~SUN~ Pictures, Images and Photos

السبت، 29 أغسطس 2009

يا أنا يا أنتى يا دنيا

صباح الخير أعزائى المدونات و المدونين و كل سنه و أنتم بخير ..
بأشكر من كل قلبى اللى سألوا عليا أثناء فترة غيابى عن البلوجر .. بجد فيكم الخير و نعم الأبناء و البنات و الأخوه و الأخوات ربنا يبارك فيكم ..

و بجد أنا بأحبكم كلكمHeart Pictures, Images and Photos


الحمد لله أنا كويس و تمام و فى نعمه بس كنت محتاج شوية عزله أراجع فيها نفسى و حساباتى و أصحح مسارات شوية حاجات كده .. و لله الحمد عدت على خير و بهذه المناسبه اللى مش بتتكرر فى العمر كتير أحب أهديكم الحكمه دى :

Get this widget Track details eSnips Social DNA

ما علينا ..

أنا بقى فى فترة العزله اللى فاتت دى فضلت أفكر و أفكر .. و أقلب دماغى و أفكر .. و أجيب القديم و الجديد و أفكر .. و تعالى يا فناجين القهوه أنتى و لوازمك ربنا يتوب علينا منها و روحى يا مجات النيسكافيه البلاك أنتى و لوازمك و أنا برضو بأفكر .. و رايح جاى فى صومعتى و أنا محتار حيرة البلجيكى :




felix animated gif Pictures, Images and Photos


و بأتأمل فى أحوال الحياه و الناس و عاوز أوصل لحاجه تصالحنى على الدنيا اللى كل ما الواحد يفتكر أنها زهزهت و أحلوت تطلع برضو زى ما هى و عمرها مابتدى كل حاجه ..

ما علينا ..

بعد بقى تفكير عميق و تقليب للأمور على مختلف الوجوه و تدوير و بحث و تمحيص فى دفاترى القديمه لاقيت شوية حاجات كده كنت بدأت فيهم من فتره و مكملتهمش لأسباب يطول شرحها ..و لاقيت فكره كنت مخطط لها على الورق بالأحرف الأولى وجدتها حاليا جديره بكل اٍهتمام و رعايه ..

بسسسسسس

هى دى ..

هى دى اللى أنا مسكت فيها و بدأت فى تنفيذها بالفعل بخطوات عمليه و سريعه لكى تخرج للنور ..

نويت خير و النيه على المولى باٍذن الله اٍنشاء و اٍشهار مؤسسه خيرية أتكفل من فضل الله بكل مصاريف تأسيسها و اٍشهارها و توفير مقر مناسب لها ..

بالذمه مش فكره كويسه ؟؟

مش لما تبقى مؤسسه و حاجه رسميه و لها غطاء و كيان قانونى مش أحسن من الطريقه اللى بنعملها دلوقتى اللى بتشوبها أشياء كتيره من اللخبطه و عدم التنظيم بل و نقص العداله فى أحيان كثيره ؟؟

مش كده أحسن من تشتيت جهود و تركيز الكثير من الناس اللى بيحبوا مجال العمل الخيرى و الاٍجتماعى و توفير غطاء شرعى و قانونى لكل من يريد أن ينضم لكتيبة العمل الخيرى المبارك باٍذن الله تعالى خاصة أننا داخلين على مرحله يعنى الله وحده أعلم بكيف ستكون صعوبتها على الناس .. يعنى الكلام و الخطب الرنانه لا حتأكلهم و حتشربهم و لا حتكسيهم و لا حتوفر لهم تمن العلاج

Short Singer (animated) Pictures, Images and Photos

دلوقتى فيه نقطتين مهمين عاوز آخد رأيكم فيهم ..

النقطه الأولى هى أسماء الأعضاء المؤسسين للمؤسسه .. بجانب اٍسمى فأنا تكلمت مع أختين فاضلتين من المدونات المعروف عنهم حبهم لعمل الخير و نشاطهم و رجاحة عقلهم و قد تكرموا مشكورين بالموافقه على أن تكون أسمائهم من ضمن ال 10 أسماء المطلوبه لتأسيس و اٍشهار المؤسسه كما أخبرنى بذلك المحامى اللى بيتولى الموضوع .. و بأطلب من حضراتكم اللى يحب يتقدم باٍسمه يتفضل يراسلنى على الاٍميل amrbadr70@yahoo.com و سيتم اٍختيار 6 أسماء فقط ..

علما و ده شىء مهم برضو و يلزم التنويه عنه اٍن العمل فى المؤسسه خيرى و تطوعى و لا يوجد أى عائد مادى للعمل فيها بالنسبة للمؤسسين و لأعضاء مجلس الاٍدارة و للشباب اللى حيعملوا فى الحقل الميدانى اٍن شاء الله ..

النقطه التانيه هى أنى بأجهز حاليا قائمه بأهداف المؤسسه و أنواع نشاطتها للتقدم بها لجهة أمنية لأخذ الموافقات الأمنيه المطلوبه كما هو متبع يعنى ..

و الحقيقه فيه عندى اٍتجاهين فى هذه النقطه و محتار فيهم و عاوزكم لو تسمحوا تساعدونى في اٍختيار أحدهما ..

الاٍتجاه الأول أن تكون المؤسسه مختصه بنشاط واحد معين زى مثلا يعنى رعاية أبناء الشوارع اللى هم فى اٍحصائيه تعدوا المليون طفل و طفله و بيتعرضوا لأشنع الممارسات و فى أمس الحاجه لمن يأخذ بيدهم ..

أو زى مثلا مساعدة المقبلين على الزواج و اللى زواجاتهم قد تعطلت بسبب ضيق ذات اليد و هم فى أشد الحاجه برضو لمساعدتهم حتى يعفوا و يصانوا و يبعدوا عن الحرام ( مثلا يعنى ) ..

ده اٍتجاه ..

الاٍتجاه التانى أن يكون نشاط المؤسسه شامل و متعدد الغايات و ده برضو شىء كويس بس أخشى أنه يشتت التركيز و يبقى من كل فيلم أغنيه و لا نصل للهدف النهائى اللى بننشده ..

أيه رأيكم ؟؟

يا ريت اللى يعرض وجهة نظره تكون محدده و واضحه و بأسلوب سهل علشان أقدر أفهمه لو سمحتم ..

ربنا يقوينا و يساعدنا و يسهل لنا الأمور كلها فى هذه الدنيا العبثيه الصعبه أم دم يلطش و يجعلنا ممن يسارعون اٍلى الخيرات ببركة فيوضات الشهر الكريم الملىء بالرحمات و الغفران و مش زى ما بيقولوا عندينا فى البلد : رمضان 10 مرق و 10 حلق و 10 خرق ..

كل سنه و حضراتكم طيبين ..

هناك 75 تعليقًا:

فشكووول يقول...

يا سلام ما فيش تعليقات ويمكن اكون اول تعليق

فشكووول يقول...

آآآآه يا خساره فيه رقابه على التعليقات وتلاقينى عاشر ولا العشرين ... ما علينا

بالنسبه للمؤسسه ... انا اؤيد ان يكون نشاطها محصورا فى اتجاه واحد لتركيز الخدمه حتى لا تتشتت الجهود وتتوه اما لو كانت فى مجال واحد فانها تكون احسن وافيد وطبعا انا معاك

تحياتى

فشكووول يقول...

اللهم صلى على حضرة النبى دا انا طلعت اول تعليق فعلا ... الله الله الله عليك يا استاذ عمرو باشا

فشكووول يقول...

على فكره انا قاعد مستنى التعليقات بتاعتى تظهر ومش ح امشى الا لما اشوفها

فشكووول يقول...

فين التعليقات يا عمرو بك انا قاعد وانت اللى خسران عمال اشرب قهوه وشاى على حسابك

فشكووول يقول...

طب ما دام انت قاعد بقى علىالنت ما فيش كلمتين حلوين من عندك .. انا قاعد

فشكووول يقول...

يا متر ... الحساب على عمرو بك انا ماشى بقى سلامو عليكم

عمرو يقول...

منورنا يا أستاذنا الفاضل و الله ده شرف كبير ليا و للمدونه ..
يعنى حضرتك شايف اٍن يكون مجال نشاط المؤسسه فى فرع واحد فقط و ده رأيى برضو ..
طيب ممكن حضرتك تقترح اٍتجاه معين لعمل المؤسسه ؟؟
فيه تعليق تانى من حضرتك وصل أهو لما أروح أشوفه ..

عمرو يقول...

با فندم المحل و صاحب المحل تحت أمر معاليك :)

فشكووول يقول...

مؤكد يا عمرو بك فيه اقتراح ...

بس خلينى افكر شويه وبكره ارد عليك واكون كونت فكره عن الموضوع ... يعنى هى جمعيه خيريه للخدمه العامه ... لخدمة الناس الغلابه او الناس المحتاجين الى اى احتياج سواء مادى او ادبى او معنوى او ما الى ذلك ... افكر وبعدين بكره ان شاء الله لما الفكره تختمر ارد عليك

تحياتى

شمس النهار يقول...

مساء الخير نورت مدونتك تاني يالورد
حمد الله علي السلامه
والعوده قويه
ربنا يوفقك
الموضوع جميل جدا وان شاء الله نتناقش فيه اكتر علي التليفون
حيث المجال اكبر للنقاش
ياريت كل الناس تفكر كده
رمضان كريم

Kiara يقول...

اشطه

بصراحه فكرة لو اتنفذت بحذافيرها الله الله هتكون كويسه جدا

انا رايي موضوع اطفال الشوارع لسبب ان دول النشئ وهما المستقبل وهما اللي هيعلوا البلد او يوطوها فلو لاقو حياه مكرمه وهاديه وتعليم وعلاج وكل الاحتياجات اكيد هيطلعوا احسن من وهما في الشارع وطبعا انا معاكم باي مسمي

في حاجه ايه رايك نخلي كل اسبوعين او تلات اسابيع زياره جماعيه مثلا لفئه معينه محتاجه الاهتمام بمعني
المسنين
الايتام
المرضي
ذوي الاحتياجات الخاصة
ويبقي كدا مش مشتتين وبنخدم الجميع

اما موضوع المقبلين علي الزواج بصراحه شايفه ناس اهم منهم هما ممكن يستحملوا شويه لكن الطفل مينفعش يستحمل هما طريقين يا يطلع كويس وانسان نافع لدينه وبلده يا يطلع معاه سكينه ولا مطوه والبانجو في جيبه وبيقول ايه ياه عاوز ايه

الموضوع محتاج دراسة متانيه بس مش من بتاعه الحكومه ☺

♥نبع الغرام♥♪≈ يقول...

السلام عليكم

انا جايا اطمن عليك واسلم عليك يا استاذنا الفاضل
ربنا يبارك فى حضرتك

ورمضان كريم وحمدالله على السلامه

الموضوع كويس بس محتاج شوية تفكير منى ومن غيرى

جزاك الله كل الخيرات
وجعل ما تقدم بميزان حسانتك
مودتى

ايناس

الجواز و سنينه يقول...

الله عليك يا استاذ استاذ جدا
و لا اعلان افيو فى زمانه
فكره هايله و الله
انا فكرت فيها و بحدثتها و محصتها مع واحده صاحبتى عامله جمعيه هيه كمان بس فى محافظه تانيه
ربنا يوفقك فيها و يجعله فى ميزان حسناتك
طيب صحيح انا قلبت المدونه رأسا على عقب موش لقيت الميل ؟ و لا العدسات مخيمه و العتب على النظر

د. ياسر عمر عبد الفتاح يقول...

والله فكرة رائعة
وربنا يوفق حضرتك فيها
دي هيبقي فيها ثواب كثير إن شاء الله (أنا مبحسدش .. أنا بقر بس)

بجد ربنا يوفقك
ولولا إني من الصعيد ,, ومش عارف ظروف وقتي
كنت قلت لحضرتك إني معاك
بس أنا معاكم بدعائي إن شاء الله
وكمان هشجعكم
بس تبقوا قولولي الماتش إمتي علشان أجي اشجع :)

داليا ..قوس قزح يقول...

صباح الخير يا عمرو
فكرة جميلة جدا و ربنا يوفقك فيها يا رب و تقدر تعمل من خلالها حاجة تساعد الناس
و انا من رائى انك فى الاول تبدا بحاجة واحدة و لما الجمعية تقف على رجلها و يكون فيها مشاركين كتير ممكن وقتها تفتح فى حاجات تانية

اما عن النشاط ففى حاجات كتير
بس النشاط اللى لاحظت انه مش موجود فى اى جمعية .. هو متابعة الاطفال المرضى بعد خروجهم من المستشفى و يمكن ده سبب رجوعهم تانى لانهم للاسف معهمش تمن الدوا فى فترة العلاج
اطفال الشوارع محتاجين ناس متخصصة اكتر علشان يعرفوا يتعاملوا معهم و يعرفوا ازاى يروضوهم و ده شوفته بعينى من خلال لقاء المدونين باطفال العشوائيات .. الاطفال زعلوا من كلمات قالها المدونين و هم مش فى بالهم

المهم
نفسى تيجى يوم السبت الجاى و تشوف بعينك الاطفال المرضى حالتهم ازاى

غير معرف يقول...

حمد الله ع السلامه يا استاذ عمرو

انا شايفه ان نشاط الجمعيه يقتصر على مجال واحد

ومجال رعايه اطفال الشوارع يكون افضل

لان كده انت جمعيتك هتراعي اولا اطفال تقريبا يتامى ..... فقراء .... محتاجين ..... وممكن تساعد منهم اللي عايز يتجوز .... او يشتغل .... او يتعلم

بمعنى انك هتكون حققت نظريه الجمعيه الموحده النشاط .... ومتعدده اوجه المساعده برضه

جازاك الله خيرا

غير معرف يقول...

الاخ الفاضل استاذ عمرو
اولا كل عام وانت بالف خير
ثانيا من كل قلبى اهنيك على الفكرة
التى وصلت اليها وربنا يجعلها فى ميزان
حسناتك واقول مبدئيا نجعل هدف المؤسسة
الخيرية قائم على اتجاه واحد وليكن
اطفال الشوارع وطبعا ده عاوز خبرات وثقافات ولكن طالما النية خالصة فالله هو
الموفق
وباذن الله لما الامور تمشى اكيد ساعتهاسيتم اضافة محتوى اخر وهو
تجهيز العرايس وده من اكبر ابواب
الخير بس انا عايزة اقول لحضرتك
ان لازم تقعد مع ناس لهم تجربة
فى امر العمل الخيرى وتستفيد من تجربتهم
ولو حضرتك عاوز اسم جمعية معينة
تفيدك بالامر انا ممكن اساعدك
تمنيت لو كان الامر بالاسكندرية
بس باذن الله مع مرور الايام حتكون
لكم فروع كثيرة ولاتتعجب
احنا كنا ثلاثة اشخاص وكانت صديقة بتتكلم انها نفسها تعمل هذا الامر
وبعد مرور اقل من عام تم التنفيذ
والان وبعد فترة مش كبيرة برضه
فيه فرع فى القاهرة
طالما النية خالصة ربنا سييسر الامور
وسنكون معك بقلوبنا او اى شء يطلب
مننا سنقوم بالتنفيذ على الفور
استاذ عمرو احييك
وربنا يكرمك

ليس فقيرا من يحب يقول...

السلام عليكم

كل سنه وحضرتك طيب يا استاذنا

فكرة جميله ربنا يجازيك عليها

خير ويوفقك يارب

انا رأيى ان فى البدايه كده الجمعيه

تركز على نشاط واحد وان شاء الله

لما الجمعيه تتوسع وتزيد المشاركات

يبقى نشاط الجمعيه يتوسع ويشمل انشطه كتير

كل سنه وحضرتك طيب

أحــوال الهـوي يقول...

جزاك الله خيرا و اثابك الله علي سغيك و تنفيذك
ثانيا حمد الله علي السلامة و كان لي الشرف اني اقابل شخصك الطيب العطوف و اللقا نصيب
ثالثا وددت ان يكون لي نصيب في سعيك و اعتقد ان من امنياتي ان اساهم بمثل هذا العمل و اكون من المؤسسين او ما تراه مناسبا لقيامي بدور فعال بهذا الصرح و اعتبرني من جنودك المخلصين

و اخيرا اقتراح بفكرة قد استقيتها من استاذنا الدكتورمصطفي محمود و نشاط جمعيته
و الهدف منها صدقة جاريه

لا تعطني سمكه و لكن علمني كيف اصطاد سمكه

كما تعرف ان الموارد التي قد تخدم مشروعك مهما بلغت محدودة و بالتالي عدد من سوف تخدمهم ايضا سيصبح محدود
الفكرة يا صديقي هي القرض الحسن الميسر
التكفل بمشروع لاسرة الفقير يدر عليه ربحا شهريا يعينه علي المعيشه و يسدد منه القرض علي اقساط معقولة و بالتالي يعود راس المال بعد فترة يفيد بها غيره و هكذا
هذا عنوان الفكرة و اذا تكرمت بمناقشة التفاصيل لو راقت لك الفكرة فنا تحت امرك و كما اسلفت قبلا اعتبرني جندي مخلص في كتيبتك

تحياتي

ستيتة يقول...

السلام عليكم يا عمرو باشا
اتأخرت لظروف خارجة عن ارادتي
مؤكد يوم السبت ان شاء الله ها نتكلم بطريقة انفع كتير من الكتابة
السؤال المهم
لو اشهار الجمعية يستلزم فورا وضع النشاط قبل الإشهار فياريت حضرتك تخلي المجال مفتوح شوية علشان لا نلجأ مرة اخرى للف على الموظفين لتوسيع النشاط
يعني يكون المجال عام "كفالة ايتام - مساعدة اطفال شوارع - زواج غير قادرين - مساعدة طلبة على اكمال تعليمهم سواء مساعدة مادية او عينية"

لكن لو الإشهار مفيهوش مشكلة اننا نتوسع براحتنا من مجال لمجال حسب تيسير ربنا لنا يبقى اوك


طبعا واضح من تعليقي اني منمتش بقالي يومين ومؤكد بعد النوم وده بعد كمان 24 ساعة ها اتكلم احسن كتير

ربنا يثيبك كل الخير يارب دنيا وآخرة على الفكرة اللي محتاجينها قوي في مجتمعنا
وربنا يعينا جميعا

بستئذنك لأني برضه ها أعمل اعلان في مدونتي

تحياتي

mimi يقول...

بارك الله فيك

ربنا يجعله في ميزان حسناتك

ياتري اللي عاوز يتطوع معاكم يعمل إيه؟

وإيه هيبقي مطلوب من أعضاء مجلس الإدارة؟

هل التواجد الدائم؟ أم الاشراف أم ماذا؟

برجاء التوضيح

mimi يقول...

أول الغيث قطرة

تذكر هذا دائما

تحياتي

حاسوباتيه يقول...

كل سنه وحضرتك طيب وبالف خير يارب والفكره اكيد رائعه فعلا كان نفسي اكون فيها

واكيد هي فكره رائعه بالنسبه لنشاط المؤسسه افتكر يعني يكون محدد الاول وبعدين ممكن يحصل توسع بحيث انها تبدا صغيره وتكبر بمشيئه لله وطبعا حضرتك لك القرار وجزاكم الله خير كل من هيساهم فيها


سؤال بقى معلش ايه معناها الجمله دي
رمضان 10 مرق و 10 حلق و 10 خرق ..

ولا فاهمه ولا كلمه فيها ياريت حضرتك توضحها وترجمها لان بجد مش فهماها خالص

رحلتنا في الحياة يقول...

جزاك الله خيرا يااستاذ عمرو على الفكرة وربنا يجعلها فى ميزان حسناتك وميزان حسنات الناس كلها اللى هتشارك باذن الله
كان نفسى اكون معاكم بس للاسف انا من بلد اخر الدنيا حاجة تخنق صحيح فعلا عرفت دلوقتى الصعيد العيشة فيه تقصر العمر ليه لان الانسان مش لاقى حاجة يقدر يفيد بيها ولا قادر يتواصل مع العالم اللى حواليه

Unknown يقول...

السلام عليكم ورحمة
الله تعالى وبركاته
جزاك الله خيراً لمـــــا
فيه خير دينك ودنياك.
من اقتراحاتى بعد اذنك
أستاذ عمرو :سداد الدين
وخاصة ربات البيوت والشباب
منهم. كتير بيستلفوا لاجل اشياء
ضرورية فى حياتهم كتزويج البنات
ونحو ذلك.

Unknown يقول...

بس هو ايه لوازم القهوة
والنيسكافيـــــــــــة؟:)
هل انت مدخــــــــــــــــن؟:(

عاشقه وغلبانه يقول...

هو النسكافيه البلاك بيعمل معاك كده
اومال انا طول الليل بشربه ومش بوصل لنص افكارك دي ليه...؟؟
عموما الفكره محترمه وتستحق التحيه
نظرا لاني مش قاهريه ومش باجي القاهره اصلا ماعتقدش اني اقدر اكون قد المسؤليه
بس انا مستنيه اي مهمه تكلفني بيها وتكون في حدود اقامتي وانا احاول انفذ ان شاء رب العالمين

توتة المخنوقة يقول...

كل سنه وحضرتك طيب

وربنا يجزيك عن العمل ده خير انشاء اللة

انا رايى ان الفكره دى لو اتنفذت هتبقى خير كتير اوى لناس فعلا محتاجين

انا شايفه اننا نركز فى اتجاه واحد الاول وليكن اطفال الشوارع والاهتمام بيهم لغاية لما الجمعية تقف على رجلها وبعد كدة نتوسع فى الانشطة والفروع كمان انشاء اللة


وانا معاكم انشاء الله وربنا يتقبل مننا صالح اعمالنا انشاء اللة

فشكووول يقول...

والله يا عمرو بك ما وصلت لحل ..
الاطفال الايتام ولا اولاد الشوارع ولا المسنين ...

بصراحه انا خايف من اطفال الشوارع دا بحر غويط وقراره بعيد وعايز امكانيات كبيره وعايز نفس طويل عشان فيه كلاكيع كتير والجمعيه لو اشتغلت فيه صعب تقنع الاطفال دول بانهم يعودوا الى جادة الحياه لان مخهم بيكون تم تركيبه تطريقه تجعله يحاول ان يضحك على ما امامه او ان ينصب عليه او يضحك عليه ... لكن ممكن لو امكانيات الجمعيه كبيره ... برضه مش عارف افكر كويس

الازهرى يقول...

والله الفكره جميله وبإذن الله أنا معاك فيها
أعاننا الله وإياك على الخير دوما
لكن فى رأيي يبقى النشاط مساعد الأيتام والشباب المتعسرين فى أمور الزواج
لإنهم أصدق فئتين محتاجين هيكون فى أثر واضح من إعانتهم على أمور الحياه
وكمان بيبقى الموضوع عندهم احتياج حقيقى
لان الموضوع بيبقى معروف وبيكون فى شبه استحياء منه وبكده يبقى اى حد بيقدم محتاج حقيقي

إنما أطفال الشوارع فموضوعهم كبير وشبه هلامى وصعب يتم حصره
وكمان ابعد عن مساعدة الطلاب لانى عاصرت بنفسى ناس ربنا كارمهم وعندهم مايغنيهم ويفيض ولكن يصرون على أخذ ما ليس من حقهم وتجد عندهم الأوراق اللازمه لذلك
وبذلك لن تستطيع التفريق بين من يحتاج حقا ومن يدعى

من غير عنـــوان يقول...

عمرو الحكيم
كل عام وأنتم بخير

ورمضان كريم
وعمل الخير في رمضان بعشر أمثال الثواب

أثابكم الله كل خير

لو سـُمح لي بأبداء الرأي سأقول:

أنا أفضل دائما الجماعة ويد الله معها دائما

أتخيل أنه من الأفضل أن تطلب ( حاجه كده زي فرانشيز ) من مؤسسة مصر للخير أو جمعية رساله

وتوفر إنت المكان والمتطوعين

وبكده تستفيد من إمكانيات الجمعيات الأساسيه .. ونقوي التبرعات.. ونكبر كلنا

لأن في الحقيقة أنا بأتخيل إن المتبرع بيحتار من كتر الأماكن

وأخيرا
هو كله خير
استخير وعلى بركة الله

أمنياتي

عاشقه الرومانسيه يقول...

كل سنه وحضرتك بخير
وربنا يجعل الفكره فى ميزان حسناتك يارب
انت وكل القائمين عليها
كان نفسى اشارك معاكم بس انا فى اسكندريه واكيد الجمعيه مقرها هيكون فى القاهره
قولى ازاى اقدر اساعد
وان شاء الله مشروع الجمعيه ده يكبر ويكون له فروع فى كل المحافظات
واهى كلها تجاره مع ربنا
(:
خالص تمنياتى بالتوفيق

أبو كريم يقول...

اولا السلام عليكم

انا راى ان النشاط لازم يكون محدد عشان ما تتشتتوش


وشكرا ورمضان كريم

بسنت صلاح الدين يقول...

اولا احب اقولك بارك الله فيك و جعله فى ميزان حسناتك ،ثانيا انا رأى يتفق مع بعض الزملاء هنا وهو ان الافضل ان تتخصص الجمعيه فى نشاط بعينه عشان التركيز يكون افضل ،اما الاختصاص و رغم ان الاتجاهين اللى عرضتهم افضل من بعض ،لكن متهايألى و الله المستعان ان اطفال الشوارع اولى ان ننقذهم من الضياع لأن غير انهم مستقبل مصر فأنك بذلك هاتقلل من مستوى الجرائم اللى بتحصل فى الشوارع كل يوم،و لى عندك رجاء ان شاء الله لما ربنا يتم نعمته عليك بإنشاء الجمعيه ان تسمح لى بالأنضمام للمساعده لوجه الله
جزاك الله كل خير و استخدمك فى نصره دينه

Remas يقول...

استاذ عمرو عودا حميدا

نورت مدونتك والبلوجر كله


جزاك الله كل خير على فكرتك الرائعة

وفعلا التركيز في جانب واحد افضل بس اطفال الشوارع دا موضوع صعب جدا

على فكره يا استاذ عمرو في سيدات ارامل او مطلقات وعندهم اطفال وفعلا محتاجين للمساعدة جدا وانا شفت كدا كتير ياريت فعلا لو نقدر نساعد ناس زى كدا

وانا معاكم وعاوزه اساعد باى طريقة تشوفوها

كل سنة وحضرتك طيب يا استاذ عمرو ورمضان كريم

غير معرف يقول...

جميل جدا وفكرة رائعة
وانا والله نفسي من مدة اشترك في جميع خيرية

وكان نفسي اروح رسالة بس يلا حصل خير
وانا تحت امرك ومنتظرين الجديد باذن الله

عمرو يقول...

كيارا
أشكرك للمشاركه يا كيارا ..
بس موضوع أطفال الشوارع ده موضوع كبير أوى أوى كما أتضح لى من المناقشات مع ذوى الخبره لأنه متصل بجوانب كثيره و اٍحنا لسه اٍمكانياتنا على قدها ..
بالنسبه للزيارات الجماعيه للفئات المعينه فدى فكره ممتازه جدا و بأرحب بها ..
و معاكى برضو فى أن موضوع المقبلين على الزواج ممكن يستنوا لكن الطفل المريض المنتظر دواء لعلاجه مش ممكن حيستنى .. أنتى صح ..
متشكر ليكى جدا و لسه باب المناقشات مفتوح ..

عمرو يقول...

عاشقة الأحزان
و عليكم السلام و رحمة الله
متشكر ليكى جدا و الله أكرم ..
فكروا براحتكم و أنا مستنى أسمع كل المقترحات من مختلف الاٍتجاهات و ده حيفيد الموضوع جدا ..
متشكر ليكى و أهلا و سهلا ..

عمرو يقول...

الجواز و سنينه
متشكر ليكى جدا ..
أنا حطيت الاٍميل فى البوست يعنى اٍطمنى العدسات مش مغيمه و لا حاجه أنا اللى كانت ناسى أحط الاٍيميل :)
متشكر ليكى و نورتى ..

عمرو يقول...

د. ياسر عمر عبد الفتاح
متشكر جدا لمشاعرك الطيبه و برضو اٍن شاء الله ممكن تشارك معانا رغم بعدك المسافى عن القاهره ..
و اٍن شاء الله عن قريب أول ما يبدأ ماتش العمل الخيرى حنبلغك على طول :)
تحياتى

عمرو يقول...

قوس قزح
بارك الله فيكى و فى مجهوداتك الضخمه لعمل الخير .. اٍن شاء الله ربنا حيكتب لك ثواب كبير ..
فكرة متابعة الأطفال المرضى بعد خروجهم من المستشفيات فكره جيده و ممتازه و لعلها من أهم الخطوات العمليه لرفع المعاناه عن الأطفال و أهلهم بل و المستشفيات نفسها ..
أيوه فعلا موضوع مراعاة أطفال الشوارع موضوع كبير و محتاج ناس متخصصين فيه ..
متشكر ليكى جدا و نورتى ..

عمرو يقول...

فتاه من الصعيد
أنا موافقك فى وجهة نظرك ..
بس لما تدرسى الموضوع بتاع أطفال الشوارع بشىء من الدقه حتلاقى أن فعلا كلام قوس قزح منطقى و صح ..
أطفال الشوارع محتاجين معامله خاصه لا تتوفر غير عند المتخصصين و ده صعب توافره فى المؤسسه فى الوقت الحالى ..
لكن فكرة مراعاة الأطفال المرضى بعد خروجهم من المستشفيات ممكن تحقق نسبه كبيره من الأهداف اللى تكلمتى عنها ..
و عموما لسه برضو باب المناقشه مفتوح بس المهم أن فئة الأطفال غالبا حتبقى من أولويات الاٍهتمامات فى المؤسسه ..
بأشكرك و أهلا و سهلا بيكى ..

عمرو يقول...

أم مالك
كل سنه و حضرتك طيبه و بارك الله فيكى
أطفال الشوارع ده موضوع كبير أوى يا أم مالك كما أتضح لى و يحتاج لاٍمكانيات كبيره مش متوفره حاليا لدينا ..
لكن ممكن فى المستقبل اٍن شاء الله ندخل هذا المجال ..
المساعده على الزواج طبعا من أكثر الأشياء اللى بيثاب عليها المرء و غالبا سيكون ده تانى نشاط من نشاطات المؤسسه ..
أنا بالفعل أقابل يوميا ساده أفاضل من أصحاب دور الرعايه و الجمعيات الخيريه أصحاب خبره طويله فى هذا المجال و أتناقش معهم و أفهم منهم كيف تسير الأمور بجانب طبعا خبرتى الشخصيه الخاصه فى العمل الاٍجتماعى و أكيد ما خاب من أستشار ..
و اٍن شاء الله لو أحتجنا لأى شىء فأكيد سأطلب المشوره من حضرتك ..
بارك الله فيكى و أهلا بيكى و سهلا ..

عمرو يقول...

ليس فقيرا من يحب
و عليكم السلام و رحمة الله و بركاته
كل سنه و أنتى طيبه و بصحه و خير و سرور ..
كلامك صح و موافقك عليه ..
البدايه تكون بنشاط واحد أو اٍثنين و بمرور الوقت تتعدد الأنشطه ..
و أنتى طيبه و متشكر ليكى ..

عمرو يقول...

أحوال الهوى
الله يسلمك و اللقا نصيب فعلا بس من القلب للقلب رسول يا صديقى ..
و الله يشرفنى يا صديقى الطيب أن نتعاون جميعا فى عمل الخير و ربنا يوفق اٍن شاء الله ..
فكرة القرض الميسر لعمل مشروع صغير فكره ممتازه و أعرف ناس بالفعل عملوها و نجحوا فيها و أصبح لهم دخل لابأس به من أرباح المشاريع دى ..
لكن يتهيألى اٍن الظروف تغيرت و اٍن المشاريع الصغيره دلوقتى بتفشل و أصحابها بيضطروا ياخدوا من رأسمال المشروع ليقدروا على مواجهة أعباء الحياه اللى بقت صعبه للغايه و بالتالى المشروع بيقع خاصة أنه أصلا مشروع صغير و اٍمكانياته ضعيفه ..
مش عارف ..
أنت أيه رأيك ؟؟
تحياتى و مودتى و أشكرك على روحك الطيبه ..

عمرو يقول...

ستيته حسب الله الحمش
أشكرك لاٍهتمامك بالموضوع بارك الله فى حضرتك ..
أيوه فعلا اٍشهار الجمعيه أو المؤسسه بيستلزم موافاقات الجهات الأمنيه اللى بتشترط وضع أهداف و نشاطات محدده قبل الموافقه عليها ..
ممكن نتوسع فى النشاطات زى ما نحب لكن سنكون مطالبين بتقديم ما يفيد وجود مقر للجمعيه يتلائم مع كم و نوعية النشاطات اللى ستتم الموافقه عليها ..
و حاليا المقر المتوافر عندى شقه لا بأس بها و لكن لا أعتقد أنها ستكون ملائمه لأكثر من نشاطين أو 3 على الأكتر ..
ده غير تدخل الوزاره فى نوعية النشاطات بما يتلائم جغرافيا مع اٍحتياج المنطقه أو المحافظه ككل ..
فبعنى هو ممكن الاٍشهار حاليا كخطوه مبدئيه بنشاطين أو 3 على الأكثر ثم نتوسع فيما بعد ..
أما اللف بقى على الموظفين فدى شغلانه ليها ناسها ..
متشكر لحضرتك و أهلا و سهلا بيكى ..

عمرو يقول...

mimi
بارك الله فيكى و متشكر جدا ..
و الله اللى عاوز يتطوع للعمل الخيرى مش حيعمل أكتر من أنه ينضم للجمعيه اٍن شاء الله و يصبح عضو نشط و فعال و لابد أنه يكون أصلا محب للعمل الاٍجتماعى و الخيرى و ده و لله الحمد متوفر لدى الأكثريه من الناس و لكن الحكايه محتاجه شوية تنظيم ..
بالنسبه لمجلس الاٍداره فالقانون نص على أن مجلس الاٍداره بيكون من الأعضاء المنتخبين من الجمعيه العموميه و يكون عددهم فردى من 5 ل 15 على حسب اللائحه الداخليه للجمعيه ..
بس أول تعيين لمجلس الاٍداره بيكون عن طريق الأعضاء المؤسسين لمده 3 سنوات ..
مجلس الاٍداره بينعقد مره كل 3 شهور على الأقل و بيتولى اٍدارة شئونها و الاٍطلاع على القرارات الخاصه بالجمعيه و تبليغها للجهات المختصه خلال 30 يوم من تاريخ صدورها ..
يعنى مش مطلوب التواجد الدائم و لكن المتابعه الدائمه بأى وسيله ..
شكرا ليكى و أهلا و سهلا بيكى ..

مطلق يقول...

عمرو باشا انا معاك و تحت امرك في اي حاجه

و لاني حاليا بتكلم من مكان سري عشان غالبا حتنش حكم من الست ام طعمه قريب اوي فياريت تكلمني علي الميل او موبايلي الي موجود في البلوج بتاعي

عمرو يقول...

شمس النهار
سمو البرنسيس :)
يا أهلا و سهلا و عشرميت مرحبا البلوجر منور بيكى يا شمس البلوجرات كلها :)
متشكر جدا على التهنئه بعودتى ربنا يخليكى ..
فعلا الموضوع محتاج مناقشات و مداولات لا تنتهى و حأستنى مكالمتك و متشكر جدا على الكتاب اللى جبتيهوللى حقيقى ساعدنى كتير ..
دمتى لنا دايما بخير و سعاده و سرور و كل سنه و سموك بألف خير :)

شمس النهار يقول...

النور نورك يالورد:)
ونور الخير اللي انت بتعمله وهتعمله ان شاء الله
والحقيقه الكلام في الموضوع ده معاك كان مفيد جدا
وبرغم المكالمات اللي تمت بينا فيه
لسه في معلومات جديده جبتها وهقول لك عليها في التليفون ان شاء الله

ربنا يكرمك علي قد قلبك الطيب ياراجل ياطيب ويراضيك زي انت مابتراضي اللي حواليك كده

ياريت كل الناس زيك
كان كل فقير اخد حقه وماباقاش علي الارض محروم

وانا شايفه الناس في البلوجر كلهم متحمسين وبيساعدوا
وعايزه اقول للناس الجميله دي اللي عايزه تشارك من المحافظات ان شاء الله بعد اذن عمرو
ممكن يدوروا علي الحالات المحتاجه في محيطهم واللي يكونوا فعلا كده
والجمعيه تبعت لهم حوالات بالمساعدات الماديه وهمه يوزعوها عليهم

شفت ياعمرو انت فتحت باب خير كبير ازاي

ربنا يكرمك ويجعله في ميزان حسناتك
:)

mahasen saber يقول...

ربنا يتقبل من حضرتك صالح العمال..

وحمدالله على السلامه
انا اسفه انى متابعتش غياب حضرتك عن المدونه لانى انا كمان مكنتش موجوده على المدونه

بالنسله للمؤسسه لو اتركز مجهودها ورعايتها فى اطفال الشوارع هيكون افضل بكتير لان حتى يكفى الاسم البائس ده الموصوميين بيه عشان نهتم بيهم
وطفل يعنى المستقبل فمينفعش نشوف نشأ بيكبر بلا رعايه ونبقا ساكتين ومنمدش ليه اى مساعده او عون

ربنا يتقبل من حضرتك ويوفقك المشروع ده بجد رائع بكل ما فى الكلمه من معنى

ربنا يوفقك دايما لكل خير

عمرو يقول...

حاسوباتيه
كل سنه و أنتى طيبه يا باشمهندسه و متشكر ليكى ..
فعلا مبدأ عدم التسرع هو من الأمور اللى بتناسبنى تماما و بأؤيدك فى رأيك ..
و اٍن شاء الله برضو تكونى معانا و تقدرى تشاركى و لو بمجهودك فى الجمعيه ..
بالنسبه للجمله اللى مش فاهماها : بعض الناس بيتعاملوا مع شهر رمضان على اٍن ال 10 أيام الأولى منه مخصصه للولائم و العزومات و المرق اللى هو الشوربه بيعبر عن كده ..
و ال 10 أيام الوسطانيين بينشغلوا فيهم بعمل الكحك اللى بيعملوه فى الريف غالبا على شكل حلق مستدير .. و أما ال10 أيام الأخرانيين فبتكون مخصصه لتجهيز ملابس العيد و الخرق و أحيانا بتتقال الخلق يعنى الملابس و الصعايده بيقولوها خلجات ..
أهلا و سهلا و نورتى و متشكر ليكى ..

عمرو يقول...

آيوشه
متشكر ليكى و جزاكى الله كل خير على شعورك الطيب ..
معلش لأنك بعيده عن القاهره - يا بختك - لكن برضو ممكن تتواصلى مع الجمعيه اٍن شاء الله و بعدين الصعيد فى حاجه هو أيضا لكل المجهودات لعمل الخير ..
ربنا يبارك لك و تقبلى تحياتى ..

عمرو يقول...

norahaty
و عليكم السلام و رحمة الله و بركاته
متشكر ليكى يا دكتوره و جزاكى الله خيرا بخير ..
و الله فكرتك كويسه برضو لأن الدين ثقيل على النفس و هو هم بالليل و ذل بالنهار ..
مساعدة المقبلين على الزواج برضو فكره بتراودنى من فتره و ثوابها كبير أوى أوى ..
لوازم القهوه و النيسكافيه هى السبرتايه و الكنكه و البويلر و المج و خللى الطابق مستور و اٍن شاء الله حأبطل اللوازم دى قريب جدا :)
متشكر و تقبلى تحياتى و تقديرى ..

عمرو يقول...

عاشقه و غلبانه
يبقى أكيد المشكله فى نوع النيسكافيه !!
متشكر لروحك المتعاونه و اٍن شاء الله ممكن فعلا تتعاونى مع الجمعيه فى حدود مكان اٍقامتك ..
بارك الله فيكى يا دكتوره و متشكر ليكى ..

الـسـيـدة نـون يقول...

اولا ازيك يا استاذ عمرو

ثانيا صورتك فى الحقيقة مختلفة عن صورتك فى البتاعة دى

فى الحقيقة انت شكلك اظرف
اما فى البتاعة دى شكلك راجل رخم


ثالثا

لما اقول راي بقى باستفاضة هنا

انا قلتلك مش موافقة

طبعا انت حر انك تعمل جمعية خيرية ربنا يجازيك خير

لكن انا مش معاك فى انك بتقول

مش لما تبقى مؤسسه و حاجه رسميه و لها غطاء و كيان قانونى مش أحسن من الطريقه اللى بنعملها دلوقتى اللى بتشوبها أشياء كتيره من اللخبطه و عدم التنظيم بل و نقص العداله فى أحيان كثيره ؟؟


انا مش معاك فى الكوبليه اللى فوق ده


اولا
بالنسبة لينا كمدونين
انا معجبة اكتر بهرجلتنا فى تنظيم عمل خيرى
معجبة بلغبطتنا ومعجبة باخطائنا اللى ممكن نقع فيها لما نيجى نجتمع على فعل خير


عارف يا استاذ عمرو
لما بنروح نتبرع بالدم
كذا مرة حد سالنى من هناك هو انتوا تبع جمعية رسالة؟
هو انتوا تبع معرفش ايه؟
هو انتوا مع بعض فى الجامعة؟
ولما اجاوب واقولهم لا احنا مجرد اصحاب
نظرة الفخر فى عيون اللى بيسالنى بتكون كبيرة
بيبلعنى بنظرة عنيه الجميلة اللى مليانة شكر وفخر بينا
نظرة استغرابه ودهشته لما يلاقينى بسلم على حد معرفهوش واول مرة اشوفه ومع ذلك الحد ده استجاب وجه علشان يتبرع بالدم


الجمعيات الخيرية
الطبيعى انها تعمل عمل خيرى
ده شء متوقع منها
فبالتالى اى مجموعة اشخاص بيعملوا عمل خيرى لما يتعرف انهم تبع جمهية خيرية
بيبقى نظرات الشكر عادية

لكن لما نروح اى مكان واحنا لا يجمعنا اى منشاة اجتماعية خيرية
وكل اللى جمعنا حب الخير
الناس بتفرح بينا اكتر

وانا بحب ده
انا بحب نظرة الفخر ونظرة الاعجاب ونظرة الشكر اللى من غير حدود فى عيون اللى قدامى

النظرة دى هتتخفض لنسبة خمسين فى المية لو انا بقيت تبع جمعية خيرية


طبعا دى وجهة نظرى انا
وده اللى انا بحس بيه

يعنى مش لازم الناس كلها تقتنع بكلامى



نيجى لنقطة تانية

علما و ده شىء مهم برضو و يلزم التنويه عنه اٍن العمل فى المؤسسه خيرى و تطوعى و لا يوجد أى عائد مادى للعمل فيها بالنسبة للمؤسسين و لأعضاء مجلس الاٍدارة و للشباب اللى حيعملوا فى الحقل الميدانى اٍن شاء الله ..

الكوبليه اللى فوق ده

حلو جدا

لكن
اللى يطوع فى عمل خيرى محتاج يكون انسان قادر ماديا
لان اقل مافيها لو مش هايدفع من جيبه علشان يعمل عمل خيرى
فهو محتاج يكون معاه يوميا فلوس المواصلات اللى تجيبه من بيته وتوديه المؤسسة الخيرية وترجعه تانى

ودى حاجة صعبة على شباب اليومين دول
الشباب عايزة تضيع وقتها فى مكان ياخدوا منه عائد مادى
مش هما يدفعوا من جيوبهم فلوس المواصلات

هما ممكن يتطوعوا يوم فى الاسبوع

لكن الناس اللى شاغلين مع حضرتك فى الادارة والسكرتارية والحاجات دى
لازم يكون ليهم مرتبات

مش كل حاجة هتبقى لله وللوطن كدة
حتى العمل الخيرى محتاج مصاريف يا استاذ عمرو
وحتى لو هما رفضوا ياخدوا مرتب
وبما انك هتكون مثلا المدير
لازم انت من نفسك تحدد مرتبات للناس اللى هتشتغل فى الادارة والسكرتارية

حتى فيه حديث شريف بيقولك
اعطى العامل اجره قبل ان يجف عرقه

اه ممكن تطلب متطوعين
لكن ان العاملين فى الجمعية اللى هايجوا كل يوم
ماياخدوش اجر
دى حاجة صعبة

لان لازم تفصل ما بين العمل الخيرى
والشغل العادى
فى اى شركة لازم يكون فيه مدير وواحد بتاع حسابات وواحد شؤون قانونية وسكرتارية وساعى وفراش
الناس دى بتطلب منها انها تشتغل من غير اجر؟
ازاى يعنى؟
متهيألى ماينفعش



انا كدة قلت وجهة نظرى

نيجى بقى لبرة الموضوع؟
هو انت ايه بالظبط؟
انت مين يعنى ؟

ليه مش موضح شغلتك ايه او ظروفك ايه؟
انت مدون من جهة امنية مثلا؟

وليه لما سالت عليك واحد قالى ان فيه ناس بتقول انه صحفى فى الدستور
بس لما سالناه هو ماردش

ماردتش ليه؟

ماتخليك صريح وقول انت مين بالظبط؟


سلام
اختك خيخة

عمرو يقول...

توتة المخنوقة
كل سنه و أنتى طيبه يا توتة و ربنا يجعله شهر مبارك على الجميع ..
متشكر ليكى للمشاركه بالرأى و لكن الحقيقه موضوع أطفال الشوارع ده اٍتضح أنه موضوع كبير و محتاج اٍمكانيات لسه مش متوفره فى الجمعيه لكن هو طبعا فى الخطه و ربنا المستعان ..
جزاكى الله كل خير على روح التعاون الطيبه اللى بتبديها و اٍن شاء الله لما يبدأ العمل فى الجمعيه أكيد سنحتاج لتعاون الجميع ..
تقبلى تحياتى و تقديرى ..

عمرو يقول...

فشكووول
أستاذنا الفاضل و الله أنا برضو أشاركك الراآ و أوافقك تماما أن موضوع أطفال الشوارع رغم جاذبيته و بريقه اٍلا أنه فعلا فيه كلاكيع كتير ..
خلينا نفكر على مهل و الحقيقه أن الصوره بدأت فعلا تتضح قدامى ..
أشكرك يا أستاذنا و لك كل التحيه و الموده ..

عمرو يقول...

الازهرى
أشكرك يا صديقى الفاضل على روحك الطيبه و حماسك و مشاعرك النبيله بارك الله فيك صحيح البركه بالشباب :)
رأيك صائب تماما بالنسبه لأطفال الشوارع و ده أتضح لى على أرض الواقع و من خلال كتير من التعليقات على الموضوع ..
فكرة مساعدة الأيتام و المتعثرين فى الزواج فكره كويسه أوى و أوافقك عليها و ياحبذا بقى لو الأيتام دول كمان يبقوا مرضى و مش قادرين يتحصلوا على تمن الدواء ..
و متشكر لك كمان على توضيح الصوره بالنسبه لمساعدة الطلاب ..
ربنا يقدم ما فيه الخير و تقبل تحياتى و تقديرى ..

عمرو يقول...

من غير عنوان
أخويا الفاضل أهلا و سهلا و مرحبا :)
كنت متأكد من أنك لن تفوت هذا البوست من غير ما تبدى رأيك اللى بأحترمه و بأقدره ..
طبعا العمل من خلال مؤسسه أو جمعيه كبيره لها اٍسمها فكره جيده جدا لأنها بتوفر الكتير من المشاق و الصعوبات المهوله خاصة فى اٍستخراج التراخيص و التصاريح و اٍجراءات الاٍشهار و ما اٍلى ذلك ..
الحقيقه يا أخى فيه حاجتين بيخلونى أسير قدما فى موضوع الجمعيه المستقله بذاتها ..
أولا رغبتى العارمه فى أن تكبر الجمعيه و تزدهر و يكون لها فروع و أعمال خيريه خاصه بها فيما بعد اٍن شاء الله و هو حلم راودنى كثيرا و وفقنى المولى فى قطع شوط كبير منه ..
الأمر التانى أن هذه المؤسسات الكبيره بتفرض عليك نوع النشاط اللى بتقوم بيه و بتكون مطالب بتحقيقه فى فتره زمنيه محدده و اٍلا سحبوا منك العمل تحت لوائهم و ده شىء مش مضمون على الأقل فى البدايه ..
أدعى لنا يا باشمهندس ربنا يسهل الحال و يوفقنا و على الله قصد السبيل ..
تقبل تحياتى و تقديرى ..

عمرو يقول...

عاشقه الرومانسيه
كل سنه و أنتى طيبه يا دودو و ربنا يعيد عليكى الأيام بكل خير ..
اٍن شاء الله لما تبدأ الجمعيه نشاطها أكيد سنحتاج لمعاونتك رغم كونك فى الاٍسكندريه .. ربنا يسهل اٍن شاء الله ..
و فعلا التجاره مع ربنا لا تبور و لا تخسر أبدا أبدا :)
تقبلى تحياتى و تقديرى ..

عمرو يقول...

أبو كريم
و عليكم السلام و رحمة الله و بركاته
أنا برضو من رأيك يا أبو كريم لأن كثرة التشعبات قد تفسد الهدف كما يقال ..
بارك الله فيك و متشكر جدا لحضرتك ..

عمرو يقول...

بسنت صلاح الدين
بارك الله فيكى و متشكر ليكى جدا ..
أكيد أطفال الشوارع موضوعهم مهم لكن زى ما قلت فهم بحاجه لأمكانيات خاصه و مهوله للتعامل معهم و ده لسه غير متوافر بالجمعيه ..
لكن الله المستعان ..
موضوع علاج الأطفال المرضى و الأسر المعيله برضو من الموضوعات الهامه للغايه لأنها بتحمى المجتمع برضو من وجود الاٍنحراف لو تم التعامل معها بالشكل السليم ..
عموما اٍن شاء الله لما تبدأ الجمعيه نشاطها أكيد ليكى معانا دور كبير ..
بارك الله فيكى و تقبلى تحياتى و تقديرى ..

عمرو يقول...

reem
متشكر ليكى جدا كتر خيرك و البلوجر منور دايما بيكم ..
ربنا يسهل و نقدر نعمل حاجه مفيده للأرامل و المطلقات و الأسر المعيله و الأطفال المرضى و الله المستعان ..
أشكرك لروحك المتعاونه الطيبه جزاكى الله كل خير ..
اٍن شاء الله سيكون لكل محبى الخير دور هام فى اٍنجاح أهداف الجمعيه عن قريب و طبعا أنتى معانا ..
تقبلى تحياتى و تقديرى ..

عمرو يقول...

هعزف لنفسى
بارك الله فيك و ربنا يعينك على فعل الخير ..
أشكرك لروحك الطيبه و حبك لعمل الخيرات ..
تقبل تحياتى و تقديرى ..

عمرو يقول...

مطلق
بارك الله فيك يا أخى كريم و ربنا يفك ضيقتك و ضيقة كل الناس و يهديهم لما فيه الصواب ..
حاولت أراسلك لكن مالقيتش رقم موبايل أو ميل !!
اٍن شاء الله خير ..
تقبل تحياتى و تقديرى ..

عمرو يقول...

شمس النهار
مساء الخير يا برنسيس :)
أنا اللى عاوز أشكرك و الله على تعليقين فى نفس البوست و دى حاجه يعنى كبيره أوى :)
متشكر ليكى كمان على مساعداتك ليا و ده برضو بينم عن شخصيتك الطيبه المحبه للخير ربنا يكرمك اٍن شاء الله ..
و بجد و الله فرحتى بالناس الطيبين اللى علقوا على البوست و أبدوا اٍستعداطيب للمشاركه فى مل الخير شىء أثلج صدرى عن جد و اللى أسعدنى بالأكثر أنهم جميعا من الشباب الحابب أنه يعمل و يشارك فى العمل الخيرى التطوعى .. ربنا يكافئهم بأذنه على قد نيتهم الطيبه ..
و موافقك على ما أقترحتيه بخصوص آلية العمل فى المحافظات لكن ده شىء برضو لا أملك وحدى اٍتخاذ القرار فيه و ربنا يسهل و يعرض الأمر على مجلس اٍدارة الجمعيه اٍن شاء الله فى أول اٍجتماع لها ..
متشكر جدا و لك خالص التحيه و الموده و التقدير ..

عمرو يقول...

mahasen saber
أهلا يا أم عبد الرحمن كيف الأحوال ؟؟
معاكى و الله فى كل ما قلتيه بس مشكلة أطفال الشوارع أن رعايتهم محتاجه لأمكانيات كبيره و ضخمه للغايه و لسه مش متوافره للجمعيه ..
عموما طبعا الموضوع لايزال مطروح للمناقشه و ربما تظهر فيه جوانب تانيه شديدة الأهميه أرجو أن تتابعى معانا ..
متشكر ليكى جدا و تقبلى تحياتى و تقديرى ..

عمرو يقول...

بت خيخه و أى كلام
أنا الحمد لله تمام و كويس و شكرا لسؤالك ..
وجود غطاء و كيان قانونى للعاملين بمجال خدمة المجتمع شىء هام و حيوى و ضرورى للبعد عن المسائله القانونيه أولا و لتوسيع مجال أعمالهم الخيريه ثانيا ..
لأن لو الموضوع فضل فقط بين دائرة الأصدقاء ففى النهايه سيكون نجاحه محدود و مهما بذلوا من جهد فمش حيقدروا لا يوفوا و يكفوا متطلبات المحتاجين للمساعده و هم كثيرون و لله الحمد ..
فى رأيى أن كون الفرد المتطوع للعمل الخيرى يلقى من الشكر و الثناء و نظرات الاٍعجاب من الغير شىء غير حيوى فى الموضوع ككل .. لأن اللى بيعمل خير فهو أصلا بيعمله لوجه الله لا ينتظر عليه جزاءا و لا شكورا و ممكن أيضا يكون بيعمله اٍرضاءا لنفسه لشعوره أنه قام بعمل خير و مفيد للآخرين حبا فى الله ..
يعنى مثلا هل ينتظر فاعل الخير نظرة شكر من صندوق التبرعات اللى بيضع فيه ما تيسر من فيض الله عليه ؟؟
هل ينتظر نظرة شكر و عرفان بالجميل من المتوفى الفقير اللى أشتري له كفن ؟؟
هل ينتظر كلمة اٍعجاب و ثناء من القط اللى دهسته سياره و أخذه للطبيب يعالجه ؟؟
اٍن أجرى اٍلا على الله ..
طبعا مش معنى كلامى ده أنى أقلل من القيمه العظيمه لأعمالكم الخيريه و لكن الأعمال الرائعه لا تكتمل فقط بالنوايا الحسنه و لكن لابد لها من اٍطار شرعى لتنميتها و اٍزدهارها ..
و حتى لو أنخفضت نظرة الاٍعجاب من الناس لخمسين فى الميه زى ما بتقولى لو أتعرف أنك تبع جمعيه خيريه فما الضرر فى هذا ؟؟
المهم أن المساعده وصلت لمن يستحقها و أنا عن نفسى سأكتفى ب صفر% اٍعجاب و الباقى عند الله الذى لا تضيع ودائعه ..
بالنسبه للنقطه التانيه اللى وردت فى كلامك و الخاصه بالمرتبات :
أنا ذكرت بالنص و صريح العباره اٍن لا عائد مادى لفئات ثلاث : المؤسسين و أعضاء مجلس الاٍداره و الشباب اللى حيعملوا فى الحقل الميدانى .. أما فيما عدا ذلك فطبعا لهم مرتبات زى مثلا العاملين فى الحسابات و السكرتاريه و الشئون القانونيه .. بل اٍن من أهداف الجمعيه اٍن شاء الله سيكون توفير فرص عمل بها لأبناء المنطقه حتى تزيد الفائده و تعم ..
بالنسبه للشباب المتطوع للعمل الخيرى .. و بأذكر كلمة متطوع علشان يبقى معروف أنهم لن يتقاضوا عليه أى أجر مادى .. و القادرين على دفع تمن المواصلات كثيرون برضو و لله الحمد .. لأن المرتبات اللى المفترض ياخدوها أرى أنه من الأفضل أن تؤول للمحتاجين .. و صدقينى اللى عندهم اٍستعداد للتطوع للعمل الخيرى و الاٍنفاق عليه من جيوبهم كتير و ده شىء بيسعدنى و بيدينى الكثير من الأمل ..
بالنسبه بقى لسؤالك عن شخصى : فأنا اٍسمى عمرو بدر كما تعلمين على مشارف الخمسينات من العمر .. أشتغل فى الزراعه و التجاره .. عصرتنى الحياه و عصرتها و غلبتنى الدنيا و غلبتها و خرجت فى النهايه بحكمه عظيمه أنه لا شىء فى الحياه أحلى من حب الله سبحانه و تعالى و لا أترك بابا لمرضاته اٍلا طرقته ..
أنا مش صحفى فى الدستور لكن تشابه اٍسمى مع الأستاذ عمرو بدر الصحفى عمل كثير من اللبس على الرغم من أنى عملت بمجلة صباح الخير لفتره ليست طويله فى منتصف الثمانينيات و من بعدها عملت بجريدة الملتقى الدولى اللندنيه لفتره طويله ..
أرجو أن أكون قد أوضحت وجهة نظرى .. و أود أن أشكرك على طرحك لوجهة نظرك و على مجهوداتك القيمه فى مجال العمل الخيرى .. وفقك الله و بارك لك فيه ..
تحياتى و تقديرى ..

بنجاواتى يقول...

سلام عليكم

كل سنة وانتم طيبين
ويارب تكونوا بخير

ده سلام ع السريع كده معلش بقى


كل سنة وانت بخير

عمرو يقول...

بنجاواتى
و عليكم السلام و رحمة الله و بركاته
كل سنه و أنت بصحه و خير و رمضان كريم ..
ألف شكر للمرور يا عزيزى و دمت بكل خير ..

فشكووول يقول...

السلام عليكم عمرو بك

شوف يا سيدى

بيقولوا ان العرق سوس بتاع الشوارع بيحطوا عليه صبغة ورنيش .. هذا ما اكدته لى زوجة ابنى وهى للعلم لها باع فى هذه المواضيع لانها صيدليه.

beautiful mind يقول...

استاذي العظيم عمرو بدر
ازيك
رمضان كريم
ويارب يجعلك من اهل الخير دايما ويجعل العمل دا في ميزان حسناتك انت والقائمين عليه يارب
بالنسبه بقي لرايي
فانا افضل الاتجاه الاول
يعني نركز كل الجهود في موضوع واحد معين
ودا هيكون مردوده افضل
لان الجمعيات الاهليه الشامله كتير
وان شاء الله ربنا ياخد بايدكم وتكبر المؤسسه وتنشر الخير باذن الله

Kiara يقول...

السلام عليكم
اولا وكدا وبعد الفطار انا مديونة باعتذار شديد وبقول انا اسفه جدا جدا

هتقولي ليه هقولك في اخر التعليق

الاول انا لما سالت خالتو عن موضوع اطفال الشوارع ودا لاني كنت دايما بروحلها القسم وبشوفهم وبشوف اسلوبهم خالتو باحثه شرطة تخصصها مع النوعيه دي من الاطفال وتفضل تسال وتدعبس لحد اما توصل هو مين الف كدبة وكدبه بيقولها الطفل ليها بس هي فاهمه وعارفه دا بالتالي لازم متخصصين علي قدر عالي جدا من الرحمه والشده في نفس الوقت واعتقد دا قليل وهنتعب فيه لكن المرضي والمسنين والناس اللي محتاجه فعلا هما اولي

اما المقبلين علي الزواج ايه رايك في مساعده اتنين للزواج كل 4 شهور مثلا واختيارهم يكون للي محتاج فعلا

نيجي بقي للاعتذر الاول كنت موجوده لحظه اما ضفت كومنت نوران
ومن الصدمه بجد مش كنت قادره ارد وكل اما اكتب امسح الكلام والاعتذار دا باعتباري بنتك مش كيارا المدونه

نوران
*****

انا طبعا بحترمك جدا لكن بجد كومنتك كان غريب اوي لدرجه اني شكيت انك انتي

---------

نيجى بقى لبرة الموضوع؟
هو انت ايه بالظبط؟
انت مين يعنى ؟

-----------

ينفع شخص اكبر منا بالطريقة دي والدك الله يرحمه انتي كنتي بتكلميه بالاسلوب دا اعتقد اني لو كلمت بابايا بالاسلوب دا بجد رد فعله انا عارفه هيكون ايه

دا اولا

نيجي لثانيا استاذ عمرو صريح جدا وقايل كل حاجه عنه دا لما بيسافر حتي بيقولنا في حد بالصراحه دي في الوقت دا معتقدتش

كمان كل مدون مش ملوزم انه يصرح شغله ايه او هو مين او ساكن فين

لما بيصرح بدا دي تبقي حاجه منه هو

طيب منا اول مادخلت التدوين مش كان في حد عارف اسم مني بس لما انا حبيت اصرح بالاسم صرحت واصبح عادي اعتقد ان دي حرية شخصية ويلا ايه يانورا :)

كل سنة وانت طيبين ورمضان كريم

ومتابعه طبعا