااااااااا
يمكن علشان انا هاتجنن كمان علشان اسافر بس الظروف مش جايه صح معايا
و فعلا اتخنقت من كتر ما روحت اسكندريه
و انا اصلا مش تقليديه و بحب التغيير فعلا ليه كل مره نروح نفس المكان ما تجرب غيره ده حتى حاجه صحيه
احنا حتى مش بنغير حكمنا إلا فى حالات الوفاه
اظاهر ده طبع فينا و جينات
عجبتنى اوى صوره الصخره بأوانها البديعه بس كان نفسى اشوف فيها كلمتين كده من اللى يسروا القلب زى للذكرى الخالده و الكلام الحلو ده
بس بجد تسلم اديك لان بجد انا غيرت جو و انا بشوف البوست الهايل ده

خمسة فضفضة يقول...

السلام عليكم ورحمر الله وبركاته

مش باقلك انك عاوز تغيظنا ههههههههههه

عارف حضرتك زمان في نص التمانينات كده لما الحكومه بدات تهتم بسينا وتشجع الموظفين انهم يروحوا هناك ، جت لامي فرصه انها تروح جنوب سينا تبع الشغل بتاعها ويدونا شقه وكمان المرتب كان هايزيد كتير اوي مع ان انا واخواتي كنا فرحانيين وعاوزين نروح بس للاسف هي ما وفقتش خافت تبقي لوحدها وهي بتعيل 3 اطفال لسه ما بدأوش حياتهم


ايامها انا زعلت جدا ، بس عارف دلوفتي زعلانه اكتر لما بقراء البوستات دي وافتكر اني كنت ممكن جدا ابقي عايشه هناك

سبحان الله علي الجمالي الرباني

باعترف اني في حاجات اول مره كنت اسمع عنها موجوده في دهب خصوصا الثقب الازرق

ويا سبحان الله الناس اللي صدعونا باهمية السياحه واهمية عمل دعايه علي مستوي العالم عن الاماكن السياحيه اللي عندنا ومدي جمالها

ليه مش بيبدأوا الاول من الداخل خصوصا ان السايح المصري هو اللي ممكن جدا يكون الخطه البديله لو قلت السياحه العالميه لاي سبب لا قدر الله زي ما حصل سنة 98 بعد حادثة الاقصر وكانت كل فنادق مصر بتنش خصوصا اللي في جنوب سينا ليلة راس السنة اللي المفروض انها بتبقي كومبليت

والناس بدأت تهتم بالسايح المصري وتوجه له برامج خاصه واغرائات كتير عشان يحل محل السياح الاجانب وفعلا لسياحه الداخليه هي اللي انقذت الوضع

لما قريت البوست ده افتكرت البرامج التافهه اللي كانت بتيجي في التليفيزيون المصري واللي ماكانتش بتوصف واحد علي مليون من اللي الاماكن اللي بتروح تصورها ومع ان المفروض كانت بتصور صوت وصوره بس عمري ما حسيت اني في قلب المكان زي ما بقرا هنا البوستات الاكثر من روعه بتاع حضرتك



صراحه يا استاذ عمرو انت المفروض تشتغل في الدعايه السياحيه هاتنجح كتير



معلش رغيت كتير

سلام

dr.lecter يقول...

لوز لوز لوز

في انتظار صور سانت كاترين ان شالله

حاسوباتيه يقول...

فعلا سمعت عنها قبل كده بس بصراحه حضرتك وصفتها بجمال كبير وكمان الصور رائعه بجد وهي فعلا اسم على مسمى وربنا يسهل يارب واقل ازورها في يوم من الايام

عارف حضرتك انا بزعل قوي لما بلاقي الحاجات الجميله دي عندنا ومابنروحهاش وناس بيجولها من كل العالم واحنا اهو في نفس البلد ومابنروحهاش بس يلا ربنا يسهل ونروحها في يوم

الازهرى يقول...

والله عندك حق فى موضوع المصايف ده
لكن تعمل ايه بقى
الناس فى بلدنا بيخافوا يجربوا او يغيروا
يعنى انامثلا الاسبوع ده فى الأقصر
تقول لى مش مصيف ؟
أقول لك لأ مصيف وعديها بقى وأمرنا لله أكل العيش يحكم
إنما اسكندريه انا أرحها فى شهر مارس أو أكتوبر مش أكتر
وبخصوص دهب فزى ما قلت لك قبل كده صعب أرجع سيناء من تانى مع انها أجمل مناطق انا رحتها لكن غصب عنى

أما بخصوص المقلب فعجبنى جدا
وفكرنى بأستاذ المقالب محمود السعدنى
تعرف ان يوسف السباعى طالب بقانون يحمى المغفلين منه

وبصراحه موافقك جدا على موضوع اهتمام الاجانب بالحفظ على كل شىء بعكسنا

تحياتى دوما

غير معرف يقول...

اقول ايه كل بوست اقول عليه تحفة
ياتى اللى بعده اكثر منه
بس معقول ة الاسعار هناك رخيصة
عن المصابف فى اسكندرية
طبعا هو هناك احس بكثير لكن الاسعار اكيد برضه اكثر بكثير ده اللى احنا نعرفه
عموما انت اخدتنا لهنك بدون ولا مليم
بس ياخوفى من ملحقات الرحلة من السائحات واضم صوتى لاختى كلمات من نور
فى تجميع هذه الرحلة فى كتاب
وترجع بالف سلامة

قيس بن الملووووح يقول...

من خلال البوست كأننا زرنا المكان

صبرني يارب يقول...

وبعدين معاك بقى

ده انا عشان اعلق على البوست ده عايزه اكتب بوست بحاله

معقوله كده

بوست روعه جدااااااا بجد

الصور مش مممممممممكن

والكلام انت عارف رايي

بس حركة النيو هولو كوست مت من الضحك على فكره

الواحد يخاف يغيظك بقى
ههههههههههه

غير معرف يقول...

أنا بقترح أن حضرتك تعمل كتاب في أدب الرحلات اللي حضرتك بتكتبه ....... ويتوزع على السياح العرب وكمان المصريين ..... بدل اعلانات نورت مصر اللي بالك فيها :))

رائعه دهب ...... وحديثك عنها أروع

ومازلتُ أتعلم يقول...

الله
سبحان الله
مصر جميلة جداً بأماكنها وناسها

أنا عايزة اسافر خلاص مش قادرة أقعد كده
ومكان زي ده هيريحنى نفسياً جداً

شكراً للصور
أول زيارة عن حضرتك
وبإذن الله مش الاخيرة

جزاكم الله خيراً

شمس النهار يقول...

صباح الخير يالورد:)
ايه ده؟؟؟
البوست ده ماظهرش كله عندي في امريكا
لا كده النت الامريكاني مضروب بقا
انا جيت اقرا البوست تاني وافرج ماما الصور لاقيت حاجات تاني

الصوره الجميله جدا جدا اللي ربنا ابدع في الونها دي ماشفتهاش
وعلي فكره الاجانب فعلا مش احسن مننا
بس همه اغلبهم مفعليين الضمير شويه
ومن صغرهم سواء في المدارس او البيت بيعلموهم القيمه
عارف كلمة قيمه دي بحرها واسع
وبتفعل الضمير
عشان اول حاجه ان الانسان بيحس بقيمة نفسه الاول

كمان الحفاظ علي الطبيعه والجمال الرباني

احنا ماعندناش اصلا احساس باجمال والا بنفسنا

بس مقلب زينهم ده جامد اوي يالورد
للدرجه دي علي نياته
وانت مش ممكن مالكش حل
:)
اخبار التصريح ايه والا خلاص
ضربناك عين يالورد
استنا بقا لما تاخدنا كلنا كده برابطة المعلم
واهو عشان نشوف ومانرجعش نقر عليك تاني ونحرم
سلام:)

سنابل يقول...

احلى من الخيال يا عمرو
بوست رائع وحكى فوق الوصف
اطمن خالص من ناحية الحسد والقر انت نقلتنا بحكيك كأننا معاك تمام
وبعدين الصور دى عندنا ؟بتاعتنا يعنى ؟معقول الجمال ده
(ربنا ما خلقت هذا باطلا سبحانك فقنا عذاب النار ) صدق الله العظيم
تسلم ايدك

خلى بالك من نفسك واستمتع بنعمة ربنا على قد ما تقدر

تحياتى وتقديرى

بسنت صلاح الدين يقول...

سبحان الله الذى خلق فأبدع ،مناظر جميله فعلا و روعه احنا محرومين منها بجهلنا للمناطق دى ،بجد شوقتنا نزور الاماكن دى و نعمل لنا ذكريات حلوه كده و حكايات، يوست اكتر من رائع و اسلوبك ياخد العقل الى العالم تانى،رحله سعيده يارب

احساس طفلة محبة للرومانسية بس واقعية يقول...

مذهوله من شخصيتك و كلامك و اسلوبك
و الله مذهوله
انت حقيقى؟

واللهى عجبنى التعليق دا
اصلى كنت حاسة نفس الاحساس لما عرفت مدونتك ولسة مستمر برضو
اصل انت بتقول حاجات غريبة معرفهاش عن مصر وكأنك بتروح مكان تانى
عالم تانى جميل اسلوبك فى نقل معالمة
يجذب اى حد انه يزوروا
الصور فوق الممتاز بتخدنى للعالم دا لدرجة انى بتمنى ابقى هناك فعلا واتأمل واستمتع حتى بالامور الشاقة والمجهدة

بانتظار البوست القادم وكل بوستاتك اللى مهما كبرت لازم تتقرى
تقبل مرورى

MaNoO يقول...

مليش دعوة بقى انا كمان عايز اروح الأماكن دى والواضح انها رخيصة جدا ومش مشكلة انها بعيدة لاننا شبابا انا مش عارف طيب ايه اللى مانعنا بقى بجد مش عارف اقول لحضرتك ايه يا استاذ عمرو اول مرة فى حياتى افكر اعمل حاجة لمجرد انى قرات عنها بس قرار سريع اوى لازم ان شاء الله اروحها قريب يااااااااارب يقدرنى

عمرو يقول...

شمس النهار
صباح الخير يا برنسيس :)
فعلا بنخاف من التغيير و دى يظهر سمه فى الشخصيه المصريه بدليل المثل اللى على طول على لساننا : اللى تعرفه أحسن من اللى متعرفوش !!
الثقب الأزرق ده حاجه معجزه ربانيه لا مثيل لجمالها فى بحار العالم بس ماتخافيش المهم يكون معاكى غطاس متمكن و أنتى فيه ..
متشكر ليكى جدا و ترجعى بالسلامه اٍن شاء الله ..
تقبلى كل التحيه و الموده و التقدير ..

عمرو يقول...

أحوال الهوى
و الله و أنا كمان بأحبك يا دكتور عصام لشخصيتك الجذابه و أخلاقك الرفيعه و سمو مشاعرك و رقتها و لموهبتك اللى لا يختلف عليها أتنين ..
متعة الرحله الحقيقيه يا دكتور لما تحس أنك أنجزتها بجد .. و أنك قدرت تكون قد التحدى تحت الماء و فوق الجبال و فى الصحراء الشاسعه المهيبه و الواحد بجد بيخرج من التجربه دى و قد أزداد صلابه و قدره على التحمل هو نفسه ماكنش مقدرها بداخله ..
متشكر لك جدا جدا و نلتقى قريبا اٍن شاء الله على خير ..
تقبل تحياتى و تقديرى ..

عمرو يقول...

عاشقة الأحزان
و عليكم السلام و رحمة الله و بركاته ..
و أنتى طيبه و ربنا يعيد علينا رمضان بكل خير اٍن شاء الله ..
الأماكن هناك حقيقى ساحره و تستاهل التعب و المغامره و لكنها مغامره مأمونه مش زى ما كتير فاهمين ..
متشكر ليكى جدا و تقبلى تحياتى ..

عمرو يقول...

د. ياسر عمر عبد الرحمن
جميله جدا جدا و تستحق الزياره و التمتع بكل ما فيها ..
بس ليه مش حتروحها برضو لعل المانع خير :)
تقبل تحياتى و أهلا بيك ..

عمرو يقول...

غير معرف
متشكر ليكى لو كان ذهولك ده بيعنى حاجه كويسه و أيوه أنا حقيقى و الله ..
تقبلى تحياتى ..

عمرو يقول...

من غير عنوان
و أحنا ورانا أيه يا باشمهندس ؟؟ و ماله شهر و بيعدى برضو :)
بس المهم نبقى عارفين أصحابنا اللى بيختفوا فجأه كده بيبقوا فييييييييين ؟؟
أنا عن نفسى قلت أنا فين أهو :)
متشكر ليك جدا و دهب فعلا بجد بلد جميله أوى و دلوقتى كمان تطورت كتير و بقت أفضل من زمان ..
تقبل تحياتى و تقديرى ..

عمرو يقول...

طوبة ذهب و طوبة فضة
متشكر ليكى جدا و أرجو أنى فعلا أكون قدرت أوصل معلومه جيده للقراء علهم يستفيدوا منها ..
تقبلى تحياتى و تقديرى ..

عمرو يقول...

بنجاواتى
أيوه و الله رحله جميله أوى يا دكتور و مهما تكررت برضو حتلاقى فى كل مره حاجه جديده تشوفها و تعيشها ..
متشكر لك جدا و دمت بكل خير ..

عمرو يقول...

كلمات من نور
متشكر جدا على وصفك كتاباتى بالروائع و أرجو و الله أن تتاح لى الفرصه و الوقت لنشرها ..
لأنا موافق حضرتك أنها أجنبيه حتى النخاع لكن ده من عملنا اٍحنا لأننا تخلينا عن زيارة هذه الأماكن و التمتع بها و تركناها لهم برضا نفس و أكتفينا بما تعودنا عليه من أماكن صارت خنقه و زحمه جدا ..
و على فكره ده شجعهم أنهم يمارسوا فى هذه الأماكن حياتهم و ما تعودوا عليه فى بلادهم من سلوكيات لا تتفق مع سلوكياتنا لأنهم لاقيين نفسهم منعزلين هناك و مش متعودين على رؤية مصريين بجانبهم فبيتصرفوا براحتهم..
يا سيدتى الفاضله الرجال عموما عندهم حول مؤقت و أحيانا دائم :)
تقبلى تحياتى و تقديرى

عمرو يقول...

ماما أمولة
أهلا و سهلا يا ماما أمولة اٍزاى حضرتك ؟؟
أشكرك جدا على متابعتك و تعليقاتك المشجعه و ربنا يستجيب لك ..
تقبلى تحياتى و تقديرى ..

عمرو يقول...

mohamed ghalia
طيب ما يالا مستنيين أيه يا جماعه ده الجو هناك دلوقتى جميل جدا جدا ..
متشكر ليك و دمت بكل خير ..

عمرو يقول...

الجواز و سنينه
متشكر لحضرتك جدا بارك الله فيكى ..
أيوه التغيير مطلوب طبعا لأن من طبيعة الأشياء التغير و التطور و عدم الثبات و الجمود ..
لا حضرتك ماتلاقيش هناك للذكرى الخالده و أصعب حب و الكلام ده لأنهم بيعتبروا المناطق اللى زى دى متاحف مفتوحه يجب الحفاظ على محتوياتها و تقدير اٍبداع الخالق شىء مفروغ منه عندهم مافيهوش هزار ..
بأشكرك و تقبلى تحياتى و تقديرى ..

عمرو يقول...

خمسة فضفضة
و عليكم السلام و رحمة الله و بركاته ..
لا و الله مش غيظ و لا حاجه بس بألفت الأنظار للمناطق الساحره اللى سقطت من حسابات المصريين ..
خساره أن والدة حضرتك ما رحتش جنوب سينا و الله هناك الأمان متوفر جدا جدا و الحياه سهله و بسيطه و غير مكلفه بالمره ..
عارفه يا دكتوره الموظفين المصريين اللى راحوا سينا بعد جلاء الاٍحتلال منها مباشرة بقوا دلوقتى مليونيرات لأنهم أشتروا أراضى كانت بالملاليم و دلوقتى بتساوى ملايين !! ( بجد و الله مش بأغيظك )
السياحه الداخليه طبعا مهمه جدا جدا لكن للأسف بنتعامل معاها بشكل زى التخاريف كده يعنى مثلا لما يدوا الليله السياحيه للسائح الأجنبى ب 30 دولار اٍقامه كامله فى فندق 5 نجوم و يدوها للمصرى ب 800 جنيه يبقى ده كلام ناس مجاني مكانهم الطبيعى الخانكه ..
علشان كده يمكن السياحه الداخليه المنظمه شبه معدومه و لا تعتمد غير على المغامرين اللى زى حياتى اللى بيروحوا لوحدهم من غير شركات سياحه و لا حاجه و بيستكشفوا بنفسهم أنسب الأوضاع لهم أيه ..
الموضوع كبير و الله يا دكتوره و يطول فيه الشرح ..
متشكر لحضرتك جدا و تقبلى تحياتى و تقديرى ..

عمرو يقول...

dr.lecter
ده لوز مقشر و الله :)
اٍن شاء الله البوست الجاى يعجبك ..
تقبل تحياتى و مودتى ..

عمرو يقول...

حاسوباتيه
متشكر جدا و فعلا خساره ان بلدنا يبقى فيها كل هذا الجمال المذهل و مش بنستمتع به ..
أتمنى أن كل المصريين يزوروا هذه الأماكن الرائعه ..
تقبلى تحياتى ..

عمرو يقول...

الازهرى
يا سلاااااام على الأقصر فى الصيف و جوها الجاف اللى ليس فيه أى شبهة رطوبه مضره للصدر ..
عارف أنا الأقصر فى الةقت ده بتبقى حر لكن جفاف جوها بيخللى أى مكان مظلل زى ما يكون فيه تكييف بالظبط ..
كنت فين فى سينا ؟؟
أيوه مقالب السعدنى دى جامده أوى بس هو مقالبه كانت بتجرح شويه :))
تقبل تحياتى عزيزى و تقديرى و أهلا و سهلا بيك ..

عمرو يقول...

أم مالك
متشكر ليكى جدا للزياره و التعليق ..
كل الأسعار فى جنوب سيناء ماعدا طبعا شرم الشيخ أرخص من أى مصيف تانى و دى حقيقه مش كتير يعرفوها ..
و الله ربنا يسهل و موضوع الكتاب ده يتم فى يوم من الأيام ..
أما موضوع ملحقات الرحله فلا داعى للقلق أخوكم جبل ما تهزه ريح :))
تقبلى تحياتى و تقديرى ..

عمرو يقول...

قيس بن الملوووح
متشكر لك و أهلا وسهلا بيك ..
تقبل تحياتى و مودتى ..

عمرو يقول...

صبرنى يا رب
أهلا بيكى يا أم خالد ..
متشكر ليكى على الزياره و التعليق ..
شوفتى الصور جميله لأن المكان هناك جميل و بجد يستاهل المشوار و لو أنه مش مشوار بعيد أوى زى ما الناس متخيله يعنى هو زى مشوار مرسى مطروح كده ..
الحقيقه زينهم يستاهل المقالب و كأنه بيقول للواحد أرجوك أعمل فيا مقلب :))
تقبلى تحياتى و تقديرى ..

عمرو يقول...

فتاه من الصعيد
متشكر ليكى ألف شكر بس حكاية نورت مصر دى فعلا حاجه بتفكرنى بأيام اٍتحاد الجمهوريات العربيه :))
دهب جميله جدا جدا و تخللى الاٍنسان يكتب عنها بصدق و حب شديدين ..
لك منى التحيه و التقدير ..

عمرو يقول...

و مازلت أتعلم
فعلا لا يملك الاٍنسان أمام هذا الكم و الكيف من الجمال فى دهب اٍلا أنه يقول سبحان الله ..
و الله فوائد السفر كتيره و متعدده بس عاوزه الواحد ينوى ثم يتوكل على الله بجد ..
أهلا بيكى دائما و شرفتى ..
تقبلى تحياتى و تقديرى

عمرو يقول...

شمس النهار
مساء الخير يا برنسيس :)
معقول النت فى أمريكا ضعيف لدرجة الصور ماطلعتش ؟؟
هم فعلا الأجانب ضميرهم صاحى شويه بس مش فى كل الحاجات بس المهم أن الغالبيه نهم عندها وعى بالقيم الحضاريه و الاٍنسانيه اللى فى الطبيعه ..
هو يمكن موضوع اٍحترام الشخص الغربى لحرية الآخرين برضو عليها معول كبير جدا فى الثقافه الانسانيه بصفه عامه عندهم و ده اللى مخلى كل واحد خاسس هناك أنه كيان قائم بذاته و عليه محاسبة نفسه قبل أن يحاسبه الآخرون ..
يا جماعه زينهم ده و الله طيب جدا و جدع جدا بس عليه حاجات مستفزه شويه و بصراحه كده يستاهل المقالب :)
لا التصريح بقى خلاص ضاع الأمل فيه و يمكن كده أحسن الله أعلم ..
شرفتى و نورتى و ترجعى مصر بألف سلامه :)

عمرو يقول...

سنابل قمح
متشكر ليكى جدا و أهلا بيكى و سهلا ..
ايوه الصور دى عندنا فى مصر اللى ماحدش يعرفها ..
مصر التانيه الغامضه المجهوله للمصريين اللى فيها كنوز أعظم و أحلى بكتير من كنوز اٍشارات المرور و الزحمه و مواعيد خروج المدارس و الموظفين ..
سينا فاضيه يا سنابل .. فاضيه ..
فاضيه و اٍحنا مش عارف ليه حابين الشريط الضيق اللى عايشين فيه من مليون سنه !!
الحمد لله اٍن الواحد عرف حاجه فى مصر كان صعب يعرفها من الخريطه :)
لك التحيه و التقدير ..

عمرو يقول...

بسنت صلاح الدين
أيوه سبحان الخلاق العظيم اللى خلق كل هذه الأشياء الرائعه ..
سبحان الله ..
أتمنى و الله أن اللى يقدر يسافر لهناك و يستمتع و يتعلم لا يتردد لحظه واحده عن السفر و مش حيندم أبدا ..
تحياتى ..

عمرو يقول...

احساس طفلة محبة للرومانسية بس واقعية
متشكر ليكى جدا ربنا يخليكى و الله ده كتير ..
أيوه مصر مليئه بالعجائب و الروائع المذهله بس اٍحنا اللى مقصرين فى حقها و فى حقنا و مش واخدين بالنا من الكنوز الحقيقيه اللى ربنا وضعها بين أيدينا ..
شدى حيلك يالا و سافروا و أنتم حتنبسطوا أوى أوى ..
متشكر ليكى و أهلا بيكى ..

عمرو يقول...

MaNoO
هى مش بعيده يا مانو و لا حاجه دى سفريه بسيطه تاخد مثلا 6 ساعات يعنى بيعدوا و مرسى مطروح أهيه الناس كلها بتروحها ..
يالا بس أنت أنوى و اٍن شاء الله حتلاقى ربنا هونها خالص ..
تقبل تحياتى و تقديرى ..

عطش الصبار يقول...

الله عليك يا استاذ عمر
قدره غريبه ورائعه على وصف الاشياءتاخذنا معك فى تفاصيل الرحله نعيشها معاك ثانيه بثانيه واللهى حسيت انى رحت الاماكن دى من دقه الوصف وحبك للاشياء اللى بتقابلك
شكرا لك على كل التفاصيل دى وانامعاك ان فعلا الاجانب بيحبوا كل الاشياء اللى بيعملوها وبيحترموا كل المخلوقات وبيحترموا الطبيعه انا لمست ده بنفسى
برضه عايزه اشكرك على انك اوضحت نقط كانت غايبه عن الناس وبمعنىاصح كنا بنخاف منها وهى الذهاب فى اتجاه جنوب سينا كنت بانظر لها كا اشياء بعيده المنال لدرجه انى بعد ما قريت البوستات اللىكتبتها يا استاذ عمر حسيت ان فعلا فكره ابعادنا عن المناطق دى مقصوده عشان يخلى الجو للبعدا ويبقى فيه حاجز نفسى بين الناس وبين جزء مهم وعزيز من بلدهم
شكرا مره اخرى
تقبل تحياتى

غير معرف يقول...

الاخ الفاضل استاذ عمرو
ليك سؤال عندى فى المدونة
ياريت تدخل تجاوب عليه
تحياتى

عمرو وجيه يقول...

الله يا أستاذ عمرو

بجد صور هايلة

بس استفزتني اوي المناظر

لاني مرحتش مصيف لسه


فمنظر البحر و الفسح حفزني اني اروح المصيف
بوست رائع

تقبل تحياتي

Unknown يقول...

سبحان الله والحمد لله
ولا آله الا الله والله اكبر
ولا حول ولا قوة الابالله
العلــىّ العظيـــــــــم
دا جواب سؤالك استاذنا
احنا احسن منهم فى ايه؟
الكام كلمة دول هم الاجابة
وهم الخلاصــــــــــــــة.

Unknown يقول...

وتسلم الايادى والارجل والعيون
والذاكرة والكاميرات اللى
صورت وحكت وامتعتنا بهذا
الكلام الجميل والرحلة
الاجمــــــــــــــــل

Kiara يقول...

انا حسيت اني كنت في الرحله بجد وصف رائع بجد
وصوره الجبال تحفه

سبحان الله فعلا

soha يقول...

جامد اوي الكلام عن دهب بجد باين انك لفيتها اوي -معلوماتك المفصله دي تكبرها في دماغ اي حد انو يعمل سفاري في دهب -ربنا يوفئك

alibabahotel يقول...

فعلا مدينة دهب مدينة رائعة الجمال
انا اراها افضل من شرم الشيخ لكن الاعلام كله متوجه للشرم و الخدمات كلها للشرم لا لدهب

hafecktor يقول...

مدينة دهب جميلة و انا اعمل بها لكن بها مشكلات كثيرة جدا بسبب المسؤولين عنها فأقل الخدمات غير موجودة فيها لأكن بصراحة حينما اسافر لدهب اكره العودة للقاهرة مرة اخرى فعلا

Summer يقول...

wonderful story.. great presentation, awesome reality with a touch of enjoyable humer.. I wish that every one in the world would see this city and more that that,,, I wish that new generation of college and university students start a new chapter for Egypt by going to Dahab and explore it's wonders in a better way than their parents did.. thanx for the effort Amr .. You're a real respected Egyptian.