~SUN~ Pictures, Images and Photos

الخميس، 2 يوليو 2009

راحت عليكى يا حفيظه :))

أييييييه .. دنيا !!
و الله وراحت عليكى يا عربيتى يا جيب يا رانجلر يا عشرة السنين ..


خلاص بقى بقيتى عجوزه زيى و مابقتيش حمل مشاويرى الصعبه اللى تهد الحيل ..
صحيح فى شبابك كنتى وحش جبار يا خاله رانجلر و كنت معجب بيكى و بقوتك الخرافيه اللى زى قوة الديناصور جنب بقية العربيات الورق
الكورى و اليابانى اللى كانوا بيخافوا منك و يعملوا لك ألف حساب لما تعدى بس من جنبهم و تعملى كدهو :

green dinosaur Pictures, Images and Photos بس خلاص بقى راحت عليكى يا تيزه و مبقتيش تستحملينى و لا طيقانى و بقيتى على طول بتشتكى مره من دبرياجك و مره من فراملك و مره لامؤاخذه من فتيسك لما يا ينبوع الرخامه بقيت أخاف أركبك لحسن تولعى بيا زى ما عملتيها فى مره و فين فى محطة بنزين أون ذا رن و لولا ستر ربنا كنتى عملتى مصيبه يا كلبه ..


طيب بلاش دى .. فاكره يا بت يا رانجلر لما طرمبتك قطعت بنزين و أنا فى المزرعه فى وسط الصحرا حيث لا قرطار و لا نافخ نار و لولا فضل الله و جدعنة البرنسيس شمس التهار كانت السباع الضاريه و الضباع الجوعانه طلعوا عليا و أكلونى و قرقشوا عضمى ..
و لا يا حلاوتك لما تكييفك عطل و فشل فى تصليحه عتاة بتوع التكييف .. و بقيت برضو بأركبك و أروح بيكى الصحراء كل يوم و أنا مش متكيف منك خالص و أنزل منك بأشر عرق و لا اللى فى الساونا .. بس أعمل أيه كنت مضطر لك يا من كنتى حبيبتى و أنتى بندالتك زى ما تكونى كنتى عارفه و عماله تتمادى فى رخامتك و كل يوم تطلعى لى بمصيبه شكل لما خليتى عيشتى مرار ..

و لا اٍبتلاء الردياتير بتاعك يا مجرمه أنتى اللى لففنى حوالين نفسى شهور طويله و خلانى أمشى بيكى و أنا شايل جركنين مياه كل واحد 20 لتر زى ما أكون طالع هجره للصحراء الكبرى لما بقيت مضحكة العيال و كل ندل فيهم بكلمه و اللى يقول لى : حج مبرور يا آبه .. و اللى يسألنى : أنت بتروح تبيع الميه دى فين يا أبويا ؟؟ .. و أضطرتينى أخيرا يا قاسيه أنى أبتدى أشحت عربية الواد أبنى الكبير ده بتاع الصاعقه اللى كل ما أشحت منه عربيته بسبب أعطالك يبكتنى على غلو البنزين زى ما أكون وزير البترول و يلمح لى من تحت لتحت علشان أفولها له !!

ما أنكرش يا طنط أنك شيلتينى سنين طويله أنا و عيالى و ليا معاكى ذكريات هى من أجمل ذكريات عمرى .. بس النصيب غلاب يا حفيظه و أبتدت عينيا تبص بره لما قعدتى لى زى أمنا الغوله تنكدى عليا طول الوقت و أنتى جنبك زمايلك الحلوين المقطقطين اللى يرجعوا شباب العواجيز اللى زيى .. لحد ما عينيا وقعت على السنيوره دى :





عربيه جيب شيروكى قلبى أغرم بيها من أول لقاء animated hearts Pictures, Images and Photos و ماسبتهاش اٍلا لما بقت على اٍسمى .. و سبحان العاطى الوهاب مسبب الأسباب الرازق بغير حساب ..
صحيح هى مش بنت بنوت بس اللى يشوفها و الله يفتكرها لسه على الزيرو و الحقيقه أنى لسه بأفهمها اٍكمنها كلها بالكومبيوتر و كده بس بعونك يا رب و بخبرتى الواسعه فى هذا المجال أبتديت أفهمها و ألينها اٍكمنى حنين و رومانسى مع العربيات ..
و أما أنتى أيتها الرانجلر العنيده الشرسه يا قوقه فخليكى كده عبره أديكى بتنفعى العيال برضو و لعلمك بقى كذب من قال : القديمه تحلى و لو كانت وحله !!
و يا كل من عنده عربيه قديمه قاعده فى أرابيزه تغلس عليه غلاسات أشكال و ألوان شد حيلك و أنوى خير و هاتلها عربيه ناعمه و عسوله زى البنوته دى :

cute girl blinkie Pictures, Images and Photos

تعوضك عن وجع قلب الميكانيكيه و تحرق بيها دم عربيتك القديمه :)

هناك 32 تعليقًا:

شمس النهار يقول...

مساء الخير يالورد :)

الف الف مبروك علي العربيه
ربنا يبارك فيها ويكفيك شرها ويعطيك خيرها
ويجعلك تمشي بيها في الخير اللي انت اصلا دايما بتمشي فيه

بس هي دي اخرتها يالورد تشنع كده بالعربيه الاميره الجميله اللي طلعت روحها في المزرعه والطريق الوعر بتاعها:)

وبعدين اعمل لبكره افرض ان حد فتن لها (انا) وعرفت الكلام ده وجت شافته في المدونه هتعمل ايه انت
وخصوصا انك ناوي ماتبعهاش وتشدها وتخليها للمزرعه
اسحب ناعم احسن ودلعها تاني ماحدش ضامن :)

وبعدين لاشكر علي واجب يالورد انا عملت ايه يعني
الحمد لله اليوم ده عدي علي خير:)
والف مبروك يالورد

ستيتة يقول...

ان ان تشششششششششششششششششششش

كده يا حفيظة وبعد ما طلعت عينك يجي عمر يجرصك بين المدونات
ويفضل عليكي حته شيروكي بالكمبيوتر

اه يا زمان العبر
هههههههههههههههههههههههههههههه

الف مبروك العروسة الجديدة
تدوبها في مشاوير العافية
وربنا يرزقك خيرها ويكفيك شرها

حسيت في كلامك تورية كده كوني كبيرة ورئمة
بس ها البس وش العبيط واقول
ده بيكلم حفيظة
ههههههههههههههههههههههههههههه

بوست زي الشربات وربنا يضحك ويفرح ايامك

تحياتي

بنجاواتى يقول...

مش عارف افرح علشان الشروكى ولا ازعل علشان المأسوف على شيخوختها حفيظة

يا رب تكون الجديدة احلى

وهى فكرة حلوة برضه يمكن القديمة لما تشوف الجديدة تغير منها وتبقى جديدة مرة واحدة او تغير وتخلف عربية نونو او حتى توكتوك

تحياتى

بلاش فضايح يقول...

العشرة متهونش بردو
يعنى البوست دة تأبين للعربية القديمة
ولا بتغيظ القديمة بالجديدة ههههههههههههه

بس مليون مبروك على الجديدة

وليكى الله يا حفيظة
هما الرجالة كدة معلش
ههههههههههه

الكحيان يقول...

ممممممم غزل ممتع - والكلام لكن ياجارات - مبارك العروسة الجديدة،وإن كنت لا عرف الفرق بين الرانجلر والجيب لأن أقصى حاجة أعرفها هي الفرق بين البسكلتة والتوك توك.بس عموما ألف ألف مبروك وربنا مايوريك عطل فيهاوماتناسش الحاجة برضة يعني لازم تراضيها بزقتين هي الخير والبركة. بوست ممتع يداعب أحلام الكحيانيين شكرا لك .

صوت من مصر يقول...

احلى مسا عليك
اولا
مبروك على العربيه
هديتى ليك
هيبقى عارف ايه
فاكر الكلب اللعبه الى لما العربيه تمشى يهزلك دماغه
بتاع زمان
دى هديه
فى اقرب لقاء بان الله
مبروك

المتبهدلون في الأرض يقول...

مبروك على الأرض

صبرني يارب يقول...

الف الف مبروك يا استاذنا

ربنا يجعلك خيرها ويكفيك شرها يارب

وبعدين بقى كده

حفيظه الحلوه الشديده الى استحملتك ياما
وشالتك انت وولادك سنين تقوم اول ما تشوف عربيه جديده وشحتوفه وديجيتال وناعمه تقوم تنكر لها كده كل حاجه

ليييييييييييييه كده

انت لسه كنت شوفت حاجه من الديجيتال

عشان تحكم

مبروك عليك يا باشا جديدك








اي خدمه

أحــوال الهـوي يقول...

مبروك يا فنان علي العروسه الجيدة و يباركلك فيها ويديك خيرها و يكفيك شرها

بس ليه عتاب علي قسوتك مع القديمة باحس ان ده حصل معايا لما العضمة تكبر و الاقيني بعد ما كنت مفيد ابقي عاله علي الناس

يمكن لاول مرة باختلف معاك من زمن بس انت كنت قاسي شويتين

علي العموم هديتة العربيه الجديده عندي لما انزل اجازة و يسعدني الحظ و سمحت ليه و اقابلك

تحياتي

غير معرف يقول...

يا لهوووووى على الرجاله و عينهم الزايغه
ههههههههههههههه
انت راجل محصلتش!!!!

beautiful mind يقول...

ازيك يا استذا عمرو

فينك والله وحشتنا بوستاتك اللي زي العسل زيك

عايز اقولك الف مبروك بمناسبة العربيه الجديده ويارب تعيش كدا لغير ما تدوبها وتجيب غيرها

وعايز اقول للعربيه القديمه معلش متزعليش هي دي حكمة ربنا لكل شىء بدايه ونهايه

بس عمرو قل باصله معاكي متزعليش هو صحيح اخدك لحم ورماكي عضم زي خيل الحكومه
هههههههه

MǿиY El-Shreef يقول...

ياسلاااام

مافيش فرحه بجد تضاهي فرحتي بتغير العربيه

الا ماتش كورة طبعا D:

بجد عمر ماتهون العربيه عليا وحلال عليك ياعم الجديده

الف مليون مبروك

ارقيها بقى وكده ;)

من غير عنـــوان يقول...

مبروك ألف مبروك وربنا يكفيك شر الطريق يا عمرو يا بن حوا وآدم

وعموما ده حال الدنيا

بس خلي بالك لحسن البنات يشوفوك في العربيه الجديده واقعين في غرام بعض يفتكروها سبهلله ... ويعاكسوك...

مبروك يا عمووور

تحياتي

حــــــــــواء يقول...

الف مبرووووووووووووك
الف مليون مبروك يأستاذ عمر
ربنا يبعد عنك شرها ويرزقك خيرها يارب
والله من قلبي بدعيلك

تحياتي

عمرو وجيه يقول...

ألف ألف ألأف مبرووووووووك


العربية الجديدة

تتربي في عزك ان شاء الله

غير معرف يقول...

مبروك على العربيه الجديده .... وتددبها كاوتش كاوتش في الفرح دايما
بالنسبه لحفيظه ...... لها الله وده حال الدنيا

Sweet Violet يقول...

تؤتؤتؤتؤتؤتؤتؤتؤتؤتؤتؤ
بقى كده .. يعنى هى دى اخرة حفيظه v_v

دى هى بردو اللى استحملت كتير
يبقى ده جزائها v_v

مش عارفة ازعل على حفيظه ولا اقولك مبروك

اممممم
طيب انا هزعل على حفيظه
و هنمشيها لغة عربية و اقولك
"مباااااااااااااااااااااااااااااااااارك " عليك الجديدة "اللى بدون اسم ×_× "
هه بس

^_^

همس الاحباب يقول...

هههههههههه
الف مبروك يا برنس
مع ان حفيظة وش السعد
بس يلا الجدبد جديد يا باشا
وخلى حفيظة تمووت بحسرتها
وتقولك اخدتنى زيرو ورمتنى كركوبة
ربنا يباركاك فيها
تحياتى

Empress appy يقول...

الف مبروك ربنا يديلك خيرها ويبعد عنك شرها يا رب

dr.lecter يقول...

اوعدنا يااارب

دي عربيه احلامي هي والبي ام

مبرووك ياعمنا ابقي ادينيس لفه واحده بس بها رغم اني معفرش اسوق

Kiara يقول...

هههههههههههههههه


مبروووووووووووووك العربيه

بس خلي بالك من القديمه اه لحسن تقلب عليك وانت عمال تعاكس في الجديده وحاطط لها قلب ومروقها;);)

mohamed ghalia يقول...

مليووووووووووووووون مبروك
ربنا يسعدك دايما

شاعر ومشاعر يقول...

مبروك يا عم العربية الجديدة
بس برضه لازم تاخد بالك
واللي قبلينا قالوا:
"اللي ما تحتاجش لوشه, بكرة يحوجك الزمان لقفاه"
ما تشدش على القديمة في الكلام كدة لأحسن تيجي تحتاجها في يوم تحرن وتقول لك : مش هأمشي.
وأهو عقبالنا.
وربنا يبارك لك في الجديدة ويكفيك شرها يا عمور يا بن حوة وآدم.

بسنت صلاح الدين يقول...

الف مبروك ياباشا على العروسه الجديده ربنا يباركلك فيها ،بس حفيظه حرام ابقى شوفها بحاجه بقى بعد العمر ده كله ،وبعدين ماهى معذوره بقى السن ليه حكمه

كلمات من نور يقول...

ألف مبروك عليك عزيزة

والبقاء لله في حفيظة ولو إني مستخسرة تأبينها...تبيع؟؟؟؟؟؟؟؟؟؟ أصلي بحب العربيات الهلمة دي علشان اخوف بيها بتوع الميني باصات والاتوبيسات

بس يا خسارة بطلت سواقه من زمان بسبب السواقين اللي مش مفروض يسوقوا ولا حتى مشاية بيبيهات وعلشان عمودي الفقران

غير معرف يقول...

مبارك عليك يااستاذ عمرو
الشيروكى وربنا يحفظك انت وراكبيها
من كل سوء
بس والله حفيظة اصيلةبرضه
التغيير مطلوب ولكنى مصرة وأأكد
ان القديمة تخلى ولو كانت وحلا
تحياتى

قوس قزح يقول...

انا خايفة يكون البوست دى بترمى به على حاجة تانية غير العربية خصوصا بعد مثل القديمة تحلى

مبروك على العربية الجديدة
ومش مفروض يعنى علشان تغزى العين تخليها على الباب بتاع المدونة كل اللى داخل ياخدها لفة ؟

ربنا يديك خيرها و يكفيك شرها ان شاء الله

خمسة فضفضة يقول...

السلام عليكم ورحمة الله وبركاته

اهو انتو كده يا رجال ما بيطمرش فيكوا المعروف

بقي بعد ما الست الكومل حفيظه افنت زهرة شبابها في خدمة معاليك يكون ده جزاتها
كدهون تركنها وتخلي فضيحتها بجلاجل
وكمان تيجبلها دره ههههههههههههههههههه

ربنا يكون في عونك يا حفظفظ ياختي
معلش بقي كلنا لها
احنا هناخد زمنا وزمن غيرنا

بس خليكي فاكره ربنا مايرضاش بالظلم ههههههه

مبروك علي العربيه الدلوعه الجديده ربنا يباركلك فيها ويكفيك شرها

المفروض بقي تعملنا نقيقه وتدبح واحد اوزي معتبر كده وتعزمنا كلنافي المزرعه مش كده

سلام

حاسوباتيه يقول...

الف مبروك على العربيه الجديده بس برضو القديمه حلوه واهي عشره عمر لحسن تزعل بعدين وزعلها يطلع على الجديده وتحصل خناقات هههههههه
الف مبروك

الازهرى يقول...

ايه بقى دا؟
ليه كده
امال فين الكلام عن التمساحة واو ما تطلع على الطريق وسع يا جدع الكلام يا دوب من كام شهر
فاكر فايد ؟

ما علينا

الف مليون مبروك على العربية الجديدة وباذن الله تكون خير دايما عليك وتعينك فى كل الاوقات

♥نبع الغرام♥♪≈ يقول...

السلام عليكم

بجد وحشتنى كتير
وميرسى على سؤالك عنى بغيابى ويارب يديم الود يارب

والف مليون مبروك على العربيه وربنا يكفيك شر الطريق اللهم امين يارب العالمين
دمت فى حفظ الرحمن
تحياتى
انوسة

هبه يقول...

•.¸(¯`'•.¸, _________________ , .•'´¯) .•'´¯)
(¯`'•.¸(¯`'•.¸««««««««««««»»»»»»»»»»»¸.•'´¯).•'´¯)
--==>>>---> أحلى تحية من هبه لبابا عمرو <---<<<==--
(_¸.•'´(_¸.•'´««««««««««««»»»»»»»»»»»`'•¸_)'•.¸_)
(_¸.•'´(_¸.•'´¯¯¯¯¯¯¯¯¯¯¯¯¯¯¯¯¯¯¯¯ `'•.¸_)`'•.¸_)
¯`'•.¸(¯`'•.¸, _ أحلى تحية من هبه لبابا عمرو _ , .•'´¯) .•'´¯)
(¯`'•.¸(¯`'•.¸««««««««««««»»»»»»»»»»»¸.•'´¯).•'´¯)
--==>>>---> أحلى تحية من هبه لبابا عمرو <---<<<==--
(_¸.•'´(_¸.•'´««««««««««««»»»»»»»»»»»`'•¸_)'•.¸_)
(_¸.•'´(_¸.•'´¯¯¯¯¯¯¯¯¯¯¯¯¯¯¯¯¯¯¯¯ `'•.¸_)`'•.¸_)
¯`'•.¸(¯`'•.¸, أحلى تحية من هبه لبابا عمرو, .•'´¯) .•'´¯)
(¯`'•.¸(¯`'•.¸««««««««««««»»»»»»»»»»»¸.•'´¯).•'´¯)
--==>>>---> أحلى تحية من هبه لبابا عمرو <---<<<==--