الأربعاء، 17 يونيو 2009

المجد للقوارير ..

Animated Balance Scale Pictures, Images and Photos


أسعد الله صباحكم بالمسرات أعزائى المدونات و المدونين ..
من شهور طويله و نحن ملاك الأراضى الصحراويه المستصلحه بمنطقة وادى الملوك بالكيلو 52 طريق القاهره الاٍسكندريه الصحراوى ننتظر بلهفه لجنة الخبراء المشكله من خبراء وزارة العدل و خبراء هيئة اٍستصلاح الأراضى لفحص موقفنا القانونى من الأراضى الصحراويه اللى بحوزتنا و اللى قمنا باٍستصلاحها و زراعتها و طفحنا الكوته من كيعاننا لحد ما أزهرت و أثمرت و صارت خضراء بهجة للناظرين ..

و بالأمس فقط وصلت اللجنه الموقره لمنطقتنا الصحراويه المستصلحه فى موكب مهيب يتبعه عشرات السيارات لأصحاب الأراضى الراغبين من اللجنه التوجه لأراضيهم لفحصها ..

أعضاء اللجنه قاموا بالتنبيه على الملاك اللى بيتبعوهم بأن أول أرض سيتم فحصها هى أرضى و حددوها بالرقم و بالاٍسم لا لشىء سوى لكونها أول قطعه فى حيازة بئر 120 و بأن على الجميع أن يتوجه كل واحد لأرضه و البقاء فيها لحين وصول اللجنه لحد عنده ..
لكن ماحدش اٍستجاب لهم و فضلوا برضو وراهم مش عارف ليه ..

أنا و العيال كنا فى الأرض فى الوقت ده بنلم البصل و بنعاكس الدبابير أم 4 جنحات رغم حرارة الشمس اللى بدأت فى الاٍلتهاب و اٍذا فجأة يتبدل المشهد .. و تقف سيارات أعضاء اللجنه قدام الأرض ملكى ( و الملك لمالك الملك لا شريك له وحده ) و تتبعهم سيارات الحرس المرافقين و أيضا سيارات ملاك الأراضى الآخرين .. و ينقلب المكان بعد هدوءه لما يشبه ساحة قتال لم أشهد لها مثيلا اٍلا فى طوابير فراخ الجمعيه فى منتصف السعينيات !!

كل الملاك يقاتلون ليفوزوا من أعضاء اللجنه بكلمه أو اٍشاره تطمئنهم على مصير أراضيهم .. و أعضاء اللجنه يطالبونهم بالهدوء و بالتوجه لأراضيهم فى اٍنتظار اللجنه اللى حتمر عليهم تباعا بغير أى اٍستجابه من الملاك .. و حالة فوضى عارمه لا أتصور أنها تليق اٍلا بأحفاد التتار والفراعنه !! بل اٍن بعضهم للأسف الشديد اٍقتحم أرضى بالسيارات الجيب الثقيله أم نمر جمرك السويس ليسبق باقى السيارات للوصول لأعضاء اللجنه مما تسبب فى تلف عدد من شجرات البرتقال اللى تعبت أوى فى رعايتها لحد ما أزهرت و ربنا يستر و ماتكونش حصلت تلفيات فى مواسير مياه الرى المدفونه تحت الرمال بسبب ثقل السيارات ..

بجد المشهد كان مضحكا و مؤلما فى نفس الوقت ..

و فجأه تهبط من سيارة خبراء وزارة العدل سيده فاضله فى منتصف الأربعينيات .. سيده وقوره و محتشمه أثار ظهورها حاله من الاٍنضباط و يتبعها عدد من الرجال و النساء ممسكين بدفاتر هم أعضاء اللجنه ..

هذه السيده الفاضله كما قيل لى هى رئيسة اللجنه المرسله من قبل وزارة العدل .. و يشهد لها الجميع بالكفاءه و النزاهه و بقوة الشخصيه و أنها لا تخشى فى الحق لا لومة لائم و لا نفوذ و لا سطوة كبير و هى على درجة مستشار ..

سألت عن صاحب هذه الأرض .. فتقدمت و وصلت لها بصعوبه بالغه ..

تفحصتنى من خلف نظاراتها و أمرت واحدا من مساعديها بفتح المحضر الرسمى ..

سألتنى عن ظروف تملكى للأرض و نوعية الزراعات بها و عمرها و حاجات من هذا القبيل .. فجاوبتها بكل أمانه ..

لم تكتفى السيده المستشاره بأخذ أقوالى لكن نزلت بنفسها و تمشت وسط الزراعات و تفحصت عن قرب أشجار البرتقال و البصل لتحديد عمر الزراعات و تحديد ما اٍذا كانت فعلا زراعات حقيقيه أم ديكور غرس حديثا فى الأرض بغرض تزويق الصوره كما حدث فى الجيزه مؤخرا ..

و يعدين سألتنى عن المبنى المخصص للتسمين الحيوانى و مساحته بالتحديد .. فجاوبتها بالتقريب ..

لكن يبدو أنها لم تطمئن تماما لأقوالى فطلبت من مساعديها قياس المبنى بكل دقه .. و سجلت الرقم الصحيح للمساحه ..

أشهد أن السيده المستشاره الفاضله لم تعبأ بشمس الصحراء الحارقه و هى تمارس عملها و لا بهواء الجنوب الملتهب بحرارة رمال الصحراء اللى كان بيلفح الوجوه و كانت تصر على التأكد بنفسها من كل كبيره و صغيره .. علما بأن هذه اللجنه ستقوم بفحص ألوف الأفدنه فى المنطقه يعنى مساحات أراضى شاسعه تبلغ فى مجملها مساحة بعض الدول الشقيقه فمن أين تستمد هذا الجلد و من أين تنبع هذه القوه الداخليه اللى بتعينها على أداء عملها بكل أمانه و نزاهه ؟؟؟!!!

سؤال سألته لنفسى و أنا أتأمل سيادة المستشاره اللى رفضت بحده أخذ زجاجة مياه مثلجه و علبة عصير قدمها لها واحد من الملاك و العرق الغزير ينصب من جبهتها و قد أقفلت المحضر الرسمى معى بتوقيعى على أقوالى و على ما أثبتته فى المحضر .. يعنى خلاص المحضر الرسمى أتعمل و توقع عليه منها و من أعضاء اللجنه و منى فمدحى أو ذمى أو اٍبداء اٍعجابى بشخصيتها القويه لن يقدم أو يؤخر فى الأمر شيئا ..

تحيه كبيره أوى أوى لكل سيده تحمل الأمانه فى عنقها و تحافظ عليها و تؤديها بما يرضى الله و الضمائر سواء كانت ربة بيت أم عامله أو طالبه ..

أحلى صباح على عيون كل أم فيكى يا مصر تعرف تربى عيالها تربيه صح و تنشئهم تنشئه صح و تبث فى نفوسهم روح المثابره و حب الاٍجتهاد و الأمانه و الصبر على الشدائد ليكونوا فى الحياه بمثابة قناديل مضيئه ينوروا الطريق لأجيال تيجى من بعدهم و يتحملوا المسئوليه زيهم بشرف و نزاهه ..

الرفق و المجد للقوارير ..

و زلطه كبيره أوى على دماغ كل أم ماعرفتش تربى عيالها و تعلمهم أنه لا يصح اٍقتحام أراضى الغير بالسيارات الجيب أم نمر جمرك السويس و تدمير ما فيها من أشجار ..

و تقبلوا خالص حبى و تقديرى ..

هناك 37 تعليقًا:

شمس النهار يقول...

صباح الخير
عزيزي اللورد الفلاح المعتز بأرضه

الف مبروك اخيرا اللجنه جت

اعتقد من شهر 9 وانت مستني اللجنه دي
صح

الحمد لله كده الموضوع خلص والا ايه


ومبروك علي جني البصل (فين الرنجه والفسيخ)


والناس البيخين اللي دخلوا الارض وبهدلوا الدنيا دول يعني انت عملت لهم ايه
تصدق حرقت دمي
ايه الاستهانه دي

ماهمه مش واخدين الارض دي عشان يزرعوا زيك
لا
دول هيسقعوها وبعدين يبيعوها

التلفيات كتير والا ايه

اوعي يكون كسروا شجراتي
دي يطير فيها رقاب

الف مبروك علي اثبات حقك اخيرا ومبروك علي البصل:)

انت تستاهل كل خير ياراجل يا طيب

(فين بقا العزومه ):)

فتاه من الصعيد يقول...

اضم صوتي لصوتك
بجد طوبه وزلطه للي ما عرفتش تربي
وكامل احترامي للسيده الفاضله
ومبروك اللجنه..... وعايزين قفص برتقال بقا

dr.lecter يقول...

انت بجد ياعمرو رفعت معنوياتي طالما لسه فيه ستات لسه كده

شفت بقي علشان ماحدجش بيضيع حقه ابدا

وياريت تشيل صوره وداعا لشجره البرتقال وحط بدالها جنينه ضخمه من البرتقال بس عاوزه ابو سره ههههههه

norahaty يقول...

اولا الف مبروك يافندم

norahaty يقول...

رأيى ان (الست المستشارة )
ابة لام جادت تربيتها فصارت
ما هى عليه من الجمال والكمال !
والكمال لله وحده!

norahaty يقول...

تصحيح خطأ (كى بوردى)
غير مقصود(الست المستشارة
ابنة لأم اجادت تربيتها)

بسنت صلاح الدين يقول...

اولا ربنا يعوضك بشجره احلى ان شاء الله،ومعلش محدش بيعرف معنى الشجره الصغيره دى الا اللى زرعها و راعاها لحد ماكبرت،مش عارفه ازاى يكون صاحب ارض و عارف قيمه الزرع و يعمل كده،نيجى بقى للست المستشاره والله الواحد بيفرح بالنماذج دى اللى بتخلى الواحد فخور كده،و بضم صوتى لصوتك و بحيى كل ام و كل ست ليها رساله فى الحياه
تقبل تحياتى

MaNoOoSh يقول...

انا مكنتش متابعة موضوع الارض دة
بس يظهر حضرتك كنت شايل همه من فتره

على العموم الحمد لله ان ربنا عوض صبرك خير الحمد لله
ومعلش على شوية التلفيات البسيطة دي.. ان شاء الله تكون جت سليمة


وانا فعلا بضم صوتي لصوتك
والامهات المهملين انا مش بس عايزة اديهم زلطة كبيرة.. لا .. دة انا عايزة اديلهم جمرة من نار.. تلزق في ايديهم .. علشان طلعوا جيل مش متربي

همس الاحباب يقول...

الف مبروك
وبالتوفيق دائما
وما يعرفش قيمة الارض والزرع غير اللى انكوى بنار الشمس ورواها بدمه وعرقه
ربنا يبارك للك فى زراعتك
والحمد لله البلد لسه بخير
وفيها شرفاء لهم منا كل تحية وتقدير
وفيها جبناء لعنة الله عليهم
تحياتى وتقديرى

أحــوال الهـوي يقول...

تحياتي الي شخصك الكريم
بعد طول غياب

ماما يقول...

يارب ينتصر الحق وتاخد حقك فى البلد دى
وساعتها بقى توزع كام كيلو بصل هديه لكل البلجوريه
اشكرك على التحيه لكل لقوارير التعبانه فى تربية ولادها
محتاجه رايك و مشورتك
لانك بترعى ارضك بالجهد والصبر والعرق
وانا برعى اولادى بالحب والامل

ارجو عدم تاخير الرد

من غير عنـــوان يقول...

الحمد لله إن لسه فيه ناس محترمه جنب الناس اللي تستاهل.........................


ولا بلاش

ومبروك اللجنه

تحياتي يا صديقي

فشكووول يقول...

عمرو بك
تحياتى
انت يا خويا خايف على الارض ولا الست المستشاره عجبتك
وبعدين مين اللى قالك تصدق الحكومه فى كلامها ... كل يوم الحكومه بكلام
نفسى فى عربيه من العربيات الـ 4×4 اللى بيركبوها دى ..
هما بيركبوها ازاى وبعدين كيلو البصل بقى بكام يعنى الطن يبقى بكام
تحياتى عمرو بك

صبرني يارب يقول...

بص يا استاذنا الى كسر شجرة البرتقال ده من فضلك اكسرله رقابته

عالم رخمه والله وما عندهمش اي دم

شبه الجدي بتاعنا الى اكل الزرع بتاعي الله يسامحه
بس احنا دبحناه وكلناه على فكره
ههههههههههههه

المهم
انا دايما باقول ان رغم كل شيء لسه فى ناس محترمين وجد واديهم نضيفه

اوعدنا يارب يبقوا كتير شويه عن كده

تحياتي لحضرتك وربنا يجازيك كل الخير ويباركلك فى ارضك وولادك

ستيته حسب الله الحمش يقول...

الحقيقة الست دي عادية جدا وزيها آلاف الستات والرجالة ومهياش حالة خاصة وتحية لكل من يؤدي عمله بما يرضي الله ذكرا كان أم انثى

وبرضه من الحقائق الثابتة اننا شعب خد على الهمجية وحضرتك ذكرت طوابير الفراخ واللحمة ومهازلها في السبعينات يعني من اربعين سنة ومن قبلها كمان الشعب بقى بيطبق مبدأ أخطف وأجري يا أبو اسماعين

الحزن كل الحزن ان ناس مؤكد ليها مستوى ما ثقافي او اجتماعي متحسش ان الي عملته ده تعدي ولا تخاف من ربنا

البصل والبرتقال واليوسفني كمان ربنا يبارك لك فيهم
انا عاوزة فول سوداني .. أوك؟

ماما أمولة يقول...

ربنا يوفقك ويصلح حالك

وان شاء الله يعوضك خير عن التلفيات

تقديري

عمرو وجيه يقول...

آه والله معاك حق يا استاذ عمرو


بصراحة قلائل قوي اللي عندهم الامانة دي


و و قليل قوي اللي بيعرف يربي ولاده صح



ربنا يعفينا

عمرو يقول...

صباح النور يا برنسيس :)
الله يبارك فيكى .. فعلا الحمد لله اللجنه دى طال اٍنتظارها و أخيرا تمت على خير ..
الموضوع يعتبر كده خلص بمعاينة اللجنه و الله المستعان ..
و الله يبارك فيكى برضو على جنى البصل :)
الحمد لله طلع المحصول حلو و البصل أحمر و زى العسل يعنى خللى البصل عليا و الفسيخ و الرنجه عليكى لأنه طبعا حيبقى فسيخ برنسيسات :)
الناس بقى اللى دخلوا الأرض بعربياتهم بهذا الشكل الفوضوى فمنهم لله بقى و أستعوضت المولى فى الخسائر يمكن قضا أخف من قضا ..
لا ماتخافيش شجراتك بخير و زى الفل حد يقدر يقرب لهم ؟؟ دول تبع الخاصه الأميريه :))
العزومه جاهزه و الله بس أنتم أنووا ..
شكرا ليكى و أهلا بيكى ..

عمرو يقول...

فتاه من الصعيد
الله يبارك فيكى .. و قفص برتقال واحد مش كفايه بس الموسم الجاى بقى و عليكى خير :)
أهلا و سهلا و شرفتى المدونه ..

عمرو يقول...

dr.lecter
أيوه طبعا السيدات المحترمات هم الأغلبيه بغير شك و ما عدا ذلك فلا يجوز القياس عليه ..
الحمد لله ما يضيع حق وراءه مطالب ..
صورة الشحره اللى أنكسرت مؤلمه شويه أنا معاك بس معلش أنا مخلى الصوره للذكرى الخالده فقط :)
تقبل تحياتى و تقديرى يا دكتور ..

عمرو يقول...

norahaty
الله يبارك فيكى يا دكتوره .. بارك الله فيكى ..
فعلا السيده المستشاره هى اٍبنه باره مش بس لأم أجادت تربيتها و لكن كمان هى فى زعمى قدرت على تنمية شخصيتها بنفسها و ده يتطلب اٍراده قويه و شخصيه مؤمنه بمبادىء جديره بالاٍعتقاد ..
متشكر ليكى و أهلا و سهلا ..

عمرو يقول...

بسنت صلاح الدين
صاحب العوض موجود و الحمد لله اللى جات على قد كده ..
ثقافة اٍحترام الآخر و خصوصيته و ممتلكاته للأسف ثقافه مفتقده دلوقتى و الكل بيتعامل بثقافة معلش ..
فما بالك بقى بثقافة اٍحترام الأشجار ؟؟
فعلا تحيه كبيره مش بس لكل أم أحسنت تربية عيالها و لكن تحيه لكل اٍنسان قادر على اٍرضاء ضميره أصلا ..
تقبلى تحياتى و تقديرى ..

عمرو يقول...

مانوش
الحمد لله حمل و أنزاح ..
عجبتنى أوى أوى حكاية الجمره دى :))
فكره عبقريه و جديده جديره بالتجربه :)
تقبلى تحياتى و أهلا و سهلا ..

عمرو يقول...

همس الأحباب
الله يبارك فيك و متشكر أوى ..
ربنا يحفظ الشرفاء و يكترهم و يخليهم قدوه حسنه لعل و عسى الجبناء يقتدوا بهم فى يوم من الأيام ..
أهلا و سهلا و شرفت ..

gogo!sf يقول...

الف مبروك يا استاذ عمرو

ومعلش متزعلش على شجرة البرتقال

بكرة تطلع تانى ان شاء الله

وبأذن الله ميكنش فى اى خسائر تانيه خالص

والحمد لله ان اللجنه وقعت وانتهى الامر على خير

مبروووووك

احترامى وتقدير

جوجو

عمرو يقول...

أحوال الهوى
حمدا لله يا صديقى على عودتك بالسلامه و نورت البلوجر :)

عمرو يقول...

ماما
الحمد لله الشرفاء فى البلد موجودين و بخير و بيحافظوا على حقوق الناس بعينيهم ..
البصل كتير و الله و المحصول وفير بس لو فيه وسيله لتوصبله لكل البلوجاريه أكون فى منتهى السعاه :)
قلت رأيى فى الموضوع اللى عندك حضرتك بمنتهى الصراحه و كأن الموضوع يخصنى و أرجو أن تفكرى فيه برويه ..
ربنا يبارك فى أولادك و يبعد عنهم كل سوء ..
متشكر ليكى و أهلا و سهلا ..

عمرو يقول...

من غير عنوان
الله يبارك فيك يا صديقى الحكيم ..
و فعلا فكرة الجمره اللى أقترحتها مانوش هى فكره حلوه نظريا و عمليا :)
تحياتى و أهلا بيك ..

عمرو يقول...

فشكووول
أستاذنا الفاضل أهلا بيك :)
لا ما أنا خايف على الأرض و برضو معجب بشخصية و نزاهة السيده المستشاره و صبرها على المتاعب الجمه لأجل تحقيق العداله ..
العربيات الجيب دى يا أستاذنا فى دول الخليسج رخيصه و بتسهيلات كبيره فى الدفع بس المهم اللى يركبها ما يكسرش بيها ممتلكات الغير و اٍلا مش حتكون لايقه عليه ..
طن البصل لو معرش و نابر بيوصل لجنيه فى سوق أكتوبر للجمله و بيزيد طبعا لو عطشان يعنى الطن بيتراوح ما بين ألف جنيه و 1250 بخلاف النولون ..
تحياتى لحضرتك و أهلا و سهلا بيك ..

عمرو يقول...

صبرنى يا رب
يا أم خالد حرام عليكى يعنى يكسر شجرة برتقال نقوم نكسر له رقبته :))
العين بالعين و السن بالسن و بالقياس يبقى الشحره بالشجره بس هو للأسف مش زارع شجر علشان نكسر له منه يبقى مافيش بد من كسر رقبته بقى :))
الحمد لله الشرفاء بخير ربنا يزيدهم و يبارك لهم ..
تحياتى ليكى و نورتى المدونه ..

عمرو يقول...

ستيته حسب الله الحمش
فعلا السيده الفاضله تقوم بواجبها بدون تقصير و لا زياده ..
لكن من المستحب برضو التنويه بأصحاب الفضائل كما نبرز أخطاء المقصرين .. لا لشىء اٍلا لدفع الأمل فى النفوس وسط هذا الكم المهول من الفساد و الغرائب اللى بنسمع عنها ..
فول سودانى ؟؟؟
و الله فكره .. أستنى بس حضرتك لما أعرف ظروف زراعته أيه لأنى ما زرعتوش قبل كده ..
بس بجد فكره مش وحشه أبدا ..
تقبلى تحياتى و تقديرى ..

عمرو يقول...

ماما أمولة
ربنا يخليكى يا ماما أمولة و يوفقنا جميعا و يزيح الغمه بقدرته ..
العوض على الله و الحمد لله على كل الأحوال ..
متشكر لحضرتك و نورتى المدونه ..

عمرو يقول...

عمرو وجيه
هم مش قليلين اللى بيعرفوا يربوا عيالهم صح لكن الناس بتستسهل و بيسيبوا عيالهم يربوا نفسهم بطريقتهم ..
كل سنه و مدونتك طيبه و متشكر للزياره و التعليق :)

عمرو يقول...

gogo!sf
الله يبارك فيكى و متشكر جدا ..
لا حنزعل على اللى راح و لا على ما قدره الله فى لوح قدره ..
متشكر جدا لزيارتك و تعليقك بارك الله فيكى ..

nona يقول...

أكيد مصر فيها سيدات كتير قيادية و تتحلى بالنزاهة والضمير وقوة الشخصية

ربنا يبارك فيهم وفى اولادهم و يهدى الستات المخربةالتانية

تحياتى

دعاء يقول...

الله الله الله
إيه ده انت كمان بتزرع يا استاذ
دي سبع صنايع وللا ايه .بس إن شاء الله البخت مش ضايع.
ادعيلى ربنا يرزقنى بحتة سنتوفة ارض ازرعها..اصل بحب الزراعة.
ما أجمل ان تأكل مما تزرع.صح؟
بالتوفيق دائما يا رب

عطش الصبار يقول...

استاذ عمرو
اجمل مافى البوست ده
انه اظهر ان فيه سيدات جديرات بالاخترام وانهالقى الضوء على امثال تلك السيده
وخصوصا ان الاغلبيه من سيدات مصر واللهى بتدى كل حاجه حقها
ولكن الاعلام ركز فقط على السلبيات لدرجه اننا صدقنا اننا كدا
مبروك عليك الارض
وان شاء الله يبقى فيه بدال الشجره الف شجره وتخضر مصر على ايدين امثالك
تقبل تحياتى