الجمعة، 10 أبريل 2009

مش لاقى عنوان !!!!!!!!!


يعنى هى بقت كده ؟؟!!
يعنى هى الحكايه وصلت لكده ؟؟!!
يعنى عاوز حد يقدر يقنعنى أنه ممكن يبقى فيه شعب فى الدنيا بهذا القدر من الهبل و اللامبالاه حتى يسمح بأن يكون علم وطنه مرسوم على شبشب حمام يباع على الأرصفه و يشتريه الناس عادى كده جدا !!
عاوز أعرف مين المسئول اللى يستحق الحرق حيا اللى تفتق ذهنه القذر المريض عن صنع هذه الشباشب اللى بدأت فى الاٍنتشار على فرشات الباعه الجائلين فى منطقة وسط البلد و الموسكى و العتبه ؟؟
عاوز أعرف مين القذر الحقير اللى لا أجد غضاضه فى وصفه بالخائن لوطنه و اللى فى رأيى حيكون مسئول عن اٍستهتار جيل بكامله بعلم بلاده اللى هو رمز اٍنتماءه و وطنيته اللى صنع هذه البضاعه الفاسده لتباع هكذا علنا بدون أن يقدم صانعيها و بائعيها للمحاكمه العاجله بتهمة الخيانه و اللى لو ده حصل فى أى بلد من اللى بنتقرنن عليهم بحضارة السبعتلاف سنه لقامت الدنيا و ما قعدت و لنال المجرمون جزائهم على خير وجه ؟؟!!
و لكن حأقول أيه ؟؟ ما هو أصلا العيب فى الناس اللى بتتفرج على هذه المهزله بدم بارد و بتشتريها بدم بارد و بتلبسها بدم بارد و لا دم الصراصير و نرجع نقول ليه ربنا عامل فينا كده ؟؟
ليه ؟؟ علشان اٍحنا بصراحه نستاهل كل ما يجرى علينا من مجريات الزمان لأننا بصراحه وصلنا للدرجه اللى بنلبس فيها علم بلادنا شبشب فى رجلينا !! طيب يبقى خلاص بقى زعلانين ليه ؟؟ زعلانين من أيه ؟؟ و لا أحنا عايشين ليه أصلا ؟؟ و لا أحنا عايشين فى هذا الوطن و تحت سماه ليه ؟؟
مكسوف أوى منكم يا أرواح شهدائنا .. حقكم عليا .. بصراحه مانستهلش تضحياتكم !!

هناك 67 تعليقًا:

شمس النهار يقول...

ليك حق ماتلاقيش عنوان عشان انت راجل مؤدب جدا
بس تصدق انا كمان مش لاقيه تعليق خالص
يترجم الفجيعه اللي انا حاسه بيها

gogo!sf يقول...

انا عارفة ان بلادنا بقت رخيصة علينا انما لدرجة دى بجد انا مش مصدقة ...........لكى الله يا مصر

mohamed ghalia يقول...

والله فعلا مصيبة
دول ولا عندهم أى روح انتماء ولا حب للبلد دى

أمبارح كان عمرى عشرين يقول...

زى ما حضرتك قولت هى بقت كده
بقى عندنا لامبالاة رهيبه ومش فارق معانا اى حاجه
ومفيش طبعا وصف يتقال على الاعمل كده غير انه خاين ده ابسط لفظ محترم يتقال عنه

الشموع البيضاء يقول...

حاجه بجد غرييييبه وفمنتهى السخافه
هيا الناس اتجننت ولا ايه
بس للاسف فعلا خلاااص مبقاش فى لا وطن ولا انتماء ولا اى حاجه منقدرش نلوم الناس على الى همه حاسينه بس كمان متوصلش للدرجه دى صاحب الفكره دى ابليسى التفكير وحقير فعلا وللاسف لقا ناس متخلفه بايعه القضيه بتشترى

kochia يقول...

هومستورد من الصين ولا محلي ؟؟
اصلها تفرق بصراحة

بس بجد عيب مفيش حاجة تتقال
الامر لله

حاسوباتيه يقول...

بصراحه اول مافتحت المدونه قعدت كده اتفرج على الصوره ومش عارفه ايه ده وفجاه قولت يالهوي ده شبشب وعليه العلم
لا يمكن اتخيل ابدا ان حد يعمل كده بجد استهتار بينا وببلادنا لان الي عمل كده عارف ومتاكد ان ماحدش هيقوله حاجه للاسف

بسنت صلاح الدين يقول...

الحقيقه ده مش بس بينم عن لا مبالاه و عدم وطنيه ده كمان جهل بعيد عنك و عن القراء

عبدالله يقول...

انا لسه مسبهل بجد ازاي يعني طيب يعني الي عملها عبيط طيب الي نقلها ولا الي بيبعها ولا الي بيشتريها كل دول عبط وخونه طب ازاي يعني طيب يمكونوا مش يعرفوا شكل العلم حد يقولهم طيب انا لو مكنتش شوفت الصوره كنت افتكرت الموضوع هزار بس ده بجد مش عارف هوا فيه ايه الناس بتعمل ليه كده

عاشقة الأحزان يقول...

السلام عليكم ورحمة الله وبركاته
بصراحه حاجه غريبه
انا اصلا استغربت وفضلت متنحه حبه كتير قوووى أبص عشان مش مصدقه المسخره دى ياااااااااااااه ايه العبط ده
فين الانتماء للوطن
حسبى الله ونعم الوكيل
تقبل تحياتى
وسلالامى

صوت من مصر يقول...

استاذ عمرو
بالنسبه لشبشب اقولك ان موجود منه بجميع الالوان بس انا يوم ما جيبت اشترى اشترى علم امريكا لكن علم مصر محدش كان بيرضى يشتريه
وهو اصلا انتاج صينى ربنا يخليك ياريس ربنا يخليكوا يا صين

ঔღঔ نـــوارة ঔღঔ يقول...

لا حول ولا قوة الا بالله

مهما كان ميصحش يحصل كدا واذا صناعة مستوردة كمان ازاي دخلت مصر

دي قلة قيمة هو علم اسرائيل ولا امريكا عشان يتعمل فيه كدا

ربنا يفرجها

ماما أمولة يقول...

اللي عمل كدا لايمكن يكون مصري

دا انسان حقود

MǿиY El-Shreef يقول...

الشبشب ده منتشر من بدري

ماحنا رخصنا من بدري اوي

والي يعر اكتر بقى اني شفتها ف منتديات كتير بيتريقوا علينا بيها

حسبي الله ونعم الوكيل هنقول ايه يعني

كيــــــــــــارا يقول...

يالهوووووووووووووووووووووووووووي


ايه دا

بجد دا استهبال مين المسئول اللي عمل دا

وكمان بيروجوه

يااااااااااربي

كلمات من نور يقول...

والله أنا خايفه أبويا وصاحبه يشوفوا الشبشب داه

أبويا من الضباط القدامى وراجل من سنين السنين وهو معاش علشان قال معاش اللي يقول اه والسلام

داه لو شافه ممكن يعمل فيها إرهابي ويولع في المحلات

يا خسارة يا مصر

لا لا مش يا خسارة يا مصر يا خسارتك فينا إحنا يا مصر

عمرو يقول...

شمس النهار
أهلا يا برنسيس :)
و الله الكلام فعلا أحيانا بيعجز عن التعبير بما يتناسب مع المصيبه .. عندك حق و لا حول و لا قوة اٍلا بالله

عمرو يقول...

gogo!sf
لا و الله بلادنا مش رخيصه علينا أبدا لكن يمكن رخيصه عليهم .. على اللى بيسمحوا بالمهازل دى تحصل تحت أى مسمى
بجد موضوع غريب و يحرق الدم ..

عمرو يقول...

mohamed ghalia
كلمة مصيبه دى شويه فى رأيى
أهلا بيك ..

عمرو يقول...

أمبارح كان عمرى عشرين
دى مش بس خيانه ده فجر .. لأن اللى عمل العمله السودا دى اٍن كان تصنيع فى مصر أو اٍستيراد من الخارج أو توزيع أو بيع أو شراء كل ده بيتم بشكل فاجر بدون وازع و لا رادع من ضمير

عمرو يقول...

الشموع البيضاء
أرجو أن فعلا ماحدش يشترى زى ما صوت من مصر بيقول و لو أن ده مش كفايه برضو لأنه ماكنش المفروض الموضوع ده يحصل و ينتشر من الأساس

عمرو يقول...

kochia
صوت من مصر بيقول أنه مستورد من الصين .. طيب من المسئول عن السماح بدخوله مصر و بيعه بشكل علنى اٍستهبالى بالشكل ده ؟؟!!

عمرو يقول...

حاسوباتيه
أنا كمان ما صدقتش !!
بس دى الحقيقه الصادمه للأسف الشديد و فعلا زى ما قلتى لأن اللى عمل كده عارف اٍن ماحدش حيحاسبه ..
شىء مؤلم و مخزى ..

عمرو يقول...

بسنت صلاح الدين
و كمان بينم عن أن الحكايه بقت ماتهمش حد .. يعنى خلاص بقت الأشياء الرديئه بتتساوى بالجيده و أهو كلو ماشى ..

عمرو يقول...

عبدالله
هو هبل على اٍستعباط على لامبالاه على اٍستهتار على شوية حاجات كده مش كويسه أصابت الناس بتبلد فى شعورها و الخوف اٍن الموضوع يكبر عن كده و الله وحده أعلم حيوصل بينا لفين !!

عمرو يقول...

عاشقة الأحزان
اٍنتماء أيه بقى كل سنه و اٍحنا طيبين ..
و تقبلى تحياتى و شكرى

عمرو يقول...

صوت من مصر
كويس أنك عرفتنا أصل الموضوع ..
صينى ماشى بس مين بقى اللى سمح بدخوله لمصر ؟؟!!
و مين اللى سمح ببيعه ؟؟
و مين اللى بيشتريه ؟؟ ما هو أكيد فيه ناس أغبيا أشتروه برضو ..
و مين بقى الشركه الصينى أصلا اللى أنتجته علشان تتحط فى البلاك لست من قبل الغرفه التجاريه المصريه و يتاخد ضدها الاًٍجراء المناسب ؟؟

عمرو يقول...

نوارة
العلم فى كل ثقافات الشعوب له اٍحترامه و هيبته و لا يجوز مرمطته بالشكل الفج ده خاصة اٍن لهذه الفعله مردود خاطىء جدا على الأجيال الصاعده ..
ربنا يستر ..

عمرو يقول...

ماما أمولة
طيب اللى صنعها مش مصرى .. و اللى سمح بدخولها مصر مش مصرى برضو ؟؟
و اللى بيبيعوها مش مصريين ؟ و اللى بيشتروها مش مصريين ؟؟
الحكايه معقده أوى يا ماما أمولة ..

عمرو يقول...

مونى الشريف
فعلا ده اللى أتضح لى .. حاجه تعر بجد ..
بس يا ترى العيب عند مين ؟؟ عند اللى سمحوا بدخوله و بيعه فى مصر ولا عند اللى بيتريقوا علينا ؟؟

عمرو يقول...

اٍحنا بقى عاوزين نعرف مين المسئول ؟؟
حأموت يا كيارا و أعرف مين المسئول ..
تعرفيش المسئول ؟؟ :)

عمرو يقول...

كلمات من نور
تحيه منى لوالدك .. أرجوكى أن تبلغيه تحياتى و تقديرى :)
فعلا هى اللى خساره فينا ..

كيــــــــــــارا يقول...

لاااااااااا خالص

والنبي ولا شفته

طب جبهولي انت بس

وانا هخليه يكره اسمه

هوديه المشرحه داااااااااايركت

norahaty يقول...

ياأستاذ عمرو
إذا كان هان عليهم
ربهم ونبيهم صلى الله عليه وسلم
وشوفنا(الاحذية الرياضية)المستوردة
مكتوب على النعل والعياذ بالله
لفظ الجلالة ....استغفر الله
نحن ننحدر للاعمق العميق
الغريق (المظلم)

norahaty يقول...

وكمان هانت حياة
الناس عليهم وصاروا
يستوردوا الاغذية الفاسدة
والاسمدة المسرطنة وووووووووو
حاجات كتير لو الواحد قعد يعدها
بس حيجى له اكتئاب بس ادينا بنطوح:(

fashkool يقول...

العزيز عمرو بك
تحياتى
شوف يا عزيزى المغزى من وراء هذا الموضوع ليس فى طبع العلم عليه
لكن الوطن هان على الجميع وهان علينا احنا شخصيا عشان الغلب اللى احنا عايشين فيه.
شوف يا عمرو بك
انا احبك وآجى اعلق عندك عشان انت بتيجى تعلق عندى .. يعنى بتعمل لى حاجه حلوه
طب الوطن ح نحبه ليييييييه؟ لازم يعملى حاجه حلوه ويخلينى على الاقل زى باقى الاوطان.
لكن ............. وانت تعرف
ما فيش سبب يخلينا نحب وطنا اليومين دول

انا يا سيدى من جنود اكتوبر واعتقد والحمد لله انى قمت بواجبى
ماذا كسبت؟ .... من جنى المحصول؟ من جلس على كرسى العرس ..... ونحن وجيلنا الذى دفع دمه ... وما زال يدفع من عرقه وتعبه وكده كل شيئ ....لا نجنى شيئا سوى الفتات
هل اخذنا حقنا؟ ... هل ضمنا مستقبل يستر اولادنا .... اسئله كثيره لا اجابات لها .
هذا ليس وطننا ... انه وطنهم ... هان علينا وهان عليهم وضعفت الدوله وهانت حتى على اولادها
وخلاص
تحياتى

من غير عنـــوان يقول...

رضينا بأن نكون مع الخوالف

البدايه من زمـــان.. لما ابتدى كل مجرم... يعيث فسادا في مصر.. وسكتنا ... واستحسنا أحيانا.. وضحكنا على كل قفشه... وتغاضينا عن كلمات ومفردات.. وشيئا فشيئا وصلنا لهذه المهزله

موجة يقول...

السلام عليكم ورحمة الله وبركاتة
مش لاقية انا كمان تعليق!!!!!!!
لا حول ولا قوة الا بالله
نقول ايه
منهم لله اللى عملو كدة
بس المصيبة مش فى اللى عمل بس
المصيبة فى اللى بيساعدو الناس اللى عملو كدة على انهم ينشرو الحاجات دى ويخلوها كدة موجودة علنا
شئ مخجل
انا فعلا قرفانة من كل واحد شاف مصيبة زى دى وسكت عليها
تقبل مرورى

صبرني يارب يقول...

قول قلة عقل

قول قلة ادب

قول جهل وتخلف بعيد عنك

قول بلد بقت موووولد وصاحبه غايب

قول فعلا احنا نستحق الى يجرالنا

انا مستعده معاكم ارفع قضيه على الصانع

لو موافق على الفكره بلغني

أمل الحياة يقول...

مش عارفة بجد اقول ايه
دى حاجة مانلومش الريس فيها
الشعب خلاااااااص باع البلد بجد
دلوقتى شباب كتير بيترسمو على بعض بمين يكره البلد اكتر
و اللى يحبها او يدافع عنها يبقى انسان جاهل ومش فاهم الواقع و غير مثقف
بقو بيعملو مسابقات فى كره البلد
و الفايز يعاملوه كانه صلاح الدين
ياللا ربنا يهدى الجميع

تقبل مرورى...

كلمات من نور يقول...

أستاذي عمرو

أنا نقلت قصتي نور والبحر إلى مدونة خاصة بالقصص حسب أوامر الست أم البنات

بصراحه أنا مستجدة في المدونات وخيبة كبيرة قوي وهي شايلاني فوق راسها لما الصداع مش بيسيبها

طول عمر النحو عقدتي في الحياة أجيب الدرجات النهائية في كل فروع العربية إلا النحووووووووووو

معلش انتم معايا وشويه شويه ربي يقدرني أغير الأخطاء النحوية

رابط المدونة القصصية

http://qssassy.blogspot.com

شكرا لمرورك الجميل

gogo!sf يقول...

فعلا والله يا عمرو هو موضوع يحرق الدم ويقهر كمان

ربنا يستر على الاجيال القادمه
احنا لسه ما شوفناش حاجه

dr.lecter يقول...

دي مسخره

وقله ادب

اه احنا ممكن نتكون زهقانين من البلد وكارهين اللي بيحصل ومخنوقين منها وبنعلن السبب اللي خلانا نوصل لكده

ومش طايقين بعض وعاوزين نهج منها

لكن ماتوصلش لكده ابدا

عمرو يقول...

كيارا
طيب و الله المشرحه شويه عليه
أنا بأقول ينضرب على قفاه بالشباشب دى لحد ما يبان له صاحب
بتعجبنى روحك الوطنيه :)

عمرو يقول...

norahaty
و الله عندك حق يا دكتوره فليس بعد الكفر ذنب !!
بس ده أحنا كده بنفقد قيمه ورا قيمه ورا قيمه لحد ما حنلاقى نفسنا فى الطل و ضهرنا مكشوف بغير أى قيمه تحميه
طيب و بعدين ؟؟!!
ده حتى قيمة العلم اللى هو رمز الوطن عاوزين يوقعوه من عينينا طيب يبقى فاضل أيه ؟؟
و لا حاجه .. دى الاٍجابه بمنتهى البساطه ..

عمرو يقول...

fashkool
أولا يا أستاذنا اٍسمح لى أتقدم لحضرتك بخالص اٍحترامى لشخصك الكريم كونك بطل من أبطال مصر اللى حنظل نفتخر بهم على الدوام رغم أنف الظروف ..
أستاذنا الفاضل ..
حب الوطن فرض ..
فرض عين و ليس فرض كفايه من وجهة نظرى ..
الحقيقه اٍحنا المفروض ماننتظرش مقابل من الوطن ثمنا لحبنا له بل و عشقنا له .. و أنظر يا صديقى فى مقولة النبى صلى الله عليه و سلم لما كا بيهاجر من بلده مكه و قد ذاق ما ذاق على يد كفارها و اٍزاى أعرب نبينا الهادى عن حبه لبلده و أنه لولا أفعال الكافرين به ما تركها أبدا ..
يعنى لم يكرهها رغم ما لاقى من تكذيب و عنت و ظلم فيها ..
الوطن فى حد ذاته قيمه ..
قيمه ..
قيمه موجبه للحب و التقديس و الاٍحترام حتى لو لم نجد فى الوطن ما يدعو لمحبته !!
الوطن ليس فقط مظالم و تجاهل و نكران للجميل ..
الوطن أرض و ناس و حيطان و بيوت و مشاعر لا يجوز اٍنكارها و لا تحاشيها و اٍغفالها ..
الوطن يا أستاذنا ..
الوطن ..
و تقبل خالص شكرى و تقديرى ..

عمرو يقول...

من غير عنوان
ما هى لو الحكايه زادت عن كده و ماتلحقتش يبقى نقول على كل شىء يا رحمن يا رحيم
و على رأيك قعدنا نضحك فى الأول لما حنبكى فى الآخر أهو و قالوا زمان آخرة الزمر طيط !!
تقبل خالص تقديرى ..

عمرو يقول...

موجة
العجيب الغريب أن فعلا الناس بتشتريها و هم فرحانين و بيضحكوا بسماجه و غتاته و برود متناهى ..
و فعلا لو كل واحد أخد موقف اٍيجابى بالذات فيما يخص المسائل القوميه لتغير الوضع للأفضل بغير شك ..
أشكرك للمرور و التعليق و أهلا بيكى ..

عمرو يقول...

صبرنى يا رب
أتضح يا ست أم خالد أن الشباشب الحقيره دى صناعة الصين
يبقى الأوقع هنا أن ممكن قضيه تترفع على المستورد الرئيسى و أنا معاكى فى القضيه لو حنرفعها جماعه
عموما حأبتدى فعلا آخد خطوات اٍيجابيه فى هذا الشأن و عندى أمل أن يكون بفايده و يوفقنى فيها المولى كما وفقنى من قبل و تمكنت من وقف اٍعلان خللى السلاح صاحى بتاع المنشط اٍياه ده
و حأقولك الخطوات اللى تمت أول بأول ..
أحييكى يا أم خالد على حماسك و روحك الوطنيه ..

عمرو يقول...

أمل الحياة
أيوه و الله بقت ظاهره غريبه جدت أن كل ما الشاب شتم فى البلد و أظهر كرهه ليها كل ما بقى واد روش طحن و أبن ناس !!
ظاهره غريبه بتنبأ بكارثه لو لم يتدارك الأمر ..
أشكرك و تقبلى تقديرى ..

عمرو يقول...

كلمات من نور
أهلا بيكى ..
النحو ده من أجمل المواضيع الجديره بالدراسه فى الحياه و لا يستلزم اٍلا حفظ بعض القواعد الأساسيه و فهم جيد لمعنى الجمله و تطبيق هذه القواعد عليه ..
اٍبدأى بدراسة المثنى و الجمع و حركات اٍعرابهم لتحاشى الوقوع فى الأخطاء النحويه الظاهره للعين و بعدها حتلاقى نفسك بتتعاملى مع قواعد النحو بسلاسه و طبيعيه زى قيادة السياره كده :)
أهلا و سهلا بيكى و تقبلى تقديرى ..

عمرو يقول...

gogo!sf
ده موضوع يخض بصراحه لأن وراه اٍنعكاسات نفسيه كبيره جدا على نفوس الناس و خاصة الصغار منهم ..
على رأيك ربنا يستر ..

عمرو يقول...

dr.lecter
موافقك على كلامك جدا ..
و فعلا غريبه أوى أنها توصل لكده !!
يعنى حاجه غير متوقعه أبدا و لكن كل يوم بنشوف عجبه جديده و حقيقى مش عارفين حتوصل لأيه ..

شمس النهار يقول...

عايزه اقول لك ان النهارده كنت بزور عمي المريض
وبينما انا اصلي عنده وبسلم وتضرب عيني في منظر لطيف خالص شبشب عليه كل اعلام الدول
سألت المركب ده قصدي الشبشب ده اصله كان مقاسه كبير جدا ياعمر شبه المركب
المهم لمين الشبشب ده قالوا لحفيدته وللعلم حفيدته بطله من ابطال السباحه المصريه وبتمثل مصر بالخارج كتير
المهم سألتها جبتي منين الشبشب ده قالت من المنيا لما كنت في البطوله الاخيره
الله ماالالمان زينا اهو
طب يابنتي هو عادي كده تلبسوا الاعلام دي في رجليكم كده والا ايه البنت البطله اللي بتمثل مصر بتاعة اللغات الحيه والميته
بصت لي كده باستغراب شديد وقالت فيها ايه
وبعد اذن حضرتك بقا سمعت مني خطبه عصماء طويله عريضه والا خطبة عادل امام في مسرحية الزعيم
المشكله انها كانت فكراني بهزر
ايه رأيك يارجل ياطيب

عمرو يقول...

شمس النهار
الرأى رأيك يا برنسيس :)
ما هو ده اللى بأتكلم فيه أن الجيل اللى طالع أصبح مش عارف معنى لقيم الوطن و رموزه اللى يستحقوا أن يفتدوا بالروح .. فالحكايه يعنى بقت سبهلله و كلام فارغ و مش عارفين أيه آخرتها ؟؟

nona يقول...

لالالا كدة زيادة والله
مهما كانت فهى فى الآخر مصر بلدنا
يعنى هل ينفع ان واحد مصرى او خليجى ولا أجنبى مثلا يشتريه ويروح بيه بلده يلبسه هناك ويدخل بيه الحمام كمان

عيب اوى على اللى عمله عيب اوى

كلمات من نور يقول...

في استطلاع للرأي العام قال صديقه : و إيه يعني ما أنا عندي واحد عليه علم أمريكا!!!!!!!!!!!!!!

قلتلها لا ا شيخه بس يعني هي أمريكا تستاهل من ايام ما قتلوا الهنود الحمر لغاية يوم الدين بس دي قلة حياء

ردت أخرى : كبري يا بنتي داه شيء عادي وبعدين اساسا أنا مبحبش العلم بتاعنا داه بحب القديم ( العلم الملكي


بصراحه بصيت للاتنين على انهم حالتين ميؤوس منهن ضمن ملايين الحالات في مصر
وكان نفسي يكون في ايدي واحد من الشباشب دي حيث أني ماهرة في حدف الأبناء بالشباشب بس لله الأمر من قبل ومن بعد

والله يا مصر انتي خسارة فينا

صبرني يارب يقول...

استاذنا

بجد حضرتك عملت حاجه فى موضوع الاعلان

طيب ماهو انا قلت لحضرتك قبل كده ان كان فى فيلم بيصب فى نفس الاتجاه

تقريبا كان اسمه ليلة سقوط بغداد

وكان بيحول اي كلمه وطنيه اساسا واي حماسه وطنيه لشكل مبتذل ورخيص من الكومديا
بجد انا كنت قرفانه منهم

ومن فضلك لو هاترفع قضيه على المستورد انا لازم اكون معاك فى الموضوع ده
حقيقى انا نفسي ارفع مليون قضيه فى البلد دي
ويا احنا يا هما
واحنا ان شاء الله
تحياتي لحضرتك

arsenalwy يقول...

لا اله الا الله

للدرجة دى

الناس للاسف بتفتكر ان ده انتماء لما تجيب حاجه عليها علم مصر حتى لو بتتلبس فى الرجل

للدرجة الدى الناس بقت ساذجة

همسه يقول...

على فكره يا استاز عمررررررو
اولا
انا اللى مزعلنى ان الصناعه مش مصريه
يعنى
حتى شبشب
علم مصر
صينى
وهيا دى المصيبه
على أسم مصر. التاريخ يقدر يقول ما شاء. أنا مصر عندى.
واهو قال التاريخ
ما شاء
علم مصر على شبشب
شبشب
يا انجازاتك
يا ريس
غنواااااااا معايا
علشان كده احنا اخترناه

انا قبل ايام شفت اللاعب المصري المحترف في الدوري الالماني محمد زيدان في مقابلة معة على قناة o tv المصرية وراهم جزمة عملاها لة شركة بوما خصيصا وفيها علم مصر يعني اللاعب ماعندو عقل علم بلدك تحطه في جزمة في رجلك بدل ما تحط علم بلدك في تيشرت على صدرك

لكن زي ما قال الشاعر صلاح جاهين (عجبي )


فين شوقى لو كان معانا دلوقتى كان قال:وطنى لو شغلت بالخلد عنه ..هايرسمو علمه على شبشب

اوعوا تزعلواااا
بجد فعلا

ممكن يكون المصدر حس اننا لا نستطيع تصنيع شبشب وطنى فصعبنا عليه وحقق لنا لبس العلم الوطنى اهو كله وطنى

الازهرى يقول...

عاوز أعرف مين المسئول اللى يستحق الحرق حيا

بس كده
المسئول هو الشعب الذى رأى هذا المنتج وفرح به واشتراه واغرى صانعه بالمزيد من الارباح فتوسع فى انتاجه

تفتكر نقدر نعدم المسئول ؟

leeno يقول...

عندك حق فعلا تغضب كل الغضب دة

س دة جزء من كمية استهتار منتشر بشكل مفزع الايام دي في مصر و العالم العربي و حيوصل لفين الله اعلم

احساس طفلة محبة للرومانسية بس واقعية يقول...

المكسب السريع وتذليل الكلمات اللى ملهاش معانى فى اعلانات ملهاش لزمة لمنتجات ملهاش لزمة وقلنا ماشى
بس علم بلدنا فين الكلام اللى اتعلمناه
نبيعه عشان كسب مادى رخيص طيب لية

الأحمر في الأعلى: يرمز إلي اللون الأحمر هو لون التوهج، و هو أقوى الألوان وأكثرها تعبيراً عن القوة و الأمل و الإشراق و التقدم ويرمز أيضا إلي دماء الشهداء.

الأبيض في المنتصف: لون يعبر عن النقاء و الصفاء والسلام

الأسود في الأسفل: يعبر عن عصور التخلف و الاستبداد و الاستعمار، و التي ولت بغير رجعة و هي لتذكرة للأجيال بهذه الأيام الصعبة التي ناضل فيها الأجداد ضد الظلم و الظالمين .

و في المستطيل الأوسط يوجد النسر وهو أقوي الطيور بلون ذهبي وينظر ناحية اليسار ويعبر عن قوة مصر وحضاراتها

مش عارفة اقول اية
موضوع مؤلم

تقبل مرورى

ذو الوجه المبتسم يقول...

السلام عليكم
تعرف بجد يا استاذى العزيز
شوفت الصورة للشبشب ده
نفسي اتسدت
المسؤل الحقيقي هو الجهل
مش جهل التعليم
جهل بعض الناس بشئ اسمه الوطن
شئ اسمه حب الوطن
للاسف فيه افكار مزروعة عند اناس ؟؟؟؟ مش عارف اوصفهم بايه
وللاسف الاكبر للمعلومية اننا بنعانى خارج مصر بسبب الناس دى
وبسبب جهل بعض المصريين بالوطن هنا مثلا بالسعودية
تخيل اللى بيحصل هنا بين بعض المصريين
علشان مطلوش فى التعليق لان الموضوع بجد كبير
تخيل انك قاعد مع سعودى مثلا وبيكلمك عن المصريين وعن افعالهم الغير لائقة
هترد عليه تقول ايه
كلامى بنفس نطاق الموضوع
لان لو اللى صمم وصور الشبشب ده عنده جزء ولو بسيط من الوطنية
معتقدش انه كان هيعمل كده

مصر امى
مصر يا شامة وعلامة
مصر حبى
وانتى يا نبع الكرامة

تقبل تحياتى لك ولكل مصري وطنى بيغار على وطنه

سنابل قمح يقول...

ايه ده ؟انت بتتكلم جد ؟
لأايه ده ؟
أنا شايفة صح ؟العلم ؟

بعد ما كان فوق الراس دلوقت بقي مداس ؟
طبعا بعد ما هان على عساكر أمن الدولة وقطعوه من ادين المتظاهرين وداسوه بجزمهم
لو حد ح يتحرك لوقف المسخرة دى أنا معاه

سما الحب يقول...

ده حد بيرد علي اننا حطينا علم امريكا علي الشبشب وفرشة الحمام
بيقولنا انتو كمان علمكم اهه علي الشبشب بتاع الحمام
فصبر جميل والله المستعان علي ما تصفون
(حسبنا الله ونعم الوكيل )فيه طبعا

Dr.safy يقول...

اولا شكرا على تعليقك على مدونتى البسيطه واشكرك على رايك المجامل..ولكن كنت انا المستفيده الاكبر بمرورى هنا استفدت كثيرا هنا ولكنى احببت ان اترك تعليقا على امر علم مصر التى يعلم الله انى اشعر انها ملامحى ودمى واغار عليها بدرجه لا توصف فتصور كم كانت صدمتى برؤية هذه الصوره التى ارهقنى النظر اليها حزنا
ماذا نفعل ان كان الحال وصل بنا لان نخطو على رمز وجودنا فقط اقول حسبى الله ونعم الوكيل فى هؤلاء