~SUN~ Pictures, Images and Photos

السبت، 10 أكتوبر 2009

السيكوباثيه سلوك فردى ربما ينقلب لسلوك مجتمع بكاااااامله


مساء الخير ..
حأدخل فى الموضوع على طول علشان أعزائى اللى بيشتكوا من طول بوستاتى مايتضايقوش .. مع أن الحكى يحب كتر الكلام و الكلام يحب السلام و السلام طاير حمام و ما يحلى الحكى اٍلا بذكر سيدنا النبى عليه أفضل الصلاة و السلام ..
دلوقتى أنا ملاحظ أنه بقى فيه اٍتجاه جماعى ناحية السلوك السيكوباثى بعد ما كان فيما مضى سلوك فردى و شخصى ليس بالندره يعنى و أيضا لم يكن بالكثره اللى بنشوفها اليومين دول و ده مؤشر خطير يدعو للقلق بجد ..
للاسف لم يعد من النادر أن نقابل فى حياتنا اليوميه أشخاص يتسم سلوكهم بالسيكوباثيه .. بل و لم يعد من العسير أن نتفاجىء بشخص ما يفتخر بغير قصد منه و لا علم بخصائص هذه الشخصيه شديدة التعقيد و الوعوره أنه سيكوباثى بكل ما تحمل الكلمه من دلاله ..
طيب .. ما هى خصائص هذه الشخصيه الغير سويه و الخطره جدا على الآخرين ؟؟
السلوك السيكوباثى عرفه علماء التحليل النفسى بأنه سلوك بيسير دوما فى اٍتجاه واحد و هو سلوك الضرر بالمجتمع و اللى فيه نتيجة لسعان مستمر فى فيوزات عقل الشخص بيولد كم عنف مهول و شرير حتى لأقرب الناس له و فيما نشاهد من جرائم مستحدثه على المجتمع شديدة القسوه و الدمويه خير شاهد على هذا .. لأن السيكوباثى بيكون مندفع متهور .. متبلد الحس .. عمره ما يشعر بالندم و لا بالذنب .. اٍنسان أنانى و صعب يتعرف سبب أنانيته ..
الشخص السيكوباثى بيبقى غير ناضج عاطفيا .. فاقد للقدره على عمل كونترول على دوافع و محفزات سلوكه الشخصى .. فاقد الرادع لضميره و لا يشعر بالندم على تصرفاته المشينه تجاه المجتمع و قيمه العليا ..
علاقته بالآخرين علاقات كلها سطحيه و أى كلام مايقدرش يحافظ على علاقات دائمه و لا حتى صداقات طويلة الأمد .. و ده برضو بينطبق على علاقته بزوجته و أولاده اللى بيستغلهم طول الوقت زى ما بيحاول يستغل كل المحيطين به بمختلف الطرق المشروعه و الغير مشروعه ..
السيكوباثيك اٍنسان وصولى متطفل يسعى للتقرب من أصحاب السلطه و يتمسح بهم و يعملهم أراجوز علشان يظل فى ركابهم و لا يجد أى غضاضه فى أن يستعمل أحقر الطرق و أدناها للوصول لهدفه ..
مش بيكون عنده خجل و لا اٍحساس بالعيب و لا شهامه و لا نخوه و لا اٍحترام للآخرين .. كمان بيمتاز السيكوباثى بفقدان شعور الرحمه و التعاطف مع الآخر .. بيفقد شويه بشويه ملكة التفكير المنطقى اللى بيتماشى مع عادات و تقاليد مجتمعه ..
السرقات الصغيره التافهه سلوك لدى السيكوباثى و غالبا بيكون مش محتاج لهذه السرقات اللى ممكن تكون مجرد قلم أو ولاعه من أم جنيه و نص المهم أن يشعر بالرضا الداخلى حال اٍيذائه للمسروق ..
بتحصل له اٍثاره جنسيه مفاجئه ربما بدون سبب واضح و بينساق برضو فجأه خلف نزواته بدون تفكير عقلانى لا فى الدوافع و لا فى العواقب و ده بيفسر بوضوح جانب خفى من حوادث التحرش الجنسى الفردى و الجماعى زى ما رأينا مؤخرا ..
لما بيصل الأمر للقتل بيكون عنيف جدا و بيتعمد تعذيب ضحيته أولا قبل الاٍجهاز عليها و قد يغتصب جثة ضحيته بوحشيه و قد يمزقها أشلاءا للتخلص منها بقسوه و بقلب ميت و عين لا ترمش ..
السيكوباثى اللى غالبا بيمتاز ببنيه قويه و جسد رياضى بيبقى كييف يأذى الأخرين بأى شكل و لو حتى اٍيذاء نفسى و بيشعر بمتعه فائقه لما بيقدر يفلت من العداله مستعملا حيله و طرقه و أساليبه الملتويه لكن لما بيقع بيولول و يقول تعالى لى يا امه و يبكى و يبوس الشوز طلبا للرحمه ..
الجماعه النفسنجيه ( يعنى بتوع علم النفس ) قالوا اٍن السيكوباثيه بتبدأ فى التكوين داخل النفس البشريه بعد سن المراهقه بشويتين .. و أنا لى رأى مختلف برضو شويتين ..
فى رأيى المتواضع أرى أن السيكوباثيه بتتكون لدى الشخص فى سن مبكره غالبا فى السن ال 13 .. لييييه؟؟
لأن ده السن اللى بتتطور فيه السلوكيات الغير مقبوله نوعا لسلوكيات منحرفه تماما و أهم علامه له هى الكذب عمال على بطال .. يعنى المراهق يبدأ الكذب فى الصغيره و الكبيره بدون سبب منطقى و يبقى الكذب فى حنكه زى اللبانه حتى فى الأمور اللى لا تحتمل الكذب و لا تستحقها ..
نضيف على الكذب اٍهتمام المراهق المبالغ فيه بالأمور الجنسية و السعى لفهم جوانبها الخفيه بغض النظر عن مصادر معلوماته اللى غالبا كلها تخاريف و كلام غير مقبول ..
السيكوباثى الصغنون اللى لسه بيتكون ممكن كمان يجرب التدخين و المخدرات و الكحوليات و يقلد الكبار فى كل شىء بما فى ذلك العنف و الدمويه و القسوه و اٍيذاء الآخرين ..
أزعم و بقلب جامد أن السلوك السيكوباثى بينشأ لدى الأشخاص اللى أتربوا فى طفولتهم على الطاعه العمياء اللى لا مناقشه فيها على يد أبوين قساه طول الوقت بيدوا أوامر لا جدال فيها بغير حتى ما يغلفوا هذه الأوامر بشىء من الرحمه و الحنان .. بالاٍضافه للعامل الاٍقتصادى و الاٍجتماعى اللى نشأ فيه الشخص المريض و كمان السمات
الشخصيه و الخصائص الوراثيه ..
و لذلك نجد أن السلوك السيكوباثي بيبدو واضح و جلى فى المجتمعات اللى رزحت سنين طويله تحت حكم ديكتاتوريه مطلقه عودت شعوبها على الخضوع و العبوديه و ليس لهم أى حق فى المطالبه بالعدل و المساواه و حتى لو طلبوا فيبقوا كلاب و بتهوهو و ماحدش حيعبرهم ..
آدى خصائص السلوك السيكوباثى .. و آدى أسباب تكونه و ظهوره .. و آدى الشخص السيكوباثى فأجتنبوه .. و آدى البيضه و آدى اللى قشرها و آدى اللى قال هات حته حته حته ..
تقبلوا تحياتى و سامحونى على شوية التهييس فى هذا البوست الخريفى أبو صفين زراير على جنب و غالبا ده بسبب المسكنات الأمريكانى اللى خلتنى مش عارف وش الرغيف من قفاه ..

هناك 33 تعليقًا:

♥نبع الغرام♥♪≈ يقول...

نقول عليه افضل الصلاة والسلام

وناخد مكان
ونقرء ونرجع تانى

♥نبع الغرام♥♪≈ يقول...

السلوك السيكوباثى

ههههههههههههههه
الحمد لله انا مش كده
وبحمد ربنا
تصدق انى وانا برء البوست واشوف كلام حضرتك عملت مقارنه بينى وبين كلامك لقيتنى مش انا اللى بتتكلم عنه
هههههههههههههههه

الحمد لله
ويا باشا هيس براحتك ما حدش واخد منها حاجه ربنا يروق بالك يارب ويسعدك
ومتشكرين لحضرتك على الجهد الرائع
دمت بكل خير
ايناس

أمل حمدي يقول...

و آدى البيضه و آدى اللى قشرها و آدى اللى قال هات حته حته حته ..
تقبلوا تحياتى و سامحونى على شوية التهييس فى هذا البوست الخريفى أبو صفين زراير على جنب و غالبا ده بسبب المسكنات الأمريكانى اللى خلتنى مش عارف وش الرغيف من قفاه ..

ربنا يسامحك يا عمرو

أنا دخت

صبرني يارب يقول...

يا باشا تهييس مش تهييس

المهم ان حضرتك نورت البلوج يا فندم

بالذمه ده كلام

انا كده حسيت ان نص الشعب سيكوباثي

ربنا يسترررررررر

والف سلامه عليك وان شاء الله بالشفا

Remas يقول...

مساء الخير يا استاذ عمرو

اخبار حضرتك ايه ؟

لو كل التهييس كدا يبئا مرحبا بالتهييس

الصورة بتاعة البوست فعلا انسب صورة للموضوع

حضرتك كالعادة طرحت موضوع كبير ونعقد بطريقة بسيطة وتوصل لاى شخص بسهوله

وبحب جدا البوستات بتاعة حضرتك اللى بتتكلم عن الامراض النفسية

الازهرى يقول...

ياااااااااااااا رب
أول

الازهرى يقول...

تعرف
لولا موضوع التدخين والمخدرات والجنس وقسوة الابوين
يبقى انت بتوصفنى تمااااااااااااااااام

الشخصيه السايكوباثيه شخصية بدأت فى الظهور والزياده فى المجتمع نتيجة الضغط والقهر الواقع على أفراده مما أثر تأثيرا سيئا على كل فئاته وأثر بالتالى الأطفال من تعاملهم مع آباء وأساتذه لا يطبقون مايعلمونهم إياه وتسبب ذلك فى الإنهيار لداخلى لهمم وظهور كل الأمور السلبيه التى نراها والتى تتفاوت من الأضرار الصغيره إلى أن يظهر القاتل والنصاب وغيرهم

تهييس جميل والله ونفسى فى شويتين منه انا كمان بس تعمل ايه بقى
ادع لى

حاسوباتيه يقول...

والله حضرتك بتوصف بالظبط كل المجرمين الي بيعملوا جرائم بشعه الي طالعه جديد بالزات انهم فعلا مابيحسوش بالندم نهائي وحاسه انه بيفتخر فعلا بيها وبيطلع بقى على التلفزيون وبقى نجم ومشهور وللاسف النوع ده بقى موجود كتير جدا ربنا يهدي الناس

كلمات من نور يقول...

فعلا يا أستاذ عمرو إنت شرحت شرح واف وكاف وخاصة معاملة الأباء للأبناء و ارغامهم عالطاعة العمياء حلو السجع داه

بس برضه من الشخصيات السيكوباتيه اللي ظهرت في مصرنا المحروسة الطفل اللي اتربى وهو ابن شغالة وبواب وطباخه ووو أطفال بيشوفوا حواليهم ويتعقدوا ويا عيني لو الأم أخدت واحد من عيالها بيت بتشتغل فيه وفضلت حابساه في المطبخ جنبها والأولاد بره شغالين جيم بوي و بلاي ستيشن و دي في دي وعايشيين

صدقني قلبي بينفطر عليهم علشان بيقارنوا ويلاقوا إن المجتمع ظلمهم ونسبة كبيرة منهم مش بترضى و بتتمرد وربي يكفيينا شر هذا التمرد علشان والله غالبا مش بيكون بإيدينا إن المجتمع فيه طبقات بين كل طبقة وطبقة سبع طبقات

ولولا جدية كلامي كنت قلت سبع طبقات و استك علشان يلسعنا

SHAPE YOUR LIFE (ABOALI) يقول...

يااااااااااااااااسلام على السيكوباتيه دى

ودى بقى بتتباع فين يا شقيقى علشان اضرب نفسين كده على الماشى

احسن الواد جميز قال ليا انك لازم تكونى سيكوباتى متعفن اوماااااااااال

اصلى شعار السيكوباتية

حكم الشعب بالطابور وهو لابس طرطور



اسعدنى الكلام والمرور وعجبى

طهر فؤادك يقول...

السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشارك معانا فى حملة نصرة الاقصى والموضوع بسيط جدا وياريت تشوف موضوعى على مدونتى وتقولى رأيك ..رأيك يهمنى اكيدددد ..

dr.lecter يقول...

يعني ياعمنا مش لاقي غير صوره دكتور ليكتر؟ كده تفضحني علنا وتقول عليا سيكوباتي ؟ زعلان اووي هههههه

Israa El-sakka يقول...

سلام عليكم
اولا انا احب اشكر حضرتك على الإضافة الهايلة دي لكن بخضوض الشخصية السيكوباتية انا على خد ما اعلم في مدارس نفسية بتفرض التسمية دي او التوصيف ده و يتفول ان ده هروب من التفسير الحقيقي للحالة دي فياريت حضرتك تفهمني الجزئية دي تخديدا
و اتمنى دوام التواصل

غير معرف يقول...

لو المسكنات الامريكاني هتخلينا نفهم علم نفس كده اجري اشتريها على طول :)

الف سلامه لحضرتك

والاحظ اهتمام علم نفساوي في الفترات الاخيره .... فلعل الاسباب خيرا :)

تحياتي

رحلتنا في الحياة يقول...

جميل البوست ده ولو طبقنا فعلا الكلام ده هنلاقى اغلب الناس بقيت سيكوباتية
بس الحمد لله مش فيا اغلب الصفات دى

مستكه يقول...

ماشاء الله حضرتك عرضت الموضوع بشكل بسيط وميسر بحيث اي حد يفهمه

جميل جدا علم النفس والابحار فيه شيق فعلا

اول مره اعرف صفات السيكوباتي بالتفصيل بس مش قادرة اتخيل الشخصية

ياريت لو حضرتك تعرف شخصية شهيرة سواء تاريخية او اتمثلت في اي عمل فني تقولي عليها

عشان انا مش قادرة اتخيل حد سيكوباتي يمكن اللي جاي علي بالي بس هو هتلر

بس ده لما حس ان مجده خلاص انتحر عشان ميتذلش

مش عارفه الصراحة !!


شكرا لحضرتك عالبوست المفيد جدا

mahasen saber يقول...

دى من اكتر الصور المرعبه اليى شفتها فى حياتى يمكن لانى اعرف اليى وراها واليى ورا النظره دى
يعنى صمت الحملان واكل البشر
انتونى هوبكنز اكتر من رائع عشان كدا خلانى اخاف واكش من الصوره دى

لو قيسنا بئا اليى قريناه ده فى البوست من تحليل لاصحاب الشخصيه الفريده دى
فاعتقد ان اغلبنا هيبقا كدا زى ما حضرتك قلت
بس معتقدتش ان قسوة التربيه بتكون دافع لنشئة الشخصيه دى جوه الانسان اعتقد ان الدلع المفرط وتميز الولد عن البنت ممكن يخلق بسهوله شخصيه من النوع ده

ربنا يعافى اولادنا ويعافينا جميعا ويبعدنا عن كل ما هو مسيكب نفسيا

dalia يقول...

حقيقي استمتعت بالبوست والبرغي كمان بس حسيت في الاخر ان الشخصية ديه ممكن تكون حوالينا طول الوقت ممكن نلاقيه في اصحابنا واخواتنا ومش بعيد نلاقيها في بعض المدونيين كمان اعتقد ان مفيش شخص بكل هذه الوحاشه اكيد في جانب ايجابي انت متكلمتش عنه وبعدين اهم حاجه انك مذكرتش الحل والعلاج لهذه النوع من الشخصيات يعني علماء علم النفس ملقوش حل ولا انت اللى كسلت تقول الحل؟

MaNoOoSh يقول...

افتقدت مواضيعك المميزة جدا يا استاذ عمرو

بسنت صلاح الدين يقول...

اٍنسان وصولى متطفل يسعى للتقرب من أصحاب السلطه و يتمسح بهم
تقريبا معظم الشعب كده هههههه، انا بحييك على الموضوع الهادف و لا يهمك من الطول الكلام على قلبنا زى العسل و يارب منكونش سيكوباتيين
دمت بكل خير

خمسة فضفضة يقول...

السلام عليكم ورحمكة الله وبركاته

ازيك يا استاذ عمرو

علي كده بقي كل الشعب سيكوباثي

وعلي فكره عندك حق في موضوع سن 13 سنه ده
انت فكرتني بمشهد في فيلم حين ميسره لما واد صغير ماسك فايده اله حاده وعمال يجرح في العربيات من غير سبب ولا منفعه هاتعود عليه الا انه يسبب اذي للناس وخلاص

وفعلا لو تلاحظ ان الاطفال اليومين دول بقوا شرسين جدا وبقت منهم نسبه كبيره جدا بتحب تأذي من غير سبب تلاقيهم مثلا جارين كلب من رقبته ولا ماسكين قطه ونازلين فيها ضرب ولا بيزقلوا العربيات بالطوب ، وتحس ان اهلهم بينزلوهم الشارع عشان يتخلصوا منهم ويريحوا دماغهم شوية

ربنا يرحمنا من اللي كان السبب في سيكوباثية المجتمع


سلام

فشكووول يقول...

السلام عليكم عمرو بك

يا نهار مطين بطين

يعنى هو انا سيكوباتى على كدا بقى

عموما بلاش الواحد يزعل على نفسه عشان المجتمع كله بقى سيكوباتى اليومين دول والبركه فى حبة العسكر اللى ماسكينا من سنة 52

top-fn يقول...

توبك ولا اروع من كده يا استاذ عمرو

وطرح مميز جداا

لكن لو دي الظروف اللى بينشأ فيها السيكوباثي

فاممكن الشعب المصري يبقي سيكوباثي في يوم من الايااامـ

ربنا يستر عليه^-^

في انتظار جديدكـ

خالص تحياتي,,

Unknown يقول...

كفانا الله وإياكم
شر هؤلاء وهؤلاء
وهــــــــؤلاء.

Unknown يقول...

كانت عندنا مدرسة
فى سنة رابعة أبتدائى
لم يرزقها الله الولد
فطلعت عقدتها هذه
علينا حتى صار
(غلق)باب
حجرة
الفصل معناه وصلة
من العذاب وحتى صارت
عندى عقدة او قل عدم تفضيل
وكراهية شديدة جدا لغلق باب
حجرتى الا للضرورة :(

Unknown يقول...

إنما حضرتك فين؟
طولت الغيبة
هذه المرة!

اقصوصه يقول...

اول مره اسمع بهالسلوك :)

فارس عبدالفتاح يقول...

اعتقد أني إنسان سيكوباتي من الطراز الأول بس مش كل الصفات اللى حضرتك بتقول عليها موجودة فيا المراهقة العاطفي – الأصولية التطفلية – عدم اللامبالاة بالقيم الأخلاقية – الكذب – والاهتمام بالأمور الجنسية .

اعتقد أن هذه الصفات ليست في وأني اعتقد أني إنسان سيكوباتي من الطراز الأول – بس أنا مجبر أن أكون بهذا الشكل لأنه هذا هو المنطق المفهوم والعملة المتداولة واللغة الدارجة في هذا الزمن

وعلى فكرة أني انتهج هذا الأسلوب بأعلى درجات الوعي والإدراك بحيث أطوع هذا المنهج لصالحي بكل براعة

ولكن لدي خطين أحمرين لا استطيع أن أتعداهم وهم .. الشرف والكرامة .. هذين الأمرين هما هما أساس وعماد تفكيري وتقيمي لكل الأفعال الإنسانية جمعاء


وأول ما أقوم به أقيم أفعالي أولا ثم أفعال الآخرين وعلي ردات الأفعال بالنظر لردات الأفعال الصادرة من الأشخاص ومرجعيتهم الطبقية والدينية والفكرية

بمعنى أني سيكوباتي مثقف .. ولا استخدم السيكوباتية إلا مع الأشخاص السيكوباتيون وهم قاعدة كبيرة في جميع الشعوب سواء العربية او غيرها

م/ الحسيني لزومي يقول...

انا سيكوباتي اذا انا موجود

elsha3er يقول...

السلام عليكم

والله انا مش عارف اقول اية بس فى اعتقادى انها مازال سلوك فردى ما اعتقدش انه بقى اسلوب مجتمع

تحياتى

احمد الشاعر

Unknown يقول...

فعلا فعلا
تفتكر الشخصية دي بتنتج عن القهر المجتمعي ؟؟
و لا ايه بالظبط ؟؟
يعني انا لاحظت ان الشخصية السيكوباثية منتشرة بشكل كبير ..
يعني فعلا .. شخصية موجودة ..
طول الوقت و في كل مكان ..
ايه هي انسب طريقة للتعامل مع الشخص السيكوباتي ؟؟

glory يقول...

مقالات دايما رائعه والله تسلم ايديك

إيمان هلال يقول...

سيكوباتى انا سمعة الكلمه دى قبل كده فين ؟؟؟؟
..................
http://kot-cha.blogspot.com/