~SUN~ Pictures, Images and Photos

الجمعة، 12 يونيو 2009

شوشو جنبهم غلبان !!

animated devil head Pictures, Images and Photos


ده المقصود بيه الشيطان يعنى


طيب و بعدين يعنى ؟؟
يعنى أعمل أنا أيه دلوقتى ؟؟
دماغى عماله بتلف و عقلى عايم فى البالوظه من ساعة ما قريت هذا الخبر النحس الذى تقشعر منه أبدان الحلاليف مش بس البنى آدمين ..
ما هو أصل بصراحه خبطتين فى الراس توجع و تدوخ و تطلع من النافوخ نجوم و علامات اٍستفهام و حاجات كده من اللى بتطلع من دماغ توم لما جيرى يهبده بالنشابه على دماغه فى أفلام الكارتون !!
و أنا بصراحه أخدت هبده على دماغى من أسبوعين كده لما الصحف طالعتنا بخبر القبض على الطبيب الشهير اللى كان بيصور مريضاته أثناء الكشف عليهن و هن عرايا بكاميرا خفيه مثبته فوق سرير الكشف بعيادته ثم لا يلبث الوغد أن يهددهن بنشر هذه الكليبات و اٍلا يخضعن لرغباته الدنيئه و يوافقن على ممارسة الفعل الحرام معه .. و حتى بعد موافقة بعضهن كان يقوم بتصوير هذا اللقاء الشيطانى بينهم و يطبعه على سيديهات ليوزعها على أصدقائه للتباهى برجولته المزعومه بعد ما زوجته أشاعت بين أصدقائه أنه – لا مؤاخذه ما بيعرفش - محاولا نفى هذه التهمه عن نفسه الحقيره ..
أنا بصراحه أترعبت بعد ما قريت هذا الخبر .. و أتخذت خطوه اٍيجابيه بأنى بطلت أروح لدكتورة الأسنان بتاعتى اللى كانت بتنضف لى أسنانى لتبدو براقه و جذابه تسر الناظرين و تلهب العواطف و تحطم القلوب ..
طبعا .. ما يمكن كانت بتصورنى من غير ما أشعر و يمكن يكون بق الرجل عوره فى هذا الزمن الشقلباظى المسخره و يمكن ترجع تهددنى بنشر كليبات ليا على الأنترنت و أنا بأنضف أسنانى و تبقى فضيحه فى بلدنا أبو كبير - شرقيه ( على فكره ده اٍسم بلد مش صفه يعنى ) ..
الخبطه التانيه بقى غلبت الأولانيه .. من كام يوم كده طالعتنا الصحف بخبر القبض على مدرس ثانوى عوقب من قبل بسبب سوء سلوكه و تم نقله من مدرسة البنات اللى كان بيشتغل فيها بسبب تحرشه بتلميذاته لمدرسة صبيان قام بتصوير ممارسات غير أخلاقيه مع 18 تلميذه من تلميذاته بالمرحله الثانويه كان بيديهم دروس خصوصيه و برضائهن كما يظهر ذلك جليا من بعض الكليبات التى شوهدت بعد تداولها على الموبايلات فى مدينة القاهره الكبرى و ما حولها !!
و أن هذه الممارسات الدنيئه كانت بتتم داخل منزله حيث اٍعتادت بعضهن الذهاب لبيته لأخذ الدروس على الرغم من كونه أعزب و بعلم أولياء أمورهن اللى يستحقوا الاٍعدام رميا بالجزم القديمه لموافقتهم على ذهاب بناتهم لبيت مدرس أعزب كما هو معروف عنه متعللين بحسن سمعته ( يا أخى النهه ) .. و البعض الآخر كان بيتم داخل منازل التلميذات أنفسهن و بحضور أولياء أمورهن فى غفله منهم و هم قاعدين فى الأوضه اللى جنبهم بعد ما دخلوا له طبعا كوباية الشاى و طبق البتى فور !!!!!!!!
الغريب أن المدرس السافل كما جاء فى الصحف كان بينقل هذه الكليبات الفاضحه على سيديهات و يروجها برضو بين أبناء حى اٍمبابه كما لو كان حريصا على فضح نفسه حتى توصلت الشرطه لشخصيته بعد جهد جهيد و ألقت القبض عليه و قدمته للنيابه العامه اللى أقر قدامها بفعلته الشنيعه ..
لا يفوتنا هنا أن نحيى رجال النيابه العامه اللى قرروا عدم اٍستدعاء الطالبات المتصورات فى الكليبات اٍلا بعد الاٍنتهاء من أداء اٍمتحانات الثانويه العامه اللى بقت على الأبواب حفاظا على مستقبلهن !!!
يعنى أيه اللى بيحصل ده ؟؟
طبيب و مدرس و الأتنين المفترض فيهم أنهم يكونوا على درجه عاليه من الأمانه الصادقه حيث كون الأول مستأمن على الحياه و الصحه و العرض .. و التانى مستأمن على بناتنا و أولادنا فى هذا السن الخطر و ده برضو لا يعفى أولياء أمورهم من معاقبتهم هم كمان على اٍهمالهم و تغفيلهم و سوء تقديرهم للأمور ..
يعنى خبطتين ورا بعض كده صحيح حاجه تدوخ و تلخبط و مش عارف أعمل أيه ؟؟ مش عارف ألوم مين و لا مين و لا مين بمعنى أصح ؟؟
خصيمكم سيدنا النبى تعالوا ندور على حد نرمى عليه اللوم و نبهدله و نعلق عليه سلسلة أخطائنا اللى لا تنتهى بس بلاش الكابتن حسن شحاته لحسن ده اللى فيه مكفيه يا ولداه :)
أنا عن نفسى حأبتدى بالدعاء بالخراب المستعجل على مستر نوكيا شخصيا اللى عمل موبايلات بكاميرات فيديو شديدة الحساسيه و الخطوره بتسجل أحلى اللحظات ..
يالا مين تانى ؟؟

هناك 41 تعليقًا:

شمس النهار يقول...

الحقيقه الاخبار دي بتكون صادمه ليه جدا
وبيصعب عليا الاطفال دول اللي بيختال طفولتهم
ايوه البنت اللي عندها 16 و18 سنه دي طفله ولسه الدنيا والمستقبل قصادهم
ليه نعكر ده كله بأفعال الكبار المرضي نفسيا

وطبعا بلوم علي الام اللي تسمح لنفسها انها تقفل باب علي بنتها مع رجل غريب حتي لوكان اهل ثقه

الخلوه اصلا حرااااام

ماهو احنا لوتمسكنا بالدين والكتالوج اللي ربنا حاطه لنا كل حاجه هتمشي تمام

وبعدين ماله الحاج نوكيا هتدعي عليه ليه
هو عمل تكنولوجيا جميله نصور بيها حاجات جميله
ماانا مصوره بيها ورد
العيب فينا وفي النفوس المريضه اللي عايزه تشوه اي برائه قصادها زي ماهي اتشوهت
يعني المدرس ده ماهو مريض نفسي طبعا
برضه اكيد اهله اهملوه وبرضه حد عمل معاه كده
الدايره لافه وسلسله من الاهمال الاسري مع وجود النفوس الضعيفه

وطول عمري اقول ان المدرس والمدرسه يجب ان يخضعوا لأختبار نفسي وعقلي قبل الدخول في المهنه
دول مسؤليين عن ابناء هذا الوطن
التدريس اخطر مهنه في الوجود هو المسؤل عن صناعة الانسان

شمس النهار يقول...

ورجعت تاني
مساء الخير ياراجل ياطيب
معلش هعلق اتني
عشان نسيت الدكتور
ودي مصيبه تانيه
اخطر ناس في الموضوع ده الدكاتره كمان
عشان غرفة الكشف
ومن عندك ياعمرو بقول وبنادي ارجوكم مافيش ست والا طفل والا طفله تتساب مع دكتور او دكتوره لوحدهم في غرفة الكشف
في كل مهنه الكويس والوحش

بلاش الثقه الزايده دي
المجتمع اتغير وظهر حاجات ماكناش بنسمع عنها
خاللوا بالكم ارجوكم وياريت نفعل دينا الجميل اللي ماسبش حاجه مااتكلمش فيها

معلش يالورد اني احتليت المدونه شويه

اعمل لك ايه دايما تتكلم في قضايا صعبه ومهمه

ربنا يكرمك
واسعد الله مسااااااك يالورد

همس الاحباب يقول...

جزاك الله خيرا على هذا الموضوع
وحسبى الله ونعم الوكيل
ضاعت الاخلاق والقدوة
واصبحت افعالنا اشد قسوة من وسوسة الشيطان
اين الضمير وشرف المهنة با دكتور
اين الاخلاق والامانة ايها المدرس
كفانا استخدام سىء للتكنولوجيا
التقدم العلمى له جوانب خير لماذا نستخدمه نحن فى اغراض دنيئة
الكل مدان الاسرة الاعلام والراى العام
الاشخاص ذوى النفوس المريضة
كلنا اصبحنا مدانين مع الاسف
ولا حول ولا قوة الا بالله
تحياتى

هبه يقول...

بابا عمرو جسمى كله قشعر من البوست ده :(
خلاص مش اروح لدكاتره مره تانيه.....طبعن اهل البنات غلطنين من فوقهم لتحتيهم لانهم مهملين و مش ياخدوا بالهم فى بناتهم صح.......
يومك سعيد و ليلك جميل جميل جميل زيك.......
هبه

ستيتة يقول...

حسبنا الله ونعم الوكيل

يعني لو ممكن ست تروح لدكتورة امراض نساء مثلا
لكن عادة في الجراحة ها تحتاج دكتور
يبقى لازم يكون فيه محرم أوك
ده امر سهل والتهاون فيه يستاهل نلوم عليها وعلى اللي هي ملزمة منه سواء كان زوج او اب او اخ


لكن بالله عليك قصة المدرس تعالى نحللها
ندعي على وزارة التربية والتعليم اللي حوجت الأهالي لأشكال ضالة ودروس خصوصية

بنتي رايحة تانية ثانوي وحتى يومنا هذا بفضل الله مخدتش درس في شهادة او غير شهادة الا العربي في الاعدادية وكنت حاطة المدرس في مرمى بصري اشوفه طول الدرس

لكن الثانوية غير شكل
لازم البنت تاخد دروس في كل المواد ومع جروب في بيت احدهم

واحدهم ده بيحدده المدرس مش انا

من ساعة ما سمعنا البلوة دي عمالين نضرب اخماس في اسداس

طيب بلاش مدرسين مشهورين ونوديها اي مركز بس ده بياخد فيه 40 في الحصة
ده اكتر من عدد العيال في فصلها مرتين

والمدرسة مش بتدرس السنتين الجايين وبندفع فلوسها علشان العيال تغييب براحتها بدل ما يروحوا يقعدوا في الحوش

طيب منعلمش البنت خالص علشان التار ولا العار
ههههههههههههههههههههه

ونهائيا قلنا اللي ربناهم بالحلال لازم ربنا يسترنا فيهم ونحاول على قد ما نقدر نعقلها ونتوكل ونشوف الموقف في اول يوم ها يبين ايه وربنا يسترنا فوق الارض وتحت الارض ويوم العرض عليه

نلوم الشيطان
نلومه ليه
ماهو سلط علينا الحكومة الرشيدة وقاعد مش لاقي شغل

mahasen saber يقول...

ااقول اللزمه اليى ابنى سمعها من موجه كوميدى ومسكت فى لسانه

يا خراشى

مصطفى ريان يقول...

المصيبة مش بس فى الفعل لكن انه يصور نفسه ويوزع الفديوهات دي دي الكارثة ان يكون التفاخر بالمعصية
دة تغير خطير فى الشخصيةالمصرية ولازم يتدرس من علماء النفس والاجتماع
العيب عيب الستات اللى وافقو على كدةوعيب الاهالى اللي ودوعسيالهم للمدرس دة رغم اخلاقةالزفت وعيب تربيةانهم ماربوش عيالهم صح
_______

اشكرك للتنويه عن الحلقة .. لك كل التحية

عمرو وجيه يقول...

للاسف يا أستاذ عمرو

الابتعاد عن الدين هو السبب

لان اللي عنده دين اصلا ميعملش كده


ربنا يهدينا جميعا



بس انا شايف ان الجرائم دي كترت وبقت عادي

مش فريدة من نوعها

و ده ميمنعش انها حقيرة برده


ربنا يحفظنا ويحفظ ولايانا من تلك المصايب

ذو الوجه المبتسم يقول...

السلام عليكم ورحمة الله وبركاته
اولا احييك على البوست
بالرغم من ان هناك معلومات قديمة
لكن الحقيقة هى ان لازم يكون هناك تغيير جزرى
التغيير هيكون فى طرق معالجتنا لكل الامور دي
ازاى
التمسك بتعاليم ديننا الحنيف
الست ميكشفش عليها دكتور
طالما هناك دكتورة متخصصة
مهما كانت فروق الخبرة
وبخاصة فى الامراض النسائية

البنت لا تجلس مع اشتاذها منفرده
لابد من وجود مرافق لها
اخ - اب -ام - اى فرد من العائلة

الاهم من ده هو الثقة بالنفس
وانه لو حصل شئ من هذا القبيل يتم الابلاغ عنه فورا

ويمكن هنا المشكلة ازاى هتبلغ عن شئ وهى عارفة انها ممكن تتفضح
وممكن تتطلق
وممكن حاجات كتير

على العموم
البوست كويس
واتمنى انك تحط بعض الحلول ولو فى تعليق من عندك
او فى بوست جديد

سؤال
ماذا ستفعل لو كنت مكان ولى امر لسيدة او لبنت من هؤلاء الضحايا

تقبل تحياتى

صبرني يارب يقول...

استاذنا شوف حضرتك

انا طبعا الشخصين دول لو سجنوا مدى الحياه قليل عليهم

وانا شايفه انهم يقام عليهم الحد ويترجموا فى ميدان عام وده اقل واجب والله


انما الستات الى بيروحوا لدكتور لواحدهم دول هما كمان يستاهلوا الى حصلهم

وحقيقى مش قادره افهم يعنى ايه صورهم وابتزهم

يا فندم لو كان صورهم زي ما بتقول مجرد الكشف وصور عاديه دي حاجه ما تمسهمش ولا حاجه

اكيد الصور الاوليه كانت زفت برضه

عشان كده رضخوا له

يعنى مش فاهمه اي واحده فى الدنيا لو هى فعلا كويسه يعنى

يخيرها من انه ينشر لها صورها وهى بتكشف ولا تمارس معاه الزنا

اعتقد يعنى تختار انها ترفض العلاقه المشينه

وبعدين كمان الكلبات التانيه الي بتقول انها انتشرت واضح جدا من الفديوهات انهم عارفين انهم بيتصوروا اعتقد ده استهبال من ما اسميناهم ضحايا يا فندم


وبالنسبه للبنات والمدرس يغفر لهم بسسسسسسس صغر سنهم

واهاليهم المفروض فعلا يعاقبوا على اهمالهم


والانحراف ده موجود على فكره من بدء الخليقه

لكن تقدر تقول انه زاد

افتكر كان فى طبيب راح للرسول وقاله انى كشف على ست واصاب منها ولكن لم يمسها وطلب منه يقيم عليه الحد لو كان اصاب حد
ورد عمر وقاله سترك الله لو سترت نفسك


المهم ان انا طبعا قرفانه من المدرس والدكتور

لكن طبعا مش باعفي ا لضحايا واهالي البنات من المسؤليه

تحياتي لحضرتك بوست متميز كالعاده


اه ايه رايك نرمي المسؤليه على راعي الرعيه ؟؟

يوم القيامه انا مش هاسيب رقابته لعلمك وانا دماغي ناشف بقى وهاخد حقي منه ان شاء الله
ههههههههههههههههه

غير معرف يقول...

انا رايي ان الطالبات تاخد الدروس مجموعات تلاته او اكتر
وده المتبع حتى لو في منزل الطالبه يعني تاخد معاها زميله وتحت اشراف ولي الامر وتحت نظره
لو ما كنش اولياء الامور فاضيين لولادهم فاضيين لايه

صوت من مصر يقول...

حاسس انى مفهمتش حاجه نهائى ياريت بجد اشوف سمبل للموضوع

بلاش فضايح يقول...

لا حول ولا قوة الا بالله
الدنيا خلاص معدش ينفع نعيش فيها
الواحد بقى خايف يطلع برة البيت

يارب سترك وعفوك
لا حول ولا قوة الا بالله

مسدس صغير يقول...

بصراحة يا عمنا انت حطيت ايدك على مشكلة غاية فى الخطورة
الامان الاجتماعى؟؟
اذا كان المدرس والطبيب لم نعد نشعر بالامان تجاههم
فمع من نشعر بالامان؟؟
لنا الله
وحسبنا الله ونعم الوكيل

MaNoOoSh يقول...

فعلا انا ألوم الأهالي.. وألوم الرجالة كمان (رخامة عليهم مش اكتر يعني)

اصل بجد.. ازاي الاب يسيب بنته فى اودة مقفولة؟؟؟

ازاي الراجل يسيب زوجته تروح للدكتور لوحدها؟؟؟
طب ازاي علاقتة بيها بايظة لدرجة انها لو اتعرضت لموقف زي دة متقلهوش؟؟؟

علشان الست (اللي بتربي أجيال وتطلع رجالة للمجتمع) تتربي صح.. محتاجة راجل يعرف معني الرجولة.. ويعرف ربنا.. ويتقى الله فى حياته.

بصراحة مش عارفة فعلا ألوم مين.. اصل فى كل المواقف سواء الدكتور او المدرس.. الست اللي تخضع ليه مينفعش ملومهاش... أما الدكتور والمدرس دول عايزين كعقاب مبدئي انهم يتمنعوا من ممارسة المهن بتاعتهم.

عمرو يقول...

شمس النهار
أوافقك على رأيك فى أن مهنة التدريس من أشد المهن حساسيه و يجب أن يخضع القائمون عليها لاٍختبارات نفسيه جاده خاصة أن المدرسين بيتعاملوا مع المستقبل بكل ما يحمل و بكل ما فيه ..

عمرو يقول...

شمس النهار
صباح الخير يا برنسيس :)
أتفضلى فى أى وقت المدونه مدونتك و لو أعرف أنك حترجعى تانى كنت فرشتها شيكولاته و مارون جلاسيه بس معلش ملحوقه ..
أيوه طبعا يجب توخى الحرص فى هذا الزمن اللى مش ولابد حتى مع الأطباء و ده طبعا لا ينفى أن هذه القله المنحرفه أخلاقيا و نفسيا هم مجموعه من الشواذ لا يجوز القياس عليهم مع وجود الأغلبيه الملتزمه و المحترمه من الأطباء ..
الحرص واجب على العموم و فى كل الأحوال ..
شرفتى و نورتى :)

عمرو يقول...

همس الأحباب
فعلا يا صديقى الكل مدان خاصة الأسره اللى تركت جانب الحرص و ساقت فى الهباله و آدى النتيجه ..
ربنا يستر مما هو قادم ..
أهلا بيك ..

عمرو يقول...

هبه
طيب لو عييتى لا قدر الله حتعملى أيه ؟؟ مش حتروحى برضو لدكاتره ؟؟
اللى حصل لا ينفى أبدا أن الغالبيه العظمى بغير شك من الأطباء ناس محترمين و عندهم ذمه و لكن ده لا ينفى اٍن الحرص مطلوب ..
بأؤيدك برضو أن الأسره عليها خطأ كبير فيما حدث ..
متشكر و أهلا بيكى ..

Unknown يقول...

شىء مرير ومؤلم
ياأستاذ عمرو

Unknown يقول...

طبعا ولا يمكن ابرر فعلة
من فعل سواء الطبيب
ام المدرس
لكن
واه من لكن هذه!
المريضات او التلميذات
الضحايات كما يتم وصفهن
هل سيصبحن (نساء طبيعيات)بعد ذلك؟
استوقفنى ان النيابة قررت عدم إستدعائهن الا بعد امتحانات
الثانوية العامة!مثل تلك
الافعال الدنيئة التى حدثت
لهن لن تتركهن (طبيعيات )
ابداً واقولها لك انما
ستخلق جيلا من
امهات وموظفات
مريضات نفسيناً ليس بالضرورة
يفعلن ما فُعل بهن ولكنهن إن لم يعالجن
فلن يكن (سويات ابداً) وما الطبيب والمدرس الا نتاج تجربة او ام او
مدرس مريض سابق .
هذا رأيى والله اعلم!

عمرو يقول...

ستيته حسب الله الحمش
أوكى موافقك فى جزئية وجوب وجود محرم من أهل المريضه و هى فى حضرة الطبيب اللى المفترض فيه أصلا أنه اٍنسان محترم بيحافظ على قسمه و على أعراض مرضاه و حياتهم ..
بالنسبه لجريمة المدرس الشنعاء ..
ندعى أولا على الأسره المهمله اللى وضعت بناتها فى هذا المأزق لأنهم أولا لم يحسنوا تربية البنات فيصبحن قادرين على رفض الاٍغواء منذ بدايته تمسكا بالفضيله و أصول الحلال و الحرام ..
و ندعى على الأسره كمان مره لأنها وصلت البنات أنهم يكفوا على الخبر ماجور و لا يفضحوا هذه الممارسات رغم علم الكثيرات من بنات المدرسه بها فعلا و سماعا من زميلاتهن لأن ببساطه جسر الثقه بين البنات و أسرهن مفقوووووووود ..
ندعى بقى كمان على وزارة التربيه و التعليم اللى أصبحت بتضم الكثير من المدرسين القتله و المتحرشين و الشواذ و اللى تسببوا فى حدوث عاهات مستديمه للتلاميذ .. معاكى أنهم قله و لكن هذا لا ينفى بأى حال كونهم يعملون تحت لواء هذه الوزاره و هى المسئوله نمبر وان عنهم ..
الأطباء طول عمرهم موجودين و بيمارسوا مهنتهم بشرف و أمانه .. و المدرسين برضو طول عمرهم موجودين و ياما خرجوا أجيال محترمه من البنات و البنين .. طيب أيه اللى حصل ؟؟ أيه اللى جرى ؟؟ أيه هذا الاٍنقلاب و الاٍنفلات فى المهنتين اللى لا يجوز فيهما أبدا اللعب أو العبث اٍضافة طبعا لمهنة الهندسه اللى لا تقل أهميه و خطوره عنهم ..
على رأيك ربنا يستر علينا دنيا و آخره و يبعد عننا الشيطان اللى كابس على أنفاسنا و مش عاوز يغور فى داهيه بقى ..
أهلا بيكى و متشكر ليكى ..

عمرو يقول...

محاسن صابر
اللزمه دى لازم تكون على لسان الجميع هذه الأيام عبد الرحمن بيفهم و الله :)
منوره الشاشه مع حسين فهمى ربنا يكرمك ..
أهلا بيكى و اٍن شاء الله دايما بخير ..

عمرو يقول...

مصطفى ريان
كلامك صح و ده برضو أمر أستوقفنى و كأن الجناه أرادو فضح نفسهم بنفسهم و على رأيك التفاخر بقى بالمعصيه و ده أشد درجه من درجات الفجور ..
و ياريت بجد الأهالى يتحاسبوا لأنهم شركاء أصليين فى الجريمه باٍهمالهم فى تنشئة عيالهم تنشئه سليمه و كمان بتركهم بنات يقعوا فى هذا الفعل الشنيع بتغفليهم و اٍستهبالهم ..
التنويه عن الحلقه بتاعتك واجب على كل المدونين لأنك حتمثلنا جميعا على الشاشه .. و اٍن شاء الله تكون بدايه طيبه ربنا يوفقك ..
تقبل تحياتى ..

عمرو يقول...

عمرو وجيه
أكيد طبعا الاٍبتعاد عن الدين و القيم السليمه سبب أساسى لما يحدث .. بس الجرائم دى مش عاديه أبدا يا عمرو و لا يجوز أن تعدى كده بدون دراسه و بحث حتى لا تتكرر ..
بأؤمن على دعائك و ربنا يستر فعلا ..

عمرو يقول...

ذو الوجه المبتسم
و عليكم السلام و رحمة الله و بركاته
أنا كمان اٍسمح لى أحييك على زيارة المدونه و التعليق ..
و يارب تفضل المعلومات قديمه دائما حتى لا تتكرر مره تانيه :)
أوافقك تماما على التغيير الجذرى اللى بتقترحه و اللى هو التمسك بتعاليم الدين الحنيف و ده من البديهيات اللى لا يختلف عليها أتنين ..
و كمان أكيد تقصد مد جسور الثقه بين أفراد الأسره مش الثقه بالنفس و ده طبعا لا يمنع أن الثقه بالنفس مطلوبه فى كل الأحوال ..
و الحمد لله أن البوست كويس و ده كان شىء مسبب لى قلق رهيب و اٍنزعاج كبير بس الحمد لله أنك أديتنى الثقه و ده شىء تشكر عليه بجد ..
بالنسبه للحلول فأنا شايف أن التعليقات وضعت كل الحلول المناسبه للتعامل مع الموقف و خاصة الحل اللى حضرتك اٍقترحته و هو التغيير الجذرى المتمثل فى التمسك بأهداب الدين الحنيف فهل بعد هذا الحل يوجد حل ؟؟ لا أظن ..
بالنسبه لسؤالك فأنا أزعم أنى ما أنفعش للاٍجابه عليه لأنى أهتم بكل صغيره و كبيره فى حياة أسرتى و موعيهم و مفهم كويس أيه الصح و الغلط .. فبجد حقيقى مش عارف أجاوبك عليه ..
طيب ممكن تفيدنا بخبرتك و تقولنا كيف سيكون التصرف فى مثل هذه الحاله لو حدثت معك و تعرضت واحده من سيداتك أو بناتك لهذا الموقف لا قدر الله ؟؟
تقبل تحياتى و تقديرى و شرفت المدونه ..

gogo!sf يقول...

يا لهوى يا لهوى يا لهوى

طيب انا عايزة افهم حاجه ده دكتور اكيد امراض نساء يعنى عادى لما ست تكشف عنده ده للسيدات اللى مش بتفرق معاهم دكتورة من دكتور وهو صورهم وهددهم بنشر صورهم وهما بيكشفو صح

ليه خايفين يقولولوا انشر انت معروف انك دكتور واحنا مرضى عندك احنا مش عملنا حاجه غلط هيخاف طبعا ومش هيعمل كده لانه هو نفسه مريض بسبب انه مراته بتذله فبده هيكون ضعيف
وبقالنسبه للسيدات اللى وفقت على كده دى تستحق قطع رقابتها


اما بالنسبه للمدرس الرق على اخلاق الطالبه لو هى فعلا متربيه ومحترمه هترفض اصلا الهزار مع مدرسها لكن تلت تربع البنات بيحبو مدرسنهم عشان كده المدرسين بيعرفو يضحكو على البنات كويس
حسبى الله ونعمه الوكيل

بجد يا عمور هما فعلا موضوعين اسوء من بعض وربنا يستر على نساء المسلمين جميعا

البوست ده فعلا مهم جدا
تحياتى وتقديرى

عاشقه الاحزان

غير معرف يقول...

طبعا أكيد مصر كلها هاتتفرج على ال سي ديهات هاتقولي ازاى؟ هاقولك لما يتحفظوا عليها الامناء والمندوبين بتوع الشرطة غير الاشراف طبعا هاينزلوها على اجهزة الكومبيوتر ومها للموبايل وبكده مصر كلها هاتتفرج عليها طبعا انا مش بتمنى ان ده يحصل لكن اتوقعه ومتاكد انه هو اللى هايحصل وربنا يسترنا ويستر الناس كلها من الفضايح والمعاصى

احساس طفلة محبة للرومانسية بس واقعية يقول...

لا حول ولا قوة الا بالله
لو هنلوم بالحق
يبقى المدرس و اولياء الامور الاول
وبعدين البنات وبعدين نلوم المجتمع
ما هو اصل المجتمع مش هو اللى بيحدد اخلاقنا العكس هو اللى بيحصل ومش معنى ان فى ناس سيئة فى المجتمع اننا نرمى اللوم عليهم
احنا نتحلى بالاخلاق ونربى اولادنا صح
ونراعى ربنا وناخد كل حذرنا
وبعدها ربنا مش هيضيع تعبنا فى تربيتهم وفى اخلاقنا اللى زرعناهم فيهم
دا سواء على المدرس ووالدية او على الطلبات

ثانيا الطبيب دا بقى ومريضاتة ملهومش عذر ولا حد نرمى علية غلطتهم
دول ناس كبيرة وفاهمة وعارفة مفروض اية اللى يتعمل وبرضو اخطائوا
تقريبا دا مرض جديد اسمة شريان مفقود فى قلب الاخلاق دا اذا كان عندهم قلب اصلا

تقبل مرورى

Kiara يقول...

لا حول ولا قوة الا بالله

انا فاكره لما كان في مدرس بيدني كنت بقعد في صاله مفتوحه وماما قاعده قدامنا موش بتتحرك الا لما الاستاذ يمشي

العيب في الاهل معلي وفي التربية

لا حول ولا قوة الا بالله بجد انا مصدومه

من غير عنـــوان يقول...

لا حول ولا قوة إلا بالله

المشطله الرئيسية كمان

نشر هذه الجرائم

أتخيل إن عدم نشرها أولى

من باب إذا بليتم

وليس من باب دفن الرأس في الرمال

تحياتي

ذو الوجه المبتسم يقول...

السلام عليكم ورحمة الله

اسمح لى احييك على ذكائك ولباقتك فى الرد

بخصوص الثقة بالنفس التى اقصدها هى ثقة الشخص نفسه بنفسه والنابع من ثقة ولى الامر واسلوب التربية الصحيحة

على سبيل المثال لو ان الست او البنت عندها ثقة بنفسها هتقدر تتصرف مع الامر قبل حدوثه ولا تقع فريسة سهلة لمدرس او حتى لدكتور
ولو فرضنا ان الدكتور فعل فعلته ( التصوير ) بدون علمها
فاعتقد من السهل جدا اخبار اهلها بالموضوع ولا يصح ان تقع فى فخ الخيانة
وبالتالى فان الدكتور لم ولن يستطيع ان يفعل شئ لواحدة تستطيع مقاومته
لانه لم يفعل معها شئ كل الموضوع تصوير اثناء الكشف واكيد لو تم التحقيق سوف يكتشف ذلك بسهولة
لذلك فان الدكتور سيكون اجبن من انه يفعل شئ
لكن للاسف الضعف وبعض السيدات بيكون عندهم الرغبة اصلا للخيانة فيفعلون ذلك

اما عن البنات والمدرس
اعتقد بسن المراهقة يجب على الاهل تكثيف الاهتمام بالابناء وعمل الكنترول الجيد عليهم
بدون دخول فى تفاصيل

اما عن السؤال اللى يبدو ان حضرتك فهمتنى فيه غلط

لم اقصد ابنائك انت بالتحديد
ولكن ما قصدته لو ان احدنا تعرض للموقف ماذا يفعل

- احب اعرف حضرتك ان معظم الاباء المتحضرين مثل حضرتك موعيين ابنائهم ايه الصح وايه الغلط

لكن ما قصدته عندما يحدث مشكلة مثل هذا فالطبعى ان كل شخص بيضع نفسه مكان الضحية وبناء عليه بيقرر رأيه

لست خبيرا بالحياة مثل خبرتك
ولكن عندما يحدث عندنا بالبلدة الريفية مثل هذا الامر فان العقوبة هى الاعدام للفاعل
القصاص من الدكتور ومن المدرس

اعتقد دى ابسط اجابة
مرة تانية باكرر اعجابى بذكائك وخبرتك

تقبلى تحياتى

ذو الوجه المبتسم يقول...

معلش هاقول كلمة صغيرة
لو حضرتك بصيت على تعليق gogo عاشقة الاحزان
هتلاقي تقريبا متفق مع كلامى
انا قريته بعد ما علقت

تقبل تحياتى
ودمت بخير اخي الاكبر

قوس قزح يقول...

انا الاول لى سؤال
هى الرجالة مش بتتكسف ؟؟
اقصد ان ما عمرنا سمعنا عن ست بتنشر كليباتها على النت مع الرجالة علشان تتفاخر او تعمل دعاية للبيزنس بتاعها

يعنى الرجل مش بيتكسف ان حد يشوفه فى وضع زى ده ؟ ده المفروض بيفضح نفسه كمان



بالنسبة للبوست انا اول مرة اسمع الخبرين
فى ناس بتقول ازاى تروح ست لوحدها للدكتور .. طيب و الست اللى مالهاش حد تروح معاه تعمل ايه ؟ تستلف حد من الجيران ؟
ولا الست اللى عندها مرض خطير و مش عايزة تشيل حد الهم معها ؟
مش الحل اننا نمسك فى المجنى عليهم و نقول انتم غلطانين كنت تاخدوا بالكم

انا شايفة غلطتهم بس فى انهم خافوا و اختاروا انهم يرضوا رغباته بدل ما يبلغوا عنه

اما عن قصة المدرس .. ازاى يعنى اخلاقه بايظة و فضل مدرس ؟؟
و ايه حكاية البنت تروح له البيت تاخد درس ؟
هى الاهالى دى مش بتسمع عن البلاوى الموجودة اليومين دول من تحرش و قرف
ده زنا المحارم منتشر يعنى الاولى اننا ناخد بالنا من الغريب و القريب

حسبنا الله و نعم الوكيل

ربنا يستر علينا و على بناتنا و اولادنا

MADO يقول...

Al salaam to all
Those both Situations were really bad and for the bad news they are not the only cases like that in Egypt and I don’t mean to make anyone feel bad, I just want to go over 2 important points.
First WE need seriously to change that idea of respect people and trust them because their job( always doctors and judges are good as example) we need to learn and teach kids whatever the job is the person has he still human being can be good or bad ALSO that apply for family members.

Second so what after feeling bad because of that news???
Some will feel bad? Some will try to do things to keep their kids and families safe? Some will forget it after minutes? And very few will TALK (only few will talk because that Is not politic issue and won’t make them famous and go to TV shows and for sure nobody will invite them at conference in Europe or USA to talk about a sick doctor or criminal teacher in Egypt) about those guys (the teacher and doctor) should be punished badly with some unhelpful talks about we never had that before and all that happen because are away from religion or because government is bad, and then???NOTHING yes ANYTHING.
For sure if someone dying our tears won’t help him, he needs some real help to can survive, right?
I should explain these point before I go further, always at any nation dead civilization period the law means way to punish people but that not the only use for law, the first and most important use of law is to make RULES to keep rights and belongs safe for everybody then if some will break the rule the punish will work(that the most important part in quraan,always rules first and later is the punishment but for most of people talk about Islam and they have no idea what they talking about they just talk about do and don’t do by using punishment method not talk about rules as it rules for better life)
I think the best thing we can do now is to stand for law to keep our kids safe with teacher and with doctors like (just my thoughts sure there are people have better ideas than mine)
Make law about man responsibility not to let women be with foreign man alone (I know that is the Islam but can we make it a life rules not just keep talking about how Muslim we are??) which mean women go to women doctor if she will to male doctor it’s the mean around her responsibility to go with her .we just talking about QUAMA isn’t that part of it??Or women rights in Islam are just topic for TV talk shows??( husband first if there isn’t here father if she doesn’t has one then her brother above 21 years if she hasn’t one should be women from mosque or church volunteer and go with her)
Make law says that if female or male under 21 years old has sex act against her or him or have been recorded in sexual act or has any sex offence from anyone it’s the parents responsibility ( father first and then mother) to let that female or male alone with someone in good condition to let the crime happen.

I think that will be good rules after that the punish come for who doesn’t follow the rules.
I apology for that is very long and in English but my excuse is I feel there are some good people visit these blog and then they will start to work on that or better than too.
P.s if anyone wants to attack me please save your energy and DO something for your nation.

Salam to all

بسنت صلاح الدين يقول...

بجد الواحد بقى مزهول من اللى بيحصل يعنى كنا الاول بلد الامان شوف بقينا دلوقتى ايه ،اكيد مش كل الناس بالصوره البشعه دى بس اغلبهم بقى كده للأسف،اتصدمت من الخبرين دول زى ماتصدمت من اخبار الام اللى عذبت بنتها حتى الموت و هى عندها 6 سنين بمساعده جوزها،وزى اللى خلعت اظافر بنتها ذات العامين هى و جوزها برضه و مش بس كده ساعدته على اغتصاب بنتها الكبيره تقريبا 13 سنه،انا مش عارفه ايه اللى بيحصل ده ،بس المهم دلوقتى فعلا اننا منثقش فى حد ابدا، ولادنا تبقى عينينا عليهم كمان الواحده اللى رايحه للدكتور لازم تاخد معاها حد حتى لو دكتور اسنان زى مانت قلت لأن كنت قريت على واقعه كده ان دكتور اسنان بيخدر المريضات و يعتدى عليهم يعنى حتى الاسنان متأمنش ليها اوى و تروح لوحدك،و اهم حاجه العقاب يبقى رادع حتى يصبحوا عبره لمن يعتبر،ربنا يرفع عننا الغمه دى

همسه يقول...

السلام عليكم
البوسيت مؤلم جدااااااااااا
نقول مرعب
صوره من زمن القبح والدمامه
حسبى الله ونعم الوكيل
مين
المتهم
مين المقصر
مين البريئ ومين الظالم
مي المدان
كلنا اصبحنا مدانين مع الاسف
ولا حول ولا قوة الا بالله
تحياتى

أمل حمدي يقول...

هذه حكايات آخر الزمان وما هو آت أصعب مما نتصور

ربنا يكفينا شز الدنيا ويحفظنا ويحفظ اولادنا واولاد المسلمين اللهم امين

تقديري

بعبعه يقول...

معلش يا عمرو هاقول حاجه لقوس قزح


يعنى ايه ما لهاش حد تروح معاه يا جميل ؟؟

مقطوعه يعنى خالص


طيب انا احيانا باتزنق فى دكتور الاسنان برضه ولما باروح هناك باقول للبنت الى بره ادخلي معايا من فضلك ولانى عارفاها كويس وبقالي 3 سنين باتردد على نفس الدكتور

والحقيقه الدكتور نفسه لما باكون لوحيد بيحرص على كده


هى كمان تقدر تطلب ده من الدكتور ان البنت ما تخرجش

وعادي ما تتحرجش ده مطلب عادي جدا

ولو الدكتور ما نفذوش تقدر تنسحب مش هايغصبها والناس قاعدين بره فى العياده


انا مش باقول ان الدكتور مش غلطان

لا ده زباله وعايز الحرق

انما انا لازم انشر الوعي الدينى والثقافي بين الناس عشان الضحيه ما تتكررش

يعنى لازم امشي فى الاتجاهين


شكرا ليكى يا قوس قزح

وشكرا لك يا عمرو

عطش الصبار يقول...

الحقيقه عماله ادور على الحروف قدامى مش شايفاها ايه الاجرام ده كلمه اجرام انحطاط لاتكفى ايه اللى حصل للناس فين الخوف من ربنا هو كل مجرم يعمل حاجه مش عارف ان الديان موجود
مش عارفه ااقول ايه غير حسبنا الله ونعم الوكيل فى هؤلاء المرضى
اليس هناك من سبيل
ما
الايستطيع خبراء التكنولوجيا يعملوا للناس برامج توعيه نعرف بيها اللى بيصوروا واللى بيسجلوا
هو الحقيقه مش عارفه الحل ايه اكيد فيه حل زى ما بندور على حل وعلاج لاانفلونزا الخنازير لازم يكون فيه وقايه من امثال هؤلاء الخنازير
ربنا يرحمنا ويعافينا ويسترها مع الجميع
على فكره عرفت من البوست ده ان احنا جيران ياعنى بلدى بين ابو كبير والزقازيق
تقبل تحياتى

غير معرف يقول...

I am not sure where you're getting your information, but good topic. I needs to spend some time learning more or understanding more. Thanks for great info I was looking for this information for my mission.

Here is my website; pay day loan