~SUN~ Pictures, Images and Photos

الثلاثاء، 23 يونيو 2009

الوليه الخايبه و دقية الباميه !!

yay football Pictures, Images and Photos





صباح الخير أعزائى المدونات و المدونين ..
بخصوص بوست حسن شحاته ..
لا أنكر أنى متغاظ أشد الغيظ من المعلم حسن شحاته و من كومبينة اللعيبه بتوعه اللى بيمثلوا مصر ..
الناس دى مش بتمثل مصر .. لأ .. دول بيمثلوا نفسهم ..
الناس دى أتصرف عليها دم قلبى و دم قلبكم علشان يرفعوا اٍسم مصر فى المحافل الدوليه .. فهل ده حصل ؟؟
لا محصلش .. لأن حتى التمثيل المشرف اللى كنا بنرضى بيه أفتقدوه و مابقوش بيمثلوا الوطن تمثيل مشرف ..
بلاش مش حنتكلم فى واقعة الفضيحه اللى عمرو أديب أتكلم عنها لأنها شىء خفى لا يعلمه اٍلا المولى علام الغيوب و ما كنا بشهداء عليهم و مش حنتهم حد بغير علم اليقين لأنه أمر لو تعلمون عظيم ..
لكن حنتكلم فقط عن عدم تمكن الفريق يقيادة المعلم على الحفاظ على مستوى الأداء و ده بيدل على أنه أصلا مافيش أساس سليم للموضوع ككل ..
مثلا ..
لو وليه طبخت دقية باميه باللحمه الضانى لجوزها و طلع تمام و عشره على عشره و الراجل أستمخ منه و كافئها على شطارتها مكافأه هايله تعمر الدماغ .. تقوم بعدها بكام يوم تعمل دقية باميه تانى بس يطلع وحش و جوزها برضو يكافئها حبا فيها .. و المره اللى بعدها تعمل دقية باميه تالته بس تطلع أيه بقى نص نص يعنى فيروح جوزها برضو مكافئها .. أمال أيه ما هو بيحبها .. تروح هى بقى مطمنه و ماتحاولش تجود فى صنعتها مادام هى كده كده جوزها بيكافئها سواء أجادت أم طلع منها طبيخ زى خلقتها .. و تركن على كده و خلاص ..
ده بيدل على أن أصلا هى ماعندهاش أساس سليم للطبيخ .. و أنها ست مهمله و طماعه و كسلانه و بتركن للسهل ..
عارف أن الكوره غالب و مغلوب .. الرياضه عامة غالب و مغلوب .. بس اللى بيحصل معانا ده لا يمت للرياضه بصله .. و لكن يمت للوليه أم دقية باميه .. و اللى أستسهلت و أطمنت مادام كده كده جوزها بيكافئها سواء أجادت أم أستهبلت ..
الملايين اللى أتصرفت على هذا المنتخب من جيبى و من جيبكم يعنى اٍحنا أولى بيها ..
أنا عن نفسى عاوز حقى نقدا و مش عاوز حد يمثلنى فى المباريات الدوليه بهذا الشكل خاصة أنى داخل على جوازة البت بنتى الوسطانيه و عريسها أساسا دمياطى يعنى فالرحمه حلوه برضو ..
عاوز حد يعوضنى عن ألم الواد أبنى الصغير الشيخ عبده لما حضن علم مصر و هو بيعيط بعد نهاية الماتش الأخير و اللى كان عنده أمل أنه حيلوح بيه من البلكونه لما المنتخب يكسب اٍن شاء الله فى المشمش علما بأنه أشتراه من مصروفه البسيط بعد ما حوش 15 جنيه من أول ما بدأت البطوله ..
الناس دول مش بيمثلوا الوطن و لكن بيمثلوا حسن شحاته الفتاكه ..
بخصوص بوست العالم السرى لأكل الشوارع ..
أتسألت فى التعليقات كتير اٍزاى عرفت كل هذه البيانات و الأرقام اللى أوردتها فى البوست ؟
الحقيقه أكتسبت خبره لا بأس بها من عملى أيام دراستى فى الجامعه بمطاعم الاٍسكندريه زى شى جابى و أستريا و سانتا لوتشيا و البلفدير و غيرهم .. و أطلعت بعينيا على ما كان يحصل فى مطابخهم :)
و لما أكرمنى المولى من فضله فتحت مطعم نظيف لطيف و كافيتريا برضو لطيفه ظريفه فى القاهره و بسببهم أحتكيت كثيرا بالعاملين بالعالم السرى لأكل الشوارع فأزددت بفضل الله خبره على خبره ..
كمان كتير من التعليقات سألتنى عن رأيى فى الكشرى و مدى سلامة الأطعمه اللى بتقدم فى المطاعم الكبيره الشهيره ذات الأسماء الرنانه ..
رأيى الشخصى أنه لا يمكن أبدا بأى حال من الأحوال ضمان نظافة العاملين فى المطابخ لأننا مش بندخل جوه ضميرهم .. تضمن منين بجد و ده كنت بأشوفه بعينى اٍن اللى مجهز لك الأكل اللذيذ ده مش هارش هنا و لا هنا و ماغسلش أيده بعدها ؟؟
تضمن منين نظافة الأوانى المستعمله فى الطبيخ ؟؟ هل شفتهم بنفسك و هم بيغسلوها ؟؟ أبدا ..
طيب أيه اللى يمنع اٍنتشار الأمراض و تفشيها بعد كده ؟؟ و لا حاجه ..
بنقول اٍحنا شعب معدته حديد و نهضم الزلط و عندنا مناعه .. الكلام ده مش صحيح .. و لو كان صحيح ما كان المصريين تفشى بينهم الاٍلتهاب الكبدى بأنواعه .. و السرطان بأنواعه .. و الفشل الكلوى و الحصوات بأنواعها .. و أمراض القولون و القرح المعويه و بلاوى زرقا لا آخر لها ..
الكشرى لما بيبات منه شويه فى المحل معدومى الذمه مش بيرموه طبعا لكن بيخلطوه بالكشرى الطازه اللى بيكون لسه نازل من على النار سخن و ده ضرر ما بعده ضرر .. لأن البايت بيدفا بفعل درجة حرارة الطازه و بيفسد و خاصة المكرونه و بيعمل نوع من السموم الضاره للغايه بس ناسى اٍسمها و أكيد الدكتوره ستيته حتفيدنا فى هذه النقطه ..
أقسم برب العزه أنى شفت بعينى برص محترم وقع من سقف مطعم كشرى شهير للغايه فى الحله اللى بيغلوا فيها الصلصه و أنا قاعد بآكل فما كان من الوله اللى واقف على النصبه اٍلا أنه بحث عنه بالكبشه و طلعه و رماه فى الخباثه و لا من شاف و لا من درى و أستئنف عمله عادى جدا !!
أيه ضمنكم أنه مش بتحصل حاجات كده فى المطاعم الأخرى ؟؟
خلونا فى أكل البيت أحسن صدقونى .. حتى لو كانت اللى عاملاه الوليه الخايبه بتاعة دقية الباميه اللى تستاهل اللى كان بيعمله عدى صدام حسين فى المنتخب الوطنى العراقى لما كان بيتهزم و يلاقوا البوكس بابه فى بق الطياره اللى راجعه بيهم من بره و على المعتقل عدل حيث يلاقوا العذاب أصناف و أشكال لأنهم لم يمثلوا وطنهم تمثيل مشرف ..
و تقبلوا كل التحيه و الاٍحترام ..

هناك 26 تعليقًا:

شمس النهار يقول...

صباح الخير يالورد
طبعا انا مالييش في الكوره فامش هفتي فيها
لكن انا ليه في الباميه طبعا فاهفتي فيها:)
في ستات بتطبخ كده من غير نفس عمل روتيني زي اي حاجه في حياتها
فا مره تطلع حلوه ومره وحشه
لكن لو هي فعلا بتحب جوزها وبيتها واولادها هتحب فعلا تعمل لهم كل شئ جميل وطيب
وهتبتدي تجود من طبيخها
قيس كده علي كل حاجه في حياتنا
زي القطاع العام كده العامل والموظف نام في الخط ماهو كده كده واخد علاوه وحوافز وكله تمام يجود من نفسه وينمي قدراته ليه
ده بختصار يعني عشان انا لو حبيت اعلق مظبوط علي البوست ده عايزه بوست فرعي:)
اما موضوع اكل الشوارع خلالالالالالالاص ياعمرو الرحمه حلوه حتي المطاعم الكبيره
حسبي الله ونعم الوكيل فيهم

وبعدين في بوستاتك اللي تبان سهله وبسيطه وفاني وهي جواها مليون قضيه
انا بعد كده هرد علي البوستات دي في بوست عندي
وهسميه حبشتكنات شمسيه:)
عشان عايزه ارد علي كل كلمه باينه او مستتره
ويامستتراتك ياعمرو:)
قول للشيخ عبده هي دي الحياه ولو سمحت اديله 15جنيه
مش وقت تربيه والولد مجروح
بس لازم يعرف ان مصر وحبها مش بس كوره وعلم نشيله لما نغلب بختك ياابو بخيت في ماتش
مصر اكبر من كده بكتير
ينهار ابيض كل ده تعليق ده انا لسه مااتكلمتش في باقي النقاط
معلش يالورد
ماهو زي ماانت عندك تعليق تمليك عندي
انا كمان احتليت مدونتك واضفتها للخاصه الملكيه بتاعتي:)

عمرو وجيه يقول...

السلام عليكم

أولا حكاية الالمنتخب بجد لا تعليق ربنا يعلم قد ايه خذلونا

و حكاية الكشري دي

انا جتلي مناعة قوية ضده

لان جالي كبد وبائي فبقيت باكل بجراءة بعديها


ربنا ما يوريكم

المحلات بقت حاجة وحشة


و النظافة بقت أوحش


ربنا يتولانا

أحــوال الهـوي يقول...

لست ادري كيف يتفتق ذهنك علي هذه الاسقاطات فتبدو العلاقه بين دقية الباميه و المنتخب مثل الاصل و الصورة


اتمتع بمتابعتك و لا تخلو الابتسامه او تفر عن و جداني و تسالني الحيرة عن هذا البحر المتدفق من المعرفة و الثقافيه الغير محدوده فلا اجد لها اجابه الا بفخر قائلا انه صديقي

تحياتي

الكلمة نور يقول...

برص؟
هااااااار اسود
منتخب ايه ونيلة ايه بقى
خلينا فى البرص
وكملت اكل
مقلعتلهمش البنطلون فى المحل؟
وبعدين ماهى الكورة كدا
مكسب وخسارة ايه الجديد
ايطاليا طلعت بره
يعدموهم فى ميدان التحرير بتاع روما؟

غير معرف يقول...

ان شاء الله نجهز البوكس لما يوصلوا
بس هما طلعوا براءه من موضوع البنات دول
المهم انا زي ما قلتلك موش بحب اكل الشارع ...... طعمه موش حلو

من غير عنـــوان يقول...

أنا ماليش في الكوره
أحب أتفرج على التنس والسباحة

ودايما بأتعجب من نفسي إني مش بأحب الكوره بس بأحمد ربنا على هذه النعمة

بس من خلال تتبعي للأحداذ
أتخيل :
مش معقول واحد يكون الأول في الدراسه ويطلع الأخير
ولا واحد خايب ويطلع من الأوائل

ممكن بظروف قاهره
إنما لو كررها كذا مره
لا يعد مع المتفوقين

إنما أعجبني مثل البامية ده جددددددا



وفكرتني بشي جابي وأستريا يا عموووور

تحياتي

عايش... ولكن !!!! يقول...

حلوه الباميه
لكن اكل الشوارع مبحبوش

منتخبنا دايما كده بحالات لما تتوقعله يكسب يخليك تخرج عن شعورك ولو هتقول انه هيتغلب 5 ولا سته تلاقيه بيلعب زى الفل شىء غريب

فشكووول يقول...

وبعدين لك يا عمرو بك
انت كل يوم حتنزل بوست ولا ايه واحنا نجرى وراك
ومع ذلك يا سيدى انا مش عايز حد يمثلنى تمثيل مشرف ولا غير مشرف ولا حتى تمثيل على المسرح القومى
انا عايز حقى ناشف زيك بالضبط ومش عايز كوره خالص والفضيائيات بتجيب كل يوم كوره ولا كل الكور نتفرج عليها وخلاص بس عايز بقى حقى من الكام مليون اللى حيلهفوهم العيال دول
ايه رأيك فى دقية باميه اعملها لك بايدى وبشرط البس جوانتى وكل ثانيه احطها تحت الحنفيه والصابون وما تخافش خالص
طبعا اكل البيت لا يعلى عليه بس بشرط يكون فيه لحمه وهبر اما من غير كدا فأنا ارضى ببتوع المطاعم ورزقى على الله
ربنا يتمم لبنتك الوسطانيه على خير وتجوز ولادهم وانت فى كامل الصحه
تحياتى

صبرني يارب يقول...

لا بجد عدي كان بيعمل كده؟
ههههههههههههههههههههه


انا زي ما قلتلك قبل كده يا استاذنا شايفه انه ما دام الشعب جعان

ولا فن ولا كوره ولا بتنجان

اكلوا الشعب الاول وبعدين فكروا فى الباقي

طبعا الكلام ده ما بيجيش على هوا ناس كتير

لكن مش مهم ده رايي


وبالنسبه لاكل الشوارع انا كنت زمان باكل بره خصوصا فى فتره كنت عايشه فيها في فندق يعنى غصب عني

لكن والله لحد الان باقول اي اكل فى البيت انشاله جبنه وبطيخ احسن من اي عك بره

وواحده متعبه زيي كده محيره نفسها بتعمل كل حاجه فى البيت لما الموضوع بقى شبه جنان يعنى عندي
هههههههههههههه

وبعدين هو ما فيش عندكم الا باميا مافيش طباخه تانيه

مسقعه والنبى عشان ماليش فى الباميا اوي
هههههههههههههههههه

كلمات من نور يقول...

مقارنة رائعة ولو إن البامية ممكن تزعل بسبب هذه المقارنة بس نقول إيه داه حتى كيلو البامية بكام يا سيدي الفاضل

يبقى يحق لها تزعل
جزاك الله كل خير على كلامك ومش مزعلني
إلا الناس اللي بتقول معلش حجنعوضها في تصفيات كاس العالم اصل العيال تعبت بس حيتمرنوا كويس ويرفعوا راسنامع رواندا

طيب كانوا رفعوا راسنا مع الامريكانننننننننن

غير معرف يقول...

السلام عليكم

اشكرك على ردك على استفساراتنا بخصوص المطاعم ذات الاسماء الرنانة كذلك الكشرى .

الخلاصة انه لا صوت يعلو فوق صوت حلل المنزل .


و ان بقيت اشكالية ان الخضر الطازجة و الفواكه مرشوشة كما ان الاجبان و الالبان غير مضمونة المكونات و الفراخ المجمدة منظرها لا يشجع و اللحوم الحمراء انت و حظك و الخبز ملىء بالمحسنات الصناعية .

فاضل حاجة كدة ؟


انا من اسكندرية و كنت احب اعرف من باب العلم بالشىء اين يقع مطعم البلفدير ؟

احب الجو العام لسانتا لوتشيا و جابى و كان لنا فيه ذكريات جميلة ايام الجامعة كل خميس بس ده كان فى اواخر الثمانينات اوائل التسعينات و لا اعرف كيف اصبح الان!!

خالص تحياتى

حازم

MaNoOoSh يقول...

انا فعلا جالي احباط من موضوع الاكل بره البيت ده

بس احسن علشان مفكرش مجرد تفكير اكل اى حاجة بره البيت ولو كنت هموت من الجوع
اهونلى اشتري جبنه وعيش من اى سوبر ماركت ولا اني ادخل اى مطعم بعد كده
عااااااااااااااااااا
كنت بحب الشاورمة يا ناس.. بس خلاص منعتها
عاااااااااااااااااااااا

يللا أمنا لله الصحة أهم بمليون مرة
حتى الكشرى همنع اختى تجيبه من بره تاني
احنا بنعمله فى البيت اطعم وانضف مليون مره

mohamed ghalia يقول...

هههههههههههههه
تحليلك دايما رائع أستاذى

بسنت صلاح الدين يقول...

لا مادام جات سيره الباميه سيبك من الكوره بقى ،اما بقى بخصوص البرص و الكشرى كان املى كبير انه يطلع الكشرى كويس بعد ماحطينا الكبده والحواوشى على القائمه السوداء بس للأسف هاينضم ليهم

ستيتة يقول...

البوست ده نزل امتى؟
الله هو كل حاجة في البلد دي بقت تتم في الدرا

زعلانة منك قوي قوي قوي
خليت بطني وجعتني لأني سيدة التيك اواي الأولى وبحبه حب غير طبيعي

يالا امرنا لله

بالنسبة للمنتخب فتحليل حضرتك بستحق التصقيف غير انك تجاهلت شيء واحد بس

الست بنت الأصل واللي بتدخل الجوازة ابيض يا ورد مش بيطمعها ذوق جوزها في الكسل والأنتخة وانما بتتمنى له الرضا يرضى

وعليه فلو العيال دول كانوا جدعان مكنوش استغلوا حلمنا وصبرنا ومؤزرتنا ليهم وجابوا لنا كل هذا الإحباط

كمان مفروض جدا يتعاقبوا ولكن مش زي المجحوم عدي ما كان بيعمل
ولكن بالأصول والقانون
لأن اللي أدى ماتش البرازيل وايطاليا بالجمال ده لازم بتسائل ازاي كان عامل زي العيل التايهه قدام امريكا

المادة اللي بتطلع من الأكل الحامض اسمها الأفلاتوكسين وهي لا تنتهي بالغلي ولا بغيره لأنها سموم تفرزها الفطريات
فتموت الفطريات وتبقى السموم
وهذه السموم تؤدي بشكل سريع مريع للفشل الكلوي والكبدي حفظنا الله واياكم

سلمنا للبنوتة العروسة وبلاش تسيح للعريس كده
هههههههههههههههههههه

حواء يقول...

السلام عليكم
اولا : الف مبروك لبنتك
ثانيا : معلش لابنك بجد حسيت بيه اوي لاني كنت كده انا وبنتي بالضبط بس من غير علم
هههههههههههه
انا من مدمني الكشري وخصوصا في توم اند بصل
وكشري ابو طارق في التحرير
بموت في حاجه اسمها كشري
بس اخر مره وحياتك أكل كشري بره البيت
عارف انا لو كان النونو الاخير ده جه
كنت هعمل فيه زي مانت عملت في نفسك
كنت هخليه يشتغل برده ايام الاجازات
هو ده اللي بيصنع الرجاله
وعجبتني اوي حكايه الست الخايبه بتعت دقية الباميه
ههههههههههههههههههههههههه

في حاجات كتيره اوي بينطبق عليها موضوع الست الخايبه

مدونتك جميله اوي
ولذيذه جدا وطعمه كمان
والف مبروك مره تانيه لابنتك
تحياتي

غير معرف يقول...

تحياتى استاذ عمرو
اولا اشكر مرورك الطيب عندى والذه اتمنا الاينقطع
ثانيا شكرا لنصايح حضرتك الغالية
بالنسبة للماتش ربنا يهديهم حرقوا دمنا بس يالا بلاها كورة
بالنسبة للكشرى الحمد لله انا جبت
ضرف المعدة عن الاكل الخارجى
ولو ان احنا كان لنا زيارة شهرية لمطعم مشهور عندنا فى اسكندرية
بنروح نحتفل بمناسبة اول الشهر
ونتغدا هناككان نفسى اسالك عليه
بس هسالك برضه وياريت تجيب لى معلومات
بلبع اخباره ايه ارجو الافادة سريعا
وتحياتى

همس الاحباب يقول...

وبعدين يا استاذ
مش هينفع كده
المنتخب وما علينا
طب احنا كده اتعقدنا من الوليه والبامية والكشرى وكل حاجة هنعمل ايه دلوقتى
هههههههههه
رائع جدا يا استاذنا
جزاك الله خيرا
تحياتى

الكحيان يقول...

الصراحة فكرة الانشغال بالكرة والملايين التي تنفق عليها وعلى اللاعبين حرام وإحنا في أوضاع مضطربة وفقر ما يعلم بيه الا الله يعني إيه واحد يلعب شوية وياخد ألوف وملايين وجوائز وأسفار وامتيازات تدفع كلها من أموال الشعب وضرائبه لماذا؟ مسألة أمن قومي ؟ طز عشان الناس تتلهي وتنسى ويجيلها الضغط والسكر ويتمسكوا بانتصارات وهمية تعوضهم عن هزائم الواقع المميتة. وبعدين المنتخب وضع نفسه في موقف صعب في التهمة الموجهة له من عمرو أديب لسببين : الأول لم يحدد الأسباب التي أدت به إلى هذا المستوى الهابط الثاني لم يرد على تلك الحملات هناك وكأن الأمر لا يعنيه ولكن لعل الذي أهاج البعض وجعلهم يتشككون في اللاعبين أن اللاعبين ليسوا فوق مستوى الشبهات أصلا لأن من المعروف أن هناك بعضا -وليس كلا - يعرف عنهم القيام بالمغامرات إياها والسعي وراء بنات الليل والمعجبات وجاء عمرو أديب ليزيد باستفزازه النار اشتعالا طبعا نحن لا نتهم أحدا ولا نقذف أحدا بلا دليل لأن الخوض في الأعراض حرام في الحقيقة انتصار مصر في الكورة أو خسارتها من وجهة نظري لا ينبغي أن ينشغل بها من عنده ذرة من العقل فلا ينبغي أن تمثل شيئا فإن الحياة أكبر من ذلك ومشاكلنا أكبر وإن كنا نحب الرياضة فلنمارسها بنفسنا ونوفر فلوسنا ونصنع بها أماكن نظيفة يتريض فيها أطفالنا وإن كان لا بد من الفرجة يبقى نتفرج على كرة محترمة لدى الفرق الأجنبية على الدش أليس كذلك ؟ تقبل مروري وشكرا على البوست الجميل

ميرام يقول...

(:
والله معاك حق
وتشبيه رهيب
بعيدا عن ذلك لاني ماليش في الكورة
(:
(:
أنــا شفت بقى منظر لن أنســاه ماحييت
شفت عربية كبدة جنبها زي برميل كده حاطط فيه الطحينة
(:
المهم انا قاعدة في العربية وبتكلم في الموبيل ومركزة مع الناس الي بتشتري .. وطبعا الريحة
(:
لقيت قطة بتنط في البرميل ...
دي لوحدها كـــــارثة ...
الكـــارثــة الأكبر ..
صاحب العربية يقوم مطلعها من البرميل ويعصرها )::::::::::
ايوة ماسكها من ديلها وبينزل ايده عليها عشان يشيل الباقي في نفس البتاع
اااااااااااااااااااااااااااااااااه
انا جالي انهيار عصبي
(:
مش عارفه الناس هتحرم امتى
(:
مالها البامية ...
تحيـــــــاتي
(:

عطش الصبار يقول...

(بنقول اٍحنا شعب معدته حديد و نهضم الزلط و عندنا مناعه .. الكلام ده مش صحيح .. و لو كان صحيح ما كان المصريين تفشى بينهم الاٍلتهاب الكبدى بأنواعه .. و السرطان بأنواعه .. و الفشل الكلوى و الحصوات بأنواعها .. و أمراض القولون و القرح المعويه و بلاوى زرقا لا آخر لها )..
واللهى يا استاذ عمرو احنا وهمنا نفسنا بالمقوله دى كتير مش عارفه ظلط ايه اللى بنهضمه امال الشباب ورحلات الموت اللى ورا بعضها دى ايه
عموما انا هخلى بنتى مدمنه مطاعم البيتزا والحاجات الامريكانى تشوف البوست بتاعك والنهارده بالمصادفه كانت عازمانى على حاجه زى دى وافتكرت البوست بتاعك فضلت قاعده ابص للاكل شويه وماقدرتش

كل بوستاك يا استاذ عمر بتلقى الضوء على امراض المجتمع بس بطريقه لطيفه جدا ومشوقه
شكرا لك مره
انا مبسوطه لانى لحقت تعليق فى الصفوف المتقدمه
انا شاء الله بالمصابره يمكن اكون نمره تلاته فى يوم من الايام

Unknown يقول...

السلام عليكم ورحمة
الله تعالى وبركاته
يااستاذ عمرو
اشمعنى المرة دى
ما كل مرة تحصل
نفس النتيجة
ماتبص على كاس
الامم الافريقية
لكن بص على كاس العالم وما شابهه
صدقنى النتيجة واحدة فى كل مرة !

Unknown يقول...

وانت شفت برص
انا شفت صرصار
ونمـــــــــــل

Unknown يقول...

وشفت العمال بتوع
المطاعم الفيف ستارز
لما بيجوا يكشفوا :(:(
حدث ولا حرج :(:(:(:(:(
كشاكيل امراض متحركة
اختار اللى انت عايزة
واهم مرض فيهم الاحساس
بالغلب والظلم والقهر
ودول ممكن يخليهم يعملوا
اى حاجــــــــــــــة

dina يقول...

اول زيارة للمدونة
و انا كمان رافضة فكرة الثواب على الريحة دى.....يعنى حد عمل حاجة فى زماااااااان نفضل نكافؤه عليها مهما يعمل على ريحة الذكريات...نلتمس اعذار اه ممكن انما لازم يكون فى وقفة....الغلطة فى طبخ البامية من الاول فعلا

حمدي مناع يقول...

السلام عليكم ورحمة الله وبركاته
انا يا حبيبى رغم انى مش غاوى كورة الا انى يوم ما امريكا غلبتنا كنت هموت فيها والله
المهم سيبك
بص انا لسه عامل مدونة جديدة لانى طبعا جديد فى عالم التدوين
يا ريت تشرفنى بزيارتك لمدونتى
http://hamdy-manaa.blogspot.com/