الثلاثاء، 7 يوليو، 2009

صلاة الزين على عيالنا

Soccer - animated Pictures, Images and Photos

لأنى أب حنين على عيالى و قلبى بيهفهف عليهم هفهفه قررت فى لحظة تجلى أنى أبيع الواد اٍبنى الصغير آخر العنقود السكر المعقود عبد الرحمن عمرو الشهير بالواد الشيخ عبده حيث أنه أزهرى نشأ و ترعرع فى أحضان الأزهر الشريف منذ نعومة أظافره ..

و أصل الحكايه اٍنى بعد تفكير عميق وجدت اٍن أسلم السبل لضمان مستقبل سوبر لوكس للولد أنه يطلع لعيب كوره محترف و من ثم يتباع لنادى من الأنديه الكبيره بالملايين زى ما بنسمع عن لعيبة اليومين دول .. و مين عارف يمكن ربنا يكرمه و يتباع لنادى من نوادى أوروبا و تبقى الحكايه زهزهت معاه و يمكن مع اٍخواته كمان ..

و مكدبتش خبر .. و فضلت أنكش بمنكاش لما عترت و اللقا نصيب فى أكاديميه متخصصه فى تدريب العيال اللى فى سنه على مهارات الساحره المستديره بيديرها نخبه من لعيبة مصر العالميين الكبار اللى اٍعتزلوا المستطيل الأخضر و أنشأوا هذه الأكاديميه الفذه لتخريج جيل جديد من اللاعبين المحترفين ..

صحيح لاقيت الأمرين علشان ألحق الولد بالأكاديميه لأنها مقصوره على أبناء صفوة المجتمع و لأنها أصلا بتقع داخل كمباوند بيمر الداخل له على عدة نقاط تفتيش بسبب أهمية بعض ساكنيه .. و لكن الحمد لله أستطعت بتوفيقه تعالى أن ألحقه بها و أن أدبر مصاريفها المرتفعه و كله يهون فى حبك يا بت يا مدوره ..

و تمضى الشهور .. و يندمج الواد الشيخ عبده فى الأكاديميه و تبرز مواهبه الفذه كراس حربه ( الله يمسيك بالخير يا بيبو ) لا يشق له غبار .. و يحرز ميدالية أحسن هداف فى الأكاديميه .. و يشكل مع رفاقه فريق كوره مرعب لفرق الكمباوندات المجاوره بفضل مدربهم الكابتن الدولى و المحترف السابق فى اٍيطاليا ..

و أنا بقى يا فرحتى بأبنى كابتن مصر المستقبل لما أروح معاه يوم بعد يوم أتابع تدريباته و مبارياته .. و أقول فى عقل بالى يا ويلك يا ميدو يا ضلام ليلك يا أبو تريكه اٍدارى من كسفتك يا زيدان جايلكم لعيب محترف مافيش زيه .. بس ربكم لما يحب يكشف المستور بيكشفه رغما عن مناخير الجميع ..

الأسبوع اللى فات بقى أعلنوا فى الأكاديميه عن اٍقامة مباراه وديه بين فريق الواد أبنى و بين فريق مركز شباب بهموه السوق يوم 6\7 !!!!

فين يا أخوانا بهموه السوق دى ؟؟؟ الله و رسوله أعلم .. محدش عارف !!!

اللى يقول تقع بهموه السوق بعد بهموه المحطه بأتنين كيلو .. و اللى يقول لا لا دى قبل بهموه البلد بتلات مصارف و حاجات كده يعنى بس الخلاصه أنها بتقع فى أدغال الريف المصرى العتيد و برضو الله أعلم ..

اٍمبارح بقى كان ميعاد الماتش .. و أرتدت الأكاديميه أبهى الحلل مسبقا بمناسبة الفوز المرتقب على فريق عيال الفلاحين اللى حيسحقوهم فريق عيال الأغنيا و اللى لبسوا الأطقم الجديده اللى بالشىء الفلانى و جزم الكوره الجديده اللى برضو بالشىء الفلانى و اللى مش فاكر الوله أبنى قالى على اٍسمها بس نسيته و اللى أعرفه أنها على أيامنا كان اٍسمها الجزمه أم بزابيز .. و طبعا أهالى العيال برضو ملوا المدرجات علشان يفرحوا بعيالهم و كلهم من النوعيه اللى بالكم فيها دى اللى هم بيتكلموا كلمه عربى و عشره لامؤاخذه فرنساوى .. و الكل مترقب وصول الفريق الضيف اللى جاى ينسحق على حسب اٍعتقاد الجميع ..

و فجأتن يوصل الأتوبيس بتاعهم .. أتوبيس كده منظره كئيب و متهالك من اللى بنسميه فى الفلاحين الحلزونه .. و ينزل منه الفريق الضيف ..

العيال يا حبايب قلبى قد عيالنا برضو .. لابسين يا حبايبى شورتات و فانلات قديمه أكل عليها الدهر و شرب و مش كلهم كمان لابسين زى بعض .. و فى رجليهم جزم مشكله كاوتش من باتا على كوتشيات مخرمه و معاهم مدربهم اللى كان لابس تريننج من أبو 30 جنيه و كان خايف عليهم و بيلمهم تحت جناحه كأنهم كتاكيته خاصة أن عيال الفلاحين بان عليهم الاٍرتباك و الخجل بسبب اٍستقبال عيالنا اللى ينقرصوا و كان اٍستقبال ملىء بالسخريه و الملاحظات الرخمه عن هيئتهم المتواضعه ..

بس ربكم و الحق أنا من البصه الأولى أدركت الفرق الكبير بين بنية عيالنا الجسديه و بين العيال دول .. و كانت المقارنه مش فى صالح عيالنا أبدا !!

و أبتدا الماتش .. و شويه شويه بدأ فريق عيال الفلاحين فى فرض سيطرته المطلقه على الملعب .. و أظهروا رجوله و فدائيه و اٍستبسال رغم هتافات مشجعى فريق الأغنيا المحبطه .. و بدأ مهرجان تسجيل الأهداف :)

اٍكتشفت أن عيالنا فاقدين لحرفية تنفيذ الخطه اللى رسمها لهم مدربهم اللى أشهد له بالبراعه .. و فى المقابل كان الفريق الضيف يلتزم تمام الاٍلتزام بخطته و ينفذها حرفيا .. بان لى الفرق الشاسع بين لياقة الفريقين البدنيه و لما سلمت على عيال الفلاحين بعد اٍنتهاء الماتش يدا بيد أدركت من خشونة أيدين أغلبهم أنهم بيشتغلوا فى الغيط مع أهاليهم و ده طبعا أكسبهم صحه مش موجوده عند عيالنا المترفهين المتدلعين بتوع النجتس و الكورن فليكس و النوم فى التكييف للعصر ..

و أبتدا أهالى العيال الأغنيا يبلموا و المامهات دموعهم اللولى تسح على خدودهم البنور بسبب خيبة عيالهم القويه اللى أتصرف عليهم مبالغ طائله علشان يبقوا لعيبه محترفين ..

و لاقيت نفسى بدون ما أشعر بأشجع العيال لعيبة بهموه السوق أنا و سواق أتوبيسهم و أم عيل فيهم منقبه كانت بتناول العيال أزايز الميه علشان يشربوا .. و شويه شويه أبتدا التشجيع فى المدرجات يتنقل لصالح الفريق الضيف اٍعجابا بحرفنتهم و اٍصرارهم المخيف على الفوز مما زاد فى وكسة عيالنا و بقوا يجروا مفرشحين فى الملعب بدون هدف و لا غايه زى اللى ندهتهم النداهه و طبعا كانت النهايه أنهم أتهزموا هزيمه تقيله منكره غير مسبوقه ..
عارفين مع صفاره نهاية الماتش كانت النتيجه كام ؟؟

8 \ 3

أيوه 8 \ 3 لصالح فريق عيال الفلاحين مقابل 3 أهداف لعيالنا الواد أبنى سجل منهم هدفين ..

و طبعا أنسحبوا عيالنا من الملعب و هم يجرون ورائهم أذيال الوكسه و الخيبه القويه كعروسه راجعه على بيت أبوها يوم الصباحيه بعد ما كانوا قبل الماتش ماليين الدنيا هيصه و عنظزه و نكت و تريقه على ولاد الفلاحين اللى حيرجعوا البلد يلموا الدوده من الغيط على حد قولهم ..

و أما العيال الغلابه التانيين اللى ربنا جبر بخاطرهم فبسم الله ما شاء الله اللهم صلى على حضرة نبينا الزين كحيل العين كانت فرحتهم بالنصر المؤزر على ولاد الأغنيا اللى تعاملوا معاهم من فوق لا تضاهيه فرحه و حملوا على أكتافهم القويه مدربهم و سواق أتوبيسهم بالمره و لفوا بيهم أرض الملعب الشيك أوى اللى أزعم أنهم عمروا ما لعبوا على ملعب بالأناقه دى قبل كده .. و اللى شرح فؤادى و بهجج خاطرى أن عيل فيهم معرفش جاب منين علم كبير أوى لمصر و أبتدا يلوح بيه فى فرحه عارمه :)

و أنا مروح بأبنى لاحظت أنه ساكت و متنح على غير العاده و لما سألته عن السبب و أنا بأضحك علشان أغيظه قال فى بجاحه تشوبها حسره : غلبونا يا بابا علشان الهوا كان ضدنا فى الشوطين !! و كمان بيزقوا و لعبهم خشن !! و الحكم كان موالس معاهم !! و بصراحه كده الماتش ده مش محسوب !!

قلت له : أبشر يا أبنى مادام وصلت لكده يبقى حتنضم للمنتخب فى يوم من الأيام ..

مبروك عليكى ولادك يا بهموه السوق .. ربنا يحرسهم و يحميهم .. و منصورين اٍن شاء الله دايما يا أولاد الفقرا على ولاد الأغنيا و بأهدى لكم من قلبى الأغنيه دى :)



weladna Online recorder

هناك 32 تعليقًا:

الكلمة نور يقول...

كان عندنا دكتور فى الكلية لعيب كورة جبار وابن حلال يحب الطلبة والضحكة المهذبة سألته انت سيبت الكورة ولا هى اللى سابتك يا دكتور؟
قالى وانا صغير كنت عامل فريق فى البلد وكنت بالعب حافى على الارض الناشفة (شرب) وعمرى مالبست جزمة كورة(باتا او ام بزابيز)لغاية ما روحت الكلية فى القاهرة قلت اقدم فى نادى ولقيت الترسانة عامل اختبارات الترسانه واول مانزلت على النجيلة الناعمة قلعت الجزمة وجريت زى ما اكون باجرى على حرير ومحدش صدق انى بالعب حافى كدا احسن من اللاعيبة اللى معايا
بس يا خشارة كان عنده بلهارسيا
فكرتنى بيه
الله يمسيه بالخير ويجزيه عنا خير

beautiful mind يقول...

اولا ازيك يا استاذنا يا جميل
ثانيا
ايه ياعم الكلام الجامد دا
وهو انت اول مرة تعرف ان عيال الفلاحين عيال تعجبك يعني مش اي اي
دا انت لو بصيت في مصر كلها تلاقي الرموز كلهم ولاد فلاحين وكانوا علي قد حالهم وحالهم كانت قحط
مشوفتش لما مصر فازت بكاس الامم وجابوا ابهات ومهمهات اللعيبه
عموما اوعي تسيب الشيخ عبده وخليك معاه يمكن ربنا يطرح فيه البركه
واخر كلامي سؤال
كان نفسي اعرف انت اهلاوي ولا .... ( والعياذ بالله )

تسلم يا جميل

ماما أمولة يقول...

ههههههههههههه

ربنا يباركلك فيه

من اول الحكاية وانا توقعت النهاية

ولاحظت من رد ابنك القاء المسئولية على غيره

ربنا يهدي اولادنا حميعا اللهم امين

تقديري

بسنت صلاح الدين يقول...

ان شاء الله خيرها فى غيرها،بس ده حال الدنيا دايما ربنا مقسم الارزاق ،كنا دايما نلاقى حتى طلبه المدارس الحكوميه يطلعوا من الاوائل و طلبه اللغات طبعا مش كلهم بس معظمهم بينجحوا والسلام،الموضوع يمكن عشان الغلابه دول بيبقوا تعبانين فى الحاجه و طالع عينهم و متحملين المسئوليه و ده دافع كويس عشان يوصلوا لأهدافهم

خمسة فضفضة يقول...

السلام عليكم ورحمة الله وبركاته

فكرتني ببني عبيد والزمالك

بس كويس الواد الشيخ عبده فيه امل ان شاء الله تبيعه بتلاتين اربعين مليون يورو وربنا يفتحها فوشه كده ويدخل المنتخب ونوصل بقي كاس العالم مره من نفسنا قبل ما نموت

--------------

صيتلك المدونه احلي تصييت
سيبت للينك بتاع اكل الشوارع في منتدي حريمي عشان يعرفوا مضاره واصله وفصله

تاني يوم لقيت منتدي حريم تاني غير الاولاني ناقل طريقة عمل الحواوشي بس مش حاطين الينك عشان قوانين ال ايه المنتدي

سلام

mahasen saber يقول...

ربنا يبارك فيهم وفى عبد الرحمن برضه

حسستنى حضرتك وانتا بتتكلم بفترة معرفش ايه بتاعة الطبقات دى

بس بجد ضحكتنى كالعاده من خفة ظل اسلوب حضرتك يا لوردنا الغالى

هبه يقول...

ههههههههههههه
دمك شربات يا بابا عمرو......
مش معقوله طريقتك فى الوصف...مش بشبع من كلامك خالص.........



تصبح على خير xoxo

mahasen saber يقول...

من وقت ما كنا فى كوستا للان وانا فى قمة سعادتى انى شفت حضرتك والباشمهندس البنا

وكبمو سيكيتيمو

وخجلانه موت من شقاوة ابنى اليى معرفتش اسيطر عليها

الواد فضل لحد ما روحنا ماسك على كيمو سيكتيمو كيمو سيكتيمو

نفسى حد يترجملى
بس فهمت منه انها حاجه حلوه يعنى

الكحيان يقول...

إيه ياعم القص اللذيذ ده؟عندك حق النعومة لا تبني حضارة ولا تحقق مجدا ولا تجلب نصرا في كل شيء حتى في التعليم بص كده تلاقي المتفوقين والعلماء أغلبهم كانوا في مدارس وجامعات كحيانة وكانوا يذاكرون على لمبة الجاز أو تحت أعمدة الإنارة في الطرق العمومية ... وبص للجامعة الأمريكية اللي بقالها أكتر من تمانين سنة في القاهرة ؟ ماذا قدمت ؟ لن تجد فيها علما واحدا من الأعلام يشار إليه بالبنان لم تقدم لا علماء ولا أدباء ولا قادة فكر ولا أي شيء. لأنهم عالم هلس بتوع همبكة معاهم قرشين بيجبروا بيهم فشلهم ويعوضوا نقصهم لزوم الوجاهة. والعيال تروح تتصرمح هناك ويدمنوا المخدرات ويمارسوا الجنس ويتعالوا على الناس بشهاداتهم الزائفة ... تدوينتك رائعة لأنها أقامت معادلا موضوعيا من خلال نموذج طريف يمثل فلسفتنا الفاشلة في إدارة حياتنا فلسفة المظاهر والغش والتعالي .شكرا لك

mahasen saber يقول...

على فكره بئه كل ما ادخل عند حضرتك واشوف مدونون فى ذمة الله

افضل فتره متنحه وااقول يا ترى اسمى هيتحط هنا امتى


ربنا يرحمنا برحمته الواسعه
ويحسن ختامنا

mohamed ghalia يقول...

هههههههههههههههه
معلش يا أستاذنا هى علقة تفوت ولا حد يموت
وادام وصلنا للشماعة يبقى أطمن
ههههههههههههههههههههه

عاشقة الأحزان يقول...

السلا م عليكم

عمرو
اخبارك ايه

الحمد لله على كل حال وربنا يهديهم الى طريق الخير

وخيرها فى غيرها

تحياتى لقلم حضرتك الرائع وأسلوبك المتميز دائمآ
ودى واحترامى الكبير
إيناس

الازهرى يقول...

طيب والهوا كان بحرى والا قبلى
والحكم قبض كام ؟
والا هو مجرد حقد طبقى ؟

تعرف من اسبوعين كنت فى اجتماع مدربين وكنا بنتكلم عن الموضوع ده تقريبا لانهم فى الاتحاد بيرفعوا الرسوم بطريقة سخيفة جدا بقى من الصعب معاها ان البسطاء يشتركوا جديا فى اللعبة خاصة مع ظروف الغلاء فى المعيشة
وكان اكتر حاجة عجبتنى احصائية بسيطة لواحد من المدربين الكبار بتقول ببساطة ان تقريبا 95% من الابطال هم من البسطاء


ولا حول ولا قوة الا بالله

Hossam يقول...

السلام عليكم
بجد مضووع اكثر من رائع
انا عجبنى اوى طريقة كتابتك لانك فى الاول اظهرت ان الفريق غنى نضيف بيدرب فى مكان نضيف والتانى الفقير هدومهم مش كويسة ولا جزمهم بس فى الاخر هم اللى كسبوا وهم اللى انتصروا بخلاف اكليين النجتس والكورن فليكس
بجد موضوع رائع فعلا
ربنا يخليك عبد الرحمن او الشيخ عبدة او بيبو
تحياتى لك

norahaty يقول...

السلام عليكم ورحمة
الله تعالى وبركاته
اولا:
انــــــــــــا
بصبح استاذنا
عمرو بدر .

norahaty يقول...

ثـــــــانياً
بقى :انت قلتها جايين
من أدغال الريف المصرى
العتيد:)واقولك انا بقى
المصريين اهمه:) المصريين اهمه:)

norahaty يقول...

وثالثاً
استاذنا العزيز
مش دايماً بيحصل هذا
لانهم برضة ساعات اللى جايين
من اعماق الريف المصرى دول بيبقوا
عيانين والعيا بعيد عن حضرتك مكلبش فيهم !!مش دايما كسبانين يعنى بس اهو
ربك سبحانه وتعالى حب ينصرهم لاجل
(العيال الفافى التانين )يتكبسوا:P

أحــوال الهـوي يقول...

و الله يا عمرو لو طالت القصه مترين كمان ما كنت زهقت اسلوبك مش ممكن في السرد و التصوير

بصراحه انت خسارة فينا اقصد انت تستحق ان تظهر كتاباتك علي مستوي اوسع لانك ممتع و متنوع و شامل
يعني في صحف مجلات

نرجع للموضوع
اولادنا المرفهين و الحافز للانتصار و اثبات وجودهم كل ده اظن انهم فقدوه بالامس كنت اتحدث لزميلي عن ابنه الذي دخل امتحان احر العام في السنه الاولي بالجامعه و ترك و رقته خاليه و عند سؤاله اجاب بمنتهي الا مبالاة انا عارف الاجابات كلها بس قررت ما اكتبش حاجه

و ده حال منتخبنا
المهم ربنا يبارك في اولادك و نبتدي تكملة خطة المستقبل بارسال كابتن بودي او دودي عبد الرحمن سابقا لاعماق الريف السحيقه اعارة لمدة شهر يزرع و يلعب و اكتساب مهارات جديدة

تحياتي

قوس قزح يقول...

الله عليك
و الله انك اصيل
لانك شجعت الغلابة و حسيت بهم و بأد ايه هم محتاجين التشجيع و يستاهلوه
و اهو الماتش ده يعلم ابنك انه مش يحكم على خصمه بمظهره ابدا و يعمل الف حساب له
و انت كمان يا عمرو تعرف ان المهارة مالهاش دعوة بان التدريب فى مكان شيك ولا فى غيط ..لو ابنك فعلا بيحب الكرة و موهوب فيها هيوصل

تحياتى

MaNoOoSh يقول...

الاول انا عايزة أقولك مبروك على ضرة حفيظة
ربنا يباركلك فيها ويرزقك بخيرها ويبعد عنك شرها


موضوع العيال ده بقى فعلا زي منت قلت
عجبني قوي وصفك لايدين الولاد الناشفة من الشقى
وانا فى اعتقادي ان هو ده اللي بيصنع الرجال
الشقى والتعب والتعود على تحمل المسئولية
بصراحة بلاقي نفسي بحترم جدا الشاب اللي ايده ناشفه وخشنه وبشرته لفحها سمار الشمس
المفروض ان الطفل يتعود على تحمل المسئولية مش يوصل لسن العشرينات وبعدين يبدأ يحاول يتعلم تحمل المسئولية

الموضوع جميل جدا
وعذرا على تأخيري فى الزيارة

فتاه من الصعيد يقول...

طبعا ولاد الاكادميه هيروحوا الاهلي والزمالك ...... وعيال بهبوه البلد هيروحوا نوادي سكا .... ومنها للأسماعيلي ...... والأهلي يشتريهم منه ..... لأن الكوسه بقيت للركب في الأنديه الكبيره

على العموم ما تخافش ..... ابنك هيروح الأهلي والمنتخب ان شاء الله

بس موش المفروض الأكادميه ترعى المواهب موش الكوسه ...... دي الكوسه نبات بيطلع بسهوله في ارضنا الخصبه موش محتاج عنايه يعني

عطش الصبار يقول...

واللهى يا استاذ عمرو انا ما بكره فى حياتى قد الكوره اللى لحست عقل الناس
تصور
عندى حفيد عنده سبع سنين
بقدمله فى يوم بيض مقلى يقولى شيلى البياض منه وانا اكله وقفت مذهوله فاتحه بقى مش عارفه اشيل البياض ازاى وايه التعصب دة المشكله لو عرف الصفارده تبع نادى برضه يبقى مش هياكل بيض ولاجبنه ولااى نوع من الماكولات الا الطماطم
وبعدين يا استاذ عمرو ماهم معظم اللاعيبه الحلوه فى كل الانديه من بلادنا من الفلاحين ياعنى من ابو كبير وههيا والبلد اللى قلت عليهاوغيرها من اقاليم مصر
ومبروك للشيخ عبده كده ضمن المنتخب بدال الحكم مش منصف ولا الهوا معاهم
اعتقد انه هيبقى كابتن المنتخب
بعد كدا مش هنعرف نكلمك
تقبل تحياتى

كلمات من نور يقول...

هههههههههههههه

أحلى ما في الموضوع كلام ابن حضرتك يا أستاذ عمرو

فعلا داه لازم يسمعه حسن شحاته

حياخده من دلوقتي ويضمه للأشبال

ربنا يكرم أولادنا و أولاد المسلمين أجمعين

شمس النهار يقول...

صباح الخير
انت بتغيظ الولد ليه :)
مش كفايه الهزيمه
الاولاد بتوع مركز الشباب ماعندهمش حد يدلعهم
وكمان عندهم هدف وطموح واخدين الموضوع جد مش عشان هاي شله انا بلعب في الاهلي والا الزمالك
ده غير الحياه القاسيه اللي بتعلم الانسان رغم انفه انه يكون عنده طموح يغير اللي هو فيه للأحسن وعشان ده يحصل لازم يتعب ويحسن من نفسه

بس طبعا كالعاده اخدت الموضوع بطريقه جميله ساخره

gogo!sf يقول...

ربنا يكرمنا كده ونشوف الواد اللعيب ضارب شعرة ازرق زى ابراهيم سعيد

ولا هربان وواخد الجنسيه القطريه

والله يا استاذ عمرو الموزين كلها اتقلبت بعد ما كان نفسنا ان ولادنا يبقو علماء او دكاترة او مهندسين بقى امالنا انه يبقى مغنى او ممثل او لعيب كورة هما دول اللى بيجيبو فلوس
مع كل احترامى للى بيقدم منهم رساله محترمه وان كانو قله منهم لله اللى كانو السبب ولكى الله يا مصر

تحياتى لك يا عمور

عطش الصبار يقول...

اسعدنى سؤاللك واللهى يا استاذ عمر
لكن انا مشغوله الايام دى فى الاعداد لمشوار قريب كدا ارد بيه على زياره اوباما ياعنى الراجل ييجى لحد عندنا وما نردش الزياره ماتنساش ان احنا فلاحين ولازم نقوم بواجب رد الزياره ياعنى بجهز حتتين جبنه قديمه على شويه قشطه وشويه عيش ملدن وكام فطيره يمكن يرضوا عننا لما يلاقونا عارفين الواجب
واللى عايز حاجه من اوباما او حتى شويه تاميفلو من شركات رامسفيلد لزوم انفلونزااصدقائهم
بس ادعولى ما ارجعش انا بيها
عموا السفر اخر الاسبوع القادم
زياره قصيره وعوده للوطن وللمدونات الجميله
شكرا على سؤلك وشكرا على كل بوست يحمل ابتسامه او يناقش قضيه
كل بوستاتك رائعه تخفف عنا باسلوبك الساحر
تقبل تحياتى

MǿиY El-Shreef يقول...

ايه ده زي افلام الكارتون D:

والله بشوف دايما حجات زي كده

بس واضح ان ابن حضرتك ماشاء الله موهبه

طب ليه ماتدخلوش اكاديميه نادي

واكاديميه الاهلي حلوه جدا

بس انت شكلك زملكاوي D:

ربنا يحميهم يارب ويحفظ مواهبهم

و ع فكره في كتير كده مش مُكتشفين ولا حد عارفهم ومش بس ف الكورة

مصر ولاده والله

بس شكلها متجوزه عرفي وبتخبي العيال هههههههههه

ثلام

كيــــــــــــارا يقول...

والله صعبوا عليا بس ايه حكاية هتنضم للمنتخب دي اممممممممم ماشي ماشي

بس خليه يستمر كفايه انه جاب جونين في المطحنه دي

وواضح ان الفريق التاني يستاهلوه بس فين المنطقة دي اول مره اسمع عنها

حــــــــــواء يقول...

بس بجد
محولتش تفهم ابنك وتعلموا وتقوله الدروس المستفاده
ولا غظته واخدت كلامه هزار وسكت علي كده
وقوله طنطتك ايمان بتقولك هرد لك ياحبيبي

وبلاش حكاية الشماعه ديه

ماما يقول...

اخى العزيز عمر

بجد بكون سعيده بكل كلامك واسلوبك فى العرض اكثر من رائع
بجد عندما اقرا لك ..كانى اقرا قصيدة شعر لا امل من قرآتها

ربنا يبارك فى اخر العنقود
ومعلش خيرها فى غيرها
انا لو منك اضمه لفريق الفلاحين
(دول ناس رجاله ووقفوا وقفة رجاله)

من غير عنـــوان يقول...

وهكذا حال الحياه

أحب الدروس المستفاده


أمنياتي

صبرني يارب يقول...

استاذنا اووووووووول مدونه ازورها النهارده

بوستاتك وحشتني والله

ربنا يخليلك الشيخ عبده

وافتكرتني لما مره روحت بلد ارياف وقعدت شويه فى العربيه ولقيت شوية بنات بيلعبوا قدام بيتهم فى عمر ولادي كده

البنت ما شاء الله ربنا يحمي بتجري زي الطلقه

ومش عارفه ساعتها نط فى دماغي منظر المدرسه عند مريم

ونسبة البدانه المرتفعه والفسحه الى فيهاالعيال كل عيل ماشي ماسك كيس شبسي وعلبة بيبسي وماشي يتهادي كده برواقه فى حوش المدرسه !!!

والعيال بتوع الارياف صحيح رفيعين بس عيال مصحصحه كده ما شاء الله ربنا يحمي


البوست حلو اوي اوي وانا بجد ضحكت اوي اوي

وقول للشيخ عبده والنبى بلاش سكة المنتخب خليه يعرف هو خسر ليه صحيح مش يافلم على نفسه
هههههههههههههههههههه