السبت، 20 يونيو 2009

العالم السرى لأكل الشوارع + تحديث ..

تحديث : الخبر ده يتصل اٍتصال مباشر بموضوع البوست و تم نشره بعد نشر البوست ده بيوم و عجبنى لأنه بيؤيد المعلومات اللى وردت فى البوست ..


عمتم صباحا بنى البلوجر ..


عربيات الكبده و السجق المنتشره فى شوارع مصر طولا و عرضا و بنجد عليها اٍقبال شديد من الزبائن و اللى أحيانا بتنافس عربات الفول فى شدة الاٍزدحام عليها بتعتبر هى البديل المنطقى لأكل اللحم اللى الكيلو منه تعدى الأربعين جنيه بل و الستين جنيه فى بعض المناطق مما يجعله صعب المنال للكثيرين ..


طيب هذا البديل رخيص الثمن اللى بيجذب الماره بروائحه المثيره للشهيه مش جدير بالبحث عن أصله و مكوناته و محاولة اٍيجاد سبب معقول لرخص ثمنه ؟؟


بادىء ذى بدء و قاعده أساسيه فأن جميع أصناف الكبده و اللحوم الداخله فى الصناعات الغذائيه زى السجق و الهامبورجر و ما شابه كلها بغير اٍستثناء مستورده من الخارج .. يعنى ما تصدقوش أبدا أنه فيه كبده أو لحمه بلدى تدخل فى هذه الصناعات ..


فيه 3 أنواع رئيسيه من الكبده المستورده الأمريكى و الأرجنتينى و البرازيلى .. و المفترض طبعا أنه بيتم الكشف على شحنات الكبده فى الموانىء كشف دقيق للسماح بمرورها للبلاد بعد التأكد من صلاحيتها ..


أرخص أنواع الكبده هى الكبده البرازيلى و سعر كيلو الجمله منها يتراوح بين 6 جنيه و 7 جنيه على حسب السوق و قد يصل وزن الكرتونه ل 30 كيلو ..


المشكله مش فى تقارير اللجان الصحيه اللى بموجبها بيتم الاٍفراج عنها فى الموانىء لأننا سنفترض بالطبع أنها سليمه و دقيقه و لا يدخل فيها لعب .. لأ .. المشكله فى طريقة تخزينها فى التلاجات الكبيره اللى غالبا مش بتراعى الأسس السليمه للحفاظ عليها مجمده لأن غالبا أصحاب التلاجات دى بيشغلوها نصف يوم فقط و بيطفئوها النصف التانى توفيرا للكهرباء .. و ده بيدى فرصه للكبده المجمده أن يفك تتليجها شويه و بعدين ترجع تتجمد تانى و هكذا و ده من أشد الخطر على صلاحيتها ..


تشتهر قليوب بالذات بوجود تلاجات التخزين التابعه لأباطرة اللحوم المجمده ..


و نأخذ فى الاٍعتبار أن الكبده اللى أصلا سهلة التسييح بتنتقل من ثلاجات السفن الشاحنه لثلاجات المبردات الناقله لثلاجات التخزين لسيارات نقل غالبا غير مبرده لثلاجات تاجر الجمله لسيارات نقل تانيه برضو غالبا غير مبرده لتجار القطاعى اللى بيشترى منهم فى النهايه أصحاب عربيات ساندوتشات الكبده اللذيذه ..


صناعة الساندوتش بقى نفسه فيه صنعه و حرفه عاليه أوى أوى ..


فاٍما أن ترفع عربية الكبده صاحبها و تخللى الجنيه يجرى فى اٍيده يا اٍما تفلسه و تخليه يبيع عفش بيته و هدوم مراته .. اٍزاى ؟؟!!


صلوا على حضرة سيدنا رسول الله ..


لا يجوز بأى حال من الأحوال أن يحتوى الرغيف الفينو الصغير على أكثر من 100 جرام حشو .. الحشو ده بيبقى عباره عن 40 جرام كبده و 60 جرام خضار ..


الخضار اللى هو بصل و ثوم و فلفل حراق و الكل متتبل تتبيله جهنميه أول ما بتترمى فى الزيت بتفوح منها زيوت عطريه تجوع اللى

لسه واكل خروف و تخليه ينجذب كالمنوم مغناطيسيا لعربية الكبده علشان يضرب رغيفين على الماشى كده ..


بنلاحظ أن فيه نوعين من قطعية الكبده .. قطعية الكبده العصافيرى و بتبقى صغيره جدا كأنها مفرومه .. و قطعية الكبده الاٍسكندرانى و بتبقى أكبر شويه و لكل نوع عربيه مشهوره بيه و صنعه تكاد تتقارب ..


لو اٍفترضنا أن أرخص رغيف كبده دلوقتى ب 2 جنيه فلزمن و حتما يكون صافى مكسب صاحب العربيه جنيه صافى كامل بالتمام و الكمال بعد خصم كل المصاريف يعنى لو باع 100 رغيف يوميا كحد أدنى يبقى صافى مكسبه 100 جنيه يوميا من غير ضرايب و لا حجوزات .. و ده فى أيده هو أو فى اٍيد الوله اللى جايبه يشتغل على العربيه ..


أكيد لا يوجد ضمان لصحة اٍجراءات الحفاظ على سلامة الكبده بعد كل هذه الخطوات لنقلها من تلاجه لتلاجه .. و لا أصلا يوجد ضمان لعدم تسرب أنواع أخرى من الكبده للمستهلك زى مثلا كبدة الخنازير و الحمير و الكلاب و بالفعل تم ظبط العديد من مثل هذه الجرائم .. نضيف على كده عدم ضمان سلامة عامل تقطيع الكبده و هى صنعه قائمه بذاتها و لا سلامة دمه اللى بيختلط بالكبده اللى بيقطعها لما بيجرح صوابعه أثناء قيامه بعمله .. و لا سلامة القائم على البيع و لا أنه مش هارش فى حته كده و لا كده قبل ما يمسك الرغيف الفينو و يفتحه .. و لا سلامة الطرشى اللى بيتباع على العربيات نفسها .. يعنى من الآخر كده ما تقدرش تضمن سلامة الساندوتش الرهيب العجيب اللى فى اٍيدك ده رغم الجهود الجباره اللى بتبذلها الأجهزه الحكوميه المختلفه لظبط المخالفين ..


السجق بقى موضوع تانى :)


الأمعاء الدقيقه المستورده بتمر هى كمان بنفس مراحل التنقل من مكان لمكان زى بنت عمها الكبده .. و بيصطلح على تسميتها بالرانك .. و الكيلو فى الجمله بيوصل لحوالى 2 جنيه فقط لا غير ..


فيه نوعين من السجق .. نوع رخيص أوى بيصل سعر كيلو الجمله فيه ل 5 جنيه و نوع راقى مفتخر بيوصل الكيلو فيه ل 7 جنيه .. خدوا بالكم أنا بأتكلم عن السجق بتاع العربيات مش اللى عند الجزار ..


النوع الرخيص بيتم حشوه بخليط من هياكل الفراخ و البرغل و البصل و الثوم المطحونين على الناعم ..


هياكل الفراخ لمن لا يعلم هى ما يتبقى من صدر الفرخه بعد تشفيتها لأخذ الفيليه منها .. فبيتبقى منه القفص الصدرى و الجلد اللى عليه و الرأس سليم و نصف المقار و غالبا الرأس بيكون بالريش .. و بيتم فرمهم فى مفارم عملاقه جباره بتخللى العظم زى العجين فمايبانش أبدا فى السجق اٍلا لحريفة أكل الشوارع .. و نسبة الخلط لكل كيلو هياكل مفرومه كيلو برغل و نص كيلو بصل و 100 جرام توم طبعا بيتفرموا بقشرهم ..


بتتم طبعا اٍضافة ملح و توابل و مواد حافظه و مواد ملونه و كبريت و حاجه اٍسمها اللعلى بتضيف لون أحمر جميل على السجق و كمان بتدارى طعم هياكل الفراخ الزفره ( باردون للفظ ) .. الخلطه المريعه دى بتبقى بنسبة 150 جرام لكل كيلو ..


و بنعرف النوع ده من أنه بيبقى طرى و لما بيتحط على النار مش بيكش أوى ..


النوع التانى اللى هو الراقى بتستبدل فيه هياكل الفراخ المفرومه و البرغل بدهن بقرى خالص مفروم على الناعم و نسبه بسيطه من اللحم المستورد من منطقة البطن المخصص للفرم و اللى اٍسمه بين أهل الصنعه الفريسكا و بيبقى بنسبة 2 : 1 .. و بيضاف له نفس التوابل المخصصه للسجق و كذلك المواد الحافظه و الملونه غير طبعا الثوم و البصل أحيانا بنسبة نص كيلو لكل كيلو لحم ..
بيتم حشو الأمعاء الدقيقه بواسطة ماكينه تشبه المدفع و اٍسمها كده فعلا بيشتغل عليها عامل متخصص و حريف علشان الأمعاء ما تتمزقش و فى نفس الوقت ماتبقاش فاضيه و جواها هوا بيسبب اٍنفجارها و هى على النار ..


أهم خطوه لحفظ السجق هو تشميعه فى الهواء بعد حشوه لتصفية المياه و الدماء اللى فيه .. و الست العاقله الراسيه ما تشتريش سجق من جزار أو من محل لسه حديث الحشو لأن السوائل اللى فيه بتوزن طبعا ..


و اللى يضمن سلامة كل هذه الخطوات حتى يصل صباع السجق لفم المستهلك يبقى جدع :)


و فيه مثل فرنسى بيقول : كل السجق بشهيه بس ما تسألش معمول اٍزاى ..


السجق ده غير السجق الاٍسكندرانى اللى بيبقى محشو فى الأمعاء الغليظه و بيبقى فيه طعم اليانسون باين شويه و هو أصلا اٍيطالى ..


نيجى بقى للحواوشى ..


فاكرين فيلم خللى الدماغ صاحى ؟؟


اللى كان فيه سامى العدل بيلعب دور عفريت نزل على الأرض و عشق الحواوشى و حاول يعرف سر صنعته لكنه فشل رغم كونه عفريت اٍبن عفاريت ..


و الحقيقه أنه مهما ست البيت حاولت بشتى الطرق توصل لطعم حواوشى الشارع لا يمكن أبدا تنجح فى ده لكن حتطلع حواوشى بيتى نضيف طعمه قريب من الكفته لكن لا يمكن يبقى طعمه زى مثلا حواوشى شلبى بتاع سوق التوفيقيه .. و يقال بين محترفى أكل الشوارع اٍن السبب بيرجع لسيدى الحلى اللى دعا ربنا أنه يخللى أكل الشارع أحلى و ألذ من أكل البيوت !! مقام سيدى الحلى فى نهاية عطفة الشيخ عبد الله فى باب الشعريه ..


لييييييه ؟؟


صلوا على حضرة رسول الله ..


بادىء ذى بدء لازم يكون العيش البلدى اللى بيتم حشوه مخبوز نص خبيز يعنى مش مستوى .. و بيتساب لما يبرد تماما من غير ما يعرق لأنه لو عرق يبقى فسد طعم الحواوشى ..


حواوشى الشارع برضو نوعين ..


نوع رخيص بيبقى عباره عن هياكل فراخ مفرومه و برغل و ليه ضانى أو دهن بقرى خالص حتلاقوه بيمسك فى سقف الحنك بعد الأكل و بصل و فلفل أخضر حراق و خلطة توابل شيطانيه سيأتى ذكرها ..


النوع الراقى منه بيبقى عباره عن بوش و لحمه مفرومه مستورده و باقى مكونات النوع الأول ..


البوش هو ما يتبقى من تنظيف اللحوم عند الجزارين .. يعنى الدهون و الشغت و الجلد و الختم و كده يعنى .. و بيبقى كندوز يعنى بقرى على بتلو على ضانى .. و الكيلو منه فى الجمله ب 7 جنيه .. و يوجد متعهدين لجمعه من محلات الجزاره للمتاجره فيه و أشهر متعهده فى القاهره هى الحاجه نورا عاشور اللى مسكت تجارة المرحوم زوجها فتحى الطحش و قد ترملت و هى فى عز شبابها و بتفوح منها رائحة المسك و العنبر تقريبا فى الأسبوع التانى من كل شهر و عندها تلاجات عملاقه مهوله فى سوق العتبه و المدبح القديم ..


الصنعه الصح للحواوشى لو عاوزين تجربوه فى البيت هى كالآتى :


- كيلو لحمه كندوز ملبسه ..


- نص كيلو ليه ضانى أو بوش ..


- كيلو بصل و يفضل الصغير علشان مايبقاش فيه ميه كتير ..


- نص كيلو فلفل أخضر حراق و يمكن الاٍستغناء عنه أو عن بعضه أو تضاف الشطه ..


- 100 جرام ثوم ..


- 50 جرام كبابه صينى مطحونه و يفضل سليمه و تطحن فى البيت و هى حبات بنية اللون صغيره نوعا و السر كله فى هذه الكبابه الصينى ..


- معلقه كبيره جنزبيل مطحون .. و ممكن معاهم حتة جذور جنسنج كورى للمتزوجين حديثا ..


- - معلقه كبيره قرفه مطحونه ..


- رشة زر ورد ..


- معلقه و نص كبيره بهارات ..


- 3 حبات جوزة الطيب مفرومين ..


- ملح و فلفل أسود على حسب الطلب .. و لا يضاف كمون أبدا ..


الاٍسكندرانيه بيضيفوا على الخلطه دى حزمة بقدونس و هذا للعلم ..


بتتفرم كل هذه المكونات مرتين أو تلاته و بيتحشى بيها العيش و بيلف فى ورق سيلفر طبعا يعنى بلاش ورق الجرائد و لا الورق الأبيض اللى أصلا مصنع من القمامه و على الفرن متوسط الحراره مش هادى علشان ما ينشفش أو بلغة أهل الصنعه ما يتسليش ..


ملحوظات :


- بيكثر وجود الدود الأبيض صغير الحجم فى الشاورما عند الكثير من المحلات بسبب سوء التخزين من يوم ليوم و بسبب وجود طبقات الليه فى العمود ..


- محلات الكبده و المخ المقليه بالرده بتستعمل كبده مستورده مش بلدى .. و المخ غالبا بيكون نخاع جملى مش مخ خالص أبدا ..


- جميع محلات الكباب و الكفته بغير اٍستثناء حتى المحلات الشهيره منهم بيتعاملوا مع الحاجه نورا و بيدخلوا البوش فى صناعة الكفته .. و للعلم بيتسمى فى السوق زبالة الجزار ..


- الأرز بيدخل كمكون أساسى فى صناعة الفول و الطعميه حيث بيضاف للفول أثناء تدميسه و قبل ما يستوى بشويه علشان يدى له تخانه بعد اٍضافة مواد كاويه مستورده من ألمانيا لسرعة تدميس الفول و يبقى زى اللوز .. و أغلب المطاعم بيسلقوا أرز التموين اللى بيشتروه بثمن بخس من الفقراء و بيضيفوه على خلطة الطعميه علشان تكتر ..


- أدينى عملت اللى وعدتك بيه ياض يا سامح يا ملك الكبده ياللى عربيتك فى مجمع الأردنيه بالحى السابع بمحافظة 6 أكتوبر أمام جنة الفواكه تحت البواكى بجوار البحصلى .. بقى ياض أقولك زود الطحينه تقولى هو كده يا حاج !!!


طييييييييب ..


و تقبلوا خالص تحياتى ..

هناك 49 تعليقًا:

شمس النهار يقول...

صباح الخير يا لورد :(
يا عم ايه البوستات الجميله دى؟
صباح القضايا الشائكه و الحمد لله بالفطره لا اميل لاكل الشارع اطلاقا و خصوصا ما يدخل فيه اللحوم
يا ريت بقى كل شباب البلوجر يقروا البوست ده و ينشروا الفكر اللى فيه على كل اللى حواليهم
و بجد انت ذكى جدا انك تنزل موضوع زى ده و فى التوقيت ده و احنا مش ملاحقين ما بين انفلونزا الطيور و خنازير و طاعون و دود جوه السمك كمان
اخر حائط سد لغذاء الانسان المصرى مافضلش غير انفلونزا الفول و الطعميه و بكده نقول للشعب المصرى جوعوا تصحوا

تسلم ايدك و ربنا كده يارب يكرمك على كل بوست بتكتبه جواه سبعين قضيه

حلوه قوى وصفة الحواوشى انت كده بتنافس مطبخ شموسه
صباح الفل يا لورد :)

غير معرف يقول...

ههههههههه
و ربنا انت فظيع يا استاذ عمرو
فظيع فى معلوماتك الكتير
ز فظيع فى اسلوبك فى الكتابه
و فظيع فى خفه دمك و التلميحات الى مش كل البلوجريه هيفهموها
هههههههههه
مش نعرف انت لورد و لا عندك عربيه كبده و سجق؟
حيرتنا معاك لكن شكرا لتنبيهنا للخطر

عاشقة الأحزان يقول...

السلام عليكم

عمرو

اخبارك ايه بجد هايل قووى البوست وجميل قووووووووووووى


وبجد فكرته عجبتنى قووى

دمت بكل خير
ايناس

خمسة فضفضة يقول...

السلام عليكم ورحمة الله وبركاته

ازيك يا استاذ عمرو بك
ايه يا عمنا المواضيع الجامده دي علي الصبح كده
بطننا وجعتنا هههههههههههههههههههه

الحمد لله يارب طول عمري فيه عداء متأصل بيني وبين اكل الشوارع حتي الفول والطعميه اللي نادر جدا اني اشتريهم من بره لاني اصلا باعمل الفول في البيت وبيبقي ولا احلي من بره اما الطعميه فاماما بتعملهلنا يا اما لما يهفني الشوق باشتري وخلاص واسمي قبل ما اكل وانا عارفه ان فيها بلاوي هههههه
ولو كانت جت علي الرز يبقي خير وبركه لا ياسيدي دا فيه محلات ومشهوره جدا جدا وليها فروع كمان بتحط علي الطعميه بواقي العيش اللي بتفيض من الزباين او اللي بتفيض من سندوتشات الفول ، يعني يلموا العيش ويسيبوه مرمي علي السطح في الشمس لحد ما ينشف وبعدين يبلوه مع عجينة الطعميه وشوف بقي ايه اللي مشي عليه فران بقي وصراصير وحاجات تانيه
دا غير اصلا ان العيش بيكون بواقي من اكل الناس والله الكلام ده من واحده ساكنه جمب الفرع الرئيسي للمحل وبتشوف اللي بيحصل بعنيها

ولبا بقي السلطه وطبعا الخضار بتاعها من غير غسيل او حتي غسيل طلسئه

وهاقولك بقي علي سندوتشات الفول بالقشطه برضو من واحده قريبة صاحب المحل ، بيجيب اللبن في جراكن عمرها ما اتغسلت ولو شفتها تقرف من شكلها غير الريحه ومن غير ما يتغلي بيحط منه علي الفول ويضربهم في الخلاط وطبعا ماحدش بياخد باله


ااما بقيت الحاجات من كبده لانشون وسجق الحمد لله رب العالمين مش بقرب لاكل الشوارع دا بوتايتا

صحيح لما فشلت اني اطلع الحواوشي زي بتاع الجزار بقيت اروح اقطع اللحمه بنفسي واخلي الراجل يعملها قدامي



المشكله في ده كله ان ده اكل الناس الغلابه واللي مش فمقدرتهم انهم يشتروا لحوم بلدي

ربنا يستر علينا يارب

سلام

خمسة فضفضة يقول...

اه صحيح مشكرين علي الحواوشي هاجرب واقولك النتيجه

الازهرى يقول...

ليه كده بس
انا كان خط الدفاع الاخير عندى فى رحلاتى المكوكية هو عربية الفول ومحلات الكشرى
بعد كده نكتفى بالكشرى وربنا يعينى


اما بخصوص الحواوشى فيا رب تكون متأكد من المقادير علشان انا نقلتها لقسم المطبخ عندنا وجارى اتخاذ اللازم لتنفيذها
وبصراحة سواء طلعت صح او اوت
ش مهم
مش هتكون افظع من تجاربهم على فى الطبيخ باشكاله وانواعه اللى لو عرفتها تقول برضه عربية الكبده ارحم

احساس طفلة محبة للرومانسية بس واقعية يقول...

كل دا واحنا بنيجى نأكل فى الاخر
الحمد لله الحمد لله مأكلتش الحاجات دى قبل كدا
اكيد زى ما قلت لازم الناس اللى بتبيع تكسب
بس لازم يكون فى ضمير وامانة لان الحاجات دى بتضر فى المستقبل القريب

طريقة الحواوشى شكلها ممتازة
جارى ارسالها لكل اللى بعرفهم
الموضوع كله مفيد ومهم جدا
شكرا ليك

تقبل مرورى

أحــوال الهـوي يقول...

وصلت الرساله بقي علشان شوية طحينه تشرد الراجل
علي العموم من يوم ماشفت طريقة صناعة اللحوم زي اللنشون و الهمبورجر و انا لا يمكن اكلها مهما كانت مغريات الرائحه الشهيه و شكل الناس اللي بتاكل سندوتشات الشارع بطريقه تدل علي الاستمتاع و ال شهيه

عجبني تحريك العظيم بتفاصيل التفاصيل بداية بالمصدر و السعر ثم التخزين و التصنيع
بالرغم من سرية الخلطه استطعت اختراق المنظمات العامله و الحصول عليها

تحياتي

فتاه من الصعيد يقول...

لالالالالالالالالالالالالالالالالالا
انت كنت بتشتغل ايه قبل ما تحرف الصحافه ؟
كل الفضايح اللي عنلتهالهم دي علشان الواد ما حطش طحينه ...... ده انت قلبك اسود بقا
المهم انا ما بحبش اكل بره لأن بشوف ان طعمه وحش ....... وما تسألش ازاي

غير معرف يقول...

السلام عليكم
شكرا استاذ عمرو على المعلومات دى
مهما كان احساس الواحد تجاه الاكل بتاع الشارع انه اكل مش مضمون - فمعلوماتك اكدت الاحساس ده و ان الموضوع بجد مش هزار .

واضح ان مفيش ذمة فى اى حاجة .

طيب و ايه رأيك فى الكشرى ؟ انا سمعت ان الحلل المستخدمة و اللى يتكون من الالومنيوم مصيبة فى حد ذاتها .

لا اظن ان محلات زى بيزا هت و كنتاكى و ماكدونادز الى اخر القائمة مش حتفرق كتير مع اختلاف نوعية الطعام لكن برضه تحس ان فيه حاجة غلط .

يا ترى ليك رأى او نصيحة فى هذا الموضوع ؟

خالص تحياتى

حازم

دعاء يقول...

لا انا كده زعلت منك قوي
انت أفسدت عليا الكبدة بتاعة العربية اللى بشم ريحتها ريقى يجرى.

طب تعرف ان واحد شغال عند جزار قالي ان الكبده اللي بيبيعوها في الاصل كبده مستورده ويخلوها تفك ويبيعوها على انها طازة ..امال هيجيوا الكبدة اللى فى المحلات دى كلها منين..هى البقرة ليها كام كبدة!!

بجد الموضوع جاى فى وقته وربنا يستر علينا
و حقيقي البوست مميز جدا جدا جدا

mohamed ghalia يقول...

هههههههههههه
ده الواحد كره كل أنواع الأكل
ربنا يستر

ستيته حسب الله الحمش يقول...

ايه ده
جبت ده كله منين
فعلا الكبير كبير والنص نص نص نص
والصغير منعرفوش


بس ده اسمه كلام
انا عربية الكبدة بتاعة حسني في اسكندرية من اساسيات حياتي
خليتني كرهت حسني عاااااااااااااا
حرام

يالا نحن بني الشعب المصري حديد
ومعدتنا حديد
مجمد مش مجمد والا ما بيأثر

بطلت اكل من الشارع وناوية اشيل حديد

بسنت صلاح الدين يقول...

مفيش احلى من اكل البيت بعد اللى سمعته ده،فكرتنى بالحواوشى اللى اكلته من هنا و روحت على المستشفى عدل من هنا،وانا اقول الساندوتشات اللى فى الشارع رخيصه ليه مع ان اللحمه غاليه اتارى.....بس انا هموت و اعرف انت عرفت الكلام ده كله منين،بس والله جزاك الله كل خير كرهتنا فى اكل الشارع ابو ريحه جنان اللى مش عارفين جايه منين بعد المقادير المقززه اللى مصنوع منها
تقبل تحياتى

MaNoOoSh يقول...

عااااااااااااااااااااااااا

طب انا مكنتش باكل من الشارع
بس ساعات كنت بحب سندوتشات الشاورمة

وبجيب السوسيس والبرجر المجمدين

عااااااااااااااااااااااااااااااا
معدتش هاكل اى اكل مش عاملاه بايدي تاني
ولا حتى الطعمية والفول
عاااااااااااااااااااااااا


بجد متشكرين جدا على التنوير الغذائي ده يا استاذ عمرو
صحيح اثر على معنويات الواحد الغذائية شوية.. بس العلم نور

طب الواحد ياكل ايه بعد كده بس ياربي
عااااااااااااااااااااااااااااا

nody يقول...

انا لسه امبارح متكلمه على موضوع الاكل الى باره ده
بس كنا بنتكلم على كنتاكى
نفس الخلطه بنعملها فى البيت
ومع ذالك الى فى المحل طعم تانى
وعلى فكره مش بس الاكل ده
حتى الحلويات
بيكون ليها طعم احلى من الى فى البيت
سبحان الله

بس عاوزه اصحح معلومه وردت فى البوست
مين قال ان الى عنده عربيه كبده بياخد المكسب خالص مخلص
بالعكس انا شفت بعنيه
البلديه ليها اكراميات
والمرافق ليها اكراميات
ومفتشين الصحه كمان
وبيكون ساعات يوميا

الجواز و سنينه يقول...

يا مساء الفل
ايه الموضوع اللى يجوع و كمان يسد النفس فى نفس الوقت
و حضرتك بتحكى عن الريحه جعت جدا و لما اتكلمت على الطريقه نفسى اتسدت
و الله كتر خيرك انك عملتنا الجبايا و الاسرار
بس ايه المعلومات دى كلها ماشاء الله عليك
طيب بالنسبه للفراخ و الكشرى ايه النظام ؟
انا كنت بقول كلمه دايما
ان اكيد صاحب المطعم كل همه انه يكسب بأى طريقه و مش مهم الناس يحصلها ايه
حتى الفول ياربى ؟
حاجه تقرف بس تخلى الواحده ما تكسلش و تعمل حاجتها بأديها و تعلم الجيل اللى جاى ما يعكش بره
مرسى على الموضوع الجامد و تسمحلى احط اللنك بتاعه عندى ؟
تحياتى

ماما أمولة يقول...

الحمد لله ان الواحد اصلا مقاطع كل الحاجات دي

بس كلامك قلبلي معدتي

شكرا على نصايحك يا عمرو

سنابل قمح يقول...

اااااه يا بطني
انت عرفت كل ده ازاى ؟
لأ واللي مجنني انك عارف البلاوى دى كلها وعادى يعني رايح لسامح

منك لله يا سامح كنت هات الطحينة دا الجهل نعمة

اوعى تقول كمان ان الكشرى فيه حاجة دا كله الا الكشرى و مكوناته كلها باينة وعمر بتاع البيت ما بيجى زيه (ماحدش يقول لأمى )

زمان ف اول تعاملي مع اكل الشارع ايام ثانوى لما كانت ريحة الحووشي عند الجزار اللي ورا المدرسة تطلع لنا ف الفصول وتجننا من الجوع فكرت انا واصحابي اننا نصاحب بنت الجزار اللي كانت معانا ف المدرسة ونخليها تشتري لنا هى السندوتشات من المحل بتاعهم وقلت اكيد هايكون مضمون بقي طالما بنته هتاكل منه معانا

يللا بالشفا

دمت بخير

موناليزا يقول...

تقرير محترم ودسم جدا

حاسوباتيه يقول...

بوست رائع بصراحه كالعاده

انا اصلا الحمد لله عمري ما اكلت كل ده من بره ابدا لان بنعمله في البيت وكلام حضرتك ايد رايي اكتر اني لايمكن اكل من بره شكرا جدا لحضرتك على المعلومات الجميله دي

واحد من العمال يقول...

السلام عليكم

تدوينه رائعه ومفيده جداً
بس أكيد جمع المعلومات الرهيبه دى أخد من حضرتك وقت ومجهود كبير جداً

يا إما حضرتك خبير تصنيع سجق وحواوشى !!
وأنا نسخت خلطه الحواوشى لتنفيذها بالبيت بصراحه أنا شايف إن كميه البهارات هى اللى بتسحر وتخلى الزبون يجوع ويحود على طول وهو مسلوب الإراده

وشكراً على التوعيه لأن الحكايه مش ناقصه أمراض
وجزاك الله كل خير

غير معرف يقول...

طيب هانعيش ازاى يا عم الحاج من غير فول و طعميه
حلها بقي علشان انا ذنبى ف رقبتك
لان الكرواسون و الباتيه مش بيحوووأو معايا
عموما ربنا يكرمك على النصايح الغاليه دى

عاشقة الأحزان يقول...

السلام عليكم
عمرو

احيك من كل قلبى على اهتمامك

الجميل بمثل هذة الموضيع

بجد انا دخلت وقرءت بجد كنت مذهوله قووى

ايه القرف ده

ناااااس معندهمش مبدء ولا ضمير

ربنا ينتقم منهم اشد الانتقام

وحسبى الله ونعمه الوكيل

تقبل احترامى الكبير لحضرتك

انوسه

من غير عنـــوان يقول...

عازمك يا عمرو عند
حماده طاعون
ولا تحب حوده نتانه
ولا تاكل عند بيرم ميكروب

هل ممكن أن تتخيل إن في ناس ممكن تروح للأسماء دي تاكل عندها

اللي يروح باكل هناك يبقى ذنبه على جنبه
وماتقوليش موووود وجوّ وحركات

والمشكله التانيه إن الناس بتروح الأماكن دي بعد الساعة 12 بالليل ... حيث لا يوجد إسعاف وكمان الهضم مستحيل

تحياتي

Emad يقول...

Salam
Very good post and I believe it will affect so much on people from our nation who cares the most about our health and eat healthy food.

Because I trust in my nation wonderful reaction I believe the guy you wrote his address and name will have more sales.

Salaam

ايوشة يقول...

ايه ده انا هرجع من الكلام ده الحمد لله انى بقرف اكل الحاجات دى او اى حاجة ليها علاقة من قريب او بعيد باللحمة حتى لو فى مطاعم معروفة مفيش احسن من البيت اى نعم الطعم يختلف بس انا ضامنة انا باكل ايه :)

صوت من مصر يقول...

ممكن واحد حواوشى واتنين شاورمه

beautiful mind يقول...

استاذي الغالي عمرو

ازي حضرتك يافندم يارب تفضل كدا علي طول تمتعنا باحلي واشهي البوستات اللي هي في نفس ذات الوقت اشهمي من سندويتش الكبده الاسكندراني ههههههه

عموما ردي علي الحكاية دي اني والله ما بحب اكل الشوارع دا رغم اني بعاني من الريحه اللي تهيج اجدعها واحد لما بيشمها

واللي زاد حكاية كرهي للاكل دا موضوع دبح الخنازير
طيب هي كبدة الخنازير دي كلها راحت فين اكيد طبعا هي دلوقتي قاعده ومتهنيه في معده الاخوة المصريين الغلابه

يلا ربنا يستر

همس الاحباب يقول...

ههههههههههه
بجد تحفة
انا كنت متعقد من اكل الشوارع
والحمد لله كده بقن عقدةوعاهة
تسلم الايادى بجد
الموضوع شائك وخطير
وربنا يسهلك يا سامح بكره هتبيع بطاطا فى الميدان
تحياتى

غير معرف يقول...

طب ما قولتلناش يا ريس اخبار الحاجات دي من عند جزار مضمون كويسة ولا برضو فيها كلام

يعني سجق الجزار والبوجر من عنده اخبارهم ايه ؟

فشكووول يقول...

مساء الخير يا لورد على رأى الحاجه شمس وانا من النهارده اقول لك على طول يا لورد
انت زعلتنى خالص من بتوع الكبده والجماعه اللى بيبيعوا عفشه اللحوم فى العربيات لانى من محبى هذه الاكلات جدا ودايما كل شهرين تلاته احب اكل الحاجات الزباله دى وخصوصا لو العربيه كدا شكلها مش حلو وهافف عليها دبان والراجل ايده مش نضيفه ... ههههههه
يعنى هى كل حاجه ربنا كتب علينا اننا ناكلها يا اما كلها اشعاعات يا اما كلها عليها مواد حافظه يا اما منتهية الصلاحيه ... بصراحه عيشه زى الهباب. والحمد لله اننا من مهدودى الدخل ما بنستخدمش اكثر من الفول والطعميه وبالرغم من ان فيهم رز وحاجات كدا لكن ارحم من الدود بتاع لية الخرفان
يا لورد المشكله ان كلنا ضميرنا سوس ومافيش فايده واصبحنا لا نحب المكسب الا الحرام ولا نحب العمل فى النور ودايما بنشتغل فى الضلمه ... احنا فعلا اصبحنا شعب مفكك ومنحل والانحلال الاجتماعى وصل الى الزروه
بخصوص بقى الرغيب الحواوشى انا كتبته عندى عشان اعمله ... بس كدا يبقى مكلف قوى ومكوناته من 13 نوع من عند العطار
طب بذمتك مش الواحد يشتريه بقى من عند الجماعه بتوعه احسن من ما يعمله فى البيت حتى لو كانت اديهم مش نضيفه وامرنا لله ... ما هو احنا بقى بتوع مهدودى الدخل وبنحسبها بالمليم والسحتوت

بوست هايل وهادف وتحياتى

كلمات من نور يقول...

جاري طباعة هذه المقال وتكبيرها واحتمال اعمل لها إطار واعلقها في غرفة ابني الوسطاني المكلبظ بسبب اكل الشوارع وخاصة الكبدة والكفتة والسجق......يع

بارك الله فيك ويارب يتعظ ويفهم إن البركة في أكل البيت اللي اساسا بقى برضه مشكوك فيه بس قضا أخف من قضا

mahasen saber يقول...

هههههههههههههههه با بختك يا سامح اليى زى سندوتشات الكبده تمام

كنت زود الطحينه كان هيحصلك ايه يعنى

بس احسن برضه اهو جاتلنا احنا بفايده
حتة بوست مستوى على نار هاديه ويتاكل اكل من جاذبيته

مبدع يا لوردنا الغالى
البوست تحفه ومفيد جدا جدا جدا

عطش الصبار يقول...

ايه المعلومات الموثقه دى يا استاذ عمرو
ياريت بقى معلومات زى دى كدا بس عن الاماكن الشهيره اللى ولادنا مدمنين لها ياسلام وتوضح فيها برضه اماكن تواجد الدود الابيض والاسود وكل الالوان
بصراحه شكرا لك لانى هنام من غير عشا
مع انى عمرى ما اكلت بره غير ايام الجامعه زماااااااااااااااااااان
ماتنساش معلومات عن المحلات الكبيره اياها
تقبل تحياتى

د. ياسر عمر عبد الفتاح يقول...

ده أنا ياما كلت حواوشي من علي العربيات
بس كان قدام سوق الدهشوري .. قبل السلم علي طول
بس علشان كنا زباين .. كان بيظبنا
كان بيدينا طحينة كثير .. وجرجير ككادو يعني

الحمد لله
رغم كل السموم دي
لسه الشعب عايش

هبه يقول...

ياااااااااااه
ربنا يكرمك بجد يا بابا عمرو علشان بتعرفنا الحاجات الرهيبه ديه.....بس عرفت دا كلو ازاى؟
لأ لأ مش معقول بجد
احلى صبح على عيونك يا بابا....

أم مالك يقول...

اول مرور لى على هذه المدونة الرائعة
وباذن الله لن يكون الاخير
احيك على هذا البوست الرائع
واللى خلانى اقرر لا والف لا اى ان كانت
الظروف للاكل الخارجى
حتى لو فى مطعم خمس نجوم البيتى بيتى ياسلام
تحياتى استاذ عمرو وسيظل التواصل

همسه يقول...

تحفه
بجد روعه
انت فعلا مزهل
تحياتى ليك

aidy يقول...

يا نهار ابيض

انا بجد شكلى هعيط

انا فى الجامعة اكلى كله شاورما وكبدة وسجق


لا بجد انا حاسة انى معدتى اتقلبت بعد البوست ده

وبجد هحرم اهوب ناحية اكل الجامعة ده تانى

بس هو مفيش اكل كويس نقدر ناكلوا مطمنين من برة

يعنى لو حد فى جامعة او بيشتغل غالبا بيحب يجيب وجبات سريعة

وطبعا كلها بالشكل المقزز ده

بس طبعا بشكرك على الموضوع الشائك ده

أفتكر ان الشعب المصرى بيحاول يوهم نفسه ان الاكل ده طبيعى وكويس

عشان يقدر ياكلوا عادى

تحياتى

MǿиY El-Shreef يقول...

بتأكد بس انت عامل اشراف ولا لا

اصلي رديت ف البوست الجديد ومش لاقيه ردي :D

صبرني يارب يقول...

يع يع يع

تصدق يا استاذنا بطني وجعتني


الحمد لله يا ربي ان سيدى الحلى بتاعكم ما دعاليش

ياربي مش باحب اكل بره طول عمري

الحمد لله يارب ولا ولادي عودتهم على اكل البيت

ولعلمك بقى انا باعمل الحوواشي فى البيت بيطلع جميل

مش عارفه زي الى بره ولا لا لانى عمري ما كلته بره يععععع باقرف اوي


والسجق العادي ده انا باعمله كمان بس مش باسيبه ينشف باسويه على طول
عندي قطعه فى المفرمه بتعمله عادي جدا

باوصي الجزار على امعاء خروف وبيجبهالي بيدهاني هديه كمان

وبيبقى جميل اوي هابقى انزله لكم مره فى المدونه

والكبده طبعا باعملها فى البيت باشكال مختلفه

والشاورمه كذلك

كلها لعبة توابل والله يا استاذنا


وفى العيد الكبير بقى اجارك الله تعالى باقعد بعده اسبوعين ثلاثه بابا يشتغلني بقى
اشي فشه واشي طحال ومخ يا لهووووووي بتبقى ايام اللوان

اصل انا باقرف من الحاجات دي بس باطبخها لبابا


وبعد ده كله بتاكل عندهم يا استاذ عمرو
والله حراااااام بيجيلك نفس بجد ؟؟

اااااااااااه بطني وجعتني وربنا


انا اكل لقمه بدقه فى البيت وما اكلش فى اي مكان تاني

بس لو هاتعزمني على كابوريا وجمبري ما عنديش مانع
هههههههههههههههههههههههههههه

شكرا على البوست القوي ده

mostafa rayan يقول...

مقال صح صح
عارف يا استاذ عمرو انا مش باكل منها كتير بس مش علشان كل دة علشان كمية الذباب الرهيبة اللى بتكون محيطة بيها
لك كل التحية

... amr يقول...

اسمح لي أسيبلك الينك دة كمان :((
http://www.almasry-alyoum.com/article2.aspx?ArticleID=216880

غير معرف يقول...

معلهش يا أسناذنا سؤال غلس شوية:
يعني أية زر الورد بالأنجليزي؟ أو على الأقل وصفة وأنا هحاول ألاقية هنا.
حاكم أنا عايش في أمريكا وباموت في أكل الشوارع المصري وكل ما أنزل مصر من طقوسي الدائمة أني ألف على الناس اللي أنت ذكرتهم دول‘ وبا حاول أعمل الأكل دة هنا عشان الواحد لما ينزل يبقى شبعان منة وربنا يتوب علية ومايزورش الناس دول؟



Iron Cobra

lobna sedky يقول...

استاذ عمرو ارجو التواصل معى لانى بعمل تحقيق عن الموضوع ده ومحتاجه اى معلومات عندك بخصوصه وازى عرفت الحجات الى كتبها على المدونه ده

lobnasedky3@gmail.com

غير معرف يقول...

اظاهر ان الطعم الحلو مش بيجى غير من الزباله

نقل عفش يقول...

لخدمة نقل الغفش بمكة و المملكة العربية باكملهاحيث ان شركة الامانة و الاخلاص تقدم الخدمة باقل الاسعار و التكاليف
للاتصال بنا :
0550018083 _ 0565277186

للتواصل عبر موقعنا :
http://www.xn-----jtd6bya2cendpd.com/

furnituretransferdammam company يقول...


افضل الخصومات فى شركة نقل العفش او اثاث البيت من مكان افضل شركة نقل عفش بالدمام تقدم اليكم خدماتها فى مجال نقل العفش والاثاث لديها افضل الادوات والمعدات والمحترفين فى نقل العفش انها حقا افضل شركة نقل اثاث بالدمام قمنا بإضافة خدمة نقل الاثاث و نقل العفش ضمن خدماتنا لضمان راحة اكبر لعملائنا مع توفير عمالة فنية متدربة و متمرسة فى عمليات نقل الاثاث و كذلك اسطول كامل فى خدمتكم افضل شركة نقل اثاث بالدمام فإذا كانت منقوﻻتك تهمك يجب ان ﻻ تتركها فى ايدي من ﻻ يملك الخبرة فى نقل الاثاث و العفش. افضل شركة نقل عفش بالدمام يمكنكم التواصل معنا افضل شركة نقل اثاث بالدمام انها حقا افضل شركة نقل عفش بالدمام تقدم اليكم افضل الاسعار افضل شركة نقل اثاث بالدمام لا تترد وفى طلب الخدمه افضل شركة نقل عفش بالدمام تحاول ان تكون على اعلى قدر من المسئوليه .