الجمعة، 31 يوليو، 2009

نويبع مدينة الألف وجه !!

صباح الخير أعزائى المدونات و المدونين ..
علاقتى بجنوب سيناء علاقه قديمه ترجع لعام 1992 لما رحتها لأول مره فى مهمة عمل خاصه و من اللحظه الأولى سقطت فى هواها !!
طبعا من نافلة القول التكلم عن جمال الطبيعه هناك و عن روعة خليج العقبه اللى بيحتوى على غابات ليس لها مثيل من الشعاب المرجانيه و الأسماك الملونه فى أى بحر من بحار العالم ..
لى فى كل مدينه فى جنوب سيناء ذكريات و أصدقاء و ناس بينى و بينهم عيش و ملح و اٍرتباطات عاطفيه من الصعب شرحها و لكنها محسوسه ..
أقرب مدينه لقلبى هى نويبع ..
نويبع البلد الجميله الوديعه اللى بجد ليس لها أخت و لا حتى بنت عم فى أى مدينه فى العالم من مشرق الأرض لمغربها .. آدى البحر للى عايز .. شوفوا الجمال :


و آدى السفارى للى عايز :


نويبع بتقع على خليج العقبه مباشرة و بها ميناء كبير بيزدهر و بيزهزه المدينه فى موسم الحج و العمره و عودة العاملين المصريين من الأردن و دول الخليج .. و بتواجهها من الناحيه الشرقيه للخليج مدينه و ميناء صغير فى المملكه العربيه السعوديه و من السهل جدا لما بيكون الجو صافى أن ترى بسهوله السيارات بل و البشر اللى بيتحركوا هناك .. و لو ضربت بعينك شمال شويه حتشوف مدينة العقبه الأردنيه بوضوح شديد برضو لكن بتكون واضحه جدا و أنت فى طابا و فى نفس الوقت برضو بتقدر تشوف بسهوله ميناء اٍيلات فى اٍسرائيل .. و من الناحيه الغربيه بتحدها سلسله من الجبال شاهقة العلو مليئه بالظبيان و الغزلان و المعيز الجبليه و اللى بالليل بتتقافز قدام السيارات فى الطريق المؤدى لصحراء النقب فى مشهد ممتع للغايه .. أما لحظة شروق الشمس على جبال نويبع الغربيه فشىء لا يمكن وصفه و لا يكف القلب لحظتها عن تسبيح الخالق الجليل خاصة مع صوت هدير جوف الأرض المخيف اللى بيتسمع بوضوح فى هذا السكون المهيب .. أهوه :

آل أيه و الاٍنسان بغباوته و هبله لما تاخده العزه بالاٍثم يقول : ده أنا فيا صحه تهد جبل :))

طيب أهو الجبل قدامك أتفضل هده !! ده أنت يا عم لما ضرسك بيوجعك بتقعد تولول و تقول تعالى لى يامه !!
أستغفر الله العظيم و لا حول و لا قوة اٍلا بالله تباركت يا رب يا من جعلت الجبال أوتادا ..
يعنى نويبع بتتمتع بموقع فريد عجيب لا تتمتع به أى مدينه أخرى فى العالم حيث أنها بتطل على مملكتين عربيتين و فى نفس الوقت بعتبر على حدود اٍسرائيل و ده أدالها طابع مميز برضو من حيث اللهجه و طبيعة الحياه و أهلها البدو الأصليين بيرتبطوا بصلات نسب و مصاهره مع قبائل فى الدول التلاته و بيتنقلوا بينهم بمنتهى السهوله و بدون أى تعقيدات .. أو هكذا كان الوضع فيما سبق ..
ده مدخل مدينة نويبع من الطريق الأوسط مش من ناحية طابا :
الجبل اللى هناااااااك ده فى السعوديه و خليج العقبه بيفصل بينه و بين نويبع ..
سكان نويبع الأصليين بينتمى أغلبهم لقبيلة الترابين و هى كبرى قبائل عرب جنوب سيناء و بتوازى فى قوتها و سطوتها قبيلة الفواخريه فى شمال سيناء .. و أفرادها منتشرين فى مصر و الأردن و السعوديه و اٍسرائيل و بيعملوا فى التجاره و السياحه و الزراعه بالتنقيط و مش ضرورى برضو تعرفوا بيزرعوا أيه !!
بدو سيناء بصفه عامه و خاصة أفراد قبيلتى الترابين فى الجنوب و الفواخريه فى الشمال عايشين فى سلام و وئام و بينهم مصاهره و نسب و مصالح مشتركه .. و حقيقى ناس محترمين و يعرفوا العيب و لا يقربوه .. و الكرامه عندهم تساوى الحياه و الويل لمن يهين كرامة بدوى أو يعتدى على شرفه أو يستخف به .. و أفراد القبيلتين بعضهم بيشغل مناصب عليا و مراكز مرموقه .. و لو حصلت مشكله بينهم فبيلجئوا لكبار قبائلهم و بيحلوا الموضوع ودى بدون تدخل حكومى فيما يعرف هناك بالمجالس العرفيه اللى أحكامها واجبة النفاذ فورا بدون اٍستئناف و لا نقض و لا حيل و ألاعيب و اٍلا تعرض المحكوم عليه للنفى من القبيله و دى مصيبه لا علاج لها بالنسبه للبدوى .. و على مدى سنوات طويله لم تسجل فى أقسام الشرطه هناك سوى حالات سرقه تعد على الأصابع و كان أبطالها من غير البدو يعنى من محافظات أخرى ..
و لو حصلت مشكله بين بدوى و بين ضيف من أى مكان فيكفى أن ينبه الضيف أنه سيلجأ لكبير القبيله علشان يجيب له حقه فتلاقوا البدوى على طول لان و بقى طيب
أوى أوى و يسارع لحل المشكله حتى لا يقف أمام شيخ قبيلته متهما بالعيب مع ضيف ..
أقدر أقول بقلب جامد أوى اٍن السياحه هناك سياحه اٍسرائيليه بنسبة 99% .. و ال 1% الباقيه سياحه مصريه متمثله فى أنا شخصيا و فى الأجانب اللى بيفدوا عليها فى طريقهم من و اٍلى طابا .. و ده الحقيقه شىء مؤلم للغايه أن المصريين لسه لم ينتبهوا لجمال و روعة السياحه و التصييف فى مدن جنوب سيناء و سايبينها للى بجد عرفوا قيمتها و عرفوا اٍزاى يتمتعوا بها حتى الثماله .. و أكتفينا بالمصايف المعتاده التقليديه اللى بقت زحمه و خنقه و مش لطيفه أبدا !!
السياح الاٍسرائيليين بالمئات و أحيانا بالألوف أعتادوا على قضاء أجازاتهم الأسبوعيه صيفا و شتاءا يومى الجمعه بعد الضهر و السبت فى نويبع اللى بيدخلوها بدون تأشيره ( و مسموح أيضا للمصريين دخول مدينة اٍيلات بدون تأشيره كما نصت على ذلك اٍتفاقية السلام ) من منفذ طابا البرى اللى بيبعد عن نويبع مسافة حوالى 50 كم بسياراتهم أو بدون و بيركبوا أتوبيسات عامه أو سيارات نصف نقل و ميكروباصات تنقلهم من طابا لنويبع و دهب و سانت كاترين و نادرا شرم الشيخ لأنهم أصلا لا يقدروا على مصاريف الحياه فى الشرم .. و غالبا بيقضوا اليومين دول فى كامبات لطيفه ظريفه على الشاطىء و أشهرها كامبات بساطه و أصاله و هلا و ترابين برادايس و عبد النبى اٍن و بيفضلوا يناموا على كليمات مفروشه على الرمال على بعد خطوتين من مياه الخليج على الطريقه البدويه فى العراء و بجد الناس دول معندهمش حياء أبدا خالص !! ( وش بيلطم )

يومى الجمعه و السبت و فى الأعياد اليهوديه زى الفصح و كيبور و عيد خروج اليهود من مصر و عيد المسخره ( هو أسمه كده ) و عيد الفطير ( مش الفطر ) بتعتبر أيام رواج كبيره أوى فى نويبع بالنسبه للفنادق و الكامبات الرخيصه اللى سعر البيات فيها لا يتعدى 20 جنيه للفرد و دورات المياه فيها مشتركه للرجال و النساء و أيضا للمطاعم و الكافيهات اللى أغلب أصحابها و العاملين فيها من منطقة نزلة السمان فى الهرم و بيتكلموا عبرى زى العفاريت الزرق و التعامل بيكون اٍما بالدولار أو الجنيه المصرى أو الشيكل الاٍسرائيلى اللى بيساوى هناك جنيه برضو .. و بيبقى شاطىء الترابين صاحى ليل و نهار و اٍحتفالات عجيبه و حالات جموح من البنات اليهود مقاصيف الرقبه باهرات الوحاشه ( علشان محدش يزعل ) و الله يرحمك يا عم رأفت يا هجان لو كنت عايش كنت طحنت العالم دى :

و الحقيقه حالات الجموح دى بتواجه بكل حزم من رجال الشرطه اللى ظهورهم على الشاطىء بيسبب حاله من الاٍنضباط الشديد لأن اليهود يخافوا جدا جدا من المشاكل و خاصة مع الشرطه و عنده يتعمل بسطرمه و لا يدخلش الكراكون و يبدو اٍن رجال الشرطه الاٍسرائيليين شاوينهم على الجنبين و مربيين لهم الرعب برضو زيهم زى بقية الشعوب اللى الحمد لله اٍحنا مش منهم .. و ده شاطىء الترابين :

تعرفت فى نويبع فى واحده من زياراتى على شاب بدوى بعد أن غرزت عربيتى فى الرمال فى المنطقه المنعزله من الشاطىء اللى دايما بأعسكر فيها بعيد عن دوشة السياح .. أهيه :


و شدها هو بسيارته النصف نقل و قد تطوع لمساعدتى من غير حتى ما أطلب منه بعد أن شاهد الورطه اللى كنت فيها .. الشاب ده عرفنى على نفسه بعد كده اٍن أسمه عياد و أبوه هو الشيخ زايد – رحمة الله عليه – كبير قبيلة
الترابين فى نويبع و اللى كان مصر اٍصرار لا يلين أن الله سبحانه و تعالى كان يقصد بقسمه (( و هذا البلد الأمين )) مدينة نويبع و لا شىء آخر !!
- طيب ليه يا عم الشيخ زايد ؟؟
فكان رده غريب شويه لما سألته لأنه شايف أن هذا القسم جاء بعد (( و طور سينين )) و نويبع بتقع بعد مدينة الطور يبقى بالعقل كده نويبع هى المقصوده بالقسم .. ده من وجهة نظره طبعا متناسيا أو متجاهلا أن مدينة شرم الشيخ هى اللى بتقع بعد مدينة الطور :))
و تصادقنا بسرعه أنا و عياد خاصة لما عرف أنى من القاهره و رفض بتاتا تناول أى أجر عن شهامته بل و دعانى للغداء عنده فى البيت بعد يومين ليعرفنى على أخوته و أبوه و أتفقنا أنه سيأتى ليأخذنى بعد أن يحضر الدب على حد قوله .. و تساءلت بينى و بين نفسى اٍن كان سيصطاد دبا و يدبحه للغداء و لا أيه ؟؟؟!!!! و شعرت بالرعب من الفكره و الريبه فى أمره خاصة أن نويبع تخلو من الدببه و لكن سرعان ما أكتشفت أنه يقصد بالدب السياره الجيب بتاعته ..
بيته كان عباره عن مبنى كبير من الحجر السيناوى الملون بيطل مباشرة على خليج العقبه .. و المنظر من هناك رائع رائع فوق ما العقل يتصور .. جلسنا سويا نتحدث بعد أن طلب من اٍخوته اللى جاؤوا للغداء معنا أن يحضروا الطعام و قد رحبوا بى كثيرا حتى شعرت بالخجل و الله و كل واحد فيهم أخرج من جيوبه ما يعتبرونه واجب الضيف و لكنى رفضت بشده و طلبت منهم أن يشيلوا من أمامى هذا الواجب المهبب اللى أمقته مقتا شديدا ..
و كان بصحبة واحد فيهم فتاه اٍسرائيليه وعيال أختها و كانت عاوزه تروح العمود .. عمود سليمان كما يسمونه بدو نويبع و بيقولوا اٍن سيدنا موسى عبر خليج العقبه للسعوديه من هذه النقطه قبل أن يتوجه لفلسطين حيث يقابلها من الجهه السعوديه فى جبل اللوز عمود مثله تماما و بيقولوا اٍن نبى الله سليمان عليه و على نبينا أفضل الصلاة و السلام وضع بيده هذا العمود كعلامه .. و العمود ده بيعتبر مزار يهودى مقدس خاصة للبنات اللى عاوزين يتجوزوا حيث بيتباركوا بيه لأن فى زعمهم تمت زيجات كثيره جدا بين شباب و بنات بنى اٍسرائيل فى هذه البقعه قبل أن يعبروا للضفه التانيه من الخليج ( أمال لو كانوا شافو عمدان الصعيد بقى اللى بحق و حقيقى كانوا عملوا أيه ؟؟ ) .. و آدى مسمار جحا الخايب بتاعهم خيبهم الله :


و فوجئت بعد قليل بسيده أجنبيه شقراء ترتدى الملابس البدويه و لكن مش مغطيه وجهها كما النساء البدويات تحضر صينيه كبيره عليها الطعام و الخبز البدوى الشبيه بالرقاق !!
و ياله من طعام .. كان عباره عن خروف مقطع لأجزاء كبيره و مطهو داخل قدرتين فخار بطريقه عجيبه سأشرحها فى آخر البوست و مخليه اللحم زى الزبده بصراحه ..
حيتنى بالاٍنجليزيه و رحبت بى بالعربيه قائلة : يا هلا و مرحبتين !!
و أفترشت الأرض بجانب عياد .. سألته مين دى يا عياد ؟؟
قال : زوجتى يا أبو على .. هى هولنديه و متزوجين من 3 سنين ..
أستغربت من الموقف فحكوا لى القصه من أولها ..
مارجريت أو مارجا كما كانوا ينادوها وفدت لنويبع من هولندا من بلد اٍسمها شيدام عن طريق شرم الشيخ و كانت متوجهه لمدينة اٍيلات فى اٍسرائيل بغرض السياحه .. و فى نويبع تعرفت على عياد و بهرت ببساطة حياة البدو و الطبيعه الخلابه فى الخليج .. فطلبت منه أن يساعدها على البقاء فى نويبع فتره من الوقت .. فأسكنها مع اٍخواته البنات اللى كانوا بيخرجوا يوميا للتنزه و جلب الماء من النبع القريب فعشقت الحياه هناك .. و ده النبع :

و لما ملت من حياة الراحه و البطاله طلبت منه أن يهيىء لها عملا تشغل به وقتها و تكسب منه مالا فأفهمها أن هذا عيب و أنه لا يجوز لضيف البدوى أن يعمل أو يصرف على نفسه .. فأصرت فلم يجد أمامه حتى يرضيها و يدفعها للبقاء فى نويبع لأن الحب قد بدأ يربط بينهما سوى أن يسلمها 3 جمال صغيره و 6 معيز لترعى بهم كام ساعه فى اليوم و يعطيها على ذلك أجرا بشرط أن يرسل معها أخاه ليراقبها من بعيد لبعيد حتى يكون بجانبها لو طرأ طارىء ..
تضحك مارجا من قلبها و تكمل بلهجه عربيه بدويه قريبه من لهجة كوكا فى فيلم عنتره :
- كان الأروام ( يعنى السياح ) يستعجبون من هادى البدويه الشجرا اللى بترعى لابل و لمعيز و كانوا يظنون البدو خاطفين اٍياى و يعرضون يساعدون و أجولهن كونوا بحالكن :)
شويه شويه بدأ الحب الحقيقى تظهر أعراضه على عياد و مارجا اللى بتكبره بحوالى 10 سنين على حسب تقديرى !! .. و كانوا بيتفاهموا مع بعض بشويه اٍنجليزى من اللى أتعلمهم عياد من السياح و طبعا أكتر تفاهمهم كان بالنظرات و الهمسات ( ده أكيد يعنى ) ..
لحد ما عياد أتشجع و طلب يتجوزها بعد سنه من اٍقامتها فى نويبع .. مارجا وافقت على طول و قد عشقت حياة البدو و هامت حبا بالشاب البدوى الوسيم بس المشكله كانت فى عرض هذا الأمر على أبوه الشيخ زايد الرجل المسن العتيد اللى كانت كلمته سيف على رقاب أفراد القبيله اللى بيدينوا له بالطاعه و الولاء ..
أتشجع عياد و جاب أخوه سلامه و أخوه حسن الأشعث و ده اٍسم الدلع بتاعو لأن اٍسمه الحقيقى حسن همبكه و راحوا على أبوهم و فاتحوه فى الموضوع ..
بيحكى عياد و هو بيصب دور الشاى الحبر المغلى مع السكر على نار الراكيه للمره العشرتلاف :
- كنت متوجع بوى ينفينى من الجبيله لكن فوجيت بيه بعد ما حاكينا وياه كتير كتير يبسم و بيجول لى : على بركة الله يا ولدى عل نسل جبيلتنا يتحسن و لو كانت خيوتها متلها مزيونه أرسلون جيبوها لنزوجوها لخيوك هادا التيس الأشعث عله يتمدن !!
يعنى قاله على بركة الله يا أبنى يا عياد يمكن نسل قبيلتنا يتصلح على أيدك و لو كانت ليها أخت حلوه كده زيها نبعت نجيبها من بلدها و نجوزها أخوك التيس ده حسن الأشعث يمكن يتمدن و يبقى بنى آدم ..
مارجا أسلمت و الله وحده يعلم خائنة الأعين و ما تخفى الصدور .. و قبل الزفاف فوجىء عياد بها تطلب منه المهر !!
و يبدو أن من طول عشرتها للبدو و مما كانت تسمعه من اٍخوات عياد البنات صارت مثلهم فى كل شىء :)
فوجىء عياد بهذا الطلب اللى لم يكن على باله .. و ما عاد يملك مالا بعد ما أنفق ما لديه على بناء بيت الزوجيه و فرشه و تهيئته بكل وسائل الراحه الحديثه لدرجة أنه عامل الحمام بورسلين .. فركبه الهم بعد أن أصرت مارجا على موقفها و تمسكت بالمهر .. فما كان من أبيه و أخوته ألا أنهم جمعوا من بعضهم مالا وفيرا و سلموه لعياد ليشترى به ذهبا للعروس و يدفع لها مهرا فرفضت مارجا هذا العرض رفضا تاما !!
و لما وصل الحوار معها لطريق مسدود عرضت مارجا برضو على طريقة البدو أن يتعهد أمام أبيه و أعمامه و أخواته أنه سيدفع لها مهرا و يشترى لها ذهبا فى خلال مده معينه من حر ماله هو و ليس من أموال أهله و أن يتنازل لها حاليا عن الجمال و المعيز اللى كانت بترعاهم و اللى دلوقتى كبروا و بقوا حاجه محترمه لهم تمن و كمان يتنازل لها عن الجحشين اللى بينقلوا عليهم الماء من النبع و على رأى المثل من عاشر القوم أربعين يوم صار منهم !!
لما سمعت الحكايه كاد قلبى أن يتوقف من الضحك و سألت مارجا اٍن كان عياد أبر بوعده و أشترى ذهب و دفع لها مهر ؟؟ فقالت و على شفتيها اٍبتسامة رضا :
- و الله ما صار لهالحين بس عطيانى هالموى أتسبح فيه لحالى :)
و أشارت للخليج ..
نسيت أقول لكم أن مارجا و اٍخوات عياد البنات زينه و هب الريح عاملين زى مشروع صغير كده لصنع الكليم و السجاد البدوى على الأنوال و بيبيعوا للمحلات فى نويبع و دهب و شرم الشيخ و بيكسبوا ما شاء الله كويس جدا ..
ده غير أن معظم البدويات هناك بيتكسبن من حاجه غريبه جدا قد لا تخطر على البال .. و هى أنهم بيجمعوا من الخليج فى الصباح الباكر كائن بحرى أسود تماما اٍسطوانى الشكل و بيسموه .... البحر ( مكان النقط كلمه مش ولابد كده) و بيجففوه بطريقه معينه و بيطحنوه و بيتم تهريبه للخارج حيث بيستخلصوا منه الماده الفعاله و الأساسيه الداخله فى صناعة الفياجرا أو هكذا قيل حيث أن هذا الكائن البحرى غير موجود فى أى مكان آخر فى العالم غير فى خليج العقبه .. ولقد شهدت بعينى البدويات و هن يجمعنه و أيضا خطوات تجفيفه و طحنه ..
ده عياد اللى لابس جلابيه بيضا و سويتر أزرق و اللى وراه اللى لابسه نضاره دى مراته مارجا و اللى واقف وراها ده أخوه حسن الأشعث عازف السمسميه البارع اللى لا يشق له غبار و اللى قاعدين جنبه دول اٍخواته الأتنين التانيين .. أما البت الرخمه المنكوشه دى اللى فى آخر الصوره على الشمال فدى البت الاٍسرائيليه جنات و عيال أختها الشحاتين و تقريبا عندها فوبيا من الاٍستحمام و هى من حركة السلام الآن و بتؤيد الحق الفلسطينى و كانت مصره تورينى آثار ضربة خرزانه على .... ( مش مهم فين بقى ) من عسكرى أمن مركزى اٍسرائيلى أثناء مظاهره مشتركه مع العرب فى القدس ضد شارون و سياسته الاٍرهابيه و كانت ترفع العلم الفلسطينى على حسب حكايتها :


يا بنت الأيه يا مصر .. و الله الواحد كل ما يمشى فيكى خطوتين يتكعبل فى حكاوى تملا كتب .. و كل ما نزهق منك و من عمايلك نلاقينا بنحبك أكتر و أكتر و ياما فى قلبك شايله أسرار و ألغاز ما حد يعرف يفكها غير اللى يعيشك بجد و بحق و حقيقى مش اللى يعيشك فى الكافيهات و المولات و زحمة شوارع مدينة نصر و وسط البلد و يرجع بيتهم يكتب عنك و يلعن سنسفيلك و يبقى كده من وجهة نظره بيحبك و عمل اللى عليه ..
فهمتوا قصدى ؟؟

********************

طريقة عمل الخروف على الطريقه البدويه علشان عارف أنا فيه ناس هنا بتعشق اللحمه الضانى عشقا قد ملك الفؤاد و الروح :

- تجيبوا خروف متوسط و تقطعوه هوبر كبيره شويه و تستبعدوا الليه .. تخلطوا الأجزاء المقطعه ببصل ترنشات و ثوم صحيح و شوية جذور جنزبيل و طبعا ملح و فلفل و ورق لورى و مستكه و حبهان و مرمريه و حاجه اٍسمها السماق من عند العطار و جوزة الطيب و قرنفل و قرفه و أوراق ريحان خضراء و يتحط كل ده فى القدور الفخار المبطنه من الداخل بماده عازله لا تسمح بالترشيح و تقفل جيدا جدا و باٍحكام بالطين مع الحرص اٍن الطين ميقعش فى القدور و عمل ثقب صغير جدا يسمح بخروج البخار.. و تترك لتجف ..

تكونوا بقى محضرين من قبلها حفره فى الرمل بعمق متر و نص مثلا و مليانه حطب و تولعوا فيه و تسيبوه لما ينطفى و يصفى و يبقى جمر .. تدفنوا فيه هذه القدر الفخاريه باللى فيها و تردموا عليها كويس و تسيبوها يومين مع مراعاة عدم دفن بق القدره و ترك الثقب الخاص بخروج البخار غير مغطى و اٍلا أنفجرت القدور.. و لما تطلعوها بعد يومين حتلاقوها لسه بتغلى و اللحم بقى زى الزبده و تقريبا منفصل عن العضم .. و بألف هنا و شفا ..

أشوفكم على خير اٍن شاء الله البوست الجاى أحكى لكم شويه عن مدينة دهب و ثقبها الأزرق و صديقى زينهم بامبولينو اللى مراته خدت وش الوليه الأوكرانيه بقعر الكوبايه ضبه و مفتاح و جابت لها حول فى الشبكيه و بقت بتتكلم زى فؤاد المهندس لما كان بيغنى لهند رستم و يقول : يا حبيبى أفافا ..

و لكم التحيه ..

هناك 50 تعليقًا:

شمس النهار يقول...

صباح الخير يا لورد :)
لازم و لابد ما تألف كتاب عن رحلاتك الممتعه
و مواقفك و حكاويك اللطيفه اللى مابتخلصش
بس هو عيد المسخره ده مش بتاع عادل امام؟
عمود سليمان اول مره اسمع عنه
و بعدين مالها مدينة نصر؟
و عندك حق فى كل القضايا الخفيه اللى فى البوست
مصر كلها خير بس عايزانا نحبها و كل واحد يبتدى بنفسه
تسلم أيدك

خمسة فضفضة يقول...

السلام عليكم ورحمة الله وبركاته

لا بقي والله انت قاصدها ، وعامد ومتعمد ومع سبق الاصرار والترصد كمان ههههههههههههههه

ايوه قاصد تغيظنا وتخلينا نحقد عليك ونبقي عاوزين نكون معاك
استمتعت جدا جدا جدا وانا بقرا الكلام الجميل اللي خارج من القلب ونقلتني معاك لهناك في قلب سينا ونويبع الجميله

وماكنتش عاوزه البوست يخلص من كتر حلاوة الكلام والحكايات اللي فيه

يارب تكوناحلي رحله وياريت تحاول تستمتع اكتر عشان تيجي تحكيلنا ونتمتع احنا كمان علي الريحه ههههههههه

بالنسبه للخروف الطريقه دي بتتعمل علي طول في السعوديه مش عارفه اسمها باين مندي او مظبي حاجه كده بس نفس التكنيك ده بالظبط
انا مت من الضحك وانت بتقول تجيب خروف متوسط زي ما يكون الخروف ده عادي كده في البيوت زي مثلا بطاطسايه متوسط ولا بصله متوسطه ولا هافتح البلكونه وامد ايدي اجيبه من جونينة الفيلا هههههههههههههههههههههههه



ياتري تصريح السفاري خلص ولا لسه ، حاول ترجع بالسلامه قبل رمضان ربنا يبلغنا اياه ويجعلنا من قوامه وصوامه آمين

أم مالك يقول...

الله الله يااستاذ عمرو
والله مستمتعة جدا بالحكاوى
وخلى باللك بقى الا انا حبدأ احسدك
فقوم بعمل الرقية الشرعية لنفسك
بجد ربنا يكرمك انك بتعيشنا الرحلة كاننا معاك
بس خلى بالك من الاسرائليات
اوعى يااستاذ عمرو لاالسياح ولا المؤيدين لفلسلطين واياك تشوف
اثار التعذيب لتكون خطة لاستدراجك
وجميلة يامصر باراضيكى وبناسك
وربنا يرد عنها كيد المعتدين
تحياتى

الجواز و سنينه يقول...

احجر و اقرأ و اجى بس الصور ايه
موز موز موز

norahaty يقول...

يكتب سلامتك ربنا
وتعيش وتمشى وتشوف
كمان وكمان يـــارب
لانك وبصراحة بتعمل لى
احلى حاجة بحبها :السفر
والفسحة وانا قاعدة فى بيتى:)
مع التكييف والميه الساقعة والشيبسى:) وعيش حياتك
يا استــــــــــــاذ
عمــــــــــــــــرو

norahaty يقول...

نويبع شفتها وقضيت
فيها 24ساعة من عمرى
لكن 24 ساعة رهيبة والله
وخليها مفاجأة لما احكى فى تدوينة
خاصة عن اللى حصل واللى وصل واللى
انت فكرتنى به الحين وانت بتحكى.
تروح وترجع بالف سلامة ونحن
بالانتظــــــــــــــــار
ياأستاذنـــــــــــــا

norahaty يقول...

استاذ عمرو طبعاً
شفت الوان الجبال
العجيبة والغريبة
واللى تخلى اللى عنده
قلب أو القى السمـــع
وهو شهيد يسبح بعظمة
الله سبحانه وتعـــــالى

عاشقه وغلبانه يقول...

هاروحها قريب بأذن الله
كلها كام شهر كده ونتكلف علي حدود مصر
قول يارب
ده احنا هانشوف ايام عز علي حدودك يامصر

عاشقة الأحزان يقول...

السلام عليكم

الله عليك ياعمرو بجد من كلامك خلتنى احب البلد دى والصور تحفه قوووووووووووووووى

ربنا يسعدك يارب

وكمان اسلوب حضرتك بسم الله ماشاء الله فى الكتابه هايل قووى

تحياتى

ايناس

فتاه من الصعيد يقول...

حضرتك كده بتغيظنا
مناظر جميله وبحر رائع
ناس مثيره للأهتمام وحكايات
وأخرها أكله تجوع

يا رب يوعدنا

نهر الحب يقول...

انت شكل رحالة بتحب السفر زى
ودا شئ جميل انا بستمتع بوصفك للاماكن والجولات دى جدااا
امتعنا بما ترى
تحياتى واحترامى لك

ستيته حسب الله الحمش يقول...

ما شاء الله
ربنا ما يجعلني من اللي عيونهم مأورة ومدورة
بقى عيالك مش عاوزين السفاري
قول لهم طنطكم ستيتة بتقول لكم تيجوا مكانها وتيجي مكانكم يا شريرين

انا كنت طايرة مع القصص والله
بحب القصص والسير الشخصية وكل تجربة الجواز والعيال كبحوا جماحي ومعشتهاش
حاضر يا حسبو حاضر يا عيال

الخروف ده في السعودية اسمه مظبي
وعندهم المندي والبرياني وكلها أكلات لعشاق الضاني امثالي
واهبر يا معلم

رحلة سعيدة وعودة سريعة علشان لقاء السبت ان شاء الله هههههههههههههههههههههههه

تحياتي وخالص دعواتي

dreem يقول...

سلامو عليكو
بصراحة .. بجد يعنى
انا استمتع ايما استمتاع بحكاياتك وطريقتك فى السرد
كل التحية والود والتقدير لشخصك وشخصيتك .

سيناء حيث أنا يقول...

أهلا بك
حكاياتك بالفعل فيها الكثير من الحب لكن فقط هناك معلومات يجب التأكد من صحتها قبل كتابتها فنويبع بالفعل فيها قبيلتين أحدهما الترابين كما قلت ولكن الثانية هي مزينة وليس الفواخرية أما الفواخريه فهم يعيشون في الشمال لكنهم ليسوا قبيلة هم عائلة حضرية من عائلات مدينة العريش المهمة لكنهم ليسوا من القبائل البدوية واقبل قبيلة في الشمال هي قبيلة السواركة
هذا فقط للتصحيح ليس أكثر
لكن ما كتيته جميل ويستحق التقدير
أشكرك
أشرف العناني

عمرو يقول...

شمس النهار
مساء الخير يا برنسيس :)
ما أنا بألف أهو :))
يعنى مش بألف أوى لكن بأكتب اللى انا عاوز أقوله .. أصل التأليف ده يا برنسيس موضوع تانى خالص و له اٍستعدادات و تجهيزات و حاجات كده يعنى :)
لا عيد المسخره ده غير بتاع عادل امام ده بتاع اليهود و بيلبسوا فيه حاجات غريبه كده بس بطلوا يحتفلوا بيه بالشكل ده فى نويبع يعنى بقت اٍحتفالاتهم مودرن شويه ..
مدينة نصر ؟؟
يا سلااااام على مدينة نصر ..
ده اللى ماشفش مدينة نصر و سواقين مدينة نصر يبقى ماشفش حاجه من عجايب الدنيا بصراحه :))
عشتى و سلمتى و ترجعى بألف سلامه اٍن شاء الله ..

عمرو يقول...

خمسة فضفضة
و عليكم السلام و رحمة الله و بركاته ..
أهلا و سهلا يا دكتوره و بقالك مده كبيره مش بتكتبى بوستات جديده ليه ؟؟
لا و الله ماأقصدش أبدا أنى أغيظكم بس أقصد ألفت نظركم لهذه البقعه الجميله الخلابه من أرض الوطن ..
و لعلم حضرتك السفر لهناك و الاٍقامه مش مكلفه أبدا زى ما الناس بيقولوا يمكن العكس دى مصاريفها أقل بكتير جدا من اٍسكندريه مثلا المكتظه بالناس و المصطافين و اللى فقدت بريقها كمصيف من شدة الزحام و غلاء أسعارها ..
بس معقول فيه بيت فى مصر مافيهوش خروف متوسط الحجم ؟؟!!
غريبه دى :))
يعنى أقصد مثلا خروف العيد بدل ما بيتسلق و يتعمل بالطريقه التقليديه و بيترمى أغلبه من كثرة الدهون اللى فيه ممكن يتعمل بالطريقه دى على سبيل التجربه ..
متشكر جدا جدا لدعواتك و اٍن شاء الله باٍذنك يا رب تصاريح السفارى تخلص قريب ..
تقبلى تحياتى و تقديرى ..

عمرو يقول...

أم مالك
أهلا و سهلا بيكى و لتانى مره و الله عاوز أقول لك أن فيه مشكله فى مدونتك بالنسبه للتعليقات لأنى كل بوست حضرتك بتنشريه بأبقى عاوز أعلق عليه لكن للأسف الجهاز كله عندى بيهنج لما بأحاول أفتح صفحة التعليقات و مش عارف بقى هل دى شكوى منى فقط و لا جات لحضرتك شكاوى تانيه ؟؟
عارف أنا أن أنتم مش بتعرفوا تحسدوا :)
بس برضو الرقيه الشرعيه تتعمل من باب الأخذ بالأسباب يعنى :)
و ماتخافيش يا أم مالك اٍحنا جبل ماتهزوش ريح بفضل الله و لا تفرق معانا لا سياح و لا آثار تعذيب :)
شرفتى و أهلا و سهلا بحضرتك ..

عمرو يقول...

الجواز و سنينه
متشكر للزياره و للاٍطراء على الصور ..
تقبلى تحياتى ..

عمرو يقول...

norahaty
الله يسلمك من كل سوء يا رب ..
مهما كانت متعة القراءه عن السفر فى التكييف و مستلزماته اٍلا أنها برضو لا تساوى متعة التنقل الحقيقى من مكان لآخر و التعرف على الناس و الأمكنه عن قرب بس أدينى بأوفر لكم التعب و المصاريف و أجرى على الله :)
يا ترى أيه الموقف اللى حصل لك فى نويبع ؟؟ نتمنى نقراه قريب فى بوست عندك و لعله خير يا رب ..
أيوه يا دكتوره شفتى الجبال هناك ألوانه اٍزاى حاجه مبهره الحقيقه سبحان الخلاق العظيم ..
متشكر جدا و أهلا و سهلا بيكى و تقبلى تحياتى ..

عمرو يقول...

عاشقه و غلبانه
نتمنى لك التوفيق هناك و أن يهيىء لك المولى سببا لخدمة عباده و تكون فى ميزان حسناتك اٍن شاء الله ..
تقبلى تحياتى ..

عمرو يقول...

عاشقة الأحزان
ربنا يخليكى متشكر ليكى جدا ..
الحقيقه نويبع بلد جميله و جديره بالزياره لأن المكان و الناس هناك فى منتهى الثراء ..
مش الثرء المادى و لكن أقصد الثراء الوجدانى و الاٍنسانى ..
تقبلى تحياتى و نورتى ..

عمرو يقول...

فتاه من الصعيد
لا و الله ما أقصدش أغيظكم بس أقصد أنبه لجمال نويبع و سحرها :)
بس موضوع الأكله اللى تجوع هى دى بقى اللى كنت أقصد أغيظكم بها ..
تقبلى تحياتى و تقديرى ..

عمرو يقول...

نهر الحب
أهلا و سهلا بيكى و ليه بقالك مده مش بتكتبى بوستات جديده ؟؟
فعلا بأحب السفر جدا و أكتشفت بس على كبر أن العالم من حولنا ملىء بأماكن و أشياء و ناس من الضرورى رؤيتهم و التعايش معهم قبل ما يفوت الأوان ..
متشكر ليكى جدا و تقبلى تحياتى ..

عمرو يقول...

ستيته حسب الله الحمش
لا ما أنا عارف أن حضرتك مش بتحسدى بس برضو صلاة النبى حلوه يعنى :)
أيوه و الله يا دكتوره عيالى بيكرهوا السفر و السفارى و البحر و منهم شابه بتكره الورد و الشجر و الفراش و الطبيعه بصفه عامه يعنى ..
متشكر لاٍطرائك ربنا يخليكى أصل الحكايات مع اللى زيى مش بتخلص من كتر ما شفت و سمعت :)
أول مره أعرف أن الخروف كده يبقى على الطريقه السعوديه و يمكن أكلته فعلا فى السعوديه كده بس مكنتش عارف الطريقه .. ما هى نويبع بينها و بين السعوديه حتة خليج صغنون يتاخد سباحه ممكن ..
متشكر ليكى و تقبلى تحياتى ..

عمرو يقول...

dreem
أهلا و سهلا بيكى و متشكر جدا جدا ربنا يخليكى ..
تقبلى تحياتى و تقديرى ..

عمرو يقول...

سيناء حيث أنا
أهلا و سهلا بيك ..
طبعا لا يفتى و مالك فى المدينه حيث أن حضرتك من أهل سيناء ..
بس خد بالك أنا لما تكلمت عن سكان نويبع الأصليين قلت :
(سكان نويبع الأصليين بينتمى أغلبهم لقبيلة الترابين و هى كبرى قبائل عرب جنوب سيناء)
كلمة أغلبهم بتعنى أن فيه سكان من قبائل تانيه اللى هى مزينه ..
بالنسبه للفواخريه فأنا قلت :
(و بتوازى فى قوتها و سطوتها قبيلة الفواخريه فى شمال سيناء)
و المعنى واضح أن الفواخريه شماليين و ليسوا جنوبيين ..
و الحقيقه برضو كتير من الفواخريه بيعيشوا فى الجنوب بسبب وجود صلات نسب و مصاهره بينهم و بين سكان جنوب سيناء ..
أما بقى موضوع أن الفواخريه قبيله و لا عائله حضريه فالواقع أن الفواخريه بيعتبروا نفسهم قبيله كبيره و لهم شيوخ قبائل و مشايخ عشائر أو هكذا رأيت و قيل لى و برضو أكيد أنت أدرى منى بأمور السيناويه ..
أشكرك جدا على ما أبديته من اٍهتمام و تصحيح و ده شرف كبير لى خاصة أنك من أهل سيناء اللى بالنسبه لى جزء هام جدا من حياتى و ذكرياتى ..
دمت يا أخى الفاضل بكل خير و تقبل تحياتى و تقديرى ..

Israa El-sakka يقول...

سلام عليكم
بجد شوقتني أتي أروحها ده مشروع مؤجل بقاله 3 سنين !! بس واضح أن الصورة اللي البعض بيخدها على نويبع و غيرها أنها صحراء و ده مش حقيقي دي فيها حضارة و ثقافة غنية جدا و كمان فيها سياحة و كفاية أن الصور اللي حضرتك حاطنها دي تشرح الروح بجد

تحياتي و مستنية الجديد إن شاء الله

فشكووول يقول...

يا سلام يا عمرو بك

انت مهيص فسح فى سيناء بلد الحب والدم

عارف يا عمرو بك انا عايز ابقى بدوى من سيناء عشان اتجوز بنت حلوه هولنديه زى عياد كدا وبرضه البسها بدوى واسميها مارجريت ...

على فكره بلدنا مليانه حاجات جميله واجمل من الجمال ... بس يا خساره ؟؟؟؟

تحياتى يا عمر بك

الازهرى يقول...

وبعدين يقى شوية فشكول وبعدين انت ؟
ما لك ومال الدول الوحشة اللى شرطة فيها مرعبة ؟
خلينا هنا

تعرف ؟ لما تقعد فى طابا على الشط بالليل تجيلك ذكريات كتيييييير
ذكريات شخصية وذكريات عن البلد والتاريخ
صدقنى ممكن تفضل طول الليل صاحى من خير أى منبهات

ياااااااااااااه
كنت وما زلت بأعشقها
لكن أعمل بقى صعب أرجع هناك من تانى

المهم خللى بالك من نفسك بدل ما واحدة تزغلل عنيك ونقلب بقى فيلم فتاةمن اسرائيل

تحياتى دوما

Appy يقول...

عمرو صباح الفل

ابن سيناء او الاستاذ اللى قالك معلموه هى صح
مش غلط احنا عائله حضريه مش كلنا بدو بس هو اغفل حته بير العبد وباقى العيله اللى فيها هى العيله دلوقتى بتميل للحضر اكبر من القبائل
وفيه مش السواركه اللى اكبر مننا المساعيد علاقتنا بالترابين زى ما قولت كويسه بس
بعد الاحداث الاخيره اللى حصلت معاهم ومشاكل وتدخل الامن فكانت باظت بس الميه رجعت لمجاريها تانى
زى ما بيقولوا
واحنا من اكبر العائلات فعلا
حته الفرق بين العائله والقبيله مش هفتى فيها لانى بطيخه الحقيقه ممكن اسالك بابا واقولك
تسلم ياعمرو على الكلام الجميل ده

عمرو يقول...

اٍسراء السقا
و عليكم السلام و رحمة الله و بركاته ..
لا ده مشروع مينفعش يتأجل و خير البر عاجله لأن المنطقه هناك جديره بالزياره و الله ..
طبعا نويبع و مدن سيناء عامة مدن جميله للغايه و فيها برضو صحراء و حياة بداوه بجد رائعه و الحياه فيها مريحه للأعصاب جدا ..
تحياتى ليكى و أهلا و سهلا بيكى و بأشكرك على الزياره و التعليق ..

عمرو يقول...

فشكووول
أهلا بك يا أستاذنا الفاضل شرفت و نورت المدونه ..
على فكره حياة البدو مليانه بالمفارقات و الطرائف و هم نفسهم بيقولوا كده و بيعتزوا بكونهم مختلفين عن الحضر ..
بس حقيقى أفضل شىء فى البدوى حفاظه على الوعد و الصدق فى كل ما ينطق به و حسن النيه فى التعامل مع الغرباء لحد ما يثبت له العكس يبقى كده خلاص ده الفراق بينه و بينهم ..
بلدنا ؟؟
يا سلاااااااام على بلدنا يا أستاذنا يا سلام !!
مش قادر أفهم لحد اٍمتى حنفضل مزنوقين فى هذا الشريط الضيق اللى خلاص أتخنقنا منه و أتخنق مننا ؟؟
تقبل تحياتى و أهلا بحضرتك :)

عمرو يقول...

الازهرى
و الله عندك حق يا أزهرى مش لازم نجيب سيرة الناس الوحشين خاصة اليومين دول :))
و الله كنت فى طابا ؟؟
كنت فى شغل و لا فسحه ؟؟
جميله أوى طابا خاصة قلعة صلاح الدين اللى على جزيره فى البحر ..
عارف بقى يا أزهرى انا لما بأقعد بالليل لوحدى بأسمع أيه ؟؟
بأسمع أصوات شهدائنا و الله على ما أقول شهيد ..
تزغلل عين ميييين ؟؟
ده بيقولوا لى يا أونكل اللى تنقصف رقابيهم :)
أصل لما كنت أنفع أتزغلل كانت الحروب بينا مستعره لكن دلوقتى بقى خلاص بيتقاللى يا أونكل :))
تحياتى لك و تقديرى و أهلا بيك ..

عمرو يقول...

Appy
صباح النور أهلا و سهلا ..
أشكرك جدا للتوضيح بارك الله فيكى ..
و متشكر ليكى أن الموضوع عجبك خاصة أنك على درايه كبيره بأحوال سيناء و السيناويه حيث أنك فواخريه أصيله و صميمه :)
دمتى بكل خير و تقبلى تحياتى و تقديرى ..

جانيت يقول...

الله عليك و على جمال اسلوبك و صورك اللى تجنن
بجد خلتنى اعيش معك احلى لحظات فى الدنيا كلها ...... ايه الجمال دا كلو معقوله الصور ديه من مصر
بجد بحسدك و حاسب من بنات اليهود احسن دول مكارين قوى
ههههههههههه
سلام بقى و مستنيه بوست مدينة دهب

طوبة ذهب وطوبة فضة يقول...

bgd aslobk t7fa wmodo3 aksr mn raa3 tslm aydk wm3ak mtb3en gwalatk wmstnen 7kayatk

كلمات من نور يقول...

وكأننا كنا في رحلة سفاري

ما شاء الله زمان مش زمان قوي يعني من كام عقد قرأت كتب أنيس منصور بتاعة حول العالم في 200 يوم وووو وكنت باعيش اللحظه بلحظتها مع الكاتب والمكان و تكرر هذا الأمر مع كتاباتك وبالفعل كأنني كنت هناك

عايزين كتاب بجد تجمع فيه مادتك ويترجم إلى لغات وياريت حد يترجم مقالاتك ونحطها تشجيعا لسياحتنا المضروبة

وفقك الله لما يحب ويرضى

صبرني يارب يقول...

روعه روعه البوست

احلى حاجه انى باحس انى روحت معاك يعنى من الحكايات وكمان صور


مش عارفه هاقولهالك كام مره

اكتب الكلام ده وسجله باسمك ونزله فى كتاب


والخروف ده بيسموه فى الخليج المندي وهو فعلا تحفه

وطبعا كالعاده مع خالص حقدى
هههههههههههههه

بسنت صلاح الدين يقول...

والله مابزهق من حكاياتك و رحلاتك ابدا ،ده انا بقيت ادعى تطلع فى رحله عشان تمتعنا بأسلوبك الرائع،مش هاتنازل عن مغامره تانيه من مغامرات الرحاله عمرو

صوت من مصر يقول...

اكتب كتاب عمرو بدر ونشيل ان بطوطه من السوق

Me7'o يقول...

حلو قوى قوى البوست ده

أسلوبك سردك جميل جداً

تحياتى

اقصوصه يقول...

رحله ممتعه

وصور جميله:)

dr.lecter يقول...

انت ياعمنا لففتنا سيناء كلها تصدق بالله انا روحت كل الحتت دي لكن ماشوفتش اللي انت شوفته بجد علشان كنت باخدها طياري وخلاني احس بالندم اني ماطولتش الاقعده هناك علشان استامتع بجد

Beram Elmasry يقول...

أخي العزيز الغالي شكرا لإطراأك ومديحك لي وهذا أسعدني كثيرا وأما بالنسبة لكوز الدرة فهو يباع بجنية وربع وبعد كدة غلا مش هتلاقي خالص تحياتي ولا تكرمني تكرار الزيارة .

أحــوال الهـوي يقول...

متعه

حقيقيه ان اقرا لك
تعرف موهبتك رائعه بالسرد و التشويق

صديقي الجميل انت تعرف ان من امياتي ان التقي معك و انا موجود في مصر من 10 ايام
رقم تليفوني 0117519988
ياريت نقدر نتقابل

تحياتي

ماما أمولة يقول...

اخذتني في رحلة جميلة معاك

انت قصاص هائل بجد ربنا يصلح حالك

ياريت تمتعنا دوما بقصصك وفي انتظار جديدك

دمت بحفظ الله

تقديري

marmar يقول...

انا اول مره ازور المدونه الرهيبه دي "اللهم لا حسد " بجد انت موسوعه وكلامك وحودايتك وقصصك لو فضلت اقراها كل ثانيه مش هزهق منها ابدا ابدا ابدا

اول مره اعرف بجد حاجات كتير عن مصر من مواضيع حضرتك لاني مش عارفه مصر كويس لاني مش مقيمه فيها
وكل اللي اعرفو مدينه نصر ومصر الجديده :( وبسسسسسسسسسسس

عجبني اوي وصف الكرم اللي وصفتو لاهل منطقه نويبع اللي معرفهاش بتاتا الا ان فيها جمرك تقريبا والعربيات اللي بتيجي من السعوديه والدول المجاوره بيبقى مكتوب عليها جمرك نويبع وده بس اللي اعرفو ولله
شوقتني جدا اني ازور كل منطقه حضرتك وصفتها بوصفك العالي ده
والف صحه على قلبك ويارب متكونش كلت كتير من الخروف وسبت للمدونين شويه هههههههههههههههههههه
والف مبروووك عل عربيه الجيب الجديده انا خدت لفه في المدونه وقريت كم موضوع من بتوع حضرتك

تحياتي لحضرتك

من غير عنـــوان يقول...

أضم صوتي للحاجه شمس في حكايه الكتاب ده

أمنياتي

غير معرف يقول...

مقمتش من مكاني الا وانا قريها كلها. ضحكت موت على الشاي اليي اتغله عشرتلاف مره، اصلي انا شربته منهم قبل كده وتقريبا صابني نفس احساسك بردو

د حاتم البيطار يقول...

د حاتم البيطار
انا كنت هناك وبجد مبسوط ان فيه ناس بتحب نويبع زيي