~SUN~ Pictures, Images and Photos

السبت، 18 يوليو 2009

من راس سدر أحييكم ..

صباح الخير أعزائى المدونات و المدونين ..
أولا بأعتذر لكم بشده عن عدم الرد على تعليقاتكم عندى فى الكام بوست اللى فاتوا و ده و الله لأنشغالى الشديد جدا بأمور كثيره طبعا مش أهم من الرد على التعليقات لكن أيضا ظروف النت السيئه و بطئه المفرط من أسباب عدم الرد ..
أرجو تتقبلوا عذرى ..
******************************************
من جنوب سيناء أحييكم حيث أمر بتجربه فريده ..
تجربة الاٍستعداد للقيام برحلة سفارى فى قلب الصحراء للمره الثالثه فى حياتى .. رحلة السفارى بالنسبه لى بتبدأ من راس سدر و منها لأبو زنيمه على بعد 80 كم و منها للتلال الملونه شرقا فى عمق الصحراء على بعد 80 كم تانيه ..
طبعا رحله زى دى لا يجوز أن يأخذها الاٍنسان ببساطه و سهوله لأنها بتحتاج لتجهيزات كتيره بيتولاها دليل بدوى من العالمين بطبيعة الاٍقامه فى قلب الصحراء .. و الدليل اللى معايا و أسمه طبعا لازم يكون سالم سلمان بيتولى اٍستخراج التصاريح الأمنيه اللازمه و الاٍبلاغ بمنتهى الدقه عن خط سير الرحله و نقطة النهايه و اليوم المتوقع لعودة صاحب الرحله و كده يعنى ..
أيضا بيتولى الدليل تجهيز خيمه و كليم لزوم النوم .. و شوية لوازم للأكل زى الدقيق و الرز و المعلبات و شوية لوازم اٍسعافات أوليه أهمها ترياق لسم العقارب و الأفاعى و طبعا كميه لا بأس بها من الماء و بيتولى نقل هذه الأغراض بسيارته النصف نقل و معاه السائح لو مش معاه سياره ملائمه للسير فى طرق الصحراء الغير ممهده أو غير متمرس على كده ..
أحب أعرفكم أن فى قلب الصحراء جربت كل أنواع خطوط الموبايلات ما أشتغلش غير خط فودافون و دى ملاحظه مهمه جدا جدا جدا للى ناوى ينعزل عن العالم لو حدث طارىء لا قدر الله ..
دلوقتى أنا فى مدينة راس سدر و هى أول مدينه بمعنى كلمة مدينه تقابل القادم من القاهره فى طريقه لشرم الشيخ بعد عبور نفق الشهيد أحمد حمدى رحمه الله و بتبعد عن النفق من مدخله الشرقى بحوالى 60 كم ..
راس سدر بجد مدينه رائعه رائعه .. بتجمع ما بين الطابع البدوى السيناوى و ما بين المد العمرانى السياحى المتمثل فى عشرات القرى و المنتجعات السياحيه اللى بتطل على خليج السويس من الناحيه المقابله للعين السخنه فى الجهه الغربيه من الخليج ..
و رغم فخامة و روعة هذه المنتجعات المقصور دخولها على أصحاب الشاليهات و الفيلل لكن الحق يقال اٍن الشاطىء العام أجمل و أحلى من الشواطىء الخاصه لنظافته الشديده و لخلوه من الصخور و تمتعه بشاطىء رملى جميل تم تنظيفه بعنايه و مهاره على عكس شواطىء المنتجعات السياحيه الخاصه ..
و اٍيجار الشقق للمصيفين بيتراوح ما بين 70 و 200 جنيه فى اليوم على حسب شياكة الشقه .. أما فى الشتاء فبينخفض السعر للربع و ربما أقل ..
مدينة راس سدر فيها محلات و كافيتريات و مطاعم و أسواق كثيره و أسعار السلع فيها عاديه بدون مبالغه كبيره و أغلب أصحابها و العاملين فيها من أهالى مدينة السويس أصلا .. و أما سكانها البدو الأصليين اللى بيضحكوا دائما و عينيهم على طول مقفوله نص قفله ( ايوه كده بالظبط علشان السبب اللى أنتم قلتوه ) فبيعملوا فى مهن مختلفه زى قيادة سيارات الأجره و النصف نقل و الزراعه بالتنقيط و مش لازم تعرفوا بيزرعوا أيه .. و بيمتازوا بالأمانه و الحفاظ على الوعد و لو على رقابتهم و الكرم خاصة مع الضيوف و الحفاظ على نسائهم و الرقه المتناهيه فى التعامل معهن ..
بحر راس سدر يخلو تقريبا من الشعاب المرجانيه و ربما يكون ده السبب فى كونها غير جاذبه لهواة الغطس من مختلف أنحاء العالم رغم بعدها عن شرم الشيخ بحوالى 300 كم و كلنا طبعا عارفين شهرة شرم الشيخ فى هذا المجال ..


لكن الحقيقه أن بحر راس سدر بيمتاز بهدوئه اللى يغيظ و نظافة مياهه و خلوها من أى ملوثات و أيضا بيمتاز بوجود الكثير من الدرافيل اللى يمكن مشاهدتها بالعين المجرده أثناء قفزها و لهوها و بجد شكلهم ممتع جدا ..

و أيضا تحدث ظاهره لها العجب هناك لم أرها فى أى مكان آخر و هو اٍنحسار مياه البحر لمسافة كيلو متر تقريبا أثناء فترة الظهيره مره و قبل المغرب بشويه مره تانيه مما يتيح سهولة المشى على قاع البحر و بالتالى جمع أحجام عجيبه من الكابوريا النتايه اللى وصى على أكلها الحكماء .. و لكن يجب توخى الحذر لأن فجأه البحر بيرجع يعلى تانى و بيطبق على كل شىء فى لحظة غضب مخيفه بتذكرنى بقصة اٍبتلاع البحر لفرعون موسى و جنوده و من المفارقات العجيبه وجود عيون موسى الشهيره بالقرب من المكان اللى بأحكى لكم عنه و اللى بيقال أن سيدنا موسى فجرها لبنى اٍسرائيل بقدرة الله عقب عبورهم للبحر و فرعون وراهم عاوز يقفشهم .. و قد شاهدت بعينى هذه العيون ال 12 و شربت من مائها و توضأت و سبحان الكريم اللى جعل طعمها أحلى من الشهد و الله ..

مدينة راس سدر أيام الاٍحتلال الاٍسرائيلى لشبه جزيرة سيناء كانت مركز لأجهزة الاٍستخبارات و الأمن الاٍسرائيليه و لا يزال لليوم يتذكر كبار السن من أهل المدينه العمليات الهجوميه العنيفه اللى كانت بتقوم بها قوات الكوماندوز المصريه ضد هذه الأجهزه أيام حرب الاٍستنزاف .. و كثير أيضا من أهل المدينه كانوا منضمين سرا لمنظمة أولاد الأرض اللى تكونت سرا من أهل سيناء لمقاومة الاٍحتلال الاٍسرائيلى و سقتهم الذل كاسات بسبب ما أشتهر عن أهل راس سدر من وطنيه و دهاء و سعة حيله و درايه تامه بدروب و مسالك الصحراء الشاسعه ..

و من الجدير بالذكر أنه أمام شاطىء المدينه تقبع فى أعماق الخليج 11 طائره فانتوم اٍسرائيليه تم اٍسقاطها بواسطة أبطال القوات الجويه المصريين فى حرب أكتوبر اللى شنوا هجمات جويه عنيفه على مراكز الاٍستخبارات العسكريه الاٍسرائيليه بالمدينه فى الدقائق الأولى للحرب و سويتها بالأرض كما حكى لى ..

بينى و بين راس سدر غرام و هيام و همسات و كلام ..

أهرب اٍليها كلما أشتقت للهدوء و السكينه خاصة فى الشتاء حيث تخلو تماما من الناس و بيبقى بوزى فى بوز رجال حرس الحدود الجدعان المصحصحين اللى بيحموا الشاطىء من تسرب أى صنف من الممنوعات من و اٍلى الجانب الغربى من الخليج برجوله و دقه متناهيه .. ولى فى هذا الخصوص حكايه عجيبه غريبه تشهد بمدى صدق و فدائية و أمانة رجال حرس الحدود بس مش عارف هل يجوز لى حكيها و لا لأ ؟؟

و أما الآن فى عز الصيف فشاطىء المنتجع بيزدحم بالمصيفين على كل الأحجام لما الواحد عينيه أحولت و الله و لا مفر لى من رحلة السفارى حيث لا شىء سوى السماء و التلال الملونه و صخب الصمت و التفكر فى خلق السماوات و الأرض ربنا ما خلقت هذا باطلا سبحانك !!

اٍن شاء الله أشوفكم فى بوست تانى قبل ما أبدأ رحلة السفارى أحكى لكم عن شوية ملاحظات كده خاصه بالسياحه الداخليه فى جنوب سيناء ..

متشكر لكم ..

هناك 61 تعليقًا:

صبرني يارب يقول...

ايه ده

ماشي ياعم اتغاظنا خلاص

وسفاري كمان ؟؟

وطالع لواحدك ؟؟؟

طيب ما تشوف نور تيجى معاك

زي احمد السقا يعني

بس لمعلومات نور مش فاضيه محجوزه اليومين دول

شوفلك لمبه بقى خدها معاك او كشاف شحن من ابو عشره جنيه ده حلو والنبى

هههههههههههههه

رحله سعيده يا استاذنا بس شوفلك حل فىالنت ما ينفعش كده

عشان انا عايزه اعرف عينهم بتضيق ليه وبيزرعوا وقصة حرس السواحل

دعاء يقول...

زوجي دائماً يحكي لي عن رأس سدر لأنه كان بيشتغل هناك فترة بس دايما يقول انها فاضية جدا والسياحة هناك مش شغالة قوى بس الكلام ده كان من حوالي 6 سنين ممكن يكون في حاجات اتغيرت .كمان حكى لي عن المد والجذر (والكابوريا). ههههههه

بس انت رأيك لو نحب نروح يكون في الصيف وللا في الشتا ؟
يا رب تستمتع جداً وترجع بالسلامة

Unknown يقول...

مدووووووواخنا انت كده وراك:)
من الصعيد لاخميم لرأس سدر
لسفـــــــــــــــارى !
سفارى ياراجل ياطيب
فى يوليه!وفى سينا
الجنوبيــــة !

Unknown يقول...

منتظريين الباقى
وتيجى بالسلامة
يـــــــــارب

Unknown يقول...

بس صحيح ايه سر
تسمية كل (تقريباً)
يعنى رجال سيناء
ب سالم أو سلمان
هل لها سبب تاريخى
مثــــــــــــلا؟

mohamed ghalia يقول...

أجازة سعيدة إن شاء الله

عمرو يقول...

صبرنى يا رب
لا لا مافيش داعى للغيظ دى رحله شاقه جدا و متعبه للغايه بس فوائدها عظيمه ..
و يعنى بأقول طالع أتفكر فى خلق السماوات و الأرض تقولى لى خد نور ؟؟
ده كده الواحد لا حيتفكر و لا حيتذكر هو مين أصلا !!
عينيهم بتضيق بسبب اللى بيزرعوه .. حد فاهم حاجه ؟؟
أما بقى قصتى مع حرس الحدود فسيبينى أفكر شويه ينفع أحكيها و لا لأ ..
متشكر لزيارتك و تعليقك ..

عمرو يقول...

دعاء
الفتره اللى بيحكى عنها زوج حضرتك من 6 سنين كانت فعلا السياحه ضعيفه جدا فى راس سدر ..
لكن حاليا السياحه الداخليه نشطت فيها جدا بسبب زيادة أعداد القرى السياحيه و المنتجعات للى يقدر على ثمن الوحدات بها و اللى ميقدرش بيلاقى الشاطىء العام الجميل الرائع اللى هو أحسن من الشواطىء الخاصه و أنظف كمان و بييجى لراس سدر الكثير من الراغبين فى الهدوء و قضاء أجازه بأسعار مقبوله و معقوله بعيدا عن دوشة المصايف التانيه الكئيبه بمياها الملوثه و أسعارها المبالغ فيها و المختنقه بزوارها اللى لا يحصوا ..
بالنسبه بقى لسؤال حضرتك عن زيارتها فى الصيف و لا فى الشتاء أفضل فده على حسب الرغبه ..
يعنى طبعا فى الصيف بتبقى مصيف و بحر و سهر و كافيهات و سينمات و كده ..
و فى الشتاء بتبقى هدووووووء و صفاء و سكينه و اسعار رخيصه و جو معتدل بالنهار قاسى البروده بالليل و غالبا لياليه بتبقى فيها عواصفشديده جدا ..
و الاٍختيار متاح ..
أشكرك و الله يسلمك ..

عمرو يقول...

norahaty
معلش أتعبوا معايا شويه يا دكتوره .. أشمعنى أنا مش بأقدر استقر فى مكان واحد لفتره طويله ؟؟
سفارى الصيف أفضل من سفارى الشتاء لو لأنى جربت الأتنين فبجد فى الصيف أفضل ..
الشتاء قارس البروده فى الصحراء بالليل و أنا أكره البرد جدا ..
كمان ممكن تحصل سيول جارفه فى لحظه و لولا ستر الله لكانت بجد حصلت لى كارثه من كام سنه كده ..
الصيف جميل فى سيناء الجنوبيه .. و تحت أى ظل بيبقى الجو معتدل جدا و الهواء جاف بدون رطوبه ..
لا سفارى الصيف أحسن بكتير ..

عمرو يقول...

norahaty
اٍن شاء الله يا دكتوره و متشكر جدا جدا ..

عمرو يقول...

norahaty
أيوه فعلا فيه سبب لتسمية أغلب اطفال البدو ب سليم .. سالم .. سلمان .. سليمان .. سلوم .. سلومه .. سلامه .. و هكذا ..
فى اٍعتقاد البدو كما قيل لى أن تسمية المولود بمثل هذه الأسماء أو حتى جعله اٍسم شهره ينادى به لحمايته من لدغ الثعابين و العقارب و العناكب السامه المنتشره بكثره تحت رمال الصحراء ..
هكذا يعتقدون ..
و لعلمك فالعرب القدماء كانوا يدعون من يتعرض للدغ الثعابين السليم تيمنا و أملا فى شفائه ..

أحــوال الهـوي يقول...

من بين احلامي رحلة سفاري و اغرف ان سحرها لا يحلوا الا في مصر و ارضها جربتها هنا في السعوديه و لكن كان الاعداد لها غير كافي فجأت مخيبه للامال

مررت علي راس سدر و لم ازرها و لكن وصفك قد يدفعني لزيارتها وانصح وزارة السياحه ان تستعين بك للترويج السياحي

متعك الله بالصحة و العافيه و اثابك في تاملاتك كل الخير و حسن الجزاء

تحياتي

ستيتة يقول...

طيب اولا حقدت عليك ساعة رحلة الصعيد الرائعة
طب دلوقت اعمل ايه يا بشر

طب ما تكسب فينا ثواب وكونك بقيت خبير سفاري تعمل لنا رحلة مدونين واحنا ندفع والله وانت تستفيد وتكون ديلر محترم وموثوق فيه وانتفرج على التلال الملونة

طب هز نفوخك شمال ويمين وقلب الشاي ع اللبن كده وها تلاقي انها فكرة تحفة والله

اي نعم انت ها تطلع عينك معانا
بس ده مش علشانك
ده علشان السياحة الداخلية
وعلشاااااااااااااااااااني

ربنا يسعد ايامك وتكون رحلة حلوة ان شاء الله

تحياتي

ليس فقيرا من يحب يقول...

السلام عليكم

من احدى قرى محافظه البحيره
بأرد على حضرتك التحيه وبقولك
رحله سعيده وانبسط على قد ما تقدر

فى حفظ الله وترجع بالسلامه

همس الاحباب يقول...

رحلة سعيدة ان شاء الله
وشوقتنا لسيناء وراس سدر
تروح وترجع بالسلامة
وفى انتظار الجديد من حضرتك دائما

شمس النهار يقول...

صباح الخير
ياراجل ياطيب
ده انت هتعملها بجد
:)
طيب خاللي بالك من نفسك
وبعدين البوست ده كالعاده فيه 70 قضيه
بس الحقيقه انا مشغوله مش هقدر اتكلم فيهم دلوقتي
بس بحتفظ بحقي في الحوار

وفعلا راس سدر من اجمل المناطق اللي انا شفتها
وليا فيها ذكريات كتير حلوه
ترجع بالسلامه
تحكي لنا بطريقتك في الكتابه الفريده
واللي بضحكنا وتشغل مخنا في مليون قضيه
:)

احساس طفلة محبة للرومانسية بس واقعية يقول...

انا عايزة اشوف الدرافيل دلوقتى
اعمل اية ؟

صحيح حضرتك مشاء الله عليك بتدينا معلومات مفصلة على طبق من فضة بجد احيانا بيكون اول مرة اعرفها
وكمان بحس انى فى الرحلة اللى حضرتك بتوصفها لان وصفك بيكون بدقة رهيبة

بس برضو عايزة اروح هناك واشوف الدرافيل و امشى على قاع البحر

شكرا ليك
ويارب الرحلة تكون سعيدة
تقبل مرورى

الازهرى يقول...

تعرف انا من مدرسة العقاد فى ان اللغة العربية تقدم الذكور على الاناث فى الذكر
يعنى تقول المدونون والمدونات وليس العكس

نعم ؟
البوست
لا طبعا صعب اعلق
تخيل انت انا هنا فى عز الشغل والباميا وورق الجيش وانتظار النتيجة وانت بتتفسح
يبقى انا حاسس بايه ؟

ربنا يسعدك دايما وفى انتظار النصائح
انا كنت من عشاق سيناء
لكن بصراحة من خمس سنين وانا بعيد عنها وصعب جدا ارجع لها
اخر مرة كان فى حركة غدر منها صعب انساها

MǿиY El-Shreef يقول...

ماشاء الله

بجد ربنا يسعدك كمان وكمااان

انا عايزه من ده ياعمو حزومبل :D

ممكن زي ماخالتوو قالت تعملنا رحلة كده ونطلعوها كلنا هاه هاه :))

ربنا يخليك للمجتمع التدويني عشان دايما تفضل تمتعنا برحلاتك الجميله وطريقة سردك ليها بجد ممتعه

ربنا يرجعك بالسلامه

MaNoOoSh يقول...

عااااااااااااااااااا
لالالالالا سيبني اعيط شوية
عاااااااااااا

دنا بشمشم على نقطة من مية البحر
عاااااااااااااااااا

طبعا رحلات السفاري دي بتبقى جميلة جدا
بس بصراحة عمرى ما فكرت اطلعها لانها بيبقى فيها مشقة وتعب جامد جدا

بس راس سدر يبدو انها جميلة قوي وممكن الواحد يفكر يزورها كمصيف

تمنياتي برحلة سفاري ممتعة

dr.lecter يقول...

اخر مره رحتها سنه 1995 بجد مدينه رائعه جدا اصلا كان وقتها اول مره اروح جنوب سيناء ومبهور بالمكان بجد سيناء دي حاجه تانيه خالص تحس انها لا يمكن تكون تبع مصر

ساقاري في الصحراء جامد مووت يابختك ياعمنا

الجواز و سنينه يقول...

شاء الله على حضرتك
بجد اسلوبك اكتر من رائع سلس و ممتع و مشوق و مفيد و وووووووو كتير
مش عارفه اعلق على ايه و لا ايه
تروح و ترجع بألف سلامه
و سلملنا على سالم و سليمان و سولى كمان
حببتنى فى رأس سدر خصوصا ان اخويا بيحكيلى عنها انها حلوه كتير
انا والدى كان قائد فى القنطره شرق ساعه الحرب و حافظ المنطقه هناك حته حته
يااااااه فكرتنى بالحرب
بكرها
المهم سينا رجعت كامله لينا علشان نروح رأس سدر

الكحيان يقول...

الله الله الله إني لأحسدك على هذه النعم الجميلة بارك الله في أسفارك وزادك وأعطانا لقد أمتعنا حديثك وشوقنا إلى معالم بلادنا الجميلة التي حرمنا منها ولا نعلم عنها شيئا فقد استأثر القوم بمتعها وجعلوها مناطق مغلقة ومحرمة علينا . أمنيتي منذ الصغر أن أجوب العالم في رحلات سفاري ولكني حتى الآن لم أخرج من حارتي ولا عشتي بوست رائع

♥نبع الغرام♥♪≈ يقول...

صباح الوردد

احلى عمور

اجازه سعيده لحضرتك
وان شاء الله تستمتع وتكون مبسوط

ومبسوطه قوووى انى اطمن عليك

تحياتى
انوسه

الكلمة نور يقول...

طب يا بيه ما انت كان ممكن تتفكر فى خالق السما والارض فى المقطم واهى من ناحية السبعين فدان متفرقش عن سانت كاترين كتير
اكيد فى حكمة من راس سدر
عالعموم اجازة سعيدة وتفكر مقبول ان شاء الله

عمرو يقول...

mohamed ghalia
متشكر لك جدا .. و أشوفك على خير اٍن شاء الله ..

عمرو يقول...

أحوال الهوى
أهلا بك يا صديقى الرقيق المرهف ..
فعلا السفارى فى مصر رائع جدا بس فعلا محتاج تجهيزات جيده و الحقيقه ماجربتش السفارى خارج مصر فمقدرش أحكم ..
الأماكن اللى تصلح لرحلات السفارى فى مصر كتيره جدا و متعدده بس للأسف مش فى حسابات الناس القيام بمثل هذه الرحلات الممتعه ..
متشكر لك و ربنا يستجيب لك يا رب ..
و عجبتنى فكرة الترويج السياحى دى :)
تقبل تحياتى و تقديرى ..

عمرو يقول...

ستيته حسب الله الحمش
الحقيقه الحقد بينا متبادل :)
يعنى أنا برضو حقدت على حضرتك لما قمتى برحلة الغردقه حتى تمكن الحقد من نفسى و طلعت غلبى فى العيال ..
بصى بقى بالنسبه للقيام برحلة سفارى جماعيه فوالله معنديش أى مانع و لكن يفضل القيام بها فى الربيع لأنها حتكون شاقه فى الصيف للى بيقوم بها للمره الأولى ..
و لعلم حضرتك الرحله مش بتحتاج مصاريف كتيره هى مجرد مصاريف الاٍنتقالات و التجهيزات العاديه من طعام و ماء و بس ..
عموما شجعوا بعض و أتفقوا و أنا من ناحيتى بأرشح طبعا منطقة التلال الملونه العجيبه اللى الناس بيقطعوا عشرات الآلاف من الكيلومترات و يعبروا بلاد و قارات علشان يشوفوها و يدفعوا مبالغ طائله فى حين أنها على مسيرة 5 ساعات من وسط القاهره و لكن للاسف منعرفش هى فين أصلا مع اٍنها على رأس قائمة الأماكن اللى بترشح للزياره فى شركات السياحه العالميه !!
أشكرك يا دكتوره و ربنا يستجيب لك ..
تقبلى تحياتى و تقديرى ..

عمرو يقول...

ليس فقيرا من يحب
يا أهلا بالبحيره و أهل البحيره أطيب ناس و أكرم ناس و لى فيها صلات نسب و قربى و صداقه دامت على مدى عشرات السنين :)
ربنا يستجيب لدعائك و متشكر جدا جدا و أوعدك حأعمل بنصيحتك ..
تحياتى و تقديرى ..

عمرو يقول...

همس الاحباب
متشكر جدا جدا و بجد سيناء أرض بكر و تجربة التجوال فيها تجربه لا تنسى من الذاكره و جديره بالقيام بها ..
الله يسلمك و تلك كل التحيه و التقدير ..

عمرو يقول...

شمس النهار
مساء الخير يا برنسيس :)
أيوه طبعا نويت و التدابير لله و أنتى عارفه طبعا لما بأصمم أعمل حاجه بأعملها و لا بيهمنى :)
و ربنا بقى بيقسم الأرزاق يعنى ناس بتصيف فى سان فرانسيسكو و جزر هاواى و ناس بتصيف فى راس سدر و أبو زنيمه ( ألا يعنى أيه زنيمه ؟؟ )
بجد راس سدر ليكى فيها ذكريات كتير حلوه ؟؟
طيب يا ريت تبقى تحكيهالنا لما ترجعى بالسلامه اٍن شاء الله ..
ربنا يطمن عليكى و متشوقين نسمع حكاياتك عن بلاد العم سام ..
تقبلى تحياتى و تقديرى يا برنسيس ..

خمسة فضفضة يقول...

السلام عليكم ورحمة الله وبركاته

ازيك يا استاذ عمرو

رحله سعيده ان شاء اللبه

ابقي افتكرنا بكام كابوريايه

وشوية هواء باليود من بتوع راس سدر

ترجع بالسلامه يارب

أمل حمدي يقول...

ترجع بالسلامة يارب

بجد بتحكي بطريقة جميلة بتشوق وبتنقل الصورة بصدق

دمت بحفظ الله

عمرو يقول...

احساس طفلة محبة للرومانسية بس واقعية
متشكر ليكى جدا ..
وصف الأشياء بيحتاج تفاعل بها أثناء رؤيتها و التفاعل لا يأتى اْلا بالدهشه و التأثر و أنا و لله الحمد فى حالة دهشه دائمه لكل الموجودات من حولى :)
بس و الله عندك حق مشهد الدرافيل و تجربة السير على قاع البحر حاجتين مش بيتكرروا كتير ..
شكرا و أهلا بيكى ..

عمرو يقول...

الازهرى
أنا بقى من مدرسة ladies first و اللى على اليمين يعدى الأول و الحاجات بتاعت زمان دى اللى كانوا بيسموها الأتيكيت :))
بس طبعا العقاد عمنا و تاج راسنا و أتباع مدرسته جديرين بكل تقدير ..
أنت فى عز الشغل و الباميا و ورق الجيش و أنا لسه طالع من هرتك الشغل و الفاصوليا و تقفيل الجور :)
بس برضو ماتنساش نصيبك من الأجازه لأن ده اللى حيسلعدك على تكملة المشوار بنفس ..
سيناء تغيرت تماما عن زمان و بقت حاجه رائعه بصراحه ..
متشكر لمرورك و تعليقك و أهلا بيك

صوت من مصر يقول...

انا مش بحسد
انا بنق بس

فشكووول يقول...

ازيك يا عمرو بك
انا رحت راس سدر مره واحده فى حياتى بس لن انسى مياه راس سدر
احلى مياه استحممت بها واستمتعت بها
وظاهرة المد والجزر من الاعاجيب فى هذه الراس ... كانوا الولاد بيستحموا ويلعبوا وما فيش خوف خالص ولمانشوف البحر جاى من بعيد يطلعوا
رحله ممتعه ان شاء الله ويوفقك الله وتعود بالسلامه
تحياتى

بسنت صلاح الدين يقول...

ايه الجمال ده ، فعلا مفيش احلى من الطبيعه، اجازه هنيئه و ترجع لنا سالم ان شاء الله على اسم دليلك

أم البنات يقول...

ان شاء الله تكون رحله ممتعه..ولا تنسى ان تدع لنا فى رحلتك هذه فأجمل شئ اثناء..انشغال الناس بالحياة ان تذكر والله واجمل شئ من الذكر القرآن..ونسألك الدعاء فأنت على سفر


راس سدر مكان رائع وجوه جميل وانا عن نفسى استمتعت جدا فى اجازة نص السنه..وغير فكرى فى حكايه السفر للاماكن المعروفه
بس حكاية سفارى دى...مش مرعبه شويه؟ اصلى بصراحه بخاف
ربنا يرجعكم بالسلامه ان شاء الله
ولا تنسى الدعاء
انا عاوزة دعاء مخصوص
دعاء لابنتى
ولا تنسى ان تدون لنا الاشياء الغير متوقعه التى مرت بك.
دمت فى حفظ الله انت ومن معكم وردكم إلى بيوتكم سالمين ان شاء الله

عمرو يقول...

مونى الشريف
ربنا يسعد الناس كلها و يخلى أيامهم جميله يا رب ..
و الله يا مونى عمك حزومبل معندوش أى مانع للقيام برحلة سفارى جماعيه للمدونين بس يالا شدوا حيلكم و أنشطوا كده و أتشجعوا و حتلاقوها تجربه رائعه فريده من نوعها بجد ..
ربنا يخليكى و متشكر ليكى جدا و الله يسلمك ..

عمرو يقول...

مانوش
لا تبكى يا أبنتى فلايزال فى العمر الكثير اٍن شاء الله للقيام بألف رحلة تصييف و سفارى ..
رحلات السفارى بها مشقه كبيره فعلا لكن المتعه العائده منها تنسيكى المشقه و التعب بل و تجعلك تفكرى فى القيام بها مرات و مرات ..
راس سدر فعلا من أبدع و أروع الأماكن لأسباب كثيييييييييره ..
متشكر ليكى و تقبلى تحياتى ..

عمرو يقول...

dr.lecter
سيناء أتغيرت كتير جدا دلوقتى ..
بس طبعا سنة 1995 كانت الأسعار فيها رخيصه لدرجه كبيره و كانت لسه مش معروفه بالنسبه للكثيرين ..
سفارى الصحراء يا دكتور ممتع للغايه بس عاوز صبر و شوية تحمل للمشقه ..
تقبل تحياتى و تقديرى و أهلا بيك ..

عمرو يقول...

الجواز و سنينه
متشكر ليكى جدا ربنا يخليكى ..
طبعا راس سدر رائعه رائعه بجد و من المناطق اللى تستحق الزياره و لا تنسى أبدا ..
و مين ميكرهش الحرب ؟؟ لكن أحيانا بتكون مفروضه فرض و بيكون الاٍنسان مجبر على خوضها للأسف ..
ربنا يديم السلام و المحبه و تقبلى تحياتى و تقديرى ..

عمرو يقول...

الكحيان
ربنا يستجيب لك يا رب ..
بس خد بالك يا عزيزى أن العيب فينا لأننا بننظر لمعالم بلادنا على أنها مقصوره فقط على السياح أو المقتدرين فى حين أن مثلا زياره فى أجازه لمدينه زى مدينة راس سدر مش حتتكلف نصف المصاريف اللى ممكن تحتاجها فى زياره مماثله لمدينة الاٍسكندريه .. بجد
لكا أرتبطت عندنا معالم الوطن بنقاط لا نتخاطها و نخشى دائما خوضها بحجة أنها مش معروفه لنا !!
ما هى فعلا حتفضل مش معروفه لنا طول ما أحنا خايفين منها و محجمين عن زيارتها ..
اٍن شاء الله يكتب لك ربنا رحلة سفارى فى مصر الأول و بعدها سفارى لبلاد العالم ..
سفارى مصر الأول يا أستاذنا :)
تقبل تحياتى و تقديرى ..

عمرو يقول...

عاشقة الأحزان
متشكر جدا و ربنا يخليكى ..
تقبلى تحياتى و أهلا بيكى ..

عمرو يقول...

الكلمة نور
التفكر فى ملكوت الله بعيدا عن صخب الحياه شىء مطلوب و عمل مؤكد أتاه سيدنا النبى عليه الصلاة و السلام بل اٍن الوحى نزل للمره الأولى على حضرته الزكيه فى غار ثور حيث أعتاد أن يعتزل قومه و يتفرغ للعباده ..
أشكرك و متشكر جدا للزياره و تقبل خالص مودتى و تقديرى ..

عمرو يقول...

خمسة فضفضة
و عليكم السلام و رحمة الله و بركاته ..
يا سلام بس كده من عينيا و الله يا دكتوره الكابوريا و مقدور عليها بس الهواء اللى باليود ده يتبعت اٍزاى ؟؟ :))
متشكر ليكى جدا و لك الموده و التقدير ..

عمرو يقول...

ماما أمولة
أهلا و سهلا بيكى يا ماما أمولة .. نورتنى المدونه و شرفتى ..
متشكر ليكى جدا و ربنا يستجيب لك يا رب لنا و لكم ..
تقبلى تحياتى و تقديرى ..

عمرو يقول...

صوت من مصر
كيمو حبيبى أهلا بيك :)
أيه أخبارك و عامل أيه ؟؟
بجد رحله عاوزاك و الله رغم نقك يعنى لكن بأحبك و الله :)
متشكر لزيارتك و طمنا عليك ..

عمرو يقول...

فشكووول
أهلا بحضرتك يا أستاذنا :)
راس سدر جميله طبعا بس الفرق بين بحرها و بين بحر الاٍسكندريه فرق شاسع مهول ..
بحر راس سدر يعتبر زى الترعه بالنسبه لبحر اٍسكندريه اللى كله حياه صاخبه ..
بس الفرق فى صالح بحر راس سدر لو اتكلمنا عن درجة نقاء المياه و شفافيتها ..
شفت ظاهرة المد و الجزر غريبه فعلا :)
متشكر لحضرتك جدا و الله يسلمك ..
لك خالص مودتى و تحياتى و تقديرى ..

عمرو يقول...

بسنت صلاح الدين
فعلا الطبيعه هنا يا بسنت خلابه خلابه و رائعه لدرجه تفوق الوصف ..
و متشكر ليكى و الله يسلمك و لك التحيه و التقدير ..

عمرو يقول...

أم البنات
أهلا و سهلا يا أم البنات ..
على فكره ليا ملحوظه عن مدونة حضرتك و هى أنى كل ما أحب أعلق عندك الصفحه ماتنفحتش أبدا و الجهاز كله يهنج و أضطر أقفله و اشغله تانى !!!!
مش عارف هل الشكوى دى منى بس و لا من باقى المعلقين ؟؟
طبعا راس سدر جميله و تقدرى تستمتعى بها أكتر من المصايف التانيه بكتير ..
يا أم البنات ربنا يكون مع أولادنا جميعا .. و اٍن شاء الله حأدعى لكم و لكم المسلمين .. بل و لكل الناس لأن الله وحده أعلم بهم ..
و أما بنت حضرتك فرغم أنى مش عارف أحوالها و لكن أعدك أنى باٍذن الرحمن سأدعو لها دعاءا مجربا و اٍن شاء الله يستجاب ..
متشكر لحضرتك و تقبلى خالص التحيه و التقدير ..

أحــوال الهـوي يقول...

عمرو

صديقي الحبيب
ذو العبقريه الادبية الفنيه و الادبيه لقد استنبطت ما هدفت منه حينما قررت عمل المدونه وهي التحدث عن العاطفه الانسانيه بكلمات قد تكون ممتعه اكثر من كلمات قد تحتوي علي غزل صريح تتحدث عن مفاتن المحبوب

وكما لاحظت بنظرتك اللماحه الذكيه خلو المعاني من و صف الجسد فاقول للجميع الحب احساس قبل ان يكون غذاء للجسد

اخي سوف اكون باجازة الاسبوع القادم في مصر و اتوق شوقا للقائك
سوف ارسل رقم هاتفي بمصر اليك علي ايميلك و اذا شاء الله و تيسر امر لقائنا سيكون من دواعي سعادتس

تحياتي

كلمات من نور يقول...

احنا المفروض نسمي المدونة خمسة سياحة

ما شاء الله مافيش أحلى من التجول في الطبيعة والسفر والجمال

انا بحب جدا رحلا السفاري بس من أمام شاشة التلفاز علشان انا صاحبة مرض

زمان أيام الشباب كنت بحب المغامرات وركوب الماء والبارشوت وووو بس لما طبيب العمود الفقري سمع عن مغامراتي حجر عليا صحيا

هههههههههههههه

ربي يسعدك ويوفقك فغي الرحلة وتدعمنا بالبوستات الرائعة دي عن مصر وكنوزها

دعواتك في السفر

سبهللة يقول...

انا ما فهمتش ليه بيضحكوا وعينيهم مقفولة نص قفلة

بس عجبنى اوى ادب الرحلات اللى انت كاتبه دة
بجد ممتع وشيق
وفى انتظار تفاصل الرحلة لما ترجع ان شاء الله

غير معرف يقول...

ترجع بالسلامه ..... ومتنساش الكابوريا :)

غير معرف يقول...

استاذ عمرو
رحلة سعيدة ويابختك
طمنا عليك تروح وتيجى بالسلامة
تحياتى

sadqueen يقول...

السلام عليكم

انها حقا رحله ممتعه جدا
انها اول مره ادخل المدونه وانها حقا تجنن
وانا في انتظار البوست القادم
انا بموت في السفاري
وانا طلعا بكره شمال سيناء
بس ايه رأيك ايه احلي الشمال او الجنوب
تقبل مروري مع ارق امنياتي بسفاري ممتعه

سنابل يقول...

أوعدنا يا رب
مش حسد ولا غيظ ولا حاجة وانت عارفنى قلبي بافته بيضا

يا رب تكون مبسوط وتكون بتقضي وقت حلو وترجع بالسلامة وف دماغك احلى افكار لاحلى بوستات
ما هى لازم السفارى والصحرا يعملو تأثير جامد
ترجع بالسلامة
تحياتى

Me7'o يقول...

أستاذ عمرو
صاحب التعليقات والآراء اللى جابتنى على ملا وشى لدرجة إنى كنت هاتكعبل وأقع من كتر الاستعجال إنى أشوف مدونة صاحب الدماغ دى

بحب أسجل إعجابى الشديد بأراء حضرتك ولو عاوز تترشح فى أى إنتخابات قولى
وأنا هاديك صوتى وأصوت للتانيين كمان
ههههههههههههه

Kiara يقول...

ايوه ياعم ( وش بيغمز )

بصراحه الهدؤ دا الواحد بيحتاجه من قوت لاخر للاستجمام

رحلة سعيدة