~SUN~ Pictures, Images and Photos

الثلاثاء، 7 أبريل 2009

الكلام ده كبييير !!

مساء الخير أعزائى المدونات و المدونين ..
حيث أن الواحد نفسيته تعبانه و روحه المعدنيه فى الحديد ( يعنى الروح المعنويه فى الحضيض ) على رأى سيد زيان - ربنا ياخد بيده - و بما أن العمليه فى النمليه و الفانله فى الجونله و العقل عايم فى البالوظه من اللى حصل اٍمبارح من أحداث كوميديه هزليه لا تصدر اٍلا من الشعب المصرى اللى أتشرف باٍنتمائى له و اللى أثبت شىء أزعم أنه أنفرد به دونا عن شعوب الدنيا و هو أنه من الممكن أن الاٍنسان يعمل اٍضراب فى سره يعنى بالنيه كده .. و طبعا الأعمال بالنيات و لكل اٍمرىء ما نوى و أنا بقى نويت أهيس النهارده و رزقى و رزقكم على الله و أهو يوم و عدا و اللى يمشى ورا العيال صحيح ما يخلاش من التقريص و بالروح و الدم نفديكى يا كوستاريكا ..
المشهد العبثى الأول :


Click to get cool Animations for your MySpace profile

- عارفين هايبر وان اللى فى مدخل مدينة الشيخ زايد ؟؟ طيب كويس ..
أول ما تدخلوه كده حتلاقوا شاب وجيه بيصطاد اللى داخلين و بيعرض عليهم الاٍشتراك فى مسابقه ما أعرف و لا أيه حاجه كده يعنى للفوز برحلة العمره ربنا يكتبها لنا تانى و تالت يا رب ..
المهم فى يوم من ذات الأيام و أنا داخل أتسوق كان الزحام شديد و ماشى جنبى بالصدفه رجل دين مسيحى يعنى قسيس و لابس لبس القساوسه و معلق صليب قد كده على صدره و اٍذا بيا أتفاجىء بالشاب بتاع العمره يسيب كل اللى داخلين و يقع على أبونا القسيس و يعترض طريقه و يدور هذا الحوار العبثى بينه و بين أبونا اللى أوقعه حظه فى هذا الشاب الغبى غباء مسوجر لم أجد له مثيلا فى حياتى :
- الشاب الغبى : السلام عليكم ..
- أبونا القسيس : و عليكم السلام ..
- الشاب الغبى و على وشه اٍبتسامه غبيه زيه : فيه فرصه لحضرتك تشترك معانا و تفوز برحلة عمره و زيارة قبر الرسول عليه الصلاة و السلام ..
- أبونا القسيس و قد فنجل عينيه من الدهشه : أيه أيوه حاضر آه !!
- الشاب الغبى و قد اٍزدادت اٍبتسامته اٍتساعا : طيب أتفضل حضرتك معايا علشان تشترك فى المسابقه ..
القسيس وقف محتار مش عارف يتصرف اٍزاى مع كتلة الغباء دى و قد اٍزدادت عيونه اٍتساعا و كأنه غير مصدق لما يسمع !!
هنا بقى ماقدرتش أمسك نفسى عن اٍطلاق ضحكه مجلجله لا تصدر منى غير لما بأتفرج على مارى منيب رحمة الله عليها و هى بتقول لعادل خيرى رحمة الله عليه برضو : أنتى جايه أشتغلى أيه ؟؟
و رحت موجه كلامى للشاب الغبى و قلت له :
- يعنى أنت مش شايف لبس أبونا القسيس ؟؟ جايز !! لكن كمان مش شايف الصليب اللى على صدره ؟؟!!
هنا بقى الجدع يا قلب أمه بانت عليه الحيره و تأمل فى أبونا اللى وقف ساكت ينظر اٍلى لا شىء و تهته و قالى بصوت خفيض :
- يعنى أيه ؟؟
هع هع هع هع
- المشهد العبثى التانى :

فى هايبر وان برضو .. صدفه يعنى :)

من ييجى سنتين كده كنت بأتسوق فيه و فجأة ألاقى قدامى الكابتن حسن شحاته و كان وقتها لسه الفريق القومى المصرى - أدام الله وقائه - حاصل على بطوله كبيره ناسى أيه هى حيث أنى ماليش فى الكوره لكن ليا فى الفرحه بفوز أى شىء مصرى .. و كان الفوز ده شاكح قلوب كل المصريين - أدام الله اٍنشكاحهم - فمن فرحتى بيه حيث أنه قاد الفريق للنصر كمدرب محترف و معلم بيخللى الكوره تتكلم توجهت اٍليه مباشرة و سلمت عليه بحراره و الحقيقه أن الراجل كان ذوق جدا و بادلنى السلام بحراره أشد و أبتسم و أنا بأصوره بالموبايل علشان أغيظ الواد أبنى الكبير اللى هو أهلاوى متعصب و بيجيله تخلف نصفى و أحيانا رباعى لما الأهلى بيتغلب :))

المهم بقى أسمعوا الحوار العبثى ده بينى و بين المعلم حسن شحاته و صدق من سماه معلم :
أنا :
- تشرفت بمقابلة حضرتك يا كابتن و على فكره دى تانى مره أسلم فيها عليك ..
الكابتن حسن شحاته مجاملا :
- أبوه طبعا فاكرك ..
قلت له و أنا بأضحك :
- ما أفتكرش يا كابتن لأن أول مره سلمت فيها عليك كان من حوالى 30 سنه :))
سألنى بود و هو بيبتسم و بيتأملنى بعيونه الملونه الحاده اللى زى عيون الصقر :
- يااااااه !! و ده كان فين بقى ؟؟
- فى الجزائر و كنت حضرتك بتتمشى حوالين المدينه الأوليمبيه و كان معاك الكابتن محمود الخطيب و الكابتن اٍكرامى قبل مباراة مصر و الجزائر بيوم و كنت أنا و معايا أتنين صحابى و عرفناكم بنفسنا أننا مصريين و فرحنا أوى أوى أننا قابلناكم و وقعتوا لنا على الكوره اللى كانت معانا و قلتوا لنا حنغلب الجزائر 2 صفر ..
توضيح : الكلام ده حصل فى منتصف السبعينيات و كنت وقتها فى أولى ثانوى و كان معايا الواد هشام بديع اللى هو دلوقتى مدير عام شركة أليكس تورز و الواد سامى كمال اللى هو دلوقتى برضو صاحب أكبر مصنع للأثاث فى الجزائر اللى أستمر فى الحياه فيها و تزوج جزائريه و أنجب منها زوربة عيال .. و قابلنا الكباتن بيتمشوا خارج القريه الأوليمبيه اللى كانت حاجه فريده من نوعها فى وقتها يعنى و كانت مفخرة الجزائر فى منطقه اٍسمها بن عكنون ..
بعد ما فكرت الكابتن حسن شحاته بأول مقابله من 30 سنه سرح شويه كده .. و أكتمل الموقف العبثى لما قال و هو بيبتسم ببساطه :
- أيوه أيوه بأمارة ما كان معاكم كوره صفرا ..
و ده حقيقى !! الكوره اللى معانا فعلا كانت صفرا !!!!
يا خبر زى بعضو !! معقول يا كابتن فاكر موقف صغنون زى ده حصل من 30 سنه ؟؟؟!!!!!
طيب أحلف بسماها و بترابها أنا ما فاكر أتعشيت أيه اٍمبارح ..
و
هع هع هع هااااااع
الموقف العبثى التالت :

pyro, or stupid? Pictures, Images and Photos


- لما حبيت أركب جهاز تكييف فى أوضة نومى كلمت صاحبى المهندس ياسر و سألته النصيحه .. فالراجل الحقيقه نصحنى أركب جهاز تكييف شباك مش عارف كام حصان ماركة أيه بما يتماشى مع مساحة الأوضه .. و أتفقنا على السعر و ميعاد التركيب ..
و فى الميعاد المحدد لاقيت 2 شباب و معاهم باشمهندز كبير فى السن عنهم شويه جايين و جايبين جهاز التكييف المنتظر و شوية خراطيم كده و كابلات و هيلتى و حاجات كده يعنى ..
- أهلا و سهلا أتفضلوا نورتوا و شرفتوا ..
ده أنا اللى بأقول ..
و بحسن نيه شاورت لهم على أوضة نومى و فهمتهم أنى عاوز جهاز التكييف يركب هنا بس بعيد عن السرير علشان هواه الساقع ما يبردش اللى نايم و ده من حقى بصفتى مواطن صالح و ماليش فى اللبط ..
الباشمهندز اللى معاهم طمنى باٍبتسامه واثقه كده و أبتدوا يطلعوا العده علشان يشتغلوا .. أنا الحقيقه صوت الهيلتى و الشنيور و الدق و الحاجات دى بتعمل لى حاله اٍرتجاجيه فى المخيخ الأوسط و بتسمع فى فى القولون المستعرض و بأبقى زى الغرقان فى بحر العسل و الطحينه ففضلت أنى أغادرهم لشئونى و أسيبهم يشتغلوا ..
طيخ طاخ طوخ طيخ برررررررررررررر طوخ طيخ طوخ زربو زربو طاخ طاخ طاخ طيخ طوخ طوخ طوخ !!!
و اٍذا فجأة تصمت كل هذه الأزعرينه بعد حوالى نص ساعه كده من الهبد المتواصل و يسود هدوء تاااااااام و لا الهدوء بين المتزوجين اللى ناويين يعملوا فى بعض عمله سوده !!!
قلت فى عقل بالى يا واد قوم اٍستطلع و شوف أيه الأخبار ..
و دخلت عليهم .. لاقيتهم فتحوا فعلا فتحه مربعه فى الحيطه على قد جهاز التكييف .. و لكن و ياللعجب العجاب أن الفتحه دى كانت مظلمه تماما رغم أننا لسه الظهر !! بصيت للفتحه و بصيت لهم لاقيتهم مطرطرين وشهم فى الأرض و لسان حالهم بيقول اٍنشقى يا أرض و أبلعينا !!
ليييييييه ؟؟
لأنهم بذكاوتهم اللى ليس لها مثيل سوى ذكاء الشاب الغبى اللى عاوز القسيس يطلع رحلة عمره و يزور المسجد النبوى فتحوا الفتحه العجيبه دى فى الحيطه المشتركه بين أوضتى و أوضة نوم الواد الكبير بدل ما يفتحوها على الشارع !!!!
مش كده و بس .. الموقف العبثى الحقيقى اٍكتمل لما الشاب اللى كان بيخرم الحيطه و بيكسرها قال بندم و هو بيلطم و الدموع قى عينيه :
- و أنا لما خرمت الحيطه بالهيلتى خرم صغير و بصيت منه و لاقيت الدنيا ضلمه قلت فى بالى هى الدنيا لحقت ليلت ؟؟!! أنا عاوز أولع فى نفسى و ربنا المعبود اٍهىء اٍهىء
و
هع هع هع هاااااااااع
يا جماعه بصدق و الله من كتر ما فهمت مدى عبثية الدنيا خلاص مابقتش لا أزعل و لا أحزن و لا أتنرفز و لا أجعر لكن بقيت أضحك من قلبى حتى فى أشد المواقف عبثيه ..
عارفين ليه ؟؟
علشان مافيش حاجه تستاهل الزعل :)

هناك 28 تعليقًا:

شمس النهار يقول...

لأ فعلا كلام كبير اوي اوي اوي
دي ناس مهيسه ومديه عقولها اجازه طويله شويه يابختهم بعقولهم الجميله دي
احسن من الديزل اللي عندي اللي مش عارفه اعمل فيه ايه

عمرو وجيه يقول...

السلام عليكم


ثلاث حكايات ناتجة عن تجارب في حياة حضرتك



بس اللي مش قادر اصدقه بجد هو فيه غباء بالشكل ده



:)



اتمني اكون خاطئ


بالنسبة للكابتن حسن شحاته

بجد ربنا يكرمه

عامل شغل جامد مع المنتخب


ربنا يثبته



بجد بوست رائع يا استاذ عمرو


والله قريته بسلاسه جدا


أسلوب مميز نابع من خبرة حياتية


بجد سلمت اناملك

حلوة الدنيا يقول...

هههههههههه اضحكتني بالحكايات الغريبة دي
انا لو شفت الكلام ده في فيلم حقول الكاتب بيسخر من عقول الناس

بس واضح في الحكايتين الأولي والثالثة ان الحشيش اكل دماغ الناس علي الأخر

اما حكايه كابتن حسن شحاته فبصراحة لو فعلا قال لون الكورة من الذاكرة ومجدتش معاه كده فالواحد ميقولش غير ماشاء الله علي ذاكرته

حلوة الدنيا يقول...

اه ونسيت أقولك علي الأضراب هو الي نجحه السنة الي فاتت احداث المحلة وبعدين الشعب المصري بشخصيته الحالية مش يتاع اضراب ولا شغب ولا اعتراض

الشعب دولقتي متقسم 10%ماشي جوا الحيط وعايز يعيش بأقل حاجة والباقي 75%منهم حرامية وبقيتهم بيحاول يبقي حرامي ومش عارف

شاب كــ طخين ـــــا يقول...

اول واحد ده
نسبة التهييس عنده كبيرة اوى
ده بايع دماغة وشكله خسران فيها خسراة مؤلمة
ولاخسارة مصر اربعه من السودان :D

_______________

اما الكابتن حسن شحاته
اول لما شوفت صورته فى الريدر عندى كنت هطير من ***
ده لسه من ايام خنقنا بماتش زامبيا
وتشكيله الفلسفى المربع فى المثلاثات ومستدير عند نزلة السمانة مباشرة

بس فقرة الكابتن حسن شحاته فيها نقطتين اهم من الكورة الصفرا

الأولى : انك سلمت على بيبو وده حاجه كبيرة اوى هههههههه يبختك وياريت فى السبعينات كان معاك كاميرا 24 صورة ابيض واسود ماركه (كله بيطلع فى الغسيل ) وكنت اتصورت معاه :D


والتانيه:ابنك الجامد اوى الأهلاوى ده بقى هديه من ربنا اصل الأهلاويه ناس جدعان اوى

____________
بوست جمسل اوى يا أ/عمرو
واجمل حاجه اننا لازم نضرب فى سرنا او با النيه حتى الحاجات دى بتتحسد والبلاد المتقدمه عينها تفلق الحجر

أمل حمدي يقول...

ههههههههههههههههههههههه

بجد شر البلية ما يضحك

انا معاك والله يا عمرو ان افيش حاجه تستاهل الزعل

ولا حتى الدنيا كلها

بس انا بكره الغباء بيموتني

بس بيريح صاحبه

ربنا يعافينا

سلام

mahasen saber يقول...

شاكره ليك جدا جدا جدا لانى ضحكت بجد ومن قلبى

وياما فى الدنيا من ضحكات من صنع البشر

بجد كان نفسى اضحك مع انى طول اليوم بضحك

صبرني يارب يقول...

ايه ده يا استاذنا

طب يعنى انت سبت بتوع المكيف يروحوا

انت بتعمل زي رضا

بالله العظيم كنت بالهلتي عملتلهم وشهم مصفاه لو ما رجعوا الجدار زي ما كان اييييييه ده


وبالنوسبه للحاج الغبي بتاع العمره اصلهم بيبقوا شغالين ببتاريه صينى كده اول ما يلزقوا فى حد اجارك الله عارفااااااااااهم


مواقف فعلا جامده

ويالنسبه للاضراب انا ما شاركتش فيه ولا معنويا لانى مش شايفاه مجدي ابدا ولا هو حتى له شكل معين ولا احنا كشعب لنا مطالب معينه احنا بنعترض وبس

واكاد اجزم ان الى بيتكلموا عن الاضراب دول لا فاهمين حاجه ولا عارفين حاجه ولا حاسين بالناس فعلا

وايه ده لازم نطلب الشغل عشان يتعمل ولا ايه
ههههههههههههههههههه

تحياتي لحضرتك يا فندم

احساس طفلة محبة للرومانسية بس واقعية يقول...

مش ممكن مش قادة ابطل ضحك
اخر موقف دا نكتة بجد

هو لسة فى غباء كدا

عجبنى اوى حكمتك وتمسكك
وعدم غضبك السريع لمواقف زى كدا

ربنا يزيدك ويسعدك دائما
تقبل مرورى

طوبه فضه وطوبه دهب يقول...

عندك حق مافيش حاجه تستاهل الزعل واحمد ربنا انه فتح الفتحه على اوضه نوم ابنك مش على حته تانيه وذى مابيقولوا قضا اخف من قضا والله لذيذ اوى موضوعك اول زياره وان شاء الله مش الاخيره

dreem يقول...

هههههههههههههههههههههههههههههه
ضحكتنى يا عمرو والله وانا ماليش نفس اضحك .. روح يا سيدى
أضحك الله سنك

الازهرى يقول...

لالالالالالالا
الموضوع كبر خالص
فعلا فى مواقف كتير من كتر الغيظ بنضحك جدا جدا جدا

المهم انى عرفت انى اشترك معاك فى عدم الاهتمام بالكورة

واحلى حاجة فى الموضوع كله

و لا الهدوء بين المتزوجين اللى ناويين يعملوا فى بعض عمله سوده !!!

ولا تعليق

عاشقه وغلبانه يقول...

المحله امبارح كانت ملغمه امن مركزي تحسبا لاي اضراب بس ماحصلش
والحمد لله ان الاضراب بصوره السنه اللي فاتت ماتكررش

بالنسبه بقي للشاب الغبي
فده تبصله كده وتقولك سبحانك ربنا ماخلقت هذا باطلا

حسن شحاته من سنتين زي ماحضرتك بتقول كانت امم افريقيا 2006 اللي فازت بيها مصر

ولا تعليق علي حسن شحاته حتي لو دهنوهولي عسل

اخر حاجه بقي
عملت ايه في الحيطه
هذا هو السؤال

حاسوباتيه يقول...

لا لا اخر واحده دي فظيعه ده راجل فظيع انا لو ماكان حضرتك كنت جبتله الولاعه علشان يولع في نفسه بصراحه ده ربنا بيحبه انه عمل كده مع حد زي حضرتك استحملته لو انا بقى يالهوي كنت مت فيها لانه بوظلي الاوضه
بالنسبه للقسيس والعمره فبصراحه لا تعليق غير هههههههههههههه ربنا يشفي

بالنسبه للمعلم زي ما بيسموه فانا صفر في الكوره

همسه يقول...

بعد طول تفكير وبعد ما عصرت مخى
وانا اسال نفسى
اه سبب
الزكاء الواضح جدااااااااااااا لشبابنا
اللى هوا
مستقبل مصر
وخصوصا فى موضوع البابا
وموضوع غرفه النوم
وصلت لنتيجه
شبه مؤكده
تقريباكده ياسكر يا ابو دم اجمل من العسل
العيب مش فى عقول الشباب
دول جيل المستقبل
واللى ههههههههههههه
ها يحرروا القدس
يبدو كده والله اعلم ان العيب
فى هايبر وان
او فى مدينه الشيخ زايد عموما
او فيك انت شخصيااااااااااااااااا
تحياتى ليك وللبابا
ولهايبر وان
ولعقلى
اللى كان
وبالنسبه للمعلم حسن شحاته
ربنا يسعده ويهنيه بصحته وبذاكرته مع ارق تحياتى له
يووووووووووووووه
نسيت
انا اهلاويه
بااااااااااااااااى
بااااااااااااااااااااى

خمسة فضفضة يقول...

السلام عليكم ورحمة الله وبركاته

هههههه لا بجد ناس جامده اوي ربنا ما يحرمهمش من عقلهم يا رب

:)))


حسن شحاته:
ما ننكرش ان له دور كبير في البطولات اللي خدناها في الفتره الاخيره خصوصا ان شخصيته القويه مخلياه قادر يسيطر علي المنتخب ويطلع احلي ما عند اللعيبه
بس اللي مساعده ان معاه مجموعة لاعيبه فرز اول وعندها اصرار علي الفوز دا كفايه ابو تريكه ربنا يكرمه يارب

واعتقد ان اي مدرب حتي لو معاه الابتدائيه ومعاه شوية اللاعيبه دول كان لازم يعمل ده

الاضراب :

جوزي جاي من بره يقولي ايه ده انتي بتضحكي علي وتقوليلي فيه اضراب دا المواصلات زحمه جدا اكتر من اي يوم
تقريبا الناس كانت خارجه تتفرج علي الاضراب

وبيني بينك بقي مش شايفه اي جدوي من الاضراب ده لا السنه دي ولا بتاع السنه اللي فاتت وماشاركتش لا السنه اللي فاتت ولا السنه دي

صحيح شاركت في اضراب الصيادله لانه كان بتنظيم من النقابه وتحت قيادتها وله شرعيه وكان لينا مطالب محدده وعندنا ممثلين بيتكلموا بلسانا ويتفاوضوا مع المسؤولين

بس ممكن حد يقولي الاضراب العام ده من اللي واقف وراه وايه المطالب المحدده اللي في 1 2 3 عاوزين نقدمها للحكومه ونخليها تواقف عليها
طيب لو بطلنا كلنا شغل ليوم واحد دا هايعمل ايه وهاياثر في الحكومه في ايه يا سيدي دا من بعد ما تعتبره يوم اجازة ولا هاياثر فيها

انما احنا لما عملنا اضراب الصيادله كان اضراب مفتوح لحد ما ينفذوا مطالبنا المحدده كان مؤثر وبيوجع لما وزارة الصحه صحيت الصبح لقت نفسها ضهرها للحيط ومافيش ولا صيدليه فاتحه وهي اصلا ماعندهاش امكانيات تقدر تواجه بيها ربع الحالات اللي بتدخل المستشفيات ، دا فيه مستشفيات مافيهاش بنج كفايه خلينا ساكتين

اما اضراب 6 ابريل اللي خلاه ياخد اهميته انه اعتمد السنه اللي فاتت علي عمال المحله اللي هما اصلا عاملين اكتر من اضراب خلال 2008 و 2007 عشان مطالب محدده وخدوا فعلا معظمها وواقف وراهم نقابتهم وقياداتهم العماليه ، يعني من الاخر كان مجرد لعبه والصدفه البحته هي اللي خلت اللي حصل يحصل مع بعضه في وقت واحد ويتنسب لناس معينه كانت فكراهالعبه من ورا شاشات الكمبيوتر علي الفيس بوك والتويتر

عموما كل اضراب وانت طيب


سلام

من غير عنـــوان يقول...

اللي يعيش يا يشوف

للأسف يا عمرو العزيز إنه ناس كتير دلوقت أصبحت تصرفاتهم خارج حدود العقل والإستيعاب

تحياتي

ملحوظة:
كالعاده اسلوبك ممتع

Unknown يقول...

هع هع هع هعععععععععععععععععع
تحفة والله العظيم الله ينور بجد بجد يعنى
انا ضحكت من جوانيات قلبى من جوة

رحلتنا في الحياة يقول...

هههههههه الغباء ليه ناسه :)

kochia يقول...

هههههههههههههههه
بجد والله ربنا يبسطك
انا بضحك بقالي 15 دقيقة علي الموقف الاول والاخير
ايه الناس دي

الاولطبعا اكثر غباءاااااااا من الاخير والباشمهندز بتاعه

يلا
ربنا يشفي

اما الكابتن بقي فبصراحة راجل ذوق ومحترم وما شاء الله ذاكرته حديد

بوست ظريف اوي
تحياتي

بنت الغربة يقول...

ههههههههههههههههههههههه
بجد بوست زى العسل..هزلى فعلا ..
فعلا مفارقات عجيبه ..بس اللى عجبتنى قوى حكايه الاخ اللى فتحلك شباك على اوضة ابنك...بجد مالوش حل ...
ربنا يكون فى عونك والله مقلب وحش قوى قوى ..
تحياتى ليك ولبوستاتك الجميله

♥نبع الغرام♥♪≈ يقول...

السلام عليكم ورحمة الله وبركاته
سيدى الفاضل تقبل مرورى
بجد جميل قووى الكام حكايه والكام تجربهاللى فى حياة حضرتك وكل وحده مختلفه وليها طابع خاص
هههههههههههههههه
بصراحه انا ضحكت قووى
وملعون ابو الزعل
؟؟علشان مافيش حاجه تستاهل الزعل :)
ربنا يوفقك ويسعدك ياقمر
تقبل تحياتى
سلالالالالالامى

MǿиY El-Shreef يقول...

طيب اضحك ولا الطم

والله الضحك اسهل هههههههههه

بجد مت من الضحك ع الولد الي كلم القسيس

والتاني بتاع التكيف

ههههههههههههههه

المدونه دي زي العسل انا اول مره اجي

ومش هتبقى اخر مره ان شاء الله

بسنت صلاح الدين يقول...

هما دول فعلا النوعيه اللى بنعتمد عليها عشان البلد تتقدم بينا؟؟؟ و انا اقول التقدم ماله ماشى الناحيه التانيه، عموما الفول بينفى مسئوليته عن عمليه تجميد عقول المصريين هههههههههه، بس تصدق هاتلاقى دول الناس المرتاحه ولا حاسه بحاجه اصلا ، و فى الحاله دى لازم نعتمد كلنا اسلوب البرود سيد الأخلاق عشان مايجرالناش حاجه

عمرو يقول...

شمس النهار
أهلا بيكى يا برنسيس
الديزل اللى عندك ده له حل واحد : أنه يقف فى محطة الوصول بقى :)

عمرو يقول...

عمرو وجيه
لا و الله صدق لأن المواقف دى حصلت معايا فعلا و تعجبت زيك من كم الغباء اللى بيصيب بعض العقول فبيتربسها تربسه لا فكاك منها ..
أشكر على الاٍطراء و أهلا و سهلا بيك :)

عمرو يقول...

جعلونى مريض نفسيا
الغباء له ناسه يا صديقى و بيبقوا سعداء بنفسهم و فرحانين بغبائهم :)
أهلا بيك و عاوزين نقرا لك بوست قريب ..

leeno يقول...

و ماله !!!
لا شاف الصليب

و لا الواد التاني شاف الفتحة انها على الاوضة التانية !!!!!!


ايييه دة ياربي !