~SUN~ Pictures, Images and Photos

الجمعة، 17 أبريل 2009

فدادين خمسه .. خمس فدادين :)

بسم الله ماشاء الله ..
اللهم صلى على حضرة سيدنا النبى عليه الصلاة و السلام ..
الحمد لك يا رب ألف حمد و ألف شكر :)
الزرعه نجحت يا ولاد .. شجر البرتقال البلدى و أبو صره اللى زرعته الشتويه اللى فاتت فى وسط الصحراء القاحله المخيفه نجح .. و رعرع و زهر :)
شايفين الزهور البيضا الصغنونه اللى بتزين فروعه الرقيقه دى ؟ أهى هى دى بقى زهر البرتقال اللى لما يفتح فى الوقت ده يقوم الأفلاحوكش مننا قلبه كمان يزهزه و يزهر و تبقى فرحة الدنيا مش سايعاه و يحس بالفخر أكمنه قدر بفضل المولى يعدى بالزرعه برد الشتاء القارص فى الصحراء و زعابيب أمشير اللى الود ودها تسقط الزهره دى من قبل ما تفتح مكايده فى الفلاح اللى لو مش صاحي لها و واعى لكيدها يبات سنته حزين و قلبه مكسور حزنا و كمدا على ضياع مجهود السنه بالكامل ..
أنا بقى بجد فرحان و منشكح آخر حاجه .. و فرحتى لا تقل طبعا عن فرحة النحل اللى ما أعرفش عرف منين سكة زهور برتقالى و هجم عليه أسرابا و أسرابا و هاتك يا هبر فى رحيق الزهور العبقريه علشان يخرج من بطونه عسل نمره واحد مافيش بعد كده و منتجى عسل النحل طبعا بيفخروا بعسل اٍنتاج زهر الموالح .. و ماله خللى الناس كلها تكسب و ترزق بالحلال و أهو ملك و مدبره سيدكم :)
بس طبعا حتما و لزما يبقى فيه عكيره كده تنغز الفرحه شويتين .. ما هى الدنيا كده ما بتديش الفرحه كامله لحكمه لا يعلمها غير الله ..
النغيزه بقى اللى ضايقتنى هى أن كل زرعات جيرانى من موالح و فواكه للأسف الشديد ما نجحتش .. و لا شجره واحده زهرت و لا حول و لا قوة اٍلا بالله .. لييييييييه ؟؟!!
لأن ربنا سبحانه و تعالى أدالنا عقل نفكر بيه و أدالنا فرصه أننا نستفيد من نصائح الآخرين أصحاب الخبره و المعرفه .. و لكن لعظيم الأسف البعض أستبدل العقل بربع كيلو بسطرمه و البعض أقتنع مش عارف ليه أن المثل اللى بيقول عدوك أبن كارك هو مثل صحيح و طبقوه فى حياتهم فأصابتهم الخيبه القويه و فشلوا فشلا ذريعا مريعا ..
اٍزاى ؟؟
لأنى ببساطه خلصت ضميرى قدام ربنا و نصحت جيرانى الأفنديه بعدم تسميد الأرض بالسباخ - عملا بنصيحة فلاحينهم اللى كانوا مربطين مع تجار السباخ - فى مثل هذا الجو السخن لأن ده حينشف الجذور بسبب الحراره المرتفعه للسباخ ذات نفسه و للتربه اللى أصلا بتعانى من قلة المياه .. و يكفى جدا التسميد بشوية يوريا بتاع شركة أبو قير للأسمده علشان التسميد الجذرى و رشة كلامنتوس يونانى علشان التسميد الورقى و كان الله بالسر عليم ..
بس للأسف كلهم رفضوا نصيحتى .. و أعتقدوا أنى عاوز أخرب لهم الزرعه أكمنى أبن كارهم :))
و الحقيقه أن العيب فى الزمن العبثى اللى خلا الناس ماعندهاش ثقه فى بعضهم و خلاهم يفتكروا أن كل نصيحه لوجه المولى ما هى اٍلا مكيده يراد بها سوء .. و لعلهم تعلموا الدرس ..
بسم الله ما شاء الله ..
اللهم صلى على حضرة سيدنا النبى عليه الصلاة و السلام ..
كمان عملت حاجه .. فكيره كده من فكيراتى الشرقاوى ماركة أبو سويلم :)
أستغليت جور الأشجار يا أخوانا و زرعت فيها بصل .. أيوه بصل ..
ما هى كد كده الميه بتسقى الشجر و الأرض الرمليه بتشربها فيبقى ليه ما نستغلش فائض الميه دى و نسقى بيها شتلات البصل بدل ما بتتهدر فى الرمل من غير فايده ؟؟
و فعلا .. نجحت الفكره نجاح فظيع ثلاثى الأبعاد زئبقى فتاك .. و شتلة البصل اللى كانت قد عقلة الصباع كبرت و تعملقت و بقت بصل أخضر محترم فى زمن قياسى بفضل الله .. و بصوا فى الصوره دى كده شوفوا البصله بقت تخن أيه ؟
و شويتين كده و حيبقى بصل أحمر يتباع بالشىء الفلانى اٍن شاء الله ..
عاوز أشكر البرنسيس شمس النهار .. عاوز أشكرها بجد من كل قلبى على تشجيعها ليا و اٍهتمامها بأحوال الزراعه اللى كانت متبعاها أول بأول من خلال الموبايل النوكيا n95 و تخفيفها عنى تعب الشغل المرهق للغايه فى الصحراء حيث لا قرطار و لا نافخ نار.. و كمان عاوز أشكرها على جركن مياه زمزم اللى أهدتهولى بعد ما اٍتقابلنا بالصدفه لأول مره فى فايد و بعد ما عرفت أن صنعتى هى الزراعه و لما أستغربت اٍزاى قدرت تشيل هذا الجركن العملاق و تيجى بيه من السعوديه بصت لى باٍستغراب برنسيساوى و قالت لى بلهجة الأميره اٍنجى فى فيلم رد قلبى : أمال الشيالين بيعملوا أيه ؟؟!!
و طلبت منى أسقى كل شجره بشوية مياه من الجركن الزمزماوى ده و كانت كلها ثقه أن ربنا حيبارك فى الزرعه و قد كان و لله الحمد و وشك حلو عليا يا برنسيس ربنا يجعلها سنه خضرا على الجميع يا رب :)
الأرض حلوه يا ولاد .. و رزقها حلو و واسع .. و ربنا بيبارك فى الزراعه خاصة لما يكون المتولى عليها بيحبها و بيخلص فى خدمتها و مش بيتعب من مكافحة الآفات و الخنافس الحمرا بنت اللئيمه اللى بتاكل الجذور أكلا نهما مفتريا .. و زى ما أنتم شايفين حتى الأرض الصحراويه الرمليه الخشنه المتجهمه بتبقى حلوه أوى لما بتخضر و مافيش حاجه اٍسمها مستحيل أبدا أبدا رغم المصاعب الجمه فى اٍستصلاح و زراعة الصحراء و أهمها عطل مواتير سحب المياه من الآبار زى اللى حاصل عندنا اليومين دول و اللى لهذا السبب تعطلت زراعة 3000 شتلة بتنجان و فلفل بأنواعهم ..
يا شباب .. يا بنات .. الصحرا وسيعه و مستنياكم .. مستنيه شبابكم و عافيتكم و علمكم و صبركم و صدقونى حتديكم من خيرها ما لايخطر على بالكم .. يالا بقى خشوا عليها كده بقلب جامد و خضروها أحسن ما نقعد نشتكى من البطاله و نقول يخرب بيت الحكومه :))

هناك 44 تعليقًا:

شمس النهار يقول...

الف مبروك يافارمر عمرو
بجد بجد شكل الشجر جميل جداويفرح القلب
وربنا يبارك لك فيه
وناكل برتقال الشتاء الجايه ان شاء الله بس علي فكره انابحب البرتقال اخضر قبل مايستوي
والبصل جميل كمان بس هو مايأثرش علي البرتقال

احساس طفلة محبة للرومانسية بس واقعية يقول...

مبروووك ربنا يكرمك ويزيدك
بجد شكل الشجر الصغنون دا حلو اوى
عقبال ما يكبر وتوزع علينا اول كام ثمرة يقعوا :)
جيرانك للاسف خسروا جامد لما مسمعوش نصيحتك
ولكن هم اكيد عرفوا وهيتعلموا وبعد كدا هيثقوا فيك لان دائما افكارك رائعة
وفكرة البصل خير دليل

ربنا يوفقك
تقبل مرورى

صوت من مصر يقول...

ممكن قفص طماطم
عايزنها تبقى خاضره الاارض الى فى الصاحره

MǿиY El-Shreef يقول...

بسم الله ماشاء الله

بجد حاجه تفرح القلب كده

لو كان نص شبابنا عندهم همتك كان زمان فعلا مصر بتتقدم بينا

ربنا يديم فرحتك ويكرمك ويزيدك يااااااااارب

عايزين الحلاوه بقى

:))

عاشقه وغلبانه يقول...

ربنا يباركلك يا استاذ عمرو

♥نبع الغرام♥♪≈ يقول...

السلام عليكم ورحمه الله وبركاته
الأول نصلى على النبى عليه الصلاة والسلام
بسم الله ماشاء
ربنا يزيد ويبارك يا أستاذ عمرو
ربنا يوسع الرزق كمان وكمان
بس ابقا أفتكرنا بأى حاجه مش هحدد
هههههههههههههههههه
ربنا يكرمك ويوفقك
تقبل تحياتى

سنابل يقول...

ماشاء الله لا قوة إلا بالله
اللهم بارك
ربنا يبعد عنه شر الحاسدين و اللى زرعتهم خابت
شكله حلو اوى

أمل حمدي يقول...

بسم الله ما شاء الله لاقوة إلا بالله

غن الله لايضيع اجر من احسن عملا

ربنا معاك ويعينك يارب يا عمرو

وزرعتك تكبر وتفلح وتجني الخير ان شاء الله

شاب كــ طخين ـــــا يقول...

بسم الله مشاء الله
ربنا يباركلك فى ارضك يا استاذ عمرو
وربنا يعوض على جيرانك ان شاء الله

Unknown يقول...

السلام عليكم ورحمة
الله تعالى وبركاته
سعادة الفنان الاستاذ
عمرو بدر الفلاحتوشى
زى ما بتقول :انا بسلم
وأصبح على السريع كده
ولما ارجع من الشغل اكمل
الفراءة والتعليق كمان
بس اسألك هو ايه(قرطار)؟؟
سلااام يافندم الى ان نلتقى
بعد الرجوع من العمل
إن شاء الله تعالى.

الازهرى يقول...

بسم الله ماشاء الله ..
اللهم صلى على حضرة سيدنا النبى عليه الصلاة و السلام

انا عارف مقدار سعادت لانى ببساطة برضه فلاح واجمل وقت عندى لما الزرعة تطلع وقبل ما نجنيها تلاقينى رحت لهناك وفضلت قاعد وسط الارض ييجى يومين بحالهم من ما اروح البيت وباكون طاير من الفرح وباحمد ربنا على على نعمته وبتأمل فى منظر الزرع الخلاب

وفعلا من يصدق مع الله لا يضيع الله اجره

الف الف الف الف الف الف الف مليون مبروك وباذن الله اخلص دراسة واجى اخد حتته جنبك ونقعد لهم الشوية الباقين من عمرى

Unknown يقول...

بسم الله ما شاء الله والله اكبر
اللهم صلى على حضرة سيدنا
النبى عليه الصلاة و السلام
ربنا يزيد ويبارك كمان وكمان ياأستاذنا وعلى ما اعتقد فى رأيى المتواضع يعنى ان الزراعة من الحاجات اللى الخبرة فيها اهم من الدراسة والكتب لان بصراحة كام واحد من
معارفى خريجى كليات الزراعة
اخدوا كذا مشروع من مشاريع
شباب الخريجين (زراعة)وللاسف
لم ينجحوا وبالنهاية لاما
تراجعوا وباعوا الارض
او أجروها لغيرهم
يزرعها .
ربنا يبارك لك
فى ارضك وزرعك وصحتك وعملك.

من غير عنـــوان يقول...

أولا ما شاء الله لا قوة إلا بالله

ألف مبروك وعقبال يارب ما ترص البرتقال في الأقفاص

متخيل مدى فرحتك

تسلم الأيادي والهمم

إنت راجل جميل وربنا حيكرمك إن شاء الله

أمنياتي

جلال كمال الجربانى يقول...

السلام عليكم ورحمته وبركاته

ألف مبروك ربنا بيكافىء على قد العمل
والإخلاص والتفانى
وأنت أخذت بالأسباب ورعيت وتعبت يبقى لازم تتكافىء من المولى العزيز على قد عملك
أما الشباب يوصلوا إزاى لأرض يزرعوها ويعيشوها ويدوها الطرق مسدوده
والحكومه مش فاضيه للشباب فاضيه لكبار المستثمرين ومدلعاهم على الأخر


ودمت فى أمان الله وحفظه

صبرني يارب يقول...

بسم الله ما شاء الله ولا قوة الا بالله

ربنا يزيد ويبارك ويكرمك يارب

الزراعه دي من وجهة نظري اصعب مهنه واحلى مهنه برضه

وان شاء الله السنه الجايه يكون ربنا اداك الخير كله يارب

انا هاعملكم لحمه بالبرتقال اهو مش هاخلي فى نفسكم حاجه


ربنا يكرمك يارب ويوسع عليك ويباركلك فى مالك وعيالك

dreem يقول...

ماشاء الله لاقوة الا بالله ,, ربنا يبارك لك فيها ويديلك الصحة والخير كله يا عمرو
كل التحية

gogo!sf يقول...

ربنا يكرمك يا استاذ عمرو

وبياركلك فى البرتقال والبصل الاخضر

اللى زى قلبى انا.... وان شاء الله

تحصد المحصول يا معلم واحنا فى انتظار

محصول الشتويه اللى جايه

سؤال بقى بجد

هو فعلا ده فى الصحرا يعنى انت اشتريت

كام فندان وزرعتهم كده عادى ولا كان

فى عواقب كالمعتاد بجد عيزة اعرف وشكرا

يارب يبارك فى الزرعه اللهم امين

مـجـنـووون يقول...

ربنا يوفقك يا رب

بجد انت انسان محترم قوي ولك طموح احيك عليه

تقبل مروري استاذي العزيز
مجنووون

عمرو يقول...

شمس النهار
الله يبارك فيكى يا برنسيس :)
و بأشكرك تانى على اٍهتمامك و ده مش غريب عليكى ..
البصل ما يأثرش على البرتقال بل على العكس لأن البصل بيمد الأرض بمواد مفيده جدا بتساعد على نمو الأشجار ..
شرفتى و نورتى المدونه ..

عمرو يقول...

احساس طفله محبة للرومانسية بس واقعية
الله يبارك فيكى و متشكر أوى :)
أول كام ثمره يقعوا ده أيه ؟؟
ده أنتم الخير و البركه و لكم كل المحصول لو ضميركم يخلصكم :))
متشكر للزياره و التعليق و أهلا بيكى ..

عمرو يقول...

صوت من مصر
كنت زارع طماطم فى مزرعه تانيه كانت ورا مدينة سنبل على الطريق الصحراوى بتاع اٍسكندريه و كانت الطماطم اللى بأزرعها مشهوره على مستوى فنادق ال 5 نجوم اللى كانوا بيتخانقوا علشان يحصلوا عليها بس للأسف المزرعه دى مش زارع فيها طماطم لسه بس أوعدك لما يحصل ليك يا عم قفصين مش قفص واحد :)
يا ريت الصحرا بجد تبقى خضرا يا ريت .. ربنا يسمع منك ..
شرفت و نورت و أهلا بيك :)

عمرو يقول...

مونى الشريف
الحمد لله عندى دايما أمل أن بكره أحسن من النهارده بس لو الشباب تفائلوا خير و نووا أنهم يتجهوا للصحراء يزرعوها و يعمروها و يبعدوا شويه عن المدينه و شوارعها الخنيقه الضيقه الملوثه اللى تقصر العمر ..
أهلا بيكى و نورتى..

عمرو يقول...

عاشقه و غلبانه
و يبارك لك يا رب و يحقق لك كل الخير ..
متشكر للزياره و التعليق ..

عمرو يقول...

عاشقة الأحزان
ربنا يبارك لك و متشكر أوى :)
ماشى كلامك بس يطرح الشجر و ليكى كوباية عصير برتقال بلدى معتبره تقيكى أنفلونزا الشتاء :)
بس دعواتكم معانا ..

عمرو يقول...

سنابل قمح
متشكر أوى للزياره و التعليق ..
ربنا يستجيب لك و يبعد عننا خيبة الخائبين مش بس فى الزراعه و لكن فى كل مناحى الحياه :)

عمرو يقول...

ماما أمولة
كتر خيرك يا ماما أمولة ربنا ما يحرمناش من دعواتك الطيبه .. بارك الله فيكى و ألف شكر :)

بلاش فضايح يقول...

الف مبروك
وربنا يباركلك فيها ويكفيك شر الجيران وعينيهم مهو طبعا زمانهم بيحقدوا عليك

ربنا يكرمك دايما و يجعل الخير على ايدك

لا بجد حاجة تفرح

شموخ مسلمة يقول...

بجد بجد حضرتك لا تتخيل اد ايه انا فرحت بموضوع حضرتك
و كلام حضرتك اللى شجعنى جدااااااا
بجد انا كتير فكرت فى استصلاح الصحراء و تكون حاجة بسيطة ع ادى
بس اجلت الفكرة شوية لان المجال مش مجالى خالص
و كمان فكرت فى حاجة بديلة
بس دعوات حضرتك

Kiara يقول...

الله الله علي الزرع والارض

استمتعت اوي وانا في جو الارض والزرع

حلوة الدنيا يقول...

ماشاء الله فعلا حاجة تفرح وربنا يبارك لك فيها ويبارك للناس الي حوالِك السنة الجاية

هي حلوة فكرة ان احنا نزرع ومنستناش الشغل عند الحكومة او غيرها بس الشباب يا مكسل يتحرك اساسا ياإما معندوش الخبرة بالزراعة والتكاليف ياريت لو تقدر تعمل بوست مخصوص للموضوع ده يعني تقولنا لو فيه حته للدراسه مثلا يعني انا عارف ان فيه كليه زراعة في الجامعة المفتوحة بس برده الدراسة 4 سنين يعني لو تعرف حاجة في وقت اقل يبقي كويس وبرده تقولنا علي الفلوس الي الشاب محتاجها علشان يقف علي رجليه وطبعا التوفيق ده من عند ربنا بس الواحد يسعي

خمسة فضفضة يقول...

السلام عليكم ورحمة الله وبركاته

الف الف مبروك يا استاذ عمرو والله فرحتني جدا

ربنا يبارك لحضرتك في الارض كلها وتبقي خضرا علي ايدك ان شاء الله

عارف حضرتك انا باسكن في اخر البلد تقريبا بعدي بشارعين بالظبط ارض زراعيه ومزارع موالح اليومين دول مخليه ريحة الجو روعه وفي منتهي الجمال ياسلام كده لما تخرج البلاكونه بعد صلاة الفجر تشم احلي نسيم في الدنيا حاجه ترد الروح

كان حلم حياتي من زمان اني اخد مزرعه في قلب الصحرا وابعد عن العمران خالص واعيش هناك ازرع اللي باكله واكل اللي ازرعه

دا انا حتي والله لسه انهارده كنت باحلم اني خدت بيت ليه حتة ارض قدامه قررت اني ازرع فيها الخضار اللي البيت بيحتاجه زي الخس والجرجير والبقدونس والطماطم واربي فراخ وبط
كل شويه اشوف احلام زي دي لانه فعلا حلم حياتي

بس للاسف غير قابل للتنفيذ في الفتره الحاليه



الف مبروك كمان مره احجزلي بقي اول انتاج لشجره البرتقال اللي في الصوره دي اكيد هايبقي برتقال زي العسل طالما اتسقي بمية زمزم

الازهرى يقول...

احتاج رأيك الذى اثق به كثيرا فى الفارس الاخير

صوت من مصر يقول...

يا استاذى بجد الرجال قليلون وانت منهم
اذكر ان فيلم المهاجر كان يسعى لحاجه واحده بس
"( الزراعه )
وياعم انت بتاكل البلد كلها ؟؟؟؟؟؟؟؟؟؟

غير معرف يقول...

اخي الكريم
اسمي محمد حماد
من جريدة العربي
مشرف على صفحة مدونون بها
اردت ان اجري معك حوارا للجريدة

برجاء ارسال ايميك لي
على العنوان التالي
mmmhammad@gmail.com
وتقبل احترامي وتقديري

dr.lecter يقول...

عاوزينها تبقي خضره الارض اللي في الصحرا

عارف ياستاذنا انا من صغري بحب الزراعه بس لسبب نفسي
انك تزرع حاجه بايدك وتكون مسئوول عنها علشان تكبر وتخرج للحياه وتشوفها بنفسك وتجني ثمارها احساس وهمي

عامل زي ماتكون خلفت عيل وبتربيه

Mohamed يقول...

الف مبروك يا باشا وربنا يزيدك كمان وكمان

فكــــــــــــــرنى!!!

Unknown يقول...

حشتنا ياأستاذ عمرو
يارب تكون بألف خير
كده احنا نبتدى نغير
من الزارعة من الارض
ومن البرتقال والحاجات الحلوة
دى اللى حتاخد مننا ولا ايه؟
دعواتى لحضرتك والاسرةبالسلامة دائماً

kochia يقول...

مبروك
بجد الصور عجبتني اوي واتبسطت جدا
وانا بحب العزيمة اللي عند اي شخص يحاول الزراعة لانها محتاجة بال طوووووويل
تابعنا بالاخبار بقي

تحياتي

فشكووول يقول...

ازيك يا استاذ عمرو
الف مبروك على النجاح اللى حققته
والف مبروك على الارض التى اثمرت واينعت واصبحت شجر برتقال وبصل بالشيئ الفلانى
وبارك الله فى الحاجه شمس النهار اللى اهديتك جركن المياه زمزم وعقبالنا اما نروح نحج باذن الله ولو انى حجيت مرتين لكن التالته ما تضرش
تحياتى لحضرتك ولخبرة حضرتك فى الزراعه فى الصحراء

gogo!sf يقول...

ازيك يا استاذ عمرو

يارب تكون بخير

mahasen saber يقول...

بسم الله ما شاء الله

مليون مبروك

احجزلى بئه كيلو برتقال واتنيين كيلو مشمش من الشجره اليى على الجنب دى

بجد مليون مبروك

وفعلا ساعات كتير بتنصح ناس فى نفس مجالك مثلا ومبيخدوش بالنصيحه خوفا من انك تكون بتغرقهم

الناس من كتر وحشاتها مبقتش تصدق ان فيه ناس غيرهم كويسيين

mahasen saber يقول...

بسم الله ما شاء الله

مليون مبروك

احجزلى بئه كيلو برتقال واتنيين كيلو مشمش من الشجره اليى على الجنب دى

بجد مليون مبروك

وفعلا ساعات كتير بتنصح ناس فى نفس مجالك مثلا ومبيخدوش بالنصيحه خوفا من انك تكون بتغرقهم

الناس من كتر وحشاتها مبقتش تصدق ان فيه ناس غيرهم كويسيين

بسنت صلاح الدين يقول...

بسم الله ماشاء الله ربنا يباركلك ان شاء الله، الزراعه حاجه حلوه اوى و بتعلم الصبر و جميل لما تلاقى ثمره تعبك و جهدك بتكبر قدام عينيك ،ربنا يوفقك، بس على فكره انا حاجزه اتنين كيلو من المحصول انا بقول من اولها عشان تعمل حسابك

♥نبع الغرام♥♪≈ يقول...

السلام عليكم
استاذى الفاضل عمرو
كيف حالك
بجد قلقت عليك لانقطاعك عننا فجأة
يارب المانع يكون خير ان شاء الله
منتظراك لكى أطمن عليك
تحياتى
إيناس